ᱢᱟ ᱱᱤᱛ ᱞᱟᱹᱭ ᱢᱮ

ᱥᱟᱢᱟᱝ ᱩᱛᱟᱹᱨ ᱨᱮ ᱟᱪᱟᱠ ᱯᱩᱥᱤ ᱧᱮᱞ ᱛᱮ
ᱫᱟᱹᱲ ᱠᱮᱫᱼᱟᱭ ᱜᱩᱰᱩ ᱟᱡᱟᱜ ᱡᱤᱣᱤ ᱡᱟᱞᱟ,
ᱯᱩᱥᱤᱭ ᱠᱩᱫᱟᱹᱣ ᱠᱮᱫᱮ ᱩᱱᱤ ᱪᱟᱨᱟ ᱧᱮᱞ ᱛᱮ
ᱧᱤᱨ ᱵᱟᱜᱟᱣ ᱮᱱᱟᱭ ᱜᱩᱰᱩ ᱜᱟᱡᱟᱲ ᱛᱟᱞᱟ᱾

ᱫᱟᱱᱟᱝ ᱨᱮᱭᱟᱜ ᱠᱩᱧ, ᱵᱟᱭ ᱧᱮᱞ ᱞᱮᱫ
ᱠᱷᱟᱸᱡᱚ ᱮᱱᱟᱭ ᱜᱩᱰᱩ ᱟᱪᱟᱠ ᱚᱱᱟ ᱨᱮ
ᱥᱟᱦᱮᱫ ᱠᱮᱫᱼᱟᱭ ᱩᱱᱤ ᱞᱮᱸᱜᱮᱫ ᱞᱮᱸᱜᱮᱫ
ᱡᱚᱵᱮ ᱮᱱᱟᱭ ᱡᱚᱠᱷᱚᱱ ᱚᱱᱟ ᱫᱟᱜ ᱨᱮ᱾

ᱯᱩᱥᱤᱭ ᱩᱭᱦᱟᱹᱨᱮᱫᱼᱟ, ᱟᱸᱫᱟ ᱢᱟᱫᱟ
ᱱᱤᱛ ᱫᱚ ᱜᱩᱰᱩ ᱪᱮᱠᱟ ᱛᱮᱧ ᱡᱚᱢᱮᱭᱟ?
ᱞᱟᱜᱟᱣ ᱮᱱᱟᱭ ᱟᱡᱟᱜ ᱵᱩᱫᱷᱤ ᱪᱷᱟᱸᱫᱟ
ᱪᱮᱠᱟ ᱠᱟᱛᱮ ᱱᱤᱛ ᱩᱱᱤᱧ ᱨᱟᱠᱟᱵ ᱮᱭᱟ?

ᱪᱟᱞᱟᱣ ᱜᱚᱫ ᱮᱱᱟᱭ ᱯᱩᱥᱤ ᱜᱟᱭᱟᱝ ᱜᱩᱭᱩᱝ
ᱟᱹᱜᱩ ᱠᱮᱫᱟᱭ ᱵᱟᱵᱮᱨ ᱟᱹᱰᱤ ᱴᱟᱭᱟᱞ ᱴᱩᱭᱩᱞ
ᱢᱤᱫ ᱢᱩᱪᱟᱹᱫ ᱟᱸᱲᱜᱚ ᱠᱟᱛᱮ ᱠᱩᱧ ᱨᱮᱭ ᱩᱭᱩᱝ
ᱟᱠᱟ ᱫᱮᱡᱚᱜ ᱠᱟᱱᱟᱭ ᱜᱩᱰᱩ ᱨᱟᱭᱟᱞ ᱨᱩᱭᱩᱞ

ᱛᱟᱞᱟ ᱠᱩᱧ ᱨᱮ ᱜᱩᱰᱩ ᱟᱛᱨᱟ ᱨᱟᱠᱟᱵ ᱮᱱᱟᱭ
ᱪᱚᱴ ᱨᱮᱭ ᱧᱮᱞ ᱮ ᱯᱩᱥᱤ ᱢᱮᱱᱟᱭ ᱜᱮᱭᱟ ᱠᱚᱭᱚᱜ
ᱢᱟ ᱱᱤᱛ ᱞᱟᱹᱭ ᱢᱮ, ᱩᱱᱤ ᱜᱩᱰᱩ ᱪᱮᱫ ᱮ ᱪᱮᱠᱟᱭ
ᱪᱚᱴ ᱛᱮᱭ ᱨᱟᱠᱟᱵᱼᱟ, ᱥᱮ ᱫᱟᱜ ᱨᱮᱭ ᱠᱷᱟᱸᱡᱚᱜ

ᱪᱚᱴ ᱛᱮᱭ ᱨᱟᱠᱟᱵ ᱛᱮᱢᱟ ᱮᱠᱟᱞ ᱯᱩᱥᱤᱼᱭᱟᱜ ᱪᱟᱨᱟ
ᱵᱟᱵᱮᱨ ᱮ ᱟᱲᱟᱜᱽ ᱛᱮᱢᱟ ᱟᱨᱦᱚᱸ ᱫᱟᱜ ᱨᱮᱭ ᱠᱷᱟᱸᱡᱚᱜ
ᱢᱟ ᱞᱟᱹᱭ ᱢᱮ ᱞᱚᱜᱚᱱ ᱱᱤᱛᱳᱜ ᱜᱩᱰᱩ ᱪᱮᱫ ᱮ ᱪᱮᱠᱟᱭ?
ᱪᱚᱴ ᱨᱮ ᱢᱮᱱᱟᱭ ᱜᱮᱭᱟ ᱯᱩᱥᱤ, ᱟᱡ ᱴᱷᱮᱱ ᱠᱚᱭᱚᱜ!

Written by ᱡᱚᱜᱚᱫᱤᱥ ᱪᱚᱱᱫᱨᱚ ᱢᱩᱨᱢᱩ
Published on Arsi (ᱢᱟᱜᱽ – ᱪᱟᱹᱛ, 2013)