ᱪᱷᱩᱛ ᱟᱨ ᱪᱷᱟᱹᱴᱭᱟᱹᱨ

ᱜᱤᱫᱽᱨᱟᱹ ᱠᱚ ᱡᱟᱱᱟᱢ ᱞᱮᱱ ᱠᱷᱟᱱ ᱟᱹᱛᱩ ᱥᱮ ᱜᱚᱨᱟᱢ ᱪᱷᱩᱶᱟᱹᱛᱚᱜᱼᱟ᱾ ᱚᱠᱟ ᱴᱟᱜ ᱚᱲᱟᱜ ᱨᱮ ᱜᱤᱫᱽᱨᱟᱹᱭ ᱡᱟᱱᱟᱢ ᱟᱠᱟᱱᱟ ᱚᱱᱟ ᱚᱲᱟᱜ ᱢᱟ ᱪᱷᱩᱶᱟᱹᱛᱚᱜ ᱜᱮ ᱥᱟᱶᱛᱮ ᱟᱹᱛᱩ ᱜᱚᱨᱟᱢ ᱦᱚᱸ ᱪᱷᱩᱶᱟᱹᱛᱚᱜᱼᱟ᱾ ᱟᱹᱛᱩ ᱥᱮ ᱜᱚᱨᱟᱢ ᱪᱷᱩᱶᱟᱹᱛ ᱞᱮᱱᱠᱷᱟᱱ ᱥᱮ ᱚᱠᱟᱴᱟᱜ ᱚᱲᱟᱜ ᱨᱮ ᱜᱤᱫᱽᱨᱟᱹᱭ ᱡᱟᱱᱟᱢ ᱟᱠᱟᱱᱟ ᱚᱱᱟ ᱚᱲᱟᱜ ᱨᱮ ᱪᱷᱩᱸᱛ ᱟᱹᱣᱨᱤ ᱯᱷᱮᱲᱟᱣᱜ ᱨᱮ ᱵᱚᱸᱜᱟ ᱵᱩᱨᱩ ᱫᱮᱵᱟ ᱥᱮᱵᱟ ᱞᱮᱠᱟᱱ ᱦᱚᱲ ᱱᱟᱭᱠᱮ, ᱚᱡᱷᱟ ᱵᱟᱵᱟ, ᱡᱟᱱ ᱵᱟᱵᱟ, ᱨᱩᱢᱩᱜ ᱦᱚᱲ ᱫᱚ ᱵᱟᱝ ᱠᱚ ᱦᱤᱡᱩᱜ ᱥᱮᱱᱚᱜᱼᱟ᱾ ᱟᱨ ᱜᱚᱨᱟᱢ ᱨᱮᱱᱟᱝ ᱵᱳᱸᱜᱟ ᱵᱩᱨᱩ ᱦᱚᱸ ᱵᱟᱝ ᱠᱚ ᱵᱚᱸᱜᱟ ᱵᱩᱨᱩᱭᱟ᱾

ᱚᱠᱟ ᱚᱲᱟᱜ ᱨᱮ ᱜᱤᱫᱽᱨᱟᱹᱭ ᱡᱟᱱᱟᱢ ᱟᱠᱟᱱ ᱚᱱᱟ ᱚᱲᱟᱜ ᱨᱤᱱᱤᱡ ᱟᱥᱟᱢᱤ ᱢᱟᱺᱡᱷᱤ ᱚᱲᱟᱜ ᱥᱮᱱ ᱠᱟᱛᱮᱭ ᱞᱟᱹᱭ ᱟᱭᱟ ᱵᱶᱟᱝᱢᱟ ᱤᱧᱟᱜ ᱚᱲᱟᱜ ᱨᱮ ᱪᱷᱩᱛ ᱦᱩᱭ ᱟᱠᱟᱱᱟ᱾ ᱠᱷᱟᱱ ᱢᱟᱹᱡᱷᱤ ᱫᱚ ᱜᱚᱰᱮᱛ ᱱᱟᱦᱟᱜ ᱫᱚ ᱡᱚᱜᱽ ᱢᱟᱹᱡᱷᱤ ᱪᱷᱩᱛ ᱟᱠᱟᱱ ᱚᱲᱟᱜ ᱨᱮ ᱡᱟᱹᱣᱨᱟᱜ ᱮ ᱦᱚᱦᱚ ᱚᱪᱚ ᱠᱤᱱᱟ᱾ ᱡᱟᱣᱨᱟ ᱮᱱᱟ ᱠᱚ ᱢᱤᱫ ᱦᱟᱲᱟᱢ ᱢᱤᱫ ᱵᱩᱲᱦᱤ ᱟᱨ ᱢᱚᱬᱮ ᱜᱟᱶᱞᱟ ᱠᱚ᱾ ᱟᱫᱚ ᱢᱤᱫ ᱜᱚᱴᱟᱝ ᱱᱟᱶ ᱠᱚ ᱥᱟᱵᱮᱭᱟ ᱩᱱᱤ ᱫᱚ ᱢᱟᱬᱟᱝ ᱛᱮ ᱢᱚᱬᱮ ᱠᱚ ᱢᱟᱺᱡᱷᱤ ᱱᱟᱭᱠᱮ, ᱡᱚᱜᱽᱢᱟᱹᱡᱷᱤ, ᱯᱟᱨᱟᱹᱱᱤᱠ ᱟᱨ ᱜᱚᱰᱮᱛ ᱠᱚ ᱦᱚᱭᱚ ᱠᱚᱣᱟ ᱚᱱᱟ ᱛᱟᱭᱚᱢ ᱰᱚ ᱜᱟᱶᱞᱟ ᱠᱚ ᱟᱨ ᱢᱩᱪᱟᱹᱫ ᱨᱮᱫᱚ ᱜᱤᱫᱽᱰᱨᱟᱹ ᱟᱯᱟᱛ ᱟᱥᱟᱢᱤ ᱠᱚ ᱠᱚ ᱦᱚᱭᱚ ᱠᱚᱣᱟ᱾

ᱟᱫᱚ ᱫᱷᱟᱺᱭ ᱵᱩᱰᱷᱤ ᱦᱚᱭᱚ ᱮ ᱞᱟᱹᱜᱤᱫ ᱜᱤᱫᱽᱰᱨᱟᱹᱭ ᱦᱚᱵᱚᱨ ᱚᱰᱚᱠ ᱮᱭᱟ ᱫᱩᱣᱟᱹᱨ ᱨᱮ ᱵᱟᱨᱭᱟ ᱵᱷᱟᱶᱛᱤᱡ ᱯᱷᱩᱲᱩᱜ ᱟᱱᱛᱮ, ᱢᱤᱫ ᱯᱷᱩᱲᱩᱜ ᱨᱮᱫᱚ ᱫᱟᱜ ᱟᱨ ᱢᱤᱫ ᱯᱷᱩᱲᱩᱜ ᱨᱮᱫᱚ ᱥᱚᱥᱚ ᱨᱚᱞ ᱟᱨ ᱵᱟᱪᱠᱚᱢ ᱠᱚ ᱫᱚᱦᱚ ᱠᱟᱜᱼᱟ ᱚᱱᱟ ᱯᱷᱩᱲᱩᱜ ᱨᱮᱫᱚ ᱜᱤᱫᱽᱨᱟᱹ ᱦᱚᱯᱚᱱᱟᱜ ᱦᱚᱭᱚ ᱩᱵ ᱠᱚ ᱫᱚᱦᱚᱭᱟ᱾ ᱚᱠᱟ ᱴᱟᱜ ᱥᱟᱨ ᱛᱮ ᱜᱤᱫᱽᱨᱟᱹ ᱱᱟᱲ ᱥᱮ ᱵᱩᱠᱟᱹᱭ ᱜᱮᱫ ᱞᱮᱫᱮᱭᱟ ᱚᱱᱟ ᱥᱟᱨ ᱨᱮ ᱯᱮ ᱯᱮ ᱠᱷᱤᱭᱟᱹ ᱵᱟᱨ ᱜᱚᱴᱟᱝ ᱥᱩᱛᱟᱹᱢ ᱮ ᱛᱚᱞᱟ᱾ ᱜᱤᱫᱽᱨᱟᱹ ᱨᱤᱱ ᱟᱯᱟᱛ ᱦᱚᱸ ᱥᱟᱡᱟᱣ ᱟᱠᱟᱱ ᱵᱷᱟᱶᱛᱤᱡ ᱯᱷᱩᱲᱩᱜ ᱨᱮ ᱥᱩᱱᱩᱢ ᱥᱮᱯᱮᱧ ᱠᱟᱛᱮ ᱟᱹᱛᱩᱨᱤᱱ ᱥᱟᱱᱟᱢ ᱦᱮᱨᱮᱞ ᱦᱚᱯᱚᱱ ᱩᱢᱩᱜ ᱜᱷᱟᱴ ᱛᱮᱭ ᱨᱤᱭᱟᱹᱣ ᱤᱫᱤ ᱠᱚᱣᱟ᱾ ᱫᱷᱟᱺᱭ ᱵᱩᱰᱷᱤ ᱦᱚᱸ ᱚᱱᱠᱟ ᱜᱮ ᱵᱷᱟᱶᱛᱤᱡ ᱯᱷᱩᱲᱩᱜ ᱨᱮ ᱥᱩᱱᱩᱢ ᱥᱟᱥᱟᱝ ᱟᱨ ᱥᱩᱛᱟᱹᱢ ᱛᱮ ᱛᱚᱞ ᱟᱠᱟᱱ ᱥᱟᱨ ᱟᱱᱛᱮ ᱟᱹᱛᱩ ᱨᱤᱱ ᱥᱟᱱᱟᱢ ᱛᱤᱨᱞᱟᱹ ᱦᱚᱯᱚᱱ ᱠᱚᱭ ᱟᱹᱭᱩᱨ ᱤᱫᱤ ᱠᱚᱣᱟ ᱩᱢᱩᱜ ᱜᱷᱟᱴ ᱛᱮ᱾ ᱫᱷᱟᱺᱭ ᱵᱩᱰᱷᱤ ᱫᱚ ᱫᱟᱜ ᱜᱷᱟᱴ ᱨᱮ ᱢᱤᱫᱴᱤᱡ ᱥᱩᱛᱟᱹᱢ ᱜᱤᱫᱽᱨᱟᱹ ᱦᱟᱜ ᱩᱵ ᱥᱟᱶᱛᱮᱭ ᱟᱹᱛᱩ ᱜᱤᱰᱤ ᱠᱟᱜᱼᱟ᱾ ᱟᱫᱚ ᱜᱷᱟᱴ ᱨᱮ ᱚᱱᱟ ᱨᱚᱞ ᱨᱮ ᱯᱮ ᱴᱤᱰᱟᱹᱜ ᱮ ᱥᱤᱸᱫᱩᱨᱟᱜᱼᱟ, ᱚᱱᱟ ᱫᱚ ᱜᱷᱟᱴ ᱠᱤᱨᱤᱧ ᱠᱚ ᱢᱮᱛᱟᱜᱼᱟ᱾ ᱩᱢ ᱵᱟᱲᱟ ᱮᱱᱟ ᱠᱚ ᱫᱷᱟᱺᱭ ᱵᱩᱰᱦᱤ ᱫᱚ ᱚᱱᱟ ᱫᱚᱥᱟᱨ ᱥᱩᱛᱟᱹᱢ ᱟᱨ ᱥᱟᱨ ᱫᱚ ᱟᱹᱨᱩᱵ ᱵᱟᱲᱟ ᱠᱟᱛᱮ ᱚᱲᱟᱜ ᱛᱮᱭ ᱟᱹᱜᱩᱭᱟ᱾ ᱥᱩᱛᱟᱹᱢ ᱫᱚ ᱥᱟᱥᱟᱝ ᱨᱮ ᱛᱩᱯᱩ ᱠᱟᱛᱮ ᱜᱤᱫᱟᱹᱨ ᱦᱚᱯᱚᱱ ᱮ ᱵᱚᱨᱟ ᱮᱭᱟ ᱰᱟᱸᱰᱟ ᱨᱮ᱾ ᱮᱱ ᱠᱟᱛᱮ ᱜᱤᱫᱽᱨᱟᱹ ᱨᱮᱱ ᱮᱸᱜᱟᱛ ᱥᱟᱛᱮ ᱞᱟᱛᱟᱨ ᱨᱮ ᱫᱩᱲᱩᱵ ᱠᱟᱛᱮ ᱜᱤᱫᱽᱨᱟᱹᱭ ᱦᱚᱵᱚᱨᱮᱭᱟ ᱟᱛᱱᱟᱜ ᱥᱟᱠᱟᱢ ᱨᱮ᱾ ᱮᱱ ᱠᱟᱛᱮ ᱫᱷᱟᱺᱭ ᱵᱩᱰᱷᱤ ᱫᱚ (ᱥᱟᱛᱮ ᱨᱮ) ᱜᱩᱨᱤᱡ ᱮ ᱥᱤᱯᱤᱭᱟ ᱫᱟᱜ ᱛᱮ ᱟᱨ ᱮᱸᱜᱟᱛ ᱛᱮᱫ ᱜᱩᱨᱤᱡ ᱫᱟᱜ ᱮ ᱡᱚᱨᱚ ᱟᱭᱟ᱾ ᱮᱸᱜᱟᱛ ᱛᱮᱫ ᱦᱚᱱ ᱞᱮᱸᱜᱟ ᱛᱤᱛᱮ ᱟᱛᱟᱝ ᱠᱟᱛᱮ ᱵᱚᱦᱚᱜ ᱨᱮᱭ ᱡᱚᱫ ᱡᱚᱝ ᱟ ᱟᱨ ᱠᱟᱹᱴᱤᱡ ᱛᱟᱞᱟᱝ ᱫᱚᱭ ᱥᱤᱲᱩᱵᱟ᱾ ᱤᱱᱟᱹ ᱠᱚ ᱠᱟᱹᱢᱤ ᱵᱟᱲᱟ ᱠᱟᱛᱮ ᱮᱸᱜᱟᱛ ᱛᱮᱫ ᱜᱤᱫᱽᱨᱹᱟ ᱦᱚᱵᱚᱨ ᱠᱟᱛᱮ ᱚᱲᱟᱜ ᱛᱮᱭ ᱵᱚᱞᱚᱱᱟ᱾ ᱫᱷᱟᱺᱭ ᱵᱩᱰᱷᱤ ᱫᱚ ᱯᱮᱭᱟ ᱯᱷᱩᱲᱩᱜ ᱨᱮ ᱦᱚᱞᱚᱝ ᱮ ᱞᱮᱣᱦᱟ ᱭᱟ ᱟᱨ ᱢᱤᱫ ᱯᱷᱩᱲᱩᱜ ᱦᱚᱞᱚᱝ ᱫᱟᱜ ᱫᱚ ᱜᱤᱫᱽᱨᱟᱹᱭ ᱜᱤᱛᱤᱡ ᱟᱠᱟᱱ ᱯᱟᱨᱠᱚᱢ ᱨᱮᱭᱟᱜ ᱯᱩᱱᱚᱱ ᱠᱚᱴᱷᱮ ᱨᱮᱭ ᱤᱨᱪᱤᱭᱟᱜ ᱛᱮᱭ ᱜᱤᱰᱤ ᱠᱟᱜᱼᱟ᱾ ᱫᱚᱥᱟᱨ ᱯᱷᱩᱨᱩᱲᱜ ᱦᱚᱞᱚᱝ ᱫᱟᱜ ᱫᱚ ᱟᱹᱛᱩ ᱨᱤᱱ ᱢᱚᱬᱮ ᱠᱚ ᱢᱟᱺᱡᱷᱤ, ᱯᱟᱨᱟᱱᱤᱠ, ᱡᱚᱜᱽ ᱢᱟᱹᱡᱷᱤ ᱱᱟᱭᱠᱮ ᱟᱨ ᱜᱚᱰᱮᱛ ᱮ ᱤᱨᱪᱤ ᱟᱠᱚᱣᱟ ᱠᱚᱲᱟᱢ ᱨᱮ ᱟᱨ ᱚᱱᱟ ᱤᱨᱪᱤ ᱥᱟᱨᱮᱡ ᱦᱚᱞᱚᱝ ᱫᱟᱜ ᱜᱮ ᱟᱹᱛᱩ ᱨᱤᱱ ᱜᱟᱶᱞᱟ ᱦᱮᱨᱮᱞ ᱦᱚᱯᱚᱱ ᱤᱨᱪᱤ ᱟᱠᱚᱣᱟ᱾ ᱟᱨ ᱛᱮᱥᱟᱨᱟᱜ ᱯᱷᱩᱲᱩᱜ ᱨᱮᱱᱟᱝ ᱦᱚᱞᱚᱝ ᱫᱚ ᱛᱤᱨᱞᱟᱹ ᱦᱚᱯᱚᱱ ᱢᱟᱺᱡᱦᱤ ᱮᱨᱟ, ᱯᱟᱹᱨᱟᱹᱱᱤᱠ ᱮᱨᱟ, ᱡᱚᱜᱽ ᱢᱟᱹᱡᱷᱤ ᱮᱨᱟ, ᱱᱟᱭᱠᱮ ᱮᱨᱟ ᱟᱨ ᱜᱚᱰᱮᱛ ᱮᱨᱟ ᱤᱨᱪᱤ ᱟᱠᱚ ᱛᱮᱭ ᱥᱟᱨᱮᱡᱟᱜ ᱫᱚ ᱟᱹᱛᱩ ᱨᱤᱱ ᱥᱟᱱᱟᱢ ᱛᱤᱨᱞᱟᱹ ᱦᱚᱯᱚᱱ ᱠᱚᱭ ᱤᱨᱪᱤ ᱟᱠᱚᱣᱟ ᱠᱚᱲᱟᱢ ᱨᱮ᱾

ᱤᱱᱟᱹ ᱠᱟᱹᱢᱤ ᱠᱚ ᱦᱩᱭ ᱵᱟᱲᱟ ᱮᱱᱠᱷᱟᱱ ᱮᱱᱠᱟᱛᱮ ᱫᱚ ᱱᱤᱢ ᱫᱟᱜ ᱢᱟᱺᱰᱤ ᱠᱚ ᱚᱰᱚᱠᱟ ᱟᱨ ᱠᱚᱲᱟ ᱯᱟᱦᱴᱟ ᱢᱟᱺᱡᱷᱤ ᱠᱷᱚᱱ ᱮᱦᱚᱵ ᱠᱟᱛᱮ ᱥᱟᱱᱟᱢ ᱦᱮᱨᱮᱞ ᱦᱚᱯᱚᱱ ᱠᱚ ᱮᱢᱟ ᱠᱚᱣ᱾ ᱤᱱᱠᱩ ᱮᱢ ᱠᱟᱛᱮ ᱛᱤᱨᱞᱟᱹ ᱦᱚᱯᱚᱱ ᱯᱟᱦᱴᱟ ᱦᱚᱸ ᱚᱱᱠᱟ ᱜᱮ ᱢᱟᱺᱡᱷᱤ ᱮᱨᱟ ᱠᱷᱚᱱ ᱮᱦᱚᱵ ᱠᱟᱛᱮ ᱥᱟᱱᱟᱢ ᱛᱤᱨᱞᱟᱹ ᱦᱚᱯᱚᱱ ᱠᱚ ᱮᱢᱟ ᱠᱚᱣᱟ᱾ ᱟᱫᱚ ᱪᱷᱩᱛ ᱥᱮ ᱪᱷᱩᱸᱣᱟᱹᱛ ᱯᱷᱮᱲᱟᱣ ᱠᱟᱹᱢᱤ ᱦᱚᱨᱟ ᱫᱚ ᱢᱩᱪᱟᱹᱫ ᱮᱱᱟ᱾

ᱪᱷᱩᱛ ᱯᱷᱮᱲᱟᱣ ᱛᱟᱭᱚᱢ ᱡᱟᱣ ᱫᱚ ᱠᱚᱲᱟ ᱜᱤᱫᱽᱨᱟᱹ ᱠᱷᱟᱱ ᱢᱚᱬᱮ ᱢᱟᱦᱟᱸ ᱨᱮᱠᱚ ᱦᱚᱭᱚ ᱨᱩᱣᱟᱹᱲ ᱮᱫ ᱠᱚ ᱛᱟᱸᱦᱮ ᱠᱟᱱᱟ ᱟᱨ ᱠᱩᱲᱤ ᱜᱤᱫᱽᱨᱟᱹ ᱠᱷᱟᱱ ᱯᱮ ᱢᱟᱦᱟ ᱨᱮ᱾ ᱱᱟᱦᱟᱜ ᱫᱚ ᱠᱚᱲᱟ ᱛᱟᱭ ᱠᱩᱲᱤ ᱛᱟᱭ ᱟᱨᱮ ᱢᱟᱦᱟᱸ ᱨᱮᱜᱮ ᱩᱢ ᱨᱩᱣᱟᱹᱲ ᱥᱮᱠᱚ ᱦᱚᱭᱚ ᱨᱩᱣᱟᱹᱲ ᱮᱫ ᱠᱚᱣᱟ᱾ ᱟᱫᱷᱟᱱ ᱟᱫᱷᱟᱱ ᱦᱚᱲ ᱫᱚ ᱩᱱ ᱨᱮᱜᱮ ᱯᱮᱲᱟ ᱯᱟᱸᱭᱲᱟᱹ ᱱᱣᱣᱛᱟ ᱵᱟᱨᱛᱮ ᱠᱟᱛᱮ ᱠᱚ ᱪᱷᱟᱹᱴᱭᱟᱹᱨ ᱛᱚᱨᱟ ᱮᱫ ᱠᱚᱟ᱾ ᱥᱮᱨᱣᱟ ᱞᱮᱠᱟᱛᱮ ᱪᱷᱟᱹᱴᱭᱟᱹᱨ ᱫᱚ ᱢᱟᱬᱟᱝ ᱩᱛᱟᱹᱨᱤᱡ ᱠᱚᱲᱟ ᱜᱤᱫᱽᱨᱟᱹ ᱥᱮ ᱠᱩᱲᱤ ᱜᱤᱫᱽᱨᱟᱹᱭ ᱡᱟᱱᱟᱢ ᱟᱠᱟᱱ ᱠᱷᱟᱱ ᱩᱱ ᱠᱤᱱ ᱜᱤᱫᱽᱨᱟᱹ ᱫᱚ ᱠᱚᱲᱟ ᱢᱮᱱᱮᱫ ᱜᱤᱫᱽᱨᱟᱹ ᱟᱯᱟᱛ ᱨᱤᱱ ᱟᱯᱟᱛ ᱟᱨ ᱮᱸᱜᱛ ᱨᱮᱭᱟᱜ ᱧᱩᱛᱩᱢ ᱠᱚ ᱧᱩᱢ ᱠᱚᱣᱟ ᱥᱮᱠᱚ ᱪᱷᱟᱹᱴᱭᱟᱹᱨ ᱟᱠᱚᱣᱟ᱾ ᱫᱚᱥᱟᱨ ᱠᱚᱲᱟ ᱜᱤᱫᱽᱨᱟᱹ ᱥᱮ ᱠᱩᱲᱤ ᱜᱤᱫᱽᱨᱟᱹ ᱠᱚ ᱡᱟᱱᱟᱢ ᱞᱮᱱ ᱠᱷᱟᱱ ᱩᱱᱠᱤᱱ ᱫᱚ ᱜᱤᱫᱽᱨᱟᱹ ᱮᱸᱜᱟᱛ ᱨᱤᱱ ᱟᱯᱟᱛ ᱟᱨ ᱮᱸᱜᱟᱛ ᱨᱮᱭᱟᱜ ᱧᱩᱛᱩᱢ ᱠᱚ ᱧᱟᱢᱟ᱾ ᱚᱱᱟ ᱠᱟᱛᱮ ᱟᱨᱦᱚᱸ ᱦᱩᱭᱩᱜ ᱠᱚᱫᱚ ᱠᱟᱠᱟᱛᱮᱫ, ᱠᱟᱹᱠᱤᱫ ᱛᱮᱫ, ᱢᱟᱢᱚᱛ ᱛᱮᱫ, ᱢᱟᱹᱢᱤᱫ ᱛᱮᱫ, ᱦᱟᱛᱚᱢ ᱛᱮᱫ, ᱠᱩᱢᱟᱹᱝ ᱛᱮᱫ, ᱨᱮᱭᱟᱜ ᱧᱩᱛᱩᱢ ᱠᱚ ᱧᱩᱢ ᱠᱚᱣᱟ᱾ ᱢᱮᱱᱫᱚ ᱱᱟᱦᱟᱜ ᱥᱮ ᱱᱮᱛᱟᱨ ᱫᱚ ᱜᱤᱫᱽᱨᱟᱹ ᱨᱤᱱ ᱮᱸᱜᱟᱛ ᱟᱯᱟᱛ ᱚᱠᱟ ᱠᱤᱱ ᱠᱩᱥᱤᱜ ᱠᱟᱱᱟ ᱚᱱᱟ ᱜᱮᱵᱚ ᱧᱩᱛᱩᱢ ᱮᱫ ᱠᱚᱣᱟ᱾

ᱪᱷᱟᱹᱴᱭᱟᱹᱨᱚᱜ ᱦᱤᱞᱚᱜ ᱫᱚ ᱫᱷᱟᱺᱭ ᱵᱩᱰᱤ ᱟᱨ ᱵᱟᱝ ᱠᱷᱟᱱ ᱢᱤᱫ ᱦᱟᱲᱟᱢ ᱢᱤᱫ ᱵᱩᱰᱷᱤ ᱠᱚ ᱦᱚᱦᱚ ᱟᱹᱠᱤᱱᱟ ᱥᱟᱠᱟᱢ ᱵᱟᱪᱷᱟᱣ ᱟᱨ ᱥᱟᱥᱟᱝ ᱵᱟᱪᱷᱟᱣ ᱠᱟᱛᱮ ᱨᱤᱫ ᱞᱮᱢᱮᱧ ᱞᱮᱢᱮᱧ ᱞᱟᱹᱜᱤᱫ᱾ ᱥᱟᱥᱟᱝ ᱟᱨ ᱥᱟᱠᱟᱢ ᱫᱚ ᱱᱚᱝ ᱠᱟ ᱠᱚ ᱵᱟᱪᱦᱟᱣ ᱟ ᱥᱟᱥᱟᱝ ᱜᱟᱺᱰᱤᱡ ᱟᱞᱚ ᱛᱟᱦᱮᱱ ᱢᱟ, ᱪᱟᱸᱜᱽᱲᱟ ᱟᱞᱚ ᱛᱟᱸᱦᱮᱱ ᱢᱟ ᱡᱚᱱᱮ ᱞᱮᱠᱟ ᱟᱞᱚ ᱡᱷᱚᱢᱯᱮ ᱠᱚᱜ ᱢᱟ ᱱᱤᱥᱟᱹᱰ ᱥᱟᱺᱦᱤᱡ ᱛᱟᱸᱦᱮᱱ ᱢᱟ, ᱚᱱᱟᱫᱚ ᱯᱮ ᱜᱚᱴᱟᱝ ᱠᱚ ᱵᱟᱪᱷᱟᱣᱟ ᱜᱤᱫᱽᱨᱟᱹ ᱦᱚᱯᱚᱱ ᱞᱟᱹᱜᱤᱫ ᱟᱨ ᱮᱸᱜᱟᱛ ᱟᱯᱟᱛ ᱟᱨ ᱢᱚᱬᱮ ᱠᱚ ᱞᱟᱹᱜᱤᱫ ᱫᱚ ᱡᱟᱸᱦᱟ ᱞᱮᱠᱟ ᱱᱟᱜ ᱨᱮᱦᱚᱸ ᱜᱟᱱᱚᱜᱼᱟ᱾ ᱥᱟᱠᱟᱢ ᱦᱚᱸ ᱚᱱᱠᱟ ᱜᱮ ᱥᱟᱠᱟᱢ ᱨᱮ ᱯᱩᱥᱨᱤ ᱟᱞᱚ ᱛᱟᱸᱦᱮᱱ ᱢᱟ, ᱚᱲᱮᱡ ᱥᱮ ᱠᱷᱮᱨᱪᱚ ᱟᱞᱚ ᱛᱟᱸᱦᱮᱱ ᱢᱟ ᱪᱤᱸᱠᱟᱹᱬ ᱟᱨ ᱪᱮᱦᱨᱟ ᱥᱟᱺᱦᱤᱡ ᱛᱟᱸᱦᱮᱱ ᱢᱟ ᱚᱱᱟ ᱫᱚ ᱜᱤᱫᱽᱨᱟᱹ ᱦᱚᱯᱚᱱ ᱞᱟᱹᱜᱤᱫ ᱟᱨ ᱮᱸᱜᱟᱛ ᱟᱯᱟᱛ ᱞᱟᱹᱜᱤᱫ᱾

ᱫᱷᱟᱺᱭ ᱵᱩᱰᱷᱤ ᱥᱮ ᱢᱤᱫ ᱵᱩᱰᱷᱤ ᱨᱤᱫ ᱥᱟᱥᱟᱝ ᱥᱩᱱᱩᱢ ᱥᱟᱶ ᱯᱮᱱᱮ ᱯᱷᱩᱲᱩᱜ ᱨᱮᱭ ᱥᱟᱡᱟᱣ ᱠᱮᱫ ᱠᱷᱟᱱ ᱡᱟᱣᱫᱚ ᱢᱚᱬᱮ ᱡᱚᱲ ᱟᱨ ᱵᱟᱝᱠᱷᱟᱱ ᱯᱮᱡᱚᱲ ᱥᱟᱥᱟᱝ ᱥᱩᱱᱩᱢ ᱚᱡᱚᱜ ᱠᱟᱛᱮ ᱮᱱᱟᱝ ᱮᱸᱜᱟᱛ ᱟᱯᱟᱛ ᱟᱨ ᱜᱤᱫᱽᱨᱟᱹ ᱫᱚᱠᱚ ᱚᱡᱚᱜᱮᱫ ᱠᱚ ᱛᱟᱸᱦᱮ ᱠᱟᱱᱟ᱾ ᱱᱟᱦᱟᱜ ᱫᱚ ᱪᱷᱟᱹᱴᱭᱟᱹᱨ ᱨᱮ ᱡᱚᱲ ᱚᱡᱚᱜ ᱫᱚᱠᱚ ᱵᱟᱹᱜᱤ ᱠᱮᱫ ᱛᱮ ᱥᱩᱢᱟᱹᱫ ᱮᱜᱟᱛᱟᱨ ᱟᱯᱟᱛ ᱛᱮᱫ ᱜᱮᱠᱚ ᱚᱡᱚᱜ ᱠᱤᱱᱟ᱾ ᱮᱱ ᱠᱟᱛᱮ ᱜᱤᱫᱟᱹᱨ ᱦᱚᱯᱚᱱ ᱠᱚ ᱚᱡᱚᱜ ᱮᱛᱮ ᱫᱷᱟᱹᱭ ᱵᱩᱰᱷᱤ ᱥᱮ ᱢᱤᱫ ᱵᱩᱰᱷᱤ ᱜᱤᱫᱽᱨᱟᱹ ᱛᱮᱫ ᱦᱚᱵᱚᱨ, ᱦᱮᱵᱮ, ᱥᱮ ᱛᱤᱭᱟᱹ ᱠᱟᱛᱮ, ᱢᱟᱺᱡᱷᱤ ᱠᱷᱮᱵᱚᱛ ᱠᱟᱛᱮᱜ ᱱᱮᱣᱛᱟ ᱟᱠᱟᱫ ᱯᱮᱲᱟ ᱯᱟᱭᱬᱟ ᱥᱟᱢᱟᱝ ᱨᱮ ᱤᱫᱤ ᱠᱟᱛᱮ ᱚᱠᱟ ᱠᱚ ᱧᱩᱛᱩᱢᱮ ᱠᱟᱱ ᱚᱱᱟ ᱧᱩᱛᱩᱢ ᱜᱮ ᱩᱱᱤ ᱫᱷᱟᱹᱭ ᱵᱩᱰᱷᱤ ᱥᱮ ᱢᱤᱫ ᱵᱩᱰᱷᱤ ᱫᱚᱭ ᱪᱷᱟᱹᱴᱭᱟᱹᱨ ᱤᱫᱤ ᱟᱠᱚᱣᱟ ᱟᱨ ᱩᱱ ᱨᱮ ᱱᱚᱝᱠᱟᱭ ᱦᱚᱦᱚᱭᱟ ᱠᱚᱲᱟ ᱠᱷᱟᱱ “ᱢᱟ ᱛᱮᱦᱮᱧ ᱠᱷᱚᱱ ᱫᱚ ᱯᱷᱟᱞᱱᱟ ᱥᱮ ᱛᱩᱥᱠᱟᱹ ᱧᱩᱛᱩᱢ ᱛᱮ ᱵᱟᱲᱮ ᱦᱚᱦᱚᱣᱟᱭ ᱯᱮ, ᱥᱮᱸᱫᱽᱨᱟ ᱨᱮ ᱠᱟᱨᱠᱟ ᱨᱮ ᱫᱩᱨᱤ ᱨᱮ ᱫᱚᱨᱵᱟᱨ ᱨᱮ ᱰᱚᱰᱮ ᱛᱚᱨᱟ ᱮᱯᱮ᱾” ᱠᱩᱲᱤ ᱠᱷᱟᱱ “ᱥᱟᱠᱟᱢ ᱦᱮᱡ ᱫᱟᱹᱛᱟᱹᱱᱤ ᱯᱮᱴᱮᱡ, ᱟᱲᱟᱜ ᱥᱤᱫ ᱫᱟᱜ ᱞᱩ ᱟᱨ ᱮᱢᱟᱱ ᱠᱚᱨᱮ ᱰᱚᱰᱮ ᱛᱚᱨᱟ ᱮᱯᱮ᱾” ᱯᱮ ᱢᱟᱦᱟ ᱢᱚᱬᱮ ᱢᱟᱦᱟ ᱥᱮ ᱟᱨᱮ ᱢᱟᱦᱟ ᱨᱮ ᱧᱩᱛᱩᱢ ᱧᱩᱢ ᱟᱠᱚ ᱫᱚ ᱡᱟᱱᱟᱢ ᱪᱷᱟᱹᱴᱭᱟᱹᱨ ᱠᱚ ᱢᱮᱛᱟᱜᱼᱟ᱾

ᱜᱤᱫᱽᱨᱟᱹ ᱠᱚ ᱦᱟᱨᱟ ᱵᱩᱨᱩ ᱥᱮ ᱪᱟᱪᱚ ᱠᱮᱴᱮᱡ ᱠᱟᱛᱮ ᱧᱩᱛᱩᱢ ᱟᱠᱚ ᱫᱚ ᱪᱟᱪᱚ ᱪᱷᱟᱹᱴᱭᱟᱹᱨ ᱠᱚ ᱢᱮᱛᱟᱜᱼᱟ᱾ ᱱᱚᱶᱟ ᱪᱷᱟᱹᱴᱭᱟᱹᱨ ᱫᱚ ᱟᱹᱣᱨᱤ ᱠᱚ ᱵᱟᱯᱞᱟ ᱭᱮ ᱨᱮ ᱦᱩᱭᱩᱜᱼᱟ᱾ ᱡᱟᱣ ᱫᱚ ᱜᱤᱫᱽᱨᱟᱹ ᱵᱟᱝ ᱪᱷᱟᱹᱴᱤᱭᱟᱹᱨ ᱠᱟᱛᱮ ᱡᱟᱦᱮᱨ ᱨᱮ ᱥᱚᱲᱮ ᱵᱟᱝ ᱠᱚ ᱡᱚᱢ ᱚᱪᱚ ᱟᱠᱚ ᱛᱟᱸᱦᱮᱫ, ᱩᱱᱤ ᱧᱩᱛᱩᱢ ᱪᱷᱟᱹᱴᱤᱭᱟᱹᱨ ᱞᱮᱠᱷᱟᱱ ᱡᱟᱦᱮᱨ ᱨᱮ ᱩᱱᱤ ᱧᱩᱛᱩᱢ ᱛᱮ ᱯᱟᱹᱦᱩᱲ ᱵᱚᱸᱜᱟ ᱠᱟᱛᱮ ᱮᱱᱟᱝ ᱜᱮ ᱡᱟᱦᱮᱨ ᱥᱚᱲᱮ ᱫᱚᱠᱚ ᱮᱢᱟᱭᱟ᱾ ᱟᱨ ᱵᱤᱱ ᱪᱟᱪᱚ ᱪᱷᱟᱹᱴᱭᱟᱹᱨ ᱨᱮᱫᱚ ᱵᱟᱝ ᱠᱚ ᱵᱟᱯᱞᱟ ᱫᱟᱲᱮ ᱟᱠᱚᱣᱟ᱾ ᱚᱠᱚᱭ ᱜᱤᱫᱽᱨᱟᱹ ᱟᱹᱣᱨᱤ ᱪᱟᱪᱚ ᱪᱷᱟᱹᱴᱤᱭᱟᱹᱨ ᱨᱮᱠᱚ ᱜᱚᱡ ᱜᱩᱨ ᱞᱮᱱ ᱠᱷᱟᱱ ᱩᱱᱠᱩ ᱫᱚ ᱵᱟᱝ ᱠᱚ ᱨᱟᱯᱟᱜ ᱠᱚᱣᱟ᱾ ᱩᱱᱠᱩ ᱫᱚᱠᱚ ᱛᱚᱯᱟ ᱠᱚᱣᱟ᱾ ᱩᱱᱠᱩᱣᱟᱜ ᱡᱟᱝ ᱵᱟᱦᱟ ᱦᱚᱸ ᱛᱩᱯᱩᱱᱟᱹᱭ ᱜᱷᱟᱴ ᱛᱮᱫᱚ ᱵᱟᱝ ᱠᱚ ᱤᱫᱤᱭᱟ ᱟᱦᱟᱨ ᱯᱩᱠᱷᱨᱤ ᱥᱮ ᱜᱟᱰᱟ ᱢᱩᱰᱩ ᱫᱟᱜ ᱨᱮᱠᱚ ᱵᱚᱦᱮᱞ ᱠᱟᱜ ᱯᱟᱭᱨᱟ ᱠᱟᱜᱼᱟ᱾ ᱢᱮᱱᱫᱚ ᱱᱟᱦᱟᱜ ᱫᱚ ᱛᱩᱯᱩᱱᱟᱹᱭ ᱜᱷᱟᱴ ᱛᱮᱦᱚᱸ ᱠᱚ ᱤᱫᱤ ᱮᱫ ᱜᱮᱭᱟ, ᱱᱚᱶᱟ ᱫᱚ ᱥᱟᱶᱛᱟ ᱨᱮᱭᱟᱜ ᱾ᱥᱮᱨᱣᱟ ᱛᱟᱬᱜᱚᱢ ᱯᱟᱨᱚᱢ ᱠᱟᱛᱮ ᱵᱚᱱ ᱠᱟᱹᱢᱤ ᱠᱟᱱᱟ᱾ ᱱᱟᱦᱟᱜ ᱫᱚ ᱱᱚᱶᱟ ᱪᱷᱟᱹᱴᱭᱭᱟᱹᱨ ᱨᱮᱱᱟᱝ ᱡᱟᱦᱟᱱ ᱴᱷᱤᱠᱟᱹᱬ ᱫᱚ ᱵᱟᱹᱱᱩᱜ ᱟᱱᱟᱝ᱾

ᱡᱟᱦᱟᱸᱭ ᱨᱤᱱ ᱟᱹᱰᱤ ᱚᱠᱚᱡ ᱜᱤᱫᱟᱹᱨ ᱯᱤᱫᱟᱹᱨ ᱢᱮᱱᱟᱜ ᱠᱚᱣᱟ ᱩᱱᱤ ᱩᱱᱠᱩ ᱪᱟᱪᱚ ᱪᱷᱟᱹᱴᱭᱟᱹᱨ ᱠᱚ ᱞᱟᱹᱜᱤᱫ ᱮ ᱱᱮᱰᱟ ᱜᱚᱸᱰᱟ ᱠᱮᱫᱼᱟ ᱢᱮᱱᱠᱷᱟᱱ ᱯᱮᱲᱟ ᱠᱚ ᱯᱟᱹᱭᱬᱟ ᱠᱚ ᱱᱮᱣᱛᱟ ᱵᱟᱨᱛᱮ ᱠᱟᱛᱮ ᱦᱟᱺᱰᱤ ᱮ ᱦᱟᱹᱨ ᱚᱪᱚ ᱠᱚᱣᱟ᱾ ᱱᱮᱰᱟ ᱜᱚᱸᱰᱟ ᱫᱤᱱ ᱥᱮᱴᱮᱨ ᱮᱱᱟ, ᱩᱱᱤ ᱟᱥᱟᱢᱤ ᱫᱚ ᱢᱟᱺᱡᱷᱤ ᱮ ᱞᱟᱹᱭ ᱟᱭᱟ ᱵᱟᱝ ᱢᱟ “ᱜᱤᱫᱟᱹᱨ ᱠᱚ ᱯᱤᱫᱟᱹᱨ ᱠᱚᱧ ᱪᱷᱟᱹᱴᱭᱟᱹᱨ ᱠᱟᱠᱚᱣᱟ, ᱢᱟ ᱟᱫᱚ ᱤᱧᱟᱜ ᱚᱲᱟᱜ ᱨᱮ ᱜᱟᱶᱞᱟ ᱡᱟᱣᱨᱟ ᱟᱹᱧ ᱢᱮ” ᱢᱟᱺᱡᱷᱤ ᱦᱚᱸ ᱟᱥᱟᱢᱤᱭᱟᱜ ᱠᱟᱛᱷᱟ ᱞᱮᱠᱟᱛᱮ, ᱜᱚᱰᱮᱛ (ᱱᱟᱦᱟᱜ ᱫᱚ ᱜᱚᱰᱮᱛ ᱜᱮ ᱡᱚᱜᱽ ᱢᱟᱹᱡᱷᱤ ᱦᱚᱸ ᱠᱚ ᱢᱮᱛᱟᱠᱚ ᱠᱟᱱᱟ) ᱡᱚᱜᱽ ᱢᱟᱺᱡᱦᱤ ᱠᱤᱱᱮ ᱢᱮᱛᱟ ᱠᱤᱱᱟ, ᱢᱟ ᱯᱷᱟᱞᱱᱟ ᱥᱮ ᱛᱩᱥᱠᱟᱹ ᱚᱲᱟᱜ ᱨᱮ ᱡᱟᱣᱨᱟ ᱦᱚᱦᱚᱭ ᱵᱤᱱ᱾ ᱡᱟᱣᱨᱟ ᱮᱱᱟ ᱠᱚ ᱩᱱᱨᱮ ᱜᱟᱶᱞᱟ ᱜᱚᱰᱮᱛ ᱠᱚ ᱠᱩᱞᱤ ᱠᱤᱱᱟ᱾ “ᱫᱮᱠᱷᱤ ᱛᱚᱵᱮ ᱵᱟᱵᱟ ᱜᱚᱰᱮᱛ ᱛᱮᱦᱮᱧ ᱢᱟ ᱯᱷᱟᱞᱱᱟ ᱚᱲᱟᱜ ᱨᱮ ᱪᱮᱛᱟᱱ ᱴᱚᱞᱟ ᱞᱟᱛᱟᱨ ᱴᱚᱞᱟ ᱵᱤᱱ ᱦᱟᱠᱨᱟ ᱟᱫ ᱰᱟᱞᱠᱨᱟ ᱟᱫ ᱵᱚᱱᱟ, ᱪᱮᱫ ᱱᱤᱢᱤᱛ ᱪᱮᱫ ᱞᱟᱹᱜᱤᱫ ᱞᱟᱹᱭ ᱚᱰᱚᱠ ᱠᱟᱛᱷᱟ ᱚᱰᱚᱠ ᱵᱤᱱ ᱵᱟᱵᱟ, ᱟᱹᱵᱤᱱ ᱦᱚᱸ ᱵᱟᱞᱮ ᱠᱩᱞᱤ ᱞᱤᱵᱤᱱ ᱠᱷᱟᱱ ᱪᱮᱠᱟ ᱛᱮ ᱵᱤᱱ ᱞᱟᱹᱭ ᱠᱮᱭᱟ ᱟᱨ ᱟᱹᱵᱤᱱ ᱦᱚᱸ ᱵᱟᱹᱵᱤᱱ ᱞᱟᱹᱭ ᱚᱰᱚᱠ ᱠᱟᱛᱷᱟ ᱚᱰᱚᱠ ᱞᱮᱠᱷᱟᱱ ᱪᱮᱠᱟ ᱛᱮᱞᱮ ᱵᱟᱰᱟᱭ ᱠᱮᱭᱟ, ᱦᱚᱭ ᱵᱟᱵᱟ ᱤᱱᱟᱹ ᱜᱮᱞᱮ ᱠᱩᱞᱤ ᱩᱫᱷᱟᱹᱨ ᱠᱮᱫ ᱵᱤᱱᱟ” ᱠᱷᱟᱱ ᱜᱚᱰᱮᱛ ᱥᱮ ᱡᱚᱜᱽ ᱢᱟᱺᱡᱷᱤ ᱠᱤᱱ ᱦᱚᱸ ᱠᱤᱱ ᱨᱚᱲ ᱨᱩᱣᱟᱹᱲᱟ᱾

“ᱦᱚᱭ ᱵᱟᱵᱟ ᱢᱚᱬᱮ ᱠᱚ ᱟᱨ ᱟᱹᱛᱩ ᱜᱟᱶᱞᱟ ᱠᱚ ᱠᱩᱞᱤ ᱠᱮᱫ ᱯᱩᱪᱷᱟᱹᱨ ᱠᱮᱫ ᱞᱤᱧ ᱠᱷᱟᱱ ᱯᱮ ᱞᱤᱧ ᱞᱟᱹᱭ ᱚᱰᱚᱠ ᱠᱟᱛᱷᱟ ᱚᱰᱚᱠᱟᱹᱞᱤᱧ, ᱦᱚᱭ ᱵᱟᱵᱟ ᱟᱯᱮ ᱦᱚᱸ ᱵᱟᱝ ᱯᱮ ᱠᱩᱞᱤ ᱞᱤᱧ ᱠᱷᱟᱱ ᱪᱮᱠᱟ ᱛᱮᱞᱤᱧ ᱞᱟᱹᱭᱟ ᱟᱨ ᱟᱹᱞᱤᱧ ᱦᱚᱸ ᱱᱷᱟᱜ ᱵᱟᱹᱞᱤᱧ ᱞᱟᱹᱭ ᱞᱮᱠᱷᱟᱱ ᱪᱮᱠᱟ ᱛᱮᱯᱮ ᱵᱟᱰᱟᱭ ᱧᱟᱢ ᱫᱟᱲᱮᱭᱟᱜᱼᱟ᱾ ᱟᱫᱚ ᱵᱟᱵᱟ ᱢᱟᱺᱡᱷᱤ ᱵᱟᱵᱟᱦᱟᱜ ᱟᱹᱫᱤᱥ ᱛᱮᱜᱮ ᱱᱩᱭ ᱯᱷᱟᱞᱱᱟ ᱦᱚᱲ ᱜᱮᱭ ᱦᱚᱦᱚ ᱚᱪᱚ ᱟᱠᱟᱫ ᱞᱤᱧᱟ ᱟᱫᱚ ᱵᱟᱵᱟ ᱢᱟ ᱱᱩᱭ ᱯᱷᱟᱞᱱᱟ ᱦᱚᱲ ᱜᱮ ᱵᱚᱱ ᱠᱩᱞᱤ ᱮᱭᱟ᱾”

ᱟᱫᱚ ᱩᱱᱨᱮ ᱡᱟᱣᱨᱟ ᱟᱠᱟᱱ ᱢᱚᱬᱮ ᱠᱚ ᱟᱨ ᱜᱟᱶᱞᱟ ᱠᱚ ᱩᱱᱤ ᱟᱥᱟᱢᱤ ᱠᱚ ᱠᱩᱞᱤ ᱭᱮᱭᱟ,

“ᱫᱮᱠᱷᱤ ᱥᱮ ᱛᱚᱵᱮ ᱠᱷᱟᱱ ᱟᱢ ᱯᱷᱟᱞᱱᱟ ᱦᱚᱲ ᱪᱮᱫ ᱨᱮᱢ ᱫᱩᱠ ᱮᱱ ᱦᱩᱠ ᱮᱱᱛᱮ ᱜᱚᱰᱮᱛ ᱪᱮᱛᱟᱱ ᱴᱚᱞᱟ ᱞᱟᱛᱟᱨ ᱴᱚᱞᱟᱢ ᱰᱟᱠᱨᱟ ᱚᱪᱚ ᱟᱠᱟᱫ ᱠᱤᱱᱟ? ᱟᱢ ᱦᱚᱸ ᱵᱟᱞᱮ ᱠᱩᱞᱤ ᱞᱮᱢ ᱠᱷᱟᱱ ᱪᱮᱠᱟᱛᱮᱢ ᱞᱟᱹᱭ ᱠᱮᱭᱟ ᱟᱨ ᱟᱢ ᱦᱚᱸ ᱵᱟᱢ ᱞᱟᱹᱭ ᱞᱮᱠᱷᱟᱱ ᱪᱮᱠᱟ ᱛᱮᱞᱮ ᱵᱟᱰᱟᱭ ᱠᱮᱭᱟ”

ᱠᱷᱟᱱ ᱟᱥᱟᱢᱤ ᱨᱚᱲ ᱨᱩᱣᱟᱹᱲ ᱟᱠᱚᱣᱟᱭ, “ᱦᱚᱭ ᱵᱟᱵᱟ ᱢᱚᱬᱮ ᱜᱟᱶᱞᱟ ᱠᱚ ᱠᱩᱞᱤ ᱠᱤᱫᱤᱧ ᱠᱷᱟᱱ ᱯᱤᱧ ᱞᱟᱹᱭ ᱚᱰᱚᱠ ᱠᱟᱛᱷᱟ ᱚᱰᱚᱠᱟ ᱟᱨ ᱤᱧ ᱦᱚᱸ ᱱᱷᱟᱜ ᱵᱟᱹᱧ ᱞᱟᱹᱭ ᱚᱰᱚᱠ ᱞᱮᱠᱷᱟᱱ ᱪᱮᱠᱟ ᱛᱮᱯᱮ ᱵᱟᱰᱟᱭ ᱧᱟᱢᱟ᱾ ᱦᱚᱭ ᱵᱟᱵᱟ ᱠᱟᱛᱷᱟ ᱫᱚ ᱦᱩᱠ ᱦᱚᱸ ᱵᱟᱹᱧ ᱦᱩᱠ ᱟᱠᱟᱱᱟ ᱟᱨ ᱫᱩᱠ ᱦᱚᱸ ᱵᱟᱹᱧ ᱫᱩᱠ ᱟᱠᱟᱱᱟ᱾ ᱥᱩᱠ ᱟᱨ ᱥᱟᱶᱟᱨ ᱨᱮᱱᱟᱝ ᱠᱟᱛᱷᱟ ᱠᱟᱱ ᱛᱟᱵᱚᱱᱟ᱾

“ᱛᱩᱢᱵᱟᱹ ᱨᱮ ᱴᱚᱴᱮᱡᱟᱨᱣᱟ ᱤᱛᱟᱹ ᱜᱤᱧ ᱮᱨ ᱞᱮᱫ ᱤᱲᱤ ᱪᱚᱝ ᱮᱨᱵᱟ ᱪᱚᱝ ᱛᱩᱲᱤ ᱪᱚᱝ ᱛᱤᱞᱢᱤᱧ ᱪᱚᱝ ᱦᱟᱨᱟ ᱠᱟᱛᱮ ᱜᱮᱞᱮ ᱵᱤᱞᱤ ᱜᱚᱫ ᱟᱠᱟᱱᱟ᱾ ᱚᱱᱟ ᱠᱚᱜᱮ ᱵᱚᱱ ᱥᱟᱞᱟ ᱠᱟᱜ ᱵᱟᱪᱷᱟᱣ ᱠᱟᱜ ᱧᱩᱢ ᱵᱷᱮᱜᱟᱨ ᱦᱟᱞᱟᱝ ᱵᱷᱮᱜᱟᱨ ᱠᱟᱜ ᱞᱟᱹᱜᱤᱫ ᱜᱤᱧ ᱫᱩ ᱟᱠᱟᱣᱟᱫ ᱫᱮᱞᱟ ᱟᱠᱟᱣᱟᱫ ᱯᱮ ᱛᱟᱵᱚᱱᱟ ᱵᱟᱵᱟ᱾” ᱟᱫᱚ ᱩᱱᱤ ᱟᱸᱥᱟᱢᱤ ᱚᱠᱚᱭᱼᱚᱠᱚᱭ ᱠᱚ ᱪᱤᱞᱤᱭ ᱧᱩᱛᱩᱢ ᱠᱚᱣᱟ ᱥᱮᱭ ᱪᱷᱟᱺᱴᱭᱟᱹᱨ ᱮᱫ ᱠᱚᱣᱟ ᱟᱹᱛᱩ ᱜᱟᱶᱞᱟ ᱠᱚᱭ ᱞᱟᱹᱭ ᱟᱠᱚᱣᱟ᱾ ᱠᱷᱟᱱ ᱩᱱᱠᱤᱱ ᱢᱤᱫ ᱦᱟᱲᱟᱢ ᱢᱤᱫ ᱵᱩᱰᱷᱤ ᱩᱱᱩᱠᱩ ᱮᱸᱜᱟᱛ ᱟᱯᱟᱛ ᱟᱨ ᱜᱤᱫᱽᱨᱟᱹ ᱞᱟᱹᱜᱤᱫ ᱥᱟᱥᱟᱝ ᱟᱨ ᱥᱟᱠᱟᱢ ᱵᱟᱪᱷᱟᱣ ᱠᱟᱛᱮ ᱥᱟᱥᱟᱝ ᱫᱚ ᱨᱤᱫ ᱞᱮᱢᱮᱧ ᱞᱮᱢᱮᱧ ᱠᱟᱛᱮ ᱵᱷᱟᱶᱛᱤᱡ ᱯᱷᱩᱲᱩᱜ ᱨᱮᱠᱤᱱ ᱥᱟᱡᱟᱣᱟ᱾

ᱟᱫᱚ ᱵᱤᱱᱛᱤ ᱠᱚ ᱮᱦᱚᱵᱟ᱾ ᱫᱷᱟᱹᱨᱛᱤ ᱪᱮᱫ ᱞᱮᱠᱟᱨᱮ ᱵᱮᱱᱟᱣ ᱞᱮᱱᱟ ᱟᱨ ᱦᱚᱲ ᱦᱚᱯᱚᱱ ᱞᱩᱢᱟᱹᱝ ᱞᱮᱠᱟ ᱩᱱ ᱠᱷᱚᱱ ᱚᱠᱟᱼᱚᱠᱟ ᱫᱤᱥᱚᱢ ᱠᱚ ᱟᱹᱛᱤᱧ ᱟᱹᱜᱩ ᱟᱠᱟᱫᱼᱟ᱾ ᱡᱟᱸᱦᱟ ᱛᱤᱥ ᱜᱤᱫᱽᱨᱟᱹ ᱟᱞᱚ ᱠᱚ ᱦᱤᱲᱤᱧ ᱢᱟ ᱢᱮᱱᱛᱮ᱾ ᱡᱟᱸᱫᱮ ᱢᱟᱱ ᱛᱟᱸᱫᱮᱭᱮᱱ ᱠᱟᱛᱷᱟ ᱠᱚ ᱛᱤᱭᱩᱜ ᱞᱮᱠᱷᱟᱱ ᱥᱤᱠᱷᱟᱹᱨ ᱫᱤᱥᱚᱢ ᱨᱤᱱ ᱯᱟᱹᱦᱤᱞ ᱯᱟᱨᱜᱟᱱᱟ ᱦᱟᱹᱠᱤᱢ ᱠᱚ ᱧᱩᱢᱮᱭᱟ᱾ ᱢᱮᱱ ᱟᱠᱚ ᱦᱟᱹᱠᱤᱢ ᱯᱟᱨᱜᱟᱱᱟᱭ ᱢᱮᱛᱟ ᱠᱚᱣᱟ ᱫᱮᱞᱟ ᱵᱚᱱ ᱵᱮᱨᱮᱞᱚᱜᱼᱟ, ᱵᱟᱭᱱᱟ ᱵᱤᱨ ᱤᱧ ᱪᱤᱭᱟᱹ ᱟᱠᱟᱫ ᱛᱟᱵᱚᱱᱟ᱾ ᱦᱟᱯᱲᱟᱢ ᱠᱚᱠᱚ ᱢᱮᱱᱟ ᱫᱮᱞᱟ ᱵᱚᱱ ᱜᱚᱲᱚ ᱟᱢᱟ ᱟᱫᱚ ᱰᱟᱹᱦᱤᱡᱚᱝ ᱰᱩᱸᱜᱽᱨᱤ ᱡᱚᱝ ᱟᱠᱚ ᱤᱲᱤ ᱠᱚ ᱮᱨᱵᱟ ᱠᱚ ᱮᱨ ᱠᱮᱫᱼᱟ ᱤᱲᱤ ᱢᱮᱱᱛᱮ ᱮᱨᱵᱟ ᱜᱮᱞᱮ ᱮᱱᱟ ᱮᱨᱵᱟ ᱢᱮᱱᱛᱮ ᱤᱲᱤ ᱜᱮᱞᱮ ᱮᱱᱟ᱾ ᱟᱫᱳ ᱩᱱ ᱨᱮ ᱢᱤᱫ ᱦᱟᱲᱟᱢ ᱢᱤᱫ ᱵᱩᱰᱷᱤ ᱫᱚ ᱵᱟᱹᱴᱭᱟᱹ ᱪᱟᱸᱜᱟ ᱦᱚᱨ ᱨᱮ ᱠᱤᱱ ᱰᱟᱹᱦᱤ ᱞᱟᱜᱼᱟ ᱚᱱᱟ ᱠᱤᱱ ᱦᱚᱨᱦᱚᱭᱟ ᱦᱚᱨᱦᱚᱼᱦᱚᱨᱦᱚ ᱞᱟᱰᱭᱟ ᱨᱚᱦᱚᱲ ᱯᱚᱯᱲᱚ ᱫᱟᱨᱮ ᱨᱮᱠᱤᱱ ᱫᱮᱡ ᱮᱱᱮᱡᱼᱟ ᱟᱫᱚ ᱥᱤᱥᱤᱨ ᱡᱟᱹᱣᱤᱡᱟᱜ ᱫᱟᱭᱟ ᱛᱮ ᱠᱷᱚᱫᱮ ᱡᱟᱝ ᱪᱷᱟᱣᱞᱮ ᱡᱟᱝ ᱵᱟᱝ ᱦᱤᱨᱤᱡ ᱞᱮᱱᱟ ᱵᱟᱝ ᱯᱟᱹᱥᱤᱨ ᱞᱮᱱᱟ, ᱱᱟᱭ ᱛᱮ ᱱᱟᱯᱟᱭ ᱛᱮᱜᱮ ᱨᱚᱦᱚᱲ ᱯᱚᱯᱲᱚ ᱫᱟᱨᱮ ᱠᱷᱚᱱ ᱟᱹᱬᱜᱚᱭᱮᱱᱟ, ᱟᱫᱚ ᱫᱷᱟᱹᱨᱛᱤᱭᱮ ᱞᱮᱵᱮᱫ ᱠᱮᱫ ᱠᱷᱟᱱ ᱜᱮ ᱪᱷᱩᱛᱮᱱ ᱟᱨ ᱢᱩᱠᱩ ᱛᱮᱱᱟ᱾

ᱡᱟᱱᱟᱢ ᱪᱷᱟᱹᱴᱭᱟᱹᱨ ᱨᱮ ᱚᱠᱟ ᱞᱮᱠᱟ ᱠᱚ ᱚᱡᱚᱜ ᱡᱟᱯᱟ ᱠᱚᱣᱟ ᱚᱱᱠᱟ ᱛᱮ ᱪᱟᱪᱚ ᱪᱷᱟᱹᱴᱤᱭᱟᱹᱨ ᱨᱮᱦᱚᱸ ᱚᱡᱚᱜ ᱡᱟᱯᱟᱜ ᱠᱟᱛᱮ ᱠᱚ ᱧᱩᱛᱩᱢ ᱠᱚᱣᱟ᱾ ᱪᱟᱪᱚ ᱪᱷᱟᱹᱴᱤᱭᱟᱹᱨ ᱠᱟᱹᱢᱤ ᱠᱚ ᱥᱟᱹᱛ ᱠᱮᱫ ᱠᱷᱟᱱ ᱟᱥᱟᱢᱤ ᱨᱚᱲ ᱮ ᱮᱦᱚᱵᱟ “ᱦᱚᱭ ᱵᱟᱵᱟ ᱢᱚᱬᱮ ᱜᱟᱶᱞᱟ ᱛᱩᱠ ᱦᱤᱞᱚᱜ ᱩᱠᱷᱩᱲ ᱦᱤᱞᱚᱜ, ᱥᱮᱸᱜᱮᱞ ᱦᱤᱞᱚᱜ ᱥᱚᱠᱚᱞ ᱦᱤᱞᱚᱜ, ᱥᱟᱦᱟᱱ ᱦᱤᱞᱚᱜ ᱥᱟᱠᱟᱢ ᱦᱤᱞᱚᱜ, ᱥᱩᱜ ᱫᱟᱜ ᱰᱟᱹᱰᱤ ᱫᱟᱜ ᱟᱞᱮ ᱜᱮ ᱢᱟᱬᱟᱝ ᱵᱟᱝ ᱪᱟᱞᱟᱣ ᱠᱚᱦᱚᱸ ᱞᱮ ᱪᱟᱞᱟᱣ ᱚᱪᱚ ᱠᱮᱫ ᱯᱮᱭᱟ ᱤᱱᱟᱹ ᱜᱮ ᱵᱟᱵᱟ ᱢᱚᱱ ᱫᱩᱠ ᱢᱚᱱ ᱥᱩᱠ ᱠᱚᱜ ᱛᱟᱵᱚᱱ ᱯᱮ᱾ “ᱩᱱᱨᱮ ᱢᱚᱬᱮ ᱜᱟᱶᱞᱟ ᱠᱚ ᱨᱚᱲ ᱨᱩᱣᱟᱹᱲᱟ, “ᱢᱚᱱ ᱫᱩᱠ ᱢᱚᱱᱥᱩᱠᱚᱜ ᱠᱚᱫᱚ ᱠᱚ ᱪᱟᱞᱟᱣ ᱮᱱᱟ ᱥᱚᱢᱟᱭ ᱥᱚᱠᱲᱟ ᱞᱮᱢᱮᱧ ᱜᱤᱛᱤᱞ ᱢᱟᱜᱟᱲ ᱜᱩᱯᱤ” ᱟᱨ ᱦᱚᱸ ᱟᱥᱟᱢᱤᱭ ᱨᱚᱲ “ᱦᱚᱭ ᱵᱟᱵᱟ ᱢᱚᱬᱮ ᱜᱟᱶᱞᱟ ᱛᱮᱦᱮᱧ ᱫᱚᱞᱮ ᱱᱟᱨᱛᱟ ᱮᱱ ᱪᱷᱟᱹᱴᱤᱭᱟᱹᱨ ᱮᱱᱟ ᱞᱮ ᱟᱫᱚ ᱦᱟᱹᱰᱤ ᱚᱲᱟᱜ ᱥᱩᱸᱰᱤ ᱚᱲᱟᱜ ᱨᱮ ᱨᱤᱱ ᱮᱱ ᱫᱷᱟᱨ ᱮᱱ ᱞᱮ ᱟᱫᱚ ᱠᱩᱲᱟᱹᱣ ᱠᱟᱛᱮ ᱡᱩᱲᱟᱹᱣ ᱠᱟᱛᱮ ᱟᱯᱮ ᱢᱚᱬᱮ ᱜᱚᱶᱞᱟ ᱫᱩᱣᱟᱫ᱾ ᱫᱮᱞᱟᱣᱟᱫ ᱯᱮᱭᱟᱞᱮ ᱛᱚᱵᱮ ᱵᱟᱵᱟ ᱡᱟᱸᱜᱟ ᱛᱮᱯᱮ ᱦᱮᱡ ᱮᱱ ᱵᱚᱦᱚᱜ ᱛᱮᱞᱮ ᱟᱛᱟᱝ ᱠᱮᱫ ᱫᱟᱨᱟᱢ ᱠᱮᱫ ᱯᱮᱭᱟ᱾ ᱫᱩᱲᱩᱵ ᱛᱤᱸᱜᱩᱱ ᱱᱤᱭᱟᱹ ᱛᱮ ᱦᱚᱞᱮ ᱠᱷᱟᱴᱚ ᱮᱱᱟ ᱪᱩᱱ ᱨᱮᱪᱚᱝ ᱫᱚᱠᱛᱟ ᱨᱮᱪᱚᱝ, ᱥᱟᱠᱟᱢ ᱨᱮᱪᱚᱝ ᱯᱩᱸᱜᱤ ᱨᱚᱪᱚᱝ ᱥᱮᱸᱜᱮᱞ ᱨᱮᱪᱚᱝ ᱥᱩᱠᱟᱹᱞ ᱨᱮᱪᱚᱝ, ᱡᱚᱢ ᱨᱮᱪᱚᱝ ᱧᱩ ᱨᱮᱪᱚᱝ ᱵᱟᱝ ᱞᱮ ᱩᱨᱩᱱ ᱞᱮᱫ ᱯᱩᱨᱩᱱ ᱞᱮᱫ ᱯᱮᱭᱟ, ᱩᱪ ᱜᱟᱸᱰᱚ ᱩᱪ ᱯᱤᱸᱰᱟᱹ ᱱᱤᱭᱟᱹᱛᱮ ᱦᱚᱸᱞᱮ ᱠᱷᱟᱴᱚ ᱠᱮᱫ ᱯᱮᱭᱟ᱾ ᱟᱫᱚᱞᱮ ᱱᱮᱦᱚᱨᱚᱜ ᱠᱟᱱᱟ ᱵᱟᱯᱞᱟ ᱦᱤᱞᱚᱜ ᱵᱮᱦᱟ ᱦᱤᱞᱚᱜ ᱱᱟᱨᱛᱟ ᱦᱤᱞᱚᱜ ᱪᱷᱟᱹᱴᱭᱟᱹᱨ ᱦᱤᱞᱚᱜ ᱢᱚᱨᱱᱟ ᱦᱤᱞᱚᱜ ᱜᱚᱨᱱᱟ ᱦᱤᱞᱚᱜ, ᱦᱟᱺᱰᱤ ᱠᱚᱞᱮ ᱵᱚᱰᱚᱡ ᱱᱟᱞᱦᱟ ᱡᱚᱝᱟ ᱫᱟᱜ ᱠᱚᱞᱮ ᱞᱩ ᱱᱟᱞᱦᱟ ᱡᱚᱝᱼᱟ᱾ ᱥᱟᱠᱟᱢ ᱠᱚᱞᱮ ᱨᱚᱜ ᱱᱟᱞᱦᱟ ᱡᱚᱝᱼᱟ᱾ ᱠᱟᱹᱦᱩ ᱞᱮᱠᱟ ᱞᱮ ᱛᱟᱦᱮᱸ ᱠᱟᱱᱟ ᱵᱟᱸᱠ ᱞᱮᱠᱟ ᱞᱮ ᱯᱩᱸᱰ ᱮᱱᱟ ᱟᱫᱚ ᱵᱟᱵᱟ ᱢᱚᱬᱮ ᱜᱟᱶᱞᱟ ᱟᱯᱮ ᱜᱮ ᱥᱟᱹᱠᱷᱤ ᱜᱚᱦᱟ ᱛᱟᱸᱦᱮᱱ ᱛᱟᱵᱚᱱ ᱯᱮ᱾ ᱤᱱᱟᱹ ᱠᱚ ᱜᱟᱞ ᱢᱟᱨᱟᱣ ᱵᱟᱲᱟ ᱠᱟᱛᱮ ᱦᱟᱺᱰᱤ ᱠᱚ ᱠᱚ ᱧᱩ ᱡᱚᱝ ᱟ ᱟᱨ ᱫᱚᱝ ᱠᱚ ᱮᱱᱮᱡ ᱵᱟᱲᱟ ᱡᱚᱝᱟ᱾

Written by ᱫᱩᱨᱜᱟᱹ ᱯᱨᱚᱥᱟᱫᱽ ᱢᱩᱨᱢᱩ
Published on Arsi (ᱵᱟᱹᱭᱥᱟᱹᱠ – ᱟᱥᱟᱲ, 2013)