ᱵᱟᱠᱷᱮᱬ ᱵᱤᱱᱛᱤ

ᱢᱟᱜᱽ ᱵᱚᱸᱜᱟ ᱵᱟᱠᱷᱮᱬ

ᱡᱚᱦᱟᱨ ᱜᱚᱥᱟᱸᱭ ᱡᱟᱦᱮᱨ ᱮᱨᱟ, ᱱᱮ ᱮᱱᱫᱚ ᱢᱟᱜᱽ ᱵᱳᱸᱜᱟ ᱧᱩᱛᱩᱢ ᱛᱮ ᱵᱟᱞᱮ ᱥᱤᱢ ᱵᱟᱞᱮ ᱠᱷᱚᱫᱮ ᱞᱮ ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱟᱢ᱾ ᱫᱮ ᱮᱱᱫᱚ ᱱᱟᱶᱟ ᱥᱮᱨᱢᱟ ᱱᱟᱶᱟ ᱱᱟᱝ – ᱵᱚᱞᱚᱱ ᱠᱟᱱ ᱡᱚᱦᱚᱱ ᱠᱟᱱ – ᱚᱱᱟ ᱦᱚᱸ ᱥᱟᱨ ᱠᱟᱜ ᱥᱟᱹᱜᱩᱱ ᱠᱟᱜ-ᱟᱢ᱾ ᱫᱮᱥ ᱨᱮ ᱫᱤᱥᱚᱢ ᱨᱮ ᱢᱟᱛᱠᱚᱢ ᱠᱚ ᱥᱟᱨᱡᱚᱢ ᱠᱚ ᱜᱮᱞᱮ ᱠᱚᱜ ᱵᱟᱦᱟ ᱠᱚᱜ ᱢᱟ᱾ ᱵᱤᱨ ᱨᱮ ᱵᱩᱨᱩ ᱨᱮ – ᱥᱟᱹᱣᱲᱤ ᱟᱞᱮ ᱥᱟᱜᱟᱜᱽ ᱟᱞᱮ ᱟᱲᱟᱜ ᱟᱞᱮ ᱥᱟᱠᱟᱢ ᱟᱞᱮ ᱠᱟᱹᱲᱢᱤ ᱠᱩᱲᱤ ᱜᱩᱛᱨᱩᱫ ᱥᱮᱛᱟ ᱦᱟᱠ ᱠᱟᱠᱚ ᱫᱟᱢᱟᱱ ᱠᱟᱠᱚ ᱟᱢ ᱞᱚᱴᱚ ᱡᱟᱹᱱᱩᱢ ᱠᱟᱲᱠᱮ ᱡᱟᱹᱱᱩᱢ ᱞᱟᱲ ᱠᱚ ᱞᱮᱧ ᱠᱚ ᱛᱮᱱ ᱠᱟᱜ ᱞᱮᱱ ᱠᱟᱜ ᱟᱢ᱾ ᱟᱹᱛᱩ ᱨᱮ ᱢᱟᱦᱬᱟ ᱨᱮ – ᱨᱚᱜᱟᱜ ᱵᱤᱜᱤᱱᱟᱜ ᱟᱞᱚᱢ ᱵᱚᱞᱚ ᱚᱪᱚ ᱥᱚᱲᱚ ᱚᱪᱚᱭᱟ᱾ ᱵᱟᱹᱭᱨᱤ ᱠᱚ ᱵᱟᱹᱲᱦᱤ ᱠᱚ ᱧᱮᱞ ᱫᱟᱨᱟᱢ ᱧᱮᱫ ᱫᱟᱨᱟᱢ ᱠᱟᱠᱚ ᱟᱢ᱾ ᱦᱮᱞᱮᱱ ᱨᱮ ᱛᱟᱦᱮᱸᱱ ᱨᱮ ᱱᱟᱭ ᱜᱮ ᱱᱟᱯᱟᱭ ᱜᱮ ᱥᱟᱨ ᱠᱟᱜ ᱥᱟᱹᱜᱩᱱ ᱠᱟᱜ ᱟᱢ᱾ ᱡᱟᱨᱜᱮ ᱫᱟᱜ ᱡᱟᱹᱲᱤ ᱫᱟᱜ ᱠᱚ ᱦᱚᱭ ᱟᱹᱜᱩ ᱪᱟᱯᱮ ᱟᱹᱜᱩᱭᱟᱢ᱾ ᱡᱤᱣᱤ ᱨᱮ ᱡᱟᱹᱛᱤ ᱨᱮ ᱱᱟᱶᱟ ᱫᱟᱨᱮ ᱱᱟᱶᱟ ᱨᱟᱹᱥ ᱪᱟᱨᱦᱮ ᱠᱟᱜ ᱥᱟᱨᱦᱮ ᱠᱟᱜ ᱟᱢ – ᱡᱚᱦᱟᱨ᱾
(ᱵᱚᱸᱜᱟ ᱠᱚᱫᱚ ᱼ ᱡᱟᱦᱮᱨ ᱮᱨᱟ, ᱢᱚᱬᱮ ᱠᱚ, ᱞᱤᱴᱟᱹ ᱟᱨ ᱡᱟᱦᱟᱸ ᱜᱮᱵᱚ ᱨᱟᱠᱟᱵ ᱟᱠᱟᱫ ᱠᱚ)

ᱵᱟᱦᱟ ᱵᱚᱸᱜᱟ ᱵᱟᱠᱷᱮᱬ

ᱡᱚᱦᱟᱨ ᱜᱚᱥᱟᱸᱭ ᱡᱟᱦᱮᱨ ᱮᱨᱟ, ᱱᱮ ᱮᱱᱫᱚ ᱵᱟᱦᱟ ᱧᱩᱛᱩᱢ ᱛᱮ ᱵᱟᱞᱮ ᱥᱤᱢ ᱵᱟᱞᱮ ᱠᱷᱚᱫᱮ ᱞᱮ ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜᱼᱟᱢ᱾ ᱫᱮ ᱮᱱᱫᱚ ᱱᱚᱶᱟ ᱜᱮᱞᱮ ᱱᱚᱣᱟ ᱵᱟᱦᱟ ᱢᱟᱛᱠᱚᱢ ᱟᱞᱮ ᱥᱟᱨᱡᱚᱢ ᱟᱞᱮ ᱡᱚᱢ ᱟᱞᱮ ᱦᱟᱵᱽ ᱟᱞᱮ ᱞᱟᱡ ᱦᱟᱹᱥᱩ ᱵᱚᱦᱚᱜ ᱦᱟᱹᱥᱩ ᱟᱞᱚᱢ ᱥᱤᱨᱡᱟᱹᱣ ᱚᱪᱚ ᱜᱟᱲᱦᱟᱣ ᱚᱪᱚᱭᱟ᱾ ᱵᱤᱨ ᱨᱮ ᱵᱩᱨᱩ ᱨᱮ – ᱥᱮᱸᱫᱽᱨᱟ ᱟᱞᱮ ᱠᱟᱨᱠᱟ ᱟᱞᱮ ᱡᱤᱞ ᱠᱚ ᱡᱟᱱᱣᱟ ᱠᱚ ᱮᱥᱮᱫ ᱫᱟᱨᱟᱢ ᱥᱟᱢᱟᱝ ᱫᱟᱨᱟᱢ ᱟᱞᱮᱭᱟᱢ᱾ ᱢᱤᱦᱩᱸ ᱮᱸᱜᱟ ᱢᱮᱨᱚᱢ ᱮᱸᱜᱟ ᱟᱹᱛᱤᱧ ᱟᱠᱚ ᱥᱟᱸᱜᱟᱨ ᱟᱠᱚ ᱦᱚᱲᱮᱫ ᱟᱞᱚ ᱯᱟᱹᱴᱩᱵ ᱟᱞᱚ ᱟᱹᱭᱩᱨ ᱟᱹᱜᱩ ᱥᱩᱛᱩᱜ ᱟᱹᱜᱩ ᱠᱚᱣᱟᱢ᱾ ᱥᱤᱧ ᱵᱤᱨ ᱢᱟᱱ ᱵᱤᱨ ᱠᱟᱹᱲᱢᱤ ᱠᱩᱲᱤ ᱜᱩᱛᱨᱩᱫ ᱥᱮᱛᱟ ᱦᱟᱠ ᱠᱟᱠᱚ ᱫᱟᱢᱟᱱ ᱠᱟᱠᱚᱣᱟᱢ᱾ ᱟᱹᱛᱩ ᱨᱮ ᱢᱟᱦᱬᱟ ᱨᱮ ᱨᱚᱜᱟᱜ ᱵᱤᱜᱤᱱᱟᱜ ᱟᱞᱚᱢ ᱞᱟᱜᱟᱣ ᱚᱪᱚ ᱵᱟᱡᱟᱣ ᱚᱪᱚᱭᱟ᱾ ᱡᱟᱨᱜᱮ ᱫᱟᱜ ᱡᱟᱹᱲᱤ ᱫᱟᱜ ᱠᱚ ᱦᱚᱭ ᱟᱹᱜᱩ ᱪᱟᱯᱮ ᱟᱹᱜᱩᱭᱟᱢ᱾ ᱦᱮᱞᱮᱱ ᱨᱮ ᱛᱟᱦᱮᱸᱱ ᱨᱮ ᱱᱟᱜ ᱜᱮ ᱱᱟᱯᱟᱭ ᱜᱮ ᱥᱟᱨ ᱠᱟᱜ ᱥᱟᱹᱜᱩᱱ ᱠᱚᱜ ᱢᱟ᱾ ᱡᱤᱣᱤ ᱨᱮ ᱦᱚᱲᱢᱚ ᱨᱮ ᱨᱟᱹᱥᱠᱟᱹ ᱜᱮ ᱦᱟᱹᱞᱟᱹᱥ ᱜᱮ ᱦᱮᱥᱮᱡ ᱠᱟᱜ ᱥᱮᱠᱮᱡ ᱠᱟᱜ ᱢᱟ – ᱡᱚᱦᱟᱨ!
(ᱵᱚᱸᱜᱟ ᱠᱚᱫᱚ – ᱡᱟᱦᱮᱨ ᱮᱨᱟ, ᱢᱚᱬᱮ ᱠᱚ, ᱞᱤᱴᱟᱹ ᱟᱨ ᱡᱟᱦᱟᱸ ᱜᱮᱵᱚ ᱨᱟᱠᱟᱵ ᱟᱠᱟᱫ ᱠᱚ)

ᱮᱨᱚᱜ ᱵᱚᱸᱜᱟ ᱵᱟᱠᱷᱮᱬ

ᱡᱚᱦᱟᱨ ᱜᱚᱥᱟᱸᱭ ᱡᱟᱦᱮᱨ ᱮᱨᱟ, ᱱᱮ ᱮᱱᱫᱚ ᱮᱨᱚᱜ ᱧᱩᱛᱩᱢ ᱛᱮ ᱵᱟᱞᱮ ᱥᱤᱢ ᱵᱟᱞᱮ ᱠᱷᱚᱫᱮ ᱞᱮ ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱟᱢ᱾ ᱫᱮ ᱮᱱᱫᱚ ᱤᱛᱟᱹᱭ ᱟᱞᱮ ᱮᱨ ᱟᱞᱮ ᱢᱤᱫ ᱴᱷᱮᱱ ᱧᱩᱨᱩᱜ-ᱟ ᱜᱮᱞᱵᱟᱨ ᱴᱷᱮᱱ ᱠᱟᱹᱱᱦᱟᱹᱭ ᱠᱚᱜ ᱢᱟᱹᱱᱦᱟᱹᱭ ᱠᱚᱜ ᱢᱟ᱾ ᱦᱩᱛᱤ ᱠᱚ ᱪᱟᱸᱭᱟ ᱠᱚ ᱤᱨᱤᱡ ᱠᱚ ᱤᱵᱤᱡ ᱠᱚ ᱟᱞᱚᱢ ᱞᱟᱜᱟᱣ ᱚᱪᱚ ᱵᱟᱡᱟᱣ ᱚᱪᱚ ᱟᱠᱚᱣᱟ ᱜᱚᱡ ᱜᱤᱰᱤ ᱛᱚᱨᱚᱡ ᱜᱤᱰᱤ ᱠᱟᱠᱚᱣᱟᱢ᱾

ᱡᱷᱟᱲᱟ ᱠᱚ ᱢᱟᱹᱨᱰᱤ ᱠᱚ ᱞᱮᱱ ᱠᱟᱜ ᱛᱮᱱ ᱠᱟᱜ ᱟᱢ᱾ ᱟᱹᱛᱩ ᱨᱮ ᱢᱟᱦᱬᱟ ᱨᱮ ᱨᱚᱜᱟᱜ ᱵᱤᱜᱤᱱᱟᱜ ᱠᱚ ᱟᱞᱚᱢ ᱵᱚᱞᱚ ᱚᱪᱚ ᱥᱚᱲᱚ ᱚᱪᱚᱭᱟ᱾ ᱡᱟᱨᱜᱮ ᱫᱟᱜ ᱡᱟᱹᱲᱤ ᱫᱟᱜ ᱠᱚ ᱦᱚᱭ ᱟᱹᱜᱩ ᱪᱟᱯᱮ ᱟᱹᱜᱩᱭᱟᱢ᱾ ᱦᱮᱞᱮᱱ ᱨᱮ ᱛᱟᱦᱮᱸᱱ ᱨᱮ ᱱᱟᱭ ᱜᱮ ᱱᱟᱯᱟᱭ ᱜᱮ ᱥᱟᱨ ᱠᱟᱜ ᱥᱟᱹᱜᱩᱱ ᱠᱟᱱ-ᱟᱢ᱾ ᱡᱤᱣᱤ ᱨᱮ ᱡᱟᱹᱛᱤ ᱨᱮ ᱫᱩᱯᱩᱞᱟᱹᱲ ᱥᱩᱯᱩᱞᱟᱹᱲ ᱪᱚᱦᱚᱞ ᱠᱟᱜ ᱵᱚᱦᱚᱞ ᱠᱟᱜ ᱟᱢ – ᱡᱚᱦᱟᱨ᱾
(ᱵᱚᱸᱜᱟ ᱠᱚᱫᱚ – ᱡᱟᱦᱮᱨ ᱮᱨᱟ, ᱢᱚᱬᱮ ᱠᱚ, ᱢᱟᱨᱟᱝ ᱵᱳᱨᱳ ᱟᱨ ᱡᱟᱦᱟᱸ ᱜᱮᱵᱚ ᱨᱟᱠᱟᱵ ᱟᱠᱟᱫ ᱠᱚ)

ᱢᱟᱜ ᱢᱚᱬᱮ ᱵᱚᱸᱜᱟ ᱵᱟᱠᱷᱮᱬ

ᱡᱚᱦᱟᱨ ᱜᱚᱥᱟᱸᱭ ᱡᱟᱦᱮᱨ ᱮᱨᱟ, ᱱᱮ ᱮᱱᱫᱚ ᱢᱟᱜ ᱢᱚᱬᱮ ᱧᱩᱛᱩᱢ ᱛᱮ ᱵᱟᱞᱮ ᱥᱤᱢ ᱵᱟᱞᱮ ᱠᱷᱚᱫᱮ ᱞᱮ ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱟᱢ᱾ ᱫᱮ ᱮᱱᱫᱚ ᱟᱹᱛᱩ ᱨᱮ ᱢᱟᱦᱬᱟ ᱨᱮ ᱨᱚᱜᱟᱜ ᱵᱤᱜᱤᱱᱟᱜ ᱟᱞᱚᱢ ᱵᱚᱞᱚ ᱚᱪᱚ ᱥᱚᱲᱚ ᱚᱪᱚᱭᱟ᱾ ᱵᱟᱹᱭᱨᱤ ᱠᱚ ᱵᱟᱹᱲᱦᱤ ᱠᱚ ᱧᱮᱞ ᱫᱟᱨᱟᱢ ᱧᱮᱫ ᱫᱟᱨᱟᱢ ᱠᱟᱠᱚ ᱟᱢ᱾ ᱦᱚᱭ ᱦᱤᱥᱤᱫ ᱚᱨᱥᱚᱝ ᱮᱞᱟᱝ ᱥᱤᱨᱡᱟᱹᱣᱜ-ᱟ ᱵᱤᱨᱡᱟᱹᱣᱜ-ᱟ ᱚᱱᱟ ᱠᱚᱦᱚᱸ ᱤᱬᱤᱡ ᱠᱟᱜ ᱫᱟᱨᱟᱢ ᱠᱟᱜ ᱟᱢ᱾ ᱨᱩᱣᱟᱹᱜ ᱨᱮ ᱦᱟᱹᱥᱩᱜ ᱨᱮ ᱨᱟᱱ ᱟᱞᱮ ᱢᱩᱨᱜᱟᱹᱱ ᱟᱞᱮ ᱚᱱᱟ ᱦᱚᱸᱢ ᱞᱟᱜᱟᱣ ᱚᱪᱚ ᱵᱟᱡᱟᱣ ᱚᱪᱚᱭᱟ᱾ ᱡᱟᱨᱜᱮ ᱫᱟᱜ ᱡᱟᱹᱲᱤ ᱫᱟᱜ ᱠᱚ ᱦᱚᱭ ᱟᱹᱜᱩ ᱪᱟᱯᱮ ᱟᱹᱜᱩᱭᱟᱢ᱾ ᱦᱮᱞᱮᱱ ᱨᱮ ᱛᱟᱦᱮᱸᱱ ᱨᱮ ᱱᱟᱭᱜᱮ ᱱᱟᱯᱟᱭ ᱜᱮ ᱥᱟᱨ ᱠᱟᱜ ᱥᱟᱹᱜᱩᱱ ᱠᱟᱜ ᱟᱢ᱾ ᱡᱤᱣᱤ ᱨᱮ ᱡᱟᱹᱛᱤ ᱨᱮ ᱜᱩᱱ ᱠᱚ ᱵᱤᱨᱫᱟᱹ ᱠᱚ ᱵᱤᱫ ᱠᱟᱜ ᱵᱮᱨᱮᱞ ᱠᱟᱜ ᱟᱢ – ᱡᱚᱦᱟᱨ᱾
(ᱵᱚᱸᱜᱟ ᱠᱚᱫᱚ – ᱡᱟᱦᱮᱨ ᱮᱨᱟ, ᱢᱚᱬᱮ ᱠᱚ, ᱢᱟᱨᱟᱝ ᱵᱳᱨᱳ ᱟᱨ ᱡᱟᱦᱟᱸ ᱜᱮᱵᱚ ᱨᱟᱠᱟᱵ ᱟᱠᱟᱫ ᱠᱚ)
(ᱤᱨᱩᱜ ᱢᱟᱜ ᱢᱚᱬᱮ ᱵᱟᱠᱷᱮᱬ ᱫᱚ ᱡᱟᱱᱛᱟᱲ ᱵᱟᱠᱷᱮᱬ ᱞᱮᱠᱟ)

ᱟᱹᱥᱟᱹᱲᱤᱭᱟᱹ ᱵᱚᱸᱜᱟ ᱵᱟᱠᱷᱮᱬ

ᱡᱚᱦᱟᱨ ᱜᱚᱥᱟᱸᱭ ᱡᱟᱦᱮᱨ ᱮᱨᱟ, ᱱᱮ ᱮᱱᱫᱚ ᱟᱹᱥᱟᱹᱲᱤᱭᱟᱹ ᱧᱩᱛᱩᱢ ᱛᱮ ᱵᱟᱞᱮ ᱥᱤᱢ ᱵᱟᱞᱮ ᱠᱷᱚᱫᱮ ᱞᱮ ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱝ ᱠᱟᱜ ᱛᱮᱞᱟ ᱠᱟᱜ ᱟᱢ᱾ ᱫᱮ ᱮᱱᱫᱚ ᱡᱟᱨᱜᱮ ᱫᱟᱜ ᱡᱟᱹᱲᱤ ᱫᱟᱜ ᱠᱚ ᱦᱚᱭ ᱟᱹᱜᱩ ᱪᱟᱯᱮ ᱟᱹᱜᱩᱭᱟᱢ᱾ ᱵᱟᱹᱫᱽ ᱠᱚ ᱵᱟᱹᱭᱦᱟᱹᱲ ᱠᱚ ᱞᱟᱞᱮ ᱠᱚᱜ ᱪᱟᱯᱮ ᱠᱚᱜ ᱢᱟ᱾ ᱨᱚᱜᱽ ᱠᱚ ᱨᱚᱦᱚᱫ ᱠᱚ ᱤᱨᱤᱡ ᱠᱚ ᱤᱵᱤᱡ ᱠᱚ ᱟᱹᱨᱩᱵ ᱜᱤᱰᱤ ᱟᱹᱛᱩ ᱜᱤᱰᱤ ᱠᱟᱠᱚ ᱟᱢ᱾ ᱦᱮᱞᱮᱱ ᱟᱞᱮ ᱦᱮᱲᱦᱮᱫ ᱟᱞᱮ ᱠᱩᱫᱩᱢ ᱟᱞᱮ ᱥᱩᱫᱩᱢ ᱟᱞᱮ ᱵᱤᱧ ᱠᱚ ᱠᱤᱫᱤᱧ ᱠᱚ ᱛᱮᱱ ᱠᱟᱠᱚ ᱞᱮᱱ ᱠᱟᱠᱚ ᱟᱢ᱾ ᱢᱤᱦᱩ ᱠᱚ ᱢᱮᱨᱚᱢ ᱠᱚ ᱡᱚ ᱢᱟᱠᱚ ᱟᱹᱛᱤᱧ ᱟᱠᱚ ᱠᱟᱹᱱᱦᱟᱹᱭ ᱫᱚ ᱢᱟᱹᱱᱦᱟᱹᱭ ᱫᱚ ᱪᱟᱨᱦᱮ ᱠᱚᱜ ᱥᱟᱨᱦᱮ ᱠᱚᱜ ᱦᱮᱸᱫᱮ ᱠᱚᱜ ᱦᱟᱹᱨᱭᱟᱹᱲ ᱠᱚᱜ ᱢᱟ᱾ ᱦᱮᱞᱮᱱ ᱨᱮ ᱛᱟᱦᱮᱱ ᱨᱮ ᱱᱟᱭᱜᱮ ᱱᱟᱯᱟᱭ ᱜᱮ ᱥᱟᱨ ᱠᱟᱜ ᱥᱟᱹᱜᱩᱱ ᱠᱟᱜ ᱟᱢ᱾ ᱡᱤᱣᱤ ᱨᱮ ᱦᱚᱲᱢᱚ ᱨᱮ ᱱᱟᱶᱟ ᱫᱟᱨᱮ ᱱᱟᱶᱟ ᱨᱟᱹᱥ ᱪᱚᱦᱚᱞ ᱠᱟᱜ ᱵᱚᱦᱚᱞ ᱠᱟᱜ ᱟᱢ – ᱡᱚᱦᱟᱨ᱾
(ᱵᱚᱸᱜᱟ ᱠᱚᱫᱚ – ᱡᱟᱦᱮᱨ ᱮᱨᱟ, ᱢᱚᱬᱮ ᱠᱚ, ᱢᱟᱨᱟᱝ ᱵᱳᱨᱳ ᱟᱨ ᱡᱟᱦᱟᱸ ᱜᱮᱵᱚ ᱨᱟᱠᱟᱵ ᱟᱠᱟᱫ ᱠᱚ)

ᱡᱟᱱᱛᱟᱲ ᱵᱚᱸᱜᱟ ᱵᱟᱠᱷᱮᱬ

ᱡᱚᱦᱟᱨ ᱜᱚᱥᱟᱸᱭ ᱵᱩᱨᱩ ᱵᱳᱸᱜᱟ ᱹᱹᱹᱹᱹᱹᱹᱹᱹ ᱱᱮ ᱮᱱᱫᱚ ᱡᱟᱱᱛᱟᱲ ᱧᱩᱛᱩᱢ ᱛᱮ ᱫᱟᱬᱮ ᱞᱮ ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱟᱢ᱾ ᱡᱟᱨᱜᱮ ᱫᱟᱜ ᱡᱟᱹᱲᱤ ᱫᱟᱜ ᱠᱚ ᱦᱚᱭ ᱟᱹᱜᱩ ᱪᱟᱯᱮ ᱟᱹᱜᱩᱭᱟᱢ᱾ ᱠᱷᱮᱛ ᱨᱮ ᱠᱷᱟᱹᱨᱟᱹᱭ ᱨᱮ ᱤᱨ ᱟᱞᱮ ᱮᱱ ᱟᱞᱮ ᱯᱮᱴᱮᱡ ᱟᱞᱚ ᱞᱟᱹᱯᱩᱜ ᱟᱞᱚ – ᱡᱚ ᱜᱮ ᱡᱟᱝ ᱜᱮ – ᱥᱟᱦᱟᱨ ᱠᱚᱜ ᱞᱟᱦᱟᱨ ᱠᱚᱜ ᱢᱟ᱾ ᱜᱮᱞᱮ ᱨᱮ ᱵᱤᱞᱤ ᱨᱮ – ᱪᱮᱬᱮ ᱠᱚ ᱪᱩᱴᱩᱭᱟᱹ ᱠᱚ ᱦᱚᱫ ᱟᱠᱚ ᱦᱟᱰᱟᱵᱽ ᱟᱠᱚ ᱦᱟᱠ ᱠᱟᱠᱚ ᱫᱟᱢᱟᱱ ᱠᱟᱠᱚ ᱟᱢ᱾ ᱚᱲᱟᱜ ᱨᱮ – ᱰᱷᱩᱞᱟᱹ ᱨᱮ – ᱰᱤᱞᱤ ᱵᱟᱲᱮ ᱥᱟᱹᱭᱠᱟᱹ ᱵᱟᱲᱮ – ᱛᱚᱵᱮᱫ ᱠᱚᱜ ᱛᱚᱦᱮᱫ ᱠᱚᱜ ᱢᱟ᱾ ᱟᱹᱛᱩ ᱨᱮ ᱢᱟᱦᱬᱟ ᱨᱮ ᱨᱚᱜᱟᱜ ᱠᱚ ᱵᱤᱜᱤᱱᱟᱜ ᱠᱚ ᱟᱞᱚᱢ ᱞᱟᱜᱟᱣ ᱚᱪᱚ ᱵᱟᱡᱟᱣ ᱚᱪᱚᱭᱟ᱾ ᱵᱟᱹᱭᱨᱤ ᱠᱚ ᱵᱟᱹᱲᱦᱤ ᱠᱚ – ᱧᱮᱞ ᱫᱟᱨᱟᱢ ᱧᱮᱫ ᱫᱟᱨᱟᱢ ᱠᱟᱠᱚ ᱟᱢ᱾ ᱫᱮᱥ ᱨᱮ ᱫᱤᱥᱚᱢ ᱨᱮ ᱥᱩᱠ ᱜᱮ ᱥᱩᱞᱩᱠ ᱜᱮ ᱮᱨ ᱠᱟᱜ ᱛᱟᱨᱥᱮ ᱠᱟᱜ ᱟᱢ᱾ ᱡᱤᱣᱤ ᱨᱮ ᱡᱟᱹᱛᱤ ᱨᱮ ᱜᱩᱱ ᱠᱚ ᱵᱤᱨᱫᱟᱹ ᱠᱚ ᱵᱤᱫ ᱠᱟᱜ ᱵᱮᱨᱮᱞ ᱠᱟᱜ ᱟᱢ – ᱡᱚᱦᱟᱨ᱾
(ᱵᱚᱸᱜᱟ ᱠᱚᱫᱚ – ᱚᱠᱟ ᱵᱩᱨᱩ ᱨᱤᱱᱤᱡ ᱵᱳᱸᱜᱟ ᱵᱚ ᱢᱟᱱᱟᱣ ᱟᱠᱟᱫᱮᱭᱟ ᱩᱱᱤ ᱜᱮ ᱹᱹᱹᱹᱹᱹᱹᱹᱹ ᱴᱷᱮᱱ ᱫᱚ ᱧᱩᱛᱩᱢ ᱛᱟᱭ ᱨᱟᱹᱲᱚᱜ-ᱟ᱾)

ᱥᱚᱦᱨᱟᱭ ᱜᱚᱴ ᱵᱚᱸᱜᱟ ᱵᱟᱠᱷᱮᱬ

ᱡᱚᱦᱟᱨ ᱜᱚᱥᱟᱸᱭ ᱡᱟᱦᱮᱨ ᱮᱨᱟ, ᱱᱮ ᱮᱱᱫᱚ ᱜᱚᱴ ᱵᱳᱸᱜᱟ ᱧᱩᱛᱩᱢ ᱛᱮ ᱵᱟᱞᱮ ᱥᱤᱢ ᱵᱟᱞᱮ ᱠᱷᱚᱫᱮ ᱞᱮ ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱟᱢ᱾ ᱫᱮ ᱮᱱᱫᱚ ᱢᱤᱸᱦᱩ ᱮᱸᱜᱟ ᱢᱮᱨᱚᱢ ᱮᱸᱜᱟ ᱟᱹᱛᱤᱧ ᱟᱠᱚ ᱵᱚᱥᱟᱢ ᱟᱠᱚ ᱦᱚᱲᱮᱫ ᱟᱞᱚ ᱯᱟᱹᱴᱩᱵ ᱟᱞᱚ ᱟᱹᱭᱩᱨ ᱟᱹᱜᱩ ᱥᱩᱛᱩᱜ ᱟᱹᱜᱩ ᱠᱟᱠᱚ ᱟᱢ᱾ ᱜᱚᱴ ᱨᱮ ᱜᱚᱨᱟᱢ ᱨᱮ ᱨᱚᱜᱟᱜ ᱵᱤᱜᱤᱱᱟᱜ ᱠᱚ ᱟᱞᱚᱢ ᱞᱟᱜᱟᱣ ᱚᱪᱚ ᱵᱟᱡᱟᱣ ᱚᱪᱚᱭᱟ᱾ ᱨᱤᱛᱩ ᱨᱮ ᱦᱤᱛᱩ ᱨᱮ ᱢᱤᱫ ᱢᱤᱸᱦᱩ ᱛᱮ ᱥᱟᱭ ᱢᱤᱸᱦᱩ ᱠᱚ ᱵᱟᱹᱰ ᱠᱚᱜ ᱵᱚᱨᱛᱮᱫ ᱠᱚᱜ ᱢᱟ᱾ ᱫᱮ ᱮᱱᱫᱚ ᱟᱞᱮ ᱦᱚᱸᱞᱮ ᱥᱟᱨᱦᱟᱣ ᱠᱚ ᱪᱟᱨᱦᱟᱣ ᱠᱚᱣᱟ ᱧᱤᱫᱟᱹ ᱨᱮ ᱧᱩᱛᱟᱹᱛ ᱨᱮ ᱫᱟᱲᱟᱱ ᱟᱞᱮ ᱫᱚᱱ ᱟᱞᱮ ᱨᱟᱥᱠᱟᱫ ᱟᱞᱚ ᱨᱚᱥᱠᱚᱫ ᱟᱞᱚ ᱵᱤᱧ ᱠᱚ ᱠᱤᱫᱤᱧ ᱠᱚ ᱞᱮᱱ ᱠᱟᱠᱚ ᱛᱮᱱ ᱠᱟᱠᱚ ᱟᱢ᱾ ᱡᱤᱣᱤ ᱨᱮ ᱦᱚᱲᱢᱚ ᱨᱮ ᱨᱟᱹᱥᱠᱟᱹ ᱜᱮ ᱦᱟᱹᱥᱠᱟᱹ ᱜᱮ ᱦᱮᱥᱮᱡ ᱠᱚᱜ ᱥᱮᱠᱮᱡ ᱠᱚᱜ ᱢᱟ – ᱡᱚᱦᱟᱨ᱾
(ᱵᱚᱸᱜᱟ ᱠᱚᱫᱚ – ᱡᱟᱦᱮᱨ ᱮᱨᱟ, ᱢᱚᱬᱮ ᱠᱚ, ᱞᱤᱴᱟᱹ ᱟᱨ ᱡᱟᱦᱟᱸ ᱜᱮᱵᱚ ᱨᱟᱠᱟᱵ ᱟᱠᱟᱫ ᱠᱚ)

ᱯᱟᱨᱟᱵᱽ ᱠᱚᱨᱮᱱᱟᱜ ᱦᱟᱺᱰᱤ ᱵᱚᱸᱜᱟ

ᱡᱚᱦᱟᱨ ᱜᱚᱥᱟᱸᱭ ᱢᱟᱨᱟᱝ ᱵᱳᱨᱳ, ᱱᱮ ᱮᱱᱫᱚ ᱹᱹᱹᱹᱹᱹᱹᱹᱹ ᱯᱟᱨᱟᱵᱽ ᱧᱩᱛᱩᱢ ᱛᱮ – ᱡᱷᱟᱨ ᱫᱟᱜ ᱛᱟᱯᱟᱝ ᱫᱟᱜ ᱞᱮ – ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ – ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱟᱢ᱾ ᱫᱮ ᱮᱱᱫᱚ ᱟᱞᱮ ᱦᱚᱸᱞᱮ – ᱡᱚᱢᱟ ᱧᱩᱭᱟ – ᱞᱟᱡ ᱦᱟᱹᱥᱩ ᱵᱚᱦᱚᱜ ᱦᱟᱹᱥᱩ ᱟᱞᱚᱢ ᱥᱤᱨᱡᱟᱹᱣ ᱚᱪᱚ ᱵᱤᱨᱡᱟᱹᱣ ᱚᱪᱚᱭᱟ᱾ ᱨᱚᱜᱟᱜ ᱵᱤᱜᱤᱱᱟᱜ ᱠᱚ ᱟᱞᱚᱢ ᱵᱚᱞᱚ ᱚᱪᱚ ᱥᱚᱲᱚ ᱚᱪᱚᱭᱟ᱾ ᱦᱤᱥᱠᱟᱹ ᱦᱩᱞᱩᱢ ᱠᱚ ᱟᱞᱚᱢ ᱞᱟᱜᱟᱣ ᱚᱪᱚ ᱵᱟᱡᱟᱣ ᱚᱪᱚᱭᱟ᱾ ᱵᱟᱹᱭᱨᱤ ᱠᱚ ᱵᱟᱹᱲᱦᱤ ᱠᱚ ᱧᱮᱞ ᱫᱟᱨᱟᱢ ᱧᱮᱫ ᱫᱟᱨᱟᱢ ᱠᱟᱠᱚ ᱟᱢ᱾ ᱚᱲᱟᱜ ᱨᱮ ᱜᱚᱲᱟ ᱨᱮ – ᱡᱚᱛᱚ ᱜᱮ ᱱᱟᱭ ᱜᱮ – ᱱᱟᱯᱟᱭ ᱜᱮᱞᱮ ᱛᱟᱦᱮᱸ ᱠᱚᱜ ᱢᱟ᱾ ᱟᱯᱮ ᱦᱚᱸ ᱱᱟᱭ ᱵᱟᱲᱮ ᱱᱟᱯᱟᱭ ᱵᱟᱲᱮ – ᱫᱤᱲ ᱟᱠᱟᱱ ᱫᱟᱹᱦᱤᱱ ᱟᱠᱟᱱ ᱛᱟᱦᱮᱸ ᱠᱚᱜ ᱯᱮ – ᱡᱚᱦᱟᱨ᱾
(ᱹᱹᱹᱹᱹᱹᱹᱹᱹ ᱴᱷᱮᱱ ᱫᱚ ᱯᱟᱨᱟᱵᱽ ᱠᱚ ᱧᱩᱛᱩᱢᱚᱜ-ᱟ, ᱵᱚᱸᱜᱟ ᱠᱚᱫᱚ – ᱢᱟᱨᱟᱝ ᱵᱳᱨᱳ ᱟᱨ ᱦᱟᱯᱲᱟᱢ ᱠᱚ᱾)