ᱛᱮᱞᱠᱩᱯᱤ ᱫᱚ ᱢᱮᱱᱞᱮᱠᱷᱟᱱ ᱜᱮ ᱡᱟᱝ ᱵᱟᱦᱟ ᱤᱫᱤ ᱴᱷᱟᱶᱚᱜ ᱱᱟᱹᱭᱵᱚᱱ ᱦᱩᱫᱤᱥ ᱴᱷᱟᱹᱣᱠᱟᱹ ᱜᱚᱫᱟ᱾ ᱛᱮᱞᱠᱩᱯᱤ ᱫᱚ ᱟᱹᱰᱤ ᱦᱚᱲ ᱜᱮᱵᱚᱱ ᱥᱮᱱ ᱟᱠᱟᱱᱟ ᱟᱨ ᱵᱚᱱ ᱧᱮᱞ ᱟᱹᱜᱩ ᱟᱠᱟᱫᱟ᱾ ᱟᱹᱰᱤ ᱥᱮᱫᱟᱭ ᱛᱤᱱᱟᱹᱜ ᱫᱤᱱ ᱠᱷᱚᱱ ᱪᱚᱝ ᱦᱟᱯᱲᱟᱢ ᱵᱤᱫᱟᱹᱞ ᱦᱟᱯᱲᱟᱢ ᱠᱷᱚᱱ ᱡᱟᱝ ᱵᱟᱦᱟ ᱟᱹᱛᱩ ᱞᱟᱹᱜᱤᱫ ᱱᱚᱶᱟ ᱛᱮᱞᱠᱩᱯᱤ ᱫᱚᱵᱚᱱ ᱦᱤᱨᱤ ᱤᱫᱤᱭᱮᱫ ᱜᱮᱭᱟ᱾ ᱱᱚᱸᱰᱮ ᱛᱤᱱᱟᱹᱜ ᱦᱟᱯᱲᱟᱢ ᱠᱚᱣᱟᱜ ᱡᱟᱝ ᱵᱟᱦᱟ ᱵᱚᱱ ᱛᱩᱯᱩ ᱟᱠᱟᱫᱟ ᱱᱚᱣᱟ ᱨᱮᱭᱟᱜ ᱞᱮᱠᱷᱟ ᱡᱚᱠᱷᱟ ᱫᱚ ᱯᱟᱞᱮᱱ ᱱᱩᱭ ‘ᱫᱟᱢᱩᱫᱚᱨ’ ᱱᱟᱹᱭ ᱜᱮᱭ ᱞᱟᱹᱭ ᱫᱟᱲᱮᱭᱟᱜᱼᱟ ᱟᱨ ᱛᱤᱥᱠᱷᱚᱱ ᱵᱚᱱ ᱛᱩᱯᱩᱭᱮᱫᱟ ᱚᱸᱰᱮᱱᱟᱜ ᱜᱤᱛᱤᱞ ᱟᱨ ᱞᱚᱥᱚᱫ ᱵᱚᱱ ᱟᱸᱡᱽᱞᱮ ᱨᱟᱠᱟᱵ ᱞᱮᱠᱷᱟᱱ ᱩᱱᱠᱩ ᱦᱟᱯᱲᱟᱢ ᱠᱚᱣᱟᱜ ᱠᱟᱛᱷᱟ ᱠᱚ ᱞᱟᱹᱭᱟ᱾
ᱟᱵᱚ ᱦᱚᱸ ᱩᱱᱠᱩ ᱦᱟᱯᱲᱟᱢ ᱠᱚᱣᱟᱜ ᱦᱚᱨ ᱰᱟᱦᱟᱨ ᱛᱮᱜᱮ ᱵᱚᱱ ᱦᱤᱡᱩᱜ ᱠᱟᱱᱟ ᱥᱮᱱᱚᱜ ᱠᱟᱱᱟ ᱼ ᱚᱱᱟ ᱱᱟᱹᱭ ᱜᱟᱰᱟ ᱥᱮᱫ ᱜᱮ᱾ ᱯᱟᱞᱮᱱ ᱟᱹᱰᱤ ᱠᱚᱢ ᱦᱚᱲ ᱜᱮᱵᱚᱱ ᱵᱟᱰᱟᱭᱟ ᱱᱚᱶᱟ ᱛᱮᱞᱠᱩᱯᱤ ᱵᱟᱵᱚᱛ ᱫᱚ᱾ ᱚᱸᱰᱮ ᱱᱤᱛᱚᱜ ᱢᱟ ᱧᱮᱞᱧᱟᱢᱚᱜ ᱞᱮᱠᱟᱱᱟᱜ ᱢᱟ ᱛᱤᱸᱜᱩ ᱟᱠᱟᱱᱟ ᱨᱚᱠ ᱨᱚᱠᱚ ᱩᱱᱩᱢ ᱥᱟᱨᱮᱡᱟᱜ ᱛᱮᱞᱠᱩᱯᱤ ᱢᱩᱱᱫᱤᱨ᱾ ᱟᱹᱰᱤ ᱦᱟᱦᱟᱲᱟ ᱠᱟᱛᱷᱟ᱾ ᱟᱵᱚᱢᱟ ᱢᱩᱱᱫᱤᱨ ᱨᱮ ᱵᱚᱸᱜᱟ ᱦᱚᱲ ᱢᱟᱵᱚᱱ ᱵᱟᱝ ᱠᱟᱱᱟ, ᱮᱱᱨᱮᱦᱚᱸ ᱚᱸᱰᱮ ᱢᱩᱱᱫᱤᱨ ᱪᱮᱫᱟᱜ? ᱟᱨ ᱱᱚᱶᱟ ᱦᱚᱸᱛᱚ ᱵᱟᱭ ᱵᱟᱰᱟᱭ ᱧᱟᱢ ᱟᱠᱟᱱᱟ, ᱮᱴᱟᱜ ᱦᱚᱲᱟᱜ ᱛᱤᱨᱛᱷᱚᱥᱛᱷᱟᱱ, ᱵᱚᱸᱜᱟ ᱛᱷᱟᱱ ᱟᱭᱛᱟᱱ ᱢᱮᱱᱛᱮ ᱦᱚᱸ᱾ ᱥᱟᱺᱜᱤᱧ ᱨᱮᱦᱚᱸ ᱯᱚᱞᱚᱢᱚᱜ ᱨᱮᱦᱚᱸ ᱢᱤᱫ ᱫᱤᱱ ᱫᱚ ᱚᱸᱰᱮ ᱡᱟᱝ ᱵᱟᱦᱟ ᱤᱫᱤ ᱛᱮᱜᱮ ᱦᱩᱭᱩᱜᱼᱟ, ᱵᱚᱸᱜᱟ ᱦᱚᱸ ᱛᱚ ᱱᱟᱹᱭ ᱜᱟᱰᱟ ᱦᱟᱥᱟ ᱞᱚᱥᱚᱫ ᱵᱮᱱᱟᱣᱚᱜ ᱯᱤᱸᱰᱟᱹᱨᱮ ᱟᱨ ᱜᱷᱟᱴ ᱨᱮᱢᱟ ᱜᱷᱟᱴ ᱯᱟᱨᱜᱟᱱᱟ ᱢᱮᱱᱟᱭᱟ᱾ ᱩᱱᱤ ᱴᱷᱮᱱ ᱠᱷᱚᱱ ᱜᱮ ᱜᱷᱟᱴ ᱨᱮ ᱡᱟᱝ ᱵᱟᱦᱟ ᱛᱩᱯᱩ ᱞᱟᱹᱜᱤᱫ ᱜᱷᱟᱴ ᱠᱤᱨᱤᱧ ᱯᱩᱭᱥᱟᱹ ᱵᱚᱱ ᱪᱟᱻᱞᱟ, ᱱᱚᱣᱟ ᱱᱟᱹᱭ ᱨᱮᱭᱟᱜ ᱦᱟᱥᱟ ᱫᱷᱩᱲᱤ ᱟᱨ ᱫᱟᱜ ᱨᱮ ᱢᱮᱥᱟᱜ ᱨᱮᱭᱟᱜ ᱡᱚᱛᱚ ᱦᱚᱲᱟᱜ ᱟᱸᱥ ᱢᱮᱱᱟᱜᱼᱟ ᱚᱱᱟ ᱛᱮᱜᱮ ᱵᱚᱱ ᱥᱮᱨᱮᱧᱟ ᱼ
ᱯᱟᱹᱦᱤᱞ ᱯᱟᱹᱦᱤᱞ ᱡᱷᱮᱴ ᱵᱮᱴᱟ
ᱟᱛᱱᱟᱜ ᱥᱟᱱᱟᱢ ᱨᱮᱞᱟᱝ ᱦᱚᱵᱚᱨ ᱞᱮᱫᱮ
ᱱᱩᱭ ᱜᱮᱭ ᱱᱤᱫᱤᱞᱟᱹᱝ ᱛᱮᱞᱠᱩᱯᱤ ᱵᱟᱹᱨᱱᱤ ᱜᱷᱟᱴ
ᱱᱩᱭ ᱜᱮᱭ ᱱᱤᱫᱤᱞᱟᱝᱟ ᱜᱟᱹᱭᱟᱹ ᱜᱷᱟᱴ ᱛᱮ᱾
ᱛᱮᱞᱠᱩᱯᱤ ᱛᱮ ᱜᱤᱫᱽᱨᱟᱹ ᱡᱟᱝ ᱵᱟᱦᱟᱭ ᱤᱫᱤ ᱜᱮᱭᱟ ᱟᱨ ᱱᱚᱶᱟ ᱦᱚᱸ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱡᱮ ᱜᱚᱡ ᱠᱟᱛᱮ ᱦᱚᱸ ᱦᱟᱯᱲᱟᱢ ᱛᱩᱞᱩᱡ ᱵᱚᱱ ᱧᱟᱯᱟᱢ ᱜᱮᱭᱟ ᱱᱚᱶᱟ ᱛᱮᱞᱠᱩᱯᱤ ᱨᱮ᱾ ᱫᱷᱟᱹᱨᱛᱤ ᱨᱮᱭᱟᱜ ᱱᱤᱭᱚᱢ ᱞᱮᱠᱟᱛᱮ ᱦᱤᱡᱩᱜ ᱠᱚᱫᱚ ᱵᱚᱱ ᱦᱤᱡᱩᱜ ᱠᱟᱱ ᱜᱮᱭᱟ ᱟᱨ ᱥᱮᱱᱚᱜ ᱠᱚᱫᱚ ᱵᱚᱱ ᱥᱮᱱᱚᱜ ᱠᱟᱱ ᱜᱮᱭᱟ ᱢᱤᱫ ᱞᱮᱛᱟᱲ ᱛᱟᱭᱚᱢ ᱢᱟᱲᱟᱝ ᱞᱮᱛᱟᱲᱟᱠᱟᱱ ᱼ ᱨᱮᱞᱟᱣᱟᱠᱟᱱ ᱛᱩᱯᱩᱼᱛᱟᱹᱯᱩᱜ ᱧᱟᱯᱟᱢᱚᱜ ᱢᱮᱱᱛᱮᱼ ᱚᱱᱟᱛᱮᱜᱮ ᱠᱚ ᱥᱮᱨᱮᱧᱟ ᱼ
ᱛᱮᱞᱠᱩᱯᱤ ᱜᱷᱟᱴ ᱨᱮᱞᱟᱝ ᱛᱩᱯᱩ ᱧᱟᱯᱟᱢ
ᱜᱟᱹᱭᱟᱹ ᱜᱷᱟᱴ ᱨᱮᱞᱟᱝ ᱫᱩᱯᱩᱞ ᱧᱟᱯᱟᱢ
ᱥᱟᱹᱨᱤᱜᱮ ᱱᱚᱶᱟ ᱫᱷᱟᱹᱨᱛᱤ ᱨᱮᱭᱟᱜ ᱢᱟᱭᱟ ᱢᱮᱱᱟᱜ ᱡᱤᱣᱤ ᱫᱚ ᱱᱚᱶᱟ ᱛᱮᱞᱠᱩᱯᱤ ᱨᱮᱭᱟᱜ ᱚᱜᱚᱢᱟ ᱫᱟᱨᱦᱟ ᱫᱟᱜ ᱨᱮ ᱡᱟᱭ ᱡᱩᱜᱽ ᱞᱟᱹᱜᱤᱫ ᱛᱩᱯᱩ ᱥᱟᱶᱛᱮ ᱫᱩᱯᱩᱞ ᱧᱟᱯᱟᱢ ᱩᱛᱟᱹᱨᱚᱜ ᱜᱮᱭᱟ᱾ ᱟᱨ ᱵᱟᱹᱭ ᱵᱟᱹᱭᱛᱮ ᱚᱜᱚᱢᱟ ᱫᱚᱨᱭᱟ ᱥᱮᱱ ᱞᱤᱸᱡᱤ ᱤᱫᱤᱜᱼᱟ ᱱᱚᱶᱟ ᱡᱟᱝ ᱵᱟᱦᱟ ᱠᱚ ᱜᱚᱜ ᱠᱟᱛᱮ ᱡᱟᱦᱟᱸ ᱨᱮ ᱯᱤᱞᱪᱩ ᱦᱟᱲᱟᱢ ᱯᱤᱞᱪᱩ ᱵᱩᱰᱷᱤ ᱠᱤᱱ ᱡᱟᱱᱟᱢ ᱞᱮᱱ ᱮᱛᱚᱦᱚᱵ ᱚᱸᱰᱮ ᱜᱮ ᱯᱟᱞᱮᱱ ᱢᱩᱪᱟᱹᱫ᱾
ᱛᱮᱞᱠᱩᱯᱤ ᱫᱚ ᱵᱮᱝᱜᱚᱞ ᱯᱚᱱᱚᱛ ᱯᱩᱨᱩᱞᱤᱭᱟᱹ ᱡᱤᱞᱟᱹ ᱨᱮᱭᱟᱝ ᱫᱟᱹᱢᱩᱫᱚᱨ ᱱᱟᱹᱭ ᱰᱷᱤᱯᱨᱮ ᱢᱮᱱᱟᱜᱼᱟ, ᱛᱮᱞᱠᱩᱯᱤ ᱨᱮᱭᱟᱜ ᱟᱨ ᱢᱤᱫ ᱧᱩᱛᱩᱢ ᱫᱚ ᱫᱤᱠᱩ ᱛᱮᱫᱚ ‘ᱛᱮᱞ ᱠᱚᱢᱯ’᱾ ᱛᱮᱞ ᱫᱚ ᱠᱚ ᱢᱮᱛᱟᱜᱼᱟ ᱥᱩᱱᱩᱢ᱾ ᱧᱩᱛᱩᱢᱟᱱ ᱤᱠᱚᱱᱚᱢᱤᱥᱴ ᱠᱳᱣᱴᱤᱞᱭᱚ ᱟᱡᱟᱜ ᱚᱨᱛᱷᱚ ᱥᱟᱥᱛᱨᱚ ᱨᱮ ᱫᱚ ᱢᱤᱫ ᱠᱷᱟᱡᱽᱱᱟ ᱴᱮᱠᱥ ᱢᱮᱱᱛᱮᱭ ᱞᱟᱹᱭ ᱟᱠᱟᱫᱟ᱾ ᱟᱨ ᱢᱤᱫ ᱛᱷᱚᱠ ᱦᱚᱲ ᱫᱚ ᱛᱮᱞᱠᱮᱢᱯ ᱢᱮᱱᱛᱮ “ᱯᱟᱨᱜᱟᱱᱟ” ᱠᱚ ᱞᱟᱹᱭ ᱥᱚᱫᱚᱨ ᱟᱠᱟᱫᱟ᱾ ᱚᱱᱟᱛᱮ ᱱᱚᱣᱟ ᱦᱚᱸ ᱵᱚ ᱢᱮᱱ ᱫᱟᱲᱮᱭᱟᱜᱼᱟ, ᱛᱮᱞᱠᱩᱯᱤᱜᱮ ᱛᱮᱞᱠᱮᱢᱯ ᱫᱚ ᱟᱨ ᱱᱚᱶᱟ ᱦᱚᱸ ᱯᱩᱥᱴᱟᱹᱣ ᱥᱟᱺᱦᱤᱡ ᱵᱚᱱ ᱢᱮᱱ ᱫᱟᱲᱮᱭᱟᱜᱼᱟ ᱡᱟᱦᱟᱸ ᱯᱟᱨᱜᱟᱱᱟ ᱨᱮ ᱠᱷᱟᱡᱽᱱᱟ ᱮᱢᱚᱜ ᱨᱮᱭᱟᱜ ᱱᱤᱭᱚᱢ ᱛᱟᱸᱦᱮ ᱠᱟᱱᱟ ᱚᱱᱟᱜᱮ “ᱛᱮᱞᱠᱩᱯᱤ”᱾ ᱟᱨ ᱢᱤᱫ ᱛᱷᱚᱠ ᱦᱚᱲ ᱫᱚ ᱢᱮᱱᱟ ᱠᱚ ᱛᱮᱞᱠᱩᱯᱤ ᱫᱚ ᱯᱟᱲᱟ ᱯᱟᱪᱮᱛ ᱯᱟᱨᱜᱟᱱᱟᱣᱟᱜ ᱨᱟᱡᱽ ᱜᱟᱲ ᱛᱟᱸᱦᱮ ᱠᱟᱱᱟ᱾ ᱱᱚᱝᱠᱟ ᱛᱮ ᱵᱟᱰᱟᱭᱚᱜ ᱠᱟᱱᱟ ᱛᱮᱞᱠᱩᱯᱤ ᱫᱚ ᱟᱹᱰᱤ ᱱᱟᱢᱰᱟᱠ “ᱱᱟᱜᱽᱨᱟᱦᱟ” ᱜᱟᱲ ᱛᱟᱦᱮᱸ ᱠᱟᱱᱟ᱾ ᱟᱨᱦᱚᱸ ᱠᱚ ᱢᱮᱱᱟ ᱥᱤᱠᱟᱹᱨ ᱯᱟᱨᱜᱟᱱᱟ ᱛᱮᱞᱠᱩᱯᱤ ᱨᱮᱭ ᱛᱟᱦᱮᱸᱱ ᱡᱚᱦᱚᱜ ᱚᱱᱟ ᱫᱤᱥᱚᱢ ᱫᱚ ᱟᱡᱟᱜ ᱧᱩᱛᱩᱢ ᱞᱮᱠᱟᱛᱮ ᱥᱤᱠᱟᱹᱨ ᱫᱤᱥᱚᱢ ᱢᱮᱱᱛᱮ ᱵᱟᱰᱟᱭ ᱞᱮᱱᱟ᱾ ᱟᱨ ᱱᱤᱛᱚᱜ ᱦᱚᱸ ᱥᱤᱠᱟᱹᱨ ᱫᱤᱥᱚᱢ ᱢᱮᱱᱛᱮ ᱜᱮᱵᱚᱱ ᱵᱟᱰᱟᱭᱟ᱾ ᱟᱨ ᱦᱚᱸ ᱟᱸᱡᱚᱢ ᱛᱤᱭᱩᱜᱚᱜᱼᱟ ᱚᱱᱟ ᱥᱤᱠᱟᱹᱨ ᱫᱤᱥᱚᱢ ᱫᱚ ᱵᱷᱟᱲᱟ ᱛᱮ ᱫᱚ “ᱥᱮᱨᱜᱟᱲ” ᱢᱮᱱᱛᱮ ᱵᱟᱰᱟᱭᱚᱜ ᱛᱟᱸᱦᱮᱱ᱾ ᱫᱷᱟᱹᱨᱛᱤ ᱨᱮ ᱪᱮᱫ ᱚᱜᱷᱚᱴᱚᱱ ᱪᱚᱝ ᱜᱷᱚᱴᱟᱣᱮᱱ ᱵᱟᱝ ᱫᱚ ᱡᱩᱜᱤᱭᱟᱹᱵᱟᱱ, ᱵᱟᱝ ᱫᱚ ᱥᱮᱸᱜᱮᱞ ᱡᱟᱹᱰᱤ, ᱵᱟᱝ ᱫᱚ ᱦᱚᱭ ᱵᱟᱹᱨᱰᱩ, ᱵᱟᱝ ᱫᱚ ᱱᱚᱶᱟ ᱚᱛᱮᱛ ᱞᱟᱲᱟᱣ ᱫᱷᱟᱥᱟᱣᱮᱱ ᱥᱮᱨᱜᱟᱲ ᱟᱨ ᱥᱤᱠᱟᱹᱨ ᱜᱟᱲ ᱫᱚ ᱫᱷᱟᱥᱟᱣ ᱞᱮᱱᱟ ᱢᱮᱱᱛᱮ ᱱᱤᱛ ᱦᱚᱸ ᱠᱚ ᱥᱮᱨᱮᱧᱟ ᱼ
ᱥᱮᱨᱜᱟᱲ ᱥᱤᱠᱟᱹᱨ ᱜᱟᱲ,
ᱫᱷᱟᱥᱟᱣᱮᱱ ᱫᱟᱹᱭᱱᱟ
ᱱᱟᱞᱟᱝ ᱦᱚᱱᱟ ᱫᱟᱹᱭᱱᱟ ᱟᱯᱟᱵᱟᱨᱮ ᱵᱷᱩᱨᱜᱮ᱾
ᱱᱟᱞᱟᱝ ᱦᱚᱱᱟ ᱫᱟᱹᱭᱱᱟ ᱡᱟᱞᱮ ᱛᱷᱟᱞᱮ᱾
ᱥᱮᱫᱟᱭ ᱠᱷᱚᱱ ᱱᱚᱶᱟ ᱥᱮᱨᱮᱧ ᱫᱚ ᱢᱚᱪᱟ ᱠᱷᱚᱱᱟᱜ ᱢᱚᱪᱟ ᱞᱩᱛᱩᱨ ᱠᱷᱚᱱᱟᱜ ᱞᱩᱛᱩᱨ ᱨᱮᱵᱚᱱ ᱨᱮᱵᱮᱫ ᱟᱹᱜᱩ ᱟᱠᱟᱫᱟ᱾ ᱱᱚᱶᱟ ᱯᱩᱱ ᱠᱷᱚᱫᱽ ᱥᱮᱨᱮᱧ ᱛᱮᱜᱮ ᱱᱟᱜᱟᱢ ᱦᱚᱸ ᱵᱚᱱ ᱯᱟᱸᱡᱟ ᱧᱟᱢ ᱜᱚᱫᱟ᱾ ᱢᱤᱫ ᱢᱤᱫ ᱛᱮ ᱥᱮᱨᱜᱟᱲ ᱦᱚᱸ ᱫᱷᱟᱥᱟᱣᱮᱱᱟ ᱟᱨ ᱥᱤᱠᱟᱹᱨ ᱜᱟᱲ ᱦᱚᱸ᱾ ᱫᱤᱥᱚᱢ ᱦᱚᱲᱠᱚ ᱦᱟᱞᱮ ᱰᱟᱞᱮᱭᱮᱱᱟ ᱮᱸᱜᱟᱛ ᱟᱯᱟᱛ ᱴᱷᱮᱱ ᱠᱷᱚᱱ ᱠᱚ ᱪᱷᱩᱰᱟᱹᱨᱮᱱᱟ ᱟᱨ ᱠᱚ ᱟᱯᱟᱫ ᱮᱱᱟ ᱢᱮᱱᱛᱮ ᱱᱚᱶᱟ ᱛᱮᱞᱠᱩᱯᱤ ᱨᱮᱜᱮ ᱜᱚᱡ ᱠᱟᱛᱮ ᱧᱟᱯᱟᱢ ᱨᱮᱭᱟᱜ ᱠᱚ ᱨᱤᱠᱟᱹ ᱞᱮᱫᱟ᱾
ᱥᱮᱨᱜᱟᱲ ᱟᱨ ᱥᱤᱠᱟᱹᱨ ᱜᱟᱲ ᱨᱮᱫᱚ ᱟᱹᱰᱤᱜᱟᱱ ᱜᱮᱞᱵᱟᱨ ᱪᱩᱲᱟᱹ ᱫᱚᱞᱟᱱ ᱛᱟᱦᱮᱸ ᱠᱟᱱᱟ᱾ ᱫᱷᱟᱥᱟᱣᱮᱱ ᱚᱠᱛᱚ ᱚᱱᱟ ᱜᱮᱞᱵᱟᱨ ᱪᱩᱲᱟᱹ ᱫᱚᱞᱟᱱ ᱨᱮᱭᱟᱜ ᱢᱤᱫ ᱵᱟᱨ ᱪᱩᱲᱟᱹ ᱛᱮᱫ ᱜᱮ ᱱᱤᱛᱚᱜ ᱥᱟᱨᱮᱡ ᱟᱠᱟᱱᱟ᱾ ᱚᱱᱮ ᱫᱷᱟᱥᱟᱣ ᱥᱟᱨᱮᱡ ᱪᱩᱲᱟᱹ ᱨᱮᱜᱮ ᱮᱴᱟᱜ ᱦᱚᱲ ᱦᱮᱡ ᱠᱟᱛᱮ ᱠᱚ ᱵᱚᱞᱚᱭᱮᱱᱟ ᱟᱨ ᱵᱚᱸᱜᱟ ᱠᱚ ᱮᱦᱚᱵ ᱠᱮᱫᱟ ᱱᱚᱶᱟ ᱤᱧᱟᱜ ᱯᱟᱹᱛᱭᱟᱹᱣ ᱦᱩᱭᱩᱜ ᱠᱟᱱᱟ᱾ ᱪᱤᱠᱟᱹᱛᱮ ᱱᱤᱛᱚᱜ ᱦᱚᱸ ᱟᱵᱚ ᱜᱮᱞ ᱵᱟᱨ ᱪᱩᱲᱟᱹ ᱫᱚᱞᱟᱱ ᱨᱮᱭᱟᱜ ᱵᱚᱱ ᱥᱮᱨᱮᱧᱟ ᱫᱚ ᱼ
ᱥᱮᱨᱢᱟ ᱞᱟᱛᱟᱨ ᱨᱮ ᱫᱷᱟᱹᱨᱛᱤ ᱪᱮᱛᱟᱱ ᱨᱮ
ᱞᱤᱞᱤ ᱵᱤᱪᱷᱤ ᱥᱚᱱᱟ ᱫᱚᱞᱟᱱ ᱜᱮᱞᱵᱟᱨ ᱪᱩᱲᱟᱹ
ᱪᱤᱠᱟᱹᱛᱤᱧ ᱵᱚᱞᱚᱱᱟ ᱪᱤᱠᱟᱹᱛᱤᱧ ᱫᱮᱡᱚᱜᱼᱟ
ᱞᱤᱞᱤ ᱵᱤᱪᱷᱤ ᱥᱚᱱᱟ ᱫᱚᱞᱟᱱ ᱜᱮᱞᱵᱟᱨ ᱪᱩᱲᱟᱹ᱾
ᱟᱨᱦᱚᱸ ᱱᱚᱝᱠᱟ ᱜᱮ ᱟᱹᱰᱤ ᱜᱟᱱ ᱥᱮᱨᱮᱧ ᱢᱮᱱᱟᱜᱼᱟ ᱼ
ᱱᱟᱞᱮ ᱵᱚᱭᱦᱟ ᱫᱚ ᱱᱟᱹᱰᱤᱞᱮ ᱥᱟᱸᱜᱮᱭᱟ
ᱥᱟᱱᱟᱢ ᱵᱚᱭᱦᱟ ᱫᱚ ᱵᱟᱝ ᱞᱮ ᱡᱚᱢᱟ
ᱵᱟᱡᱟᱨ ᱫᱚᱞᱟᱱ ᱫᱚ ᱵᱟᱭ ᱵᱮᱥ
ᱱᱟᱞᱮ ᱫᱚᱞᱟᱱ ᱫᱚ ᱵᱚᱸᱜᱟ ᱫᱚᱞᱟᱱ ᱞᱮᱠᱟ ᱜᱮᱞᱵᱟᱨ ᱪᱩᱲᱟᱹ᱾
ᱟᱨᱦᱚᱸ ᱢᱤᱫ ᱜᱟᱢ ᱠᱟᱹᱦᱱᱤ ᱞᱮᱠᱟᱱᱟᱜ ᱠᱟᱛᱷᱟ ᱢᱮᱱᱟᱜᱼᱟ᱾ ᱥᱮᱫᱟᱭ ᱢᱟᱵᱚᱱ ᱵᱟᱰᱟᱭ ᱛᱟᱸᱦᱮᱫ ᱚᱨᱚᱱ ᱵᱚᱨᱚᱱ ᱵᱤᱨ ᱫᱚ ᱜᱚᱴᱟᱜᱮ ᱛᱟᱸᱦᱮ ᱠᱟᱱᱟ᱾ ᱥᱤᱠᱟᱹᱨ ᱫᱤᱥᱚᱢ ᱦᱚᱸ ᱚᱱᱠᱟᱜᱮ ᱟᱹᱨᱩᱴ ᱚᱨᱚᱱ ᱵᱚᱨᱚᱱ ᱵᱤᱨ ᱛᱟᱸᱦᱮ ᱠᱟᱱᱟ᱾ ᱚᱸᱰᱮᱱ ᱛᱟᱸᱦᱮᱱ ᱦᱚᱲ ᱠᱚ ᱟᱹᱰᱤ ᱫᱤᱞᱜᱟᱹᱨᱤᱭᱟᱹ ᱠᱚ ᱛᱟᱸᱦᱮ ᱠᱟᱱᱟ᱾ ᱢᱤᱫ ᱫᱤᱱ ᱨᱮᱭᱟᱜ ᱠᱟᱛᱷᱟ ᱠᱟᱱᱟ, ᱚᱱᱟ ᱚᱨᱚᱱ ᱵᱚᱨᱚᱱ ᱵᱤᱨ ᱛᱟᱞᱟᱛᱮ ᱚᱸᱰᱮ ᱨᱤᱱ ᱢᱟᱹᱡᱷᱤ ᱟᱨ ᱢᱟᱹᱡᱷᱤ ᱮᱨᱟ ᱠᱤᱱ ᱯᱟᱨᱚᱢ ᱥᱮᱱᱚᱜ ᱠᱟᱱ ᱛᱟᱸᱦᱮ ᱠᱟᱱᱟ᱾ ᱢᱟᱹᱡᱷᱤ ᱮᱨᱟ ᱫᱚ ᱯᱮᱨᱮᱡ ᱦᱚᱲᱢᱚᱭ ᱛᱟᱸᱦᱮ ᱠᱟᱱᱟ᱾ ᱟᱪᱠᱟ ᱜᱮ ᱞᱟᱡ ᱦᱟᱹᱥᱩ ᱮᱦᱚᱵ ᱠᱮᱫᱮ ᱛᱮ ᱚᱸᱰᱮ ᱜᱮ ᱠᱤᱱ ᱡᱤᱨᱟᱹᱣᱮᱱᱟ᱾ ᱦᱤᱡᱩᱜ ᱥᱮᱱᱚᱜ ᱦᱚᱲ ᱟᱨ ᱥᱮᱸᱫᱽᱨᱟ ᱠᱚ ᱥᱟᱶ ᱧᱟᱯᱟᱢ ᱦᱚᱸ ᱦᱩᱭ ᱞᱮᱱ ᱛᱟᱹᱠᱤᱱᱟ᱾ ᱩᱱ ᱚᱠᱛᱚ ᱨᱮ ᱢᱟᱹᱡᱷᱤ ᱮᱨᱟᱭᱤᱡ ᱚᱱᱟ ᱚᱨᱚᱱ ᱵᱚᱨᱚᱱ ᱵᱤᱨ ᱛᱟᱞᱟ ᱨᱮ ᱢᱤᱫ ᱜᱤᱫᱽᱨᱟᱹᱭ ᱟᱬᱜᱚᱭᱮᱱᱟ, ᱢᱮᱱᱫᱚ ᱵᱟᱰᱟᱭᱮᱱᱟ ᱩᱱᱤ ᱜᱤᱫᱽᱨᱟᱹ ᱫᱚᱭ ᱜᱚᱡ ᱜᱮᱭᱟ᱾ ᱥᱟᱹᱜᱩᱱ ᱜᱩᱥᱟᱹᱲ ᱚᱠᱛᱚ ᱨᱮ ᱡᱟᱱᱟᱢ ᱚᱸᱡᱟ ᱧᱟᱢᱚᱜ ᱠᱟᱱᱟ ᱢᱮᱱᱠᱷᱟᱱ ᱡᱤᱣᱤ ᱵᱟᱹᱱᱩᱜ ᱱᱚᱶᱟ ᱛᱮ ᱢᱟᱹᱡᱷᱤ ᱟᱹᱰᱤᱭ ᱵᱤᱪᱷᱚᱠᱮᱱᱟ᱾ ᱟᱨ ᱩᱱᱤ ᱵᱟᱞᱮ ᱜᱤᱫᱽᱨᱟᱹ ᱫᱚ ᱚᱱᱟ ᱫᱟᱹᱢᱩᱫᱚᱨ ᱱᱟᱹᱭ ᱨᱮᱠᱚ ᱛᱩᱯᱩ ᱜᱚᱫ ᱠᱟᱫᱮᱭᱟ᱾ ᱢᱮᱱᱫᱚ ᱦᱟᱦᱟᱲᱟ᱾ ᱛᱩᱯᱩ ᱥᱟᱶᱛᱮ ᱡᱤᱣᱤᱭ ᱧᱟᱢ ᱜᱚᱫ ᱠᱮᱫᱟ᱾ ᱚᱱᱮ ᱚᱱᱟ ᱛᱩᱯᱩ ᱟᱹᱨᱩᱵ ᱡᱤᱣᱤ ᱧᱟᱢ ᱴᱷᱟᱶ ᱜᱮ ᱦᱩᱭᱩᱜ ᱠᱟᱱᱟ ᱛᱮᱞᱠᱩᱯᱤ ᱛᱩᱯᱩᱱᱟᱹᱭ ᱜᱷᱟᱴ ᱫᱚ᱾ ᱱᱮᱛᱟᱨ ᱦᱚᱸ ᱚᱱᱟ ᱛᱮ ᱵᱟᱞᱮ ᱜᱤᱫᱽᱨᱟᱹ ᱠᱚ ᱵᱚᱸᱜᱟ ᱞᱮᱱᱠᱷᱟᱱ ᱵᱚᱱ ᱯᱟᱭᱨᱟ ᱠᱚᱣᱟ᱾ ᱩᱱᱤ ᱜᱤᱫᱽᱨᱟᱹ ᱜᱮ ᱢᱤᱫ ᱫᱤᱱ ᱫᱤᱞ ᱫᱟᱲᱮᱛᱮ, ᱫᱷᱚᱱ ᱛᱮ, ᱜᱩᱱ ᱛᱮ ᱥᱮᱬᱟ ᱞᱮᱱ ᱛᱮ ᱢᱟᱹᱡᱷᱤ ᱥᱟᱶᱛᱮ ᱯᱟᱨᱜᱟᱱᱟ ᱦᱚᱸ ᱠᱚ ᱵᱟᱪᱷᱟᱣ ᱞᱮᱫᱮᱭᱟ᱾
ᱫᱟᱹᱢᱩᱫᱚᱨ ᱱᱟᱹᱭ ᱨᱮ ᱛᱩᱯᱩ ᱞᱮᱠᱷᱟᱱ ᱡᱤᱣᱤᱫᱚᱜ ᱨᱮᱭᱟᱜ ᱠᱟᱛᱷᱟ ᱚᱱᱟ ᱚᱨᱚᱱ ᱵᱚᱨᱚᱱ ᱵᱤᱨ ᱨᱮ ᱯᱟᱥᱱᱟᱣᱮᱱᱟ ᱟᱨ ᱯᱟᱹᱛᱭᱟᱹᱣ ᱦᱮᱡ ᱮᱱᱟ ᱱᱚᱶᱟ ᱱᱟᱹᱭ ᱜᱷᱟᱴ ᱨᱮ ᱡᱟᱝ ᱵᱟᱦᱟ ᱛᱩᱯᱩ ᱞᱮᱠᱷᱟᱱ ᱨᱮᱦᱚᱸ ᱡᱤᱣᱤ ᱫᱚ ᱧᱟᱢ ᱨᱩᱣᱟᱹᱲᱚᱜ ᱜᱮᱭᱟ᱾
ᱢᱮᱱᱠᱷᱟᱱ ᱛᱩᱯᱩ ᱢᱟᱬᱟᱝ ᱛᱮ ᱜᱷᱟᱴ ᱨᱤᱱᱤᱡ ᱯᱟᱨᱜᱟᱱᱟ ᱴᱷᱮᱱ ᱜᱷᱟᱴ ᱠᱤᱨᱤᱧ “ᱯᱩᱭᱥᱟᱹ” ᱮᱢᱛᱮ ᱦᱩᱭᱩᱜᱼᱟ ᱟᱨ ᱦᱟᱱᱟᱥᱚᱜ ᱨᱮᱭᱟᱜ ᱠᱚᱦᱚᱸ ᱞᱟᱹᱭᱛᱮ ᱦᱩᱭᱩᱜᱼᱟ᱾ ᱚᱱᱟ ᱛᱮᱜᱮ ᱯᱟᱞᱮᱱ ᱡᱤᱞᱤᱧ ᱰᱟᱦᱟᱨ ᱥᱮᱱᱚᱜ ᱡᱚᱦᱚᱜ ᱫᱚ ᱯᱮᱲᱟ ᱠᱚ “ᱜᱷᱟᱴ ᱠᱤᱨᱤᱧ” ᱯᱩᱭᱥᱟᱹ ᱦᱚᱸ ᱠᱚ ᱮᱢ ᱛᱚᱨᱟᱜᱼᱟ᱾ ᱥᱟᱹᱨᱤ ᱩᱛᱟᱹᱨ ᱥᱟᱹᱨᱤ ᱜᱮ ᱵᱷᱟᱨᱚᱛ ᱨᱤᱱᱤᱡ ᱚᱨᱛᱷᱚ ᱥᱟᱥᱛᱨᱤ ᱠᱳᱣᱴᱤᱭᱚ ᱫᱚ ᱱᱚᱶᱟ ᱜᱮ ᱛᱮᱞ ᱠᱚᱢᱯ ᱠᱷᱟᱡᱽᱱᱟ ᱢᱮᱱᱛᱮ ᱫᱚᱭ ᱞᱟᱹᱭ ᱵᱟᱹᱲᱤᱡ ᱟᱠᱟᱫᱟ᱾
(ᱱᱚᱣᱟ ᱚᱱᱚᱞ ᱫᱚ ᱡᱟᱦᱮᱨᱜᱟᱲ, ᱡᱩᱞᱟᱹᱭᱼ᱑᱙᱙᱑; ᱞᱮᱠᱷᱟ ᱠᱷᱚᱱ ᱦᱟᱛᱟᱣ ᱟᱠᱟᱱᱟ)
Written by ᱯᱨᱹ ᱫᱤᱜᱟᱵᱚᱨ ᱦᱟᱸᱥᱫᱟᱜ
Published on ᱯᱟᱸᱡᱟ (May – Jun 2013)
ᱢᱚᱱᱮ ᱨᱮᱭᱟᱜ ᱠᱟᱛᱷᱟ ᱯᱷᱚᱴᱮᱞ ᱥᱚᱫᱚᱨ ᱢᱮ !