ᱛᱮᱦᱮᱧ ᱫᱚ ᱟᱵᱚ ᱥᱟᱹᱨᱤ ᱥᱮᱪᱮᱫ (True Education) ᱛᱮ ᱩᱢᱟᱹᱲ ᱯᱮᱨᱮᱡᱚᱜ ᱨᱮᱱᱟᱜ ᱞᱟᱹᱠᱛᱤ ᱢᱮᱱᱟᱜᱼᱟ᱾ ᱚᱱᱠᱟᱱ ᱥᱮᱪᱮᱫ ᱛᱮ ᱯᱟᱴᱷᱮ ᱠᱮᱴᱮᱡᱚᱜ ᱨᱮᱱᱟᱜ ᱞᱟᱹᱠᱛᱤ ᱢᱮᱱᱟᱜᱼᱟ᱾ ᱡᱮᱞᱮᱠ ᱥᱩᱭᱟᱹ ᱠᱟᱛᱷᱟ ᱟᱞᱚ ᱜᱟᱞᱚᱪ ᱜᱟᱵᱟᱱᱚᱜ ᱢᱟ ᱟᱨ ᱢᱟᱱᱣᱟ ᱛᱟᱞᱟ ᱨᱮ ᱨᱮᱯᱮᱡ ᱨᱟᱯᱟᱪᱟᱜ ᱨᱮᱱᱟᱜ ᱤᱛᱟᱹ ᱟᱞᱚ ᱚᱢᱚᱱ ᱨᱟᱠᱟᱵᱚᱜ ᱢᱟ ᱢᱟᱱᱶᱟ ᱠᱚ ᱢᱩᱪᱟᱹᱫ ᱞᱟᱹᱜᱤᱫ ᱪᱮ ᱮᱴᱟᱜ ᱦᱚᱲᱟᱜ ᱟᱨᱡᱟᱣ ᱫᱷᱚᱱ ᱨᱮᱨᱮᱡ ᱞᱟᱹᱜᱤᱫ᱾
ᱟᱢᱟᱜ ᱢᱚᱱᱮ ᱨᱮ ᱩᱭᱦᱟᱹᱨ ᱟᱞᱚ ᱦᱤᱡᱩᱜ ᱢᱟ ᱚᱱᱠᱟᱱᱟᱜ ᱠᱚᱭ ᱞᱟᱹᱤᱜᱫ, “ᱫᱟᱱ” ᱢᱮᱱ ᱠᱟᱛᱮ ᱫᱷᱚᱱ ᱡᱟᱣᱨᱟ ᱞᱟᱹᱜᱤᱫ ᱟᱨ ᱠᱚᱭ ᱡᱟᱣᱨᱟ ᱫᱷᱚᱱ ᱛᱮ ᱟᱢ ᱡᱚᱢ ᱟᱹᱥᱩᱞᱚᱜ ᱞᱟᱹᱜᱤᱫ, ᱫᱷᱚᱱ ᱠᱚᱜ ᱠᱚᱭ ᱪᱮ ᱡᱟᱣᱨᱟ ᱫᱚ ᱚᱠᱟ ᱵᱮᱲᱟ ᱦᱚᱸ ᱵᱟᱭ ᱵᱩᱜᱤᱭᱟ ᱡᱩᱫᱤ ᱠᱚᱜᱼᱠᱚᱭ ᱛᱟᱞᱟ ᱨᱮᱱᱟᱜ ᱩᱭᱦᱟᱹᱨ ᱵᱷᱮᱭᱟᱬ ᱥᱟᱶᱛᱟ ᱞᱟᱦᱟᱱᱛᱤ ᱞᱟᱹᱜᱤᱫ ᱵᱟᱹᱱᱩᱜ ᱟᱱ ᱥᱟᱶᱛᱮ ᱠᱚᱠᱚᱭ ᱨᱮᱱᱟᱜ ᱩᱱᱩᱭᱦᱟᱹᱨ ᱥᱟᱸᱜᱮ ᱥᱚᱱᱚᱛ ᱟᱨ ᱯᱷᱟᱨᱪᱟ ᱵᱟᱹᱱᱩᱜ ᱟᱱ, ᱚᱱᱟᱛᱮ ᱚᱱᱠᱟ ᱠᱚᱭ ᱪᱮ ᱫᱷᱚᱱ ᱡᱟᱣᱨᱟ ᱠᱟᱹᱢᱤ ᱫᱚ ᱨᱮᱨᱮᱡ ᱟᱨ ᱠᱩᱸᱵᱽᱲᱩ ᱡᱩᱸᱵᱽᱲᱤ ᱩᱭᱦᱟᱹᱨ ᱠᱟᱱᱟ ᱚᱱᱠᱟ ᱞᱮᱠᱟᱛᱮ ᱟᱹᱰᱤᱜᱟᱱ “ᱦᱚᱲ” “ᱦᱚᱲ ᱨᱮᱱᱟᱜ ᱜᱟᱫᱮᱞ”, “ᱯᱚᱱᱛᱷᱟ”, “ᱥᱟᱶᱛᱟ ᱟᱹᱨᱤ”, ᱟᱨ “ᱨᱟᱡᱽ ᱟᱹᱨᱤ” ᱫᱚᱞ ᱮᱢᱟᱱ ᱠᱚ ᱱᱚᱝᱠᱟ ᱨᱮᱨᱮᱡ ᱟᱨ ᱠᱩᱸᱵᱽᱲᱩ ᱡᱩᱸᱵᱽᱲᱤ ᱩᱭᱦᱟᱹᱨ ᱠᱟᱹᱢᱤ ᱨᱮᱠᱚ ᱪᱷᱩᱴᱟᱹᱣ ᱟᱠᱟᱱᱟ, ᱛᱚᱵᱮ ᱱᱚᱶᱟ ᱞᱟᱹᱜᱤᱫ ᱛᱮ ᱪᱤᱨᱜᱟᱹᱞ ᱛᱟᱸᱦᱮᱱ ᱞᱟᱹᱠᱛᱤ ᱢᱮᱱᱟᱜᱼᱟ᱾
ᱥᱟᱹᱨᱤ ᱥᱮᱪᱮᱫ ᱛᱮ ᱩᱢᱟᱹᱲ ᱯᱮᱨᱮᱡ ᱟᱠᱟᱱ ᱥᱮᱪᱮᱫᱤᱭᱟᱹ ᱢᱟᱱᱣᱟ ᱫᱚ ᱠᱷᱟᱹᱞᱤ “ᱰᱤᱜᱽᱨᱤ” ᱦᱟᱛᱟᱣ ᱠᱟᱛᱮ ᱵᱟᱭ ᱛᱷᱤᱨᱩᱜᱼᱟ᱾ ᱥᱮᱪᱮᱫ ᱨᱮᱭᱟᱜ ᱮᱛᱚᱦᱚᱵ ᱫᱤᱥᱟᱹ ᱦᱩᱫᱤᱥ ᱟᱨ ᱢᱟᱨᱥᱟᱞ ᱫᱚ ᱟᱭᱳ ᱵᱟᱵᱟ ᱟᱨ ᱚᱲᱟᱜ ᱛᱟᱞᱟ ᱠᱷᱚᱱ ᱜᱮ ᱟᱹᱜᱩ ᱛᱚᱨᱟᱭᱟᱭ᱾ ᱥᱮᱪᱮᱫ ᱫᱚ ᱥᱚᱱᱚᱛ ᱟᱨ ᱫᱩᱞᱟᱹᱲ ᱟᱸᱡᱽᱞᱮ ᱨᱮᱭᱟᱜ ᱢᱤᱫ ᱫᱩᱞᱟᱹᱲ ᱪᱤᱱᱦᱟᱹ ᱠᱟᱱᱟ᱾ ᱥᱮᱪᱮᱫ ᱨᱮᱭᱟᱜ ᱢᱩᱪᱟᱹᱫ ᱯᱟᱱᱛᱮ ᱪᱮ ᱯᱟᱸᱜᱡᱟ ᱫᱚ ᱢᱟᱱᱟᱣᱟ ᱛᱟᱞᱟ ᱨᱮ ᱥᱚᱱᱚᱛ, ᱫᱩᱞᱟᱹᱲ, ᱥᱚᱛ ᱟᱨ ᱢᱟᱨᱟᱥᱞ ᱵᱤᱪᱟᱹᱨ ᱛᱮ ᱥᱟᱹᱜᱩᱱ ᱥᱟᱦᱟᱨ ᱜᱮ᱾ ᱥᱮᱪᱮᱫ ᱛᱟᱞᱟ ᱨᱮᱜᱮ ᱢᱟᱱᱣᱟ ᱡᱤᱣᱤ ᱨᱮ ᱥᱩᱠᱷᱟᱹᱫᱽ ᱥᱚᱱᱚᱛ ᱨᱮᱱᱟᱜ ᱡᱷᱟᱨᱱᱟ ᱫᱟᱜ ᱫᱚ ᱞᱤᱸᱜᱤᱱᱟ᱾ ᱥᱮᱪᱮᱫ ᱛᱮ ᱯᱮᱨᱮᱡ ᱟᱠᱟᱱ ᱢᱟᱱᱣᱟ ᱢᱚᱱᱮ ᱨᱮᱫᱚ ᱡᱟᱦᱟᱸᱱ ᱮᱯᱮᱨᱦᱮᱸᱰᱮ ᱟᱨ ᱠᱩᱪᱤᱛ ᱩᱭᱦᱟᱹᱨ ᱫᱚ ᱵᱟᱝ ᱜᱮ ᱦᱮᱡ ᱠᱚᱜᱼᱟ᱾
ᱥᱟᱸᱛ ᱠᱟᱹᱵᱤᱨ ᱫᱟᱥ ᱦᱚᱸᱭ ᱢᱮᱱ ᱞᱮᱫᱼᱟ ᱼ
“ᱯᱚᱛᱷᱤ ᱯᱟᱲᱦᱤ ᱯᱟᱹᱲᱦᱤ ᱡᱟᱜᱽ ᱢᱩᱣᱟ
ᱯᱟᱹᱱᱰᱤᱛ ᱵᱷᱟᱭᱟ ᱱᱟ ᱠᱚᱭ,
ᱟᱲᱦᱟᱭ ᱟᱠᱪᱷᱟᱨ ᱯᱨᱮᱢ ᱠᱟ
ᱯᱟᱲᱟᱦᱮ ᱥᱚ ᱯᱟᱱᱰᱤᱛ ᱦᱚᱭ᱾”
ᱥᱮᱪᱮᱫ ᱛᱮ ᱩᱢᱟᱹᱲ ᱯᱮᱨᱮᱡ ᱟᱠᱟᱱ ᱢᱟᱱᱣᱟ ᱪᱮ ᱵᱤᱨᱫᱟᱹᱱ ᱢᱚᱱᱮ ᱨᱮᱫᱚ ᱜᱚᱨᱚᱵᱽ, ᱦᱤᱸᱯᱤᱥᱠᱟᱹ ᱟᱨ ᱦᱩᱰᱤᱧ ᱢᱟᱨᱟᱝ ᱢᱮᱱᱛᱮ ᱩᱭᱦᱟᱹᱨ ᱵᱟᱝᱜᱮ ᱛᱟᱸᱦᱮᱱᱟ᱾ ᱥᱮᱪᱮᱫᱤᱭᱟᱹ ᱢᱟᱱᱣᱟ ᱫᱚ ᱟᱡᱟᱜ ᱥᱚᱱᱚᱛ ᱫᱩᱞᱟᱹᱲ ᱵᱮᱵᱷᱟᱨ ᱛᱟᱞᱟ ᱛᱮᱜᱮ ᱩᱯᱨᱩᱢᱚᱜ ᱟᱭ᱾ ᱥᱮᱪᱮᱫ ᱨᱮᱱᱟᱜ ᱩᱯᱨᱩᱢ ᱪᱤᱱᱦᱟᱹ ᱫᱚ ᱩᱱᱤ ᱠᱟᱹᱦᱱᱤᱤ ᱠᱩᱫᱩᱢ ᱟᱨ ᱠᱷᱮᱸᱞᱚᱰ ᱚᱱᱚᱞᱤᱭᱟᱹ ᱪᱮ ᱥᱮᱨᱮᱧ ᱜᱟᱞᱟᱜ ᱚᱱᱚᱬᱦᱤᱭᱟᱹ ᱫᱚ ᱚᱦᱚᱭ ᱦᱩᱭ ᱠᱚᱜᱼᱟ, ᱡᱟᱦᱟᱸᱭ ᱚᱱᱚᱞᱤᱭᱟᱹ ᱪᱮ ᱚᱱᱚᱬᱦᱤᱭᱟᱹ ᱡᱤᱣᱤ ᱛᱟᱞᱟ ᱨᱮ ᱦᱤᱸᱥᱟᱹᱼᱥᱩᱭᱟᱹ ᱜᱚᱨᱚᱵᱽ ᱟᱨ ᱠᱩᱪᱤᱛ ᱩᱭᱦᱟᱹᱨ ᱛᱟᱹᱯᱩᱜ ᱢᱮᱱᱟᱜᱼᱟ᱾
ᱟᱭᱳ ᱠᱚᱞᱮ ᱠᱷᱚᱱ ᱜᱮ ᱥᱮᱪᱮᱫᱤᱭᱟᱹ ᱫᱚᱭ ᱥᱮᱬᱟᱜᱼᱟ, ᱚᱱᱟᱛᱮ ᱥᱮᱨᱮᱧ ᱨᱮᱫᱚ ᱢᱮᱱᱟᱜᱼᱟ ᱼ
“ᱟᱭᱳ ᱫᱩᱞᱟᱹᱲ ᱥᱮᱪᱮᱫ ᱧᱟᱢᱚᱜ ᱠᱚᱞᱮ ᱵᱟᱞᱮ,
ᱡᱷᱟᱨᱱᱟ ᱫᱟᱜ ᱞᱮᱠᱟ ᱞᱤᱸᱜᱤᱱ ᱨᱤᱞᱟᱹ ᱢᱟᱞᱟ᱾”
ᱫᱷᱟᱹᱨᱛᱤ ᱨᱮ ᱫᱩᱞᱟᱹᱲ ᱯᱟᱥᱱᱟᱣ ᱞᱟᱹᱜᱤᱫ ᱛᱮ ᱫᱷᱟᱹᱨᱛᱤ ᱨᱟᱪᱟ ᱠᱷᱚᱱ ᱦᱤᱸᱥᱟᱹ ᱥᱩᱭᱟᱹ ᱨᱮᱱᱟᱜ ᱨᱮᱦᱮᱫ ᱴᱟᱰᱮ ᱦᱩᱭᱩᱜᱼᱟ᱾ ᱱᱚᱣᱟ ᱞᱟᱹᱜᱤᱫ ᱛᱮ ᱥᱟᱱᱟᱢ ᱦᱚᱲ ᱠᱚ ᱠᱩᱨᱩᱢᱩᱴᱩ ᱠᱟᱹᱢᱤ ᱨᱮ ᱟᱬᱜᱚᱱ ᱞᱟᱹᱠᱛᱤ ᱢᱮᱱᱟᱜᱼᱟ᱾ ᱱᱚᱶᱟ ᱮᱲᱮ ᱮᱯᱮᱲᱮ ᱟᱨ ᱠᱩᱪᱤᱛ ᱩᱭᱦᱟᱹᱨ ᱫᱚ ᱢᱩᱪᱟᱹᱫ ᱜᱤᱰᱤ ᱠᱟᱜ ᱞᱟᱹᱠᱛᱤᱜ ᱠᱟᱱᱟ, ᱢᱮᱱᱠᱠᱷᱟᱱ ᱱᱚᱶᱟ ᱫᱚ ᱡᱟᱦᱟᱸᱱᱟᱜ ᱯᱚᱱᱛᱷᱟ, ᱦᱟᱹᱛᱭᱟᱹᱨ ᱪᱮ ᱨᱟᱡᱽ ᱟᱹᱨᱤᱭᱟᱹ ᱠᱚᱣᱟᱜ ᱮᱯᱮᱲᱮ ᱜᱚᱲᱚ ᱛᱮᱫᱚ ᱚᱦᱚ ᱦᱩᱭ ᱠᱚᱜᱼᱟ᱾ ᱛᱚᱵᱮ ᱠᱟᱹᱢᱤ ᱦᱚᱨᱟ ᱫᱚ ᱮᱱ ᱮᱱᱟᱝ ᱜᱟᱱᱚᱜᱼᱟ ᱡᱚᱠᱷᱚᱱ ᱥᱟᱶᱛᱟ ᱨᱤᱱ ᱥᱟᱱᱟᱢ ᱦᱚᱲ ᱢᱤᱫ ᱡᱩᱢᱤᱫ ᱛᱮ ᱥᱚᱛᱮᱛ ᱫᱤᱥ ᱦᱩᱫᱤᱥ ᱦᱚᱨ ᱠᱚ ᱨᱤᱠᱟᱹᱭᱟ᱾
ᱟᱞᱚᱢ ᱩᱭᱦᱟᱹᱨ ᱜᱚᱫᱟ ᱪᱮ ᱱᱚᱶᱟ “ᱥᱟᱹᱨᱤ” ᱪᱮ ᱥᱚᱱᱚᱛ ᱨᱮᱭᱟᱜ ᱨᱮᱦᱮᱫ ᱫᱚ ᱱᱮᱦᱚᱨ ᱵᱤᱱᱛᱤ ᱛᱮ ᱟᱞᱜᱟ ᱛᱮᱜᱮ ᱯᱟᱱᱛᱮ ᱧᱟᱢᱚᱜᱼᱟ᱾ ᱛᱚᱵᱮ ᱨᱮᱦᱮᱫ ᱯᱟᱱᱛᱮ ᱧᱟᱢ ᱞᱟᱹᱜᱤᱫ ᱞᱟᱹᱜᱼᱞᱟᱹᱭ ᱛᱤᱸᱜᱩ ᱟᱠᱟᱱ ᱩᱱᱤ ᱡᱷᱩᱠᱤ ᱠᱟᱹᱨᱫᱟᱹᱱᱤ ᱵᱤᱨ ᱵᱟᱱᱟᱨ ᱥᱚᱛ ᱦᱚᱨ ᱫᱚ ᱩᱨᱩᱢ ᱠᱟᱭ ᱨᱮᱭᱟᱜ ᱞᱟᱹᱠᱛᱤᱜ ᱠᱟᱱᱟ᱾
“ᱮᱛᱚᱦᱚᱵ ᱥᱚᱱᱚᱛ ᱠᱟᱹᱢᱤ ᱯᱟᱱᱛᱮ ᱧᱟᱢ ᱞᱟᱹᱜᱤᱫ ᱫᱚ ᱱᱟᱶᱟ ᱧᱩᱛᱟᱹᱛ ᱨᱮ ᱢᱤᱫ ᱥᱮᱪᱮᱫ ᱫᱤᱭᱟᱹᱲᱟ ᱵᱟᱹᱛᱤ ᱟᱨᱥᱟᱞ ᱟᱦᱞᱟ ᱫᱚ ᱧᱩᱛ ᱮ ᱞᱟᱜᱟ ᱠᱮᱭᱟ᱾ ᱢᱤᱫ ᱩᱥᱩᱞ ᱫᱷᱤᱨᱤ ᱪᱟᱹᱴᱟᱹᱱᱤ ᱦᱩᱴᱩᱵ ᱦᱚᱸ ᱞᱤᱸᱜᱤᱱ ᱜᱟᱰᱟ ᱫᱟᱜ ᱨᱮᱱᱟᱜ ᱦᱚᱨᱮ ᱵᱚᱫᱚᱞ ᱠᱮᱭᱟ᱾ ᱥᱟᱺᱜᱤᱧ ᱛᱮ ᱥᱮᱱᱚᱜ ᱥᱟᱱᱟᱢ ᱠᱷᱟᱱ ᱮᱛᱚᱦᱚᱵ ᱨᱮᱭᱟᱜ ᱛᱟᱲᱟᱢ ᱢᱟᱲᱟᱝ ᱨᱮ ᱟᱢᱟᱜ ᱡᱟᱸᱜᱟ ᱞᱟᱯᱷᱟᱣ ᱫᱚ ᱞᱟᱹᱠᱛᱤᱜᱼᱟ᱾
ᱫᱷᱟᱹᱨᱛᱤ ᱨᱤᱱ ᱢᱟᱱᱶᱟ ᱠᱚᱣᱟᱜ ᱫᱩᱠᱷᱟᱹᱛ ᱢᱩᱦᱤᱢ ᱵᱟᱰᱟᱭ ᱞᱟᱹᱜᱤᱫ ᱫᱚ ᱟᱢᱟᱜ ᱫᱩᱠ ᱫᱟᱺᱫᱤ ᱨᱮᱱᱟᱜ ᱠᱟᱛᱷᱟ ᱦᱚᱸ ᱞᱮᱠᱷᱟ ᱡᱚᱠᱷᱟ ᱞᱟᱹᱠᱛᱤᱜ ᱟ ᱪᱮᱠᱟᱛᱮ ᱫᱷᱟᱹᱨᱛᱤ ᱢᱟᱱᱣᱟ ᱠᱚᱣᱟᱜ ᱫᱩᱠ ᱫᱟᱺᱫᱤ ᱟᱢ ᱥᱟᱶ ᱡᱚᱲᱟᱣ ᱛᱚᱯᱚᱞ ᱢᱮᱱᱟᱜᱼᱟ᱾
ᱟᱢ ᱛᱮᱜᱮ ᱢᱟᱲᱟᱝ ᱫᱚ ᱩᱨᱩᱢᱚᱜ ᱢᱮ ᱟᱢᱟᱜ ᱵᱟᱹᱲᱤᱡ ᱪᱮ ᱦᱤᱸᱥᱟᱹ ᱥᱩᱭᱟᱹ ᱠᱷᱚᱱ ᱛᱤᱱᱟᱹᱜ ᱥᱟᱦᱟ ᱨᱮ ᱢᱮᱱᱟᱢᱟ᱾ ᱪᱮᱴᱠᱟᱨ ᱛᱟᱦᱮᱱ ᱦᱩᱭ ᱟᱢᱟ ᱡᱩᱸᱵᱽᱲᱤᱼᱠᱩᱸᱵᱽᱲᱩ ᱟᱨ ᱠᱩᱪᱤᱛ ᱩᱭᱦᱟᱹᱨ ᱦᱚᱨ ᱠᱷᱚᱱ ᱯᱷᱟᱨᱟᱠ ᱛᱟᱸᱦᱮᱱ ᱞᱟᱹᱜᱤᱫ᱾ ᱱᱚᱶᱟ ᱥᱟᱨᱪᱟ, ᱯᱚᱱᱚᱛ ᱠᱟᱹᱢᱤ ᱯᱩᱨᱟᱹᱣ ᱞᱟᱹᱜᱤᱫ ᱟᱨ ᱞᱟᱦᱟᱱᱛᱤ ᱥᱮᱫ ᱡᱟᱜᱟᱸ ᱛᱟᱲᱟᱢ ᱞᱟᱹᱜᱤᱫ ᱟᱢ ᱛᱮᱜᱮ ᱛᱟᱲᱟᱢᱟᱛᱮ ᱢᱟᱲᱟᱝ ᱥᱮᱫ ᱥᱮᱱᱚᱜ ᱞᱟᱹᱠᱛᱤ ᱢᱮᱱᱟᱜᱼᱟ᱾ ᱩᱭᱦᱟᱹᱨ ᱛᱟᱦᱮᱱ ᱢᱟ ᱟᱢᱟᱜ ᱥᱟᱶᱛᱟ, ᱡᱟᱹᱛᱤ, ᱥᱟᱶᱦᱮᱫ ᱞᱟᱦᱟᱱᱛᱤ ᱞᱟᱹᱜᱤᱫ ᱫᱚ ᱟᱢᱜᱮ ᱢᱤᱫ ᱮᱛᱚᱦᱚᱵ ᱨᱮᱱᱟᱜ ᱢᱩᱴᱷᱟᱹᱱ ᱵᱟᱵᱮᱨ ᱡᱟᱦᱟᱸ ᱥᱟᱵ ᱠᱟᱛᱮ ᱪᱮᱛᱟᱱ ᱨᱟᱠᱟᱵᱚᱜ ᱦᱩᱭᱩᱜᱼᱟ᱾
ᱥᱚᱛ ᱢᱚᱱ ᱛᱮ ᱢᱩᱠᱨᱩᱲ ᱠᱟᱹᱢᱤ ᱛᱟᱞᱟ ᱛᱮ ᱥᱮᱱ ᱤᱫᱤᱜ ᱛᱮ ᱦᱩᱭᱩᱜᱼᱟ᱾ ᱫᱤᱥᱚᱢ ᱨᱮ ᱟᱢᱟᱜ ᱪᱤᱱᱦᱟᱹ ᱵᱟᱱᱪᱟᱣ ᱞᱟᱹᱜᱤᱫ, ᱟᱢᱟᱜ ᱟᱹᱨᱤ ᱪᱟᱹᱞᱤ ᱨᱚᱯᱷᱟ ᱫᱚᱦᱚ ᱞᱟᱹᱜᱤᱫ ᱟᱢ ᱜᱮ ᱠᱟᱹᱢᱤ ᱛᱮ ᱦᱩᱭᱩᱜᱼᱟ᱾ ᱩᱭᱦᱟᱹᱨ ᱠᱟᱜ ᱢᱮ ᱥᱟᱶᱛᱟ ᱛᱟᱞᱟ ᱨᱮ ᱟᱹᱰᱤᱜᱟᱱ ᱵᱮ ᱵᱟᱹᱲᱤᱡ ᱟᱨ ᱧᱩᱛᱟᱹᱛ ᱯᱟᱹᱛᱭᱟᱹᱣᱟᱱ ᱦᱚᱲ ᱠᱚ ᱢᱮᱱᱟᱜ ᱠᱚᱣᱟ ᱚᱱᱠᱟᱱ ᱦᱚᱲ ᱫᱚ ᱟᱢ ᱜᱮ ᱥᱮᱪᱮᱫ ᱛᱮ ᱦᱩᱭ ᱟᱢᱟ᱾
ᱠᱷᱟᱹᱞᱤᱱᱟᱜ ᱵᱚᱸᱜᱟ ᱛᱷᱟᱱ ᱨᱮ ᱵᱚᱦᱚᱜ ᱰᱚᱵᱚᱜ ᱪᱮ ᱛᱤᱨᱩᱵ ᱪᱮ ᱜᱚᱰ ᱟᱨ ᱛᱟᱵᱮᱨ ᱞᱮᱱᱠᱷᱟᱱ ᱪᱟᱸᱫᱚ ᱪᱮ “ᱢᱟᱨᱟᱝ ᱵᱳᱨᱳ” ᱫᱚ ᱚᱦᱚ ᱜᱮ ᱧᱟᱢ ᱠᱚᱜᱼᱟᱭ᱾ ᱚᱱᱠᱟ ᱜᱮ ᱢᱟᱱᱚᱛ ᱜᱩᱨᱩ ᱪᱮ ᱥᱚᱱᱚᱛ ᱦᱚᱲᱟᱜ ᱡᱤᱣᱤ ᱪᱩᱨᱤᱛ ᱫᱚ ᱟᱢᱟᱜ ᱨᱤᱫᱟᱹᱭ ᱛᱟᱞᱟ ᱨᱮ ᱟᱹᱜᱜᱩ ᱞᱟᱹᱠᱛᱤᱜ ᱠᱟᱱᱟ᱾ ᱢᱟᱱᱚᱛ ᱜᱩᱨᱩᱵᱟᱜ ᱯᱩᱱᱟᱹᱭ ᱟᱨ ᱥᱟᱨᱪᱟ ᱪᱩᱨᱤᱛ ᱪᱤᱱᱦᱟᱹ ᱥᱟᱢᱟᱝ ᱠᱟᱛᱮ ᱟᱢᱟᱜ ᱢᱚᱱᱮ ᱨᱮ ᱦᱤᱸᱥᱟᱹ ᱥᱩᱭᱟᱹ ᱟᱨ ᱠᱩᱪᱤᱛ ᱩᱭᱦᱟᱹᱨ ᱛᱟᱸᱦᱮᱱ ᱫᱚ ᱟᱹᱰᱤᱛᱮᱫ ᱵᱟᱹᱲᱤᱡᱼᱟ᱾ ᱱᱚᱣᱟ ᱟᱞᱚᱢ ᱢᱚᱱᱮᱭᱟ ᱪᱮ ᱟᱢᱟᱜ ᱱᱚᱣᱟ ᱧᱚᱞᱦᱟᱫ ᱠᱟᱹᱢᱤ ᱫᱚ ᱩᱠᱩ ᱨᱮ ᱢᱮᱱᱟᱜᱼᱟ᱾ ᱱᱚᱝᱠᱟ ᱩᱭᱦᱟᱹᱨ ᱛᱮᱜᱮ ᱩᱱᱤ ᱢᱟᱱᱚᱛ ᱜᱩᱨᱩ ᱟᱨ ᱥᱚᱱᱚᱛ ᱦᱚᱲᱟᱜ ᱯᱩᱱᱟᱹᱭ ᱪᱩᱨᱤᱛ ᱮᱢ ᱧᱚᱞᱦᱟᱫ ᱮᱫᱟ᱾
ᱚᱱᱟ ᱞᱟᱹᱜᱤᱫ ᱫᱚ ᱥᱚᱱᱚᱛ ᱢᱚᱱᱮ ᱛᱮ ᱢᱟᱱᱣᱟ ᱡᱤᱣᱤ, ᱵᱩᱨᱩ ᱦᱟᱨᱟ ᱟᱨ ᱥᱤᱨᱡᱚᱱ ᱟᱠᱟᱱ ᱫᱷᱟᱹᱨᱛᱤ ᱨᱤᱱ ᱥᱟᱱᱟᱢ ᱡᱤᱢᱛᱤ ᱯᱤᱯᱤᱲᱤ ᱪᱮᱛᱟᱱ ᱨᱮ ᱟᱢᱟᱜ ᱦᱚᱢᱚᱨ ᱫᱩᱞᱟᱹᱲ ᱥᱟᱨᱥᱟᱣ ᱞᱟᱹᱠᱛᱤᱜ ᱠᱟᱱᱟ, ᱚᱱᱟ ᱥᱩᱢᱩᱝ ᱦᱚᱸ ᱵᱚᱸᱜᱟ ᱞᱟᱹᱠᱛᱤᱜ ᱠᱟᱱᱟ᱾ ᱚᱱᱮ ᱥᱩᱥᱟᱹᱨ ᱵᱚᱸᱜᱟ ᱛᱷᱟᱱ ᱟᱨ ᱵᱚᱸᱜᱟ ᱠᱚᱣᱟᱜ ᱯᱩᱱᱟᱹᱭ ᱠᱟᱛᱷᱟ ᱠᱚ ᱞᱩᱛᱩᱨ ᱨᱮ ᱨᱮᱵᱮᱫ ᱥᱟᱶᱛᱮ ᱥᱚᱱᱚᱛ ᱦᱚᱲᱟᱜ ᱢᱟᱨᱟᱥᱟᱞ ᱡᱤᱣᱤ ᱪᱩᱨᱤᱛ ᱠᱟᱛᱷᱟ ᱚᱱᱟ ᱨᱮᱱᱟᱜ ᱫᱩᱞᱟᱹᱲ, ᱥᱚᱱᱚᱛ, ᱥᱟᱨᱟ ᱯᱮᱨᱮᱡ ᱩᱭᱦᱟᱹᱨ ᱦᱚᱨ ᱛᱮ ᱥᱮᱱᱚᱜ᱾
ᱫᱷᱚᱨᱚᱢ ᱪᱮ ᱯᱩᱱᱹᱟᱭ ᱨᱮᱱᱟᱜ ᱩᱭᱦᱟᱹᱨ ᱫᱳ ᱢᱟᱱᱣᱟ ᱟᱡᱟᱜ ᱢᱤᱣᱤ ᱨᱮᱱᱟᱜ ᱛᱟᱭ ᱥᱚᱱᱚᱛ ᱦᱚᱨ ᱠᱟᱱᱟ᱾ ᱟᱡᱟᱜ ᱥᱟᱨᱪᱟ ᱡᱤᱣᱤ ᱪᱩᱨᱤᱛ ᱫᱚ ᱠᱮᱴᱮᱡ ᱛᱚᱲᱮ ᱥᱩᱛᱟᱹᱢ ᱛᱮ ᱛᱚᱱᱚᱞ ᱡᱚᱲᱟᱣ ᱢᱤᱫ ᱩᱨᱤᱡ ᱜᱟᱺᱴ ᱜᱮ᱾ ᱚᱱᱟᱛᱮ ᱤᱧᱟᱜ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱪᱮ ᱢᱤᱫ ᱥᱮᱪᱮᱫᱤᱭᱟᱹ ᱪᱮ ᱫᱷᱚᱨᱚᱢ ᱦᱚᱨ ᱪᱮ ᱪᱟᱞᱟᱜ ᱦᱚᱲ ᱫᱚ ᱥᱚᱱᱚᱛ ᱫᱩᱞᱟᱹᱲ ᱨᱮᱱᱟᱜ ᱥᱚᱡᱷᱮ ᱦᱚᱨ ᱛᱮᱜᱮ ᱢᱟᱲᱟᱝ ᱤᱫᱤᱜ ᱟᱭ ᱟᱨ ᱥᱟᱱᱟᱢ ᱥᱟᱶᱛᱟ ᱫᱮᱥ ᱫᱤᱥᱣᱟᱹ ᱠᱚᱦᱚᱸ ᱥᱚᱛ ᱦᱚᱨ ᱛᱮᱜᱮ ᱟᱹᱭᱩᱨ ᱤᱫᱤ ᱠᱚᱣᱟᱭ᱾
Written by ᱥᱤᱹ ᱟᱨᱹ ᱢᱟᱹᱡᱷᱤ
Published on Holong Gada (Jan – Jun, 2011)
ᱢᱚᱱᱮ ᱨᱮᱭᱟᱜ ᱠᱟᱛᱷᱟ ᱯᱷᱚᱴᱮᱞ ᱥᱚᱫᱚᱨ ᱢᱮ !