ᱥᱟᱨᱱᱟ ᱫᱷᱚᱨᱚᱢ

ᱟᱹᱰᱤ ᱦᱚᱲᱟᱜ ᱢᱚᱱᱮᱨᱮ ᱠᱩᱠᱞᱤ ᱦᱤᱡᱩᱜᱼᱟ, ᱫᱷᱚᱢ ᱫᱚ ᱪᱮᱫ ᱠᱟᱱᱟ? ᱟᱹᱰᱤ ᱟᱞᱜᱟ ᱜᱮ ᱞᱟᱹᱭ ᱜᱟᱱᱚᱜᱼᱟ, ᱡᱤᱣᱤ ᱡᱟᱹᱛᱤ ᱫᱦᱚᱨᱚᱢ ᱧᱟᱢᱚᱜ ᱦᱚᱨ ᱜᱮ ᱫᱷᱚᱨᱚᱢ ᱠᱟᱱᱟ᱾ ᱡᱟᱦᱟᱸᱭ ᱫᱦᱚᱨᱚᱢ ᱦᱚᱨᱮ ᱞᱟᱹᱞᱟᱹᱭ ᱠᱟᱱᱟ ᱩᱱᱤᱫᱚᱭ ᱫᱷᱚᱨᱚᱢ ᱠᱟᱱᱟ ᱟᱨᱵᱟᱝ ᱩᱱᱤ ᱫᱚᱭ ᱫᱷᱚᱨᱚᱢ ᱜᱩᱨᱩ ᱠᱟᱱᱟ ᱾ ᱟᱹᱰᱤ ᱟᱞᱜᱟ ᱜᱮᱵᱚ ᱨᱚᱲ ᱜᱚᱫᱟ ᱤᱧ ᱫᱩᱧ ᱥᱟᱨᱱᱟ ᱫᱷᱚᱨᱚᱢ ᱦᱚᱲ ᱠᱟᱱᱟ ᱾ ᱚᱠᱚᱭ ᱫᱚᱭ ᱢᱮᱱ ᱜᱚᱫᱟ ᱤᱧ ᱫᱩᱧ ᱦᱤᱱᱫᱩ ᱫᱷᱚᱨᱚᱢ ᱦᱚᱲ ᱠᱟᱱᱟ ᱾ ᱚᱠᱚᱭ ᱫᱚᱭ ᱢᱮᱱ ᱜᱚᱫᱟ ᱤᱧ ᱫᱩᱧ ᱠᱨᱤᱥᱛᱟᱱ ᱫᱷᱚᱨᱚᱢ ᱦᱚᱲ ᱠᱟᱱᱟ ᱾ ᱚᱠᱚᱭ ᱫᱚᱭ ᱢᱮᱱ ᱜᱚᱫᱟ ᱤᱧ ᱫᱚᱧ ᱤᱥᱞᱟᱢ ᱫᱷᱚᱨᱚᱢ ᱦᱚᱲ ᱠᱟᱱᱟ ᱾ ᱚᱠᱚᱭ ᱫᱚᱭ ᱢᱮᱱ ᱜᱚᱫᱟ ᱤᱧ ᱫᱚᱧ ᱡᱚᱭᱱᱚ ᱫᱷᱚᱨᱚᱢ ᱠᱟᱱᱟ ᱾ ᱚᱠᱚᱭ ᱫᱚᱭ ᱢᱮᱱ ᱜᱚᱫᱟ ᱤᱧ ᱫᱚᱧ ᱵᱩᱫᱷᱚ ᱫᱷᱚᱨᱚᱢ ᱦᱚᱲ ᱠᱟᱱᱟ ᱾ ᱚᱠᱚᱭ ᱫᱚᱭ ᱢᱮᱱ ᱜᱚᱫᱟ ᱤᱧ ᱫᱚᱧ ᱥᱤᱠᱷᱽ ᱫᱷᱚᱨᱚᱢ ᱦᱚᱲ ᱠᱟᱱᱟ, ᱱᱚᱝ ᱠᱟ ᱟᱹᱰᱤ ᱞᱮᱠᱟ ᱾ ᱚᱠᱚᱭ ᱫᱚᱭ ᱢᱮᱱᱟ ᱾ ᱚᱠᱚᱭ ᱫᱚᱭ ᱢᱮᱱᱟ ᱤᱧ ᱫᱚ ᱚᱠᱟ ᱫᱷᱚᱨᱚᱢ ᱨᱮᱱᱤᱡ ᱦᱚᱲ ᱦᱚᱧ ᱵᱟᱝ ᱠᱟᱱᱟ᱾ ᱵᱚᱝᱜᱟ ᱵᱳᱨᱳ ᱠᱚᱦᱚᱸ ᱵᱟᱧ ᱯᱟᱹᱛᱭᱟᱹᱣ ᱟᱠᱚᱣᱟ, ᱟᱹᱰᱤ ᱞᱮᱠᱟ ᱜᱮᱠᱚ ᱞᱟᱹᱭᱟ᱾ ᱤᱠᱷᱟᱹᱱ ᱫᱷᱚᱨᱚᱢ ᱫᱚ ᱟᱹᱰᱤ ᱥᱮᱬᱟ ᱠᱟᱛᱷᱟ ᱠᱟᱱᱟ ᱟᱞᱜᱟ ᱛᱮ ᱦᱚᱸ ᱵᱟᱝ ᱜᱮ ᱥᱮᱴᱮᱡ ᱧᱟᱢᱚᱜᱼᱟ᱾ ᱚᱱᱟ ᱛᱟᱞᱟᱛᱮ ᱵᱚᱞᱚᱱ ᱦᱩᱭᱩᱜᱼᱟ᱾ ᱵᱩᱡᱷᱟᱹᱣ ᱜᱚᱫᱚᱜ ᱦᱚᱸ ᱟᱹᱰᱤ ᱟᱞᱜᱟ ᱜᱮᱭᱟ᱾ ᱜᱚᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱜᱷᱩᱱᱟᱛ ᱢᱩᱨᱢᱩ ᱦᱚᱨ ᱥᱮᱨᱮᱧ ᱨᱮ ᱮᱛᱚ ᱦᱚᱵ ᱨᱮᱜᱮ “ᱪᱟᱸᱫᱚ ᱵᱟᱝᱜᱟ ᱱᱮᱦᱚᱨ ᱡᱚᱝ ᱥᱮᱨᱮᱧ “ ᱮ ᱚᱞ ᱟᱠᱟᱫᱼᱟ ᱾

ᱦᱟᱦᱟᱲᱟ ᱜᱮ ᱡᱮᱜᱮᱛ ᱛᱟᱞᱟ
ᱦᱟᱦᱟᱲᱟ ᱜᱮ ᱡᱤᱣᱤ ᱛᱟᱞᱟ
ᱱᱟᱢ ᱫᱚ ᱪᱟᱸᱫᱚ ᱱᱚᱝᱠᱟᱢ ᱫᱟᱲᱮᱭᱟ᱾
ᱪᱮᱠᱟ ᱛᱮᱪᱚᱧ ᱩᱨᱩᱢ ᱠᱮᱢᱟ
ᱪᱮᱠᱟ ᱛᱮᱫᱚ ᱡᱤᱣᱤᱧ ᱢᱟᱨᱥᱟᱞ
ᱱᱮᱦᱚᱨ ᱪᱟᱸᱫᱚ ᱫᱟᱲᱮ ᱱᱤᱢᱟᱧ ᱢᱮ ᱾

ᱦᱟᱦᱟᱲᱟ ᱜᱮ ᱡᱮᱜᱮᱛ ᱟᱨ ᱡᱚᱣᱤ ᱛᱚᱞᱟ ᱠᱟᱱᱟ ᱾ ᱩᱱᱤ ᱪᱟᱸᱫᱚ ᱵᱚᱸᱜᱟ ᱩᱨᱩᱢ ᱧᱟᱢ ᱞᱮ ᱮᱱᱟᱝ ᱜᱮ ᱡᱤᱣᱤ ᱢᱟᱨᱥᱟᱞᱜᱼ ᱟ ᱟᱨ ᱡᱚᱣᱤ ᱵᱟᱧᱪᱟᱣ ᱫᱚᱨᱚᱢ ᱞᱟᱹᱜᱤᱫ ᱟᱨ ᱵᱟᱝ ᱱᱟᱯᱟᱭ ᱨᱮ ᱛᱟᱦᱮᱸᱱ ᱞᱟᱹᱜᱤᱫ ᱦᱚᱨ ᱰᱟᱦᱟᱨ ᱦᱚᱸ ᱯᱟᱸᱡᱟᱜᱼᱟ ᱾ ᱚᱱᱮ ᱚᱱᱟ ᱦᱚᱨ ᱰᱟᱦᱟᱨ ᱜᱮ ᱫᱷᱚᱨᱚᱢ ᱠᱟᱱᱟ᱾

ᱱᱚᱣᱟ ᱡᱮᱜᱮᱛ ᱨᱮ ᱡᱚᱛᱚ ᱜᱮᱛᱚᱵᱚ ᱢᱟᱹᱱᱢᱤ ᱠᱟᱱᱟ ᱾ ᱡᱚᱛᱚ ᱦᱚᱲᱟᱜ ᱜᱮ ᱦᱩᱱᱟᱹᱝ ᱢᱤᱫ ᱞᱮᱠᱟᱜᱮ ᱨᱚᱲ ᱟᱲᱟᱝ ᱦᱚᱸ ᱛᱟᱵᱚ ᱦᱩᱭᱩᱜ ᱠᱟᱛᱷᱟ ᱪᱮᱫᱟᱜ ᱵᱷᱮᱜᱟᱨᱚᱜ ᱠᱟᱱᱟ? ᱟᱹᱰᱤ ᱜᱚᱴᱟᱝ ᱡᱟᱹᱛᱤ ᱯᱟᱹᱨᱤᱥ ᱨᱤᱱ ᱦᱚᱲ ᱟᱹᱰᱤ ᱜᱚᱴᱟᱝ ᱫᱷᱚᱨᱚᱢ ᱨᱮᱱᱟᱝ ᱦᱚᱨ ᱰᱟᱦᱟᱨ ᱛᱮᱵᱚᱱ ᱛᱟᱲᱟᱢ ᱟᱠᱟᱫᱼᱟ ᱱᱚᱝᱠᱟ ᱪᱮᱫᱟᱜ ᱦᱩᱨᱭᱜ ᱠᱟᱱᱟ? ᱡᱚᱡᱟᱦᱟᱸᱭ ᱠᱚ ᱫᱷᱚᱨᱚᱢ ᱵᱟᱝ ᱠᱚ ᱯᱟᱹᱛᱭᱟᱹᱣᱟᱜᱼᱟ ᱪᱮ ᱵᱚᱜᱟ ᱦᱚᱸ ᱵᱟᱝ ᱠᱚ ᱯᱟᱹᱛᱭᱟᱹᱣ ᱟᱠᱚᱣᱟ ᱮᱱ ᱠᱷᱟᱱ ᱦᱚᱲ ᱠᱚᱦᱚᱸ ᱛᱚ ᱵᱟᱧᱪᱟᱣ ᱠᱟᱛᱮ ᱢᱮᱱᱟᱜ ᱠᱚ ᱜᱮᱭᱟ, ᱛᱚᱵᱮ ᱜᱩᱡᱩᱜ ᱠᱟᱱᱟ ᱠᱚ ᱪᱮᱫᱟᱜ? ᱟᱠᱚᱣᱟᱜ ᱦᱚᱲᱢᱚ ᱦᱩᱱᱟᱝ ᱟᱠᱚᱣᱟᱜ ᱟᱹᱛ ᱨᱮᱜᱮ ᱠᱚ ᱫᱚᱦᱚ ᱠᱮᱭᱟ ᱵᱟᱝᱠᱚ ᱦᱟᱲᱟᱝᱚᱜᱼᱟ ᱪᱮ ᱵᱟᱝᱠᱚ ᱟᱡᱟᱨ ᱵᱮᱢᱟᱨᱚᱜᱼᱟ ᱾ ᱜᱩᱨᱩ ᱜᱚᱢᱠᱮ ᱚᱞ ᱟᱠᱟᱫ ᱟᱭᱺᱼ

ᱦᱟᱞᱚ ᱵᱟᱛᱚ ᱡᱤᱣᱤ ᱵᱮᱸᱜᱮᱫ ᱞᱮᱜᱟᱭ ᱢᱮ
ᱦᱟᱞᱚ ᱵᱟᱛᱚ ᱡᱤᱣᱤ ᱩᱭᱦᱟᱨ ᱞᱮᱜᱟᱭ ᱢᱮ
ᱱᱟᱢ ᱡᱟᱹᱨᱤ ᱯᱟᱪᱷᱮ ᱚᱠᱚᱭ ᱢᱮᱱᱟᱭ ᱾

ᱚᱠᱚᱭ ᱪᱚ ᱢᱤᱫ ᱦᱚᱲ ᱢᱮᱱᱟᱭ ᱜᱮᱭᱟ ᱟᱵᱚᱭ ᱛᱚᱞ ᱫᱚᱦᱚ ᱟᱠᱟᱫ ᱵᱚᱱᱟ ᱟᱡ ᱜᱮ ᱟᱵᱚᱭ ᱞᱟᱲᱟᱣ ᱤᱫᱤᱭᱮᱫ ᱵᱚᱱᱟ᱾ ᱩᱱᱤ ᱜᱮᱛᱚᱭ ᱫᱚᱨᱚᱢ ᱠᱟᱱᱟ᱾ ᱩᱱᱤᱜᱮ ᱦᱟᱦᱟᱲᱟ ᱫᱟᱲᱮ ᱦᱚᱸ ᱠᱟᱱᱟᱭ ᱾ ᱫᱷᱚᱨᱚᱢ ᱢᱮᱱᱟᱜᱼᱟ ᱢᱮᱱᱛᱮ ᱱᱚᱣᱟ ᱡᱮᱜᱮᱛ ᱫᱷᱟᱹᱨᱛᱤ ᱢᱮᱱᱟᱜᱼᱟ, ᱡᱤᱣᱤ ᱦᱚᱸ ᱢᱮᱱᱟᱜᱼᱟ᱾ ᱫᱦᱚᱨᱚᱢ ᱦᱚᱨ ᱫᱚ ᱢᱤᱫ ᱱᱤᱛᱤ ᱱᱤᱭᱚᱢ ᱛᱟᱞᱟ ᱨᱮ ᱢᱮᱱᱟᱜᱼᱟ᱾ᱚᱱᱟ ᱵᱟᱰ ᱠᱟᱝᱠᱷᱟᱱ ᱥᱤᱛ ᱵᱟᱭ ᱛᱟᱦᱮᱸᱢᱟ᱾ ᱫᱷᱚᱨᱚᱢ ᱫᱚ ᱢᱤᱫ ᱯᱚᱛ ᱠᱟᱱᱟ ᱟᱨ ᱵᱟᱝ ᱫᱟᱲᱮ ᱠᱟᱱᱟ᱾ ᱚᱱᱟ ᱥᱚᱱᱚᱛ ᱴᱷᱟᱣ ᱨᱮ ᱥᱮᱞᱮᱫᱚᱜ ᱞᱟᱹᱜᱤᱫ ᱜᱮ ᱥᱟᱹᱨᱤ ᱦᱚᱨ ᱰᱟᱦᱟᱨ ᱛ ᱛᱟᱲᱟᱢ ᱦᱩᱨᱩᱜᱼᱟ᱾

ᱡᱚᱛᱚᱠᱚ ᱱᱚᱣᱟ ᱡᱮᱜᱮᱛ ᱫᱷᱟᱹᱨᱛᱤ ᱨᱮ ᱢᱟᱹᱱᱢᱤ ᱞᱮᱠᱟ ᱛᱮᱵᱚᱱ ᱡᱟᱱᱟᱢ ᱟᱠᱟᱱᱟ ᱾ ᱟᱹᱰᱤ ᱜᱚᱴᱟᱝ ᱡᱟᱹᱛᱤ ᱯᱟᱹᱨᱤᱥ ᱨᱮᱵᱚᱱ ᱦᱟᱹᱴᱤᱧ ᱟᱠᱟᱱᱟ᱾ ᱡᱟᱹᱛᱤ ᱡᱟᱹᱱᱤ ᱨᱚᱲ ᱯᱟᱹᱨᱥᱤ ᱦᱚᱸ ᱛᱟᱵᱚᱱ ᱢᱮᱱᱟᱜᱼᱟ᱾ ᱡᱚᱛᱚ ᱦᱚᱟᱜ ᱯᱟᱹᱨᱤᱥᱤ ᱟᱯᱟᱱ ᱟᱹᱛᱤᱱ ᱜᱮ ᱨᱮᱦᱚᱸ ᱢᱤᱱᱤᱫ ᱦᱚᱲ ᱫᱚ ᱟᱹᱰᱤ ᱜᱚᱴᱟᱝ ᱯᱟᱹᱨᱤᱥ ᱦᱚᱚᱠ ᱵᱟᱰᱟᱭᱟ ᱟᱨ ᱨᱚᱲ ᱦᱚᱸ ᱠᱚ ᱨᱚᱲ ᱫᱟᱲᱮᱭᱟᱜᱼᱟ᱾ ᱛᱚᱵᱮ ᱫᱷᱚᱨᱚᱢ ᱫᱚ ᱚᱠᱚᱭ ᱚᱠᱟ ᱫᱷᱚᱨᱚᱢ ᱨᱤᱱᱤᱡ ᱠᱟᱱᱟᱭ ᱱᱩᱱᱤᱫᱚ ᱚᱱᱟᱜᱮ ᱟᱡ ᱞᱟᱹᱜᱤᱫ ᱛᱮᱫᱚ ᱥᱮᱸᱟ ᱛᱟᱭᱟ ᱾ ᱮᱴᱟᱜ ᱫᱷᱚᱨᱚᱢ ᱨᱮ ᱢᱮᱥᱟᱜ ᱨᱮᱦᱚᱸᱭ ᱚᱦᱚᱭ ᱛᱟᱞᱟ ᱚᱲᱟᱜ ᱠᱮᱭᱟ᱾ ᱧᱮᱞ ᱵᱷᱮᱜᱟᱨᱚᱜ ᱜᱮᱭᱟᱭ᱾ ᱫᱷᱚᱨᱚᱢ ᱡᱟᱹᱱᱤ ᱵᱚᱸᱜᱟ ᱵᱳᱨᱳ ᱦᱚᱸᱠᱚ ᱵᱷᱮᱜᱟᱨ ᱵᱷᱤᱜᱤᱨ ᱜᱮᱭᱟ᱾ ᱵᱚᱝᱜᱟ ᱵᱳᱨᱳ ᱵᱟᱝᱵᱚ ᱧᱮᱞ ᱟᱠᱟᱫ ᱠᱚᱣᱟ ᱪᱮ ᱫᱷᱚᱨᱚᱢ ᱦᱚ ᱵᱟᱝᱵᱚᱱ ᱧᱮᱞ ᱟᱠᱟᱫᱮᱭᱟ᱾ ᱮᱱᱛᱮ ᱨᱮᱦᱚᱸ ᱵᱚᱱ ᱯᱟᱹᱛᱭᱟᱹᱣ ᱟᱠᱟᱣᱟᱫᱮᱭᱟ ᱟᱵᱚ ᱫᱚᱭ ᱧᱮᱞ ᱮᱫ ᱵᱚᱱ ᱜᱮᱭᱟ ᱟᱨ ᱟᱡᱟᱜ ᱦᱚᱨ ᱰᱟᱦᱟᱨ ᱨᱮᱜᱮ ᱳᱨᱞ ᱫᱚᱦᱚ ᱟᱠᱟᱫ ᱵᱚᱱᱟ ᱛᱚᱲᱮ ᱥᱩᱛᱟᱹᱢ ᱛᱮ᱾ ᱢᱤᱫ ᱞᱮᱠᱟ ᱵᱚᱸᱜᱟ ᱵᱳᱨᱳ ᱨᱮ ᱯᱟᱹᱛᱭᱟᱹᱣᱜ ᱦᱚᱲ ᱫᱚ ᱢᱤ ᱢᱤᱫ ᱜᱚᱴᱟᱝ ᱫᱷᱚᱨᱚᱢ ᱝᱤᱱ ᱦᱚᱲ ᱠᱟᱱᱟ ᱵᱚᱱ ᱾ ᱱᱤᱛᱚᱜ ᱫᱷᱟᱹᱨᱛᱤ ᱨᱮ ᱟᱹᱰᱤ ᱜᱚᱴᱟᱝ ᱫᱷᱚᱨᱚᱢ ᱨᱤᱱ ᱦᱚᱲ ᱢᱮᱱᱟᱜ ᱠᱚᱣᱟ᱾ ᱛᱚᱵᱮ ᱩᱱᱠᱩ ᱮᱟᱜ ᱫᱷᱚᱨᱚᱢ ᱨᱮᱱᱟᱝ ᱠᱟᱛᱷᱟ ᱫᱚ ᱵᱟᱵᱚᱱ ᱪᱟᱨᱪᱟᱭᱟ᱾ ᱟᱵᱚ ᱫᱚ ᱟᱵᱚᱣᱟᱜ ᱥᱟᱨᱱᱟ ᱫᱷᱚᱨᱚᱢ ᱨᱮᱱᱟᱝ ᱠᱟᱛᱷᱟ ᱜᱮᱵᱚᱱ ᱪᱟᱨᱪᱟᱭᱟ᱾

ᱟᱵᱚᱫᱚ ᱡᱟᱦᱟᱸᱱᱟᱜ ᱜᱮᱵᱚᱱ ᱠᱟᱹᱢᱤ ᱥᱟᱨ ᱥᱟᱹᱜᱩᱱ ᱢᱟᱬᱟᱝ ᱵᱚᱱ ᱧᱮᱞᱟ᱾ ᱚᱠᱟ ᱨᱮᱵᱚᱱ ᱟᱹᱛᱩ ᱫᱤᱥᱚᱢ ᱟᱨ ᱚᱠᱟᱨᱮᱵᱚᱱ ᱟᱲᱟᱜ ᱫᱩᱣᱟᱹᱨᱟ, ᱚᱸᱰᱮᱜᱮ ᱛᱮᱝᱜᱮᱱ ᱠᱟᱛᱮ ᱥᱟᱹᱨᱥᱟᱹᱜᱩᱱ ᱵᱚ ᱧᱟᱢᱟ᱾ ᱟᱵᱚ ᱫᱚ ᱚᱠᱟ ᱨᱮᱵᱚᱱ ᱡᱟᱦᱮᱨᱟ ᱚᱱᱟ ᱦᱚ ᱛᱮᱸᱜᱮᱱ ᱠᱟᱛᱮ ᱥᱟᱨ ᱥᱟᱹᱜᱩᱱ ᱵᱚ ᱮᱢᱟ ᱥᱟᱨ ᱥᱟᱹᱜᱩᱱ ᱜᱟᱱᱞᱮ ᱮᱱᱟᱝ ᱜᱮ ᱚᱸᱰᱮ ᱵᱚᱱ ᱟᱹᱛᱩ ᱫᱤᱥᱚᱢᱼᱟ ᱚᱲᱟᱜ ᱫᱩᱣᱟᱹᱨᱟ ᱟᱨ ᱡᱟᱦᱮᱨ ᱵᱚᱸᱜᱟ ᱦᱚᱸ ᱵᱚᱱ ᱨᱟᱠᱟᱵ ᱠᱚᱣᱟ᱾ ᱨᱚᱣᱟᱫᱚ ᱱᱤᱛ ᱨᱮᱱᱟᱝ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ᱾ ᱧᱮᱞ ᱛᱤᱭᱜ ᱪᱮ ᱠᱟᱫᱷᱟᱣ ᱛᱤᱭᱩᱜ ᱠᱟᱛᱷᱟ ᱦᱚᱸ ᱵᱟᱝ ᱠᱟᱱᱟ᱾ ᱟᱜᱤᱞ ᱦᱟᱯᱲᱟᱢ ᱛᱤᱞᱪᱩ ᱛᱤᱠᱤᱱ ᱜᱮ ᱫᱷᱚᱨᱚᱢᱟᱜ ᱨᱚᱲ ᱛᱮ ᱟᱨ ᱫᱷᱚᱨᱚᱢᱟᱜ ᱦᱚᱨ ᱛᱮ ᱥᱟᱨ ᱠᱤᱱ ᱛᱮᱨᱟᱝ ᱞᱮᱫᱟ ᱾ ᱥᱟᱨ ᱫᱚ ᱡᱚᱲᱟ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹᱨᱮ ᱧᱩᱨ ᱞᱮᱱᱟ᱾ ᱟᱸᱰᱮᱜᱮ ᱜᱚᱱᱚᱸ ᱦᱮᱫ ᱜᱮ ᱡᱩᱡᱩᱞᱟᱝ ᱜᱮ ᱫᱷᱟᱚᱨᱚᱢ ᱜᱮ ᱚᱝ ᱦᱟᱞᱟᱝ ᱞᱮᱱᱟ ᱾ ᱩᱱ ᱨᱮ ᱜᱮ ᱞᱟᱹᱭᱟᱫ ᱠᱤᱱᱟ, ᱱᱩᱠᱩᱠᱚ ᱟᱛᱮᱜᱮ ᱟᱵᱤᱱ ᱫᱚᱦᱚ ᱧᱟᱢᱚᱜ ᱨᱮᱱᱟᱝ ᱦᱚᱨ ᱵᱤᱱ ᱧᱟᱢᱼᱟ᱾ ᱰᱩᱠ ᱨᱮ ᱢᱩᱦᱤᱢ ᱨᱮ, ᱟᱹᱯᱟᱹᱥᱩᱞᱚᱜ ᱨᱮ ᱰᱟᱥ ᱨᱮ ᱵᱟᱥ ᱨᱮ ᱥᱮᱸᱫᱨᱮ ᱨᱮ ᱠᱟᱨᱠᱟ ᱨᱮ ᱡᱩᱦᱤᱢ ᱵᱮᱲᱟ ᱠᱚᱨᱮᱫᱚ ᱱᱩᱠᱩ ᱴᱷᱮᱱ ᱜᱮ ᱜᱚᱰ ᱡᱚᱦᱟᱨᱚᱜ ᱵᱤᱱ ᱱᱩ ᱡᱱᱩᱠᱩ ᱜᱮ ᱟᱵᱤᱱ ᱠᱚ ᱫᱩᱜ ᱨᱮᱠᱚ ᱜᱚᱲᱚ ᱟᱹᱜᱤᱱᱟᱠᱚ ᱾ ᱱᱟᱯᱟᱭ ᱨᱮᱠᱚ ᱰᱚᱦᱚ ᱠᱟᱹᱵᱤᱱᱟ ᱤᱱᱟ ᱦᱤᱞᱚᱜ ᱠᱷᱚᱱ ᱫᱚ ᱚᱱᱟ ᱨᱚᱲ ᱜᱮ ᱚᱱᱟ ᱦᱨᱜᱮ ᱩᱱᱠᱤᱱ ᱦᱟᱯᱟᱲᱟᱢ ᱠᱤᱱ ᱯᱟᱸᱡᱟ ᱟᱜᱩ ᱟᱠᱟᱫᱟ ᱾ ᱩᱱᱠᱤᱱ ᱦᱟᱯᱟᱲᱟᱢ ᱠᱤᱱᱟ ᱱᱟᱭ ᱨᱚᱲ ᱜᱮ ᱚᱱᱟ ᱦᱚᱨᱜᱮ ᱱᱤᱛ ᱦᱚᱸ ᱟᱵᱚ ᱫᱚᱵᱚᱱ ᱯᱟᱸᱡᱟ ᱟᱹᱜᱩ ᱟᱠᱫᱼᱟ ᱟᱨ ᱚᱱᱟ ᱜᱮᱵᱚᱱ ᱥᱟᱹᱨᱤ ᱟᱠᱟᱣᱟᱫᱼᱟ᱾

ᱩᱱᱠᱤᱱ ᱟᱠᱤᱞ ᱦᱟᱯᱟᱲᱟᱢ ᱯᱤᱞᱪᱩ ᱛᱤᱠᱤᱱ ᱜᱮ ᱫᱷᱚᱨᱚᱢ ᱜᱮ ᱢᱟᱨᱟᱝ ᱵᱳᱨᱳ ᱞᱮᱠᱟᱛᱮ ᱱᱟᱯᱟᱭ ᱛᱟᱦᱮᱸᱱ ᱨᱮᱭᱟᱜ ᱟᱹᱯᱟᱹᱥᱩᱞᱚᱜ ᱨᱮᱭᱟᱜ ᱦᱚᱱ ᱜᱟᱬᱟ ᱡᱚᱝ ᱨᱮᱭᱟᱜ ᱥᱟᱱᱟᱢ ᱞᱮᱠᱟᱱᱟᱜᱼᱮ ᱞᱟᱹᱭ ᱟᱹᱜᱩ ᱪᱮᱫ ᱟᱹᱜᱩ ᱟᱰ ᱠᱤᱱᱟ᱾ ᱟᱠᱤᱱ ᱨᱤᱱ ᱮᱭᱟᱭ ᱠᱚᱲᱟ ᱮᱭᱟᱭ ᱠᱩᱲᱤ ᱦᱚᱸ ᱢᱟᱨᱟᱝ ᱵᱳᱨᱳ ᱟᱜ ᱟᱸᱫᱮ ᱛᱮᱜᱮ ᱠᱤᱱ ᱡᱩᱨᱤ ᱡᱚᱛᱟ ᱠᱟᱫ ᱠᱚᱣᱟ᱾ ᱟᱯᱟᱱ ᱟᱹᱯᱤᱱ ᱚᱲᱟᱜ ᱫᱩᱣᱟᱹᱨ ᱠᱤᱱ ᱛᱮᱝᱜᱮᱱ ᱛᱤᱨᱩᱵ ᱟᱰ ᱠᱳᱴᱮ ᱡᱟᱹᱛᱤ ᱯᱟᱹᱨᱤᱥ ᱦᱚᱸ ᱠᱤᱱ ᱦᱟᱴᱤᱧ ᱟᱰ ᱠᱳᱣᱟ᱾ ᱡᱟᱷᱮᱨ ᱵᱳᱱᱜᱟ, ᱟᱳᱟᱜ ᱵᱳᱱᱜᱟ, ᱛᱟᱱᱫᱤ ᱵᱳᱱᱜᱟ, ᱜᱳᱲᱟ ᱵᱚᱝᱜᱟ ᱡᱚᱛᱚ ᱠᱤᱱ ᱞᱟᱹᱭ ᱟᱰ ᱠᱳᱣᱟ᱾ ᱩᱱᱨᱮᱜᱮ ᱠᱤᱱ ᱞᱟᱹᱭ ᱟᱫ ᱠᱚᱣᱟ ᱟᱯᱟᱱ ᱟᱹᱯᱤᱱ ᱯᱮ ᱛᱟᱦᱮᱸᱨ ᱠᱟᱱ ᱨᱮᱦᱚᱸ ᱟᱯᱮᱫᱚ ᱵᱚᱭᱦᱟ ᱫᱩᱯᱩᱞᱟᱹᱲ ᱫᱚ ᱟᱞᱚᱯᱮ ᱦᱤᱲᱤᱧᱟ᱾ ᱵᱟᱯᱞᱟ ᱜᱟᱸᱳᱜ ᱞᱟᱹᱜᱤᱰ ᱛᱮᱜᱮ ᱡᱟᱹᱛᱤ ᱯᱟᱹᱨᱤᱥ ᱫᱚᱞᱤᱧ ᱦᱟᱹᱴᱤᱧ ᱟᱰ ᱯᱮᱭᱟ᱾ ᱸᱳᱣᱟ ᱛᱟᱭᱚᱢ ᱫᱚ ᱟᱯᱟᱱ ᱯᱟᱹᱨᱤᱥ ᱨᱮᱜᱮ ᱜᱤᱫᱝᱨᱟᱹ ᱠᱚᱫᱚ ᱡᱩᱨᱤ ᱡᱚᱛᱟ ᱠᱟᱠᱚᱯᱮ᱾ ᱵᱚᱭᱦᱟ ᱫᱩᱯᱩᱞᱟᱹᱲ ᱯᱮ ᱦᱤᱲᱤᱧ ᱞᱮᱠᱷᱟᱱ ᱫᱷᱚᱨᱚᱢ ᱮ ᱟᱹᱲᱤᱥᱚᱜᱼᱟ ᱟᱯᱮ ᱴᱷᱮᱱ ᱠᱷᱚᱱᱮ ᱥᱟᱦᱟᱜᱼᱟ ᱵᱟᱭ ᱧᱮᱞ ᱯᱮᱭᱟ, ᱵᱟᱭ ᱜᱚᱲᱚ ᱟᱯᱮᱭᱟ᱾ ᱱᱟᱬᱟᱯᱤᱲᱟ ᱦᱤᱡᱩᱜᱼᱟ ᱥᱩᱞᱩᱠ ᱨᱮ ᱚᱦᱚ ᱯᱮ ᱛᱟᱦᱮᱸ ᱠᱮᱭᱟ᱾

ᱢᱤᱫ ᱫᱷᱟᱣ ᱱᱚᱝᱠᱟᱜᱮ ᱦᱟᱯᱟᱲᱟᱢ ᱠᱚ ᱫᱷᱚᱨᱚᱢ ᱠᱚ ᱦᱤᱲᱤᱧ ᱞᱮᱫᱮᱭᱟ᱾ ᱠᱟᱮᱟ ᱰᱟᱜᱽᱨᱤ ᱪᱟᱵᱟ ᱞᱮᱱᱟ ᱠᱚ ᱚᱱᱟ ᱛᱮ ᱫᱤᱥᱚᱢ ᱨᱮ ᱟᱠᱟᱞ ᱵᱚᱞᱚ ᱮᱱᱟ ᱡᱚᱢᱟᱜ ᱧᱩᱸᱟᱜ ᱵᱟᱝ ᱠᱚ ᱧᱟᱢ ᱞᱮᱫᱟ᱾ ᱨᱮᱝᱜᱮᱡ

ᱛᱮᱛᱟᱝ ᱟᱡᱟᱨ ᱵᱮᱢᱟᱨ ᱨᱮᱠᱚ ᱡᱚᱵᱮ ᱞᱮᱱᱟ᱾ ᱱᱮᱭᱩᱟᱣ ᱛᱟᱯᱟᱢ ᱫᱟᱯᱟᱞ ᱢᱟᱯᱟᱜ ᱦᱮᱯᱮᱫ ᱮᱱᱟᱠᱚ ᱟᱠᱚ ᱴᱷᱮᱱ ᱠᱷᱚᱱ ᱡᱚᱛᱚ ᱵᱚᱸᱜᱟ ᱵᱳᱨᱳ ᱠᱚ ᱥᱟᱦᱟᱭᱮᱱᱟ᱾ ᱫᱤᱥᱚᱢ ᱨᱮ ᱟᱠᱟᱞ ᱵᱚᱞᱚ ᱮᱱᱟ ᱡᱚᱢᱟᱜ ᱧᱩ ᱟᱜ ᱵᱟᱝ ᱛᱮ ᱨᱮᱝᱜᱮᱡ ᱛᱮᱛᱟᱝ ᱟᱡᱟᱨ ᱵᱮᱢᱟᱨ ᱯᱮᱨᱮᱡ ᱮᱱᱟ᱾ ᱦᱟᱯᱟᱲᱟᱢ ᱠᱚᱠᱚ ᱵᱩᱡᱷᱟᱣ ᱧᱟᱢ ᱠᱮᱫᱟ ᱱᱚᱭᱟᱣ ᱛᱟᱯᱟᱢ ᱢᱟᱯᱟᱜ ᱦᱮᱯᱮᱫ ᱠᱟᱱ ᱛᱮᱠᱚ ᱟᱵᱚ ᱴᱷᱮᱱ ᱠᱷᱚᱱ ᱵᱚᱸᱜᱟ ᱵᱳᱨᱳ ᱠᱚ ᱥᱟᱦᱟ ᱟᱠᱟᱱᱟ᱾ ᱫᱷᱚᱨᱚᱢ ᱦᱚᱨ ᱠᱚ ᱵᱟᱜᱤ ᱟᱠᱟᱣᱟᱫᱟ ᱢᱮᱱᱛᱮᱠᱚ ᱵᱟᱰᱟᱭ ᱠᱮᱫᱟ᱾ ᱟᱡ ᱥᱟᱨ ᱠᱷᱟᱸᱰᱟ ᱠᱟᱹᱯᱤ ᱰᱚᱦᱚ ᱜᱤᱰᱤ ᱠᱟᱛᱮ ᱟᱪᱟᱨ ᱵᱤᱪᱟᱹᱨ ᱞᱟᱹᱜᱤᱫ ᱠᱚ ᱫᱩᱯᱩᱲᱩᱵ ᱮᱱᱟ᱾ ᱵᱚᱸᱜᱟ ᱵᱳᱨᱳ ᱠᱚ ᱩᱭᱦᱟᱹᱨ ᱟᱢ ᱠᱮᱫ ᱠᱚᱣᱟ ᱟᱨᱠ ᱚ ᱱᱮᱦᱚᱨ ᱟᱫ ᱠᱚᱣᱟ᱾ ᱥᱚᱨᱚᱜᱽ ᱯᱩᱨᱤ ᱠᱷᱚᱱ ᱜᱤᱰᱫᱨᱟᱹ ᱪᱤᱱᱛᱮ ᱞᱤᱴᱟᱹᱭ ᱟᱸᱜᱚ ᱦᱮᱡ ᱮᱱᱟ᱾ ᱧᱮᱞᱮ ᱠᱟᱱᱟ ᱠᱚ ᱵᱚᱦᱚᱜ ᱨᱮᱛᱟᱭ ᱡᱚᱞᱡᱟ ᱟᱹᱰᱤ ᱪᱮᱦᱮᱨᱟᱭ ᱥᱮᱨᱮᱧ ᱮᱫᱟ, ᱟᱹᱰᱤ ᱪᱮᱦᱮᱨᱟᱭ ᱚᱨᱚᱝ ᱮᱫᱟ, ᱦᱚᱥᱚ ᱥᱟᱱᱟᱴᱮᱫ ᱠᱚ ᱨᱮᱦᱚᱸ ᱚᱠᱟᱨᱮᱢ ᱫᱩᱲᱩᱵ ᱮᱭᱟ ᱪᱮᱫ ᱮᱢ ᱮᱢᱟᱭᱟ᱾ ᱨᱮᱝᱜᱮᱡ ᱛᱮᱛᱟᱝ ᱧᱮᱞ ᱠᱟᱛᱮ ᱥᱚᱨᱚᱜᱪ ᱯᱩᱨᱤ ᱛᱮ ᱞᱤᱴᱟᱹᱭ ᱨᱩᱣᱟᱲ ᱪᱟᱞᱟᱣ ᱮᱱᱟ᱾ ᱢᱟᱨᱟᱝ ᱴᱷᱟᱹᱠᱩᱨ ᱮ ᱞᱟᱹᱭ ᱟᱫᱮᱭᱟ᱾ ᱢᱟᱨᱟᱝ ᱴᱷᱟᱹᱠᱩᱨ ᱮ ᱞᱟᱹᱭ ᱠᱮᱫᱼᱟ, ᱥᱤᱨᱟᱹ ᱜᱟᱭ ᱥᱟᱣ ᱨᱮ ᱡᱟᱦᱮᱨ ᱟᱳ ᱢᱮᱱᱟᱭᱟ ᱩᱱᱤ ᱟᱸᱜᱚ ᱪᱟᱞᱟᱣ ᱞᱮᱱ ᱠᱷᱚᱱ ᱵᱚᱸᱜᱟ ᱵᱳᱨᱳ ᱠᱚ ᱟᱸᱜᱚ ᱥᱮᱱᱚᱜᱼᱟ᱾ ᱞᱤᱴᱟᱹ ᱟᱨ ᱢᱚᱸᱮ ᱠᱤᱱ ᱡᱚᱴᱟᱣ ᱮᱱᱟ᱾ ᱦᱤᱦᱤᱲᱤ ᱠᱤᱱ ᱪᱟᱞᱟᱣ ᱮᱱᱟ ᱾ ᱥᱤᱨᱟ ᱜᱟᱹᱭ ᱠᱤᱱ ᱯᱟᱸᱡᱟ ᱧᱢ ᱠᱮᱫᱮᱭᱟ᱾ ᱢᱟᱹᱱᱢᱤ ᱦᱚᱯᱚᱱ ᱡᱚᱣᱟᱜ ᱢᱩᱦᱤᱱ ᱠᱟᱛᱷᱟᱠᱤᱱ ᱞᱟᱹᱭ ᱟᱫᱮᱭᱟ᱾ ᱥᱤᱨᱟᱹ ᱜᱟᱭ ᱦᱚᱸᱭ ᱨᱮᱵᱮᱱ ᱮᱱᱟ᱾

ᱥᱤᱨᱟᱹ ᱜᱟᱹᱭ ᱥᱟᱶᱛᱮ ᱛᱟᱢ ᱜᱚᱢ ᱠᱚ ᱟᱨ ᱡᱟᱦᱮᱨ ᱟᱭᱳ ᱥᱟᱶᱛᱮ ᱡᱚᱛᱚ ᱵᱚᱸᱜᱟ ᱵᱳᱨᱳ ᱠᱚ ᱫᱷᱟᱹᱨᱛᱤ ᱯᱩᱨᱤ ᱛᱮᱠᱚ ᱟᱸᱜᱚ ᱦᱮᱡ ᱮᱱᱟ᱾ ᱫᱟᱜ ᱦᱚᱸᱭ ᱡᱟᱹᱲᱤ ᱠᱮᱫᱼᱟ, ᱥᱤᱨᱟᱹ ᱜᱟᱹᱭ ᱦᱚᱸ ᱰᱤᱨᱚ ᱰᱚᱨᱚᱭ ᱛᱚᱣᱟ ᱠᱮᱫᱼᱟ᱾ ᱚᱱᱟ ᱠᱚ ᱧᱩ ᱠᱟᱛᱮ ᱫᱟᱦᱮ ᱠᱚ ᱡᱚᱢ ᱠᱟᱛᱮ ᱢᱟᱹᱱᱢᱤ ᱠᱚ ᱵᱟᱧᱪᱟᱣ ᱮᱱᱟ᱾ ᱞᱤᱴᱟᱹ ᱢᱚᱬᱮ ᱠᱤᱱ ᱫᱚ ᱫᱟᱢᱠᱚᱢ ᱰᱟᱹᱨᱤ ᱡᱚᱲᱟᱣ ᱠᱟᱛᱮ ᱠᱤᱱ ᱥᱤ ᱠᱮᱫᱼᱟ᱾ ᱤᱲᱤ ᱮᱨᱵᱟ ᱜᱩᱫᱩᱞᱤ ᱦᱳᱲᱳ ᱤᱛᱟᱹ ᱠᱤᱱ ᱮᱨ ᱠᱮᱫᱟ᱾ ᱫᱟᱨᱮ ᱮᱱᱟ ᱜᱮᱞᱮ ᱵᱤᱞᱤ ᱮᱱᱟ ᱾ ᱨᱟᱹᱥᱠᱟᱹ ᱜᱮ ᱠᱚ ᱡᱚᱢ ᱦᱟᱹᱴᱤᱧ ᱠᱮᱫᱟ᱾ ᱨᱟᱹᱥᱠᱟᱹ ᱜᱮᱠᱚ ᱮᱱᱮᱡ ᱥᱮᱨᱮᱧ ᱠᱮᱫᱟ᱾ ᱨᱟᱹᱥᱠᱟᱹ ᱨᱮᱜᱮ ᱠᱚ ᱛᱟᱦᱮᱸᱭᱮᱱᱟ᱾

ᱞᱤᱴᱟᱹ ᱢᱚᱬᱮᱠᱚ ᱠᱚᱲᱟ ᱠᱚᱫᱚ ᱥᱮᱫᱽᱨᱟ ᱠᱤᱱ ᱟᱭᱩᱨ ᱠᱮᱫ ᱠᱚᱣᱟ ᱥᱮᱫᱽᱨᱟ ᱠᱷᱚᱱ ᱨᱩᱣᱟᱹᱲ ᱠᱟᱛᱮ ᱜᱤᱛᱤᱛᱤᱡ ᱴᱟᱺᱰᱤ ᱛᱮᱠᱚ ᱟᱸᱜᱚ ᱭᱮᱱᱟ, ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹᱨᱮᱠᱚ ᱫᱩᱲᱩᱵ ᱮᱱᱟ᱾ ᱚᱠᱟ ᱠᱟᱛᱷᱟ ᱠᱚ ᱦᱟᱯᱟᱲᱟᱢ ᱠᱚ ᱜᱮᱞ ᱟᱨ ᱥᱮᱨᱢᱟ ᱟᱪᱟᱨ ᱢᱤᱫ ᱵᱤᱪᱟᱹᱨ ᱢᱤᱫ ᱠᱟᱛᱮ ᱵᱟᱝᱠᱚ ᱵᱚᱪᱚᱜ ᱞᱮᱫ ᱛᱟᱦᱮᱸᱠᱟᱱᱟ, ᱤᱱᱟᱹ ᱷᱤᱞᱚᱜ ᱫᱚ ᱵᱚᱸᱜᱟ ᱵᱳᱨᱳ ᱠᱚ ᱥᱶ ᱛᱮ ᱠᱟᱛᱷᱟ ᱠᱚ ᱵᱚᱪᱚᱜ ᱥᱟᱹᱨᱤ ᱠᱮᱫᱟ᱾ ᱤᱱᱟ ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹᱨᱮ ᱾ ᱚᱸᱰᱮ ᱠᱷᱚᱱ ᱜᱮ ᱵᱚᱸᱜᱟ ᱵᱳᱨᱳ ᱦᱚᱸ ᱠᱚ ᱪᱷᱟᱱ ᱮᱱᱟ᱾ ᱱᱤᱛ ᱨᱮᱱᱚᱸ ᱟᱵᱚ ᱥᱟᱨᱱᱟ ᱫᱷᱚᱨᱚᱢ ᱨᱤᱱ ᱦᱚᱲ ᱫᱚ ᱚᱱᱟ ᱨᱟᱭ ᱨᱤᱛ ᱜᱮ ᱡᱟᱱᱟᱢ ᱠᱷᱚᱱ ᱜᱩᱡᱩᱜ ᱦᱟᱹᱵᱤᱡ ᱵᱚᱱ ᱯᱟᱸᱡᱟ ᱟᱜᱩ ᱟᱠᱚᱫᱼᱟ᱾

ᱱᱤᱛ ᱦᱚ ᱧᱮᱞ ᱞᱮᱠᱷᱟᱱ ᱟᱵᱚ ᱥᱟᱨᱱᱟ ᱫᱷᱚᱨᱚᱢ ᱨᱮᱱᱟᱝ ᱫᱚ ᱟᱵᱚᱠᱚᱣᱟᱜ ᱞᱮᱜᱽ ᱞᱟᱠᱪᱟᱨ ᱠᱚᱨᱮ ᱜᱮ ᱫᱷᱚᱨᱚᱢ ᱨᱮᱱᱟᱝ ᱝᱟᱲᱮ ᱥᱚ ᱢᱮᱱᱟᱜᱼᱟ᱾ ᱡᱮᱞᱮᱠᱺᱼ ᱡᱟᱦᱟᱸᱭ ᱯᱮᱲᱟᱠᱚ ᱟᱵᱚ ᱟᱲᱟᱜ ᱠᱚ ᱦᱮᱡ ᱞᱮᱱᱠᱷᱟᱱ ᱟᱭᱳ ᱦᱚᱲ ᱠᱚ ᱞᱚᱴᱟ ᱜᱟᱥᱟᱣ ᱢᱟᱡᱟᱣ ᱯᱷᱚᱩᱨᱪᱟᱹ ᱠᱟᱛᱮ ᱯᱮᱨᱮᱡ ᱞᱚᱴᱟᱫᱟᱜ ᱚᱰᱚᱠ ᱠᱟᱛᱮ ᱯᱮᱲᱟ ᱥᱟᱢᱟᱝ ᱨᱮᱠᱚ ᱫᱚᱲᱚᱢᱼᱟ ᱟᱨ ᱥᱟᱹᱜᱟᱹᱭ ᱡᱟᱹᱱᱤ ᱦᱩᱰᱤᱧ ᱢᱟᱨᱟᱝ ᱡᱟᱦᱟᱸ ᱞᱮᱠᱟᱜᱮ ᱥᱟᱹᱜᱟᱹᱭ ᱛᱟᱦᱮᱱᱟ ᱚᱱᱠᱟ ᱠᱚ ᱡᱚᱦᱟᱨ ᱟᱠᱚᱣᱟ ᱟᱨ ᱵᱟᱝ ᱠᱚ ᱜᱚᱰ ᱟᱠᱚᱣᱟ᱾ ᱱᱚᱣᱟ ᱫᱚ ᱡᱚᱛᱚ ᱚᱲᱟᱝ ᱨᱮᱜᱮ ᱦᱩᱭᱩᱜ ᱠᱟᱱᱟ᱾ ᱧᱮᱞ ᱛᱚᱫᱚ ᱪᱮᱫ ᱦᱚᱸ ᱟᱵᱭ ᱵᱩᱡᱷᱟᱹᱣᱜ ᱠᱟᱱᱟ᱾ ᱤᱠᱷᱟᱹᱱ ᱟᱹᱰᱤ ᱥᱮᱸᱟ ᱵᱚᱜᱟ ᱥᱟᱲᱮ ᱢᱮᱱᱟᱜᱼᱟ᱾ ᱟᱵᱚ ᱫᱚᱵᱚᱱ ᱝᱚᱲᱟ ᱯᱮᱲᱟ ᱯᱨᱩᱵᱷᱩ ᱠᱚ ᱛᱟᱞᱮ ᱠᱚᱦᱮᱡ ᱟᱠᱟᱱᱟ᱾ ᱵᱨᱩᱵᱷᱩ ᱠᱚᱫᱚ ᱠᱚ ᱵᱚᱜᱟ ᱠᱚ ᱠᱟᱱᱟ᱾ ᱟᱵᱚ ᱵᱚᱱ ᱟᱨᱩᱵᱚᱜ ᱥᱽ ᱛᱮ ᱯᱨᱵᱷ ᱠᱚᱦᱚᱸ ᱠᱚ ᱟᱹᱨᱩᱵᱚᱜᱼᱟ᱾ ᱪᱮᱫᱟᱜ ᱰᱮ ᱟᱵᱚᱫᱚ ᱡᱟᱦᱟᱸᱥᱮᱱ ᱜᱮᱵᱚ ᱪᱟᱞᱟᱜ ᱵᱚᱸᱜᱟ ᱫᱚᱠᱚ ᱯᱟᱸᱡᱟ ᱠᱟᱵᱚᱱ ᱜᱮᱭᱟ᱾ ᱚᱱᱟᱛᱮ ᱵᱤᱨ ᱵᱩᱨᱩ ᱠᱚᱨᱮ ᱦᱚᱨ ᱵᱤᱨ ᱠᱚᱨᱮ ᱟᱹᱰᱤ ᱜᱚᱴᱟᱝ ᱝᱷᱚᱴᱚᱱ ᱠᱷᱚᱱ ᱠᱚ ᱯᱟᱨᱚᱢ ᱠᱟᱵᱚ ᱠᱟᱱᱟ᱾ ᱵᱤᱨ ᱵᱩᱨᱩ ᱠᱚᱨᱮ ᱠᱩᱞ ᱵᱟᱱᱟ ᱠᱠᱚᱴᱮᱱ ᱠᱷᱚᱱ ᱵᱚᱱ ᱨᱩᱣᱟᱲ ᱞᱮᱱ ᱠᱷᱟᱱ ᱵᱚ ᱢᱮᱱᱟ, ᱛᱮᱦᱣᱸᱧ ᱫᱚ ᱦᱩᱱᱟᱝ ᱤᱧ ᱪᱟᱵᱟ ᱩᱛᱟᱹᱨ ᱠᱚᱜᱼᱟ᱾ ᱟᱲᱟᱜ ᱵᱚᱸᱜᱟ ᱠᱚᱜᱮ ᱯᱟᱞᱮ ᱵᱟᱠᱚ ᱟᱲᱟᱜ ᱞᱮᱫᱟ᱾ ᱟᱨ ᱦᱚᱸ ᱟᱲᱟᱜ ᱠᱚᱨᱮ ᱵᱚᱱ ᱨᱩᱣᱟ ᱦᱟᱥᱩ ᱞᱮᱱ ᱠᱷᱟᱱ ᱚᱡᱷᱟ ᱥᱚᱠᱷᱟ ᱠᱚ ᱴᱷᱮᱱ ᱵᱚ ᱠᱷᱟᱹᱸᱤ ᱱᱟᱹᱬᱤ ᱠᱚᱨᱮ ᱠᱚ ᱞᱟᱹᱭᱟ ᱟᱲᱟᱜ ᱵᱚᱝᱜᱟ ᱠᱚᱜᱮ ᱠᱚ ᱵᱟᱹᱲᱤᱡ ᱵᱟᱲᱟ ᱟᱠᱟᱱᱟ, ᱩᱱᱠᱩ ᱠᱚᱜᱮ ᱨᱩᱢ ᱵᱟᱲᱟ ᱧᱚᱜ ᱟᱠᱚᱯᱮ᱾ ᱤᱱᱟᱜ ᱠᱷᱟᱱ ᱥᱮᱛᱟᱜ ᱵᱟᱹᱥᱭᱟᱹᱢ ᱵᱮᱲᱟ ᱩᱢ ᱯᱷᱩᱨᱪᱟ ᱵᱟᱲᱟ ᱠᱟᱛᱮ ᱥᱟᱯᱷᱟ ᱞᱩᱜᱽᱲᱤ ᱛᱮ ᱯᱟᱞᱟᱴ ᱠᱟᱛᱮ ᱯᱮᱨᱮᱡ ᱞᱚᱴᱟᱫᱟᱜ ᱵᱷᱤᱴᱟᱹᱨ ᱨᱮ ᱫᱚᱲᱚᱢ ᱠᱟᱛᱮ ᱵᱚᱱ ᱜᱚᱰ ᱡᱚᱦᱟᱨ ᱞᱮᱱ ᱠᱷᱟᱱ ᱨᱩᱣᱟ ᱨᱟᱵᱟᱝ ᱦᱚᱸ ᱵᱚᱱ ᱵᱮᱥᱚᱜ ᱠᱟᱱᱟ᱾ ᱚᱱ ᱠᱟᱜᱮ ᱵᱟᱹᱦᱩ ᱧᱮᱞ ᱵᱚᱱ ᱪᱟᱞᱟᱜ ᱟᱨ ᱵᱟᱝ ᱡᱟᱶᱟᱭ ᱧᱮᱞ ᱵᱚᱱ ᱵᱚᱱ ᱪᱟᱞᱟᱜ ᱯᱮᱨᱮᱡ ᱞᱚᱴᱟ ᱫᱟᱜ ᱜᱮ ᱵᱷᱤᱛᱟᱹᱨ ᱨᱮ ᱫᱚᱲᱚᱢ ᱚᱴᱚ ᱠᱟᱛᱮ ᱵᱚᱱ ᱥᱮᱱᱚᱜᱼᱟ ᱟᱨ ᱨᱩᱣᱟᱹᱲ ᱦᱮᱡ ᱠᱟᱛᱮ ᱯᱮᱨᱮᱡᱦ ᱞᱚᱴᱟ ᱫᱟᱜ ᱨᱮ ᱜᱮ ᱥᱟᱨ ᱥᱟᱹᱜᱩᱱ ᱵᱚ ᱧᱮᱞᱟ᱾ ᱚᱱᱟᱛᱮ ᱞᱚᱴᱟ ᱫᱟᱴ ᱨᱮᱱᱟᱝ ᱝᱟᱲᱮ ᱫᱚ ᱛᱤᱱᱟᱜ ᱢᱮᱱᱟᱜᱼᱟ, ᱵᱟᱮᱟᱭᱚᱜᱼᱟ᱾

ᱱᱚᱝᱠᱟ ᱜᱮ ᱟᱹᱰᱤ ᱜᱚᱴᱟᱝ ᱟᱵᱚᱣᱟᱜ ᱠᱟᱛᱷᱟ ᱠᱚ ᱢᱮᱱᱟᱜᱼᱟ᱾ ᱡᱟᱱᱟᱢ ᱠᱷᱚᱱ ᱜᱩᱡᱩᱜ ᱦᱟᱹᱜᱤᱡ ᱱᱚᱝᱠᱟᱜᱮ ᱟᱹᱰᱤ ᱜᱟᱱ ᱞᱮᱜᱽ ᱞᱟᱠᱪᱟᱨ ᱪᱮᱛᱟᱱ ᱛᱮᱜᱮ ᱫᱷᱟᱨᱚᱢ ᱫᱟᱲᱮ ᱫᱚ ᱫᱚᱲᱚᱚᱢ ᱟᱠᱟᱱᱟ᱾ ᱚᱱᱟ ᱠᱚ ᱢᱤᱢᱤᱫ ᱴᱟᱝ ᱛᱮ ᱶᱤᱥᱲᱤ ᱠᱟᱛᱮ ᱧᱮᱞ ᱞᱮᱠᱷᱟᱱ ᱣᱴᱟᱜ ᱫᱷᱚᱨᱚᱢ ᱨᱤᱱ ᱚᱚᱲ ᱠᱷᱚᱱ ᱫᱚ ᱟᱵᱚ ᱫᱚ ᱟᱹᱰᱤ ᱜᱮ ᱥᱚᱨᱚᱥ ᱛᱟᱵᱚᱱᱟ᱾ ᱵᱟᱵᱚᱱ ᱵᱟᱮᱟ ᱛᱮᱵᱚᱱ ᱟᱸᱫᱷᱟ ᱟᱠᱟᱱᱟ᱾ ᱵᱟᱮᱟᱭ ᱞᱮᱠᱷᱟᱱ ᱵᱚᱱ ᱚᱵᱚᱣᱟᱜ ᱡᱟᱹᱛᱤ ᱢᱟᱨᱥᱟᱞᱚᱜ ᱼᱟ ᱮᱴᱟᱜ ᱫᱷᱚᱨᱚᱢ ᱨᱤᱱ ᱜᱚᱸᱜᱟ ᱵᱳᱨᱳ ᱨᱮ ᱯᱟᱹᱛᱭᱟᱹᱣ ᱥᱚ ᱮᱠᱟᱞ ᱜᱮ ᱵᱟᱝ ᱦᱤᱡᱩᱜᱼᱟ᱾ ᱚᱱᱟ ᱛᱮᱰ ᱮᱢᱟ ᱡᱚᱛᱚ ᱜᱮ ᱥᱟᱨᱱᱟ ᱫᱷᱚᱨᱚᱢ ᱜᱮᱵᱚᱱ ᱫᱩᱞᱟᱹᱲ ᱢᱟ ᱟᱨ ᱚᱱᱟᱜᱮ ᱢᱟᱱᱟᱣ ᱵᱟᱛᱟᱣ ᱠᱟᱛᱮ ᱵᱚᱱ ᱛᱟᱦᱮᱸᱱ ᱢᱟ᱾

Written by ᱞᱚᱠᱷᱢᱚᱬ ᱢᱟ.ᱨᱰᱤ
Published on Souvenir, 8th International Santal Conference – 2018