ᱥᱟᱨᱱᱟ ᱫᱷᱚᱨᱚᱢ

ᱮᱴᱟᱜ ᱫᱷᱚᱨᱚᱢ ᱠᱚ ᱞᱮᱠᱟ ᱟᱵᱚᱣᱟᱜ ᱦᱚᱸ ᱡᱩᱫᱟᱹ ᱛᱮ “ᱥᱟᱨᱱᱟ ᱫᱷᱚᱨᱚᱢ” ᱢᱮᱱᱟᱜᱼᱟ ᱟᱨ ᱚᱱᱟ ᱥᱚᱨᱠᱟᱨ ᱢᱟᱱᱚᱛᱼᱮ ᱮᱢᱟᱜ ᱢᱟ᱾ ᱵᱷᱟᱨᱚᱛ ᱥᱟᱶᱛᱮ ᱵᱟᱦᱨᱮ ᱫᱤᱥᱚᱢ ᱨᱤᱱ ᱟᱵᱚ ᱦᱚᱲ ᱢᱤᱫ ᱢᱟᱸᱰᱮᱨ ᱨᱮ ᱦᱮᱡ ᱢᱤᱫ ᱠᱟᱛᱮ ᱥᱟᱨᱱᱟ ᱫᱷᱚᱨᱚᱢ ᱩᱯᱩᱨᱩᱢ ᱚᱪᱚᱭ ᱥᱟᱶᱛᱮ ᱦᱚᱲ ᱞᱮᱠᱷᱟ ᱜᱷᱩᱸᱴ (Census Code) ᱨᱮ ᱨᱟᱠᱟᱵ ᱚᱪᱚᱭ ᱞᱟᱹᱜᱤᱫ ᱠᱩᱨᱩᱢᱩᱴᱩ ᱾

C.P.Majhi (Tudu)
Odisha Ponot Pargana
Bharat Jakat Manjhi Pargan Mahal
Bhubaneswar, Odisha

ᱟᱵᱚ ᱦᱚᱲ ᱦᱚᱯᱚᱱᱟᱜ ᱦᱟᱛᱟᱣ ᱟᱨ ᱦᱮᱛᱟ ᱛᱮᱫᱚ ᱦᱚᱲ ᱫᱚ ᱦᱚᱲ ᱜᱮ ᱟᱨ ᱦᱚᱲ ᱵᱟᱝ ᱠᱚ ᱫᱚ ᱠᱚ ᱫᱤᱠᱩ ᱠᱟᱱᱟ᱾ ᱫᱤᱠᱩ ᱢᱮᱱ ᱞᱮᱠᱷᱟᱱ ᱟᱵᱚ ᱵᱷᱤᱲᱟᱹ ᱵᱟᱦᱨᱮ ᱦᱚᱲ ᱠᱚ ᱵᱩᱡᱷᱟᱹᱣᱜᱼᱟ᱾ ᱩᱱᱠᱩ ᱫᱚ ᱮᱴᱟᱜ ᱦᱚᱲ ᱠᱟᱱᱟ ᱠᱚ᱾ ᱮᱴᱟᱜ ᱦᱚᱲᱟᱜ ᱠᱟᱛᱷᱟ ᱫᱚ ᱮᱴᱟᱜ ᱜᱮᱭᱟ᱾ ᱟᱵᱚᱣᱟᱜ ᱥᱟᱞᱟᱜ ᱵᱟᱭ ᱢᱮᱥᱟᱜᱼᱟ, ᱟᱨ ᱵᱟᱭ ᱢᱮᱥᱟᱜ ᱮᱛᱮᱛ ᱛᱮᱜᱮ ᱟᱵᱚ ᱫᱚ ᱟᱹᱫ ᱠᱷᱚᱱ ᱡᱩᱫᱟᱹ ᱛᱮ ᱢᱤᱫᱴᱟᱝ ᱱᱤᱥᱴᱷᱟᱹ ᱯᱩᱥᱴᱟᱹᱣ ᱡᱟᱹᱛᱤ ᱫᱷᱚᱨᱚᱢ ᱦᱚᱲ ᱞᱮᱠᱟ ᱵᱚ ᱛᱟᱦᱮᱸ ᱟᱹᱜᱩ ᱟᱠᱟᱱᱟ᱾ ᱛᱚᱵᱮ ᱥᱟᱹᱨᱤ ᱠᱟᱛᱷᱟ ᱫᱚ ᱦᱩᱭᱩᱜ ᱠᱟᱱᱟ,ᱢᱤᱫᱴᱟᱝ ᱫᱤᱥᱚᱢ ᱛᱟᱞᱟᱨᱮ ᱛᱟᱦᱮᱸ ᱠᱟᱛᱮ ᱦᱚᱸ ᱟᱯᱟᱱ ᱟᱹᱯᱤᱱᱟᱜ ᱡᱟᱹᱛᱤ ᱫᱷᱚᱨᱚᱢ ᱪᱷᱟᱢᱰᱟ ᱞᱟᱛᱟᱨ ᱨᱮ ᱡᱤᱣᱤ ᱵᱚ ᱦᱩᱞᱟᱝᱹ ᱮᱜᱼᱟ᱾ ᱟᱨ ᱟᱵᱚᱣᱟᱜ ᱠᱟᱛᱷᱟ ᱡᱚᱠᱷᱚᱱ ᱵᱚ ᱨᱟᱠᱟᱵ ᱮᱜᱼᱟ ᱮᱱᱠᱷᱟᱱ ᱵᱷᱟᱨᱚᱛ ᱫᱤᱥᱚᱢ ᱥᱚᱢᱟᱡᱽ ᱥᱟᱶᱛᱟ ᱟᱨ ᱡᱟᱹᱛᱤ ᱫᱷᱚᱨᱚᱢ ᱨᱮᱱᱟᱜ ᱜᱚᱴᱟ ᱜᱩᱴᱤ ᱠᱟᱛᱷᱟ ᱫᱚ ᱵᱟᱰᱟᱭ ᱛᱮᱜᱮ ᱦᱩᱭ ᱟᱵᱚᱱᱟ᱾ ᱟᱨ ᱮᱱ ᱮᱱᱟᱝ ᱟᱵᱚᱣᱟᱜ ᱡᱟᱹᱛᱤ ᱫᱷᱚᱨᱚᱢ ᱨᱮᱱᱟᱜ ᱦᱤᱥᱟᱹᱵ ᱠᱤᱛᱟᱹᱵ ᱟᱨ ᱞᱮᱠᱷᱟ ᱡᱚᱠᱷᱟ ᱫᱚᱵᱚ ᱧᱟᱢ ᱫᱟᱲᱮᱭᱟᱜᱼᱟ᱾ ᱪᱮᱠᱟᱛᱮ ᱚᱱᱟ ᱥᱚᱢᱟᱡ ᱥᱟᱶᱛᱟ ᱵᱮᱵᱚᱥᱛᱟ ᱛᱟᱞᱟ ᱨᱮᱜᱮ ᱱᱤᱛ ᱫᱷᱟᱹᱨᱤᱡ ᱱᱤᱸᱡᱚᱨᱟᱜ ᱫᱟᱨᱦᱩᱴ ᱫᱷᱚᱨᱚᱢ ᱥᱟᱵᱟᱜ ᱤᱫᱤ ᱠᱟᱛᱮ ᱵᱚ ᱴᱤᱠᱟᱹᱣ ᱫᱚᱦᱚ ᱟᱠᱟᱱᱟ ᱟᱨ ᱫᱷᱤᱱᱟᱹᱝ ᱦᱚᱸ ᱵᱚ ᱫᱚᱦᱚᱭ ᱜᱮᱭᱟ᱾

᱒᱐᱑᱑ ᱥᱟᱞ ᱨᱮᱱᱟᱜ ᱦᱚᱲ ᱞᱮᱠᱷᱟ (Census) ᱦᱤᱥᱟᱹᱵᱽ ᱛᱮ ᱵᱷᱟᱨᱚᱛ ᱫᱤᱥᱚᱢ ᱨᱮ ᱡᱚᱛᱚ ᱠᱚᱛᱮ ᱢᱚᱴ ᱨᱮ 120.98 Crore ᱦᱚᱲ ᱠᱚ ᱞᱮᱠᱷᱟ ᱧᱟᱢ ᱟᱠᱟᱫ ᱵᱚᱱᱟ᱾ ᱟᱨ ᱫᱷᱚᱨᱚᱢ ᱯᱟᱹᱛᱭᱟᱹᱣ ᱟᱨ ᱢᱟᱱᱟᱣ ᱵᱟᱛᱟᱣ ᱦᱟᱛᱟᱣ ᱢᱚᱦᱚᱸᱰᱟ ᱠᱷᱚᱱ ᱞᱮᱠᱷᱟ ᱠᱟᱛᱮ ᱫᱚ ᱞᱟᱛᱟᱨ ᱨᱮ ᱩᱫᱩᱜ ᱮᱱ ᱞᱮᱠᱟ ᱠᱚ ᱧᱟᱢ ᱟᱠᱟᱱᱟ᱾

• Hindu – 96.63 crore (79.9% of total population.)
• Muslim – 17.72 crore (14.2%)
• Christian – 2.72 crore (2.3%)
• Sikh – 2.08 crore (1.7%)
• Budhist – 0.84 crore (0.7%)
• Jain – 0.45 crore (0.4%)
• Other Religion & Persuation – 0.75 crore (0.7%)
• Religion not stated – 0.29 crore (0.29%)

ᱟᱨ ᱒᱐᱐᱑ ᱥᱟᱞ ᱨᱮᱱᱟᱜ ᱦᱚᱲ ᱞᱮᱠᱷᱟ (Census) ᱦᱤᱥᱟᱹᱵ ᱛᱮᱫᱚ ᱢᱚᱴ ᱑᱐᱒᱗᱐᱑᱕᱒᱔᱗ ᱦᱚᱲ ᱫᱤᱥᱚᱢ ᱨᱮ ᱵᱚ ᱛᱟᱦᱮᱸᱭᱟ᱾ ᱚᱱᱟ ᱞᱮᱠᱷᱟ ᱨᱮᱭᱟᱜ ᱘% ᱫᱚ ᱟᱫᱤᱵᱟᱥᱤ ᱦᱚᱲ ᱚᱨᱛᱷᱟᱛ ᱘᱒᱑᱖᱑᱒᱑᱙ ᱦᱚᱲ ᱟᱹᱫᱤᱵᱟᱹᱥᱤ ᱦᱚᱲ ᱵᱚ ᱛᱟᱦᱮᱸᱭᱟ᱾ ᱚᱱᱠᱟᱛᱮ ᱒᱐᱑᱑ ᱨᱮᱭᱟᱜ ᱪᱮᱱᱥᱩᱥ ᱧᱮᱞ ᱞᱮᱠᱷᱟᱱ ᱵᱷᱟᱨᱚᱛ ᱫᱤᱥᱚᱢ ᱨᱮ ᱑᱐ ᱪᱨᱚᱨᱮ ᱜᱟᱱ ᱟᱹᱫᱤᱵᱟᱹᱥᱤ ᱦᱚᱲ ᱢᱮᱱᱟᱜ ᱵᱚᱱᱟ᱾ ᱚᱱᱟ ᱵᱷᱤᱛᱨᱤ ᱠᱷᱚᱱ ᱘ᱹ᱘᱕ ᱪᱨᱚᱨᱮ ᱫᱚ ᱟᱠᱚᱣᱟᱜ ᱱᱤᱸᱡᱚᱨ ᱡᱟᱹᱛᱤ ᱫᱷᱚᱨᱚᱢ ᱵᱟᱹᱜᱤ ᱠᱟᱛᱮ ᱮᱴᱟᱜ ᱫᱷᱚᱨᱚᱢ ᱠᱚ ᱦᱟᱛᱟᱣ ᱟᱠᱟᱜᱼᱟ᱾ ᱵᱟᱹᱠᱤ ᱑ᱹ᱑᱕ crore ᱫᱚ ᱟᱠᱚᱣᱟᱜ ᱢᱩᱬ ᱡᱟᱹᱛᱤ ᱫᱷᱚᱨᱚᱢ ᱯᱟᱹᱛᱭᱟᱹᱣ ᱯᱟᱸᱡᱟ ᱟᱠᱟᱫ ᱟᱹᱫᱤᱵᱟᱹᱥᱤ ᱠᱟᱱᱟ ᱠᱚ᱾ ᱱᱚᱶᱟ ᱠᱟᱴᱨᱟ ᱠᱩᱴᱨᱟ ᱠᱟᱛᱷᱟ ᱠᱚᱫᱚ Census report ᱨᱮ ᱧᱟᱢᱚᱜ ᱨᱮᱱᱟᱜ ᱠᱟᱛᱷᱟ ᱠᱟᱱᱟ᱾ ᱢᱮᱱᱠᱷᱟᱱ ᱯᱟᱸᱡᱟᱨ ᱡᱟᱝ ᱞᱮᱠᱟ ᱜᱚᱴᱟ ᱜᱚᱴᱟ ᱦᱚᱲ ᱞᱮᱠᱷᱟ ᱩᱱᱩᱫᱩᱜ ᱨᱮᱫᱚ ᱱᱚᱶᱟ ᱠᱚᱫᱚ ᱵᱟᱝ ᱯᱩᱥᱴᱟᱹᱣ ᱟᱠᱟᱱᱟ᱾ ᱛᱚᱵᱮ ᱨᱮᱦᱚᱸ ᱱᱤᱱᱟᱹᱜ ᱫᱚ ᱯᱩᱥᱴᱟᱹᱣᱜ ᱠᱟᱱᱟ ᱡᱮ ᱡᱟᱦᱟᱸᱭ ᱠᱚ ᱦᱤᱸᱫᱩ ᱢᱩᱥᱚᱞᱢᱟᱱ, ᱥᱤᱠᱷ, ᱤᱥᱟᱹᱭ,ᱵᱩᱫᱷᱤᱥᱴ ᱟᱨ ᱡᱚᱭᱱᱚ ᱵᱟᱝ ᱠᱟᱱᱟ ᱠᱚ ᱩᱱᱠᱩ ᱫᱚ ᱮᱴᱟᱜ ᱟᱨ ᱟᱠᱚᱣᱟᱜ ᱱᱤᱸᱡᱚᱨ ᱡᱟᱹᱛᱤ ᱫᱷᱚᱨᱚᱢ ᱯᱟᱸᱡᱟ ᱦᱚᱲ ᱠᱟᱱᱟ ᱠᱚ᱾ ᱩᱱᱠᱩ ᱠᱚᱫᱚ ᱟᱵᱚ ᱛᱷᱚᱠ ᱨᱤᱱ ᱦᱚᱲ ᱠᱟᱱᱟ ᱠᱚ᱾ ᱪᱮᱠᱟᱛᱮ ᱟᱵᱚ ᱫᱚ ᱪᱮᱛᱟᱱ ᱨᱮ ᱚᱞ ᱟᱠᱟᱱ ᱛᱩᱨᱩᱭ ᱜᱚᱴᱟᱝ ᱫᱷᱚᱨᱚᱢ ᱠᱷᱚᱱ ᱚᱠᱟ ᱦᱚᱸ ᱵᱟᱝ ᱵᱚ ᱯᱟᱹᱛᱭᱟᱹᱣᱟᱜᱼᱟ ᱪᱮ ᱵᱟᱝ ᱵᱚ ᱯᱟᱸᱡᱟᱭᱟ᱾

ᱵᱷᱟᱨᱚᱛ ᱫᱤᱥᱚᱢ ᱫᱚ ᱢᱤᱫᱴᱟᱹᱝ ᱫᱷᱚᱨᱚᱢ ᱟᱲᱟᱜ (Secular) ᱫᱤᱥᱚᱢ ᱠᱟᱱᱟ᱾ ᱚᱠᱚᱭ ᱚᱠᱟ ᱫᱷᱚᱨᱚᱢᱮ ᱟᱯᱱᱟᱨᱟ ᱚᱱᱟ ᱨᱮᱭᱟᱜ ᱟᱹᱯᱱᱟᱹᱛ ᱦᱚᱠ ᱟᱹᱭᱫᱟᱹᱨᱤ ᱱᱚᱸᱰᱮᱱ ᱦᱚᱲ ᱠᱚᱣᱟᱜ ᱢᱮᱱᱟᱜᱼᱟ ᱟᱨ ᱚᱱᱟ ᱦᱚᱸ ᱱᱚᱸᱰᱮᱱᱟᱜ ᱥᱚᱢᱵᱤᱫᱷᱟᱱ (Constitution of India) ᱨᱮᱱᱟᱜ ᱫᱷᱟᱨᱟ ᱒᱕ (Article 25 – Fundamental Rights) ᱨᱮ ᱯᱩᱥᱴᱟᱹᱣ ᱚᱩᱥᱴᱟᱹᱣ ᱚᱞ ᱛᱚᱞ ᱟᱠᱟᱱᱟ᱾ ᱱᱚᱶᱟ ᱫᱤᱥᱚᱢ ᱦᱚᱲᱟᱜ ᱫᱷᱚᱨᱚᱢ ᱟᱹᱯᱱᱟᱹᱛ ᱦᱚᱠ ᱟᱹᱭᱫᱟᱹᱨᱤ fundamental ᱢᱮᱛᱟᱜ ᱨᱮᱭᱟᱜ ᱚᱨᱛᱷᱚ ᱫᱚ ᱦᱩᱭᱩᱜ ᱠᱟᱱᱟ, ᱯᱷᱩᱨᱜᱟᱞ ᱫᱤᱥᱚᱢ ᱨᱤᱱᱤᱡ ᱯᱚᱨᱡᱟ ᱦᱤᱥᱟᱹᱵ ᱛᱮ ᱱᱟᱯᱟᱭ ᱟᱨ ᱱᱤᱨᱟᱹᱭ ᱨᱮ ᱛᱟᱦᱮᱸᱱ ᱵᱟᱠᱷᱨᱟ ᱱᱚᱶᱟ ᱫᱚ ᱱᱤᱦᱟᱹᱛ ᱜᱮ ᱞᱟᱹᱠᱛᱤᱭᱟ᱾ ᱡᱮᱢᱚᱱ ᱡᱚᱢ ᱵᱟᱝ ᱠᱷᱟᱱ ᱡᱤᱣᱤ ᱵᱟᱝ ᱛᱟᱦᱮᱸᱱ ᱞᱮᱠᱟᱱᱟᱜ ᱠᱟᱱᱟ᱾ ᱢᱩᱬ ᱟᱨ ᱢᱟᱨᱟᱝ ᱠᱟᱛᱷᱟ ᱫᱚ ᱦᱩᱭᱩᱜ ᱠᱟᱱᱟ, ᱫᱤᱥᱚᱢ ᱨᱤᱱᱤᱡ ᱨᱟᱡ ᱥᱚᱨᱠᱟᱨ ᱫᱤᱥᱚᱢ ᱦᱚᱲᱟᱜ ᱱᱚᱶᱟ ᱦᱚᱠ ᱟᱹᱭᱫᱟᱹᱨᱤ ᱢᱟᱱᱚᱛ (Recognition) ᱮ ᱮᱢ ᱟᱠᱟᱜᱼᱟ᱾ ᱟᱨ ᱛᱤᱱ ᱨᱮ ᱦᱚᱲᱟᱜ ᱱᱚᱶᱟ ᱦᱚᱠ ᱟᱹᱭᱫᱟᱹᱨᱤ ᱥᱚᱨᱠᱟᱨ ᱵᱟᱦᱟᱫᱩᱨ ᱮ ᱪᱟᱠᱨᱟᱣ ᱪᱮ ᱪᱷᱟᱰᱟᱣ ᱤᱫᱤᱭᱟ, ᱩᱱ ᱨᱮᱫᱚ ᱫᱤᱥᱚᱢ ᱨᱤᱱᱤᱡ ᱯᱚᱨᱡᱟ ᱦᱤᱥᱟᱹᱵᱽ ᱛᱮ ᱫᱤᱥᱚᱢ ᱨᱮᱭᱟᱜ ᱵᱤᱪᱟᱹᱨ ᱢᱟᱦᱟᱞ ᱨᱮᱭᱟᱜ ᱟᱥᱨᱟᱭ ᱦᱟᱛᱟᱣ ᱫᱟᱲᱮᱭᱟᱜᱼᱟ᱾ ᱚᱱᱟᱛᱮ ᱱᱚᱱᱠᱟᱱ ᱦᱚᱠ ᱟᱹᱭᱫᱟᱹᱨᱤ ᱠᱷᱚᱱ ᱫᱚ ᱩᱱᱟᱹᱜ ᱟᱞᱜᱟ ᱛᱮ ᱨᱟᱡ ᱥᱚᱨᱠᱟᱨ ᱚᱠᱚᱭ ᱦᱚᱸ ᱵᱟᱭ ᱵᱮᱫᱚᱠᱷᱚᱞ ᱫᱟᱲᱮᱭᱟᱠᱚᱣᱟ᱾ ᱱᱚᱜ –ᱚᱭ ᱱᱚᱱᱠᱟᱱ ᱫᱤᱥᱚᱢ ᱟᱨ ᱟᱹᱱᱼᱟᱹᱨᱤ ᱵᱮᱵᱚᱥᱛᱟ ᱛᱟᱞᱟ ᱨᱮ ᱟᱵᱚ ᱟᱹᱫᱤᱢ ᱡᱟᱹᱛᱤ ᱫᱷᱚᱨᱚᱢ ᱟᱨ ᱞᱟᱠᱪᱟᱨ ᱡᱚᱜᱟᱣ ᱡᱚᱛᱚᱱ ᱟᱨ ᱨᱚᱯᱷᱟ ᱫᱚᱦᱚᱭ ᱨᱮᱭᱟᱜ ᱵᱚ ᱨᱤᱠᱟᱹ ᱭᱮᱜᱼᱟ᱾

ᱮᱱᱟᱝ ᱮᱛᱚᱦᱚᱵ ᱨᱮ ᱢᱮᱱᱮᱱ ᱞᱮᱠᱟ ᱟᱵᱚ ᱟᱹᱫᱤᱢ ᱡᱟᱹᱛᱤ ᱦᱚᱲ ᱦᱚᱯᱚᱱᱟᱜ ᱡᱟᱹᱛᱤ ᱫᱷᱚᱨᱚᱢ ᱠᱚᱨᱚᱢ ᱟᱨ ᱫᱷᱚᱨᱚᱢ ᱯᱟᱹᱛᱭᱟᱹᱣ ᱫᱚ ᱟᱨ ᱠᱚᱨᱮ ᱠᱷᱚᱱ ᱫᱚ ᱡᱩᱫᱟᱹ ᱜᱮᱭᱟ᱾ ᱚᱱᱟ ᱛᱮᱜᱮ ᱦᱚᱲ ᱞᱮᱠᱷᱟ ᱜᱷᱩᱸᱴ ᱨᱮᱦᱚᱸ ᱫᱷᱚᱨᱚᱢ ᱯᱟᱹᱛᱭᱟᱹᱣ ᱥᱮᱦᱮᱫ ᱠᱷᱚᱱ ᱦᱚᱸ ᱵᱷᱤᱱᱟᱹ ᱛᱷᱚᱠ ᱨᱮᱠᱚ ᱫᱚᱦᱚ ᱟᱠᱟᱫ ᱵᱚᱱᱟ᱾ ᱱᱚᱸᱰᱮ ᱠᱟᱛᱷᱟ ᱨᱟᱠᱟᱵ ᱠᱟᱱᱟ, ᱪᱤᱞᱤ ᱟᱨ ᱪᱮᱫ ᱫᱷᱚᱨᱚᱢ ᱢᱮᱱ ᱠᱟᱛᱮ ᱵᱚ ᱚᱞ ᱮᱴᱟᱜ ᱟᱠᱟᱱᱟ? ᱡᱮᱢᱚᱱ ᱡᱟᱹᱛᱤ ᱢᱮᱱ ᱞᱮᱠᱷᱟᱱ ᱥᱟᱱᱛᱟᱲ, ᱞᱟᱲᱠᱟ, ᱢᱟᱦᱞᱮ,ᱢᱩᱸᱰᱟᱹ, ᱵᱤᱨᱦᱚᱲ, ᱠᱩᱸᱲᱵᱤ, ᱩᱨᱟᱶ ᱮᱢᱟᱱ ᱵᱚ ᱞᱟᱹᱭᱩᱜ ᱠᱟᱱᱟ, ᱚᱱᱠᱟ ᱜᱮ ᱫᱷᱚᱨᱚᱢ ᱧᱩᱛᱩᱢ ᱛᱟᱵᱚ ᱫᱚ ᱪᱮᱫ? ᱩᱥᱟᱹᱨᱟ ᱥᱟᱹᱦᱤᱸᱡ ᱫᱚ ᱯᱟᱞᱮᱛ, ᱱᱚᱶᱟ ᱥᱚᱣᱟᱞ ᱨᱮᱭᱟᱜ ᱡᱚᱵᱟᱵ ᱫᱚ ᱟᱹᱰᱤ ᱦᱚᱲ ᱟᱹᱰᱤ ᱞᱮᱠᱟ ᱵᱚ ᱮᱢᱟ᱾ ᱛᱚᱵᱮ ᱰᱷᱮᱨ ᱫᱚ “ᱥᱟᱨᱟᱱ” ᱜᱮᱵᱚ ᱢᱮᱱᱮᱜᱼᱟ ᱟᱨ ᱚᱱᱟ ᱢᱮᱱ ᱦᱚᱸ ᱡᱩᱛ ᱟᱨ ᱡᱚᱛᱷᱟᱛ ᱜᱮᱭᱟ᱾ ᱱᱚᱶᱟ ᱤᱫᱤ ᱠᱟᱛᱮ ᱵᱟᱰᱟᱭ ᱡᱚᱝ ᱜᱷᱚᱴᱚᱱ ᱟᱨ ᱠᱟᱛᱷᱟ ᱠᱚ ᱢᱮᱱᱟᱜᱼᱟ᱾

᱑᱙᱔᱙ ᱨᱮᱱᱟᱜ ᱠᱟᱛᱷᱟ᱾ ᱮᱱᱮᱜᱮ ᱵᱷᱟᱨᱚᱛ ᱫᱤᱥᱚᱢ ᱯᱷᱩᱨᱜᱟᱞᱟᱠᱟᱱ᱾ Chritian Missionary Dhankulia, Ranchi ᱯᱟᱦᱴᱟ ᱠᱷᱚᱱ ᱚᱞᱪᱤᱠᱤ ᱡᱟᱱᱟᱢ ᱫᱟᱛᱟ ᱯᱚᱸᱰᱮᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ D.Lit. ᱞᱮᱠᱟᱱ ᱠᱩᱞᱴᱤᱠᱨᱤ ᱦᱚᱨᱚᱜ ᱠᱟᱛᱮ ᱠᱚ ᱢᱟᱹᱱ ᱠᱮᱫᱮᱭᱟ᱾ ᱩᱱ ᱚᱠᱛᱮ ᱜᱮ ᱚᱱᱟ ᱢᱟᱦᱟ ᱢᱤᱫᱩᱱ ᱨᱮ ᱟᱨ ᱟᱹᱰᱤ ᱦᱚᱲ ᱥᱟᱢᱟᱝ ᱨᱮ ᱫᱤᱥᱚᱢ ᱢᱟᱨᱟᱝ ᱜᱚᱢᱠᱮ ᱡᱚᱭᱯᱟᱞ ᱥᱤᱧ ᱯᱚᱸᱰᱮᱛ ᱨᱟᱹᱜᱷᱩ ᱢᱩᱨᱢᱭ ᱠᱩᱞᱤ ᱠᱮᱫᱮᱭᱟ “ᱨᱟᱡ ᱟᱹᱨᱤ ᱞᱮᱠᱟᱛᱮ ᱡᱩᱢᱤᱫᱚᱜ ᱞᱟᱹᱜᱤᱫ ᱢᱟ “ᱡᱷᱨᱠᱟᱸᱰ ᱞᱟᱲᱟᱣᱱᱟ”ᱟᱨ “ᱡᱷᱟᱨᱠᱟᱱᱰ ᱯᱟᱨᱴᱤ” (Jharkand Movement and Jharkand Party) ᱟᱨ “ᱟᱹᱫᱤᱵᱟᱹᱥᱤ ᱢᱚᱦᱟᱥᱚᱵᱷᱟ” ᱧᱩᱛᱩᱢ ᱜᱟᱶᱛᱟ ᱵᱚ ᱛᱤᱸᱜᱩ ᱟᱠᱟᱜᱼᱟ᱾ ᱚᱱᱠᱟ ᱜᱮ ᱫᱷᱚᱨᱚᱢ ᱛᱮ ᱡᱩᱢᱤᱫᱚᱜ ᱵᱟᱠᱷᱨᱟ ᱟᱨ ᱫᱟᱨᱟᱭ ᱠᱟᱱ ᱑᱙᱕᱑ Census ᱨᱮ ᱫᱷᱚᱨᱚᱢ ᱫᱚ ᱪᱮᱫ ᱵᱚ ᱚᱞᱟ?” ᱜᱩᱨᱩ ᱜᱚᱢᱠᱮ ᱚᱱᱟ ᱨᱮᱭᱟᱜ ᱡᱚᱵᱟᱵ ᱞᱚᱜᱚᱱ ᱛᱮ ᱵᱟᱭ ᱮᱢ ᱫᱟᱲᱮᱭᱟᱫᱼᱟ᱾ ᱢᱤᱫ ᱜᱷᱟᱹᱲᱤᱠ ᱛᱟᱭᱚᱢᱮ ᱢᱮᱱ ᱠᱮᱜᱼᱟ – “ ᱥᱟᱨᱱᱟ” ᱵᱚ ᱚᱞᱟ᱾ ᱚᱱᱟ ᱟᱸᱡᱚᱢ ᱠᱟᱛᱮ ᱚᱸᱰᱮ ᱡᱟᱦᱟᱸ ᱜᱮᱠᱚ ᱛᱟᱦᱮᱸ ᱠᱟᱱ ᱡᱚᱛᱚ ᱦᱚᱲ ᱛᱤ ᱛᱷᱟᱭᱚ ᱠᱟᱛᱮ ᱚᱱᱟᱠᱚ ᱥᱟᱹᱨᱤ ᱭᱟᱫᱼᱟ᱾

ᱚᱱᱟ ᱛᱟᱭᱚᱢ ᱥᱚᱸᱜᱮ ᱫᱷᱟᱨᱟ ᱜᱮ “ᱥᱟᱨᱱᱟ ᱫᱷᱚᱨᱚᱢ ᱥᱮᱢᱞᱮᱫ” ᱧᱩᱛᱩᱢ ᱛᱮ ᱜᱟᱶᱛᱟ ᱵᱮᱨᱮᱫ ᱮᱱᱟ ᱟᱨ ᱤᱱᱟ ᱥᱮᱨᱢᱟ ᱚᱨᱛᱷᱟᱛ ᱑᱙᱔᱙ ᱨᱮᱜᱮ ᱱᱤᱛᱟᱜ ᱡᱷᱟᱨᱠᱟᱸᱰ ᱯᱚᱱᱚᱛ ᱨᱮᱭᱟᱜ ᱨᱚᱴᱮᱫᱟᱜ ᱟᱹᱛᱩ ᱨᱮ ᱥᱟᱨᱱᱟ ᱫᱷᱚᱨᱚᱢ ᱥᱮᱢᱞᱮᱫ ᱨᱮᱭᱟᱜ ᱯᱩᱭᱞᱩ ᱥᱮᱱᱮᱞᱮᱫ ᱦᱩᱭ ᱞᱮᱱᱟ᱾ ᱚᱱᱟ ᱨᱮ ᱢᱤᱫᱴᱟᱝ ᱠᱟᱛᱷᱟ ᱜᱟᱞᱢᱟᱨᱟᱣ ᱜᱚᱴᱟᱭᱮᱱᱟ ᱡᱮ, “ᱫᱟᱨᱟᱭ ᱠᱟᱱ ᱑᱙᱕᱑ census ᱨᱮ ᱼ “ᱫᱷᱚᱨᱚᱢ ᱫᱚ ᱥᱟᱨᱱᱟ ᱵᱚ ᱚᱞᱟ᱾” ᱚᱱᱟ ᱞᱮᱠᱟ ᱛᱮ ᱟᱹᱛᱩ ᱟᱹᱛᱩ ᱫᱟᱬᱟ ᱠᱟᱛᱮ ᱦᱚᱲ ᱠᱚᱠᱚ ᱞᱟᱹᱭ ᱪᱮᱸᱜᱷᱟ ᱠᱮᱫ ᱠᱚᱣᱟ᱾ ᱟᱨ ᱧᱮᱞᱮᱱᱟ ᱫᱚ ᱑᱙᱕᱑ census ᱨᱮ ᱯᱮ ᱞᱟᱠᱷ (3 lakh) ᱠᱷᱚᱱ ᱵᱤᱥᱛᱤ ᱦᱚᱲ ᱫᱷᱚᱨᱚᱢ ᱫᱚ “ᱥᱟᱨᱱᱟ” ᱠᱚ ᱚᱞ ᱞᱮᱜᱼᱟ᱾ ᱱᱚᱶᱟ ᱫᱚ ᱤᱱᱟᱹ ᱦᱩᱰᱤᱧ ᱫᱷᱟᱨᱟ ᱤᱞᱟᱹᱠᱟᱨ ᱨᱮᱭᱟᱜ ᱠᱟᱛᱷᱟ ᱠᱟᱱᱟ ᱟᱨ ᱥᱟᱱᱛᱟᱲ ᱥᱩᱢᱩᱝ ᱟᱜ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ᱾ ᱥᱟᱱᱟᱢ ᱟᱹᱫᱤᱢ ᱡᱟᱹᱛᱤ ᱨᱤᱱ ᱦᱚᱲ ᱜᱮ ᱥᱟᱨᱱᱟ ᱠᱚ ᱞᱟᱹᱭ ᱞᱮᱱᱟ᱾

ᱢᱟᱨᱟᱝ ᱫᱷᱚᱨᱚᱢ ᱢᱤᱫᱩᱱ (Religious Congregation) ᱫᱚ ᱑᱙᱖᱒ ᱥᱟᱞ ᱨᱮ ᱡᱟᱢᱥᱮᱫᱽᱯᱩᱨ ᱨᱮ ᱦᱩᱭ ᱞᱮᱱᱟ᱾ ᱚᱱᱟ ᱦᱚᱸ ᱠᱚᱨᱚᱱᱰᱤ ᱨᱮᱱᱟᱜ Adivasi Bhawan ᱡᱟᱦᱟᱸ Jaypal Singh Centre of unity ᱦᱚᱸ ᱠᱚ ᱢᱮᱛᱟᱜᱼᱟ, ᱚᱸᱰᱮ ᱯᱮᱼᱢᱟᱦᱟᱨᱤ ᱫᱷᱚᱨᱚᱢ ᱢᱟᱦᱟ ᱢᱤᱫᱩᱱ ᱦᱩᱭ ᱞᱮᱱᱟ᱾ ᱚᱱᱟ ᱨᱮ ᱵᱮᱦᱟᱨ ᱵᱮᱸᱜᱚᱞ ᱩᱰᱤᱥᱟ ᱠᱷᱚᱱ ᱟᱹᱰᱤ ᱥᱟᱸᱜᱮ ᱫᱷᱚᱨᱚᱢᱤᱭᱟᱹ ᱥᱮᱴᱮᱨ ᱠᱚ ᱛᱟᱦᱮᱸᱭᱟ᱾ ᱚᱱᱟ ᱨᱮᱫᱚ ᱥᱟᱱᱛᱟᱲ ᱞᱟᱲᱠᱟ ᱢᱟᱦᱞᱮ ᱢᱩᱸᱰᱟᱹ ᱦᱚᱸ ᱠᱚ ᱥᱮᱞᱮᱫᱼᱟ᱾ ᱞᱟᱲᱠᱟ ᱠᱚᱣᱟᱜ ᱫᱩᱯᱩᱜ ᱫᱷᱚᱨᱚᱢ ᱠᱷᱚᱱ ᱮᱦᱚᱵ ᱠᱟᱛᱮ, ᱥᱟᱹᱨᱤ ᱫᱷᱚᱨᱚᱢ, ᱟᱨ ᱥᱟᱨᱱᱟ ᱫᱷᱚᱨᱚᱢ ᱨᱤᱱ ᱥᱚᱦᱮᱫ ᱠᱚ ᱥᱮᱞᱮᱫ ᱞᱮᱱᱟ᱾ ᱥᱟᱹᱨᱤ ᱫᱷᱚᱨᱚᱢ ᱵᱮᱸᱜᱚᱞ ᱯᱟᱦᱴᱟ ᱠᱷᱚᱱ ᱫᱚ ᱚᱱᱟ ᱫᱷᱚᱨᱚᱢ ᱨᱤᱱᱤᱡ ᱢᱩᱠᱷᱤᱭᱟᱹ ᱢᱟᱱ ᱢᱚᱸᱜᱚᱞ ᱥᱚᱨᱮᱱ ᱥᱟᱶᱛᱮ ᱢᱟᱱ ᱨᱚᱵᱤᱞᱟᱞ ᱴᱩᱰᱩ ᱦᱚᱸᱭ ᱦᱮᱡᱼᱟ᱾ ᱥᱟᱨᱱᱟ ᱫᱷᱚᱨᱚᱢ ᱨᱤᱱ ᱢᱟᱬᱛᱮ ᱢᱟᱱ ᱞᱟᱞ ᱢᱩᱨᱢᱩ, ᱥᱚᱥᱤ ᱢᱩᱨᱢᱩ, ᱥᱟᱶᱛᱮ ᱜᱩᱞᱤᱟᱹ ᱴᱩᱰᱩ,ᱨᱟᱢ ᱪᱚᱸᱫᱨᱚ ᱴᱩᱰᱩ,ᱩᱫᱚᱭ ᱱᱟᱛᱷ ᱢᱟᱡᱷᱤ, ᱢᱚᱸᱜᱚᱞ ᱢᱟᱡᱷᱤ ᱮᱢᱟᱱ ᱠᱚ ᱛᱟᱦᱮᱸᱭᱟ᱾ ᱞᱟᱲᱠᱟ ᱠᱚᱣᱟᱜ ᱫᱩᱯᱩᱜ ᱫᱷᱚᱨᱚᱢ ᱨᱤᱱ ᱰᱮᱞᱤᱜᱮᱴᱥ ᱫᱚ ᱟᱹᱰᱤ ᱥᱟᱸᱜᱮ ᱠᱚ ᱦᱮᱡᱼᱟ᱾ ᱟᱨ ᱟᱸᱡᱚᱢ ᱥᱟᱸᱜᱮ ᱠᱚᱦᱚᱸ ᱰᱮᱦᱮᱨ ᱜᱮ ᱠᱚ ᱡᱟᱣᱨᱟ ᱞᱮᱱᱟ᱾ ᱚᱱᱟ ᱢᱤᱫᱩᱱ ᱨᱮ ᱚᱱᱠᱟ ᱪᱮᱫ ᱦᱚᱸ ᱵᱟᱭ ᱴᱷᱟᱹᱣᱠᱟᱹ ᱩᱛᱟᱹᱨ ᱞᱮᱱ ᱨᱮᱦᱚᱸ ᱟᱹᱰᱤ ᱜᱚᱴᱟᱝ ᱱᱟᱶᱟ ᱱᱟᱶᱟ ᱠᱟᱛᱷᱟ ᱵᱟᱰᱟᱭ ᱧᱟᱢ ᱮᱱᱟ᱾ ᱡᱮᱢᱚᱱ ᱥᱟᱹᱨᱤ ᱫᱷᱚᱨᱚᱢ ᱨᱤᱱᱤᱡ ᱢᱩᱠᱷᱭᱟᱹ ᱢᱚᱸᱜᱚᱞ ᱥᱚᱨᱮᱱ ᱮ ᱢᱮᱱ ᱞᱮᱜᱼᱟ, “ᱟᱵᱚᱣᱟᱜ ᱫᱷᱚᱨᱚᱢ ᱫᱚ “ᱥᱟᱹᱨᱤ ᱥᱟᱨᱱᱟ ᱫᱩᱯᱩᱜ ᱫᱷᱚᱨᱚᱢ”ᱵᱚ ᱧᱩᱛᱩᱢ ᱟᱜᱼᱟ᱾”ᱧᱩᱛᱩᱢ ᱟᱹᱰᱤ ᱡᱤᱞᱤᱧᱚᱜ ᱠᱟᱱ ᱧᱮᱞ ᱛᱮ ᱚᱱᱟ ᱵᱟᱝ ᱠᱚ ᱦᱟᱛᱟᱣ ᱞᱮᱜᱼᱟ᱾ ᱟᱨ ᱢᱤᱫ ᱦᱚᱲ ᱚᱱᱠᱟ ᱜᱮ ᱢᱮᱱ ᱠᱮᱜᱼᱟ ᱡᱮ “ ᱫᱷᱚᱨᱚᱢ ᱫᱚ ᱧᱩᱱᱩᱢ ᱟᱹᱲᱟᱹ (Noun) ᱛᱮᱜᱮ ᱧᱩᱛᱩᱢᱚᱜᱼᱟ᱾” ᱱᱚᱶᱟ ᱯᱮ ᱢᱟᱦᱟᱸ ᱢᱤᱫᱩᱱ ᱨᱮ ᱟᱹᱰᱤ ᱜᱟᱹᱦᱤᱨ ᱢᱟᱹᱦᱤᱨ ᱠᱟᱛᱷᱟ ᱠᱚ ᱵᱟᱰᱟᱭ ᱧᱟᱢ ᱮᱱᱟ᱾ ᱢᱩᱪᱟᱹᱫ ᱦᱤᱞᱚᱜ ᱫᱚ ᱧᱮᱞ ᱮᱱᱟ ᱞᱟᱲᱠᱟ ᱟᱨ ᱢᱩᱸᱰᱟᱹ ᱵᱚᱭᱦᱟ ᱠᱚᱫᱚ “ᱥᱟᱨᱱᱟ” ᱜᱮ ᱡᱩᱛ ᱟᱨ ᱡᱚᱛᱷᱟᱛ ᱢᱮᱱᱛᱮ ᱠᱚ ᱢᱮᱱ ᱠᱮᱜᱼᱟ᱾ ᱚᱱᱠᱟᱛᱮ ᱚᱸᱰᱮ ᱦᱚᱸ ᱫᱷᱚᱨᱚᱢ ᱫᱚ ᱥᱟᱨᱱᱟ ᱜᱮ ᱧᱩᱛᱩᱢᱚᱜ ᱢᱟ ᱢᱮᱱᱛᱮ ᱰᱷᱮᱨ ᱠᱚ ᱢᱮᱱ ᱠᱮᱜᱼᱟ ᱾

ᱱᱚᱶᱟ ᱠᱟᱛᱷᱟ ᱠᱚ ᱱᱚᱸᱰᱮ ᱞᱟᱹᱭ ᱥᱚᱫᱚᱨ ᱨᱮᱱᱟᱜ ᱚᱡᱮ ᱫᱚ ᱦᱩᱭᱩᱜ ᱠᱟᱱᱟ ᱫᱷᱚᱨᱚᱢ ᱧᱩᱛᱩᱢ “ᱥᱟᱨᱱᱟ” ᱫᱚ ᱟᱵᱚ ᱥᱟᱱᱛᱟᱲ ᱞᱟᱲᱠᱟ, ᱢᱟᱦᱞᱮ ᱢᱩᱸᱰᱟᱹ ᱵᱤᱨᱦᱚᱲ, ᱩᱨᱟᱶ ᱮᱢᱟᱱ ᱠᱷᱮᱨᱣᱟᱲ ᱡᱟᱹᱛᱤ ᱦᱚᱲ ᱫᱚᱵᱚ ᱦᱟᱛᱟᱣ ᱵᱟᱛᱟᱣ ᱥᱟᱹᱨᱤ ᱩᱛᱟᱹᱨ ᱟᱠᱟᱫᱼᱟ᱾ ᱛᱚᱵᱮ ᱛᱤᱱ ᱩᱰᱤᱡ ᱟᱵᱚ ᱥᱟᱱᱛᱟᱲ ᱦᱚᱲ ᱜᱮ ᱦᱟᱱᱟ ᱱᱟᱶᱷᱟ ᱧᱩᱛᱩᱢ ᱤᱫᱤ ᱠᱟᱛᱮ ᱵᱚ ᱨᱟᱯᱟᱪᱟᱜ ᱠᱟᱱᱟ᱾ ᱚᱱᱟ ᱠᱷᱟᱹᱛᱤᱨ ᱛᱮ ᱥᱚᱨᱠᱟᱨ ᱦᱚᱸ ᱟᱵᱚᱣᱟᱜ ᱫᱷᱚᱨᱚᱢ ᱢᱟᱱᱚᱛ ᱮᱢ ᱨᱮ ᱦᱮᱸᱪ ᱯᱮᱸᱪᱚᱜ ᱠᱟᱱᱟᱭ᱾ ᱟᱨ ᱵᱟᱰᱟᱭᱟ ᱪᱮ ᱵᱚ ᱵᱟᱝᱼᱟ, ᱢᱤᱫᱴᱟᱝ ᱡᱟᱹᱛᱤ ᱦᱚᱲ ᱥᱩᱢᱩᱝ ᱞᱟᱹᱜᱤᱫ ᱫᱷᱚᱨᱚᱢ ᱡᱟᱦᱟᱸ ᱧᱩᱛᱩᱢ ᱛᱮᱜᱮ ᱛᱤᱥ ᱦᱚᱸ ᱥᱚᱨᱠᱟᱨ ᱵᱟᱭ ᱦᱟᱛᱟᱣᱼᱟ᱾ ᱱᱚᱶᱟ ᱠᱷᱟᱴᱚ ᱟᱨ ᱠᱷᱚᱴ ᱟᱵᱚ ᱡᱚᱛᱚ ᱦᱚᱲ ᱵᱟᱲᱮ ᱵᱚ ᱵᱟᱰᱟᱭ ᱡᱚᱝ ᱢᱟ᱾ ᱟᱨ ᱟᱵᱚ ᱛᱤᱱᱟᱹᱜ ᱦᱚᱲ ᱠᱷᱟᱹᱛᱤᱨ,ᱟᱨ ᱮᱴᱟᱜ ᱟᱹᱫᱤᱢ ᱡᱟᱹᱛᱤ ᱦᱚᱲ ᱠᱚᱣᱟᱜ ᱫᱷᱚᱨᱚᱢ ᱢᱟᱱᱚᱛ ᱧᱟᱢ ᱨᱮ ᱡᱟᱸᱜᱮ ᱫᱟᱨᱟᱢᱚᱜ ᱫᱚ ᱵᱟᱭ ᱵᱩᱜᱤᱭᱟ᱾ ᱱᱚᱶᱟ ᱫᱚ ᱫᱷᱚᱨᱚᱢ ᱠᱟᱹᱢᱤ ᱫᱚ ᱵᱟᱝ ᱠᱟᱱᱟ᱾ ᱥᱟᱸᱜᱮ ᱦᱚᱲᱟᱜ ᱠᱟᱛᱷᱟ ᱫᱚ ᱜᱚᱰᱟᱣᱜ ᱜᱮᱭᱟ᱾ ᱟᱨ ᱞᱮᱠᱷᱟ ᱥᱤᱫ ᱦᱚᱲᱟᱜ ᱠᱟᱛᱷᱟ ᱛᱟᱦᱮᱸᱱ ᱨᱮᱦᱚᱸ ᱥᱟᱸᱜᱮ ᱦᱚᱲ ᱡᱟᱦᱟᱸ ᱠᱚ ᱢᱮᱱᱟ ᱚᱱᱟ ᱫᱚ ᱢᱟᱱᱟᱣ ᱵᱟᱛᱟᱣ ᱜᱮ ᱞᱮᱠ ᱠᱟᱱᱟ᱾ ᱚᱱᱟ ᱨᱮᱫᱚ ᱚᱠᱚᱭ ᱦᱚᱸ ᱵᱟᱝ ᱵᱚ ᱦᱟᱹᱱ ᱪᱮ ᱦᱤᱱᱩᱜᱼᱟ᱾

ᱠᱟᱛᱷᱟ ᱫᱚ ᱛᱟᱸᱦᱮᱭᱮᱱᱟ, ᱥᱟᱨᱱᱟ ᱫᱷᱚᱨᱚᱢ ᱨᱮᱱᱟᱜ ᱟᱪᱟᱨ ᱵᱤᱪᱟᱹᱨ ᱵᱮᱵᱷᱟᱨ ᱵᱚᱝᱜᱟ ᱵᱩᱨᱩ ᱟᱨ ᱮᱢᱟᱱ ᱛᱮᱭᱟᱜ ᱥᱮᱨᱣᱟ ᱠᱚ ᱤᱫᱤ ᱠᱟᱛᱮ ᱦᱚᱲ ᱠᱚ ᱵᱟᱰᱟᱭ ᱚᱪᱚ ᱟᱹᱰᱤ ᱛᱮᱫ ᱞᱟᱹᱠᱛᱤᱜ ᱠᱟᱱᱟ᱾ ᱟᱨ ᱚᱱᱟ ᱞᱟᱹᱜᱤᱫ ᱟᱹᱛᱩ ᱟᱹᱛᱩ ᱫᱟᱬᱟᱱ ᱫᱚᱨᱠᱟᱨᱚᱜ ᱠᱟᱱᱟ᱾ ᱟᱨ ᱦᱚᱲ ᱠᱚ ᱥᱩᱢᱡᱷᱟᱹᱣ ᱫᱚᱨᱠᱟᱨᱚᱜ ᱠᱟᱱᱟ ᱡᱮ ᱒᱐᱒᱑ ᱥᱟᱞ ᱨᱮᱱᱟᱜ census ᱨᱮᱫᱚ ᱫᱷᱚᱨᱚᱢ ᱫᱚ ᱡᱚᱛᱚ ᱜᱮ “ᱥᱟᱨᱱᱟ” ᱵᱚ ᱚᱞ ᱢᱟ᱾ ᱟᱨ ᱟᱵᱚᱣᱟᱜ ᱡᱟᱦᱟᱸ ᱜᱮ ᱥᱟᱶᱛᱟ ᱜᱟᱶᱛᱟ ᱢᱮᱱᱟᱜᱼᱟ ᱚᱱᱟ ᱨᱮᱭᱟᱜ ᱟᱸᱹᱜᱤᱵᱷᱟᱨ ᱵᱚ ᱦᱟᱛᱟᱣ ᱢᱟ᱾ ᱟᱨ ᱵᱷᱟᱨᱚᱛ ᱡᱟᱠᱟᱛ ᱢᱟᱹᱡᱷᱤ ᱯᱟᱨᱜᱟᱱᱟ ᱢᱟᱦᱟᱞᱟᱜ ᱦᱚᱸ ᱱᱚᱶᱟ ᱫᱷᱚᱨᱚᱢ ᱠᱟᱛᱷᱟ ᱯᱟᱥᱱᱟᱣ ᱵᱷᱟᱹᱨᱤᱭᱟᱹ ᱫᱚᱭ ᱦᱟᱛᱟᱣ ᱜᱮᱭᱟ᱾

ᱧᱮᱞ ᱟᱠᱟᱱᱟ ᱵᱷᱟᱨᱚᱛ ᱫᱤᱥᱚᱢ ᱦᱚᱲ ᱞᱮᱠᱷᱟ ᱨᱮ ᱟᱵᱚ ᱫᱚ ᱡᱚᱭᱱᱚ ᱫᱷᱚᱨᱚᱢ ᱦᱚᱲ ᱠᱷᱚᱱ ᱫᱚ ᱟᱹᱰᱤ ᱵᱚ ᱰᱷᱮᱨᱟ᱾ ᱩᱱᱠᱩᱣᱟᱜ ᱫᱷᱚᱨᱚᱢ ᱥᱚᱨᱠᱟᱨᱮ ᱦᱟᱛᱟᱣ ᱵᱟᱛᱟᱣ ᱟᱠᱟᱫ ᱛᱮ Census ᱨᱮ Code No. ᱮᱢ ᱟᱠᱟᱣᱟᱫ ᱠᱚᱣᱟ᱾ ᱟᱵᱚ ᱪᱮᱫᱟᱜ ᱵᱟᱭ ᱮᱢᱟ ᱵᱚᱱᱟ? ᱚᱞᱵᱚᱛᱮ ᱮᱢᱟ ᱵᱚᱱᱟ, ᱠᱷᱟᱹᱡᱩᱠ ᱟᱵᱚ ᱦᱚᱸ ᱩᱱᱠᱩ ᱞᱮᱠᱟ ᱢᱤᱫ ᱫᱷᱚᱨᱚᱢ ᱵᱚ ᱞᱟᱹᱭᱩᱜ ᱠᱷᱟᱱ᱾ ᱩᱱᱠᱩ ᱦᱚᱸ ᱛᱚ ᱠᱚ ᱵᱟᱨ ᱫᱚᱲᱟᱠᱟᱱᱟ – ᱫᱤᱜᱟᱢᱵᱚᱨᱚ ᱟᱨ ᱥᱣᱮᱛᱟᱢᱵᱚᱨ᱾ ᱚᱱᱠᱟ ᱜᱮ ᱟᱨᱦᱚᱸ ᱦᱤᱱᱚ ᱡᱟᱱ ᱟᱨ ᱢᱚᱦᱟᱡᱟᱱ᱾ ᱚᱱᱟ ᱛᱩᱞᱩᱡ ᱦᱚᱸ ᱫᱷᱚᱨᱚᱢ ᱢᱟᱱᱚᱛ ᱟᱨ ᱫᱷᱚᱨᱚᱢ ᱠᱚᱰ ᱵᱟᱠᱷᱨᱟ ᱠᱚ ᱢᱤᱫ ᱮᱱᱛᱮ ᱥᱚᱨᱠᱟᱨ ᱠᱚ ᱵᱟᱛᱟᱣ ᱚᱪᱚ ᱠᱮᱫᱮᱭᱟ᱾ ᱟᱵᱚᱣᱟᱜ ᱵᱚᱝᱜᱟ ᱵᱩᱨᱩ ᱫᱷᱚᱨᱚᱢ ᱠᱚᱨᱚᱢ ᱟᱨ ᱥᱮᱨᱣᱟ ᱨᱮ ᱡᱚᱛᱚ ᱢᱤᱫᱩᱜ ᱠᱟᱱᱟ᱾ ᱢᱮᱱᱠᱷᱟᱱ ᱥᱟᱨᱱᱟ ᱢᱮᱱᱚᱜ ᱞᱟᱹᱜᱤᱫ ᱪᱮᱫᱟᱜ ᱵᱚ ᱯᱟᱹᱪᱷᱞᱟᱹᱜ ᱠᱟᱱᱟ? ᱥᱟᱨᱱᱟ ᱫᱚ ᱥᱟᱸᱜᱮ ᱦᱚᱲᱟᱜ ᱦᱤᱥᱟᱹᱵ ᱛᱮ ᱵᱚ ᱢᱮᱱᱮᱜᱼᱟ ᱟᱨ ᱜᱚᱴᱟ ᱯᱟᱲᱟ ᱠᱷᱚᱱ ᱧᱮᱞ ᱞᱮᱠᱷᱟᱱ ᱦᱚᱸ ᱡᱩᱛ ᱟᱨ ᱡᱚᱛᱷᱟᱛ ᱜᱮᱭᱟ᱾

ᱚᱱᱟ ᱠᱟᱛᱮ ᱨᱮᱦᱚᱸ ᱥᱚᱨᱠᱟᱨ ᱵᱟᱭ ᱢᱟᱱᱟᱣᱜ ᱠᱷᱟᱱ World’s Indigenous People Rights ᱨᱮᱭᱟᱜ ᱜᱚᱲᱚ ᱵᱚ ᱦᱟᱛᱟᱣᱼᱟ᱾ ᱪᱮᱠᱟᱛᱮ ᱵᱷᱟᱨᱚᱛ ᱫᱤᱥᱚᱢ ᱦᱚᱸ International Charter for Worlds Indigenous People Rights ᱨᱤᱱᱤᱡ ᱥᱚᱦᱮᱫ ᱠᱟᱱᱟᱭ᱾ ᱚᱱᱟ ᱞᱟᱹᱜᱤᱫ ᱱᱮᱛᱟᱨᱟᱜ Information technology ᱵᱚ ᱞᱟᱜᱟᱣᱟ᱾ ᱚᱱ ᱠᱟᱛᱮ ᱜᱚᱴᱟ ᱯᱟᱲᱟ ᱠᱷᱚᱱ ᱥᱚᱨᱠᱟᱨ ᱪᱮᱛᱟᱱ ᱨᱮ ᱫᱟᱵᱟᱣ ᱦᱮᱡ ᱞᱮᱱᱠᱷᱟᱱ ᱢᱤᱫ ᱫᱤᱱ ᱦᱤᱞᱚᱜ ᱥᱚᱨᱠᱟᱨᱮ ᱵᱚᱲᱦᱮᱜᱼᱟ ᱟᱵᱚᱣᱟᱜ ᱫᱷᱚᱨᱚᱢ ᱦᱟᱛᱟᱣ ᱵᱟᱛᱟᱣ ᱞᱟᱹᱜᱤᱫ ᱾

Published on Souvenir, 8th International Santal Conference – 2018