ᱡᱚᱥ ᱚᱞ ᱪᱤᱠᱤ

ᱱᱮᱦᱟᱹᱞᱤ ᱜᱚᱴᱟ ᱯᱟᱲᱟ ᱜᱮ ᱡᱚᱥ ᱚᱞᱪᱤᱠᱤ ᱠᱟᱛᱷᱟ ᱡᱚᱛᱚ ᱦᱚᱲᱟᱜ ᱢᱚᱪᱟ ᱠᱷᱚᱱᱟᱜ ᱟᱸᱡᱚᱢᱚᱜ ᱠᱟᱱᱟ᱾ ᱛᱚᱵᱮ ᱱᱚᱶᱟ ᱡᱚᱥ ᱚᱞᱪᱤᱠᱤ ᱪᱮᱫ ᱠᱟᱱᱟ ᱟᱨ ᱪᱮᱫᱟᱜ ᱞᱚᱲᱟᱜ ᱠᱟᱱᱟ ᱱᱚᱶᱟ ᱠᱟᱛᱷᱟ ᱥᱟᱵ ᱨᱟᱠᱟᱵ ᱞᱟᱹᱜᱤᱫ ᱛᱮ ᱥᱟᱛᱟᱢ ᱨᱮᱭᱟᱜ ᱱᱚᱶᱟ ᱵᱟᱨ ᱟᱹᱲᱟᱹ ᱵᱤᱥᱲᱤ ᱠᱟᱛᱮ ᱧᱮᱞ ᱧᱚᱜ ᱦᱩᱭᱩᱜᱼᱟ᱾ ᱡᱚᱥ ᱫᱚ ᱪᱮᱫ ᱠᱟᱱᱟ? ᱞᱟᱦᱟ ᱛᱮ ᱱᱚᱶᱟ ᱵᱟᱨ ᱟᱹᱲᱟᱹ ᱨᱮᱭᱟᱜ ᱢᱮᱱᱮᱛ ᱪᱮᱫ ᱠᱟᱱᱟ᱾ ᱱᱚᱶᱟ ᱨᱮ ᱪᱮᱫ ᱟᱹᱭᱠᱟᱹᱣᱜ ᱠᱟᱱᱟ, ᱚᱱᱟ ᱛᱟᱭᱚᱢ ᱛᱮ ᱜᱚᱴᱟ ᱥᱟᱛᱟᱢ ᱤᱫᱤ ᱠᱟᱛᱮ ᱜᱟᱞᱢᱟᱨᱟᱣ ᱦᱩᱭᱩᱜᱼᱟ ᱪᱮ ᱞᱟᱹᱠᱛᱤ ᱪᱮᱫ ᱢᱮᱱᱟᱜᱼᱟ᱾ “ᱡᱚᱥ” ᱢᱮᱱ ᱞᱮᱠᱷᱟᱱ ᱡᱟᱦᱟᱸᱭ ᱥᱤᱠᱟᱹᱨᱤᱭᱟᱹ ᱜᱮ ᱟᱜᱼᱥᱟᱨ ᱛᱮ ᱛᱮᱨᱟᱝ ᱨᱮᱭᱟᱜ ᱟᱹᱭᱠᱟᱹᱣ ᱦᱤᱡᱩᱜ ᱠᱟᱱᱟ᱾ ᱩᱱᱤ ᱥᱤᱠᱟᱹᱨᱤᱭᱟᱹ ᱚᱠᱟ ᱞᱮᱠᱟᱛᱮ ᱡᱟᱦᱟᱱ ᱡᱟᱭ ᱡᱤᱱᱤᱥ ᱪᱮ ᱪᱮᱬᱮ-ᱪᱤᱯᱨᱩ ᱢᱤᱫ ᱢᱚᱱᱮ ᱛᱮ ᱧᱮᱞ ᱴᱷᱤᱠ ᱠᱟᱛᱮ ᱥᱟᱨ ᱟᱲᱟᱜᱟᱭ ᱡᱟᱦᱟᱸ ᱛᱮ, ᱚᱱᱟ ᱪᱮ ᱩᱱᱤᱭ ᱵᱟᱡᱟᱣ ᱮᱭᱟ ᱪᱮ ᱡᱤᱛᱠᱟᱹᱨᱚᱜᱼᱟ᱾ ᱡᱟᱸᱦᱟᱱ ᱠᱟᱹᱢᱤ ᱜᱮ ᱚᱱᱠᱟ ᱢᱤᱫ ᱢᱚᱱᱮ ᱛᱮ ᱠᱟᱹᱢᱤ ᱛᱚᱨᱟᱣ ᱞᱟᱹᱜᱤᱫ ᱢᱚᱱᱮ ᱢᱩᱠᱨᱩᱲ ᱠᱟᱛᱮ ᱚᱱᱟ ᱠᱟᱹᱢᱤ ᱥᱟᱹᱛᱚᱜ ᱜᱮ ᱢᱤᱫ ᱡᱚᱥ ᱢᱮᱱ ᱜᱟᱱᱚᱜᱼᱟ᱾ ᱛᱚᱵᱮ ᱱᱚᱶᱟ ᱥᱟᱛᱟᱢ ᱡᱚᱥ ᱚᱞᱪᱤᱠᱤ ᱨᱮᱭᱟᱜ ᱢᱮᱱᱮᱛ ᱫᱚ ᱚᱠᱟ ᱞᱮᱠᱟ? ᱱᱚᱶᱟ ᱫᱚ ᱢᱤᱫᱴᱟᱹᱝ ᱡᱟᱹᱛᱤ ᱥᱟᱞᱟᱜ, ᱢᱤᱫᱴᱟᱹᱝ ᱯᱟᱹᱨᱥᱤ ᱥᱟᱞᱟᱜ ᱪᱮ ᱢᱤᱫᱴᱟᱹᱝ ᱩᱯᱨᱩᱢ ᱥᱟᱞᱟᱜ ᱟᱹᱰᱤ ᱛᱮᱫ ᱡᱚᱲᱟᱣ ᱢᱮᱱᱟᱜᱼᱟ᱾

ᱱᱚᱶᱟ ᱚᱞᱪᱤᱠᱤ ᱠᱟᱛᱷᱟ ᱢᱮᱱ ᱞᱮᱠᱷᱟᱱ ᱢᱟᱲᱟᱝ ᱫᱚ ᱢᱤᱫᱴᱟᱹᱝ ᱡᱟᱹᱛᱤ ᱞᱟᱹᱜᱤᱫ ᱫᱚ ᱵᱟᱝ ᱛᱟᱸᱦᱮᱭᱟ ᱢᱤᱫᱴᱟᱹᱝ ᱡᱟᱹᱛᱤ ᱵᱤᱨᱟᱹᱫᱽ ᱞᱟᱹᱜᱤᱫ ᱛᱟᱸᱦᱮᱭᱟ᱾ ᱩᱱ ᱚᱠᱛᱚ ᱫᱚ ᱱᱚᱶᱟ ᱫᱚ ᱢᱤᱪᱷᱤᱞ, ᱥᱮᱱᱮᱞᱮᱫ ᱵᱮᱲᱟ ᱨᱮ ᱱᱚᱝᱠᱚ ᱠᱚ ᱰᱟᱠᱨᱟᱭ ᱛᱟᱸᱦᱮᱫ᱾ “ᱚᱞᱪᱤᱠᱤ ᱫᱚ ᱪᱮᱫ ᱠᱟᱱᱟ, ᱟᱹᱫᱤᱢ ᱠᱚᱣᱟᱜ ᱢᱮᱫ ᱠᱟᱱᱟ᱾” ᱱᱚᱶᱟ ᱠᱟᱛᱷᱟ ᱨᱮ ᱵᱟᱰᱟᱭ ᱧᱟᱢᱚᱜ ᱠᱟᱱᱟ ᱡᱮ ᱩᱱᱠᱩ ᱟᱹᱫᱤᱢ ᱦᱚᱲ ᱠᱚᱣᱟᱜ ᱱᱚᱶᱟ ᱨᱮ ᱩᱯᱨᱩᱢ ᱨᱮᱭᱟᱜ ᱠᱟᱛᱷᱟ ᱛᱟᱸᱦᱮᱭᱟ᱾ ᱛᱚᱵᱮ ᱱᱚᱶᱟ ᱛᱤᱥ ᱨᱮᱪᱚ ᱚᱱᱟ ᱨᱩᱯ ᱢᱚᱦᱚᱨ ᱫᱚ ᱟᱹᱨᱩ ᱟᱠᱟᱱ ᱛᱮ ᱛᱮᱦᱮᱧ ᱢᱤᱫᱴᱟᱹᱝ ᱥᱩᱢᱩᱝ ᱡᱟᱹᱛᱤᱭ ᱩᱨᱩᱢᱚᱜ ᱠᱟᱱᱟ᱾ ᱡᱟᱸᱦᱟᱭ ᱫᱚ ᱥᱟᱱᱛᱟᱲ ᱡᱟᱹᱛᱤ᱾ ᱱᱚᱶᱟ ᱠᱟᱛᱷᱟ ᱫᱚ ᱱᱚᱝᱠᱟ, ᱢᱤᱫᱴᱟᱹᱝ ᱡᱟᱹᱛᱤ, ᱫᱷᱚᱨᱚᱢ, ᱥᱟᱶᱛᱟ ᱨᱮᱭᱟᱜ ᱩᱯᱨᱩᱢ ᱫᱚ ᱟᱡᱟᱜ ᱯᱟᱹᱨᱥᱤ ᱟᱹᱱᱤᱡ ᱪᱤᱠᱤ ᱛᱟᱸᱦᱮᱱ ᱠᱷᱟᱱ ᱟᱞᱜᱟ ᱛᱮ ᱩᱯᱨᱩᱢ ᱮ ᱧᱟᱢ ᱠᱮᱭᱟ᱾ ᱪᱮᱠᱟᱛᱮ “ᱡᱟᱦᱟᱸ ᱡᱟᱹᱛᱤ ᱨᱮᱭᱟᱜ ᱚᱞ ᱵᱟᱹᱱᱩᱜᱼᱟ, ᱚᱱᱟ ᱡᱟᱹᱛᱤ ᱨᱮᱭᱟᱜ ᱫᱚ ᱢᱟᱨᱥᱟᱞ ᱜᱮ ᱵᱟᱹᱱᱩᱜᱼᱟ᱾” ᱱᱚᱶᱟ ᱠᱟᱛᱷᱟ ᱫᱚ ᱥᱟᱱᱟᱢ ᱫᱷᱟᱹᱨᱛᱤ ᱡᱟᱠ ᱢᱟᱱᱣᱟ ᱠᱚ ᱵᱟᱰᱟᱭᱟ᱾ ᱛᱚᱵᱮ ᱱᱚᱝᱠᱟᱱ ᱵᱮᱲᱟ ᱨᱮ ᱢᱤᱫ ᱡᱟᱹᱛᱤ ᱪᱮ ᱯᱟᱹᱨᱥᱤ ᱵᱟᱧᱪᱟᱣ ᱞᱟᱹᱜᱤᱫ ᱫᱚ ᱚᱞ ᱜᱮ ᱢᱤᱫ ᱦᱚᱨᱟ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱛᱮ ᱱᱚᱶᱟ ᱚᱞᱪᱤᱠᱤ ᱨᱮᱭᱟᱜ ᱡᱟᱱᱟᱢ ᱫᱚ ᱞᱟᱹᱠᱛᱤ ᱯᱟᱲᱟᱣ ᱟᱠᱟᱱᱟ᱾ ᱟᱨ ᱵᱟᱝᱠᱷᱟᱱ ᱢᱤᱫᱴᱟᱹᱝ ᱡᱟᱹᱛᱤ ᱪᱮ ᱯᱟᱹᱨᱥᱤ ᱨᱮᱭᱟᱜ “ᱥᱚᱱᱟ” ᱞᱮᱠᱟᱱ ᱠᱟᱛᱷᱟ ᱦᱚᱸᱢ ᱚᱞᱟ ᱮᱴᱟᱜ ᱪᱤᱠᱤ ᱛᱮ ᱮᱱᱠᱷᱟᱱ ᱛᱤᱥ ᱨᱮᱦᱚᱸ ᱚᱱᱟ ᱡᱟᱹᱛᱤ ᱪᱮ ᱯᱟᱹᱨᱥᱤ ᱫᱚ ᱵᱟᱭ ᱩᱯᱨᱩᱢ ᱠᱚᱜᱼᱟ᱾ ᱪᱮᱫᱟᱜ ᱡᱟᱦᱟᱸ ᱛᱤᱱᱟᱹᱜ ᱚᱞ ᱯᱟᱲᱦᱟᱣ ᱦᱚᱲ ᱢᱮᱱᱟᱜ ᱠᱚᱣᱟ ᱩᱱᱠᱩ ᱫᱚ ᱵᱟᱝ ᱠᱚ ᱵᱟᱰᱟᱭ ᱨᱮᱦᱚᱸ ᱯᱟᱲᱦᱟᱣ, “ᱚᱞ” ᱫᱚᱠᱚ ᱩᱨᱩᱢ ᱟᱠᱟᱫᱼᱟ᱾ ᱵᱟᱝᱢᱟ ᱱᱚᱶᱟ ᱫᱚ ᱚᱱᱟ ᱯᱟᱹᱨᱥᱤ ᱨᱮᱭᱟᱜ ᱚᱞ ᱠᱟᱱᱟ᱾ ᱚᱱᱠᱟ ᱛᱮ ᱥᱟᱱᱛᱟᱲ ᱡᱟᱹᱛᱤ ᱨᱮᱭᱟᱜ ᱯᱟᱹᱨᱥᱤ ᱛᱟᱸᱦᱮᱱ ᱛᱩᱞᱩᱡ ᱦᱚᱸ ᱮᱴᱟᱜ ᱯᱟᱹᱨᱥᱤ ᱚᱞᱚᱜ ᱠᱟᱱ ᱫᱷᱟᱹᱵᱤᱡ ᱫᱚ ᱴᱷᱟᱹᱣᱠᱟᱹ ᱥᱟᱺᱦᱤᱡ ᱩᱯᱨᱩᱢ ᱫᱚ ᱵᱟᱭ ᱧᱟᱢ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱞᱟᱹᱜᱤᱫ ᱛᱮ ᱜᱩᱨᱩ ᱜᱚᱢᱠᱮ ᱯᱟᱹᱨᱥᱤ ᱡᱟᱹᱱᱤ ᱚᱞ ᱮ ᱚᱰᱚᱠ ᱞᱟᱜᱼᱟ᱾ ᱱᱚᱶᱟ “ᱪᱤᱠᱤ” ᱛᱮᱫᱚ ᱥᱟᱱᱛᱟᱲ ᱨᱚᱲ ᱦᱚᱲ ᱠᱚᱣᱟᱜ ᱟᱲᱟᱝ ᱴᱷᱟᱹᱣᱠᱟᱹ ᱟᱲᱟᱝ ᱧᱟᱢᱚᱜ ᱠᱟᱱᱟ᱾ ᱟᱨ ᱮᱴᱟᱜ ᱪᱤᱠᱤ ᱛᱮᱫᱚ ᱠᱟᱹᱢᱤ ᱛᱚᱨᱟᱣ ᱞᱮᱠᱟ ᱜᱮ ᱚᱞᱚᱜ ᱥᱟᱱᱛᱟᱲ ᱨᱚᱲ ᱦᱚᱲ ᱠᱚ ᱵᱚᱲᱦᱮᱜ ᱠᱟᱱ ᱛᱟᱸᱦᱮᱫ᱾ ᱛᱚᱵᱮ ᱱᱚᱶᱟ ᱠᱟᱹᱢᱤ ᱦᱚᱨᱟ ᱫᱚ ᱛᱤᱥ ᱠᱷᱚᱱ ᱮᱦᱚᱵ ᱟᱠᱟᱱᱟ ᱢᱮᱱᱛᱮ ᱢᱚᱱᱮ ᱨᱮ ᱠᱩᱠᱞᱤ ᱨᱟᱠᱟᱵᱼᱟ?

ᱱᱚᱶᱟ ᱠᱟᱹᱢᱤᱦᱚᱨᱟ ᱫᱚ ᱟᱹᱰᱤ ᱢᱟᱲᱟᱝ ᱠᱷᱚᱱ ᱜᱮ ᱮᱦᱚᱵ ᱟᱠᱟᱱᱟ᱾ ᱢᱮᱱ ᱫᱚ ᱡᱟᱦᱟᱸ ᱛᱤᱥ ᱚᱞ ᱪᱤᱠᱤ ᱫᱤᱥᱚᱢ ᱦᱚᱲ ᱠᱚ ᱛᱟᱞᱟ ᱨᱮ ᱥᱚᱫᱚᱨ ᱟᱠᱟᱱᱟ, ᱚᱱᱟ ᱦᱤᱞᱚᱜ ᱜᱮ ᱮᱦᱚᱵ ᱟᱠᱟᱱᱟ᱾ ᱢᱮᱱ ᱫᱚ ᱑᱙᱒᱕ ᱥᱮᱨᱢᱟ ᱠᱷᱚᱱ᱾ ᱟᱫᱚ ᱩᱱᱫᱚ ᱠᱟᱹᱢᱤ ᱫᱚ ᱪᱟᱞᱟᱜ ᱠᱟᱱ ᱜᱮᱭᱟ ᱚᱞᱪᱤᱠᱤ ᱪᱷᱟᱨᱟᱣ ᱨᱮᱭᱟᱜ ᱫᱚ᱾ ᱢᱮᱱᱠᱷᱟᱱ ᱱᱚᱝᱠᱟ ᱢᱩᱠᱨᱩᱲ ᱠᱟᱛᱮ ᱵᱟᱝ᱾ ᱫᱤᱱ ᱫᱤᱱ ᱛᱮ ᱥᱟᱱᱛᱟᱲ ᱨᱚᱲ ᱦᱚᱲ ᱠᱚ ᱛᱟᱞᱟ ᱨᱮ ᱚᱞᱪᱤᱠᱤ ᱨᱮᱭᱟᱜ ᱴᱷᱟᱶ ᱮ ᱟᱢᱮᱴᱟ᱾ ᱢᱮᱱᱠᱷᱟᱱ ᱱᱤᱛᱚᱜ ᱢᱤᱫ ᱥᱟᱭ ᱵᱚᱪᱷᱚᱨ ᱥᱮᱴᱮᱨᱚᱜ ᱠᱟᱱ ᱨᱮᱦᱚᱸ ᱚᱱᱠᱟ ᱟᱥᱟ ᱞᱮᱠᱟ ᱵᱟᱝ ᱪᱷᱟᱨᱟᱣ ᱟᱠᱟᱱᱟ᱾ ᱚᱱᱟ ᱛᱮ “ᱵᱷᱟᱨᱚᱛ ᱡᱟᱠᱟᱛ ᱚᱱᱚᱞᱤᱭᱟᱹ ᱜᱟᱶᱛᱟ” ᱫᱚ ᱱᱚᱶᱟ ᱠᱟᱹᱢᱤ ᱞᱚᱜᱚᱱ ᱞᱟᱹᱜᱤᱫ ᱛᱮ ᱱᱚᱝᱠᱟᱭ ᱧᱩᱢ ᱦᱟᱞᱟᱝ ᱟᱠᱟᱫᱼᱟ᱾ ᱒᱐᱒᱕ ᱛᱮ ᱚᱠᱟ ᱞᱮᱠᱟ ᱛᱮ ᱥᱟᱭ ᱠᱚᱲᱟ ᱥᱟᱱᱛᱟᱲ ᱨᱚᱲ ᱦᱚᱲ ᱴᱷᱮᱱ ᱚᱞᱪᱤᱠᱤ ᱥᱮᱴᱮᱨᱚᱜ ᱪᱮ ᱪᱮᱫᱽ ᱢᱟᱠᱚ ᱚᱱᱟ ᱜᱮ “ᱡᱚᱥ ᱚᱞᱪᱤᱠᱤ” ᱢᱮᱱᱚᱜᱚᱜ ᱠᱟᱱᱟ᱾ ᱛᱚᱵᱮ ᱱᱚᱶᱟ ᱠᱟᱹᱢᱤᱦᱚᱨᱟ ᱨᱮ ᱟᱹᱰᱤ ᱜᱟᱱ ᱦᱚᱲ ᱪᱮ ᱜᱟᱶᱛᱟ ᱠᱚ ᱪᱷᱩᱴᱟᱹᱣ ᱟᱠᱟᱱ ᱵᱮᱲᱟ ᱨᱮ ᱟᱹᱰᱤ ᱜᱟᱱ ᱜᱟᱶᱛᱟ ᱫᱚ ᱱᱤᱛᱚᱜ ᱦᱚᱸ ᱵᱟᱠᱚ ᱦᱮᱸ ᱥᱤᱠᱟᱹᱨᱟᱜ ᱠᱟᱱ ᱜᱮᱭᱟ᱾ ᱫᱩᱠ ᱨᱮᱭᱟᱜ ᱠᱟᱛᱷᱟ ᱫᱚ ᱱᱚᱶᱟ ᱠᱟᱱᱟ᱾ ᱥᱟᱱᱛᱟᱲ ᱨᱚᱲ ᱦᱚᱲ ᱠᱚ ᱚᱠᱟ ᱞᱮᱠᱟ ᱨᱮ ᱱᱚᱶᱟ ᱠᱚ ᱞᱚᱜᱚᱱ ᱛᱮᱠᱚ ᱟᱯᱱᱟᱨᱟ, ᱩᱱᱟᱹᱜ ᱞᱚᱜᱚᱱ ᱱᱚᱶᱟ “ᱡᱚᱥ” ᱯᱩᱨᱩᱱᱚᱜᱼᱟ᱾

ᱵᱟᱝ ᱞᱚᱜᱚᱱᱚᱜ ᱨᱮᱭᱟᱜ ᱚᱡᱮ ᱠᱚ᱾ ᱵᱷᱟᱨᱚᱛ ᱫᱤᱥᱚᱢ ᱨᱮ ᱥᱟᱱᱛᱟᱲ ᱨᱚᱲ ᱦᱚᱲ ᱠᱚ ᱟᱹᱰᱤ ᱜᱟᱱ ᱯᱚᱱᱚᱛ ᱨᱮᱠᱚ ᱦᱟᱹᱴᱤᱧ ᱟᱠᱟᱱ ᱛᱮ᱾ ᱟᱠᱚ ᱛᱟᱸᱦᱮᱱ ᱯᱚᱱᱚᱛ ᱯᱟᱹᱨᱥᱤ ᱛᱮᱠᱚ ᱟᱹᱠᱤᱞ ᱜᱮᱭᱟᱱ ᱟᱠᱟᱱᱟ᱾ ᱟᱨ ᱟᱠᱚᱣᱟᱜ ᱢᱚᱱᱮ ᱡᱤᱣᱤ ᱥᱟᱞᱟᱜ ᱦᱚᱸ ᱯᱚᱱᱚᱛ ᱯᱟᱹᱨᱥᱤ ᱟᱨ ᱪᱤᱠᱤ ᱥᱟᱞᱟᱜ ᱢᱟᱭᱟ ᱱᱟᱹᱲᱤ ᱛᱚᱯᱚᱞ ᱟᱠᱟᱱᱟ᱾ ᱚᱱᱟ ᱛᱚᱯᱚᱞ ᱢᱟᱭᱟ ᱱᱟᱹᱲᱤ ᱛᱤᱱᱟᱹᱜ ᱞᱚᱜᱚᱱ ᱠᱚ ᱛᱚᱯᱟᱜᱟ ᱩᱱᱟᱹᱜ ᱞᱚᱜᱚᱱ ᱱᱚᱶᱟ “ᱡᱚᱥ” ᱫᱚ ᱡᱚ~ᱵᱤᱞᱤᱜᱼᱟ᱾ ᱱᱚᱸᱰᱮ ᱠᱟᱛᱷᱟ ᱫᱚ ᱱᱚᱶᱟ ᱠᱟᱱᱟ ᱡᱮ ᱯᱚᱱᱚᱛ ᱯᱟᱹᱨᱥᱤ ᱵᱟᱹᱜᱤ ᱵᱟᱝ ᱠᱟᱛᱮ ᱚᱱᱟ ᱥᱟᱞᱟᱜ ᱜᱮ ᱚᱞᱪᱤᱠᱤ ᱦᱚᱸ ᱟᱠᱚᱣᱟᱜ ᱚᱱᱛᱚᱨ ᱢᱚᱱᱮ ᱡᱤᱣᱤ ᱨᱮ ᱴᱷᱟᱶ ᱠᱚ ᱮᱢᱟᱜ ᱠᱷᱟᱱ ᱜᱮ “ᱡᱚᱥ ᱚᱞᱪᱤᱠᱤ” ᱫᱚ ᱡᱚ~ᱵᱤᱞᱤᱜᱼᱟ᱾ ᱡᱮᱢᱚᱱ ᱯᱚᱱᱚᱛ ᱯᱟᱹᱨᱥᱤ ᱪᱤᱠᱤ ᱥᱟᱞᱟᱜ ᱮᱴᱟᱜ ᱯᱟᱹᱨᱥᱤ ᱪᱤᱠᱤ ᱦᱚᱸ ᱠᱚ ᱟᱯᱱᱟᱨᱮᱫ ᱜᱮᱭᱟ᱾ ᱚᱱᱠᱟ ᱜᱮ ᱚᱞᱪᱤᱠᱤ ᱦᱚᱸ ᱱᱤᱡᱚᱨᱟᱜ ᱢᱚᱱᱮ ᱠᱟᱛᱮ ᱠᱚ ᱪᱮᱫᱽ ᱠᱷᱟᱱ ᱟᱹᱰᱤ ᱞᱚᱜᱚᱱ ᱜᱟᱱᱚᱜᱼᱟ᱾ ᱪᱮᱠᱟᱛᱮ ᱥᱟᱱᱛᱟᱲ ᱨᱚᱲ ᱦᱚᱲ “ᱨᱚᱲ” ᱢᱟᱠᱚ ᱵᱟᱰᱟᱭ ᱜᱮᱭᱟ ᱠᱷᱟᱹᱞᱤ “ᱪᱤᱠᱤ” ᱠᱚ ᱪᱮᱫ ᱠᱮᱫ ᱠᱷᱟᱱ ᱜᱮ “ᱡᱚᱥ ᱚᱞᱪᱤᱠᱤ” ᱫᱚ ᱟᱡᱟᱜ ᱥᱟᱹᱜᱩᱱ ᱠᱟᱹᱢᱤ ᱛᱟᱭ ᱚᱠᱛᱚ ᱡᱟᱹᱱᱤᱭ ᱯᱩᱨᱟᱹᱣ ᱠᱮᱭᱟ᱾ ᱱᱚᱶᱟ ᱠᱟᱛᱷᱟ ᱵᱤᱨᱫᱟᱹᱜᱟᱲ ᱠᱚᱨᱮᱱ ᱯᱟᱹᱴᱷᱣᱟᱹ ᱠᱚ ᱡᱟᱦᱟᱸ ᱥᱟᱛᱟᱢ ᱤᱫᱤ ᱠᱟᱛᱮ ᱠᱚ ᱚᱞᱚᱜ ᱠᱟᱱ ᱨᱮᱦᱚᱸ ᱱᱤᱡᱚᱨ ᱯᱟᱹᱨᱥᱤ ᱪᱤᱠᱤ ᱪᱮᱛᱟᱱ ᱱᱟᱥᱮᱱᱟᱜ ᱨᱮᱦᱚᱸ ᱟᱠᱚᱣᱟᱜ ᱚᱱᱛᱚᱨ ᱢᱚᱱᱮ ᱨᱮ ᱴᱷᱟᱶ ᱛᱟᱸᱦᱮᱱ ᱠᱷᱟᱱ ᱱᱚᱶᱟ ᱠᱟᱹᱢᱤ ᱫᱚ ᱟᱨᱦᱚᱸ ᱩᱥᱟᱹᱨᱟᱜᱼᱟ᱾ ᱪᱮᱠᱟᱛᱮ ᱩᱱᱠᱩ ᱜᱮ ᱥᱟᱶᱛᱟ ᱨᱤᱱ ᱟᱜᱟᱢ ᱟᱹᱜᱩᱣᱟᱱ ᱠᱚ ᱦᱩᱭ ᱫᱟᱲᱮᱭᱟᱜᱼᱟ᱾ ᱱᱚᱶᱟ ᱠᱟᱛᱷᱟ ᱫᱚ ᱡᱚᱛᱚ ᱦᱚᱲ ᱵᱚᱱ ᱵᱟᱰᱟᱭᱟ᱾ ᱚᱱᱟᱛᱮ ᱟᱨᱫᱟᱥ ᱛᱟᱸᱦᱮᱱ ᱠᱟᱱᱟ ᱵᱤᱨᱫᱟᱹᱜᱟᱲ ᱨᱤᱱ ᱯᱟᱹᱴᱷᱣᱟᱹ ᱴᱷᱮᱱ ᱟᱠᱚᱣᱟᱜ ᱥᱟᱛᱟᱢ ᱥᱟᱞᱟᱜ ᱜᱚᱨᱚᱡᱽ ᱥᱟᱛᱞᱟᱜ ᱱᱤᱡᱚᱨ ᱡᱟᱱᱟᱢ ᱯᱟᱹᱨᱥᱤ ᱟᱹᱱᱩᱡ ᱪᱤᱠᱤ ᱢᱮᱱᱟᱜ ᱠᱟᱛᱷᱟ ᱟᱯᱱᱟᱨ ᱠᱟᱛᱮ ᱚᱞᱪᱤᱠᱤ ᱠᱚ ᱪᱮᱫᱽ ᱢᱟ ᱱᱚᱶᱟ ᱟᱥᱟ ᱠᱟᱛᱮ ᱱᱚᱶᱟ ᱜᱟᱞᱢᱟᱨᱟᱣ ᱫᱚ ᱫᱚᱲᱚᱢ ᱮᱱᱟ᱾

Written by ᱞᱚᱠᱷᱢᱚᱬ ᱵᱟᱥᱠᱮ