ᱢᱟᱹᱱᱥᱤᱠ

ᱵᱟᱹᱭᱥᱟᱹᱠᱷ ᱵᱚᱸᱜᱟ ᱱᱤᱨᱢᱟᱭᱟ ᱥᱤᱛᱩᱢ ᱞᱚᱞᱚ ᱫᱤᱱ ᱠᱮ ᱫᱤᱱ ᱟᱨᱦᱚᱸ ᱵᱟᱹᱲᱛᱤ ᱤᱫᱤᱜ ᱠᱟᱱ ᱜᱮᱭᱟ᱾ ᱪᱟᱸᱫᱚ ᱦᱚᱸ ᱯᱟᱞᱮᱱ ᱚᱠᱟ ᱡᱚᱱᱚᱢ ᱨᱮᱭᱟᱜ ᱨᱟᱹᱜᱤ ᱛᱮ ᱧᱩᱛᱟᱹᱛ ᱧᱤᱫᱟᱹ ᱨᱮᱜᱮ ᱟᱸᱜᱽᱨᱟ ᱦᱚᱵᱚᱨ ᱠᱟᱛᱮ ᱥᱮᱛᱟᱜ ᱛᱚᱨᱟ ᱡᱚᱨᱚᱝ ᱡᱚᱨᱚᱝᱮ ᱩᱯᱮᱞᱚᱜ ᱠᱟᱱᱟ᱾ ᱨᱟᱠᱟᱵ ᱛᱚᱨᱟ ᱠᱷᱚᱱ ᱜᱮ ᱮᱞᱟᱝᱮ ᱮᱨ ᱯᱟᱥᱱᱟᱣᱮᱫᱟ᱾ ᱦᱚᱲᱢᱚ ᱦᱟᱨᱛᱟ ᱢᱟ ᱩᱫᱽᱜᱟᱹᱨ ᱦᱟᱣᱮᱫᱛᱮ ᱛᱤᱠᱤ ᱠᱩᱸᱫᱽᱨᱤ ᱞᱮᱠᱟ ᱵᱟᱨᱵᱟᱹᱨᱤ ᱜᱟᱱ ᱫᱚ ᱵᱟᱯᱷᱟᱣᱮᱱ ᱜᱮ᱾ ᱡᱤᱣᱤ ᱦᱚᱸ ᱥᱟᱸᱦᱮᱫ ᱦᱚᱭ ᱞᱮᱠᱟ ᱜᱮ ᱯᱟᱞᱮᱱ ᱚᱰᱚᱠ ᱟᱫᱮᱨᱚᱜ ᱠᱟᱱᱟ ᱟᱹᱠᱩ ᱯᱟᱹᱠᱩ ᱛᱮ᱾ ᱫᱤᱥᱚᱢ ᱜᱚᱴᱟ ᱞᱚᱞᱚ ᱦᱚᱭ ᱨᱮᱭᱟᱜ ᱛᱷᱟᱯᱲᱮ ᱠᱷᱚᱱ ᱵᱟᱧᱪᱟᱣ ᱞᱟᱹᱜᱤᱫ ᱥᱚᱨᱠᱟᱨ ’ᱥᱚᱱᱛᱚᱨᱚᱱᱵᱮᱣᱨᱟᱭ ᱩᱪᱷᱟᱹᱱ ᱥᱚᱫᱚᱨᱟᱠᱟᱫᱟ᱾ ᱠᱷᱚᱵᱚᱨ ᱠᱟᱜᱚᱡᱽ ᱠᱚᱨᱮ ᱥᱮ ᱧᱮᱱᱮᱞᱚᱢ ᱠᱚᱨᱮ ᱫᱤᱱᱟᱹᱢ ᱥᱤᱛᱩᱢ ᱛᱮ ᱜᱩᱡᱩᱜ ᱠᱟᱱ ᱦᱚᱲᱟᱜ ᱠᱷᱚᱵᱚᱨ ᱯᱟᱨᱥᱟᱞᱚᱜ ᱠᱟᱱᱟ᱾ ᱱᱤᱭᱟᱹ ᱵᱟᱨ ᱵᱚᱸᱜᱟ ᱥᱤᱛᱩᱢ ᱛᱮ ᱛᱤᱱᱟᱹᱜ ᱜᱮᱥᱟᱭ ᱦᱚᱲ ᱪᱚᱝᱠᱚ ᱞᱚᱦᱚᱢ ᱟᱠᱟᱱᱟ᱾ ᱢᱟᱹᱱᱢᱤ ᱥᱟᱶ ᱡᱟᱱᱶᱟ ᱠᱚ ᱦᱚᱸ ᱥᱤᱛᱩᱢ ᱞᱚᱞᱚ ᱛᱮ ᱩᱛᱤᱥᱩᱛᱤ ᱠᱚ ᱟᱵᱚᱥᱛᱟ ᱪᱟᱵᱟ ᱦᱟᱠᱟᱱᱟ᱾ ᱚᱠᱟ ᱨᱮᱦᱚᱸ ᱱᱟᱥᱮᱱᱟᱜ ᱦᱮᱢᱟᱞ ᱵᱟᱝᱠᱚ ᱧᱟᱢᱮᱫᱟ᱾ ᱵᱚᱲᱦᱮ ᱛᱮᱜᱮ ᱯᱟᱞᱮᱱ ᱦᱚᱲ ᱠᱚ ᱚᱲᱟᱜ ᱠᱷᱚᱱ ᱠᱚ ᱚᱰᱚᱠᱚᱜ ᱠᱟᱱᱟ ᱵᱟᱝᱠᱷᱟᱱ ᱜᱚᱢᱷᱮᱲ ᱫᱟᱨᱮ ᱩᱢᱩᱞ ᱜᱮᱠᱚ ᱯᱟᱱᱛᱮ ᱵᱟᱲᱟᱭᱮᱫᱟ ᱡᱤᱠᱤ ᱡᱤᱨᱟᱹᱣ ᱞᱟᱹᱜᱤᱫ᱾

ᱟᱹᱠᱩᱛ ᱨᱮᱢ ᱦᱟᱵᱚᱲ ᱞᱮᱱᱠᱷᱟᱱ ᱥᱤᱛᱩᱢ ᱦᱟᱞᱟᱭ ᱦᱟᱞᱟᱭ ᱨᱮᱦᱚᱸ ᱠᱟᱹᱢᱤ ᱦᱩᱭᱟᱢ ᱜᱮ᱾ ᱫᱟᱹᱭ ᱛᱮᱧᱟᱝ ᱚᱲᱟᱜ ᱥᱮᱱᱚᱜ ᱛᱮᱜᱮ ᱦᱩᱭᱩᱜᱼᱟ ᱞᱮᱢᱯᱟ ᱦᱟᱜ ᱟᱹᱰᱤ ᱢᱟᱨᱟᱝ ᱟᱹᱲᱡᱷᱹᱣ ᱥᱚᱡᱷᱮ ᱞᱟᱹᱜᱤᱫ, ᱠᱷᱟᱴᱚ ᱜᱟᱞᱚᱪ ᱛᱮᱫᱚ ᱟᱹᱲᱡᱷᱟᱹᱣ ᱵᱟᱭ ᱨᱟᱲᱟ ᱜᱚᱫ ᱫᱟᱲᱮᱭᱟᱜᱼᱟ, ᱫᱚᱦᱲᱟ ᱯᱮᱦᱲᱟ ᱫᱮᱡ ᱨᱩᱣᱟᱹᱲ ᱟᱛᱮ ᱜᱟᱯᱟᱞᱢᱟᱨᱟᱣ ᱞᱮᱱ ᱮᱱᱟᱝ ᱥᱚᱞᱦᱮᱜᱼᱟ᱾ ᱠᱷᱟᱴᱚ ᱨᱮᱜᱮ ᱦᱩᱱᱟᱹᱝ ᱢᱩᱪᱟᱹᱫ ᱠᱚᱜ ᱠᱷᱟᱱ ᱥᱮᱱᱚᱜ ᱨᱮᱱᱟᱜ ᱫᱚ ᱞᱟᱹᱠᱛᱤ ᱵᱟᱭ ᱦᱩᱭ ᱠᱚᱜᱼᱟ, ᱯᱷᱚᱱ ᱛᱮᱜᱮ ᱠᱟᱛᱷᱟ ᱥᱚᱞᱦᱮ ᱠᱚᱜᱼᱟ᱾

ᱥᱟᱺᱜᱤᱧ ᱜᱮᱭᱟ ᱦᱚᱨ, ᱪᱟᱸᱫᱚ ᱨᱟᱠᱟᱵ ᱛᱚᱨᱟ ᱥᱮᱴᱮᱨ ᱦᱩᱭᱩᱜᱼᱟ ᱵᱟᱝᱠᱷᱟᱱ ᱞᱚᱞᱚᱣᱟᱜ ᱠᱚ ᱛᱟᱺᱜᱤ ᱛᱟᱨᱟ ᱦᱩᱭᱩᱜᱼᱟ᱾ ᱚᱱᱟᱛᱮ ᱛᱟᱭᱚᱢ ᱥᱤᱢᱨᱟᱜ ᱨᱮᱜᱮ ᱚᱲᱟᱜ ᱠᱷᱚᱱᱮ ᱚᱰᱚᱠᱮᱱᱟ ᱞᱮᱢᱯᱟ᱾ ᱰᱩᱞᱩᱝ ᱜᱟᱹᱰᱤ ᱛᱮ, ᱢᱤᱫ ᱰᱟᱹᱵᱩ ᱢᱟᱹᱰᱤᱫᱟᱜ ᱮ ᱥᱟᱸᱵᱟᱣ ᱠᱮᱜᱼᱟ ᱟᱨ ᱵᱟᱨ ᱯᱟᱹᱭᱞᱟᱹ ᱠᱷᱟᱹᱡᱟᱹᱲᱤ᱾ ᱯᱟᱪᱷᱮ ᱵᱤᱞᱚᱢ ᱦᱩᱭ ᱫᱟᱲᱮᱭᱟᱜᱼᱟ᱾ ᱫᱟᱜ ᱛᱮᱛᱟᱝ ᱫᱟᱠᱟ ᱨᱮᱸᱜᱮᱡ ᱟᱨ ᱵᱟᱝᱠᱷᱟᱱ ᱵᱷᱟᱹᱜᱽᱱᱟᱹ ᱵᱷᱟᱹᱜᱽᱱᱤ ᱠᱚ ᱡᱚᱢ ᱦᱟᱹᱴᱤᱧᱟ᱾

ᱞᱮᱢᱯᱟ ᱞᱚᱜᱚᱱ ᱞᱚᱜᱚᱱᱮ ᱯᱷᱟᱸᱫᱟ ᱟᱹᱪᱩᱨᱮᱜᱼᱟ ᱰᱩᱞᱩᱝ ᱜᱟᱹᱰᱤ ᱯᱟᱭᱰᱮᱞ, ᱩᱥᱟᱹᱨᱟᱭ ᱥᱮᱴᱮᱨᱚᱜ ᱢᱟ ᱢᱮᱱᱛᱮ᱾ ᱮᱱᱦᱚᱸ ᱢᱤᱫ ᱰᱟᱝ ᱜᱟᱱ ᱫᱚᱭ ᱩᱥᱩᱞ ᱜᱚᱫ ᱮᱱ ᱜᱮᱭᱟ ᱨᱟᱠᱟᱵ ᱪᱟᱸᱫᱚ᱾ ᱱᱮ ᱟᱫᱚ ᱞᱚᱞᱚ ᱮᱞᱮᱝ ᱫᱚ ᱵᱟᱡᱟᱣᱚᱜ ᱵᱟᱡᱟᱣᱚᱜ ᱛᱮᱜᱮ ᱥᱮᱴᱮᱨᱮᱱᱟᱭ ’ᱥᱩᱠᱨᱤ ᱜᱟᱹᱰᱤᱭᱟᱹ ᱟᱹᱛᱩ ᱟᱡ ᱫᱟᱹᱭ ᱛᱮᱧᱟᱝ ᱚᱲᱟᱜ᱾

ᱯᱟᱨᱠᱚᱢ ᱠᱚ ᱵᱤᱞ ᱟᱫᱮ ᱠᱷᱟᱱᱜᱮ ᱜᱤᱛᱤᱡ ᱡᱤᱨᱟᱹᱣ ᱜᱮ ᱥᱟᱱᱟ ᱜᱚᱫ ᱠᱮᱫᱮ, ᱞᱚᱴᱟ ᱫᱟᱜ ᱡᱚᱦᱟᱨ ᱵᱮᱵᱷᱟᱨ ᱚᱠᱛᱚ ᱜᱮᱭ ᱧᱮᱞ ᱫᱚ ᱢᱟᱨᱟᱝ ᱵᱷᱟᱹᱜᱽᱱᱟᱹᱛ ᱛᱮᱫ ᱵᱚᱸᱜᱟᱭ ᱫᱩᱲᱩᱵ ᱟᱠᱟᱱᱟ ᱛᱟᱞᱟ ᱨᱟᱪᱟ ᱨᱮ ᱵᱮᱱᱟᱣᱟᱠᱟᱱ ᱛᱩᱨᱥᱤ ᱯᱤᱸᱰᱟᱹ ᱥᱟᱢᱟᱝ ᱨᱮ᱾ ᱥᱩᱨ ᱨᱮ ᱟᱨ ᱢᱤᱫ ᱠᱚᱲᱟ ᱜᱤᱫᱽᱨᱟᱹᱭ ᱫᱩᱲᱩᱵ ᱟᱠᱟᱱᱟ ᱞᱚᱦᱚᱫ ᱞᱩᱜᱽᱲᱤ ᱛᱮ ᱫᱷᱩᱛᱤ ᱠᱟᱛᱮ ᱟᱨ ᱪᱮᱫ ᱠᱟᱜᱚᱪ ᱪᱚᱭ ᱥᱟᱵ ᱟᱠᱟᱫᱟ᱾ ᱟᱨᱦᱚᱸ ᱟᱹᱰᱤᱜᱟᱱ ᱦᱚᱲ ᱨᱟᱪᱟ ᱠᱚᱨᱮ ᱯᱤᱸᱰᱟᱹ ᱠᱚᱨᱮ ᱠᱚ ᱫᱩᱲᱩᱵ ᱟᱠᱟᱱᱟ ᱟᱠᱚᱣᱟᱜ ᱯᱟᱹᱨᱤ ᱛᱟᱺᱜᱤ ᱨᱮ᱾ ᱞᱮᱢᱯᱟ ᱦᱟᱜ ᱢᱚᱱᱮᱨᱮ ᱦᱤᱫᱤᱡ ᱦᱮᱡ ᱜᱚᱫ ᱮᱱᱟ ‘ ᱛᱤᱥ ᱠᱷᱚᱱ ᱟᱫᱚ ᱢᱟᱨᱟᱝ ᱵᱷᱟᱹᱜᱽᱱᱟᱹ ᱫᱚᱭ ᱚᱡᱷᱟᱜ ᱠᱟᱱᱟ ? ᱱᱩᱭ ᱞᱚᱵᱚᱰᱚᱝᱠᱟ ᱢᱟ ᱚᱞ ᱯᱟᱲᱦᱟᱣ ᱨᱮ ᱵᱟᱭ ᱞᱟᱵᱟᱫᱷᱤᱭᱟᱹᱣ ᱞᱮᱱᱛᱮ ᱦᱟᱱᱮ ᱟᱱᱫᱷᱨᱟ ᱫᱤᱥᱚᱢ ᱱᱟᱞᱦᱟ ᱠᱟᱹᱢᱤ ᱛᱮᱭ ᱥᱮᱱ ᱞᱮᱱ᱾ ᱛᱤᱥ ᱠᱚᱨᱮ ᱟᱫᱚ ᱜᱩᱨᱩ ᱪᱮᱞᱟᱭ ᱫᱩᱲᱩᱵ ᱞᱮᱱ ᱛᱮ ᱵᱚᱸᱜᱟ ᱵᱳᱨᱳ ᱫᱚᱭ ᱟᱹᱯᱱᱟᱹᱛ ᱠᱮᱫ ᱠᱚ, ᱪᱮ ᱦᱚᱲ ᱮᱲᱮ ᱜᱮᱭ ᱚᱡᱷᱟᱜ ᱠᱟᱱᱟ᱾ ᱟᱫᱚ ᱟᱡ ᱫᱟᱹᱭ ᱴᱷᱮᱱ ᱠᱷᱚᱱ ᱜᱮᱭ ᱵᱟᱰᱟᱭ ᱠᱮᱫᱟ ᱵᱟᱝᱢᱟ ᱱᱟᱞᱦᱟ ᱫᱤᱥᱚᱢ ᱠᱷᱚᱱ ᱜᱮ ᱚᱡᱷᱟᱜ ᱫᱚᱭ ᱪᱮᱫ ᱟᱹᱜᱩᱣᱟᱠᱟᱫᱟ ᱢᱩᱥᱞᱟᱹ ᱜᱩᱨᱩ ᱴᱷᱮᱱ ᱠᱷᱚᱱ ᱟᱨ ᱱᱚᱜᱼᱚᱭ ᱛᱩᱨᱩᱭ ᱵᱚᱸᱜᱟ ᱢᱟᱲᱟᱝ ᱜᱮᱭ ᱦᱮᱡ ᱨᱩᱣᱟᱹᱲ ᱟᱠᱟᱱᱟ᱾ ᱞᱟᱹᱭᱮ ᱛᱚᱸᱜᱮ ᱤᱫᱤ ᱠᱮᱫᱟ ‘ ᱟᱡ ᱜᱮ ᱱᱚᱶᱟ ᱱᱟᱶᱟ ᱞᱮᱠᱟᱱ ᱛᱩᱨᱥᱤ ᱯᱤᱸᱰᱟᱹ ᱫᱚᱭ ᱵᱮᱱᱟᱣ ᱠᱮᱫᱟ, ᱢᱟᱫ ᱠᱷᱩᱱᱴᱤ ᱨᱮ ᱟᱨᱟᱜ ᱥᱟᱹᱞᱩ ᱦᱤᱯᱤᱲ ᱦᱤᱯᱤᱲ ᱮ ᱚᱴᱟᱝ ᱠᱮᱜᱼᱟ, ᱤᱱᱟᱹ ᱥᱩᱢᱩᱝ ᱫᱚ ᱵᱟᱝ ᱫᱩ ᱱᱷᱟᱜ ᱦᱟᱱᱟ ᱚᱲᱟᱜ ᱵᱚᱞᱚᱱ ᱢᱮ ᱯᱮᱭᱟ ᱦᱚᱲ ᱠᱷᱟᱹᱯᱨᱤ ᱟᱨ ᱪᱮᱫ ᱡᱟᱝ ᱠᱚᱪᱚᱭ ᱫᱚᱦᱚᱣᱟᱠᱟᱫ, ᱚᱠᱟ ᱠᱷᱚᱱ ᱪᱚᱭ ᱟᱹᱜᱩᱣᱟᱠᱟᱫ, ᱟᱡ ᱜᱮᱭ ᱵᱟᱰᱟᱭ᱾ ᱫᱤᱱᱟᱹᱢ ᱮ ᱥᱤᱸᱫᱩᱨᱟᱜᱼᱟ, ᱫᱤᱱᱟᱹᱢ ᱮ ᱵᱚᱸᱜᱟ ᱵᱳᱨᱳᱭᱟ᱾ ᱢᱮᱛᱟᱭ ᱨᱮᱫᱚᱭ ᱢᱮᱱᱟ ‘ ᱤᱧ ᱨᱮᱱ ᱵᱚᱸᱜᱟ ᱵᱳᱨᱳ ᱠᱟᱱᱟᱠᱚ ᱫᱮᱵᱟ ᱥᱮᱵᱟ ᱦᱚᱪᱚᱣᱟᱹᱧ ᱯᱮ, ᱚᱠᱚᱭᱟᱜ ᱦᱚᱸ ᱵᱟᱭ ᱵᱟᱹᱲᱤᱡᱚᱜᱼᱟ, ᱵᱟᱭ ᱮᱴᱠᱮᱴᱚᱬᱮᱜᱼᱟ ᱵᱚᱨᱚᱢ ᱟᱵᱚ ᱥᱟᱶᱛᱮ ᱦᱚᱲᱟᱜ ᱦᱚᱸ ᱵᱷᱟᱹᱞᱟᱹᱭ ᱦᱩᱭᱩᱜᱼᱟ᱾ ᱟᱫᱚ ᱚᱱᱟ ᱛᱟᱭᱚᱢ ᱠᱷᱚᱱ ᱜᱮ ᱚᱡᱷᱟᱜ ᱮ ᱮᱦᱚᱵ ᱟᱠᱟᱫᱟ᱾ ᱱᱮᱛᱟᱨ ᱫᱚ ᱫᱤᱱᱜᱮ ᱦᱚᱲ ᱠᱚ ᱦᱮᱡ ᱧᱟᱢᱮ ᱠᱟᱱᱟ ᱫᱤᱱᱟᱹᱢ ᱜᱮ ᱦᱟᱱᱛᱮ ᱱᱷᱟᱛᱮ ᱠᱚ ᱟᱥᱮᱱᱮ ᱠᱟᱱᱟ, ᱛᱤᱱᱟᱹᱜ ᱜᱟᱱ ᱠᱚ ᱮᱢᱟᱭ ᱠᱟᱱᱟ ᱥᱮ ᱵᱟᱝ ᱟᱡ ᱜᱮᱭ ᱵᱟᱰᱟᱭᱟ᱾

ᱟᱫᱚ ᱵᱷᱟᱹᱜᱽᱱᱟᱹ ᱩᱱᱤ ᱠᱚᱲᱟ ᱠᱮᱭ ᱢᱮᱛᱟᱫ ᱮᱭᱟ ‘ ᱫᱮ ᱚᱱᱟ ᱠᱟᱜᱚᱡᱽ ᱛᱟᱢ ᱚᱰᱚᱠ ᱢᱮ ᱟᱨ ᱱᱚᱶᱟ ᱞᱚᱴᱟ ᱫᱟᱜ ᱥᱟᱢᱟᱝ ᱨᱮ ᱫᱚᱦᱚᱭ ᱢᱮ᱾ ᱞᱚᱴᱟ ᱫᱟᱜ ᱛᱟᱸᱵᱟ ᱛᱩᱨᱥᱤ ᱥᱟᱢᱟᱝ ᱨᱮ ᱵᱤᱱᱤᱰ ᱟᱥ ᱵᱟᱠᱷᱨᱟ ᱵᱚᱸᱜᱟ ᱵᱩᱨᱩ ᱠᱚ ᱱᱮᱦᱚᱨ ᱠᱚᱢ ᱟᱨ ᱪᱮᱫ ᱮᱢ ᱢᱟᱹᱱᱥᱤᱠᱟ ᱚᱱᱟ ᱫᱚ ᱟᱢᱟᱜ ᱢᱚᱱᱮ ᱛᱮᱜᱮ ᱢᱟᱹᱱᱥᱤᱠ ᱢᱮ᱾ ᱚᱱᱟ ᱛᱟᱭᱚᱢ ᱡᱚᱦᱟᱨ ᱢᱮ ᱟᱨ ᱱᱚᱶᱟ ᱠᱟᱜᱚᱡᱽ ᱥᱟᱵ ᱠᱟᱛᱮ ᱢᱤᱫ ᱢᱚᱦᱰᱟ ᱚᱰᱚᱠ ᱥᱮᱱ ᱩᱛᱟᱹᱨᱚᱜ ᱢᱮ ᱟᱞᱚᱢ ᱠᱚᱭᱚᱜ ᱨᱩᱣᱟᱹᱲᱟ᱾ᱟᱫᱚ ᱩᱱᱤ ᱠᱚᱲᱟ ᱦᱚᱸ ᱵᱷᱟᱹᱜᱽᱱᱟᱹ ᱦᱟᱜ ᱠᱟᱛᱷᱟ ᱞᱮᱠᱟᱛᱮ ᱛᱟᱵᱮᱨ ᱠᱟᱛᱮ ᱪᱮᱫ ᱠᱚᱪᱚᱭ ᱵᱟᱰᱟᱜ ᱵᱩᱰᱩᱜ ᱠᱮᱫᱟ ᱟᱹᱰᱤ ᱜᱷᱟᱹᱲᱤᱠ᱾ ᱟᱫᱚᱭ ᱤᱠᱲᱩᱢ ᱮᱱᱛᱮ ᱟᱹᱰᱤ ᱫᱷᱟᱣᱮ ᱡᱚᱦᱟᱨ ᱠᱮᱫᱟ, ᱚᱱᱟ ᱛᱟᱭᱚᱢ ᱠᱟᱜᱚᱡᱽ ᱥᱟᱵ ᱠᱟᱛᱮ ᱩᱥᱟᱹᱨᱟᱭ ᱚᱰᱚᱠ ᱥᱮᱱᱮᱱᱟ᱾ ᱚᱱᱠᱟ ᱜᱮ ᱛᱟᱭᱚᱢ ᱨᱤᱱ ᱦᱚᱲ ᱠᱚ ᱦᱚᱸ ᱪᱮᱫ ᱠᱚᱪᱚ ᱠᱚ ᱵᱚᱸᱜᱟ ᱦᱚᱪᱚ ᱠᱮᱫᱟ, ᱟᱫᱷᱮᱠ ᱫᱚ ᱚᱲᱟᱜ ᱵᱷᱤᱛᱤᱨ ᱥᱮᱫ ᱨᱮ ᱟᱫᱷᱮᱠ ᱰᱚ ᱨᱟᱪᱟ ᱛᱟᱞᱟ ᱛᱩᱨᱥᱤ ᱯᱤᱸᱰᱟᱹ ᱥᱟᱢᱟᱝ ᱨᱮ᱾

ᱞᱮᱢᱯᱟ ᱫᱚ ᱟᱡ ᱫᱟᱹᱭ ᱛᱮᱧᱟᱝ ᱛᱤᱠᱤᱱ ᱥᱟᱶ ᱵᱟᱹᱥᱭᱟᱹᱢ ᱵᱟᱲᱟ ᱭᱮᱱᱛᱮ ᱜᱟᱞᱚᱪ ᱜᱟᱞᱢᱟᱨᱟᱣ ᱠᱚ ᱮᱦᱚᱵ ᱠᱮᱫᱟ ᱪᱟᱹᱲᱤ ᱢᱮᱞᱟ ᱨᱮ᱾ ᱡᱟᱦᱟᱸ ᱛᱤᱱ ᱠᱚᱨᱮ ᱫᱚ ᱞᱚᱞᱚ ᱦᱚᱭᱼᱮ ᱩᱭᱩᱝ ᱛᱟᱨᱟᱭᱮᱫ ᱠᱚ᱾ ᱟᱡᱽ ᱵᱟᱡᱽ ᱠᱟᱛᱷᱟ ᱥᱚᱞᱦᱮ ᱛᱮ ᱪᱟᱸᱫᱚ ᱫᱚ ᱠᱚ ᱫᱤᱯᱤᱞ ᱩᱛᱟᱹᱨ ᱠᱮᱫᱮ᱾ ᱢᱟᱨᱟᱝ ᱵᱷᱟᱹᱜᱽᱱᱟᱹ ᱦᱚᱸᱭ ᱟᱣᱥᱟᱱᱮᱱ ᱛᱮ ᱟᱫᱚ ᱟᱠᱚ ᱥᱟᱶᱮ ᱫᱩᱲᱩᱵ ᱯᱟᱱᱛᱮᱭᱮᱱᱟ᱾ᱛᱟᱭᱚᱢ ᱫᱚ ᱠᱟᱛᱷᱟ ᱮᱴᱟᱜ ᱥᱮᱫ ᱠᱚ ᱟᱛᱨᱮ ᱤᱫᱤ ᱠᱮᱫᱟ᱾ ᱡᱩᱫᱟᱹ ᱡᱩᱫᱟᱹᱵᱟᱦᱱᱟ ᱠᱟᱛᱮ ᱞᱮᱢᱯᱟ ᱟᱡ ᱫᱟᱹᱭ ᱛᱮᱧᱟᱝ ᱫᱚᱠᱤᱱ ᱚᱰᱚᱠᱮᱱᱟ᱾ ᱢᱮᱞᱟ ᱨᱮᱫᱚ ᱞᱮᱢᱯᱟ ᱟᱨ ᱢᱟᱨᱟᱝ ᱵᱷᱟᱹᱜᱽᱱᱟᱹᱛ ᱥᱩᱢᱩᱝ᱾

ᱟᱫᱚ ᱞᱮᱢᱯᱟᱭ ᱢᱮᱱ ᱜᱚᱫ ᱠᱮᱫᱟ ‘ᱵᱷᱟᱹᱜᱽᱱᱟᱹ ᱟᱹᱰᱤ ᱵᱷᱮᱜᱟᱨ ᱵᱤᱨᱤᱛ ᱵᱤᱱ ᱥᱟᱵ ᱠᱮᱫ ᱫᱚ! ᱟᱵᱚ ᱵᱚᱝᱥᱚ ᱨᱮ ᱢᱟ ᱱᱚᱝᱠᱟᱱ ᱜᱩᱱ ᱵᱤᱨᱫᱟᱹ ᱦᱟᱱ ᱦᱚᱲ ᱜᱮ ᱵᱟᱝᱠᱚ ᱛᱟᱦᱮᱸᱠᱟᱱᱟ᱾

ᱢᱟᱢᱚ ᱟᱫᱚ ᱡᱟᱣ ᱞᱮᱠᱟ ᱦᱚᱯᱚᱱ ᱵᱤᱫᱟᱹᱞ ᱦᱚᱯᱚᱱ ᱯᱟᱴᱟᱫᱚ ᱢᱤᱫ ᱜᱮ ᱛᱟᱦᱮᱱ ᱠᱟᱹᱠᱛᱤ ᱠᱟᱱᱟ ᱥᱮ ᱟᱹᱨᱩ ᱯᱷᱮᱨᱟᱣ ᱦᱚᱸ ᱞᱟᱹᱠᱛᱤᱜ ᱠᱟᱱ ᱜᱮᱭᱟ ?

ᱟᱹᱨᱩ ᱫᱟᱲᱮᱭᱟᱜ ᱠᱷᱟᱱ ᱢᱟ ᱱᱟᱯᱟᱭ ᱜᱮ ᱵᱷᱟᱹᱜᱽᱱᱟᱹ ᱟᱫᱚ ᱦᱚᱲ ᱮᱲᱮ ᱠᱟᱛᱮ ᱥᱮ ᱥᱟᱹᱨᱤ ᱥᱚᱛᱚ ᱦᱚᱨ ᱛᱮ ᱛᱟᱲᱟᱢ ᱠᱟᱛᱮ ?

ᱵᱷᱟᱹᱜᱽᱱᱟᱹᱭ ᱵᱩᱡᱷᱟᱹᱣ ᱧᱟᱢ ᱜᱚᱫ ᱠᱮᱫᱟᱭ ᱫᱷᱟᱲᱟᱯᱮ ᱚᱰᱟᱣᱮᱫᱟ ᱢᱮᱱᱛᱮ᱾ ᱠᱟᱛᱷᱟᱭ ᱟᱹᱪᱩᱨ ᱧᱚᱜ ᱠᱮᱫᱟ᱾ ᱧᱮᱞ ᱵᱤᱱ ᱢᱟᱢᱚ, ᱱᱟᱥᱮ ᱪᱷᱳᱲᱮ ᱞᱤᱧ ᱚᱡᱷᱟᱜ ᱠᱟᱱᱟ, ᱚᱲᱟᱜ ᱛᱮ ᱦᱮᱡ ᱟᱠᱟᱱ ᱟᱹᱠᱩᱛᱟᱠᱟᱱ ᱦᱚᱲ ᱚᱠᱟ ᱞᱮᱠᱟᱨᱮ ’ᱵᱟᱝ` ᱫᱚ ᱞᱤᱧ ᱢᱮᱛᱟ ᱠᱚᱣᱟ ? ᱛᱤᱱᱟᱹᱜ ᱟᱥᱟ ᱠᱟᱛᱮ ᱠᱚ ᱦᱤᱡᱩᱜᱼᱟ, ᱯᱷᱟᱞᱱᱟ ᱴᱷᱮᱱ ᱵᱚᱸᱜᱟ ᱵᱩᱨᱩ ᱞᱮᱠᱷᱟᱱ ᱱᱤᱨᱟᱹᱭ ᱧᱟᱢᱚᱜ ᱜᱮᱭᱟ ᱢᱮᱱᱛᱮ᱾

ᱮᱱᱟᱝᱤᱡ ᱩᱱᱤ ᱠᱚᱲᱟ ᱫᱚ ᱵᱷᱟᱹᱜᱽᱱᱟᱹ ᱪᱮᱫ ᱵᱟᱠᱷᱨᱟᱭ ᱵᱚᱸᱜᱟ ᱚᱪᱚ ᱠᱮᱫ ᱵᱤᱱᱟ ?

ᱢᱟᱢᱚ, ᱛᱮᱦᱮᱧ ᱜᱮ ᱪᱟᱹᱠᱨᱤ ᱵᱟᱠᱷᱨᱟ ᱵᱤᱱᱤᱰ ᱚᱞᱮ ᱥᱮᱱᱚᱜ ᱠᱟᱱᱟ, ᱟᱫᱚ ᱦᱚᱞᱟ ᱨᱮᱜᱮᱭ ᱢᱮᱛᱟᱫ ᱞᱤᱧ ᱛᱟᱫᱮᱸᱭᱟ ᱢᱟᱹᱱᱥᱤᱠ ᱞᱟᱹᱜᱤᱫ ᱡᱮᱢᱚᱱ ᱯᱩᱨᱤᱠᱷᱟ ᱨᱮᱭ ᱯᱟᱥ ᱫᱟᱲᱮᱭᱟᱜ ᱢᱟ᱾

ᱵᱚᱸᱜᱟ ᱵᱳᱨᱳ ᱪᱮᱛᱟᱱ ᱟᱹᱞᱤᱧᱟᱜ ᱦᱚᱸ ᱯᱟᱹᱛᱭᱟᱹᱣ ᱫᱚ ᱢᱮᱱᱟᱜ ᱜᱮᱭᱟ ᱵᱷᱟᱹᱜᱽᱱᱟᱹ ᱟᱫᱚ ᱢᱟᱹᱱᱥᱤᱠ ᱞᱮᱠᱷᱟᱱ ᱪᱟᱹᱠᱨᱤ ᱧᱟᱢᱚᱜ ᱠᱷᱟᱱ ᱚᱞ ᱯᱟᱲᱦᱟᱣ ᱟᱹᱠᱤᱞ ᱟᱨᱡᱟᱣ ᱨᱮᱭᱟᱜ ᱞᱟᱹᱠᱛᱤ ᱜᱮ ᱵᱟᱹᱱᱩᱜ ᱟᱱ᱾ ᱪᱮᱫ ᱢᱟᱹᱱᱥᱤᱠ ᱦᱩᱭᱩᱜᱼᱟ ᱵᱷᱟᱹᱜᱽᱱᱟᱹ ? ᱮᱸᱜᱟᱛᱮ ᱟᱹᱵᱤᱱ ᱵᱟᱠᱷᱨᱟ ᱦᱚᱸ ᱢᱟᱹᱱᱥᱤᱠ ᱵᱤᱱ ᱛᱚ ! ᱡᱮᱢᱚᱱ ᱢᱟᱨᱟᱝ ᱚᱠᱚᱡ ᱪᱟᱹᱠᱨᱤ ᱧᱟᱢ ᱵᱤᱱ᱾

ᱢᱟᱢᱚ, ᱟᱹᱵᱤᱱ ᱦᱚᱸ᱾ ᱟᱹᱞᱤᱧ ᱫᱚ ᱢᱟᱢᱚ ᱟᱹᱞᱤᱧ ᱨᱮᱱ ᱵᱚᱸᱜᱟ ᱵᱳᱨᱳ ᱞᱤᱧ ᱵᱮᱵᱷᱟᱨᱮᱫ ᱠᱚᱣᱟ, ᱟᱫᱚ ᱦᱚᱲᱟᱜ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱟᱹᱞᱤᱧ ᱪᱮᱛᱟᱱ ᱨᱮ᱾ ᱚᱱᱟ ᱯᱟᱹᱛᱭᱟᱹᱣ ᱜᱮ ᱟᱠᱚ ᱫᱚᱭ ᱱᱤᱨᱟᱹᱭᱮᱫ ᱠᱚᱣᱟ, ᱚᱱᱟ ᱨᱮ ᱵᱚᱸᱜᱟ ᱵᱚᱩᱨᱩ ᱠᱚᱣᱟᱜ ᱢᱮᱫ ᱞᱩᱛᱩᱨ ᱫᱚ ᱦᱟᱭᱟᱢ ᱦᱟᱭᱟᱢ ᱜᱮ᱾

ᱵᱷᱟᱹᱜᱽᱱᱟᱹ ᱡᱚᱛᱚ ᱟᱹᱠᱩᱛ ᱨᱮᱭᱟᱜ ᱱᱤᱨᱟᱹᱭ ᱵᱚᱸᱜᱟ ᱵᱩᱨᱩ ᱛᱮ ᱜᱟᱱᱚᱜ ᱠᱷᱟᱱ ᱪᱮᱫ ᱟᱹᱠᱩᱛ ᱜᱮ ᱵᱟᱭ ᱛᱟᱦᱮᱸ ᱠᱚᱜᱼᱟ, ᱪᱮᱫᱟᱜ ᱥᱮ ᱥᱟᱱᱟᱢ ᱦᱚᱲ ᱜᱮᱛᱚ ᱵᱚᱸᱜᱟ ᱵᱳᱨᱳ ᱢᱟ ᱠᱚ ᱵᱟᱰᱟᱭᱟ ᱟᱨ ᱵᱚᱸᱜᱟ ᱵᱳᱨᱳ ᱠᱚ ᱫᱮᱵᱟ ᱥᱮᱵᱟᱭᱮᱫ ᱠᱚᱣᱟ᱾

ᱚᱠᱟᱨᱮ ᱢᱟᱢᱚ, ᱚᱲᱟᱜ ᱨᱮᱢᱟ ᱵᱚᱸᱜᱟ ᱜᱚᱪᱟᱨ ᱨᱮᱭᱟᱜ ᱚᱠᱛᱚ ᱜᱮ ᱚᱠᱟᱨᱮ, ᱟᱹᱠᱩᱛ ᱞᱮᱱ ᱮᱱᱟᱝ ᱜᱮᱛᱚ ᱵᱚᱸᱜᱟ ᱵᱩᱨᱩ ᱵᱚ ᱩᱭᱦᱟᱹᱨᱮᱫ ᱠᱚ᱾ ᱢᱟᱜᱽ ᱢᱟᱥ ᱯᱮᱲᱟᱜ ᱞᱮᱠᱟ ᱞᱮᱠᱷᱟ ᱨᱮᱵᱮᱱ ᱫᱮᱵᱟ ᱥᱮᱵᱟ ᱠᱚ ᱠᱷᱟᱱ ᱯᱮᱲᱟ ᱦᱚᱲ ᱪᱮᱜᱚ ᱟᱹᱵᱤᱱ ᱚᱲᱟᱜ ᱦᱮᱡ ᱠᱟᱛᱮ ᱞᱚᱴᱟ ᱫᱟᱜ ᱫᱚᱲᱚᱢ ᱠᱟᱛᱮᱭ ᱡᱚᱦᱟᱨ ᱟᱹᱵᱤᱱᱟ ?

ᱞᱮᱢᱯᱟ ᱴᱮᱯᱥᱟ ᱴᱤᱯᱥᱤ ᱨᱮ ᱵᱟᱭ ᱫᱟᱲᱮᱜ ᱞᱮᱠᱟᱭ ᱵᱩᱡᱷᱟᱹᱣ ᱠᱮᱫᱟ, ᱟᱫᱚᱭ ᱢᱮᱱ ᱜᱚᱫ ᱠᱮᱫᱟ ‘ ᱪᱟᱹᱠᱨᱤ ᱵᱟᱠᱷᱨᱟ ᱯᱩᱨᱤᱠᱷᱟ ᱥᱩᱢᱩᱝ ᱫᱚ ᱵᱟᱝ ᱵᱷᱟᱹᱜᱽᱱᱟᱹ ᱱᱚᱶᱟ ᱡᱤᱵᱚᱱ ᱥᱟᱜᱷᱟᱨ ᱨᱮ ᱥᱟᱨᱟ ᱜᱷᱟᱹᱲᱤ ᱜᱮ ᱵᱤᱱᱤᱰ ᱮᱢ ᱦᱩᱭᱩᱜᱼᱟ᱾ ᱛᱤᱱᱟᱹᱜ ᱜᱟᱱ ᱨᱮᱫᱚ ᱟᱵᱚ ᱦᱚᱸᱵᱚ ᱯᱟᱥᱚᱜᱼᱟ ᱟᱨ ᱛᱤᱱᱟᱹᱜ ᱜᱟᱱ ᱨᱮᱫᱚ ᱵᱚ ᱯᱷᱮᱞᱚᱜᱼᱟ᱾ ᱢᱩᱞ ᱨᱮᱫᱚ ᱯᱟᱹᱛᱭᱟᱹᱣ ᱟᱨ ᱟᱹᱠᱤᱞ ᱜᱮ ᱛᱟᱦᱮᱱᱟ᱾ ᱟᱯᱱᱟᱨ ᱛᱮᱜᱮ ᱵᱩᱡᱷᱟᱹᱣᱚᱜᱼᱟ ᱮᱢᱟᱱ ᱮᱢᱟᱱ ᱵᱤᱱᱤᱰ ᱫᱚ ᱯᱟᱥ ᱜᱟᱱᱚᱜᱼᱟ ᱥᱮ ᱵᱟᱝ᱾ ᱡᱟᱦᱟᱸ ᱞᱮᱠᱟᱱ ᱵᱤᱱᱤᱰ ᱜᱮ ᱦᱩᱭᱮᱱ, ᱚᱱᱟ ᱯᱟᱥ ᱞᱟᱹᱜᱤᱫ ᱞᱟᱹᱠᱛᱤᱜ ᱟᱹᱠᱤᱤᱞ ᱜᱮ ᱵᱟᱹᱱᱩᱜᱼᱟ, ᱱᱤᱡᱮᱨᱟᱜ ᱫᱟᱲᱮ ᱨᱮᱭᱟᱜ ᱯᱟᱹᱛᱭᱟᱹᱣ ᱜᱮ ᱵᱟᱹᱱᱩᱜ ᱠᱷᱟᱱ ᱟᱣᱥᱟᱱ ᱟᱣᱥᱟᱱ ᱠᱩᱠᱞᱤ ᱨᱮᱱᱟᱜ ᱞᱟᱹᱱᱟᱹᱭ ᱮᱢ ᱛᱮᱦᱚᱸ ᱩᱫᱽᱜᱟᱹᱨ ᱛᱮᱵᱮᱱ ᱦᱤᱨᱟᱹᱢ ᱜᱟᱨᱮᱢ ᱩᱛᱟᱹᱨᱚᱜᱼᱟ᱾

ᱢᱟᱢᱚ, ᱩᱱᱤ ᱠᱚᱲᱟ ᱜᱮ ᱧᱮᱞᱮ ᱵᱮᱱ ! ᱟᱞᱮ ᱟᱹᱛᱳ ᱡᱟᱠ ᱚᱞᱚᱜ ᱠᱚᱲᱟ ᱠᱩᱲᱤ ᱠᱷᱚᱱ ᱞᱟᱥᱮᱨ ᱦᱟᱛᱟᱝᱼᱟᱱ ᱠᱚᱲᱟ ᱠᱟᱱᱟᱭ᱾ ᱠᱚᱞᱮᱡᱽ ᱯᱟᱲᱦᱟᱣ ᱥᱟᱹᱛ ᱠᱟᱛᱮ ᱯᱮᱼᱯᱩᱱ ᱥᱮᱨᱢᱟ ᱦᱩᱭᱮᱱᱟ ᱪᱟᱹᱠᱨᱤ ᱵᱟᱠᱷᱨᱟ ᱵᱤᱱᱤᱰ ᱚᱞ ᱚᱞᱛᱮ ᱮᱱᱦᱚᱸ ᱠᱟᱰᱟ ᱪᱩᱯᱤ ᱢᱟ ᱵᱟᱝ ᱜᱮ ᱵᱷᱤᱰᱤ ᱪᱩᱯᱤ ᱦᱚᱸ ᱵᱟᱭ ᱥᱟᱵ ᱫᱟᱲᱮᱭᱟᱠᱟᱣᱟᱫᱼᱱᱟ᱾ ᱦᱚᱞᱟ ᱜᱮᱭ ᱞᱟᱹᱭ ᱟᱹᱞᱤᱧ ᱠᱟᱱ ᱛᱟᱦᱮᱸᱫᱚᱜ ᱢᱚᱱᱮ ᱛᱮᱫᱚ ᱟᱹᱰᱤ ᱱᱟᱯᱟᱭᱮ ᱚᱞᱮᱫᱟ ᱟᱫᱚ ᱤᱝᱞᱤᱥ ᱟᱨ ᱡᱤᱹᱠᱮᱹ ᱨᱮᱜᱮ ᱪᱮᱠᱟ ᱪᱚᱭ ᱴᱷᱟᱠᱮᱫ ᱫᱟᱨᱟᱢᱚᱜ ᱠᱟᱱᱟ, ᱫᱮᱨᱧ ᱵᱩᱪᱟᱹᱜ ᱫᱷᱟᱹᱵᱤᱡ ᱮ ᱨᱩᱸᱫᱷᱟᱹᱣᱮᱫ ᱨᱮᱦᱚᱸ ᱵᱟᱭ ᱩᱛᱩᱲ ᱫᱟᱲᱮᱭᱟᱜ ᱠᱟᱱᱟ᱾ ᱵᱤᱱᱤᱰ ᱚᱞ ᱚᱞᱛᱮᱭ ᱢᱟᱨᱮ ᱢᱟᱹᱨᱩᱲᱮᱱ ᱨᱮᱦᱚᱸ ᱯᱟᱥ ᱨᱮᱭᱟᱜ ᱠᱟᱭᱫᱟ ᱜᱮ ᱵᱟᱭ ᱪᱮᱫ ᱫᱟᱲᱮᱭᱟᱫ᱾ ᱟᱡᱟᱜ ᱢᱚᱱᱮ ᱨᱮᱜᱮ ᱤᱱᱟᱹᱜ ᱯᱟᱹᱛᱭᱟᱹᱣ ᱵᱟᱹᱱᱩᱜᱼᱟ ᱡᱮ ᱟᱨᱡᱟᱣᱟᱠᱟᱱ ᱟᱹᱠᱤᱞ ᱛᱮᱜᱮ ᱵᱤᱱᱤᱰ ᱫᱚᱭ ᱯᱟᱥ ᱫᱟᱲᱮᱭᱟᱜᱼᱟ ᱢᱮᱱᱛᱮ᱾

ᱟᱹᱞᱤᱧᱟᱜ ᱩᱭᱦᱟᱹᱨ ᱛᱮᱫᱚ ᱵᱷᱟᱹᱜᱽᱱᱟ ᱪᱟᱹᱠᱨᱤ ᱵᱟᱠᱷᱨᱟ ᱵᱤᱱᱤᱰ ᱫᱚ ᱟᱨᱡᱟᱣᱟᱠᱟᱱ ᱟᱹᱠᱤᱞ ᱵᱤᱰᱟᱹᱣ ᱵᱤᱱᱤᱰ ᱜᱮ ᱵᱟᱝᱠᱷᱟᱱ ᱢᱟ ᱦᱩᱱᱟᱹᱝ ᱟᱞᱮ ᱞᱮᱠᱟᱱ ᱢᱩᱨᱩᱠᱷ ᱚᱞᱠᱷᱚᱵᱟ ᱠᱚᱦᱚᱸ ᱠᱚ ᱞᱟᱴ ᱥᱟᱦᱮᱵᱽ ᱠᱚᱜᱼᱟ᱾

ᱟᱹᱞᱤᱧ ᱥᱮ ᱵᱚᱸᱜᱟ ᱵᱩᱨᱩ ᱛᱟᱹᱞᱤᱧ ᱟᱡ ᱥᱟᱶ ᱵᱤᱱᱤᱰ ᱚᱞ ᱵᱟᱝᱠᱚ ᱥᱮᱱᱚᱜᱼᱟ ᱥᱮ ᱠᱩᱠᱞᱤ ᱠᱚ ᱟᱡ ᱞᱟᱹᱜᱤᱫ ᱫᱚ ᱵᱷᱮᱜᱟᱨ ᱛᱮ ᱟᱣᱥᱟᱱᱟᱜ ᱢᱟ ᱵᱟᱭ ᱦᱤᱡᱩᱜ, ᱥᱟᱱᱟᱢ ᱠᱚ ᱞᱟᱹᱜᱤᱫ ᱤᱱᱟᱹ ᱠᱩᱠᱞᱤ ᱥᱟᱠᱟᱢ ᱜᱮ᱾ ᱮᱱᱦᱚᱸ ᱟᱡᱟᱜ ᱫᱟᱲᱮᱜ ᱵᱟᱝ ᱫᱟᱲᱮᱜ ᱨᱮᱭᱟᱜ ᱫᱷᱟᱫᱷᱚᱥ ᱫᱷᱩᱼᱫᱷᱩᱠ ᱛᱟᱭ ᱫᱚ ᱟᱹᱞᱤᱧᱟᱜ ᱩᱫᱽᱜᱟᱹᱣ ᱛᱮ ᱪᱷᱤᱢ ᱪᱷᱟᱹᱛᱩᱨ ᱩᱛᱟᱹᱨ ᱟᱠᱟᱱᱟ ᱟᱨ ᱢᱚᱱᱮ ᱨᱮ ᱯᱟᱹᱛᱭᱟᱹᱣ ᱦᱮᱡ ᱟᱠᱟᱣᱟᱫᱮᱭᱟ ᱡᱮ ᱫᱟᱲᱮᱭᱟᱜ ᱜᱮᱭᱟᱭ ᱢᱮᱱᱛᱮ᱾ ᱱᱤᱨᱡᱟᱞᱟ ᱠᱷᱟᱨᱥᱟᱞᱟ ᱢᱚᱱᱮ ᱛᱮ ᱵᱤᱱᱤᱰ ᱨᱮᱭ ᱰᱩᱲᱩᱵ ᱨᱮᱫᱚ ᱵᱟᱝ ᱵᱟᱝ ᱫᱟᱲᱮᱭᱟᱜ ᱠᱩᱠᱞᱤ ᱨᱮᱭᱟᱜ ᱞᱟᱹᱱᱟᱹᱭ ᱦᱚᱸ ᱵᱟᱨ ᱯᱮ ᱫᱷᱟᱣ ᱜᱟᱱ ᱫᱚ ᱜᱮᱞᱟ ᱵᱤ ᱰᱟᱹᱣ ᱜᱮ᱾

ᱚᱱᱠᱟᱱ ᱠᱚᱜᱮ ᱠᱚ ᱦᱟᱭ ᱪᱚᱜᱚᱜᱼᱟ ᱵᱷᱟᱹᱜᱽᱱᱟᱹ ᱡᱟᱦᱟᱸᱭ ᱠᱚ ᱫᱚ ᱟᱹᱠᱤᱞ ᱟᱨᱡᱟᱣ ᱠᱟᱛᱮ ᱦᱚᱸ ᱢᱩᱨᱩᱠᱷ ᱠᱚ ᱞᱮᱠᱟ ᱜᱮ ᱯᱨᱚᱵᱮᱞᱮᱢ ᱨᱮᱭᱟᱜ ᱥᱚᱞᱩᱥᱚᱱ ᱦᱚᱨ ᱰᱟᱦᱟᱨ ᱜᱮ ᱵᱟᱝᱠᱚ ᱯᱟᱸᱡᱟ ᱫᱟᱲᱮᱭᱟᱜᱼᱟ᱾ ᱟᱫᱚ ᱦᱟᱸᱰᱮ ᱱᱷᱟᱰᱮ ᱛᱟᱣᱟᱜᱼᱛᱟᱨᱠᱚ, ᱛᱟᱭᱚᱢ ᱫᱚᱠᱚ ᱢᱮᱱᱟ ᱢᱚᱞᱚᱝ ᱨᱮᱜᱮ ᱵᱟᱹᱱᱩᱜ ᱫᱚ ᱚᱠᱟ ᱠᱷᱚᱱᱮᱢ ᱧᱟᱢᱟ᱾ ᱢᱚᱞᱚᱝ ᱨᱮᱫᱚ ᱪᱮᱫ ᱚᱞ ᱟᱠᱟᱱ ᱚᱠᱚᱭᱮ ᱵᱟᱰᱟᱭ ? ᱟᱹᱞᱤᱧᱟᱜ ᱯᱟᱹᱛᱭᱟᱹᱣ ᱫᱚ ᱢᱚᱞᱚᱝ ᱨᱮᱫᱚ ᱪᱮᱫ ᱚᱞ ᱟᱠᱟᱱ ᱚᱠᱚᱭᱮ ᱵᱟᱰᱟᱭ ? ᱟᱹᱞᱤᱧᱟᱜ ᱯᱟᱹᱛᱭᱟᱹᱣ ᱫᱚ ᱢᱚᱞᱚᱝ ᱨᱮᱫᱚ ᱱᱤᱡᱮ ᱛᱮᱜᱮ ᱜᱟᱨ ᱦᱩᱭᱩᱜᱼᱟ, ᱚᱠᱟ ᱞᱮᱠᱟᱵᱮᱱ ᱜᱟᱨᱟ ᱚᱱᱠᱟᱜᱮ ᱜᱟᱨᱚᱜᱼᱟ᱾

ᱟᱡ ᱦᱚᱸᱛᱚ ᱢᱟᱢᱚ ᱚᱞᱚᱜ ᱵᱚᱸᱜᱟ ᱢᱟᱭ ᱫᱷᱩᱬᱟᱹ ᱫᱷᱩᱯᱟᱫ ᱠᱤᱱ ᱜᱮᱫᱤᱱᱟᱹᱢ ᱦᱤᱞᱚᱜ; ᱮᱱᱦᱚᱸ ᱩᱠᱩᱨ ᱟᱹᱠᱤᱞ ᱫᱚᱭ ᱟᱨᱡᱟᱣ ᱞᱮᱫᱟ ᱯᱟᱹᱛᱭᱟᱹᱣ ᱫᱚ ᱵᱟᱝ᱾ ᱟᱨ ᱟᱹᱞᱤᱧ ᱦᱚᱸ ᱩᱱᱤ ᱥᱚᱨᱚᱥᱩᱛᱤ ᱧᱩᱛᱩᱢ ᱛᱮᱜᱮ ᱱᱮᱦᱚᱨ ᱞᱤᱧ ᱢᱮᱛᱟᱫ ᱫᱮ᱾ ᱴᱷᱟᱶ ᱜᱮ ᱵᱚᱫᱚᱞᱮᱱ ᱠᱷᱟᱱ ᱯᱟᱹᱛᱭᱟᱹᱣ ᱫᱚ ᱚᱠᱟ ᱞᱮᱠᱟᱛᱮ ᱦᱮᱡ ᱟᱫᱮᱭᱟ᱾ ᱧᱮᱞ ᱠᱮᱫᱮᱭᱟᱵᱮᱱ ᱛᱤᱱᱟᱹᱜ ᱨᱟᱹᱥᱠᱟᱹ ᱥᱟᱞᱟᱜ ᱞᱟᱸᱫᱟ ᱞᱟᱸᱫᱟ ᱛᱮᱭ ᱪᱟᱞᱟᱣᱮᱱᱟ᱾

ᱦᱚᱲᱟᱜ ᱵᱷᱮᱣᱱᱟ ᱠᱟᱱᱟ ᱚᱱᱟᱫᱚ, ᱟᱹᱵᱮᱱ ᱵᱮᱱ ᱵᱟᱰᱟᱭ ᱜᱮᱭᱟ ᱢᱟᱹᱱᱥᱤᱠ ᱥᱩᱢᱩᱝ ᱛᱮᱫᱚ ᱯᱟᱥ ᱵᱟᱭ ᱜᱟᱱᱚᱜᱼᱟ ᱮᱱᱦᱚᱸ ᱥᱟᱹᱨᱤ ᱠᱟᱛᱷᱟ ᱫᱚ ᱪᱮᱫᱟᱜ ᱵᱟᱹᱵᱤᱱ ᱞᱟᱹᱭ ᱟᱫᱮᱭᱟ᱾ ᱮᱲᱮ ᱵᱮᱱ ᱨᱚᱲ ᱨᱮᱫᱚ ᱟᱹᱵᱮᱱ ᱜᱮᱵᱮᱱ ᱮᱲᱮᱜ ᱠᱟᱱᱟ᱾ ᱫᱤᱱ ᱫᱤᱱ ᱛᱮᱫᱚ ᱵᱮᱱ ᱵᱷᱩᱸᱰᱩᱞᱚᱜᱼᱟ᱾ ᱟᱨ ᱥᱟᱹᱨᱤ ᱥᱩᱛᱩᱜ ᱟᱛᱮ ᱵᱮᱱ ᱥᱮᱱᱚᱜ ᱠᱷᱟᱱ ᱦᱚᱲ ᱠᱚ ᱵᱟᱰᱟᱭ ᱵᱤᱱᱟ, ᱜᱩᱱ ᱢᱟᱱᱟᱣ ᱵᱤᱱᱟ, ᱧᱩᱛᱩᱢ ᱟᱹᱵᱮᱱᱟᱠᱚ᱾ ᱟᱫᱚ ᱟᱹᱠᱤᱞ ᱥᱩᱢᱩᱝ ᱛᱮ ᱦᱚᱸ ᱵᱟᱭ ᱜᱟᱱᱚᱜᱼᱟ, ᱵᱚᱸᱜᱟ ᱵᱩᱨᱩ ᱥᱩᱢᱩᱝ ᱛᱮᱦᱚᱸ ᱵᱟᱝ ᱜᱟᱱᱚᱜᱼᱟ ᱥᱮᱯᱟᱹᱛᱭᱟᱹᱣ ᱥᱩᱢᱩᱝ ᱛᱮᱦᱚᱸ ᱵᱟᱝ ᱜᱟᱱᱚᱜᱼᱟ᱾ ᱱᱚᱶᱟ ᱯᱮᱭᱟ ᱩᱪᱩᱫ ᱢᱤᱫ ᱫᱷᱟᱹᱲ ᱨᱮ ᱛᱟᱦᱮᱸ ᱞᱮᱱ ᱮᱱᱟᱝ ᱜᱮ ᱪᱩᱞᱷᱟᱹ ᱫᱚ ᱵᱮᱱᱟᱣ ᱜᱟᱱᱚᱜᱼᱟ ᱟᱨ ᱡᱤᱭᱚᱱ ᱥᱟᱸᱜᱷᱟᱨ ᱴᱩᱠᱩᱡ ᱵᱷᱟᱹᱜᱤ ᱥᱟᱺᱦᱤᱡ ᱫᱚᱲᱚᱢ ᱜᱟᱱᱚᱜᱼᱟ᱾

ᱢᱟᱢᱚ, ᱚᱱᱟ ᱢᱟ ᱴᱷᱤᱠ ᱜᱮ ᱟᱫᱚ ᱟᱹᱞᱤᱧᱟᱜ ᱥᱚᱝᱥᱟᱨ ᱴᱩᱠᱩᱡ ᱫᱚᱲᱚᱢ ᱞᱟᱹᱜᱤᱫ ᱟᱹᱞᱤᱧᱟᱜ ᱜᱩᱱ ᱵᱤᱨᱫᱟᱹ ᱢᱟ ᱞᱤᱧ ᱜᱩᱱᱢᱟᱹᱱ ᱜᱮ᱾ ᱟᱨ ᱡᱩᱫᱤ ᱞᱤᱧ ᱢᱮᱛᱟᱠᱚᱣᱟ ᱢᱟᱹᱱᱥᱤᱠ ᱠᱟᱛᱮ ᱛᱚ ᱪᱮᱫ ᱦᱚᱸ ᱵᱟᱝ ᱜᱟᱱᱚᱜᱼᱟ ᱮᱱᱠᱷᱟᱱ ᱵᱚᱸᱜᱟ ᱵᱩᱨᱩ ᱥᱮ ᱟᱞᱤᱧᱟᱜ ᱞᱟᱡ ᱦᱚᱸ ᱪᱮᱠᱟᱞᱤᱧ ᱯᱮᱨᱮᱡ ᱠᱮᱭᱟ᱾

ᱵᱷᱟᱹᱜᱽᱱᱟᱹ ᱦᱚᱲ ᱮᱲᱮ ᱠᱟᱛᱮ ᱪᱟᱣᱞᱮ ᱟᱞᱚᱵᱮᱱ ᱵᱟᱺᱫᱤᱭᱟ ᱵᱟᱝᱠᱷᱟᱱ ”ᱵᱟᱝ ᱯᱟᱹᱛᱭᱟᱹᱣ” ᱨᱮᱭᱟᱜ ᱱᱚᱥᱚᱢ ᱛᱮ ᱪᱟᱣᱞᱮ ᱯᱷᱩᱯᱰᱟᱹᱜᱼᱟ, ᱦᱮᱣᱮᱨᱚᱜᱼᱟ ᱟᱨ ᱵᱮᱥ ᱛᱮ ᱡᱚᱢ ᱦᱚᱸ ᱵᱟᱹᱵᱤᱱ ᱫᱟᱲᱮᱭᱟᱜᱼᱟ᱾

ᱤᱱᱟᱹᱜ ᱛᱮᱜᱮ ᱯᱮᱢᱯᱟ ᱟᱡ ᱫᱟᱹᱭ ᱢᱟᱡᱟᱱᱚᱜ ᱞᱟᱹᱜᱤᱫᱼᱮ ᱦᱚᱦᱚ ᱠᱮᱫᱟ ᱟᱫᱚ ᱜᱟᱞᱢᱟᱨᱟᱣ ᱠᱤᱱ ᱛᱷᱩᱠᱩᱢ ᱠᱮᱫ ᱛᱮ ᱚᱲᱟᱜ ᱥᱮᱫ ᱠᱤᱱ ᱵᱚᱞᱚᱭᱮᱱᱟ ᱢᱟᱢᱚᱼᱵᱷᱟᱹᱜᱽᱱᱟᱹ᱾

Written by ᱴᱷᱮᱬᱚ ᱵᱷᱚᱡᱟᱭ ᱴᱩᱰᱩ
Published on ᱯᱟᱸᱡᱟ (Nov – Dec 2015)