ᱢᱟᱜᱽ ᱵᱚᱸᱜᱟ ᱫᱚ ᱥᱮᱨᱢᱟ ᱨᱮᱭᱟᱜ ᱮᱛᱚᱦᱚᱵ ᱪᱟᱸᱫᱚ ᱠᱟᱱᱟ᱾ ᱢᱟᱜᱽ ᱟᱹᱣᱨᱤ ᱵᱚᱸᱜᱟᱜ ᱢᱮᱱᱮᱠ ᱡᱟᱦᱮᱨ ᱟᱭᱚ ᱢᱟᱨᱟᱝ ᱫᱮᱣᱟ ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱵᱩᱨᱩ ᱵᱚᱸᱜᱟ ᱟᱨ ᱥᱤᱢᱟᱹ ᱥᱟᱲᱮ ᱵᱚᱸᱜᱟ ᱵᱩᱨᱩ ᱠᱚ ᱟᱹᱣᱨᱤ ᱯᱮᱨᱮᱡ ᱩᱢᱟᱹᱲ ᱢᱟᱬᱟᱝ ᱫᱚ ᱵᱤᱨ ᱵᱩᱨᱩ ᱵᱚᱞᱚ ᱠᱟᱛᱮ ᱫᱟᱨᱮ ᱱᱟᱹᱲᱤ ᱢᱟᱜ ᱥᱟᱠᱟᱢ ᱫᱟᱹᱛᱟᱹᱱᱤ ᱛᱩᱢᱟᱹᱞ ᱡᱚᱝ ᱪᱮ ᱥᱟᱹᱣᱲᱤ ᱤᱨᱩᱜ ᱟᱨ ᱚᱲᱟᱜ ᱥᱟᱹᱲᱤᱢ ᱫᱟᱞᱚᱵ ᱫᱚ ᱵᱟᱭ ᱵᱩᱜᱤᱭᱟ᱾ ᱢᱮᱱᱟᱠᱚ ᱥᱮᱫᱟᱭ ᱦᱟᱯᱲᱟᱢ ᱠᱚ ᱥᱤᱧ ᱫᱩᱣᱟᱹᱨ ᱵᱟᱹᱧ ᱫᱩᱣᱟᱹᱨ ᱦᱚᱨ ᱛᱮ ᱟᱬᱜᱚ ᱦᱮᱡ ᱠᱟᱛᱮ ᱪᱟᱹᱭ ᱫᱤᱥᱚᱢ ᱨᱮ ᱰᱮᱨᱟ ᱰᱟᱺᱰᱤ ᱛᱤᱨᱩᱵ ᱡᱚᱝ ᱞᱟᱺᱜᱤᱫ ᱥᱮᱱᱮᱨ ᱥᱟᱹᱣᱲᱤ ᱯᱟᱺᱲ ᱪᱷᱟᱴᱟᱬ ᱢᱟᱜ ᱟᱨ ᱥᱟᱦᱟᱱ ᱥᱟᱠᱟᱢ ᱫᱟᱺᱛᱟᱺᱱᱤ ᱵᱤᱨ ᱵᱩᱨᱩ ᱠᱚ ᱵᱚᱞᱚᱱ ᱠᱟᱱ ᱚᱠᱛᱚ ᱵᱩᱨᱩ ᱥᱤᱱᱤᱡ ᱨᱮ ᱠᱩᱞ ᱜᱮ ᱪᱚᱭ ᱦᱩᱸᱠᱨᱟᱺᱜ ᱠᱟᱱ ᱞᱮᱠᱟ ᱠᱚ ᱟᱸᱡᱚᱢ ᱠᱮᱫ ᱪᱟᱢᱟᱞ ᱪᱩᱢᱩᱞ ᱪᱤᱞᱤ ᱠᱚᱪᱚ ᱠᱚ ᱜᱷᱚᱭᱞᱮ ᱮᱫ ᱠᱚ ᱞᱮᱠᱟ ᱠᱚ ᱟᱹᱭᱠᱟᱹᱣ ᱠᱮᱫ ᱠᱷᱟᱱ ᱠᱚ ᱢᱮᱱ ᱠᱮᱫ ᱟ᱾ᱫᱷᱚᱨᱟ ᱜᱮ ᱯᱟᱞᱮᱱ ᱵᱩᱨᱩ ᱨᱤᱱ ᱵᱚᱸᱜᱟ ᱵᱩᱨᱩ ᱟᱨ ᱡᱟᱦᱮᱨ ᱟᱭᱚ ᱢᱟᱨᱟᱝ ᱫᱮᱣᱟ ᱟᱨ ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱵᱟᱝ ᱫᱮᱣᱟ ᱢᱟᱬᱟᱝ ᱫᱚ ᱵᱤᱨ ᱵᱩᱨᱩ ᱵᱚᱞᱚᱱ ᱦᱚᱨ ᱵᱟᱝ ᱠᱚ ᱟᱲᱟᱜ ᱟᱵᱚᱱ ᱠᱟᱱᱟ᱾ᱟᱫᱚ ᱠᱚ ᱡᱟᱨᱣᱟ ᱢᱤᱫ ᱮᱱᱛᱮ ᱟᱪᱟᱨ ᱢᱤᱫ ᱵᱤᱪᱟᱹᱨ ᱢᱤᱫ ᱠᱮᱫ ᱟ᱾ᱵᱟᱝ ᱢᱟ ᱱᱟᱣᱟ ᱥᱮᱨᱢᱟᱭ ᱵᱚᱞᱱ ᱠᱟᱱ ᱡᱚᱦᱚᱱ ᱠᱟᱱ ᱢᱟᱜᱽ ᱵᱚᱸᱜᱟ ᱢᱩᱞᱩᱜ ᱢᱚᱬᱮ ᱢᱟᱦᱟ ᱨᱮ ᱵᱚᱸᱜᱟ ᱵᱩᱨᱩ ᱵᱚᱱ ᱯᱮᱨᱮᱡ ᱠᱚ ᱩᱢᱟᱹᱬ ᱠᱚ ᱥᱟᱶᱛᱮ ᱟᱵᱚ ᱨᱤᱱ ᱢᱚᱬᱮ ᱠᱚ ᱟᱨ ᱟᱹᱛᱩ ᱨᱮᱭᱟᱜ ᱨᱟᱭ ᱠᱚ ᱨᱤᱛ ᱠᱚ ᱟᱨ ᱱᱟᱣᱟ ᱱᱟᱜᱽᱞᱮ ᱥᱮ ᱢᱟᱨᱮ ᱱᱟᱜᱽᱞᱮ ᱠᱚᱸᱦᱚ ᱥᱟᱞᱟ ᱠᱟᱜ ᱜᱚᱴᱟ ᱠᱟᱜ ᱟ᱾ᱟᱫᱚ ᱠᱚ ᱱᱮᱰᱟ ᱠᱮᱫ ᱜᱚᱸᱰᱟ ᱠᱮᱫᱼᱟ᱾ᱱᱮᱰᱟ ᱫᱤᱱ ᱥᱮᱴᱮᱨ ᱮᱱᱟ, ᱜᱚᱰᱮᱛ ᱥᱟᱶᱛᱮ ᱡᱚᱜᱽ ᱢᱟᱺᱡᱷᱤ ᱛᱤᱠᱤᱱ ᱴᱚᱨᱚᱰᱟᱝ ᱟᱨ ᱴᱩᱢᱠᱤ ᱥᱮᱨᱦᱟ ᱟᱛᱮ ᱥᱤᱢ ᱵᱩᱥᱟᱹᱜ ᱟᱨ ᱪᱟᱣᱞᱮ ᱠᱤᱱ ᱩᱴᱷᱟᱹᱣ ᱠᱮᱜ ᱟ᱾ ᱱᱟᱭᱠᱮ ᱦᱚᱸᱭ ᱥᱟᱯᱲᱟᱣ ᱮᱱᱟ ᱟᱨ ᱟᱹᱛᱩ ᱨᱤᱱ ᱦᱚᱸᱠᱚ ᱡᱟᱨᱣᱟ ᱮᱱᱟ᱾ᱱᱟᱭᱠᱮ ᱫᱚ ᱦᱟᱴᱟᱜ ᱨᱮ ᱪᱟᱣᱞᱮ ᱡᱟᱝ, ᱠᱷᱚᱫᱮ ᱡᱟᱝ, ᱥᱩᱱᱩᱢ ᱥᱤᱸᱫᱩᱨ, ᱢᱤᱛᱷᱤ, ᱪᱚᱱᱫᱚᱱ, ᱥᱟᱠᱟᱢ, ᱦᱚᱞᱚᱝ, ᱜᱩᱨᱤᱡ ᱰᱩᱸᱵᱩᱜ, ᱥᱟᱶᱛᱮ ᱦᱟᱺᱰᱤ ᱴᱩᱠᱩᱡ ᱥᱤᱠᱣᱟᱹᱨ ᱨᱮ ᱥᱟᱡᱟᱣ ᱠᱮᱫ ᱛᱮ ᱥᱟᱹᱜᱩᱱ ᱞᱚᱴᱟ ᱫᱟᱜ ᱥᱮᱯᱮᱧ ᱠᱟᱛᱮ ᱟᱹᱛᱩ ᱦᱚᱲ ᱥᱟᱶᱛᱮ ᱢᱟᱜᱽ ᱵᱚᱸᱜᱟᱜ ᱴᱟᱺᱰᱤ ᱛᱮᱠᱚ ᱨᱮᱞᱟᱣ ᱮᱱᱟ᱾ᱥᱮᱴᱮᱨ ᱠᱟᱛᱮ ᱱᱟᱭᱠᱮ ᱫᱚ ᱵᱚᱸᱜᱟᱜ ᱴᱷᱟᱶᱨᱮ ᱜᱮᱡ ᱜᱩᱨᱤᱡ ᱠᱟᱛᱮ ᱦᱚᱞᱚᱝ ᱞᱩᱵᱩᱜ ᱛᱮ ᱯᱮ ᱜᱚᱴᱟᱝ ᱛᱷᱟᱨᱮ ᱛᱷᱟᱨ ᱮ ᱠᱷᱚᱸᱰ ᱠᱮᱫ ᱜᱮ᱾ (ᱠᱷᱚᱸᱰ ᱫᱚ ᱟᱹᱛᱩ ᱯᱤᱪᱷᱤ ᱵᱷᱮᱜᱟᱨᱚᱜ ᱟ᱾ᱚᱠᱟᱼᱚᱠᱟ ᱟᱹᱛᱩ ᱠᱚᱨᱮ ᱫᱚ ᱜᱩᱞᱟᱹᱭ ᱛᱮ ᱟᱨ ᱚᱠᱟᱼᱚᱠᱟ ᱟᱹᱛᱩ ᱠᱚᱨᱮ ᱫᱚ ᱯᱩᱱ ᱠᱚᱸᱬ ᱠᱚ ᱠᱷᱚᱸᱰ ᱟ)᱾ᱟᱫᱚ ᱠᱷᱚᱸᱰ ᱨᱮ ᱪᱟᱣᱞᱮ ᱡᱟᱝ ᱮ ᱪᱩᱨᱩᱡᱟ ᱢᱟᱬᱟᱝ ᱫᱚ ᱡᱟᱦᱮᱨ ᱟᱭᱚ, ᱛᱟᱞᱟ ᱨᱮᱭᱟᱜ ᱠᱷᱚᱸᱰ ᱨᱮ᱾ᱤᱱᱟᱹ ᱠᱟᱛᱮ ᱢᱟᱨᱟᱝ ᱵᱩᱨᱩ ᱠᱚᱸᱧᱮ ᱱᱟᱠᱷᱟ ᱥᱮᱫᱟᱜ ᱠᱷᱚᱸᱰ ᱨᱮ᱾ᱟᱨ ᱤᱱᱟᱹ ᱠᱟᱛᱮ ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱧᱩᱛᱩᱢ ᱛᱮ ᱮᱛᱚᱢ ᱱᱟᱠᱷᱟ ᱥᱮᱫᱟᱜ ᱠᱷᱚᱸᱰ ᱨᱮᱭ ᱪᱩᱨᱩᱡᱟ᱾ᱥᱤᱸᱫᱩᱨ ᱦᱚᱸ ᱚᱱᱠᱟ ᱞᱮᱠᱟ ᱜᱮ ᱡᱟᱦᱮᱨ ᱟᱭᱚ ᱴᱷᱮᱱ ᱠᱷᱚᱱ ᱮᱦᱚᱵ ᱠᱟᱛᱮ ᱯᱮᱼᱯᱮ ᱴᱤᱰᱟᱹᱜ ᱠᱟᱛᱮ ᱡᱚᱛᱚᱭ ᱴᱤᱰᱟᱹᱜ ᱤᱫᱤ ᱟᱠᱚᱣᱟ᱾ᱯᱟᱦᱩᱲ ᱫᱚ ᱦᱮᱲᱟᱜᱤᱡ ᱡᱟᱦᱮᱨ ᱟᱭᱚ ᱧᱩᱛᱩᱢ ᱛᱮ, ᱛᱟᱞᱟ ᱨᱮᱭᱟᱜ ᱠᱷᱚᱸᱰ ᱨᱮ ᱮᱛᱚᱦᱚᱵ ᱨᱮ ᱤᱱᱟᱹ ᱛᱟᱭᱚᱢ ᱢᱟᱨᱟᱝ ᱵᱩᱨᱩ ᱧᱩᱛᱩᱢ ᱛᱮ ᱯᱩᱸᱰ ᱥᱟᱺᱰᱤ ᱠᱚᱸᱭᱮ ᱱᱟᱠᱷᱟ ᱯᱟᱦᱴᱟ ᱨᱮ ᱟᱨ ᱤᱱᱟᱹ ᱛᱟᱭᱚᱢ ᱢᱚᱬᱮ ᱠᱚ ᱛᱩᱨᱩᱭ ᱠᱚ ᱧᱩᱛᱩᱢ ᱛᱮ ᱟᱨᱟᱜ ᱥᱟᱺᱰᱤ ᱮᱛᱚᱢ ᱱᱟᱠᱷᱟ ᱯᱟᱦᱴᱟ ᱨᱮ ᱠᱚ ᱵᱚᱸᱜᱟ ᱠᱚᱣᱟ᱾ᱱᱚᱣᱟ ᱦᱚᱸ ᱟᱹᱛᱩ ᱡᱟᱹᱱᱤ ᱡᱩᱫᱟᱹᱼᱡᱩᱫᱟᱹ ᱜᱮᱭᱟ᱾ᱚᱠᱟᱼᱚᱠᱟ ᱟᱹᱛᱩ ᱨᱮᱫᱚ ᱢᱟᱨᱟᱝ ᱵᱩᱨᱩ ᱧᱩᱛᱩᱢ ᱛᱮ ᱟᱨᱟᱜ ᱥᱟᱺᱰᱤ ᱠᱚ ᱵᱚᱸᱜᱟ ᱮᱭᱟ ᱟᱨ ᱢᱚᱬᱮ ᱠᱚ ᱧᱩᱛᱩᱢ ᱛᱮ ᱯᱩᱸᱰ ᱥᱤᱢ ᱠᱚ ᱵᱚᱸᱜᱟ ᱮᱫ ᱠᱚᱣᱟ᱾
ᱟᱫᱚ ᱠᱚ ᱵᱟᱠᱷᱮᱬᱟ ᱼ
“ᱡᱚᱦᱟᱨ ᱜᱚᱸᱥᱟᱭ ᱡᱟᱦᱮᱨ ᱮᱨᱟ ᱱᱮ ᱮᱱᱫᱚ ᱢᱟᱜᱽ ᱵᱚᱸᱜᱟ ᱧᱩᱛᱩᱢ ᱛᱮ ᱵᱟᱞᱮ ᱥᱤᱢ ᱵᱟᱞᱮ ᱠᱷᱚᱫᱮ ᱞᱮ ᱮᱢᱟᱢ ᱠᱟᱱ ᱪᱟᱞᱟᱢ ᱠᱟᱱ ᱥᱩᱠ ᱛᱮ ᱥᱟᱶᱟᱨ ᱛᱮ ᱟᱛᱟᱝ ᱠᱟᱜ ᱛᱮᱞᱟ ᱠᱟᱜ ᱟᱢ᱾ᱫᱮ ᱮᱱᱫᱚ ᱱᱟᱶᱟ ᱥᱮᱨᱢᱟ ᱱᱟᱶᱟ ᱱᱟᱝ ᱵᱚᱞᱚᱱ ᱠᱟᱱ ᱡᱚᱦᱚᱱ ᱠᱟᱱ ᱚᱱᱟ ᱦᱚᱸᱢ ᱥᱟᱨ ᱠᱟᱜ ᱥᱟᱹᱜᱩᱱ ᱠᱟᱜ ᱟ᱾ᱫᱮᱥ ᱨᱮ ᱫᱤᱥᱚᱢ ᱨᱮ ᱢᱟᱛᱠᱚᱢ ᱠᱚ ᱥᱟᱨᱡᱚᱢ ᱠᱚ ᱜᱮᱞᱮ ᱠᱚᱜ, ᱵᱟᱦᱟ ᱠᱚᱜ ᱢᱟ᱾ᱵᱤᱨ ᱨᱮ ᱵᱩᱨᱩ ᱨᱮ ᱥᱟᱹᱣᱲᱤ ᱭᱟᱞᱮ ᱥᱟᱜᱟᱜᱽ ᱟᱞᱮ ᱥᱟᱦᱟᱱ ᱟᱞᱮ ᱥᱟᱠᱟᱢ ᱟᱞᱮ ᱠᱟᱹᱲᱢᱤ ᱠᱩᱲᱤ ᱜᱩᱛᱨᱩᱫ ᱥᱮᱛᱟ ᱦᱟᱠ ᱠᱟᱠᱚ ᱫᱟᱢᱟᱱ ᱠᱟᱠᱚ ᱣᱟᱢ᱾ᱞᱚᱴᱚ ᱡᱟᱹᱱᱩᱢ ᱠᱟᱲᱠᱮ ᱡᱟᱹᱱᱩᱢ ᱞᱟᱲ ᱠᱚ ᱞᱮᱧ ᱠᱚ ᱛᱮᱱ ᱠᱟᱠᱚ ᱞᱮᱱ ᱠᱟᱠᱚ ᱟᱢ᱾ᱟᱹᱛᱩ ᱨᱮ ᱢᱟᱦᱬᱟ ᱨᱮ ᱨᱚᱜᱟᱜ ᱵᱤᱜᱷᱤᱱᱟᱜ ᱟᱞᱚᱢ ᱵᱚᱞᱚ ᱚᱪᱚᱭ ᱥᱚᱲᱚ ᱚᱪᱚᱭᱟ᱾ᱵᱟᱹᱨᱤ ᱠᱚ ᱵᱟᱹᱬᱦᱤ ᱠᱚ ᱧᱮᱞ ᱫᱟᱨᱟᱢ ᱧᱮᱫ ᱫᱟᱨᱟᱢ ᱠᱟᱠᱚ ᱟᱢ᱾ᱦᱮᱞᱮᱱ ᱨᱮ ᱛᱟᱸᱦᱮᱱ ᱨᱮ ᱱᱟᱭ ᱜᱮ ᱱᱟᱯᱟᱭ ᱜᱮ ᱥᱟᱨ ᱠᱟᱜ ᱥᱟᱹᱜᱩᱱ ᱠᱟᱜ ᱟᱢ᱾ᱡᱟᱨᱜᱮ ᱫᱟᱜ ᱡᱟᱹᱲᱤ ᱫᱟᱜ ᱠᱚ ᱦᱚᱭ ᱟᱹᱜᱩ ᱪᱟᱯᱮ ᱟᱹᱜᱩᱭᱟᱢ᱾ᱡᱤᱣᱤ ᱨᱮ ᱦᱚᱲᱢᱚ ᱨᱮ ᱱᱟᱣᱟ ᱫᱟᱲᱮ ᱱᱟᱣᱟ ᱨᱟᱹᱥᱠᱟᱹ ᱪᱟᱨᱦᱮ ᱠᱟᱜ ᱥᱟᱨᱦᱮ ᱠᱟᱜ ᱟᱢ ᱜᱚᱸᱥᱟᱭᱼ ᱡᱚᱦᱟᱨ᱾”
ᱵᱚᱸᱜᱟ ᱠᱚᱫᱚ ᱡᱟᱦᱮᱨ ᱮᱨᱟ ᱢᱟᱨᱟᱝ ᱵᱩᱨᱩ ᱞᱤᱴᱟᱹ ᱢᱚᱬᱮ ᱠᱚ ᱥᱤᱢᱟᱹ ᱥᱟᱲᱮ ᱡᱟᱸᱦᱟ ᱜᱮ ᱢᱮᱱᱟᱜ ᱟᱠᱟᱫ ᱠᱚᱣᱟ᱾ ᱵᱚᱸᱜᱟ ᱵᱩᱨᱩ ᱠᱚ ᱯᱮᱨᱮᱡ ᱠᱮᱫ ᱩᱢᱟᱹᱬ ᱠᱮᱫ ᱥᱮ ᱢᱩᱪᱟᱹᱫ ᱠᱮᱫ ᱛᱚᱯᱟᱜ ᱠᱮᱫ ᱠᱷᱟᱱ ᱟᱫᱚ ᱵᱚᱦᱚᱜ ᱡᱤᱞ ᱫᱚ ᱱᱟᱭᱠᱮ ᱞᱟᱹᱜᱤᱫ ᱠᱚ ᱥᱚᱲᱮᱭᱟ ᱟᱨ ᱵᱟᱝ ᱠᱷᱟᱱ ᱥᱟᱨᱡᱚᱢ ᱥᱟᱠᱟᱢ ᱨᱮ ᱠᱷᱚᱸᱰ ᱥᱟᱨᱮᱡ ᱦᱚᱞᱚᱝ ᱥᱟᱶ ᱠᱚ ᱪᱟᱨᱯᱟ ᱠᱮᱫ ᱜᱮ᱾ᱟᱨ ᱜᱟᱺᱰᱭᱟᱹ ᱛᱮᱫ ᱫᱚ ᱜᱮᱫ ᱠᱩᱴᱤ ᱵᱟᱲᱟ ᱠᱟᱛᱮ ᱱᱟᱭᱠᱮ ᱡᱩᱲᱩ ᱠᱚ ᱮᱢᱟᱭ ᱛᱮ ᱥᱟᱨᱮᱡ ᱡᱤᱞ ᱫᱚ ᱟᱹᱛᱩ ᱦᱚᱲ ᱠᱚ ᱩᱴᱷᱟᱹᱣ ᱟᱠᱟᱫ ᱪᱟᱣᱞᱮ ᱥᱟᱶ ᱠᱚ ᱥᱚᱲᱮ ᱢᱤᱫ ᱠᱮᱫ ᱜᱮ᱾ ᱮᱱ ᱠᱟᱛᱮ ᱟᱹᱛᱩ ᱦᱚᱲ ᱠᱚ ᱫᱩᱲᱩᱵ ᱢᱤᱫ ᱵᱮᱴᱷᱟᱨ ᱢᱤᱫ ᱠᱟᱛᱮ ᱟᱪᱟᱨ ᱢᱤᱫ ᱵᱤᱪᱟᱹᱨ ᱢᱤᱫ ᱠᱟᱛᱮ ᱠᱟᱛᱷᱟ ᱠᱚ ᱜᱚᱞᱟᱴ ᱛᱮ ᱨᱟᱭ ᱠᱚ ᱛᱚᱞᱟ ᱵᱟᱝᱢᱟ ᱱᱟᱣᱟ ᱱᱟᱜᱽᱞᱮ ᱥᱮ ᱢᱟᱨᱮ ᱱᱟᱜᱽᱞᱮ, ᱱᱟᱣᱟ ᱦᱟᱴᱟᱜ ᱥᱮ ᱢᱟᱨᱮ ᱦᱟᱴᱟᱜ ᱢᱮᱱᱛᱮ᱾ ᱠᱚᱲᱟ ᱠᱟᱹᱢᱤ, ᱠᱩᱲᱤ ᱠᱟᱹᱢᱤ, ᱠᱟᱰᱟ ᱱᱟᱦᱮᱞ, ᱰᱟᱸᱜᱽᱨᱟ ᱱᱟᱦᱮᱞ, ᱨᱮᱭᱟᱜ ᱠᱩᱲᱟᱹᱭ, ᱡᱤᱞ ᱠᱚ ᱦᱟᱹᱠᱩ ᱠᱚ ᱨᱮᱭᱟᱜ ᱫᱚᱨ ᱫᱟᱢ, ᱠᱟᱢᱟᱨ ᱠᱚᱣᱟᱜ ᱫᱟᱜ ᱫᱩᱞᱤᱡ ᱥᱮ ᱫᱷᱟᱺᱭ ᱵᱩᱲᱦᱤ ᱭᱟᱜ ᱵᱚᱨᱛᱚᱱ ᱦᱩᱲᱩ ᱱᱟᱭᱠᱮ ᱢᱟᱹᱱ ᱦᱩᱲᱩ, ᱢᱟᱹᱡᱷᱤ ᱢᱟᱹᱱ ᱦᱩᱲᱩ ᱟᱨ ᱦᱚᱸ ᱮᱢᱟᱱᱼᱮᱢᱟᱱ ᱛᱮᱭᱜ ᱠᱚ ᱜᱟᱞᱚᱪ ᱜᱚᱴᱟᱭᱟ᱾ᱢᱟᱨᱮ ᱱᱟᱜᱽᱞᱮ ᱥᱮ ᱢᱟᱨᱮ ᱦᱟᱴᱟᱜ ᱠᱷᱟᱱ ᱠᱚ ᱢᱮᱱᱟ ᱱᱚᱣᱟ ᱢᱟᱲᱟᱝ ᱥᱮᱨᱢᱟ ᱚᱠᱟ ᱠᱚ ᱜᱚᱞᱟᱴ ᱟᱠᱟᱫ ᱚᱱᱟ ᱫᱟᱢ ᱚᱱᱟ ᱫᱚᱨ ᱟᱨ ᱚᱱᱟ ᱠᱩᱲᱟᱹᱭ ᱜᱮ ᱛᱟᱸᱦᱮᱱᱟ ᱟᱨ ᱟᱹᱛᱩ ᱨᱤᱱ ᱢᱚᱬᱮ ᱠᱚᱸᱦᱚ ᱤᱱᱠᱩ ᱜᱮ ᱢᱮᱱᱮᱠ ᱢᱟᱺᱡᱷᱤ, ᱡᱚᱜᱽ ᱢᱟᱺᱡᱷᱤ, ᱯᱟᱹᱨᱟᱹᱱᱤᱠ, ᱱᱟᱭᱠᱮ,ᱟᱨ ᱜᱚᱰᱮᱛ ᱠᱚᱸᱦᱚ ᱵᱟᱝ ᱠᱚ ᱵᱚᱫᱚᱞᱚᱜ ᱟ᱾ᱟᱨ ᱱᱟᱣᱟ ᱱᱟᱜᱽᱞᱮ ᱠᱷᱟᱱ ᱠᱚ ᱱᱟᱣᱟ ᱟᱹᱨᱩᱭᱟ ᱟᱹᱛᱩ ᱨᱮᱭᱟᱜ ᱠᱟᱹᱢᱤ ᱠᱩᱲᱟᱹᱭ, ᱡᱤᱞ ᱦᱟᱹᱠᱩ ᱨᱮᱭᱟᱜ ᱫᱚᱨ ᱫᱟᱢ, ᱠᱟᱢᱟᱨ, ᱫᱟᱜ ᱫᱩᱞᱤᱡᱟᱜ ᱵᱚᱨᱛᱚᱱ ᱦᱩᱲᱩ, ᱟᱨ ᱠᱟᱰᱟ ᱱᱟᱦᱮᱞ ᱰᱟᱸᱜᱽᱨᱟ ᱱᱟᱦᱮᱞ ᱠᱟᱹᱢᱤ ᱠᱩᱲᱟᱹᱭ ᱠᱚ ᱚᱠᱟᱼᱚᱠᱟ ᱱᱟᱣᱟ ᱟᱹᱨᱩ ᱞᱟᱹᱠᱛᱤᱜ ᱟ, ᱚᱱᱟᱼᱚᱱᱟ ᱠᱚ ᱱᱟᱣᱟ ᱟᱹᱨᱩᱭᱟ᱾ᱟᱨ ᱞᱟᱹᱠᱛᱤ ᱯᱟᱲᱟᱜ ᱠᱷᱟᱱ ᱢᱚᱬᱮ ᱠᱚᱸᱦᱚ ᱚᱠᱚᱭᱼᱚᱠᱚᱭ ᱠᱚ ᱱᱟᱣᱟ ᱟᱹᱨᱩ ᱠᱚᱣᱟ᱾ᱟᱫᱚ ᱥᱟᱱᱟᱢ ᱞᱮᱠᱟᱱᱟᱜ ᱫᱚᱨ ᱠᱚ ᱫᱟᱢ ᱠᱚ ᱠᱩᱲᱟᱹᱭ ᱠᱚ ᱨᱟᱭ ᱠᱚ ᱨᱤᱛ ᱠᱚ ᱜᱟᱞᱚᱪ ᱢᱤᱫ ᱜᱚᱴᱟ ᱢᱤᱫ ᱠᱮᱫ ᱠᱷᱟᱱ ᱟᱫᱚ ᱥᱟᱹᱣᱲᱤ ᱠᱚ ᱤᱨᱟ᱾ ᱚᱱᱟ ᱥᱟᱹᱣᱲᱤ ᱫᱚ ᱥᱟᱜᱟᱲ ᱨᱮᱠᱚ ᱵᱷᱟᱹᱨᱤ ᱠᱮᱜᱼᱟ᱾ ᱢᱮᱱ ᱟᱠᱚ ᱚᱱᱟ ᱥᱟᱹᱣᱲᱤ ᱫᱚ ᱟᱹᱛᱩ ᱨᱤᱱ ᱥᱟᱱᱟᱢ ᱨᱮᱸᱜᱮᱡ ᱚᱨᱮᱡ ᱠᱚ ᱦᱟᱹᱴᱤᱧ ᱡᱚᱝ ᱛᱮ ᱥᱟᱹᱣᱲᱤ ᱚᱲᱟᱜ ᱫᱟᱞᱚᱵ ᱡᱚᱦᱚᱱ ᱠᱚ ᱫᱟᱞᱚᱵ ᱢᱮᱥᱟᱭᱟ᱾ ᱚᱱᱟ ᱞᱟᱹᱜᱤᱫ ᱠᱚ ᱫᱟᱞᱚᱵ ᱢᱮᱥᱟᱭᱟ ᱡᱮᱢᱚᱱ ᱚᱲᱟᱜ ᱨᱮ ᱨᱚᱜᱽ, ᱵᱤᱜᱷᱤᱱ, ᱨᱩᱣᱟᱹᱜ, ᱦᱟᱹᱥᱩ, ᱯᱤᱲᱲᱟᱹ, ᱯᱷᱟᱸᱰᱟ ᱠᱚ ᱵᱟᱭ ᱡᱟᱜ ᱧᱟᱢ ᱠᱚᱣᱟ ᱥᱮ ᱴᱷᱮᱨ, ᱵᱚᱡᱚᱨ ᱦᱚᱸ ᱚᱱᱟ ᱚᱲᱟᱜ ᱨᱮ ᱫᱚ ᱵᱟᱭ ᱧᱩᱨᱩᱜᱼᱟ ᱱᱚᱣᱟ ᱫᱚ ᱮᱱᱟᱝ ᱠᱷᱚᱱ ᱜᱮ ᱦᱟᱯᱲᱟᱢ ᱠᱚᱣᱟᱜ ᱯᱟᱛᱭᱟᱹᱣ ᱢᱮᱱᱟᱜ ᱛᱮ ᱱᱤᱛ ᱦᱚᱸ ᱟᱵᱚ ᱦᱚᱸ ᱵᱚᱱ ᱯᱟᱹᱛᱭᱟᱹᱣ ᱟᱠᱟᱣᱟᱫᱼᱟ᱾ᱟᱫᱚ ᱥᱟᱜᱟᱲ ᱡᱚᱲᱟᱣ ᱞᱟᱹᱜᱤᱫ ᱟᱲᱟᱜ ᱞᱮᱫ ᱠᱚ ᱰᱟᱸᱜᱽᱨᱟ ᱠᱟᱰᱟ ᱟᱹᱜᱼᱜᱩ ᱠᱚ ᱪᱟᱞᱟᱣ ᱮᱱᱟ ᱢᱮᱱ ᱠᱷᱟᱱ ᱜᱚᱴᱟ ᱯᱟᱲᱟ ᱴᱟᱺᱰᱤ ᱨᱮ ᱴᱤᱠᱚᱨ ᱨᱮ ᱚᱲᱟᱜ ᱨᱮ ᱵᱤᱨ ᱨᱮ ᱵᱩᱨᱩ ᱨᱮ ᱠᱚ ᱯᱟᱱᱛᱮ ᱠᱮᱫ ᱠᱚ ᱨᱮ ᱦᱚᱸ ᱵᱟᱝ ᱠᱚ ᱧᱟᱢ ᱫᱟᱲᱮᱭᱟᱫ ᱨᱮ ᱠᱚ ᱵᱟᱰᱟᱭ ᱠᱮᱫᱼᱟ ᱵᱟᱝᱢᱟ ᱰᱟᱺᱜᱽᱨᱤ, ᱠᱟᱰᱟ ᱫᱚ ᱚᱠᱟ ᱥᱮᱫ ᱪᱚ ᱠᱚ ᱧᱤᱨ ᱟᱠᱟᱱᱟ ᱵᱟᱠᱚ ᱧᱟᱢᱚᱜ ᱠᱟᱱᱟ ᱟᱨ ᱱᱚᱛᱮ ᱵᱮᱲᱟ ᱦᱚᱸᱭ ᱦᱟᱹᱥᱩᱨ ᱤᱫᱤᱜ ᱠᱟᱱᱟ ᱩᱱ ᱨᱮ ᱪᱮᱫ ᱵᱟᱝ ᱠᱚ ᱪᱤᱠᱟᱹᱭ, ᱵᱷᱟᱞᱟ ᱪᱮᱠᱟ ᱛᱮᱠᱚ ᱧᱟᱢ ᱠᱚᱣᱟ! ᱥᱟᱹᱨᱤ ᱜᱮ ᱩᱱᱠᱩ ᱫᱚᱠᱚ ᱧᱤᱨ ᱞᱮᱱ ᱛᱟᱸᱦᱮ ᱠᱟᱱ ᱜᱮᱭᱟ᱾ᱞᱟᱹᱭ ᱟᱠᱚ ᱡᱟᱣ ᱫᱚ ᱚᱱ ᱫᱷᱚᱱ ᱩᱨᱩᱱ ᱯᱩᱨᱩᱱ ᱠᱚ ᱛᱟᱸᱦᱮ ᱠᱟᱱᱛᱮ ᱚᱲᱟᱜᱼᱚᱲᱟᱜ ᱰᱟᱺᱜᱽᱨᱤ ᱠᱟᱰᱟ ᱢᱮᱨᱚᱢ ᱵᱷᱤᱰᱤ ᱥᱤᱢ ᱥᱩᱠᱨᱤ ᱥᱟᱜᱟᱞᱼᱥᱟᱜᱟᱞ ᱠᱚ ᱛᱟᱸᱦᱮ ᱠᱟᱱᱟ᱾ᱟᱫᱚ ᱠᱤᱥᱟᱺᱬ ᱮᱨᱟ ᱠᱟᱹᱲᱢᱤ ᱠᱩᱲᱤ ᱜᱚᱲᱟ ᱡᱚᱡᱚᱜ ᱜᱩᱨᱤᱡ ᱜᱤᱰᱤ ᱠᱚ ᱟᱹᱲᱤᱥᱚᱜ ᱛᱮ ᱜᱩᱨᱤᱡ ᱠᱚᱫᱚ ᱜᱚᱲᱟ ᱨᱮᱭᱟᱜ ᱢᱤᱫ ᱠᱚᱬ ᱥᱮᱫ ᱨᱮᱠᱚ ᱯᱩᱸᱡᱤ ᱜᱤᱰᱤ ᱠᱟᱜᱼᱟ᱾ ᱨᱟᱹᱜᱤᱛᱮ ᱡᱚᱱᱚᱜ ᱢᱩᱴᱷᱤ ᱠᱚᱛᱮ ᱠᱚ ᱫᱟᱞ ᱠᱮᱫ ᱠᱚᱣᱟ, ᱡᱚᱢᱟᱜ ᱠᱚᱨᱮ ᱦᱚᱸᱠᱚ ᱴᱟᱱ ᱴᱩᱱ ᱠᱮᱫ ᱠᱚᱣᱟ ᱵᱟᱹᱲᱛᱤ ᱟᱞᱚ ᱠᱚ ᱤᱡᱽ ᱢᱟ ᱢᱮᱱᱛᱮ᱾ ᱠᱤᱸᱥᱟᱺᱬ ᱠᱚ ᱟᱨ ᱜᱩᱛᱤ ᱠᱚᱲᱟ ᱠᱚᱦᱚᱸ ᱜᱩᱨᱤᱡ ᱠᱚᱨᱮ ᱵᱩᱨᱩᱢ ᱠᱟᱛᱮ ᱠᱚ ᱚᱡᱽᱨᱟ ᱠᱚᱜ ᱨᱮᱦᱚᱸ ᱵᱟᱝ ᱠᱚ ᱟᱹᱨᱩᱵ ᱯᱷᱟᱨᱪᱟ ᱜᱟᱥᱟᱣ ᱯᱷᱟᱨᱪᱟ ᱞᱮᱫ ᱠᱚ ᱛᱟᱸᱦᱮ ᱠᱟᱱᱟ᱾ᱜᱚᱲᱟ ᱨᱮᱜᱮ ᱠᱚ ᱛᱦᱩ ᱞᱮᱫ ᱠᱷᱟᱨᱟᱜ ᱞᱮᱫ ᱛᱟᱸᱦᱮ ᱠᱟᱱᱛᱮ ᱵᱩᱜᱤ ᱛᱮᱠᱚ ᱡᱟᱹᱨᱰᱤ ᱞᱮᱫ ᱛᱤᱡᱩ ᱞᱮᱫ ᱠᱚ ᱛᱟᱸᱦᱮ ᱠᱟᱱᱟ᱾ ᱟᱫᱚ ᱚᱱᱟ ᱟᱹᱲᱤᱥ ᱠᱟᱺᱦᱤᱥ ᱛᱮᱜᱮ ᱰᱟᱺᱜᱽᱨᱤ ᱫᱚ ᱥᱤᱧ ᱵᱤᱨ ᱥᱟᱨᱟᱣᱱᱟ ᱠᱟᱫᱟᱢ ᱵᱩᱴᱟᱹ ᱛᱮᱠᱚ ᱧᱤᱨ ᱮᱱᱟ ᱟᱨ ᱠᱟᱰᱟ ᱫᱚ ᱢᱟᱱ ᱵᱤᱨ ᱢᱚᱬᱫᱟ ᱡᱷᱟᱨᱱᱟ ᱛᱮᱠᱚ ᱧᱤᱨ ᱮᱱᱟ᱾ ᱰᱟᱺᱜᱽᱨᱤ ᱠᱟᱰᱟ ᱵᱟᱝ ᱠᱚ ᱧᱟᱢ ᱞᱮᱫ ᱠᱚ ᱠᱷᱟᱱ ᱠᱚ ᱢᱮᱱ ᱠᱮᱫᱼᱟ ᱟᱵᱚ ᱦᱚᱲ ᱜᱮᱵᱚᱱ ᱚᱨ ᱤᱫᱤᱭᱟ᱾ᱟᱫᱚ ᱚᱱᱟ ᱵᱷᱟᱹᱨᱤ ᱞᱮᱱ ᱥᱟᱜᱟᱲ ᱜᱟᱹᱰᱤ ᱠᱷᱚᱱ ᱟᱸᱬᱜᱚ ᱠᱟᱛᱮ ᱟᱨ ᱦᱚᱸ ᱢᱚᱬᱮ ᱜᱚᱴᱟᱝ ᱥᱟᱜᱟᱲ ᱨᱮᱠᱚ ᱩᱪᱟᱹᱲ ᱠᱮᱫ ᱛᱮ, ᱢᱚᱬᱮ ᱡᱚᱲ ᱟᱨ ᱢᱚᱬᱮ ᱜᱚᱴᱟᱝ ᱰᱟᱺᱜᱽᱣᱟᱹ ᱠᱚᱲᱟ ᱜᱤᱫᱽᱨᱟᱹ ᱠᱚ ᱧᱟᱢ ᱠᱚᱛᱮ ᱢᱤᱼᱢᱤᱫ ᱜᱚᱴᱟᱝ ᱥᱟᱜᱟᱲ ᱜᱟᱹᱰᱤ ᱨᱮ ᱯᱮᱼᱯᱮ ᱦᱚᱲ ᱠᱟᱛᱮ ᱠᱚ ᱦᱟᱹᱴᱤᱧ ᱠᱚᱣᱟ᱾ᱵᱟᱼᱵᱟᱨ ᱦᱚᱲ ᱠᱟᱛᱮ ᱫᱚ ᱚᱜᱼᱚᱨ ᱠᱚ, ᱟᱨ ᱩᱱᱠᱩ ᱢᱤᱼᱢᱤᱫ ᱦᱚᱲ ᱢᱤᱼᱢᱤᱫ ᱥᱟᱜᱟᱲ ᱛᱟᱭᱚᱢ ᱨᱮᱫᱚ ᱥᱟᱜᱟᱲ ᱞᱟᱜᱼᱜᱟ ᱠᱚ ᱛᱟᱦᱮᱱᱟ᱾ᱟᱫᱚ ᱠᱚ ᱚᱨ ᱤᱫᱤᱭᱟ ᱟᱫᱚ ᱵᱷᱟᱹᱨᱤ ᱵᱚᱡᱷᱟ ᱩᱱᱟᱹᱜ ᱦᱟᱢᱟᱞᱟ ᱵᱤᱱ ᱥᱩᱱᱩᱢᱟᱜ ᱥᱟᱜᱟᱲ ᱞᱮᱠᱟ ᱱᱚᱝᱠᱟ ᱥᱟᱰᱮᱭᱟ, ᱰᱟᱸᱜᱽᱨᱟ ᱜᱟ,ᱰᱤ ᱫᱚ ᱠᱤᱬᱤᱡ ᱠᱚᱸᱬᱚᱡᱼᱠᱤᱬᱤᱡ ᱠᱚᱸᱬᱚᱡ ᱟᱨ ᱠᱟᱰᱟ ᱜᱟᱹᱰᱤ ᱫᱚ ᱦᱚᱸᱫᱽᱨᱟᱝᱼᱦᱚᱸᱫᱽᱨᱟᱝ᱾ ᱚᱱᱟ ᱵᱷᱟᱹᱨᱤ ᱵᱚᱡᱷᱟ ᱥᱟᱜᱟᱲ ᱫᱚ ᱮᱛᱚᱦᱚᱵ ᱥᱮ ᱢᱟᱬᱟᱝ ᱩᱛᱟᱹᱨ ᱫᱚ ᱡᱟᱦᱮᱨ ᱨᱮ ᱵᱚᱸᱜᱟ ᱵᱩᱨᱩ ᱠᱚ ᱛᱷᱟᱯᱚᱱ ᱟᱠᱟᱱ ᱩᱱᱠᱩ ᱠᱚ ᱤᱫᱤ ᱟᱠᱚᱣᱟ ᱵᱟᱝ ᱢᱟ ᱟᱯᱮ ᱠᱚ ᱥᱟᱹᱠᱷᱤ ᱠᱟᱛᱮ ᱥᱚᱵᱷᱟ ᱠᱟᱛᱮ ᱜᱮ ᱠᱟᱛᱷᱟ ᱢᱤᱫ ᱜᱚᱞᱟᱴ ᱢᱤᱫ ᱨᱟᱭ ᱠᱚᱞᱮ ᱵᱷᱟᱹᱨᱤ ᱟᱹᱜᱩ ᱥᱟᱜᱟᱲ ᱟᱹᱜᱩ ᱥᱮᱴᱮᱨ ᱟᱯᱮ ᱥᱚᱯᱨᱚᱛ ᱟᱯᱮ ᱠᱟᱱᱟ᱾ᱟᱨ ᱟᱞᱮ ᱦᱚᱸ ᱜᱟᱞᱚᱪ ᱜᱚᱴᱟ ᱟᱠᱟᱫ ᱨᱟᱭ ᱠᱚ ᱨᱤᱛ ᱠᱚ ᱢᱟᱱᱟᱣ ᱵᱟᱛᱟᱣ ᱠᱟᱛᱮ ᱞᱮ ᱛᱟᱸᱦᱮᱱᱟ᱾ᱤᱱᱟᱹ ᱠᱟᱛᱮ ᱫᱚᱥᱟᱨ ᱵᱷᱟᱹᱨᱤ ᱵᱚᱡᱷᱟ ᱥᱟᱜᱟᱲ ᱫᱚ ᱢᱟᱺᱡᱷᱤ ᱚᱲᱟᱜ ᱠᱚ ᱤᱫᱤᱭᱟ ᱨᱟᱭ ᱟᱠᱟᱱ ᱨᱤᱛ ᱟᱠᱷᱟᱱ ᱜᱚᱞᱟᱴ ᱠᱟᱛᱷᱟ ᱠᱚ ᱪᱟᱞ ᱟᱭᱟ ᱥᱚᱯᱨᱚᱛ ᱟᱭᱟ᱾ᱤᱱᱟᱹ ᱛᱟᱭᱚᱢ ᱛᱮᱥᱟᱨᱟᱜ ᱵᱷᱟᱹᱨᱤ ᱵᱚᱡᱷᱟ ᱥᱟᱜᱟᱲ ᱫᱚ ᱵᱤᱪᱟᱹᱨᱤᱭᱟᱹ ᱯᱩᱨᱩᱫᱷᱩᱞ ᱯᱟᱹᱨᱟᱹᱱᱤᱠᱟᱜ ᱚᱲᱟᱜ ᱛᱮᱠᱚ ᱤᱫᱤᱭᱟ᱾ᱥᱟᱞᱟ ᱜᱚᱴᱟ ᱟᱠᱟᱫ ᱨᱟᱭ ᱨᱤᱛ ᱠᱟᱛᱷᱟ ᱠᱚ ᱪᱟᱞ ᱟᱭ ᱥᱚᱯᱨᱚᱛ ᱟᱭᱟ᱾ᱤᱱᱟᱹ ᱛᱟᱭᱚᱢ ᱯᱩᱱᱟᱜ ᱵᱷᱟᱹᱨᱤ ᱵᱚᱡᱷᱟ ᱥᱟᱜᱟᱲ ᱫᱚ ᱟᱹᱛᱩ ᱦᱚᱲ ᱛᱮ ᱥᱟᱵ ᱛᱟᱞᱟ ᱢᱮᱬᱦᱮᱫ ᱨᱮᱭᱟᱜ ᱥᱟᱵ ᱫᱟᱵ ᱠᱟᱹᱢᱤ ᱦᱚᱲ ᱠᱟᱢᱟᱨ ᱚᱲᱟᱜ ᱠᱚ ᱤᱫᱤᱭᱟ ᱟᱨ ᱠᱚ ᱥᱚᱯᱨᱚᱛ ᱟᱭᱟ, ᱩᱱᱤ ᱦᱚᱸ ᱚᱱᱟ ᱵᱷᱟᱹᱨᱤ ᱵᱚᱡᱷᱟ ᱥᱮ ᱨᱟᱭ ᱟᱠᱟᱱ ᱨᱤᱛ ᱟᱠᱟᱱ ᱠᱟᱛᱷᱟ ᱠᱚᱭ ᱟᱛᱟᱝ ᱫᱟᱨᱟᱢ ᱛᱮᱞᱟ ᱫᱟᱨᱟᱢᱼᱟ᱾ᱟᱨ ᱢᱩᱪᱟᱹᱫ ᱩᱛᱟᱹᱨ ᱥᱮ ᱢᱚᱬᱮᱭᱟᱜ ᱵᱷᱟᱹᱨᱤ ᱵᱚᱡᱷᱟ ᱥᱟᱜᱟᱲ ᱫᱚ ᱡᱟᱱᱟᱢᱚᱜ ᱨᱮ ᱦᱟᱹᱨ ᱦᱟᱞᱟᱝᱤᱡ ᱫᱷᱟᱺᱭ ᱵᱩᱰᱷᱤ ᱥᱮ ᱫᱟᱜ ᱫᱩᱞᱤᱡ ᱚᱲᱟᱜ ᱠᱚ ᱤᱫᱤᱭᱟ᱾ᱟᱫᱚ ᱩᱱᱤ ᱦᱚᱸ ᱚᱱᱟ ᱜᱚᱞᱟᱴ ᱟᱠᱟᱱ ᱨᱟᱭ ᱠᱚ ᱨᱤᱛ ᱠᱚ ᱢᱟᱹᱱ ᱥᱟᱛᱞᱟᱜ ᱮ ᱟᱛᱟᱝ ᱫᱟᱨᱟᱢ ᱛᱮᱞᱟ ᱫᱟᱨᱟᱢ ᱟ ᱟᱨ ᱢᱟᱱᱚᱛ ᱠᱟᱛᱮᱭ ᱛᱟᱸᱦᱮᱱᱟ᱾ᱚᱱᱟ ᱵᱷᱟᱹᱨᱤ ᱵᱚᱡᱷᱟ ᱥᱟᱜᱟᱲ ᱠᱚ ᱥᱮᱴᱮᱨ ᱵᱟᱲᱟ ᱠᱟᱛᱮ ᱩᱱᱠᱩ ᱥᱮᱜ ᱴᱮᱨ ᱦᱚᱲ ᱫᱚ ᱟᱨ ᱦᱚᱸ ᱫᱚᱲᱦᱟ ᱢᱟᱜᱽ ᱵᱚᱸᱜᱟ ᱴᱟᱺᱰᱤ ᱛᱮᱠᱚ ᱨᱩᱣᱟᱹᱲᱟ᱾ ᱱᱟᱭᱠᱮ ᱤᱥᱤᱱ ᱟᱠᱟᱱ ᱥᱚᱲᱮ ᱥᱮ ᱵᱚᱦᱚᱜ ᱪᱟᱨᱯᱟ ᱞᱟᱫ ᱮ ᱡᱚᱢ ᱠᱮᱫ ᱠᱷᱟᱱ ᱟᱹᱛᱩ ᱜᱟᱶᱞᱟ ᱦᱚᱸ ᱠᱚ ᱡᱚᱢ ᱠᱮᱫ ᱜᱮ᱾ ᱥᱟᱱᱟᱢ ᱦᱚᱲ ᱠᱚ ᱡᱚᱢ ᱯᱩᱨᱟᱹᱣ ᱠᱮᱫ ᱠᱷᱟᱱ ᱱᱟᱭᱠᱮ ᱫᱚ ᱞᱚᱴᱟ ᱨᱮᱭᱟᱜ ᱫᱟᱜ ᱛᱮ ᱵᱚᱸᱜᱟ ᱟᱠᱟᱫ ᱴᱷᱟᱸᱣ ᱟᱨ ᱡᱚᱢ ᱟᱠᱟᱫ ᱴᱷᱟᱸᱣ ᱥᱮ ᱢᱟᱜᱽ ᱵᱚᱸᱜᱟ ᱴᱟᱺᱰᱤ ᱤᱨᱪᱤ ᱠᱟᱛᱮᱭ ᱡᱟᱹᱛᱤ ᱛᱟᱞᱟ ᱠᱟᱜᱼᱟ᱾ᱮᱱ ᱠᱟᱛᱮ ᱥᱟᱱᱟᱢᱟᱜ ᱥᱟᱯᱟᱵ ᱥᱟᱢᱴᱟᱣ ᱠᱟᱛᱮ ᱥᱟᱵ ᱠᱟᱛᱮ ᱟᱨ ᱦᱚᱸ ᱱᱟᱭᱠᱮ ᱫᱚ ᱚᱲᱟᱜ ᱛᱮᱠᱚ ᱟᱹᱭᱩᱨ ᱟᱹᱜᱩ ᱥᱮᱴᱮᱨ ᱦᱚᱴᱚ ᱠᱟᱭᱟ᱾
Written by ᱫᱩᱨᱜᱟᱹ ᱯᱨᱚᱥᱟᱫᱽ ᱢᱩᱨᱢᱩ
Published on Arsi (ᱢᱟᱜᱽ – ᱪᱟᱹᱛ, 2014)
ᱢᱚᱱᱮ ᱨᱮᱭᱟᱜ ᱠᱟᱛᱷᱟ ᱯᱷᱚᱴᱮᱞ ᱥᱚᱫᱚᱨ ᱢᱮ !