ᱢᱟᱹᱱᱢᱤᱭᱟᱜ ᱥᱟᱹᱜᱟᱹᱭ ᱵᱚᱸᱜᱟ ᱵᱩᱨᱩ ᱥᱟᱶ ᱫᱚ ᱟᱹᱰᱤ ᱜᱟᱹᱦᱤᱨᱟ᱾ ᱟᱠᱚ ᱵᱟᱝᱠᱷᱟᱱ ᱟᱵᱚᱣᱟᱜ ᱫᱚ ᱚᱠᱟ ᱠᱟᱹᱢᱤ ᱦᱚᱸ ᱵᱟᱭ ᱥᱩᱜᱩᱲᱚᱜ ᱞᱮᱠᱟᱱ ᱯᱟᱹᱛᱭᱟᱹᱣ ᱢᱮᱱᱟᱜ ᱛᱮ ᱚᱠᱛᱚ ᱡᱟᱹᱱᱤ ᱟᱠᱚ ᱫᱚᱵᱚ ᱢᱟᱱᱟᱣ ᱵᱟᱛᱟᱣ ᱠᱚᱣᱟ᱾ ᱟᱵᱚ ᱠᱷᱮᱨᱣᱟᱲ ᱡᱟᱹᱛᱤ ᱵᱤᱨᱟᱹᱫᱽ ᱨᱮᱭᱟᱜ ᱱᱮᱣ ᱱᱮᱢᱟᱪᱟᱨ, ᱟᱪᱟᱨ ᱵᱤᱪᱟᱹᱨ ᱠᱚᱫᱚ ᱵᱚᱸᱜᱟ ᱵᱳᱨᱳ ᱠᱚ ᱥᱟᱞᱟᱜ ᱜᱟᱯᱟᱞ ᱢᱟᱨᱟᱣ ᱠᱟᱛᱮ ᱛᱚᱞ ᱟᱠᱟᱱᱟ᱾ ᱟᱹᱛᱩ ᱫᱤᱥᱚᱢ ᱦᱚᱸ ᱵᱚᱸᱜᱟ ᱵᱩᱨᱩ ᱠᱚ ᱥᱟᱹᱠᱷᱤ ᱥᱚᱵᱷᱟ ᱠᱟᱛᱮ ᱜᱮ ᱛᱮᱸᱜᱮᱱ ᱛᱤᱸᱜᱩ ᱟᱠᱟᱱᱟ᱾ ᱚᱱᱟᱛᱮ ᱮᱴᱟᱜ ᱡᱟᱹᱛᱤ ᱥᱟᱶᱛᱟ ᱠᱚᱨᱮ ᱠᱷᱚᱱ ᱟᱵᱚ ᱠᱷᱮᱨᱣᱟᱲ ᱠᱚᱣᱟᱜ ᱫᱚ ᱢᱟᱹᱱ ᱟᱹᱰᱤ ᱪᱮᱛᱟᱱ ᱨᱮ ᱢᱮᱱᱟᱜᱼᱟ᱾ ᱥᱮᱫᱟᱭ ᱠᱷᱚᱱᱟᱜ ᱜᱮ ᱨᱟᱭᱨᱤᱛ ᱪᱮ ᱵᱤᱪᱟᱹᱨ ᱟᱪᱟᱨ ᱠᱚᱦᱚᱸ ᱡᱚᱛᱷᱟᱛᱟᱱ ᱜᱮᱭᱟ᱾ ᱟᱵᱚᱣᱟᱜ ᱠᱟᱢᱠᱟᱡᱽ ᱠᱚᱨᱮ ᱫᱚ ᱮᱴᱟᱜ ᱥᱟᱶᱛᱟ ᱨᱤᱱ ᱦᱚᱲ ᱫᱚ ᱵᱟᱵᱚ ᱞᱚᱲᱟ ᱠᱚᱣᱟ, ᱟᱵᱚ ᱟᱵᱚ ᱛᱮᱜᱮ ᱵᱚ ᱛᱚᱨᱟᱣᱟ᱾ ᱡᱮᱢᱚᱱ ᱵᱟᱵᱽᱬᱮ, ᱱᱟᱹᱯᱤᱛ, ᱫᱷᱚᱵᱟ ᱠᱚ᱾ ᱵᱚᱸᱜᱟ ᱫᱚ ᱵᱟᱸᱵᱽᱬᱮ ᱮᱱᱟᱝ ᱜᱮ ᱢᱟᱱᱟᱣ ᱵᱟᱛᱟᱣ ᱦᱩᱭ ᱫᱟᱲᱮᱭᱟᱜᱼᱟ, ᱚᱱᱠᱟᱱ ᱠᱩᱪᱤᱛ ᱩᱭᱦᱟᱨᱹ ᱫᱚ ᱟᱵᱚᱣᱟᱜ ᱵᱟᱹᱱᱩᱜᱼᱟ᱾ ᱛᱚᱵᱮ ᱛᱤᱱᱟᱹᱜ ᱜᱟᱱ ᱠᱟᱹᱢᱤ ᱨᱮ ᱵᱟᱸᱵᱽᱬᱮ ᱞᱮᱠᱟ ᱱᱟᱭᱠᱮ ᱵᱚ ᱞᱟᱜᱟᱣ ᱮ ᱠᱟᱱ ᱨᱮᱦᱚᱸ ᱚᱸᱰᱮ ᱟᱵᱚᱣᱟᱜ ᱛᱟᱸᱦᱮᱱ ᱠᱟᱱᱟ ᱡᱟᱹᱛᱤᱭᱟᱹᱨᱤ ᱡᱩᱢᱤᱫ᱾ ᱩᱱᱤ ᱫᱚ ᱟᱹᱛᱩ ᱯᱟᱦᱴᱟ ᱠᱷᱚᱱ ᱵᱚᱸᱜᱟ ᱠᱚᱭ ᱯᱮᱨᱮᱡ ᱩᱢᱟᱹᱬ ᱠᱚᱣᱟ᱾ ᱟᱹᱛᱩ ᱦᱚᱲ ᱜᱮ ᱩᱱᱤ ᱫᱚ ᱵᱚᱸᱜᱟ ᱦᱚᱛᱮᱛᱮᱠᱚ ᱥᱟᱵ ᱠᱟᱭᱟ᱾
ᱥᱮᱫᱟᱭ ᱦᱟᱯᱲᱟᱢ ᱠᱚ ᱛᱚᱞ ᱟᱠᱟᱫ ᱡᱟᱹᱛᱤ ᱥᱟᱶᱛᱟ ᱨᱮ ᱡᱚᱛᱚ ᱦᱚᱲ ᱥᱟᱢᱴᱟᱣ ᱥᱟᱺᱦᱤᱡ ᱛᱟᱸᱦᱮᱱ ᱠᱷᱟᱱ ᱚᱱᱟ ᱥᱮᱫᱟᱭ ᱠᱚ ᱛᱚᱞ ᱞᱮᱫ ᱨᱟᱭᱨᱤᱛ ᱵᱟᱧᱪᱟᱣ ᱠᱟᱛᱮ ᱫᱚᱦᱚ ᱦᱩᱭ ᱟᱵᱚᱱᱟ᱾ ᱡᱟᱦᱟᱸ ᱛᱤᱱᱟᱹᱜ ᱜᱮ ᱡᱩᱜᱽ ᱵᱚᱫᱚᱞᱚᱜ ᱟᱨ ᱵᱟᱝ ᱥᱚᱥᱱᱚᱜ ᱦᱚᱨᱮ ᱢᱟᱲᱟᱝ ᱤᱫᱤᱜ ᱨᱮᱦᱚᱸ ᱟᱹᱜᱤᱞ ᱦᱟᱯᱲᱟᱢ ᱠᱚᱣᱟᱜ ᱛᱚᱞ ᱟᱹᱜᱩ ᱟᱠᱟᱫ ᱨᱟᱭᱨᱤᱛ ᱠᱚᱫᱚ ᱵᱟᱧᱪᱟᱣ ᱫᱚᱦᱚ ᱛᱮᱜᱮ ᱦᱩᱭ ᱟᱵᱚᱱᱟ ᱟᱨ ᱵᱟᱝᱠᱷᱟᱱ ᱵᱚ ᱟᱫ ᱪᱟᱵᱟᱜᱼᱟ᱾ ᱠᱷᱮᱨᱣᱟᱲ ᱦᱚᱯᱚᱱᱟᱜ ᱢᱩᱬ ᱩᱯᱨᱩᱢ ᱫᱚ ᱟᱡᱟᱜ ᱠᱚᱨᱚᱢ ᱫᱷᱚᱨᱚᱢ ᱨᱮᱜᱮ ᱵᱟᱧᱪᱟᱣ ᱢᱮᱱᱟᱜᱼᱟ᱾ ᱡᱮᱢᱚᱱ ᱵᱤᱱᱛᱤ, ᱵᱟᱠᱷᱮᱬ, ᱥᱮᱨᱮᱧ, ᱚᱦᱬᱮ ᱮᱢᱟᱱ ᱠᱚᱛᱮ᱾ ᱱᱚᱶᱟ ᱠᱚᱛᱮ ᱜᱮ ᱩᱯᱨᱩᱢ ᱛᱟᱵᱚ ᱫᱚ ᱟᱨ ᱱᱚᱶᱟ ᱵᱚ ᱟᱫ ᱞᱮᱠᱷᱟᱱ ᱟᱵᱚ ᱵᱷᱤᱛᱤᱨ ᱨᱮ ᱡᱟᱦᱟᱸ ᱥᱤᱵᱤᱞ ᱥᱟᱹᱜᱟᱹᱭ ᱢᱮᱱᱟᱜᱼᱟ, ᱚᱱᱟ ᱫᱚ ᱢᱟᱞᱚᱴᱚᱜᱼᱟ᱾ ᱡᱩᱜᱽ ᱡᱩᱜᱽ ᱠᱷᱚᱱ ᱛᱟᱦᱮᱸ ᱦᱮᱡ ᱟᱠᱟᱱᱟᱜ ᱟᱫᱚᱜᱼᱟ ᱟᱨ ᱟᱵᱚ ᱫᱚᱵᱚ ᱢᱮᱱᱚᱜᱚᱜᱼᱟ ᱡᱟᱹᱛᱤᱭᱟᱹᱨᱤ ᱩᱨᱩᱢ ᱥᱮᱫ ᱛᱮᱫᱚ ᱠᱟᱝᱜᱟᱲ᱾ ᱚᱠᱟ ᱥᱮᱫ ᱛᱮᱦᱚᱸ ᱵᱟᱝ ᱦᱚᱲ ᱫᱟᱲᱮᱭᱟᱠᱟᱦᱟᱫ ᱦᱚᱯᱚᱱ ᱞᱮᱠᱟ ᱡᱚᱛᱚᱣᱟᱜ ᱵᱩᱰᱟᱹᱣ ᱠᱟᱛᱮ ᱡᱤᱭᱚᱱ ᱫᱚ ᱛᱟᱸᱮᱦᱱᱟ ᱦᱟᱞᱮ ᱰᱟᱞᱮ ᱨᱮ᱾
ᱥᱤᱨᱡᱚᱱ ᱴᱷᱟᱹᱠᱩᱨ ᱡᱮᱜᱮ ᱡᱤᱣᱤ ᱵᱟᱠᱷᱨᱟ ᱵᱟᱨᱭᱟ ᱦᱚᱨᱮ ᱵᱮᱱᱟᱣ ᱟᱠᱟᱜᱼᱟ᱾ ᱢᱤᱫᱴᱟᱹᱝ ᱦᱚᱨ ᱫᱚ ᱫᱷᱟᱹᱨᱛᱤᱯᱩᱨᱤ ᱛᱮ ᱟᱬᱜᱚᱱ ᱡᱮᱠᱷᱟ ᱟᱨ ᱢᱤᱫᱴᱟᱹᱝ ᱫᱚ ᱫᱷᱟᱹᱨᱛᱤᱯᱩᱨᱤ ᱠᱷᱚᱱ ᱨᱩᱣᱟᱹᱲ ᱡᱮᱠᱷᱟ᱾ ᱚᱠᱛᱚ ᱡᱟᱹᱱᱤᱡ ᱚᱠᱚᱭᱟᱜ ᱚᱠᱟ ᱵᱮᱲᱟ ᱨᱮ ᱫᱷᱟᱹᱨᱛᱤᱯᱩᱨᱤ ᱛᱮ ᱟᱬᱜᱚᱱ ᱦᱚᱨ ᱛᱮ ᱟᱬᱜᱚᱱᱟ ᱟᱨ ᱚᱠᱛᱚ ᱡᱟᱹᱱᱤ ᱜᱮ ᱨᱩᱣᱟᱹᱲ ᱦᱚᱨᱟ ᱛᱮ ᱨᱩᱣᱟᱹᱲ ᱦᱩᱭ ᱟᱭᱟ᱾ ᱱᱚᱶᱟ ᱚᱠᱛᱚ ᱵᱷᱤᱛᱨᱤ ᱨᱮ ᱢᱟᱱᱶᱟ ᱟᱡᱟᱜ ᱠᱚᱨᱚᱢ ᱫᱷᱚᱨᱚᱢ ᱡᱚᱛᱚ ᱠᱟᱹᱢᱤ ᱛᱮ ᱦᱩᱭ ᱟᱭᱟ᱾ ᱚᱠᱚᱭ ᱚᱠᱟ ᱠᱟᱹᱢᱤ ᱨᱮᱱᱟᱜ ᱢᱮᱱᱟᱜ ᱛᱟᱟ ᱚᱱᱟ ᱠᱚ ᱡᱚᱛᱚ ᱢᱤᱫᱼᱢᱤᱫ ᱛᱮ ᱠᱟᱹᱢᱤ ᱦᱩᱭ ᱟᱭᱟ᱾ ᱚᱠᱚᱭ ᱫᱚ ᱵᱩᱜᱤ ᱞᱟᱹᱜᱤᱫ ᱮ ᱠᱟᱹᱢᱤ ᱠᱟᱱᱟ ᱟᱨ ᱚᱠᱚᱭ ᱫᱚ ᱵᱟᱹᱲᱤᱡ ᱦᱚᱸᱭ ᱠᱟᱹᱢᱤ ᱠᱟᱱ ᱜᱮᱭᱟ᱾ ᱚᱠᱚᱭ ᱠᱚᱫᱚ ᱡᱟᱹᱛᱤ ᱥᱟᱶᱛᱟ ᱥᱩᱥᱟᱹᱨ ᱞᱟᱹᱜᱤᱫ ᱟᱨ ᱚᱠᱚᱭ ᱠᱚᱫᱚ ᱡᱟᱹᱛᱤ ᱥᱟᱶᱛᱟ ᱵᱟᱹᱲᱤᱡ ᱞᱟᱹᱜᱤᱫ᱾ ᱛᱚᱵᱮ ᱱᱚᱶᱟ ᱠᱚ ᱛᱟᱞᱟ ᱨᱮ ᱟᱵᱚ ᱠᱷᱮᱨᱣᱟᱲ ᱡᱟᱹᱛᱤ ᱫᱚ ᱟᱡᱟᱜ ᱠᱚᱨᱚᱢ ᱫᱷᱚᱨᱚᱢ ᱫᱚ ᱵᱟᱧᱪᱟᱣ ᱫᱚᱦᱚ ᱞᱟᱹᱜᱤᱫ ᱜᱷᱟᱱᱮ ᱜᱮ ᱨᱤᱠᱟᱹᱭᱟ᱾ ᱱᱤᱛ ᱦᱚᱸ ᱟᱵᱚ ᱥᱟᱶᱛᱟ ᱵᱟᱧᱪᱟᱣ ᱞᱟᱹᱜᱤᱫ ᱢᱟᱹᱡᱷᱤ ᱢᱟᱯᱟᱹᱡᱷᱤ ᱦᱚᱨᱟ ᱢᱮᱱᱟᱜ ᱜᱮᱭᱟ᱾ ᱛᱚᱵᱮ ᱛᱮᱦᱮᱧ ᱢᱤᱫ ᱦᱩᱰᱤᱧ ᱦᱩᱰᱤᱧ ᱡᱤᱱᱤᱥ ᱠᱚᱵᱚ ᱦᱤᱲᱤᱧ ᱤᱫᱤ ᱞᱮᱠᱷᱟᱱ ᱟᱵᱚᱣᱟᱜ ᱩᱯᱨᱩᱢ ᱠᱷᱟᱴᱚ ᱜᱚᱫᱚᱜ ᱜᱮᱭᱟ᱾ ᱚᱱᱟᱛᱮ ᱛᱮᱦᱮᱧ ᱟᱵᱚ ᱥᱟᱶᱛᱟ ᱨᱮ ᱥᱟᱥᱟᱝ ᱨᱮᱱᱟᱜ ᱞᱚᱲᱟ ᱤᱫᱤ ᱠᱟᱛᱮ ᱞᱟᱹᱭ ᱥᱚᱫᱚᱨᱚᱜ ᱠᱟᱱᱟ᱾ ᱚᱱᱟ ᱫᱚ ᱟᱵᱚ ᱟᱹᱛᱩ ᱢᱚᱬᱮ ᱦᱚᱲ ᱟᱱᱛᱮ ᱫᱚ ᱯᱮ ᱫᱷᱟᱣ ᱥᱟᱥᱟᱝ ᱵᱚ ᱵᱟᱪᱷᱟᱣᱟ ᱟᱨ ᱵᱚ ᱚᱡᱚᱜ ᱟᱭᱟ ᱢᱟᱱᱣᱟ ᱞᱮᱠᱟᱛᱮ ᱱᱚᱸᱰᱮ ᱡᱟᱱᱟᱢ ᱦᱟᱛᱟᱣ ᱤᱡ᱾ ᱢᱤᱫ ᱫᱚ ᱡᱟᱱᱟᱢᱚᱜ ᱡᱷᱚᱜ, ᱫᱚᱥᱟᱨ ᱫᱚ ᱵᱟᱯᱞᱟ ᱡᱷᱚᱜ ᱟᱨ ᱛᱮᱥᱟᱨ ᱫᱚ ᱜᱚᱡ ᱠᱟᱛᱮ᱾
ᱥᱟᱥᱟᱝ ᱫᱚ ᱱᱤᱨᱚᱲᱟ ᱟᱨ ᱥᱟᱨᱪᱷᱟ ᱡᱤᱱᱤᱥ ᱠᱟᱱᱟ᱾ ᱚᱱᱟᱛᱮ ᱦᱟᱯᱲᱟᱢ ᱠᱚ ᱥᱟᱥᱟᱝ ᱵᱮᱰᱟ ᱨᱮ ᱡᱟᱹᱛᱤ ᱠᱚ ᱦᱟᱹᱴᱤᱧ ᱟᱫ ᱵᱚᱱᱟ ᱟᱨ ᱥᱟᱥᱟᱝ ᱛᱮᱠᱚ ᱡᱟᱹᱛᱤ ᱛᱟᱞᱟ ᱞᱮᱫ ᱵᱚᱱᱟ᱾ ᱜᱤᱫᱽᱨᱟᱹ ᱡᱟᱱᱟᱢᱮᱱ ᱛᱟᱭᱚᱢ ᱡᱟᱹᱛᱤ ᱥᱟᱶᱛᱟ ᱛᱮ ᱟᱹᱩᱨ ᱟᱹᱜᱩᱭᱮ ᱞᱟᱹᱜᱤᱱ ᱛᱮ ᱟᱹᱛᱩ ᱢᱚᱲᱮ ᱦᱚᱲ ᱟᱡ ᱞᱟᱹᱜᱤᱱ ᱯᱮᱭᱟ ᱥᱚᱡᱦᱮ ᱱᱤᱨᱲᱟᱹ ᱥᱟᱥᱟᱝ ᱠᱚ ᱵᱟᱪᱦᱟᱣᱟ ᱟᱨ ᱚᱱᱟ ᱨᱤᱫ ᱠᱟᱛᱮ ᱠᱚ ᱚᱡᱚᱜ ᱮᱭᱟ ᱟᱨ ᱥᱟᱥᱟᱝ ᱫᱟᱜ ᱛᱮᱠᱚ ᱩᱢ ᱟᱹᱨᱩᱵ ᱮᱭᱟ᱾ ᱩᱱᱡᱷᱚᱜ ᱩᱛᱟᱹᱨ ᱩᱱᱤ ᱱᱟᱶᱟ ᱦᱮᱡ ᱟᱠᱟᱱ ᱜᱤᱫᱽᱨᱟᱹ ᱫᱚ ᱱᱚᱶᱟ ᱥᱟᱶᱛᱟ ᱨᱮᱠᱚ ᱞᱮᱠᱷᱟᱭᱮᱱᱟ᱾
ᱚᱱᱠᱟ ᱜᱮ ᱩᱱᱤ ᱜᱤᱫᱽᱨᱟᱹ ᱡᱚᱠᱷᱚᱱᱮ ᱦᱟᱨᱟ ᱤᱫᱤᱜᱼᱟ ᱟᱨ ᱟᱡᱟᱜ ᱡᱩᱣᱟᱹᱱ ᱦᱚᱨᱟ ᱞᱮᱵᱮᱫ ᱛᱤᱭᱩᱜ ᱞᱮᱠᱷᱟᱱ ᱟᱡ ᱛᱮ ᱟᱡ ᱮ ᱛᱤᱸᱜᱩ ᱠᱮᱴᱮᱡᱚᱜᱼᱟ ᱩᱱ ᱨᱮ ᱟᱡ ᱛᱩᱞᱩᱡ ᱡᱩᱨᱤ ᱡᱚᱛᱟᱜ ᱮ ᱩᱲᱩᱜᱟ᱾ ᱩᱱᱡᱷᱚᱜ ᱟᱨ ᱢᱤᱫ ᱥᱟᱶᱛᱟ ᱛᱮ ᱵᱚᱞᱚᱱᱟᱭ᱾ ᱚᱱᱟ ᱵᱮᱲᱟ ᱦᱚᱸ ᱟᱹᱛᱩ ᱢᱚᱲᱮ ᱦᱚᱲ ᱟᱱᱛᱮ ᱜᱮ ᱥᱟᱥᱟᱝ ᱨᱮᱭᱟᱜ ᱞᱚᱲᱟ ᱢᱮᱱᱟᱜᱼᱟ᱾ ᱟᱹᱠᱤᱱᱼᱟᱹᱠᱤᱱ ᱛᱮ ᱧᱟᱯᱟᱢ ᱵᱟᱯᱞᱟ ᱨᱮ ᱟᱨᱵᱟᱝ ᱚᱲᱟᱜ ᱦᱚᱲ ᱠᱩᱥᱤ ᱠᱩᱯᱩᱥᱤ ᱠᱟᱛᱮ ᱵᱟᱯᱞᱟᱜ ᱨᱮ ᱥᱟᱥᱟᱝ ᱫᱚ ᱞᱟᱹᱠᱛᱤᱭᱟᱱ ᱜᱮᱭᱟ᱾ ᱱᱶᱚᱟ ᱡᱷᱚᱜ ᱦᱚᱸ ᱯᱮᱟ ᱥᱚᱡᱷᱮ ᱱᱤᱨᱲᱟᱹ ᱥᱟᱥᱟᱝ ᱠᱚ ᱵᱟᱪᱷᱟᱣᱟ ᱟᱨ ᱯᱟᱱᱛᱮ ᱛᱮ ᱫᱩᱲᱩᱵ ᱢᱤᱫ ᱠᱟᱛᱮ ᱠᱚ ᱚᱡᱚᱜ ᱡᱟᱯᱟᱜ ᱠᱤᱱᱟ᱾ ᱩᱱᱡᱷᱚᱜ ᱠᱷᱚᱱ ᱩᱛᱟᱹᱨ ᱩᱱᱠᱤᱱ ᱫᱚ ᱡᱩᱨᱤ ᱡᱚᱛᱟ ᱠᱟᱱᱟ ᱠᱤᱱ ᱢᱮᱱᱛᱮ ᱵᱚᱸᱜᱟ ᱵᱳᱨᱳ ᱠᱚ ᱥᱟᱹᱠᱭᱟᱹᱛ ᱟᱹᱠᱤᱱᱟ᱾
ᱢᱟᱹᱱᱢᱤ ᱡᱟᱱᱟᱢ ᱠᱟᱛᱮ ᱟᱡᱟᱜ ᱡᱤᱣᱤᱫ ᱡᱤᱵᱚᱱ ᱨᱮ ᱠᱟᱢᱠᱟᱡᱽ, ᱠᱚᱨᱚᱢ ᱫᱷᱚᱨᱚᱢ ᱛᱚᱨᱟᱣ ᱤᱫᱤ ᱛᱮ ᱚᱠᱛᱚ ᱞᱟᱦᱟ ᱤᱫᱤᱜᱼᱟ ᱟᱨ ᱟᱡᱟᱜ ᱢᱩᱪᱟᱹᱫᱚᱜ ᱚᱠᱛᱚ ᱥᱮᱴᱮᱨᱚᱜᱼᱟ᱾ ᱩᱱᱡᱷᱚᱜ ᱥᱤᱨᱡᱚᱱ ᱴᱷᱟᱹᱠᱩᱨᱟᱜ ᱨᱩᱣᱟᱹᱲ ᱦᱚᱨᱛᱮ ᱨᱩᱣᱟᱹᱲ ᱦᱩᱭ ᱟᱭᱟ᱾ ᱛᱟᱭᱚᱢ ᱮᱠᱮᱱ ᱦᱚᱲᱢᱚᱭ ᱵᱟᱹᱜᱤ ᱚᱴᱚᱣᱟᱜᱼᱟ᱾ ᱩᱱᱡᱷᱚᱜ ᱦᱚᱸ ᱟᱹᱛᱩ ᱢᱚᱲᱮ ᱟᱱᱛᱮ ᱥᱟᱥᱟᱝ ᱫᱟᱜ ᱛᱮᱠᱚ ᱟᱵ ᱟᱹᱨᱩᱵ ᱮᱭᱟ᱾ ᱛᱚᱵᱮ ᱮᱱᱟᱝ ᱟᱡᱟᱜ ᱡᱤᱣᱤ ᱥᱩᱠ ᱱᱤᱨᱟᱹ ᱛᱮ ᱦᱟᱱᱟᱯᱩᱨᱤ ᱨᱮ ᱛᱟᱸᱦᱮᱱᱟ ᱢᱮᱱᱛᱮ ᱦᱟᱯᱲᱟᱢ ᱠᱚᱠᱚ ᱞᱟᱹᱭ ᱟᱹᱜᱩ ᱟᱠᱟᱜᱼᱟ᱾
ᱱᱚᱜᱼᱚᱭ ᱱᱚᱝᱠᱟᱱ ᱱᱮᱣ ᱱᱮᱢᱟᱪᱟᱨ ᱠᱚ ᱠᱷᱮᱨᱣᱟᱲ ᱥᱟᱶᱛᱟ ᱨᱮ ᱢᱮᱱᱟᱜ ᱟᱹᱜᱩ ᱟᱠᱟᱫ ᱛᱮ ᱱᱤᱛ ᱦᱚᱸ ᱫᱷᱟᱹᱨᱛᱤ ᱡᱟᱠᱟᱛ ᱨᱮ ᱟᱵᱚ ᱢᱤᱫ ᱨᱮ ᱡᱩᱢᱤᱫ ᱜᱮ ᱢᱮᱱᱟᱜ ᱟᱠᱟᱫ ᱵᱚᱱᱟ᱾ ᱱᱚᱶᱟ ᱠᱚᱵᱚ ᱦᱤᱲᱤᱧ ᱮᱨᱮᱧ ᱞᱮᱠᱷᱟᱱ ᱟᱵᱚᱣᱟᱜ ᱡᱟᱹᱛᱤ ᱥᱟᱶᱛᱟ ᱟᱫᱚᱜᱼᱟ ᱛᱟᱭᱚᱢ ᱫᱚ ᱟᱵᱚ ᱦᱚᱸᱵᱚ ᱟᱫᱚᱜᱼᱟ᱾
Written by ᱦᱟᱡᱟᱢ ᱵᱟᱥᱠᱮ, ᱵᱟᱨᱤᱯᱟᱫᱟ
Published on ᱡᱩᱢᱤᱫ, ᱒᱐᱑᱗ᱼ᱒᱐᱑᱘
ᱢᱚᱱᱮ ᱨᱮᱭᱟᱜ ᱠᱟᱛᱷᱟ ᱯᱷᱚᱴᱮᱞ ᱥᱚᱫᱚᱨ ᱢᱮ !