ᱠᱟᱹᱯᱤ ᱰᱩᱸᱜᱽᱨᱤ

ᱟᱹᱰᱤ ᱥᱮᱫᱟᱭ ᱨᱮᱭᱟᱜ ᱠᱟᱛᱷᱟ ᱠᱟᱱᱟ᱾ ᱡᱟᱦᱟᱸ ᱫᱚ ᱯᱟᱞᱮ ᱥᱚᱛ ᱡᱩᱜᱽ ᱫᱷᱟᱨᱟ ᱫᱷᱟᱹᱨᱤ ᱦᱚᱸ ᱦᱩᱭ ᱫᱟᱲᱮᱭᱟᱜᱼᱟ᱾ ᱠᱟᱛᱷᱟ ᱨᱮᱭᱟᱜ ᱜᱷᱚᱴᱚᱱ ᱠᱚ ᱠᱚᱨᱮ ᱠᱷᱚᱱ ᱵᱟᱰᱟᱭ ᱧᱟᱢᱚᱜ ᱠᱟᱱᱟ, ᱡᱮ ᱚᱱᱟ ᱚᱠᱛᱚ ᱫᱚ ᱦᱚᱲ ᱥᱟᱶ ᱵᱚᱸᱜᱟ ᱵᱳᱨᱳ ᱠᱚ ᱧᱮᱯᱮᱞ ᱨᱚᱯᱚᱲ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱟᱵᱚ ᱦᱚᱲ ᱦᱚᱯᱚᱱ ᱠᱚ ᱜᱟᱝ ᱱᱟᱹᱭ ᱯᱟᱨᱚᱢ ᱠᱟᱛᱮ ᱫᱚᱠᱷᱤᱱ ᱢᱚᱦᱰᱟ ᱠᱚ ᱨᱮᱞᱟᱣ ᱪᱟᱞᱟᱣᱮᱱᱟ᱾ ᱚᱱᱟ ᱚᱠᱛᱚ ᱨᱮ ᱡᱟᱸᱦᱟᱭ ᱡᱟᱦᱟᱸ ᱴᱷᱟᱶᱼᱮ ᱠᱩᱥᱤᱭᱟᱫᱼᱟ ᱚᱱᱟ ᱠᱚᱨᱮ ᱜᱮ, ᱟᱹᱛᱩ ᱪᱤᱭᱟᱹ ᱠᱟᱛᱮ ᱥᱟᱨ ᱥᱟᱹᱜᱩᱱ ᱠᱟᱛᱮ ᱟᱹᱛᱩ ᱛᱚ ᱛᱮᱸᱜᱮᱱ ᱵᱮᱨᱮᱫ ᱠᱮᱫᱼᱟ᱾ ᱟᱨ ᱟᱠᱚᱣᱟᱜ ᱟᱹᱯᱟᱹᱥᱩᱞ ᱨᱮᱭᱟᱜ ᱠᱟᱹᱢᱤ ᱦᱚᱨᱟ ᱵᱤᱨ ᱵᱩᱨᱩ ᱠᱚ ᱢᱟᱜ ᱴᱟᱺᱰᱤ ᱠᱟᱛᱮ ᱠᱚ ᱵᱟᱹᱫ ᱠᱷᱮᱛ ᱠᱚ ᱵᱮᱱᱟᱣ ᱟᱱᱟ᱾ ᱚᱱᱠᱟᱼᱚᱱᱠᱟ ᱛᱮᱜᱮ ᱱᱤᱛᱚᱜ ᱯᱷᱩᱨᱜᱟᱹᱞ ᱥᱤᱧᱚᱛ ᱫᱤᱥᱚᱢ ᱨᱮ ᱟᱵᱚ ᱦᱚᱲ ᱦᱚᱯᱚᱱ ᱠᱚ ᱩᱰᱤᱥᱟ ᱯᱚᱱᱚᱛ ᱫᱷᱟᱹᱨᱤᱡ ᱠᱚ ᱴᱩᱰᱟᱹᱝ ᱛᱤᱭᱩᱜ ᱟᱠᱟᱫᱟ᱾ ᱟᱨᱦᱚᱸ ᱯᱟᱞᱮ ᱦᱟᱯᱲᱟᱢ ᱠᱚ ᱢᱟᱲᱟᱝ ᱥᱮᱫ ᱠᱚ ᱞᱟᱦᱟ ᱠᱚᱜ ᱜᱮᱪᱚᱝ, ᱥᱟᱢᱟᱝ ᱨᱮ ᱚᱜᱚᱢ ᱫᱚᱨᱭᱟ ᱛᱮᱠᱚ ᱫᱟᱨᱟᱢ ᱟᱠᱟᱱᱟ᱾

ᱛᱚᱵᱮ ᱛᱮᱦᱮᱧᱟᱜ ᱱᱚᱶᱟ ᱠᱟᱛᱷᱟ ᱫᱚ ᱱᱤᱛᱚᱜ ᱩᱰᱤᱥᱟ ᱯᱚᱱᱚᱛ ᱨᱮ ᱢᱮᱱᱟᱜ ᱢᱚᱭᱩᱨᱵᱷᱚᱸᱡᱽ ᱡᱤᱞᱟ ᱨᱮᱭᱟᱜ ᱵᱟᱵᱚᱱᱜᱷᱟᱹᱴᱤᱼᱥᱚᱵᱽᱰᱤᱵᱤᱡᱟᱱ ᱨᱟᱭᱨᱚᱝᱯᱩᱨ ᱛᱷᱟᱱᱟ, ᱜᱟᱹᱬᱫᱟᱹ ᱯᱤᱲ ᱰᱟᱦᱟᱨᱰᱤ ᱟᱹᱛᱩ ᱨᱮᱭᱟᱜ ᱜᱷᱚᱴᱚᱱ ᱠᱚ ᱤᱫᱤ ᱠᱟᱛᱮ ᱞᱟᱹᱭᱩᱜ ᱠᱟᱱᱟ᱾ ᱱᱚᱶᱟ ᱰᱟᱦᱟᱨᱰᱤ ᱟᱹᱛᱩ ᱨᱮᱭᱟᱜ ᱥᱩᱨ ᱥᱟᱰᱜᱮ ᱟᱹᱛᱩ ᱠᱚᱫᱚ ᱥᱟᱢᱟᱝ ᱥᱮᱦᱮᱫ ᱨᱮ ᱠᱷᱚᱸᱬᱵᱚᱸᱫᱽ, ᱜᱩᱸᱰᱩᱨᱤᱭᱟᱹ, ᱤᱪᱟᱹᱜ ᱜᱷᱩᱴᱩ, ᱛᱟᱭᱚᱢ ᱥᱮᱦᱮᱫ ᱨᱮᱫᱚ ᱯᱩᱠᱷᱩᱨᱤᱭᱟᱹ ᱮᱛᱚᱢ ᱥᱮᱦᱮᱫ ᱨᱮᱫᱚ ᱰᱟᱸᱰᱽᱲᱮ ᱵᱩᱥ, ᱜᱟᱺᱵᱷᱟᱹᱨᱤᱭᱟᱹ ᱟᱨ ᱠᱚᱧᱮ ᱥᱮᱦᱮᱫ ᱨᱮᱫᱚ ᱯᱟᱛᱮ ᱯᱟᱹᱱᱤ ᱢᱮᱱᱟᱜᱼᱟ᱾ ᱱᱚᱶᱟ ᱟᱹᱛᱩ ᱫᱚ ᱠᱚ ᱢᱮᱱᱟ ᱥᱮᱫᱟᱭ ᱡᱚᱠᱷᱚᱱ ᱵᱷᱚᱸᱡᱽ ᱨᱟᱡᱟ ᱟᱨ ᱥᱟᱹᱨᱟᱹᱭᱠᱮᱞᱟ ᱨᱟᱡᱟ ᱠᱤᱱ ᱯᱮᱲᱟ ᱞᱮᱱ ᱵᱮᱲᱟ ᱨᱮ ᱱᱚᱶᱟ ᱰᱟᱦᱟᱨ ᱫᱚ ᱵᱮᱱᱟᱣ ᱟᱠᱟᱱᱟ᱾ ᱱᱚᱶᱟ ᱰᱟᱦᱟᱨ ᱛᱮᱜᱮ ᱨᱟᱡᱽ ᱠᱚ ᱦᱟᱹᱛᱤ ᱪᱮᱛᱟᱱ ᱥᱟᱫᱚᱢ ᱪᱮᱛᱟᱱ ᱠᱚ ᱦᱤᱯᱤᱨᱤ ᱠᱟᱱ ᱛᱟᱦᱮᱸ ᱠᱟᱱᱟ᱾ ᱚᱱᱟ ᱛᱮᱜᱮ ᱯᱟᱞᱮᱱ ᱢᱟᱨᱮ ᱦᱟᱯᱲᱟᱢ ᱠᱚ ᱱᱚᱶᱟ ᱟᱹᱛᱩ ᱫᱚ ᱰᱟᱦᱟᱨ ᱟᱲᱮ ᱨᱮ ᱢᱮᱱᱟᱜ ᱟᱛᱮ ᱰᱟᱦᱟᱨᱰᱤ ᱠᱚ ᱧᱩᱢ ᱦᱟᱞᱟᱝ ᱟᱠᱟᱫᱟ᱾ ᱯᱟᱞᱮᱱ ᱱᱚᱶᱟ ᱟᱹᱛᱩ ᱫᱚ ᱟᱵᱚ ᱦᱚᱲ ᱵᱟᱥᱠᱮ ᱯᱟᱹᱨᱤᱥ ᱠᱚᱠᱚ ᱟᱹᱛᱩ ᱪᱤᱭᱟᱹ ᱥᱟᱨ ᱥᱟᱹᱜᱩᱱ ᱞᱟᱜᱼᱟ᱾ ᱚᱱᱟ ᱚᱠᱛᱚ ᱫᱚ ᱱᱚᱶᱟ ᱫᱤᱥᱚᱢ ᱠᱚᱦᱚᱸ ᱵᱩᱨᱩ ᱫᱤᱥᱚᱢ ᱜᱮ ᱛᱟᱦᱮᱸ ᱠᱟᱱᱟ᱾ ᱢᱟᱱᱶᱟ ᱫᱚ ᱡᱟᱦᱟᱸ ᱨᱮᱜᱮ ᱠᱚ ᱟᱹᱛᱩ ᱫᱤᱥᱚᱢ ᱡᱚᱛᱚ ᱞᱮᱠᱟᱱ ᱥᱩᱵᱤᱫᱟ ᱧᱮᱞ ᱠᱟᱛᱮ ᱠᱚ ᱟᱹᱛᱩᱭᱟ᱾ ᱱᱚᱶᱟ ᱟᱹᱛᱩ ᱦᱚᱸ ᱮᱛᱚᱢ ᱠᱚᱧᱮ ᱜᱟᱰᱟ/ᱱᱟᱹᱭ ᱛᱮ ᱮᱴᱮᱫ ᱮᱥᱮᱫ ᱟᱠᱟᱱᱟ᱾ ᱟᱨ ᱮᱛᱚᱢ ᱠᱷᱚᱱ ᱠᱚᱧᱮ ᱥᱮᱫ ᱛᱮ ᱢᱤᱫ ᱰᱩᱸᱜᱽᱨᱤ ᱛᱤᱸᱜᱩ ᱟᱠᱟᱱᱟ᱾ ᱡᱟᱦᱟᱸ ᱫᱚ ᱢᱚᱬᱮ ᱦᱟᱹᱴᱤᱧ ᱨᱮ ᱦᱟᱹᱴᱤᱧ ᱟᱠᱟᱱᱟ ᱟᱨ ᱟᱹᱛᱩ ᱠᱷᱚᱱ ᱛᱟᱭᱚᱢ ᱥᱮᱦᱮᱫ ᱨᱮ ᱰᱩᱸᱜᱽᱨᱤ ᱠᱚᱫᱚ ᱢᱮᱱᱟᱜᱼᱟ᱾ ᱡᱮᱢᱚᱱ ᱮᱛᱚᱢ ᱥᱮᱦᱮᱫᱟᱜ ᱱᱟᱹᱭ/ᱜᱟᱰᱟ ᱜᱩᱲᱭᱟᱹ ᱜᱟᱰᱟ ᱠᱷᱚᱱ ᱮᱦᱚᱵ ᱮᱱᱟ, ᱥᱚᱥᱚ ᱰᱩᱸᱜᱽᱨᱤ, ᱪᱟᱶᱟᱨ ᱰᱩᱸᱜᱽᱨᱤ, ᱰᱟᱸᱰᱚ ᱰᱩᱸᱜᱽᱨᱤ, ᱵᱟᱹᱨᱥᱟᱹ ᱰᱩᱸᱜᱽᱨᱤ ᱟᱨ ᱵᱟᱦᱟ ᱰᱩᱸᱜᱽᱨᱤ ᱡᱟᱦᱟᱸ ᱫᱚ ᱠᱷᱟᱲᱟᱝ ᱜᱟᱰᱟ/ᱱᱟᱹᱭ ᱨᱮ ᱢᱩᱪᱟᱹᱫ ᱟᱠᱟᱱᱟ᱾ ᱟᱫᱚ ᱯᱟᱞᱮ ᱩᱱᱠᱩ ᱵᱟᱥᱠᱮ ᱯᱟᱹᱨᱤᱥ ᱦᱚᱲ ᱠᱚᱫᱚ ᱱᱚᱶᱟ ᱡᱟᱭᱜᱟ ᱫᱚᱢᱮ ᱠᱚ ᱠᱩᱥᱤ ᱟᱫ ᱛᱮ ᱱᱚᱝᱠᱟᱱ ᱴᱷᱟᱶ ᱨᱮ ᱟᱹᱛᱩ ᱠᱚ ᱵᱮᱨᱮᱫ ᱞᱟᱜᱼᱟ᱾ ᱟᱨ ᱱᱚᱶᱟ ᱰᱩᱸᱜᱽᱨᱤ ᱟᱲᱮ ᱯᱟᱥᱮ ᱠᱚ ᱰᱷᱚᱸᱰᱟ ᱰᱷᱤᱯᱟᱹ ᱠᱚ ᱥᱚᱢᱟᱱ ᱠᱟᱛᱮ ᱵᱟᱹᱫ ᱠᱷᱮᱛ ᱠᱚ ᱵᱮᱱᱟᱣ ᱞᱟᱜᱼᱟ᱾ ᱟᱨ ᱱᱚᱶᱟ ᱰᱟᱸᱰᱚ ᱰᱩᱸᱜᱽᱨᱤ ᱟᱨ ᱵᱟᱹᱨᱥᱟᱹ ᱰᱩᱸᱜᱽᱨᱤ ᱛᱟᱞᱟ ᱨᱮ ᱫᱚ ᱥᱚᱰᱚᱜ ᱫᱷᱟᱨᱟ ᱛᱟᱦᱮᱸ ᱛᱮ ᱵᱟᱱᱟᱨ ᱰᱩᱸᱜᱽᱨᱤ ᱠᱚ ᱟᱲᱮ ᱢᱤᱫ ᱠᱮᱫ ᱛᱮ ᱢᱤᱫᱴᱟᱹᱝ ᱟᱦᱟᱨ ᱠᱚ ᱵᱮᱱᱟᱣ ᱠᱮᱫᱼᱟ᱾ ᱡᱟᱛᱮ ᱟᱠᱚᱣᱟᱜ ᱞᱟᱛᱟᱨ ᱥᱮᱫᱟᱜ ᱵᱟᱹᱫ ᱠᱷᱮᱛ ᱠᱚ ᱫᱟᱜ ᱨᱮᱭᱟᱜ ᱚᱵᱷᱟᱵᱽ ᱟᱞᱚ ᱦᱩᱭᱩᱜ ᱢᱟ ᱢᱮᱱᱛᱮ ᱟᱨ ᱩᱢ ᱟᱹᱨᱩᱵᱚᱜ ᱠᱷᱚᱱ ᱮᱦᱚᱵ ᱠᱟᱛᱮ ᱦᱟᱹᱠᱩ ᱠᱟᱴᱠᱚᱢ ᱠᱚ ᱡᱚᱢ ᱞᱟᱹᱜᱤᱫ ᱦᱚᱸ ᱞᱟᱹᱠᱛᱤ ᱫᱟᱲᱮᱭᱟᱜᱼᱟ᱾ ᱛᱚᱵᱮ ᱟᱵᱚ ᱦᱚᱲ ᱦᱚᱯᱚᱱ ᱫᱚ ᱡᱟᱦᱟᱸ ᱨᱮᱜᱮ ᱵᱚ ᱛᱟᱸᱦᱮᱱ ᱚᱱᱟ ᱡᱟᱭᱜᱟ ᱫᱚ ᱞᱟᱦᱟ ᱛᱮ ᱟᱹᱛᱩ ᱪᱤᱭᱟᱹ ᱥᱟᱨ ᱥᱟᱹᱜᱩᱱ ᱫᱚᱵᱚ ᱧᱮᱞ ᱢᱟᱲᱟᱝ ᱜᱮᱭᱟ᱾ ᱱᱩᱠᱩ ᱦᱚᱲ ᱦᱚᱸ ᱚᱱᱟ ᱠᱚᱫᱚ ᱠᱚ ᱧᱮᱞ ᱞᱟᱜ ᱜᱮᱭᱟ ᱯᱟᱞᱮ᱾ ᱚᱱᱟ ᱛᱮᱜᱮ ᱛᱚ ᱛᱤᱱᱟᱹᱜ ᱥᱟᱞ ᱡᱩᱜᱽ ᱫᱷᱟᱹᱨᱤᱡ ᱠᱚ ᱛᱟᱦᱮᱸ ᱠᱟᱱᱟ ᱡᱚᱛᱚᱣᱟᱜ ᱛᱮ ᱱᱟᱯᱟᱭ ᱜᱮᱠᱚ ᱛᱟᱦᱮᱸ ᱠᱟᱱᱟ ᱯᱮᱨᱮᱡ ᱟᱱᱮᱡᱼᱫᱷᱟᱱᱮᱡ ᱟᱨ ᱦᱮᱥᱮᱡᱼᱥᱮᱠᱮᱡ᱾ ᱛᱚᱵᱮ ᱟᱵᱚ ᱦᱚᱲ ᱫᱚ ᱵᱚᱸᱜᱟᱼᱵᱳᱨᱳ ᱠᱚᱫᱚ ᱵᱟᱠᱚ ᱨᱟᱜᱽ ᱠᱷᱟᱱ ᱵᱟᱵᱚ ᱯᱮᱨᱮᱡ ᱩᱢᱟᱹᱲ ᱠᱚᱣᱟ᱾

ᱱᱩᱠᱩ ᱦᱚᱲ ᱦᱚᱸ ᱵᱚᱸᱜᱟ ᱵᱳᱨᱳ ᱠᱚᱫᱚ ᱠᱚ ᱥᱮᱵᱟ ᱫᱮᱵᱟ ᱞᱟᱫ ᱠᱚ ᱜᱮᱭᱟ᱾ ᱮᱱᱛᱮ ᱨᱮᱦᱚᱸ ᱡᱩᱫᱤ ᱵᱚᱸᱜᱟ ᱵᱳᱨᱳ ᱠᱚ ᱟᱨᱦᱚᱸ ᱡᱟᱸᱦᱟᱱᱟᱜ ᱠᱚ ᱵᱟᱝ ᱠᱚ ᱠᱩᱥᱤᱜ ᱠᱷᱟᱱ ᱟᱨ ᱵᱟᱝ ᱠᱚ ᱠᱷᱚᱡᱽ ᱠᱷᱟᱱ ᱡᱟᱸᱦᱟᱱᱟᱜ ᱟᱹᱭᱟᱹ ᱫᱚᱠᱚ ᱩᱫᱩᱜᱽ ᱜᱮᱭᱟ ᱟᱨ ᱚᱱᱠᱟ ᱛᱮᱜᱮ ᱰᱟᱸᱰᱚ ᱰᱩᱸᱜᱽᱨᱤ ᱵᱚᱸᱜᱟ ᱦᱚᱸᱭ ᱠᱟᱹᱢᱤᱭᱮᱫ ᱛᱟᱸᱦᱮᱫ᱾

ᱟᱫᱚ ᱵᱟᱥᱠᱮ ᱦᱚᱲᱟᱜ ᱫᱤᱱᱟᱹᱢ ᱟᱹᱰᱤ ᱱᱟᱯᱟᱭ ᱜᱮ ᱪᱟᱞᱟᱜ ᱠᱟᱱ ᱛᱟᱦᱮᱸ ᱠᱟᱱᱟ ᱟᱨ ᱦᱟᱱᱛᱮ ᱵᱚᱸᱜᱟᱼᱵᱳᱨᱳ ᱠᱚᱫᱚ ᱯᱟᱞᱮ ᱪᱮᱫ ᱠᱚᱪᱚ ᱠᱚ ᱟᱸᱥᱚᱜ ᱠᱟᱱ ᱚᱠᱚᱭ ᱵᱟᱰᱟᱭᱟ᱾ ᱮᱱᱠᱷᱟᱱ ᱵᱚᱸᱜᱟᱼᱵᱳᱨᱳ ᱠᱚᱫᱚ ᱯᱷᱚᱱᱫᱤ ᱠᱚ ᱮᱦᱚᱵ ᱠᱮᱫᱼᱟ᱾ ᱦᱚᱭ ᱛᱚ ᱟᱥᱟᱲ ᱥᱟᱱ ᱵᱚᱸᱜᱟ ᱦᱩᱭ ᱠᱚᱜ ᱡᱟᱦᱟᱸ ᱜᱮ, ᱫᱟᱜ ᱠᱚ ᱛᱟᱸᱦᱮᱱ ᱵᱮᱲᱟ ᱨᱮᱭᱟᱜ ᱠᱟᱛᱷᱟ᱾ ᱚᱱᱟ ᱡᱮ ᱡᱟᱦᱟᱸ ᱵᱟᱸᱫᱽ/ᱟᱦᱟᱨ ᱰᱟᱸᱰᱚ ᱟᱨ ᱵᱟᱹᱨᱥᱟᱹ ᱰᱩᱸᱜᱽᱨᱤ ᱛᱟᱞᱟ ᱨᱮ ᱠᱚ ᱵᱮᱱᱟᱣ ᱞᱟᱜᱼᱟ᱾ ᱚᱱᱟ ᱫᱚ ᱫᱤᱱᱟᱹᱢ ᱧᱤᱫᱟᱹ ᱫᱚ ᱯᱷᱩᱲᱚᱜ ᱠᱟᱱ ᱛᱟᱸᱦᱮᱱ᱾ ᱫᱤᱱ ᱵᱮᱲᱟ ᱵᱟᱥᱠᱮ ᱦᱚᱲ ᱠᱚ ᱮᱥᱮᱫ ᱚᱴᱚ ᱠᱟᱜᱼᱟ ᱟᱨᱦᱚᱸ ᱧᱤᱫᱟᱹ ᱵᱮᱲᱟ ᱫᱚ ᱯᱷᱩᱲᱚᱜᱼᱟ᱾ ᱚᱱᱠᱟ ᱛᱤᱱᱟᱹᱜ ᱫᱤᱱ ᱜᱟᱱ ᱪᱚ ᱪᱟᱞᱟᱣ ᱮᱱᱟ᱾ ᱵᱟᱝ ᱜᱮ ᱜᱟᱱᱚᱜ ᱠᱟᱱ ᱧᱮᱞ ᱛᱮ ᱵᱟᱥᱠᱮ ᱦᱚᱲ ᱠᱚᱫᱚ ᱫᱚᱢᱮ ᱠᱚ ᱨᱟᱹᱜᱤᱭᱮᱱ ᱥᱟᱶ ᱛᱮᱠᱚ ᱟᱹᱲᱤᱥᱚᱜ ᱛᱟᱸᱦᱮᱫ᱾ ᱦᱮᱸᱫᱟ ᱭᱟ ᱱᱚᱶᱟ ᱵᱟᱸᱫᱽ/ᱟᱦᱟᱨ ᱫᱚ ᱵᱷᱟᱞᱟ ᱫᱤᱱᱟᱹᱢ ᱪᱮᱠᱟᱛᱮ ᱨᱟᱹᱯᱩᱫᱚᱜ/ᱵᱷᱟᱸᱜᱟᱴᱚᱜ ᱠᱟᱱᱟ? ᱟᱫᱚ ᱩᱱᱠᱩ ᱦᱚᱸ ᱵᱚᱸᱜᱟ ᱠᱟᱛᱷᱟ ᱫᱚ ᱵᱟᱝ ᱠᱚ ᱟᱹᱭᱠᱟᱹᱣ ᱫᱟᱲᱮᱭᱟᱜ ᱠᱟᱱᱟ᱾ ᱟᱫᱚ ᱯᱷᱚᱸᱫᱤ ᱠᱚ ᱜᱟᱜ ᱠᱮᱫ ᱛᱮ ᱢᱤᱫ ᱨᱟᱹᱜᱤ ᱟᱨ ᱫᱷᱚᱯᱚᱴ ᱟᱨ ᱫᱤᱞ ᱫᱟᱲᱮ ᱫᱷᱟᱨᱟ ᱵᱟᱥᱠᱮ ᱦᱚᱲ ᱫᱚ ᱧᱤᱫᱟᱹ ᱟᱦᱟᱨ ᱮ ᱦᱚᱨᱦᱚ ᱟᱠᱟᱫᱼᱟ᱾ ᱜᱚᱴᱟ ᱧᱤᱫᱟᱹ ᱵᱷᱤᱛᱟᱹᱨ ᱨᱮ ᱤᱠᱷᱟᱹᱱ ᱪᱤᱞᱤ ᱦᱚᱸ ᱵᱟᱝ ᱠᱚ ᱦᱮᱡ ᱞᱟᱱᱟ ᱪᱮ ᱟᱲᱮ ᱦᱚᱸ ᱵᱟᱝ ᱨᱟᱹᱯᱩᱫ ᱞᱮᱱᱟ᱾ ᱮᱱᱠᱷᱟᱱ ᱟᱨᱦᱚᱸ ᱵᱟᱭ ᱦᱚᱨᱦᱚᱭᱟ᱾ ᱟᱨᱦᱚᱸ ᱡᱟᱦᱟᱸ ᱦᱤᱞᱚᱜ ᱵᱟᱭ ᱦᱚᱨᱦᱚᱭᱟ ᱚᱱᱟ ᱦᱤᱞᱚᱜ ᱫᱚ ᱵᱟᱸᱫᱽ ᱟᱲᱮ ᱨᱟᱹᱯᱩᱫ ᱠᱚᱜ ᱠᱟᱱᱟ ᱫᱟᱜ ᱠᱚ ᱟᱸᱡᱮᱫᱚᱜ ᱠᱟᱱᱟ᱾ ᱟᱫᱚ ᱚᱱᱠᱟ ᱜᱮ ᱟᱨᱦᱚᱸᱭ ᱦᱚᱨᱦᱚ ᱠᱮᱫᱼᱟ᱾ ᱧᱩᱛ ᱠᱟᱲᱟᱝᱼᱠᱩᱪᱟᱝ ᱥᱩᱬᱩᱡ ᱛᱷᱩᱢ ᱮᱠᱞᱟ ᱪᱩᱢᱩᱞᱼᱪᱩᱢᱩᱞ, ᱮᱱᱦᱚᱸ ᱨᱟᱹᱜᱤ ᱫᱟᱲᱮ ᱛᱮ ᱠᱟᱹᱯᱤ ᱟᱱᱛᱮᱭ ᱦᱚᱨᱦᱚ ᱟᱠᱟᱫᱼᱟ᱾

ᱛᱚᱵᱮ ᱛᱮᱦᱮᱧ ᱫᱚᱭ ᱧᱟᱢ ᱠᱮᱫᱮᱭᱟ ᱢᱤᱫ ᱦᱚᱲ ᱮ, ᱦᱮᱡ ᱮᱱᱟᱭ ᱟᱨ ᱟᱡᱟᱜ ᱡᱟᱸᱜᱟ ᱛᱮ ᱚᱱᱟ ᱨᱟᱹᱯᱩᱫ ᱵᱷᱟᱸᱜᱟᱴ ᱡᱟᱭᱜᱟ ᱨᱮ ᱵᱟᱹᱫ ᱨᱟᱹᱜᱼᱯᱩᱫ ᱮ ᱪᱷᱩᱴᱟᱹᱣ ᱟᱠᱟᱱᱟ᱾ ᱚᱱᱟ ᱧᱮᱞ ᱠᱟᱛᱮ ᱩᱱᱤ ᱵᱟᱥᱠᱮ ᱦᱚᱲ ᱫᱚ ᱟᱹᱰᱤ ᱟᱸᱴ ᱮ ᱨᱟᱹᱜᱤ ᱪᱟᱵᱟᱭᱮᱱᱟ᱾ ᱡᱟᱦᱟᱸ ᱜᱮ ᱦᱩᱭᱩᱜ ᱛᱟᱯᱟᱢ ᱠᱷᱚᱱ ᱢᱟᱯᱟᱜᱟ ᱫᱷᱟᱹᱨᱤᱡ ᱢᱚᱱᱮᱭ ᱜᱚᱴᱟ ᱠᱮᱫ ᱛᱮ ᱵᱟᱹᱭᱼᱵᱟᱹᱭ ᱛᱮ ᱵᱟᱝ ᱨᱟᱥᱠᱟᱫ ᱨᱚᱥᱠᱚᱫ ᱠᱟᱛᱮ ᱚᱸᱰᱮᱭ ᱥᱩᱨ ᱮᱱᱟ᱾ ᱤᱱᱟᱹᱜ ᱛᱮ ᱢᱚᱱᱮᱭ ᱜᱚᱴᱟ ᱠᱮᱫᱼᱟ᱾ ᱵᱟᱝᱼᱟ ᱢᱟᱜ ᱩᱛᱟᱹᱨᱤᱭᱟᱹᱧ᱾ ᱟᱨ ᱨᱟᱹᱜᱤ ᱛᱮ ᱠᱟᱹᱯᱤᱭ ᱦᱟᱵᱟᱜ ᱠᱮᱫᱼᱟ᱾ ᱡᱟᱦᱟᱸ ᱞᱮᱠᱟᱭ ᱢᱟᱜᱮᱭᱟ ᱢᱮᱱᱛᱮ, ᱩᱱᱤ ᱦᱚᱲ ᱫᱚ ᱚᱱᱟ ᱠᱟᱹᱯᱤᱭ ᱥᱟᱵ ᱫᱟᱨᱟᱢ ᱠᱮᱫ ᱛᱮ ᱫᱚᱢᱮ ᱠᱤᱱ ᱛᱟᱯᱟᱢ ᱮᱱᱟ ᱜᱟᱲᱫᱟ ᱜᱩᱲᱫᱩ ᱟᱨ ᱚᱱᱟ ᱠᱟᱹᱯᱤ ᱫᱚ ᱵᱟᱥᱠᱮ ᱦᱚᱲ ᱮ ᱨᱮᱡ ᱚᱪᱚᱭᱮᱱᱟ᱾ ᱡᱚᱠᱷᱚᱱ ᱵᱟᱥᱠᱮ ᱦᱚᱲ ᱮ ᱞᱟᱸᱜᱟ ᱪᱟᱵᱟᱭᱮᱱᱟ, ᱩᱱ ᱡᱷᱚᱜ ᱩᱱᱤ ᱦᱚᱲ ᱮ ᱢᱮᱛᱟᱭ ᱠᱟᱱᱟ᱾ ᱟᱯᱮ ᱫᱚ ᱚᱠᱚᱭ ᱦᱚᱸ ᱵᱟᱯᱮ ᱩᱨᱩᱢ ᱠᱚᱣᱟ ᱚᱠᱚᱭᱟᱜ ᱠᱟᱛᱷᱟ ᱦᱚᱸ ᱵᱟᱝ ᱯᱮ ᱵᱩᱡᱷᱟᱹᱣ ᱛᱤᱭᱩᱜᱼᱟ᱾ ᱟᱞᱮ ᱟᱯᱮ ᱴᱷᱮᱱ ᱠᱷᱚᱱ ᱥᱮᱵᱟ ᱞᱮ ᱠᱷᱚᱡᱽ ᱠᱟᱱᱟ ᱟᱯᱮ ᱫᱚ ᱵᱟᱯᱮ ᱴᱷᱤᱠᱟᱹ ᱫᱟᱲᱮᱭᱟᱜ ᱠᱟᱱᱟ᱾ ᱩᱞᱴᱟᱹ ᱟᱞᱮ ᱠᱚ ᱢᱟᱢᱟᱜ ᱦᱚᱸ ᱯᱮ ᱫᱤᱲᱦᱚᱜ ᱠᱟᱱᱟ᱾ ᱤᱧ ᱫᱚ ᱦᱚᱲ ᱫᱚᱧ ᱵᱟᱝ ᱠᱟᱱᱟ ᱤᱧ ᱫᱚ ᱱᱚᱶᱟ ᱰᱟᱸᱰᱚ ᱨᱤᱱᱤᱡ ᱵᱚᱸᱜᱟ ᱠᱟᱹᱱᱟᱹᱧ, ᱟᱯᱮᱧ ᱧᱮᱞᱮᱫ ᱯᱮᱭᱟ᱾ ᱛᱚᱵᱮ ᱤᱧ ᱵᱟᱝ ᱯᱮ ᱥᱮᱵᱟ ᱛᱤᱭᱩᱜ ᱤᱧ ᱠᱟᱱᱟ᱾ ᱟᱯᱮ ᱫᱚ ᱱᱚᱶᱟ ᱴᱷᱟᱶ ᱨᱮ ᱛᱟᱸᱦᱮᱱ ᱞᱮᱠᱟᱱ ᱦᱚᱲ ᱫᱚᱯᱮ ᱵᱟᱝ ᱠᱟᱱᱟ᱾ ᱟᱯᱮ ᱫᱚ ᱱᱤᱛ ᱜᱮ ᱱᱚᱸᱰᱮ ᱠᱷᱚᱱ ᱵᱟᱹᱜᱤ ᱠᱟᱛᱮ ᱱᱚᱶᱟ ᱥᱤᱢᱟᱹ ᱵᱟᱨᱦᱮ ᱩᱛᱟᱹᱨᱚᱜ ᱯᱮ᱾ ᱟᱨ ᱵᱟᱝᱠᱷᱟᱱ ᱤᱧᱮᱢ ᱢᱟᱜᱤᱧ ᱠᱟᱱ ᱞᱮᱠᱟ ᱟᱯᱮ ᱮᱨᱟ ᱦᱚᱯᱚᱱ ᱡᱚᱛᱚᱧ ᱢᱟᱜ ᱠᱷᱟᱪᱟ ᱵᱟᱪᱟ ᱯᱮᱭᱟ᱾ ᱱᱚᱶᱟ ᱧᱤᱫᱟᱹ ᱵᱷᱤᱛᱟᱹᱨ ᱛᱮ ᱱᱚᱶᱟ ᱰᱟᱦᱟᱨᱰᱤ ᱵᱟᱹᱜᱤᱭᱟᱜ ᱯᱮ ᱟᱨ ᱵᱟᱝᱠᱷᱟᱱ ᱪᱤᱞᱤ ᱦᱚᱸ ᱵᱟᱯᱮ ᱵᱟᱧᱪᱟᱣᱜᱼᱟ᱾ ᱱᱚᱶᱟ ᱦᱚᱸ ᱵᱟᱰᱟᱭ ᱠᱟᱜ ᱯᱮ ᱟᱯᱮ ᱵᱟᱥᱠᱮ ᱦᱚᱲ ᱫᱚ ᱛᱤᱥ ᱨᱮᱦᱚᱸ ᱱᱚᱶᱟ ᱟᱹᱛᱩ ᱨᱮᱫᱚ ᱵᱟᱯᱮ ᱦᱮᱡ ᱨᱩᱣᱟᱹᱲ ᱠᱮᱭᱟ ᱵᱟᱥᱠᱮ ᱯᱟᱹᱨᱤᱥ ᱛᱮᱫᱚ᱾ ᱮᱱᱠᱷᱟᱱ ᱩᱱᱤ ᱵᱟᱥᱠᱮ ᱦᱚᱲ ᱩᱱᱤ ᱵᱚᱸᱜᱟ ᱦᱚᱲ ᱴᱷᱮᱱ ᱮ ᱜᱚᱰ ᱡᱚᱦᱟᱨ ᱵᱟᱲᱟᱜ ᱠᱟᱱᱟᱭ ᱢᱟᱱᱟᱣᱼᱮ ᱞᱟᱹᱜᱤᱫ᱾ ᱵᱟᱭ ᱢᱟᱱᱟᱣ ᱫᱟᱲᱮ ᱟᱫᱮ ᱛᱮ ᱡᱤᱣᱤ ᱵᱟᱧᱪᱟᱣ ᱠᱟᱛᱮ ᱧᱤᱨ ᱪᱟᱞᱟᱣ ᱮᱱᱟᱭ ᱚᱲᱟᱜ, ᱟᱨ ᱚᱲᱟᱜ ᱨᱮ ᱡᱚᱛᱚ ᱦᱚᱲ ᱮ ᱞᱟᱹᱭᱟᱫ ᱠᱚᱣᱟ ᱱᱚᱶᱟ ᱜᱷᱚᱴᱚᱱ᱾ ᱟᱨ ᱧᱤᱫᱟᱹ ᱵᱷᱤᱛᱟᱹᱨ ᱨᱮ ᱮᱨᱟᱼᱦᱚᱯᱚᱱ, ᱢᱤᱦᱩᱼᱢᱮᱨᱚᱢ, ᱜᱟᱹᱭᱼᱰᱟᱺᱜᱽᱨᱤ ᱠᱷᱚᱱ ᱮᱦᱚᱵ ᱠᱟᱛᱮ ᱡᱟᱦᱟᱸ ᱠᱚ ᱜᱚᱜ ᱫᱟᱲᱮᱭᱟᱫ ᱞᱮᱠᱟᱱ ᱥᱟᱢᱟᱱ ᱠᱚ ᱜᱚᱜ ᱠᱮᱫ ᱛᱮ ᱡᱤᱣᱤ ᱵᱟᱧᱪᱟᱣ ᱞᱟᱹᱜᱤᱫ ᱚᱱᱟ ᱰᱟᱦᱟᱨᱰᱤ ᱥᱤᱢᱟᱹ ᱠᱚ ᱯᱟᱨᱚᱢ ᱠᱮᱫᱼᱟ᱾ ᱚᱱᱠᱟ ᱛᱮ ᱯᱟᱞᱮ ᱩᱱᱠᱩ ᱵᱟᱥᱠᱮ ᱦᱚᱲ ᱫᱚ ᱚᱱᱟ ᱥᱩᱨ ᱟᱹᱛᱩ ᱯᱩᱠᱷᱩᱨᱤᱭᱟᱹ, ᱥᱤᱢᱲᱟᱹ, ᱢᱩᱨᱜᱟᱹ, ᱠᱷᱚᱨᱚᱲ ᱫᱟ ᱤᱪᱟᱹᱜ ᱜᱷᱩᱴᱩ ᱟᱹᱛᱩ ᱠᱚᱨᱮ ᱠᱚ ᱵᱟᱥᱟ ᱰᱮᱨᱟᱭᱮᱱ ᱪᱚᱝ᱾ ᱛᱚᱵᱮ ᱦᱟᱯᱲᱟᱢ ᱠᱚᱣᱟᱜ ᱞᱟᱹᱭ ᱞᱮᱠᱟᱛᱮ ᱟᱨ ᱧᱮᱞᱚᱜᱚᱜ ᱠᱟᱱ ᱞᱮᱠᱟᱛᱮ ᱯᱟᱞᱮ ᱩᱱᱠᱩ ᱵᱟᱥᱠᱮ ᱦᱚᱲ ᱫᱚ ᱯᱩᱠᱷᱩᱨᱤᱭᱟᱹ ᱨᱮᱠᱚ ᱵᱟᱥᱟ ᱰᱮᱨᱟ ᱰᱟᱺᱰᱤ ᱠᱮᱫᱼᱟ᱾

ᱛᱚᱵᱮ ᱢᱤᱫ ᱵᱟᱨ ᱚᱱᱚᱞᱤᱭᱟᱹ ᱫᱚᱠᱚ ᱢᱮᱱᱟ ᱵᱟᱝᱢᱟ ᱩᱱᱤ ᱵᱟᱥᱠᱮ ᱯᱟᱹᱨᱤᱥ ᱦᱚᱲ ᱫᱚ ᱚᱱᱟ ᱟᱡᱟᱜ ᱠᱟᱹᱯᱤ ᱛᱮᱜᱮᱭ ᱢᱟᱜ ᱜᱚᱡ ᱚᱪᱚᱭᱮᱱᱟ᱾ ᱡᱩᱫᱤ ᱱᱚᱝᱠᱟ ᱦᱩᱭ ᱠᱚᱜᱼᱟ, ᱮᱱᱠᱷᱟᱱ ᱩᱱᱠᱩ ᱡᱮ ᱟᱹᱛᱩ ᱨᱮᱠᱚ ᱛᱟᱦᱮᱸ ᱞᱮᱱ ᱥᱟᱨᱮᱡ ᱦᱚᱲ ᱠᱚ ᱮᱨᱟ ᱦᱚᱯᱚᱱ ᱠᱚ ᱱᱚᱶᱟ ᱡᱮ ᱟᱹᱛᱩ ᱵᱟᱹᱜᱤᱭᱟᱜ ᱠᱷᱚᱵᱚᱨ ᱚᱠᱚᱭᱮ ᱞᱟᱹᱭ ᱟᱫ ᱠᱚᱣᱟ? ᱟᱨ ᱢᱤᱫ ᱚᱱᱟ ᱛᱟᱭᱚᱢ ᱫᱟᱨᱟᱢ ᱮᱴᱟᱜ ᱦᱚᱲ ᱠᱚ ᱚᱸᱰᱮ ᱠᱷᱟᱹᱞᱤ ᱠᱟᱹᱯᱤ ᱜᱮᱠᱚ ᱧᱟᱢ ᱠᱮᱫᱼᱟ, ᱢᱮᱱᱠᱷᱟᱱ ᱵᱟᱥᱠᱮ ᱯᱟᱹᱨᱤᱥ ᱦᱚᱲᱟᱜ ᱜᱚᱡ ᱦᱚᱲᱢᱚ ᱫᱚ ᱵᱟᱝ ᱧᱟᱢ ᱞᱟᱱᱟ? ᱱᱚᱶᱟ ᱫᱚ ᱟᱹᱰᱤ ᱥᱟᱹᱨᱤ ᱵᱟᱭ ᱟᱹᱭᱠᱟᱹᱣᱜ ᱠᱟᱱᱟ᱾

ᱤᱧᱟᱜ ᱛᱚᱞᱟᱥ ᱛᱮ ᱦᱟᱯᱲᱟᱢ ᱠᱚᱣᱟᱜ ᱞᱟᱹᱭ ᱞᱮᱠᱟᱛᱮ ᱚᱸᱰᱮ ᱫᱚ ᱩᱱᱤ ᱰᱟᱹᱰᱤ ᱵᱚᱸᱜᱟ ᱟᱨ ᱵᱟᱥᱠᱮ ᱦᱚᱲᱟᱜ ᱫᱚᱢᱮ ᱠᱤᱱ ᱱᱮᱭᱟᱣ ᱠᱷᱟᱹᱯᱟᱹᱨᱤᱭᱟᱹᱣᱼᱮᱱ ᱥᱟᱶᱛᱮ ᱥᱟᱯᱟᱵ ᱛᱟᱯᱟᱢ ᱮᱱᱟ ᱠᱤᱱ ᱟᱨ ᱡᱚᱠᱷᱚᱱ ᱵᱟᱥᱠᱮ ᱦᱚᱲ ᱮ ᱞᱟᱸᱜᱟᱭᱮᱱᱟ, ᱱᱚᱶᱟ ᱠᱚ ᱠᱟᱛᱷᱟᱭ ᱞᱟᱹᱭ ᱟᱫ ᱛᱮ ᱟᱹᱛᱩ ᱠᱷᱟᱹᱞᱤ ᱠᱟᱛᱮ ᱧᱤᱫᱟᱹ ᱵᱷᱤᱛᱟᱹᱨ ᱨᱮ ᱚᱱᱟ ᱥᱩᱨ ᱥᱟᱲᱜᱮ ᱨᱮᱜᱮ ᱠᱚ ᱵᱟᱥᱟ ᱵᱟᱲᱟᱭᱮᱱᱟ᱾ ᱡᱟᱸᱦᱟᱭ ᱡᱟᱦᱟᱸ ᱥᱮᱫ ᱠᱚ ᱧᱤᱨᱮᱱ ᱞᱟᱸᱜᱟ ᱢᱩᱪᱟᱹᱫᱚᱜ ᱟᱨ ᱵᱚᱛᱚᱨ ᱪᱟᱵᱟᱜ ᱫᱷᱟᱹᱨᱤᱡ ᱠᱚ ᱧᱤᱨᱮᱱᱟ᱾ ᱚᱱᱟᱛᱮ ᱚᱱᱟ ᱟᱲᱮ ᱯᱟᱥᱮ ᱠᱚᱨᱮ ᱠᱚ ᱵᱟᱥᱟᱭᱮᱱᱟ᱾

ᱛᱚᱵᱮ ᱩᱱᱠᱩ ᱵᱟᱥᱠᱮ ᱠᱟᱱ ᱜᱮᱭᱟ ᱠᱚ ᱢᱮᱱᱛᱮ ᱫᱚ ᱱᱚᱶᱟ ᱛᱮ ᱵᱟᱰᱟᱭᱚᱜ ᱠᱟᱱᱟ ᱡᱟᱦᱟᱸ ᱛᱤᱥ ᱟᱵᱽᱜᱮ ᱵᱚᱸᱜᱟ/ᱜᱚᱲᱟ ᱵᱚᱸᱜᱟᱜ ᱵᱮᱲᱟ ᱫᱚ ᱟᱠᱚᱣᱟᱜ ᱡᱚᱛᱚᱣᱟᱜ ᱵᱚᱸᱜᱟ ᱥᱟᱯᱟᱵ ᱥᱟᱶ ᱫᱟᱬᱮ ᱠᱚ ᱚᱱᱟ ᱵᱟᱸᱫᱽ ᱪᱮ ᱟᱦᱟᱨ ᱨᱮᱜᱮ ᱫᱟᱬᱮ ᱩᱢ ᱯᱷᱩᱨᱪᱟᱹ ᱱᱟᱲᱠᱟ ᱯᱷᱩᱨᱪᱟᱹᱜ ᱛᱮ, ᱫᱟᱬᱮ ᱠᱚᱦᱚᱸ ᱠᱚ ᱩᱢ ᱠᱚᱛᱮ ᱠᱟᱹᱯᱤ ᱛᱟᱨᱣᱟᱲᱮ ᱠᱚ ᱦᱟᱴᱟᱜ ᱰᱟᱸᱞᱤᱜ ᱠᱚ ᱟᱹᱨᱩᱵ ᱥᱟᱯᱷᱟᱭᱟ᱾ ᱟᱨ ᱚᱸᱰᱮ ᱠᱷᱚᱱ ᱜᱮ ᱜᱷᱚᱴ ᱫᱟᱜ ᱠᱚ ᱤᱫᱤᱭᱟ ᱟᱨ ᱥᱤᱸᱜᱟᱹᱲ ᱵᱮᱲᱟ ᱵᱚᱸᱜᱟ ᱠᱚ ᱚᱸᱰᱚᱠᱚᱜᱼᱟ᱾ ᱚᱱᱠᱟ ᱠᱟᱹᱢᱤ ᱠᱟᱛᱮ ᱛᱮᱦᱮᱧ ᱫᱷᱟᱹᱨᱤᱡ ᱩᱱᱠᱷᱚᱱ ᱢᱮᱱᱟᱜ ᱠᱚᱣᱟ ᱟᱹᱰᱤ ᱱᱟᱯᱟᱭ ᱛᱮ᱾ ᱡᱩᱫᱤ ᱩᱱᱤ ᱰᱟᱸᱰᱚ ᱵᱚᱸᱜᱟ ᱩᱱᱟᱹᱜ ᱮ ᱟᱹᱲᱤᱥ ᱠᱚᱜ ᱠᱷᱟᱱ ᱪᱮ ᱢᱟᱜ ᱜᱚᱡ ᱩᱛᱟᱹᱨ ᱠᱮ ᱠᱷᱟᱱ ᱛᱮᱦᱮᱧ ᱫᱷᱟᱹᱨᱤᱡ ᱱᱚᱶᱟ ᱱᱚᱝᱠᱟ ᱪᱮᱠᱟᱛᱮ ᱠᱚ ᱵᱚᱸᱜᱟ ᱵᱩᱨᱩᱜ ᱠᱟᱱᱟ᱾ ᱟᱨ ᱱᱟᱭ ᱛᱮ ᱱᱟᱯᱟᱭ ᱛᱮ ᱢᱮᱱᱟᱜ ᱠᱚᱣᱟ᱾ ᱱᱤᱛᱚᱜ ᱞᱮᱠᱟ ᱛᱮᱫᱚ ᱚᱸᱰᱮ ᱯᱩᱱᱭᱟᱹ ᱵᱟᱸᱫᱽ/ᱟᱦᱟᱨ ᱢᱮᱱᱟᱜᱼᱟ᱾ ᱡᱚᱛᱚ ᱠᱷᱚᱱ ᱪᱮᱛᱟᱱ ᱩᱛᱟᱹᱨᱟᱜ ᱫᱚ ᱵᱟᱥᱠᱮ ᱡᱟᱦᱮᱨ ᱠᱚ ᱢᱮᱛᱟᱜᱟᱜᱼᱟ᱾ ᱦᱟᱯᱲᱟᱢ ᱠᱚᱨᱮ ᱠᱷᱚᱱ ᱠᱟᱛᱷᱟ ᱟᱸᱡᱚᱢ ᱟᱠᱟᱱᱟ ᱢᱤᱫ ᱫᱷᱟᱣ ᱪᱮᱞᱮᱱ ᱚᱱᱟ ᱵᱟᱸᱫᱽ ᱨᱮ ᱫᱤᱥᱣᱟᱹ ᱦᱟᱹᱠᱩ ᱥᱟᱵ ᱵᱮᱲᱟ ᱨᱮ ᱵᱟᱥᱠᱮ ᱯᱟᱹᱨᱤᱥ ᱦᱚᱲ ᱮ ᱡᱷᱟᱹᱞᱤ ᱞᱟᱱᱟ᱾ ᱛᱚᱵᱮ ᱫᱤᱥᱣᱟᱹ ᱠᱚ ᱵᱚᱸᱜᱟ ᱠᱚ ᱱᱮᱦᱚᱨ ᱞᱟᱫᱮᱭᱟ ᱡᱮ ᱱᱩᱭ ᱫᱚ ᱟᱡ ᱛᱮᱫᱚ ᱵᱟᱭ ᱦᱮᱡ ᱟᱠᱟᱱᱟ ᱟᱞᱮ ᱜᱮᱞᱮ ᱟᱹᱜᱩ ᱟᱠᱟᱫᱮᱭᱟ ᱤᱠᱟᱹ ᱠᱟᱭ ᱢᱮ᱾ ᱮᱱᱠᱷᱟᱱ ᱩᱱᱤ ᱵᱟᱥᱠᱮ ᱯᱟᱹᱨᱤᱥ ᱦᱚᱲ ᱮ ᱵᱟᱧᱪᱟᱣ ᱮᱱᱟ᱾

ᱡᱚᱠᱷᱚᱱ ᱵᱟᱥᱠᱮ ᱯᱟᱹᱨᱤᱥ ᱦᱚᱲ ᱚᱱᱟ ᱟᱹᱛᱩ ᱠᱚ ᱵᱟᱹᱜᱤᱭᱟᱫᱼᱟ ᱚᱱᱟ ᱛᱟᱭᱚᱢ ᱚᱠᱟ ᱠᱷᱚᱱ ᱫᱚ ᱢᱩᱨᱢᱩ ᱯᱟᱹᱨᱤᱥ ᱦᱚᱲ ᱦᱮᱡ ᱠᱟᱛᱮ ᱚᱱᱟ ᱵᱟᱥᱠᱮ ᱦᱚᱲᱟᱜ ᱡᱚᱛᱚᱣᱟᱜ ᱠᱚ ᱟᱠᱚᱣᱟᱜ ᱠᱮᱫᱼᱟ᱾ ᱚᱱᱠᱟ ᱛᱮ ᱡᱩᱜᱽ ᱦᱚᱸ ᱯᱟᱨᱚᱢ ᱤᱫᱤᱭᱮᱱᱟ ᱚᱱᱟ ᱰᱟᱸᱰᱚ ᱰᱩᱸᱜᱽᱨᱤ ᱦᱚᱸ ᱚᱱᱟ ᱠᱟᱹᱯᱤ ᱠᱚ ᱧᱟᱢ ᱠᱮᱫ ᱠᱷᱟᱹᱛᱤᱨ ᱠᱟᱹᱯᱤ ᱵᱚᱸᱜᱟ ᱱᱚᱸᱰᱮ ᱫᱚ ᱢᱮᱱᱟᱭᱟ ᱢᱮᱱᱛᱮ ᱩᱱᱠᱩ ᱦᱚᱲᱟᱜ ᱯᱟᱹᱛᱭᱟᱹᱣ ᱦᱮᱡ ᱮᱱ᱾ ᱚᱱᱟ ᱠᱟᱹᱯᱤ ᱰᱩᱸᱜᱽᱨᱤ ᱵᱟᱝ ᱠᱟᱹᱯᱤ ᱵᱩᱨᱩ ᱧᱩᱛᱩᱢ ᱛᱮ ᱵᱤᱠᱟᱹᱣ ᱮᱱᱟ᱾ ᱟᱥᱚᱞ ᱨᱮᱫᱚ ᱩᱱᱤ ᱵᱚᱸᱜᱟ ᱫᱚ ᱠᱟᱹᱯᱤ ᱵᱚᱸᱜᱟ ᱫᱚᱭ ᱵᱟᱝ ᱠᱟᱱᱟ ᱩᱱᱤᱭᱟᱜ ᱧᱩᱛᱩᱢ ᱫᱚ ᱵᱟᱝ ᱞᱟᱹᱭ ᱠᱚᱜᱼᱟ᱾ ᱚᱱᱠᱟ ᱛᱮ ᱨᱟᱡᱟ ᱚᱢᱚᱲ ᱠᱚ ᱯᱟᱨᱚᱢ ᱤᱫᱤᱭᱮᱱᱟ᱾ ᱵᱤᱦᱟᱨ ᱯᱚᱱᱚᱛ ᱨᱮ ᱴᱟᱴᱟ ᱵᱟᱡᱟᱨ ᱵᱮᱱᱟᱣ ᱮᱱᱟᱟ ᱟᱨ ᱱᱚᱸᱰᱮ ᱵᱷᱚᱸᱡᱽ ᱫᱤᱥᱚᱢ ᱦᱚᱸ ᱩᱰᱤᱥᱟ ᱯᱚᱱᱚᱛ ᱮᱱᱛᱮ ᱵᱟᱹᱨᱯᱟᱫᱟ ᱵᱟᱡᱟᱨ ᱵᱮᱱᱟᱣᱮᱱ ᱠᱷᱟᱱ ᱚᱱᱟ ᱨᱟᱡᱟ ᱰᱟᱦᱟᱨ ᱦᱚᱸ ᱧᱩᱛᱩᱢ ᱵᱚᱫᱚᱞᱮᱱᱟ ᱴᱟᱴᱟᱼᱵᱟᱹᱨᱯᱟᱫᱟ ᱟᱨ ᱩᱰᱤᱭᱟᱹ ᱯᱚᱱᱚᱛᱮᱱ ᱛᱮ ᱩᱰᱤᱭᱟᱹ ᱟᱲᱟᱝ ᱛᱮ ᱰᱟᱦᱟᱨᱰᱤ ᱦᱚᱸ ᱰᱟᱸᱰᱵᱩᱥ ᱧᱩᱛᱩᱢ ᱟᱠᱟᱱᱟ᱾

ᱱᱚᱝᱠᱟ ᱛᱮ ᱛᱮᱦᱮᱧ ᱫᱷᱟᱹᱨᱤᱡ ᱦᱚᱸ ᱡᱟᱦᱟᱸ ᱧᱤᱨ ᱵᱟᱧᱪᱟᱣ ᱟᱠᱟᱱ ᱵᱟᱥᱠᱮ ᱯᱟᱹᱨᱤᱥ ᱦᱚᱲ ᱟᱨ ᱵᱟᱝ ᱱᱚᱝᱠᱟᱱ ᱜᱷᱚᱴᱚᱱ ᱵᱟᱰᱟᱭ ᱟᱠᱟᱫ ᱵᱟᱥᱠᱮ ᱯᱟᱹᱨᱤᱥ ᱦᱚᱲ ᱫᱚ ᱚᱱᱟ ᱰᱩᱸᱜᱽᱨᱤ ᱟᱦᱟᱨ ᱰᱟᱹᱰᱤ ᱠᱚᱨᱮ ᱫᱚ ᱮᱠᱞᱟ ᱛᱚᱠᱞᱟ ᱵᱟᱠᱚ ᱥᱮᱱ ᱵᱟᱲᱟᱜᱼᱟ᱾ ᱟᱨ ᱵᱟᱥᱠᱮ ᱯᱟᱹᱨᱤᱥ ᱦᱚᱲ ᱨᱤᱱ ᱦᱚᱯᱚᱱ ᱮᱨᱟ ᱠᱚᱫᱚ ᱚᱱᱟ ᱟᱹᱛᱩ ᱨᱮᱠᱚ ᱴᱷᱟᱶ ᱵᱟᱲᱟ ᱟᱠᱟᱱᱟ ᱩᱱᱠᱩ ᱫᱚ ᱡᱟᱸᱦᱟᱱ ᱮᱴᱠᱮ ᱴᱚᱬᱮ ᱵᱟᱭ ᱦᱩᱭ ᱟᱠᱟᱱᱟ ᱛᱚᱵᱮ ᱛᱮᱦᱮᱧ ᱱᱚᱶᱟ ᱦᱩᱰᱤᱧᱼᱦᱩᱰᱤᱧ ᱠᱟᱛᱷᱟ ᱜᱮ ᱱᱚᱝᱠᱟ ᱞᱟᱹᱭᱩᱜ ᱨᱮᱭᱟᱜ ᱠᱟᱨᱚᱱ ᱫᱚ ᱟᱵᱚ ᱦᱚᱲ ᱦᱚᱯᱚᱱ ᱠᱚᱭᱤᱡ ᱵᱟᱧᱪᱟᱣ ᱜᱩᱨᱩ, ᱚᱞ ᱜᱩᱨᱩ, ᱞᱟᱠᱪᱟᱨ ᱜᱩᱨᱩ, ᱫᱷᱚᱨᱚᱢ ᱜᱩᱨᱩ, ᱠᱷᱮᱞᱚᱸᱰ ᱜᱩᱨᱩᱣᱟᱜ ᱡᱟᱱᱟᱢ ᱚᱱᱟ ᱵᱟᱥᱠᱮ ᱯᱟᱹᱨᱤᱥ ᱛᱷᱟᱯᱚᱱᱟᱜ ᱟᱹᱛᱩ ᱨᱮ ᱦᱩᱭ ᱟᱠᱟᱱ ᱛᱮ ᱟᱨ ᱚᱱᱟ ᱰᱟᱸᱰᱚ ᱰᱩᱸᱜᱽᱨᱤ ᱠᱚᱨᱮ ᱫᱷᱮᱭᱟᱱ ᱠᱟᱹᱢᱤ ᱠᱚ ᱦᱩᱭ ᱟᱠᱟᱱ ᱛᱮ ᱱᱚᱶᱟ ᱰᱟᱸᱰᱚ ᱰᱩᱸᱜᱽᱨᱤ ᱵᱟᱝ ᱠᱟᱹᱯᱤ ᱰᱩᱸᱜᱽᱨᱤ ᱫᱚ ᱟᱵᱚ ᱥᱟᱱᱛᱟᱲ ᱥᱟᱶᱛᱟ ᱨᱮ ᱠᱟᱹᱯᱤ ᱵᱩᱨᱩ ᱢᱮᱱᱛᱮ ᱟᱹᱰᱤ ᱢᱟᱨᱟᱝ ᱴᱷᱟᱶ ᱮ ᱟᱢᱮᱴ ᱟᱠᱟᱫᱼᱟ᱾ ᱟᱨ ᱱᱚᱶᱟ ᱦᱚᱸ ᱡᱚᱛᱚ ᱵᱚ ᱵᱟᱰᱟᱭᱟ ᱜᱩᱨᱩ ᱵᱟᱵᱟᱭᱤᱡ ᱚᱲᱟᱜ ᱮᱨᱟ ᱫᱚ ᱵᱟᱥᱠᱮ ᱯᱟᱹᱨᱤᱥ ᱠᱩᱲᱤ ᱜᱮᱭ ᱛᱟᱦᱮᱸ ᱠᱟᱱᱟ᱾ ᱛᱚᱵᱮ ᱡᱟᱶᱟᱭ ᱠᱟᱛᱮ ᱢᱟ ᱯᱟᱹᱨᱤᱥ ᱵᱚᱫᱚᱞᱚᱜ ᱛᱮᱭ ᱢᱩᱨᱢᱩ ᱞᱟᱱᱟ᱾ ᱟᱨ ᱡᱟᱸᱦᱟᱭ ᱦᱚᱲᱟᱜ ᱡᱟᱸᱦᱟᱱ ᱠᱟᱹᱢᱤ ᱨᱮ ᱡᱤᱛᱠᱟᱹᱨ ᱡᱛᱟᱭᱚᱢ ᱨᱮ ᱮᱨᱟ ᱦᱚᱲᱟᱜ ᱦᱚᱸ ᱟᱹᱰᱤ ᱢᱟᱨᱟᱝ ᱜᱚᱲᱚ ᱛᱟᱸᱦᱮᱱᱟ᱾ ᱦᱚᱭ ᱛᱚ ᱩᱱᱤ ᱵᱚᱸᱜᱟ ᱫᱚ ᱵᱟᱥᱠᱮ ᱯᱟᱹᱨᱤᱥ ᱠᱚᱫᱚ ᱮᱜᱮᱨ ᱛᱮᱜᱮ ᱮᱜᱮᱨ ᱞᱟᱜ ᱠᱚᱣᱟᱭ᱾ ᱢᱟᱱᱟᱣ ᱞᱮᱠᱷᱟᱱ ᱢᱟᱱᱟᱣ ᱠᱚᱜ ᱜᱮᱪᱚᱭ᱾ ᱛᱚᱵᱮ ᱠᱟᱛᱷᱟ ᱨᱮ ᱢᱮᱱᱟᱜ ᱡᱟᱸᱦᱟᱱᱟᱜ ᱜᱮ ᱦᱩᱭᱩᱜᱼᱟ ᱚᱱᱟ ᱫᱚ ᱵᱷᱟᱹᱜᱤᱭᱟᱜ ᱜᱮ ᱦᱩᱭᱩᱜᱼᱟ ᱟᱨ ᱡᱟᱦᱟᱸ ᱦᱩᱭᱩᱜᱼᱟ ᱚᱱᱟ ᱦᱚᱸ ᱵᱷᱟᱹᱜᱤ ᱜᱮ ᱦᱩᱭᱩᱜᱼᱟ᱾ ᱩᱱ ᱵᱮᱲᱟ ᱩᱱᱤ ᱰᱟᱸᱰᱚ ᱵᱚᱸᱜᱟ ᱟᱨ ᱵᱟᱥᱠᱮ ᱯᱟᱹᱨᱤᱥᱟᱜ ᱱᱮᱭᱟᱣ ᱠᱷᱟᱹᱛᱤᱨ ᱚᱱᱟ ᱵᱷᱟᱹᱜᱤ ᱴᱷᱟᱶ ᱵᱟᱥᱠᱮ ᱦᱚᱲ ᱠᱚ ᱟᱲᱟᱜ ᱠᱮᱫ ᱛᱮ ᱢᱩᱨᱢᱩ ᱦᱚᱲ ᱠᱚ ᱫᱚᱠᱷᱚᱞ ᱠᱮᱫᱼᱟ᱾ ᱟᱨ ᱢᱩᱨᱢᱩ ᱦᱚᱲᱟᱜ ᱠᱟᱹᱢᱤ ᱛᱮ ᱛᱮᱦᱮᱧ ᱟᱵᱚ ᱦᱚᱲ ᱦᱚᱯᱚᱱ ᱠᱷᱮᱨᱣᱟᱲ ᱵᱚᱝᱥᱚ, ᱥᱟᱱᱛᱟᱲ ᱥᱟᱹᱛ ᱫᱤᱥᱚᱢ ᱨᱮ ᱩᱯᱩᱨᱩᱢ ᱵᱚ ᱧᱟᱢ ᱟᱠᱟᱫᱼᱟ᱾ ᱚᱱᱟ ᱨᱮᱫᱚ ᱠᱷᱟᱹᱞᱤ ᱢᱩᱨᱢᱩ ᱥᱩᱢᱩᱝ ᱫᱚ ᱵᱟᱝ ᱵᱟᱥᱠᱮ ᱦᱚᱸ ᱥᱟᱶ ᱢᱮᱱᱟᱭ ᱜᱮᱭᱟ᱾

ᱱᱚᱶᱟ ᱠᱟᱛᱷᱟ ᱜᱷᱚᱴᱚᱱ ᱠᱚ ᱨᱮᱭᱟᱜ ᱡᱚᱥ ᱛᱮᱫ ᱫᱚ ᱛᱮᱦᱮᱧ ᱵᱚ ᱧᱮᱞᱟ᱾ ᱵᱟᱥᱠᱮ ᱦᱚᱲ ᱤᱫᱤ ᱠᱟᱛᱮ ᱰᱟᱸᱰᱚ ᱰᱩᱸᱜᱽᱨᱤ, ᱢᱩᱨᱢᱩ ᱦᱚᱲ ᱤᱫᱤ ᱠᱟᱛᱮ ᱠᱟᱹᱯᱤ ᱰᱩᱸᱜᱽᱨᱤ ᱟᱨ ᱜᱩᱨᱩ ᱜᱚᱢᱠᱮᱭᱟᱜ ᱠᱟᱹᱢᱤ ᱦᱚᱨᱟ ᱛᱮ ᱠᱟᱹᱯᱤ ᱵᱩᱨᱩ ᱞᱮᱠᱟ ᱛᱮ ᱟᱵᱚ ᱥᱟᱶᱛᱟ ᱨᱮ ᱟᱹᱰᱤ ᱱᱟᱢᱰᱟᱠ ᱵᱤᱠᱟᱹᱜ ᱠᱟᱱᱟ, ᱛᱚᱵᱮ ᱠᱟᱛᱷᱟ ᱫᱚ ᱱᱚᱶᱟ᱾ ᱱᱚᱶᱟ ᱠᱟᱹᱯᱤ ᱵᱩᱨᱩ ᱥᱟᱞᱟᱜ ᱡᱚᱱᱚᱲᱟᱣ ᱟᱵᱚᱣᱟᱜ ᱠᱟᱹᱢᱤᱦᱚᱨᱟ ᱠᱚ ᱟᱵᱚ ᱛᱤᱱᱟᱹᱜ ᱵᱚ ᱟᱯᱱᱟᱨᱟ, ᱩᱱᱟᱹᱜ ᱞᱚᱜᱚᱱ ᱜᱮ ᱟᱵᱚ ᱡᱟᱹᱛᱤ, ᱫᱷᱚᱨᱚᱢ, ᱥᱟᱶᱛᱟ ᱟᱨ ᱥᱟᱶᱦᱮᱫ ᱮᱴᱟᱜ ᱞᱟᱦᱟᱱᱛᱤ ᱥᱟᱶᱛᱟ ᱥᱟᱞᱟᱜ ᱯᱟᱱᱛᱮᱱᱚᱜᱼᱟ᱾

Written by ᱞᱚᱠᱷᱢᱚᱬ ᱵᱟᱥᱠᱮ