ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮ ᱟᱵᱚᱣᱟᱜ ᱚᱞ ᱪᱤᱠᱤ ᱛᱮ ᱥᱮᱪᱮᱫᱚᱜ ᱨᱮᱱᱟᱜ ᱫᱚᱥᱟ ᱟᱨ ᱫᱤᱥᱟᱹ

ᱡᱚᱛᱚᱵᱚᱱ ᱵᱟᱰᱟᱭ ᱜᱮᱭᱟ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱚᱥᱴᱨᱤᱠ ᱯᱟᱹᱨᱥᱤ ᱜᱷᱟᱸᱨᱚᱡᱽ ᱨᱮᱱᱟᱜ ᱢᱤᱫ ᱧᱩᱛᱩᱢᱟᱱ ᱯᱟᱹᱨᱥᱤ ᱠᱟᱱᱟ᱾ ᱱᱚᱣᱟ ᱨᱮᱱᱟᱜ ᱯᱟᱥᱱᱟᱣ ᱫᱚ ᱵᱷᱟᱨᱚᱛ ᱫᱤᱥᱚᱢ ᱨᱮᱫᱚ ᱡᱷᱟᱨᱠᱷᱚᱸᱰ, ᱵᱤᱦᱟᱨ, ᱯᱚᱪᱷᱤᱢ ᱵᱟᱝᱞᱟ, ᱩᱲᱤᱥᱟ, ᱟᱥᱟᱢ, ᱢᱚᱫᱫᱷᱭᱚ ᱯᱟᱨᱫᱮᱥ ᱮᱢᱟᱱ ᱯᱚᱱᱚᱛ ᱠᱚᱨᱮ ᱨᱚᱲᱚᱜᱚᱜ ᱠᱟᱱᱟ᱾ ᱵᱷᱟᱨᱚᱛ ᱫᱤᱥᱚᱢ ᱨᱮᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱨᱚᱨᱚᱲ ᱦᱚᱲ ᱫᱚ ᱢᱤᱫ ᱠᱟᱨᱚᱲ ᱠᱷᱚᱱ ᱦᱚᱸ ᱰᱷᱮᱨ ᱜᱮ ᱢᱮᱱᱟᱜ ᱵᱚᱱᱟ᱾ ᱡᱷᱟᱨᱠᱷᱚᱸᱰ ᱨᱮᱫᱚ ᱥᱟᱱᱛᱟᱲ ᱒᱔,᱑᱐,᱕᱐᱙ ᱢᱮᱱᱟᱜ ᱵᱚᱱᱟ ᱚᱱᱟ ᱢᱟᱹᱫᱽ ᱨᱮ ᱟᱹᱛᱩ ᱫᱤᱥᱚᱢ ᱨᱮᱫᱚ ᱒᱓,᱐᱒,᱘᱓᱐ ᱟᱨ ᱥᱚᱦᱚᱨ ᱵᱟᱡᱟᱨ ᱨᱮᱫᱚ ᱑,᱐᱗,᱖᱗᱙ ᱢᱮᱱᱟᱜ ᱵᱚᱱᱟ᱾

ᱟᱵᱚᱣᱟᱜ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱢᱤᱫ ᱯᱷᱩᱨᱜᱟᱹᱞ ᱟᱲᱟᱝ ᱠᱟᱱᱟ ᱟᱨ ᱱᱟᱯᱟᱭ ᱟᱹᱨᱤ ᱪᱟᱹᱞᱤ ᱛᱮ ᱛᱚᱞ ᱟᱠᱟᱱ ᱠᱤᱥᱟᱹᱬ ᱥᱟᱶᱦᱮᱫ ᱛᱮ ᱩᱨᱩᱱ ᱯᱩᱨᱩᱱ ᱛ ᱮ ᱱᱚᱶᱟ ᱨᱮᱱᱟᱜ ᱩᱱᱩᱨᱩᱢ ᱫᱚ ᱢᱮᱱᱟᱜ ᱜᱮᱭᱟ᱾ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱦᱮᱫ ᱨᱮᱭᱟᱜ ᱱᱟᱜᱟᱢ ᱨᱮ ᱒᱒ ᱰᱤᱥᱮᱢᱵᱚᱨ ᱒᱐᱐᱓ ᱨᱮᱱᱟᱜ ᱢᱚᱜᱚᱲᱵᱟᱨ ᱫᱚ ᱢᱤᱫ ᱱᱚᱝᱠᱟᱱ ᱥᱟᱹᱜᱩᱱ ᱢᱟᱦᱟᱸ ᱠᱟᱱᱟ ᱡᱟᱦᱟᱸ ᱫᱚ ᱟᱵᱚ ᱛᱤᱥ ᱦᱚᱸ ᱵᱟᱵᱚᱱ ᱦᱤᱲᱤᱧ ᱫᱟᱲᱮᱭᱟᱜᱼᱟ᱾ ᱱᱚᱣᱟ ᱥᱟᱹᱜᱩᱱ ᱢᱟᱦᱟᱸ ᱨᱮᱜᱮ ᱟᱵᱚᱣᱟᱜ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱥᱚᱝᱵᱤᱫᱷᱟᱱ ᱨᱮᱭᱟᱜ ᱒᱒ ᱯᱟᱹᱨᱥᱤ ᱞᱮᱠᱷᱟ ᱨᱮ ᱢᱟᱱᱚᱛ ᱮ ᱧᱟᱢ ᱠᱮᱫᱟᱼᱟ᱾

ᱟᱵᱚᱣᱟᱜ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱚᱝᱵᱤᱫᱷᱟᱱ ᱨᱮᱭᱟᱜ ᱤᱨᱟᱹᱞ ᱫᱷᱟᱯ ᱨᱮ ᱥᱮᱞᱮᱫ ᱠᱟᱛᱮ ᱛᱩᱨᱩᱭ ᱥᱮᱨᱢᱟᱭ ᱯᱟᱨᱚᱢ ᱠᱮᱫᱟ ᱢᱮᱱᱠᱷᱟᱱ ᱩᱠᱩᱨ ᱱᱤᱛ ᱦᱚᱸ ᱟᱵᱚᱣᱟᱜ ᱯᱟᱹᱨᱥᱤ ᱨᱟᱱᱟᱠᱟᱵ ᱥᱮᱱ ᱢᱟ ᱵᱟᱭ ᱧᱮᱞ ᱧᱟᱢ ᱞᱮᱱᱟ᱾ ᱯᱟᱹᱨᱥᱤ ᱤᱨᱟᱹᱞ ᱫᱷᱟᱯ ᱨᱮ ᱢᱮᱥᱥᱟᱭᱮᱱ ᱛᱟᱭᱱᱚᱢ ᱟᱵᱚᱣᱟᱜ ᱦᱚᱸ ᱟᱹᱰᱤᱜᱟᱱ ᱠᱩᱠᱢᱩ ᱛᱟᱸᱦᱮ ᱠᱟᱱᱟ ᱵᱟᱝᱢᱟ᱾ ᱯᱟᱹᱨᱥᱤ ᱞᱟᱦᱟᱜ ᱥᱟᱶ ᱥᱟᱶᱛᱮ ᱥᱟᱶᱦᱮᱫ ᱦᱚᱸ ᱞᱟᱦᱟᱜᱼᱟ, ᱥᱟᱶᱦᱮᱫ ᱞᱟᱦᱟᱜ ᱥᱟᱶ ᱥᱟᱶᱛᱮ ᱟᱵᱚ ᱦᱚᱸᱵᱚᱱ ᱞᱟᱦᱟᱜᱼᱟ ᱮᱴᱟᱜ ᱯᱟᱹᱨᱥᱤ ᱜᱷᱟᱨᱚᱸᱡᱽᱡ ᱨᱤᱱ ᱦᱚᱲ ᱠᱚ ᱞᱮᱠᱟ᱾ ᱩᱭᱦᱟᱹᱨ ᱞᱮᱱᱟ ᱥᱟᱱᱟᱢ ᱦᱚᱲᱟᱜ ᱢᱚᱱᱮ ᱨᱮ ᱯᱟᱹᱨᱥᱤ ᱨᱚᱨᱚᱲ ᱞᱟᱹᱜᱤᱫ ᱯᱟᱹᱨᱥᱤ ᱞᱟᱦᱟᱭ ᱞᱟᱹᱜᱤᱫ ᱨᱟᱹᱥᱠᱟᱹ ᱥᱟᱨᱦᱟᱣᱜᱼᱟ, ᱥᱟᱱᱟᱝ ᱪᱟᱢᱯᱮᱞᱚᱜᱼᱟ᱾ ᱢᱮᱱᱠᱷᱟᱱ ᱩᱠᱩᱨ ᱮᱭᱟᱭ ᱥᱮᱨᱢᱟᱭ ᱞᱮᱵᱮᱫᱽ ᱞᱟᱹᱜᱤᱫ ᱱᱤᱛ ᱦᱚᱸᱛᱚ ᱚᱱᱠᱟ ᱢᱟ ᱵᱟᱭ ᱟᱴᱠᱟᱨᱚᱜ ᱠᱟᱱᱟ᱾ ᱟᱵᱚᱣᱟᱜ ᱠᱩᱠᱢᱩ ᱠᱩᱠᱢᱩ ᱨᱮᱜᱮ ᱛᱟᱸᱦᱮᱭᱮᱱᱟ ᱱᱤᱛ ᱫᱷᱟᱹᱵᱤᱡ ᱤᱥᱠᱩᱞ ᱠᱚᱞᱮᱡᱽ ᱠᱚᱨᱮ ᱱᱟᱯᱟᱭ ᱥᱟᱹᱦᱤᱸᱡᱽ ᱚᱞ ᱯᱟᱲᱦᱟᱣ ᱜᱮᱵᱚᱱ ᱮᱦᱚᱵ ᱫᱟᱲᱮ ᱟᱠᱟᱣᱟᱫᱼᱟ᱾

ᱱᱤᱛ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱚᱠᱟ ᱫᱚᱵᱟᱹᱴᱤᱭᱟᱹ ᱨᱮ ᱛᱤᱸᱜᱩ ᱟᱠᱟᱱᱟ? ᱡᱚᱛᱚᱠᱷᱚᱱ ᱢᱟᱲᱟᱝ ᱱᱚᱣᱟ ᱠᱩᱠᱞᱤ ᱟᱵᱚ ᱥᱟᱢᱟᱝ ᱨᱮ ᱦᱤᱡᱩᱜ ᱠᱟᱱᱟ᱾ ᱚᱠᱟ ᱩᱭᱦᱟᱹᱨ ᱟᱸᱥ ᱫᱚᱦᱚ ᱠᱟᱛᱮ ᱟᱵᱚᱨᱤᱱ ᱦᱟᱯᱲᱟᱢ ᱠᱚ ᱟᱠᱚᱣᱟᱜ ᱡᱤᱣᱤ ᱠᱚ ᱟᱞᱟᱭ ᱞᱮᱫᱼᱟ ᱩᱱᱠᱩᱣᱟᱜ ᱚᱱᱟ ᱩᱭᱦᱟᱨᱹ ᱠᱩᱠᱢᱩ ᱦᱟᱭ ᱥᱟᱹᱨᱤ ᱞᱮᱱᱟ᱾ ᱵᱤᱦᱟᱨ ᱠᱷᱚᱱ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱨᱩᱯ ᱢᱚᱦᱚᱨ ᱫᱚ ᱵᱟᱭ ᱵᱚᱫᱚᱞ ᱞᱮᱱᱟ᱾ ᱵᱤᱦᱟᱨ ᱯᱚᱱᱚᱛ ᱨᱮ ᱪᱮᱫ ᱞᱮᱠᱟ ᱟᱵᱚᱣᱟᱜ ᱫᱚᱥᱟ ᱛᱟᱸᱦᱮ ᱠᱟᱱᱟ ᱛᱮᱦᱮᱧ ᱦᱚᱸ ᱚᱱᱠᱟ ᱜᱮ ᱢᱮᱱᱟᱜᱼᱟ ᱧᱮᱞ ᱠᱷᱟᱱᱮᱢ ᱚᱱᱟ ᱠᱷᱚᱱ ᱦᱚᱸ ᱟᱨᱦᱚᱸ ᱠᱟᱹᱦᱤᱞ ᱪᱟᱵᱟ ᱟᱠᱟᱱᱟ᱾ ᱟᱵᱚ ᱚᱠᱟᱨᱮ ᱤᱨᱟᱹᱞ ᱜᱮᱞ ᱥᱮᱨᱢᱟ ᱞᱟᱦᱟ ᱨᱮᱵᱚᱱ ᱛᱤᱸᱜᱩ ᱞᱮᱱᱟ ᱱᱤᱛᱦᱚᱸ ᱚᱸᱰᱮ ᱜᱮ ᱢᱮᱱᱟᱜ ᱵᱚᱱᱟ᱾ ᱪᱮᱫᱟᱜ? ᱱᱚᱣᱟ ᱪᱮᱫᱟᱜ ᱨᱮᱱᱟᱜ ᱞᱟᱹᱱᱟᱹᱭ ᱫᱚ ᱟᱵᱚ ᱜᱮ ᱯᱟᱱᱛᱮ ᱦᱩᱭ ᱟᱵᱚᱱᱟ᱾ ᱛᱮᱦᱮᱧ ᱫᱷᱟᱹᱵᱤᱡ ᱡᱟᱦᱟᱸ ᱛᱤᱱᱟᱹᱜ ᱜᱮ ᱦᱚᱲᱟᱜ ᱛᱤᱨᱮ ᱯᱚᱱᱚᱛ ᱨᱮᱭᱟᱜ ᱵᱟᱹᱨᱟᱹᱦᱤ ᱛᱟᱸᱦᱮ ᱠᱟᱱᱟ ᱡᱚᱛᱚ ᱠᱚᱜᱮ ᱱᱚᱰᱮᱨᱤᱱ ᱦᱚᱲᱟᱜ ᱟᱸᱥ ᱠᱩᱠᱢᱩ ᱠᱚ ᱞᱮᱵᱮᱫ ᱜᱮᱡᱮᱨ ᱪᱟᱵᱟ ᱠᱮᱫᱼᱟ, ᱚᱠᱚᱭ ᱦᱚᱸ ᱟᱵᱚᱣᱟᱜ ᱢᱚᱱᱮ ᱵᱷᱤᱛᱨᱤ ᱩᱭᱩᱜ ᱞᱟᱹᱜᱤᱫ ᱫᱚ ᱵᱟᱠᱚ ᱪᱮᱥᱴᱟ ᱞᱮᱫᱼᱟ᱾ ᱚᱠᱚᱭ ᱦᱚᱸ ᱟᱵᱚᱣᱟᱜ ᱥᱟᱱᱟᱝ ᱵᱟᱰᱟᱭ ᱞᱟᱹᱜᱤᱫ ᱵᱟᱠᱚ ᱩᱭᱦᱟᱹᱨ ᱞᱮᱫᱼᱟ᱾ ᱩᱭᱦᱟᱹᱨ ᱛᱟᱸᱦᱮ ᱞᱮᱱᱟ ᱟᱵᱚᱣᱟᱜ ᱯᱚᱱᱚᱛ ᱧᱟᱢ ᱠᱟᱛᱮ ᱟᱵᱚᱣᱟᱜ ᱯᱚᱱᱚᱛ ᱨᱮ, ᱟᱵᱚ ᱞᱮᱠᱟ, ᱟᱵᱚ ᱠᱩᱥᱤ ᱵᱚᱱ ᱛᱟᱸᱦᱮᱱᱟ ᱢᱮᱱᱛᱮ ᱟᱵᱚᱣᱟᱜ ᱯᱚᱱᱳᱛ ᱨᱮ ᱟᱵᱚᱣᱟᱜ ᱨᱟᱡᱽ ᱵᱷᱟᱥᱟ ᱦᱩᱭᱩᱜᱼᱟ, ᱟᱵᱚᱣᱟᱜ ᱡᱚᱛᱚ ᱞᱮᱠᱟᱱ ᱟᱸᱥ ᱠᱩᱠᱢᱩ ᱯᱩᱨᱟᱹᱣᱜᱼᱟ ᱟᱨ ᱡᱚᱛᱚ ᱞᱮᱠᱟᱱ ᱦᱚᱠ ᱟᱹᱭᱫᱟᱹᱨᱤ ᱵᱚᱱ ᱧᱟᱢᱟ ᱟᱨ ᱟᱵᱚᱣᱟᱜ ᱯᱚᱱᱚᱛ ᱨᱮ ᱟᱵᱚᱣᱟᱜ ᱥᱟᱱᱟᱝ ᱞᱮᱠᱟ ᱵᱚᱱ ᱠᱟᱹᱢᱤᱭᱟ᱾ ᱥᱤᱫᱚᱼᱠᱟᱹᱱᱦᱩ, ᱪᱟᱸᱫᱽᱼᱵᱷᱟᱭᱨᱚᱵᱽ, ᱯᱷᱩᱞᱚᱼᱡᱷᱟᱱᱚ, ᱛᱤᱞᱠᱟᱹ ᱢᱟᱹᱡᱷᱤ, ᱵᱤᱨᱥᱟᱹ ᱢᱩᱱᱰᱟᱹ ᱟᱨ ᱜᱮᱥᱟᱭ ᱜᱮᱥᱟᱭ ᱟᱵᱚᱨᱮᱱ ᱵᱤᱨ ᱠᱚᱣᱟᱜ ᱟᱛᱨᱟ ᱠᱩᱠᱢᱩ ᱥᱚᱛᱚᱜᱼᱟ ᱢᱮᱱᱛᱮ᱾

ᱡᱷᱟᱨᱠᱷᱚᱸᱰ ᱯᱚᱱᱚᱛ ᱜᱚᱴᱷᱚᱱ ᱮᱱ ᱛᱟᱭᱚᱢ ᱱᱚᱝᱠᱟ ᱦᱚᱸ ᱟᱸᱥ ᱛᱟᱸᱦᱮ ᱠᱟᱱᱟ ᱡᱷᱟᱨᱠᱷᱚᱸᱰ ᱥᱚᱨᱠᱟᱨ ᱟᱵᱚ ᱨᱟᱠᱟᱵ ᱞᱟᱹᱜᱤᱫ ᱜᱟᱹᱦᱤᱨ ᱩᱭᱦᱟᱹᱨ ᱛᱟᱭ ᱢᱮᱱᱟᱜᱼᱟ ᱟᱨ ᱢᱤᱫ ᱫᱤᱱ ᱦᱤᱞᱚᱜ ᱟᱵᱚ ᱦᱚᱸᱵᱚᱱ ᱨᱟᱠᱟᱵ ᱜᱮᱭᱟ ᱢᱮᱱᱛᱮ ᱯᱟᱹᱛᱭᱟᱹᱣ ᱛᱟᱸᱦᱮ ᱠᱟᱱᱟ᱾ ᱥᱮᱫᱟᱭ ᱥᱚᱱᱮᱜᱚᱲ ᱜᱟᱲ ᱞᱤᱞᱤ ᱵᱤᱪᱷᱤ ᱪᱟᱹᱭ ᱪᱟᱢᱯᱟᱹ ᱵᱟᱫᱚᱞᱚᱤ ᱠᱚᱸᱭᱰᱟ ᱞᱮᱠᱟᱱ ᱱᱟᱜᱟᱢ ᱛ ᱮ ᱚᱨᱥᱚᱝ ᱠᱟᱛᱮ ᱟᱵᱚᱣᱟᱜ ᱦᱤᱡᱩᱜ ᱠᱟᱱ ᱫᱤᱢ ᱨᱟᱹᱥᱠᱟᱹ ᱨᱚᱢᱚᱡᱽ ᱛᱮ ᱛᱟᱸᱦᱮᱱ ᱢᱟ ᱢᱮᱱᱛᱮ ᱚᱞ ᱟᱠᱷᱚᱨᱮ ᱵᱮᱱᱟᱣᱟ᱾ ᱩᱱᱠᱩᱣᱟᱜ ᱡᱟᱸᱜᱟ ᱯᱟᱸᱡᱟ ᱨᱮ ᱞᱮᱵᱮᱫ ᱠᱟᱛᱮ ᱜᱮ ᱞᱤᱞᱤ ᱵᱤᱪᱷᱤ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱠᱷᱩᱱᱴᱤ ᱫᱚᱵᱚᱱ ᱛᱤᱸᱜᱩᱭᱟ᱾ ᱢᱮᱱᱠᱷᱟᱱ ᱩᱠᱩᱨ ᱱᱤᱛ ᱫᱷᱟᱹᱵᱤᱡ ᱛᱮ ᱪᱮᱫ ᱠᱟᱹᱢᱤ ᱦᱚᱸᱛᱚ ᱵᱷᱟᱹᱜᱤ ᱞᱮᱠᱟ ᱛᱮᱢᱟ ᱵᱟᱭ ᱥᱟᱨ ᱥᱟᱹᱜᱩᱱ ᱞᱮᱱᱟ᱾ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱦᱤᱡᱩᱜ ᱠᱟᱱ ᱟᱜᱟᱢ ᱥᱮᱫ ᱠᱚᱭᱚᱜ ᱞᱮᱠᱷᱟᱱ ᱧᱮᱞ ᱧᱟᱢᱚᱜ ᱠᱟᱱᱟ ᱵᱟᱝ ᱢᱟ ᱱᱚᱣᱟ ᱫᱚ ᱥᱟᱱᱟᱢ ᱯᱟᱲᱟ ᱜᱮ ᱧᱩᱛ ᱜᱮᱭᱟ᱾

ᱱᱤᱛ ᱫᱚ ᱟᱵᱚᱨᱤᱱ ᱨᱮᱸᱜᱮᱡ ᱱᱤᱫᱷᱟᱹᱱ ᱦᱚᱲ ᱠᱚᱦᱚᱸ ᱜᱤᱫᱽᱨᱟᱹ ᱚᱞ ᱯᱟᱲᱦᱟᱣ ᱯᱟᱦᱴᱟ ᱠᱚ ᱞᱮᱣᱮ ᱟᱠᱟᱱᱟ᱾ ᱟᱹᱛᱩ ᱫᱤᱥᱚᱢ ᱨᱮᱱ ᱥᱟᱱᱟᱢ ᱦᱚᱲ ᱜᱮ ᱠᱩᱲᱤ ᱜᱤᱫᱽᱨᱟᱹ ᱟᱨ ᱠᱚᱲᱟ ᱜᱤᱫᱽᱨᱟᱹ ᱡᱚᱛᱚ ᱜᱮ ᱥᱚᱢᱟᱱ ᱛᱮᱠᱚ ᱚᱞ ᱯᱟᱲᱦᱟᱣ ᱚᱪᱚᱭᱮᱫ ᱠᱚᱣᱟ᱾ ᱥᱟᱱᱟᱢ ᱦᱚᱲᱟᱜ ᱩᱭᱦᱟᱹᱨ ᱨᱮ ᱵᱚᱱᱚᱫᱚᱞ ᱦᱮᱡ ᱟᱠᱟᱱᱟ᱾ ᱱᱤᱛᱚᱜ ᱡᱩᱜᱽ ᱨᱤᱱ ᱥᱟᱱᱟᱢ ᱦᱚᱲ ᱜᱮ ᱦᱚᱲᱟᱜ ᱨᱚᱲ ᱫᱚ ᱵᱟᱠᱚ ᱠᱷᱟᱹᱛᱤᱨᱟᱜ ᱠᱟᱱᱟ, ᱢᱮᱱᱠᱷᱟᱱ ᱩᱱᱠᱩᱣᱟᱜ ᱜᱟᱹᱦᱤᱨ ᱩᱭᱦᱟᱹᱨ ᱨᱮᱱᱟᱜ ᱚᱵᱷᱟᱵᱽ ᱢᱱᱮᱱᱟᱜᱼᱟ᱾

ᱟᱵᱚ ᱨᱟᱠᱟᱵ ᱞᱟᱹᱜᱤᱫ ᱡᱷᱟᱨᱠᱷᱚᱸᱰ ᱥᱚᱨᱠᱟᱨ ᱯᱟᱦᱴᱟ ᱠᱷᱚᱱ ᱦᱚᱸ ᱟᱹᱰᱤᱜᱟᱱ ᱥᱮᱪᱮᱫ ᱠᱟᱹᱢᱤ ᱦᱚᱨᱟ ᱠᱚ ᱮᱦᱚᱵ ᱟᱠᱟᱫ ᱜᱮᱭᱟ ᱢᱮᱱᱠᱷᱟᱱ ᱱᱚᱣᱟ ᱠᱟᱢᱤ ᱦᱚᱨᱟ ᱩᱱᱟᱹᱜ ᱫᱚ ᱦᱤᱛ ᱨᱮ ᱵᱟᱭ ᱞᱟᱜᱟᱜ ᱠᱟᱱᱟ᱾ ᱱᱤᱛᱚᱜ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱥᱮᱪᱮᱫ ᱴᱷᱟᱶ ᱫᱚ ᱦᱩᱭᱩᱭᱜ ᱠᱟᱱᱟ᱾

ᱱᱚᱝᱠᱟ ᱛᱮ ᱵᱟᱰᱟᱭ ᱧᱟᱢᱚᱜ ᱠᱟᱱᱟ ᱟᱵᱚ ᱫᱚ ᱛᱤᱱᱟᱹᱜ ᱞᱟᱛᱟᱨ ᱨᱮ ᱢᱮᱱᱟᱜ ᱟᱠᱟᱫ ᱵᱚᱱᱟ ᱮᱴᱟᱜ ᱯᱚᱱᱚᱛ ᱠᱚᱨᱮ ᱠᱷᱚᱱ᱾ ᱚᱱᱟᱛᱮ ᱱᱤᱛᱚᱝ ᱫᱚ ᱟᱹᱰᱤ ᱞᱚᱜᱚᱱ ᱛᱮ ᱡᱩᱫᱤ ᱟᱵᱚᱣᱟᱜ ᱯᱟᱹᱨᱥᱤ ᱯᱟᱥᱱᱟᱣ ᱥᱚᱱᱟᱭᱮᱫ ᱵᱚᱱ ᱠᱷᱟᱱ ᱫᱚ ᱡᱷᱟᱨᱠᱷᱚᱸᱰ ᱨᱮᱱᱟᱜ ᱡᱚᱛᱚ ᱡᱤᱞᱟᱹ ᱨᱮᱭᱟᱜ ᱡᱚᱛᱚ ᱡᱷᱟᱨᱠᱷᱚᱸᱰ ᱨᱮᱭᱟᱜ ᱯᱟᱨᱟᱭᱢᱟᱨᱤ ᱟᱨ ᱢᱤᱰᱤᱞ ᱤᱥᱠᱩᱞ ᱨᱮ ᱞᱚᱜᱚᱱ ᱛᱮ ᱞᱚᱜᱚᱱ ᱟᱵᱚᱣᱟᱜ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱚᱞ ᱯᱟᱲᱦᱟᱣ ᱵᱚᱱ ᱮᱦᱚᱵ ᱚᱪᱚᱭ ᱢᱟ᱾ ᱚᱱᱟ ᱥᱟᱶᱛᱮ ᱡᱟᱦᱟᱸ ᱡᱟᱦᱟᱸ ᱠᱚᱨᱮ ᱢᱟᱪᱮᱛ ᱨᱮᱱᱟᱜ ᱚᱵᱷᱟᱵᱽ ᱢᱮᱱᱟᱜ ᱠᱚᱠᱷᱟᱱ ᱞᱚᱜᱚᱱ ᱛᱮ ᱞᱚᱜᱚᱱ ᱚᱞ ᱪᱤᱠᱤ ᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱵᱟᱰᱟᱭ ᱢᱟᱪᱮᱛ ᱠᱚᱠᱚ ᱦᱟᱛᱟᱣ ᱢᱟ ᱟᱨ ᱚᱱᱟ ᱞᱚᱜᱚᱱ ᱵᱟᱭ ᱦᱩᱭ ᱫᱟᱲᱮᱭᱟᱜ ᱠᱷᱟᱱ ᱥᱟᱱᱛᱟᱲᱤ ᱯᱟᱹᱨᱥᱤ ᱞᱟᱹᱜᱤᱫ ᱫᱚ ᱯᱟᱨᱟ ᱢᱟᱪᱮᱛ ᱠᱦᱚᱸ ᱠᱚ ᱟᱹᱪᱩ ᱠᱚᱢᱟ ᱚᱱᱟ ᱥᱟᱶᱛᱮ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱯᱟᱦᱴᱟ ᱥᱮᱫ ᱠᱷᱚᱱ ᱥᱟᱱᱛᱟᱲᱤ ᱟᱠᱟᱫᱮᱢᱤ ᱦᱚᱸ ᱞᱚᱜᱚᱱ ᱛᱮ ᱞᱚᱜᱚᱱ ᱵᱮᱨᱮᱫᱽ ᱢᱟᱠᱚ ᱚᱱᱟ ᱥᱟᱶᱛᱮ ᱯᱟᱲᱦᱟᱣ ᱞᱟᱹᱜᱤᱫ ᱛᱮ ᱞᱚᱜᱚᱱ ᱛᱮ ᱞᱚᱜᱚᱱ ᱯᱚᱛᱚᱵ ᱠᱚ ᱪᱷᱟᱯᱟᱜ ᱢᱟ᱾

ᱱᱤᱛ ᱟᱵᱚᱣᱟᱜ ᱯᱟᱹᱨᱥᱤ ᱚᱞ ᱪᱤᱠᱤ ᱛᱮ ᱦᱟᱨᱟ ᱵᱩᱨᱩ ᱞᱟᱹᱜᱤᱫ ᱫᱚ ᱟᱹᱰᱤ ᱛᱮᱫ ᱜᱮ ᱪᱷᱩᱴᱟᱹᱣ ᱦᱩᱭᱩᱜ ᱛᱟᱵᱱᱚᱱᱟ, ᱱᱤᱛᱚᱜ ᱮᱵᱷᱮᱱᱚᱜ ᱦᱩᱭᱩᱜ ᱛᱟᱵᱚᱱᱟ, ᱪᱮᱴᱠᱟᱨᱚᱜ ᱞᱟᱹᱜᱤᱫ, ᱡᱩᱢᱤᱫᱚᱜ ᱞᱟᱹᱜᱤᱫ, ᱜᱟᱫᱮᱞ ᱨᱮ ᱛᱟᱸᱦᱮ ᱠᱟᱛᱮ ᱜᱮ ᱟᱵᱚᱣᱟᱜ ᱪᱤᱠᱤ ᱫᱚᱵᱚᱱ ᱦᱟᱨᱟ ᱨᱟᱠᱟᱵ ᱫᱟᱲᱮᱭᱟᱜᱼᱟ ᱟᱨᱵᱚᱱ ᱜᱮᱞᱮ ᱵᱤᱞᱤ ᱚᱪᱚ ᱫᱟᱲᱮᱭᱟᱜᱼᱟ᱾ ᱦᱟᱹᱯᱤᱫ ᱛᱷᱤᱨ ᱛᱷᱟᱨ ᱠᱟᱛᱮ ᱫᱚ ᱪᱮᱫ ᱦᱚᱸ ᱵᱟᱵᱚᱱ ᱪᱮᱠᱟ ᱫᱟᱲᱮᱟᱭᱜᱼᱟ᱾ ᱱᱤᱛ ᱫᱚ ᱢᱤᱫ ᱦᱚᱨ ᱛᱮ ᱛᱟᱲᱟᱢ ᱠᱟᱛᱮ ᱢᱤᱫ ᱰᱟᱦᱟᱨ ᱛᱮ ᱢᱚᱦᱰᱟ ᱠᱟᱛᱮ ᱟᱵᱚᱣᱟᱜ ᱡᱟᱱᱟᱢ ᱟᱲᱟᱝ ᱡᱟᱱᱟᱢ ᱯᱟᱹᱨᱥᱤ ᱟᱨ ᱚᱞ ᱪᱤᱠᱤ ᱛᱮ ᱥᱮᱪᱮᱫᱚᱜ ᱞᱟᱹᱜᱤᱫ ᱯᱚᱱᱚᱛ ᱥᱚᱨᱠᱟᱨ ᱴᱷᱮᱱ ᱫᱟᱹᱵᱤ ᱵᱚᱱ ᱫᱚᱦᱚᱭ ᱢᱟ ᱟᱨᱵᱚᱱ ᱵᱟᱛᱟᱣ ᱚᱪᱚᱭᱮᱢᱟ᱾ ᱱᱚᱶᱟ ᱛᱮ ᱥᱮᱪᱮᱫ ᱞᱮᱱᱠᱷᱟᱱ ᱯᱟᱞᱮᱱ ᱥᱟᱱᱟᱢ ᱦᱚᱲᱟᱜ ᱢᱚᱱᱮ ᱨᱮ ᱱᱚᱣᱟ ᱩᱭᱦᱟᱹᱨ ᱥᱟᱨᱥᱟᱣᱚᱜᱼᱟ, ᱱᱟᱶᱟ ᱮᱵᱷᱮᱱ, ᱱᱟᱶᱟ ᱪᱮᱴᱠᱟᱨ ᱦᱤᱡᱩᱜᱼᱟ᱾

ᱱᱤᱛ ᱫᱚ ᱥᱟᱶᱛᱟ ᱨᱮᱭᱟᱜ ᱥᱮᱪᱮᱫ ᱪᱤᱛᱟᱹᱨ ᱵᱟᱭᱼᱵᱟᱹᱭ ᱛᱮᱵᱚᱱ ᱵᱚᱫᱚᱞ ᱢᱟ᱾ ᱱᱚᱶᱟ ᱞᱟᱹᱜᱤᱫ ᱫᱚ ᱟᱵᱚᱣᱟᱜ ᱩᱭᱦᱟᱹᱨ ᱵᱚᱫᱚᱞ ᱦᱩᱭᱟᱵᱚᱱᱟ, ᱟᱵᱚᱣᱟᱜ ᱢᱩᱠᱨᱩᱲ ᱩᱭᱦᱟᱹᱨ ᱪᱟᱸᱫᱷᱮᱲ ᱨᱟᱠᱟᱵ ᱞᱟᱹᱜᱤᱫ ᱫᱚ ᱟᱵᱚ ᱪᱷᱩᱴᱟᱹᱣ ᱦᱩᱭᱩᱜ ᱛᱟᱵᱚᱱᱟ᱾ ᱥᱮᱪᱮᱫ ᱯᱟᱦᱴᱟ ᱡᱟᱦᱟᱸᱴᱟᱜ ᱜᱮ ᱮᱴᱠᱮ ᱴᱚᱬᱮ ᱢᱮᱱᱟᱜᱼᱟ ᱚᱱᱟ ᱠᱚ ᱯᱷᱚᱴᱮᱞ ᱯᱟᱥᱱᱟᱣ ᱠᱟᱛᱮ ᱚᱱᱟ ᱠᱚ ᱥᱟᱦᱟ ᱨᱮᱭᱟᱜ ᱵᱚᱱ ᱨᱤᱠᱟᱹᱭ ᱢᱟ᱾ ᱮᱛᱚᱦᱚᱵ ᱟᱥᱲᱟ ᱠᱚᱨᱮ ᱠᱷᱚᱱ ᱜᱮ ᱱᱤᱛ ᱞᱟᱹᱠᱛᱤ ᱦᱩᱭ ᱟᱠᱟᱱᱟ ᱥᱮᱪᱮᱫᱚᱜ ᱨᱮᱭᱟᱜ ᱦᱚᱨᱟ ᱟᱞᱜᱟ ᱦᱩᱭᱩᱜ ᱢᱟ, ᱥᱟᱶᱤᱫᱷᱟᱱ ᱨᱮ ᱚᱞ ᱢᱮᱱᱟᱜᱼᱟ, ᱨᱟᱭᱤᱴ ᱴᱩ ᱮᱡᱩᱠᱮᱥᱚᱱ ᱥᱮᱪᱮᱫᱚᱜ ᱨᱮᱭᱟᱜ ᱦᱚᱠ ᱟᱹᱭᱫᱟᱹᱨᱤ ᱨᱮᱭᱟᱜ ᱢᱟ ᱵᱮᱵᱚᱥᱛᱟ ᱢᱮᱱᱟᱜ ᱜᱮ, ᱢᱮᱱᱠᱷᱟᱱ ᱚᱱᱟ ᱫᱚ ᱱᱤᱛ ᱨᱟᱭᱤᱴ ᱴᱩ ᱞᱟᱨᱱ ᱪᱮᱫᱚᱜ ᱨᱮᱱᱟᱜ ᱦᱚᱠ ᱟᱹᱭᱫᱟᱹᱨᱤ ᱨᱮᱭᱟᱜ ᱦᱚᱸ ᱵᱮᱵᱚᱥᱛᱟ ᱦᱩᱭᱩᱜ ᱛᱟᱵᱚᱱᱟ᱾ ᱩᱱᱠᱩ ᱨᱟᱡᱟᱨᱤᱭᱟᱹ ᱠᱚᱣᱟᱜ ᱢᱚᱱᱮ ᱨᱮ ᱱᱚᱶᱟ ᱩᱭᱦᱟᱹᱨ ᱟᱹᱜᱩ ᱦᱩᱭ ᱟᱵᱚᱱᱟ ᱡᱮ ᱥᱮᱪᱮᱫᱚᱜ ᱯᱟᱦᱴᱟ ᱠᱟᱹᱢᱤ ᱞᱮᱠᱷᱟᱱ ᱟᱹᱰᱤᱜᱟᱱ ᱮᱠᱴᱮᱴᱚᱬᱮ ᱥᱟᱦᱟ ᱫᱟᱲᱮᱭᱟᱜᱼᱟ ᱪᱮᱠᱟᱛᱮ ᱥᱟᱱᱟᱢᱟᱜ ᱜᱮᱛᱚ ᱥᱮᱪᱮᱫ ᱥᱟᱶᱛᱮᱜᱮ ᱡᱚᱱᱚᱲᱟᱣ ᱢᱮᱱᱟᱜᱼᱟ᱾

ᱚᱱᱟᱛᱮ ᱱᱤᱛ ᱫᱚ ᱥᱟᱱᱟᱢ ᱠᱚᱜᱮ ᱚᱞ ᱪᱤᱠᱤ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱥᱮᱪᱮᱫ ᱠᱟᱛᱮ ᱢᱟᱲᱟᱝ ᱥᱮᱫ ᱵᱚᱱ ᱞᱟᱦᱟᱜ ᱢᱟ ᱟᱨ ᱟᱵᱚᱣᱟᱜ ᱥᱟᱶᱛᱟ ᱨᱮᱱᱟᱜ ᱟᱹᱨᱤ ᱪᱟᱹᱞᱤ ᱟᱪᱟᱨ ᱵᱮᱵᱷᱟᱨ ᱟᱹᱱ ᱟᱹᱨᱤ ᱵᱚᱱ ᱵᱟᱰᱟᱭ ᱧᱟᱢ ᱫᱟᱲᱮᱟᱭᱜᱼᱟ᱾ ᱱᱤᱛ ᱫᱚ ᱥᱮᱪᱮᱫᱚᱜ ᱥᱟᱶ ᱥᱟᱶᱛᱮ ᱥᱟᱶᱦᱮᱫ ᱠᱟᱹᱢᱤ ᱨᱮᱦᱚᱸ ᱜᱟᱫᱮᱞ ᱜᱟᱫᱮᱞ ᱨᱮᱵᱚᱱ ᱠᱷᱚᱸᱡᱟᱜ ᱢᱟ᱾

Written by ᱡᱚᱵᱟ ᱢᱩᱨᱢᱩ
Published on Holong Gada (Jan – Jun, 2011)