ᱫᱩᱞᱟᱹᱲ ᱵᱟᱜᱟᱱ ᱵᱟᱦᱟ

ᱵᱟᱦᱟ ᱡᱩᱫᱤ ᱵᱟᱜᱟᱱ ᱛᱟᱞᱟ
ᱮᱴᱮᱫ ᱮᱥᱮᱫ ᱫᱩᱞᱟᱹᱲ ᱨᱮ
ᱪᱮᱦᱚᱨ ᱵᱮᱦᱚᱨ ᱞᱚᱴᱟ ᱫᱟᱜᱼᱟᱛᱮ
ᱟᱢᱟᱜ ᱛᱟᱺᱜᱤ ᱨᱮ᱾

ᱞᱟᱸᱫᱟ ᱟᱢᱟᱭ, ᱠᱩᱞᱤ ᱠᱟᱢᱟᱭ
ᱪᱷᱟᱸᱫᱟ ᱢᱮᱭᱟᱭ ᱡᱤᱣᱤ ᱨᱮ
ᱩᱠᱩᱞ ᱰᱩᱵᱩᱞ ᱪᱟᱰᱳ ᱢᱮᱭᱟᱭ
ᱥᱤᱵᱤᱞ ᱫᱩᱞᱟᱹᱲ ᱨᱮ᱾

ᱠᱷᱤᱞᱰᱩ ᱠᱷᱟᱢᱰᱟ ᱞᱚᱠᱷᱟ ᱪᱮᱨᱮᱡ
ᱟᱞᱚ ᱥᱮᱨᱮᱢ ᱴᱮᱸᱜᱚᱡᱮ
ᱵᱟᱦᱟ ᱨᱟᱥᱟ ᱥᱤᱵᱤᱞ ᱨᱮᱦᱚᱸ
ᱟᱞᱚᱢ ᱡᱮᱸᱵᱮᱫᱮ᱾

ᱠᱚᱭᱚᱜᱼᱠᱚᱭᱚᱜ ᱥᱟᱺᱜᱤᱧ ᱠᱷᱚᱱᱟᱜ
ᱢᱩᱞᱩᱡ ᱢᱟᱪᱷᱟ ᱞᱟᱸᱫᱟᱭ ᱢᱮ
ᱦᱤᱸᱥᱤᱫ ᱦᱚᱭᱛᱮ ᱜᱟᱹᱣᱩᱡᱽ ᱨᱮᱦᱚᱸᱭ
ᱥᱟᱺᱜᱤᱧ ᱠᱷᱚᱱ ᱜᱮ ᱧᱮᱞᱮᱢᱮ᱾

ᱥᱤᱵᱳᱲ ᱞᱟᱹᱜᱤᱫ ᱡᱟᱹᱱᱩᱢ ᱢᱮᱱᱟᱭ
ᱯᱟᱪᱮ ᱟᱢᱮ ᱥᱤᱨᱵᱟᱹ ᱢᱮ
ᱥᱟᱺᱜᱤᱧ ᱥᱟᱹᱜᱩᱱ ᱪᱟᱸᱫᱳ ᱞᱮᱠᱟ
ᱚᱱᱛᱚᱨ ᱠᱷᱚᱱ ᱜᱮ ᱧᱮᱞᱮ ᱢᱮ᱾

Written by ᱟᱫᱤᱛᱛᱚ ᱥᱚᱨᱮᱱ
Published on ᱯᱟᱸᱡᱟ (Sep – Oct 2013)