ᱫᱟᱥᱟᱸᱭ ᱫᱟᱬᱟᱱ

ᱦᱟᱯᱲᱟᱢ ᱠᱚ ᱮᱭᱟᱭ ᱱᱟᱹᱭ ᱫᱤᱥᱚᱢ ᱨᱮ ᱢᱟᱱᱣᱟ ᱠᱚ ᱵᱟᱹᱰ ᱮᱱᱛᱮ ᱪᱟᱢᱯᱟ ᱫᱩᱣᱟᱹᱨ ᱛᱮᱸᱜᱮᱱ ᱠᱟᱛᱮ ᱯᱟᱹᱨᱤᱥ ᱯᱤᱪᱷᱤ ᱜᱟᱲ ᱠᱚ ᱵᱮᱨᱮᱫ ᱟᱱᱟ᱾ ᱢᱮᱛᱟᱜ ᱢᱮ ᱪᱟᱹᱭ, ᱪᱟᱢᱯᱟ, ᱵᱟᱫᱚᱞᱤ, ᱠᱚᱸᱭᱰᱟ, ᱠᱷᱟᱹᱭᱨᱤ, ᱥᱤᱧ ᱟᱨᱦᱚᱸ ᱮᱢᱟᱱᱼᱮᱢᱟᱱ᱾ ᱦᱟᱯᱲᱟᱢ ᱠᱚ ᱮᱭᱟᱭ ᱱᱟᱹᱭ ᱡᱟᱯᱟᱜ ᱪᱟᱢᱯᱟ ᱫᱤᱥᱚᱢ ᱨᱮ ᱟᱹᱰᱤ ᱥᱩᱞᱩᱠ ᱱᱤᱨᱟᱹᱭ ᱟᱨ ᱥᱟᱶᱛᱮ ᱦᱳᱲᱳ, ᱪᱟᱣᱞᱮ, ᱠᱟᱰᱟ, ᱰᱟᱺᱜᱽᱨᱤ, ᱢᱮᱨᱚᱢ ᱵᱷᱤᱰᱤ, ᱥᱤᱢ ᱥᱩᱠᱨᱤ ᱟᱨ ᱮᱢᱟᱱᱼᱮᱢᱟᱱ ᱫᱷᱚᱱ ᱛᱮ ᱟᱱᱮᱡ ᱫᱷᱟᱱᱮᱡ ᱠᱤᱥᱟᱹᱬ ᱠᱚ ᱛᱟᱸᱦᱮ ᱠᱟᱱᱟ᱾ ᱫᱷᱚᱨᱚᱢ ᱠᱚᱨᱚᱢ ᱟᱨ ᱵᱷᱚᱨᱚᱢ ᱪᱮᱛᱟᱱ ᱦᱚᱸ ᱵᱚᱸᱜᱟ ᱵᱳᱨᱳ ᱠᱚ ᱫᱮᱵᱟ ᱥᱮᱵᱟ ᱨᱮᱦᱚᱸ ᱟᱹᱰᱤ ᱥᱚᱛ ᱟᱨ ᱥᱟᱹᱨᱤ ᱯᱟᱹᱛᱭᱟᱹᱣ ᱛᱟᱸᱦᱮ ᱠᱟᱱ ᱛᱟᱠᱚᱣᱟ᱾ ᱫᱩᱜ ᱫᱟᱨᱟᱢᱚᱜ ᱞᱟᱹᱜᱤᱫ ᱛᱮᱦᱚᱸ ᱠᱚᱲᱟ ᱛᱟᱭ ᱠᱩᱲᱤ ᱛᱟᱭ ᱵᱟᱹᱭᱨᱤ ᱫᱟᱨᱟᱢ ᱞᱟᱹᱜᱤᱫ ᱚᱠᱚᱭ ᱦᱚᱸ ᱵᱟᱝ ᱠᱚ ᱯᱟᱹᱪᱟᱹᱠᱚᱜ ᱠᱟᱱ ᱛᱟᱦᱸᱮ ᱠᱟᱱᱟ᱾

ᱵᱷᱟᱸᱰ ᱫᱤᱥᱚᱢ, ᱛᱩᱲᱩᱠ ᱫᱤᱥᱚᱢ ᱠᱷᱚᱱ ᱵᱟᱹᱱᱤᱡᱽ ᱵᱮᱯᱟᱨ ᱢᱮᱱᱛᱮ ᱛᱩᱲᱩᱠ ᱦᱚᱯᱚᱱ ᱠᱚ ᱟᱵᱚᱣᱟᱜ ᱟᱹᱛᱳ, ᱟᱵᱚᱣᱟᱜ ᱜᱟᱲ ᱛᱮᱠᱚ ᱦᱮᱡ ᱞᱮᱱ ᱛᱟᱸᱦᱮ ᱠᱟᱱᱟ᱾ ᱦᱮᱡ ᱠᱟᱛᱮ ᱠᱚ ᱪᱟᱹᱨᱤᱛ ᱤᱫᱤ ᱟᱱᱟ ᱟᱵᱚᱣᱟᱜ ᱟᱹᱛᱳ ᱫᱤᱥᱚᱢ, ᱟᱵᱚᱣᱟᱜ ᱜᱟᱲ, ᱪᱮ ᱞᱤᱞᱤ ᱵᱤᱪᱷᱤ ᱞᱤᱠᱷᱚᱱ ᱜᱚᱲᱦᱚᱱ ᱧᱮᱞ ᱛᱮ ᱢᱮᱫ ᱛᱟᱠᱚ ᱨᱩᱠᱩᱲ ᱮᱱᱟ᱾ ᱟᱹᱛᱳ ᱫᱤᱥᱚᱢ ᱟᱨ ᱜᱟᱲ ᱦᱟᱹᱛᱭᱟᱹᱣ ᱞᱟᱹᱜᱤᱫ ᱞᱟᱞᱚᱪ ᱢᱚᱱᱮ ᱢᱮᱞᱮᱼᱢᱮᱞᱮ ᱮᱱᱟ᱾ ᱠᱷᱟᱱ ᱜᱮ ᱩᱱᱠᱩ ᱫᱚ ᱛᱟᱠ ᱧᱮᱞ ᱠᱟᱛᱮ ᱚᱠᱛᱚᱼᱚᱠᱛᱚ ᱨᱮ ᱟᱹᱛᱳᱼᱫᱤᱥᱚᱢ ᱟᱨ ᱜᱟᱲ ᱨᱮ ᱦᱟᱯᱲᱟᱢ ᱠᱚ ᱥᱟᱶ ᱠᱚ ᱧᱮᱯᱮᱫ ᱨᱮᱭᱟᱜ ᱠᱚ ᱨᱤᱠᱟᱹᱭᱟ᱾ ᱢᱮᱱᱠᱷᱟᱱ ᱦᱟᱯᱲᱟᱢ ᱠᱚᱦᱚᱸ ᱡᱩᱢᱤᱫ ᱠᱟᱛᱮ ᱠᱚ ᱛᱤᱸᱜᱩ ᱫᱟᱨᱟᱢ ᱠᱚᱣᱟ᱾ ᱵᱟᱝᱠᱚ ᱫᱟᱨᱟᱢ ᱫᱟᱲᱮ ᱭᱟᱠᱚ ᱨᱮ ᱟᱵᱚ ᱨᱮᱱ ᱛᱤᱨᱞᱟᱹ ᱦᱚᱯᱚᱱ ᱠᱚᱦᱚᱸ ᱟᱜᱼᱥᱟᱨ, ᱠᱟᱹᱯᱤᱼᱠᱷᱟᱸᱰᱟ ᱟᱛᱮ ᱟᱵᱚᱨᱮᱱ ᱦᱮᱨᱮᱞ ᱦᱚᱯᱚᱱ ᱠᱚ ᱵᱟᱹᱭᱨᱤ ᱥᱟᱶ ᱛᱤᱸᱜᱩ ᱫᱟᱨᱟᱢ ᱨᱮᱠᱚ ᱜᱚᱲᱚᱣᱟᱠᱚ ᱠᱟᱱ ᱛᱟᱸᱦᱮ ᱠᱟᱱᱟ᱾ ᱩᱱᱨᱮ ᱠᱩᱲᱤ ᱠᱚᱨᱮᱱ ᱢᱟᱬᱛᱮ ᱞᱮᱠᱟᱛᱮ ᱟᱭᱚᱱ ᱟᱨ ᱠᱟᱡᱚᱞ ᱡᱟᱸᱦᱟ ᱛᱤᱱ ᱨᱮ ᱥᱟᱨ ᱠᱤᱱ ᱟᱲᱟᱜᱟ ᱥᱮᱨᱢᱟ ᱨᱮ ᱡᱩᱞᱩᱜ ᱥᱤᱧ ᱪᱟᱸᱫᱚ ᱦᱚᱸ ᱨᱤᱢᱤᱞᱛᱮ ᱮᱥᱮᱫ ᱜᱚᱫᱚᱜ ᱞᱮᱠᱟ ᱵᱩᱡᱷᱟᱹᱣ ᱜᱚᱫᱚᱜ ᱠᱟᱱ ᱛᱟᱸᱦᱮ ᱠᱟᱱᱟ᱾ ᱱᱚᱛᱮ ᱦᱮᱨᱮᱞ ᱦᱚᱯᱚᱱ ᱨᱮ ᱫᱤᱵᱤ ᱟᱨ ᱰᱩᱨᱜᱟᱹ ᱛᱤᱠᱤᱱᱟᱜ ᱥᱟᱨ ᱦᱚᱸ ᱥᱮᱨᱢᱟ ᱨᱮ ᱥᱟᱨᱼᱥᱟᱨ ᱛᱟᱹᱯᱟᱹᱠᱤᱡ ᱞᱮᱱᱠᱷᱟᱱ ᱵᱤᱞᱤᱫ ᱵᱤᱡᱽᱞᱤ ᱠᱮᱫ ᱥᱟᱶᱛᱮ ᱦᱩᱰᱩᱨ ᱞᱮᱠᱟ ᱛᱟᱠᱮᱨ ᱟᱬᱜᱚᱱ ᱠᱟᱱ ᱛᱟᱸᱦᱮ ᱠᱟᱱᱟ᱾ ᱱᱚᱝᱠᱟ ᱜᱮ ᱛᱩᱲᱩᱠ ᱦᱚᱯᱚᱱ ᱦᱟᱯᱲᱟᱢ ᱠᱚ ᱥᱟᱶ ᱛᱩᱯᱩᱫ ᱧᱮᱯᱮᱫ ᱨᱮ ᱟᱵᱚᱨᱮᱱ ᱛᱤᱨᱞᱟᱹ ᱦᱚᱯᱚᱱ ᱟᱭᱚᱱ, ᱠᱟᱡᱚᱞ, ᱪᱷᱤᱛᱟᱹ, ᱠᱟᱯᱨᱟᱹ ᱦᱤᱸᱥᱤ, ᱰᱩᱢᱱᱤ, ᱯᱟᱭᱳ ᱟᱨ ᱯᱩᱱᱛᱟᱹ ᱮᱢᱟᱱ ᱠᱚ ᱥᱮᱞᱮᱫ ᱞᱮᱱ ᱠᱷᱟᱱ ᱛᱩᱲᱩᱠ ᱦᱚᱯᱚᱱ ᱧᱤᱨ ᱦᱚᱨ ᱠᱚ ᱧᱮᱞ ᱟᱫᱮᱫ ᱛᱟᱸᱦᱮ ᱠᱟᱱᱟ᱾ ᱠᱷᱟᱱ ᱩᱱᱠᱩ ᱠᱚ ᱧᱮᱞ ᱠᱮᱫᱼᱟ ᱵᱟᱝᱢᱟ ᱛᱩᱯᱩᱫ ᱧᱮᱯᱮᱫ ᱨᱮ ᱛᱤᱨᱞᱟᱹ ᱦᱚᱯᱚᱱ ᱠᱚ ᱜᱚᱲᱚᱣᱟᱠᱚ ᱠᱷᱟᱱ ᱜᱮ ᱟᱵᱚ ᱛᱩᱲᱩᱠ ᱩᱱᱠᱩ ᱥᱟᱶ ᱛᱩᱯᱩᱫ ᱨᱮ ᱵᱟᱝ ᱵᱚᱱ ᱫᱟᱲᱮᱜ ᱠᱟᱱᱟ᱾ ᱫᱩ ᱵᱟᱝ ᱨᱮᱦᱚᱸ ᱱᱩᱠᱩ ᱛᱤᱨᱞᱟᱹ ᱦᱚᱯᱚᱱ ᱴᱷᱮᱱ ᱡᱟᱸᱦᱟ ᱵᱟᱝ ᱡᱟᱸᱦᱟ ᱵᱚᱸᱜᱟ ᱫᱟᱲᱮ, ᱫᱷᱚᱨᱚᱢ ᱫᱟᱲᱮ ᱥᱚᱛ ᱟᱨ ᱫᱚᱲᱦᱚ ᱢᱮᱱᱟᱜ ᱛᱟᱠᱚᱣᱟ᱾ ᱱᱩᱠᱩ ᱛᱤᱨᱞᱟᱹ ᱠᱚᱣᱟᱜ ᱵᱚᱸᱜᱟ ᱫᱟᱲᱮ, ᱫᱷᱚᱨᱚᱢ ᱫᱟᱲᱮ ᱵᱟᱝ ᱵᱟᱹᱲᱤᱡ ᱞᱮᱠᱷᱟᱱ ᱚᱦᱚ ᱜᱮᱵᱚᱱ ᱫᱟᱲᱮ ᱠᱚᱜᱼᱟ᱾ ᱚᱱᱠᱟ ᱛᱮ ᱩᱱᱠᱩ ᱛᱩᱲᱩᱠ ᱫᱚ ᱢᱤᱫ ᱪᱷᱟᱸᱫᱟ ᱠᱚ ᱜᱟᱜ ᱠᱮᱫᱟ ᱟᱨ ᱟᱵᱚᱨᱮᱱ ᱛᱤᱨᱞᱟᱹ ᱦᱚᱯᱚᱱ ᱟᱹᱛᱠᱤᱨ ᱠᱚ ᱨᱮᱭᱟᱜ ᱠᱚ ᱯᱚᱨᱛᱚᱱ ᱠᱮᱫᱟ᱾ ᱚᱱᱠᱟ ᱛᱮ ᱩᱱᱠᱩ ᱫᱚ ᱟᱹᱛᱠᱤᱨ ᱤᱫᱤ ᱞᱟᱹᱜᱤᱫ ᱫᱟᱜ ᱞᱩᱻ ᱜᱷᱟᱴ, ᱩᱢᱩᱜ ᱜᱷᱟᱴ, ᱵᱤᱨ ᱵᱩᱨᱩ ᱥᱟᱠᱟᱢ ᱦᱮᱡ, ᱫᱟᱹᱛᱟᱹᱱᱤ ᱯᱮᱴᱮᱡ ᱟᱨ ᱥᱟᱦᱟᱱ ᱫᱤᱯᱤᱞ ᱚᱠᱛᱚ ᱠᱚᱨᱮ ᱠᱚ ᱛᱟᱸᱬᱟᱜᱟᱫ ᱠᱚᱣᱟ᱾ ᱚᱱᱠᱟᱛᱮ ᱟᱥᱟᱲ ᱵᱚᱸᱜᱟ ᱢᱩᱪᱟᱹᱫᱼᱢᱩᱪᱟᱹᱫ ᱵᱟᱝ ᱨᱮᱦᱚᱸ ᱥᱟᱱ ᱵᱚᱸᱜᱟ ᱢᱩᱞᱩᱜᱼᱢᱩᱞᱩᱜ ᱟᱭᱚᱱ ᱟᱨ ᱠᱟᱡᱚᱞ ᱢᱩᱰᱩ ᱛᱮ ᱩᱢᱩᱜ ᱠᱤᱱ ᱥᱮᱱ ᱟᱠᱟᱱ ᱛᱟᱸᱦᱮ ᱠᱟᱱᱟ᱾ ᱥᱮᱨᱢᱟ ᱨᱤᱢᱤᱞ ᱡᱷᱤᱯᱤᱨᱼᱡᱷᱤᱯᱤᱨ ᱫᱟᱜ ᱫᱚᱭ ᱡᱟᱹᱲᱤᱭᱮᱫ ᱛᱟᱸᱦᱮ ᱠᱟᱱ ᱜᱮᱭᱟ᱾ ᱩᱢᱩᱜ ᱜᱷᱟᱴ ᱠᱷᱚᱱ ᱱᱟᱥᱮ ᱥᱟᱺᱜᱤᱧ ᱧᱚᱜ ᱨᱮ ᱜᱟᱹᱭᱼᱰᱟᱺᱜᱽᱨᱤ ᱜᱩᱯᱤ ᱜᱤᱫᱽᱨᱟᱹ ᱫᱚ ᱜᱩᱸᱜᱩ ᱪᱷᱩᱯᱤ ᱟᱨ ᱢᱟᱫ ᱪᱟᱛᱚᱢ ᱟᱛᱮ ᱩᱢᱩᱞ ᱠᱟᱛᱮ ᱠᱚ ᱜᱩᱯᱤ ᱡᱚᱝ ᱠᱟᱱ ᱛᱟᱸᱦᱮ ᱠᱟᱱᱟ᱾ ᱟᱭᱚᱱ ᱟᱨ ᱠᱟᱡᱚᱞ ᱫᱚ ᱢᱩᱸᱰᱩ ᱩᱢᱩᱜ ᱜᱷᱟᱴ ᱠᱤᱱ ᱟᱸᱬᱜᱚ ᱟᱠᱟᱱ ᱚᱠᱛᱚ ᱨᱮᱜᱮ ᱩᱱᱠᱩ ᱛᱩᱲᱩᱠ ᱫᱚ ᱟᱪᱠᱟ ᱠᱚ ᱡᱟᱹᱯᱩᱫ ᱠᱮᱫ ᱠᱤᱱᱟ᱾ ᱚᱠᱟ ᱦᱚᱸ ᱵᱟᱝ ᱠᱤᱱ ᱫᱤᱥᱟᱹ ᱫᱟᱲᱮᱭᱟᱫᱟ᱾ ᱛᱩᱲᱩᱠ ᱴᱷᱮᱱ ᱠᱤᱱ ᱥᱟᱵ ᱚᱪᱚᱭᱮᱱᱟ ᱟᱨ ᱠᱚ ᱟᱹᱛᱠᱤᱨ ᱤᱫᱤ ᱠᱮᱫ ᱠᱤᱱᱟ᱾ ᱱᱚᱛᱮ ᱫᱟᱜ ᱦᱚᱸ ᱠᱟᱹᱡᱼᱠᱟᱹᱡ ᱛᱮ ᱵᱟᱹᱲᱛᱤ ᱤᱫᱤ ᱠᱮᱫᱟᱭ᱾ ᱚᱠᱟ ᱞᱮᱠᱟ ᱛᱮᱪᱚᱝ ᱩᱱᱠᱩ ᱥᱟᱺᱜᱤᱧ ᱨᱮ ᱜᱩᱯᱤ ᱜᱤᱫᱽᱨᱟᱹ ᱫᱚᱠᱚ ᱛᱷᱤᱛ ᱧᱟᱢ ᱜᱚᱫ ᱠᱮᱫ ᱠᱚᱣᱟ ᱵᱟᱝᱢᱟ ᱟᱭᱚᱱ ᱫᱟᱹᱭ ᱟᱨ ᱠᱟᱡᱚᱞ ᱫᱟᱹᱭ ᱛᱤᱠᱤᱱ ᱫᱚ ᱛᱩᱲᱩᱠ ᱠᱚ ᱟᱹᱛᱠᱤᱨ ᱤᱫᱤᱭᱮᱫ ᱠᱤᱱᱟ᱾ ᱠᱷᱟᱱ ᱜᱮ ᱩᱱᱠᱩ ᱜᱩᱯᱤ ᱜᱤᱫᱽᱨᱟᱹ ᱫᱚ ᱟᱹᱛᱳ ᱛᱮ ᱫᱟᱹᱲ ᱥᱮᱱ ᱠᱟᱛᱮ ᱟᱹᱛᱳ ᱨᱮᱱ ᱥᱟᱱᱟᱢ ᱦᱚᱲ ᱠᱚ ᱞᱟᱹᱭᱟᱫ ᱠᱚᱣᱟ᱾ ᱟᱸᱡᱚᱢ ᱥᱟᱶᱛᱮ ᱟᱹᱛᱳ ᱠᱚᱲᱟ ᱫᱤᱵᱤ ᱟᱨ ᱫᱩᱨᱜᱟᱹ ᱛᱤᱠᱤᱱ ᱫᱚ ᱦᱚᱲ ᱠᱚ ᱡᱟᱣᱨᱟ ᱵᱟᱲᱟ ᱛᱮᱫᱚ ᱚᱠᱟ ᱥᱮᱱ ᱟᱭᱚᱱ ᱟᱨ ᱠᱟᱚᱞ ᱠᱚ ᱟᱹᱛᱠᱤᱨ ᱟᱠᱟᱫ ᱠᱤᱱᱟ ᱟᱜᱼᱥᱟᱨ, ᱠᱟᱹᱯᱤᱼᱠᱷᱟᱸᱰᱟᱣᱟᱛᱮ ᱠᱤᱱ ᱫᱟᱹᱲ ᱢᱟᱬᱟᱝ ᱮᱱᱟ᱾ ᱤᱱᱟᱹᱜ ᱛᱮᱫᱚ ᱫᱟᱜ ᱡᱟᱹᱲᱤ ᱦᱚᱸ ᱟᱹᱰᱤ ᱫᱷᱚᱯᱚᱴ ᱵᱟᱹᱲᱛᱤ ᱤᱫᱤᱭᱮᱱᱟ ᱟᱨ ᱜᱟᱰᱟ ᱢᱩᱰᱩ ᱵᱟᱱ ᱫᱟᱜ ᱦᱚᱸ ᱠᱟᱢᱥᱟᱣ ᱟᱬᱜᱚᱭᱮᱱᱟ᱾ ᱵᱟᱝ ᱫᱚ ᱵᱟᱱ ᱫᱟᱜ ᱟᱬᱜᱚᱱ ᱢᱟᱬᱟᱝ ᱛᱮ ᱟᱭᱚᱱ ᱟᱨ ᱠᱟᱡᱚᱞ ᱛᱤᱠᱤᱱ ᱮᱭᱟᱭ ᱱᱟᱹᱭ ᱫᱚᱠᱚ ᱯᱟᱨᱚᱢ ᱞᱮᱫ ᱠᱤᱱᱟ ᱪᱮ ᱵᱟᱝ, ᱱᱚᱛᱮ ᱫᱤᱵᱤ ᱟᱨ ᱫᱩᱨᱜᱟᱹ ᱛᱤᱠᱤᱱ ᱦᱚᱸ ᱮᱭᱟᱭ ᱱᱟᱹᱭ ᱫᱚ ᱠᱤᱱ ᱯᱟᱭᱨᱟ ᱯᱟᱨᱚᱢ ᱞᱮᱱ ᱪᱚᱝ ᱵᱟᱝ ᱪᱚᱝ ᱱᱚᱣᱟ ᱠᱟᱛᱷᱟ ᱵᱟᱝ ᱵᱟᱰᱟᱭ ᱧᱟᱢ ᱞᱮᱱᱟ᱾ ᱤᱱᱟᱹ ᱛᱟᱭᱚᱢ ᱠᱷᱟᱱ ᱜᱮ ᱟᱹᱛᱳ ᱨᱮᱱ ᱥᱟᱱᱟᱢ ᱦᱚᱲ ᱡᱟᱣᱨᱟ ᱠᱟᱛᱮ ᱚᱠᱟᱥᱮᱫ ᱠᱚ ᱟᱹᱛᱠᱤᱨ ᱟᱠᱟᱫ ᱠᱤᱱᱟ ᱚᱱᱟ ᱯᱟᱦᱴᱟ ᱠᱚ ᱪᱟᱞᱟᱣᱮᱱᱟ᱾ ᱪᱟᱞᱟᱣ ᱠᱟᱛᱮ ᱠᱚ ᱧᱮᱞ ᱟᱱᱟ ᱵᱟᱱ ᱜᱟᱰᱟ ᱫᱟᱜ ᱠᱟᱞ ᱥᱟᱫᱚᱢ ᱞᱮᱠᱟ ᱠᱟᱢᱥᱟᱣ ᱟᱬᱜᱚᱱ ᱠᱟᱱᱟ᱾ ᱪᱤᱠᱟᱹ ᱠᱚ ᱯᱟᱨᱚᱢᱚᱜᱼᱟ? ᱜᱟᱰᱟ ᱰᱷᱤᱯ ᱨᱮ ᱡᱟᱣᱨᱟ ᱢᱤᱫ ᱠᱟᱛᱮ ᱠᱚ ᱦᱩᱫᱤᱥ ᱵᱟᱲᱟ ᱠᱮᱫᱟ “ᱱᱚᱝᱠᱟ ᱨᱮᱫᱚ ᱪᱤᱠᱟᱹ ᱛᱮᱵᱚᱱ ᱯᱟᱨᱚᱢᱚᱜᱼᱟ᱾” ᱟᱫᱚ ᱠᱚ ᱢᱮᱱ ᱠᱮᱫᱼᱟ, ᱫᱮᱞᱟ ᱵᱚᱱ ᱟᱹᱛᱳ ᱚᱲᱟᱜ ᱥᱮᱫ ᱨᱮᱜᱮ ᱵᱚᱱ ᱟᱪᱟᱨ ᱢᱤᱫ ᱵᱤᱪᱟᱹᱨ ᱢᱤᱫᱟ ᱟᱨ ᱵᱚᱱ ᱦᱩᱫᱤᱥ ᱵᱟᱲᱟ ᱞᱮᱜᱮ᱾ ᱟᱹᱛᱳ ᱦᱚᱲ ᱡᱟᱛᱨᱟ ᱠᱟᱛᱮ ᱠᱚ ᱦᱩᱫᱤᱥ ᱠᱮᱫᱼᱟ ᱵᱟᱝᱢᱟ ᱦᱟᱯᱮ ᱱᱚᱣᱟ ᱥᱟᱭ ᱞᱮᱜᱮ ᱟᱫᱚ ᱯᱟᱱᱛᱮ ᱵᱚᱱ ᱚᱰᱚᱠᱚᱜᱼᱟ᱾ ᱥᱟᱱ, ᱵᱷᱟᱫᱚᱨ ᱯᱟᱨᱚᱢᱮᱱᱟ ᱫᱟᱜ ᱮᱭ ᱥᱟᱭ ᱠᱮᱫᱟ᱾ ᱫᱟᱥᱟᱸᱭ ᱵᱚᱸᱜᱟ ᱥᱮᱴᱮᱨᱮᱱᱟ ᱜᱟᱰᱟ᱾ ᱢᱩᱰᱩ ᱟᱸᱡᱮᱫᱼᱮᱱᱟ ᱨᱤᱞᱟᱹᱢᱟᱞᱟ᱾ ᱥᱮᱨᱢᱟ ᱦᱚᱸ ᱞᱤᱞ ᱜᱮ ᱟᱨ ᱯᱷᱤᱲᱤ ᱯᱷᱟᱝ ᱜᱮ ᱧᱮᱞᱮᱱᱟ᱾ ᱟᱫᱚ ᱟᱹᱛᱳ ᱨᱮ ᱟᱨᱦᱚᱸ ᱥᱟᱱᱟᱢ ᱦᱚᱲ ᱠᱚ ᱡᱟᱨᱣᱟᱭᱮᱱᱟ᱾ ᱟᱹᱛᱳ ᱨᱮ ᱜᱩᱨᱩ ᱞᱮᱠᱟᱱ ᱦᱚᱲ ᱦᱚᱸᱠᱚ ᱦᱚᱦᱚᱣᱟᱫ ᱠᱚᱣᱟ᱾ ᱫᱷᱚᱨᱚᱢ ᱜᱩᱨᱩ, ᱠᱟᱺᱵᱽᱨᱩ ᱜᱩᱨᱩ, ᱥᱤᱫᱚ ᱜᱩᱨᱩ, ᱱᱟᱹᱨᱥᱤᱧ ᱜᱩᱨᱩ, ᱜᱟᱸᱰᱚ ᱜᱩᱨᱩ, ᱵᱤᱴᱩ ᱜᱩᱨᱩ ᱟᱨ ᱵᱷᱩᱣᱟᱹᱝ ᱜᱩᱨᱩ ᱜᱟᱞᱚᱪ ᱜᱚᱴᱟ ᱠᱮᱫᱟ ᱠᱚ᱾ ᱮᱭᱟᱭ ᱱᱟᱹᱭ ᱯᱟᱨᱚᱢ ᱠᱟᱛᱮ ᱯᱳᱱ ᱥᱮᱫ ᱵᱚᱱ ᱦᱟᱹᱴᱤᱧᱚᱜᱼᱟ ᱮᱛᱚᱢ, ᱠᱚᱸᱭᱮ, ᱥᱟᱢᱟᱝ, ᱟᱨ ᱯᱟᱪᱮ᱾ ᱚᱱᱠᱟ ᱛᱮ ᱟᱹᱜᱭᱩᱨ ᱢᱟᱬᱛᱮ ᱞᱮᱠᱟᱛᱮ ᱫᱷᱚᱨᱚᱢ ᱜᱩᱨᱩ, ᱠᱟᱺᱵᱽᱨᱩ ᱜᱩᱨᱩ, ᱥᱤᱫᱚ ᱜᱩᱨᱩ, ᱱᱟᱹᱨᱥᱤᱧ ᱜᱩᱨᱩ ᱥᱟᱶᱛᱮ ᱟᱨᱦᱚᱸ ᱜᱩᱨᱩ ᱠᱚ ᱟᱛᱮ ᱯᱟᱱᱛᱮ ᱞᱟᱹᱜᱤᱫ ᱠᱚ ᱫᱤᱲᱦᱚᱭᱮᱱᱟ᱾ “ᱢᱮᱱ ᱫᱚ ᱱᱚᱝᱠᱟ ᱫᱚ ᱵᱟᱵᱚ ᱥᱮᱱᱚᱜᱼᱟ᱾” ᱚᱱᱠᱟ ᱛᱮ ᱠᱩᱲᱤ ᱠᱚᱣᱟᱜ ᱥᱟᱡᱽ ᱛᱮᱠᱚ ᱥᱟᱡᱟᱣᱮᱱᱟ ᱦᱚᱭᱼᱦᱤᱥᱤᱫ, ᱦᱤᱸᱥᱠᱟᱹ, ᱦᱚᱞᱚᱢ ᱥᱮ ᱵᱟᱱ, ᱥᱤᱸᱜᱟᱹᱨ ᱟᱞᱚ ᱵᱟᱡᱟᱣᱟᱠᱚ ᱢᱟ; ᱚᱱᱟᱛᱮ ᱢᱟᱨᱟᱜ ᱯᱷᱤᱧᱪᱟᱹᱨ ᱠᱚᱞᱜᱟ ᱵᱚᱦᱚᱜ ᱨᱮᱠᱚ ᱫᱟᱹᱦᱲᱤ ᱠᱮᱫᱟ᱾ ᱵᱟᱹᱭᱨᱤ ᱟᱞᱚ ᱠᱚ ᱴᱷᱤᱠᱟᱹ ᱫᱟᱲᱮᱭᱟᱜ ᱢᱟ ᱢᱮᱱᱛᱮ ᱥᱟᱨ ᱫᱚ ᱦᱚᱛᱚᱫ ᱠᱷᱚᱞ ᱨᱮᱠᱚ ᱩᱠᱩ ᱠᱮᱫᱟ ᱟᱨ ᱚᱱᱟ ᱦᱚᱛᱚᱫ ᱫᱚ ᱟᱜ ᱰᱟᱺᱰᱤᱡ ᱨᱮᱠᱚ ᱛᱚᱞ ᱠᱮᱫᱛᱮ ᱯᱟᱯᱟᱱᱛᱮ ᱧᱩᱛᱩᱢ ᱮᱱᱮᱡ ᱪᱷᱚᱸᱫᱽ ᱛᱮᱠᱚ ᱚᱰᱚᱠᱮᱱᱟ᱾ ᱮᱱᱮᱡ ᱡᱚᱦᱚᱜ ᱫᱚ ᱯᱟᱹᱬᱪᱷᱟᱹ ᱚᱨ ᱯᱤᱪᱷᱤ ᱵᱷᱩᱣᱟᱺᱝ ᱵᱷᱩᱝᱼᱵᱷᱩᱝ ᱥᱟᱰᱮᱭᱟ; ᱥᱟᱶᱛᱮ ᱠᱟᱸᱥᱟ ᱠᱚ ᱨᱩᱻ ᱤᱫᱤᱭᱟ ᱡᱟᱸᱦᱟ ᱞᱮᱠᱟᱛᱮ ᱦᱚᱲ ᱠᱚ ᱟᱸᱡᱚᱢ ᱛᱮᱠᱚ ᱚᱰᱚᱠᱚᱜ ᱢᱟ ᱢᱮᱱᱛᱮ᱾ ᱯᱟᱯᱟᱱᱛᱮ ᱨᱮ ᱛᱤᱱᱟᱹᱜ ᱫᱤᱱ ᱪᱚᱝ ᱞᱟᱜᱟᱣᱜ ᱚᱱᱟ ᱢᱮᱱᱛᱮ ᱜᱚᱲᱚ ᱞᱮᱠᱟᱛᱮ ᱡᱟᱸᱦᱟᱼᱡᱟᱸᱦᱟ ᱨᱮᱠᱚ ᱮᱱᱮᱡᱼᱟ ᱡᱚᱢᱟᱜ ᱵᱟᱠᱷᱨᱟ ᱪᱟᱣᱞᱮ ᱨᱮᱦᱚᱸ ᱦᱳᱲᱳ ᱨᱮᱦᱚᱸ ᱠᱚ ᱮᱢᱟ ᱠᱚᱣᱟ᱾ ᱮᱢᱚᱜᱤᱡ ᱠᱩᱲᱤ ᱦᱚᱯᱚᱱ ᱫᱚ ᱫᱟᱸᱥᱟᱭ ᱠᱚᱲᱟ ᱠᱷᱚᱱᱮ ᱦᱩᱰᱤᱧ ᱨᱮᱦᱚᱸ ᱩᱱ ᱡᱚᱦᱚᱜ ᱫᱚᱠᱚ ᱜᱚᱰᱟᱭ ᱜᱮᱭᱟ᱾ ᱪᱮᱫᱟᱜ ᱥᱮ ᱢᱮᱱᱟᱠᱚ ᱟᱵᱚ ᱨᱮᱱ ᱟᱭᱚᱱ ᱟᱨ ᱠᱟᱡᱚᱞᱟᱜ ᱛᱤᱨᱮ ᱠᱟᱡᱽᱨᱟ ᱦᱟᱹᱴᱤ ᱠᱟᱡᱚᱞ ᱠᱷᱚᱫᱟ ᱛᱟᱸᱦᱮ ᱠᱟᱱ ᱛᱟᱹᱠᱤᱱᱟ᱾ ᱩᱱᱠᱤᱱ ᱩᱨᱩᱢ ᱠᱤᱱ ᱞᱟᱹᱜᱤᱫ ᱛᱮ ᱜᱚᱰ ᱞᱚᱪᱷᱱᱟ ᱛᱮ ᱛᱤᱻ ᱨᱮᱭᱟᱜ ᱠᱟᱡᱽᱨᱟ ᱦᱟᱹᱴᱤ ᱠᱟᱡᱚᱞ ᱠᱷᱚᱫᱟ ᱠᱚ ᱧᱮᱞᱟ᱾

ᱫᱟᱸᱥᱟᱭ ᱠᱚᱲᱟ ᱫᱟᱸᱬᱟᱼᱫᱟᱸᱬᱟ ᱛᱮᱠᱚ ᱫᱟᱸᱬᱟ ᱧᱟᱯᱟᱢ ᱞᱮᱱᱠᱷᱟᱱ ᱟᱫᱚ ᱵᱩᱜᱤ ᱵᱟᱹᱲᱤᱡ ᱠᱚ ᱠᱩᱯᱩᱞᱤᱜᱼᱟ ᱟᱨ ᱠᱷᱟᱹᱲᱤ ᱢᱟᱹᱴᱤ ᱠᱟᱛᱮ ᱟᱭᱚᱱ ᱠᱟᱡᱚᱞ ᱟᱨ ᱫᱤᱵᱤ ᱫᱩᱨᱜᱟᱹ ᱛᱮᱠᱚᱣᱟᱜ ᱠᱷᱚᱡᱽ ᱠᱷᱚᱵᱚᱨ ᱠᱚ ᱵᱟᱰᱟᱭ ᱡᱚᱝᱟ᱾

ᱫᱟᱸᱥᱟᱭ ᱮᱱᱮᱡ ᱫᱚ ᱥᱩᱢᱟᱹᱫ ᱨᱟᱹᱥᱠᱟᱹ ᱡᱚᱝ ᱞᱟᱹᱜᱤᱫ ᱫᱚ ᱵᱟᱝ ᱠᱟᱱᱟ ᱱᱚᱣᱟ ᱫᱚ ᱱᱟᱜᱟᱢ ᱥᱟᱠᱟᱢ ᱨᱮᱭᱟᱜ ᱢᱤᱫ ᱥᱟᱦᱴᱟ ᱠᱟᱱᱟ᱾ ᱦᱟᱯᱲᱟᱢ ᱠᱚᱣᱟᱜ ᱱᱩᱱᱟᱹᱜ ᱥᱟᱺᱜᱤᱧ ᱦᱩᱫᱤᱥ ᱛᱟᱸᱦᱮ ᱠᱟᱱ ᱛᱟᱠᱚᱣᱟ, ᱟᱵᱚᱣᱟᱜ ᱱᱟᱜᱟᱢ ᱟᱞᱚ ᱟᱫᱚᱜ ᱢᱟ ᱢᱮᱱᱛᱮ ᱮᱱᱮᱡ ᱥᱮᱨᱮᱧ ᱨᱮ ᱛᱚᱞ ᱫᱚᱦᱚ ᱪᱷᱟᱸᱫᱟ ᱫᱚᱦᱚ ᱠᱟᱛᱮ ᱜᱟᱬᱟ ᱠᱚ ᱞᱟᱹᱜᱤᱫ ᱠᱚ ᱥᱟᱡᱟᱣ ᱫᱚᱦᱚ ᱥᱟᱢᱴᱟᱣ ᱫᱚᱦᱚ ᱟᱠᱟᱣᱟᱫ ᱵᱚᱱᱟ᱾ ᱮᱱᱟᱝ ᱱᱟᱝ ᱨᱮ ᱦᱩᱭ ᱯᱟᱨᱚᱢ ᱟᱠᱟᱱ ᱜᱷᱚᱴᱚᱱ ᱠᱚ ᱟᱞᱚ ᱵᱚᱱ ᱦᱤᱲᱤᱧ ᱢᱟ ᱢᱮᱱᱛᱮ ᱱᱤᱛᱚᱝ ᱦᱚᱸ ᱚᱠᱟ ᱚᱠᱛᱚ ᱨᱮ ᱟᱭᱚᱱ ᱠᱟᱡᱚᱞ ᱟᱨ ᱫᱤᱵᱤ ᱫᱩᱨᱜᱟᱹ ᱯᱟᱼᱯᱟᱱᱛᱮ ᱠᱚ ᱪᱟᱞᱟᱣ ᱞᱮᱱᱟ, ᱚᱱᱟ ᱚᱠᱛᱚ ᱨᱮ ᱱᱤᱛᱚᱜ ᱦᱚᱸ ᱯᱮ ᱢᱟᱦᱟ, ᱢᱚᱸᱬᱮ ᱢᱟᱦᱟ ᱥᱮ ᱵᱤᱡᱚᱲ ᱢᱟᱦᱟᱸ ᱯᱟᱼᱯᱟᱱᱛᱮ ᱧᱩᱛᱩᱢ ᱠᱚ ᱫᱟᱬᱟᱱᱟ ᱥᱮᱠᱚ ᱮᱱᱮᱡᱼᱥᱮᱨᱮᱧᱟ᱾

Written by ᱫᱩᱨᱜᱟᱹ ᱯᱨᱚᱥᱟᱫᱽ ᱢᱩᱨᱢᱩ
Published on ᱯᱟᱸᱡᱟ (Sep – Oct 2013)