ᱵᱟᱝᱮ ᱟᱸᱡᱚᱢᱮᱫ

ᱩᱱᱤ!
ᱵᱟᱝᱮ ᱟᱸᱡᱚᱢᱮᱫ ᱛᱤᱧᱟ ᱦᱚᱢᱚᱨ
ᱟᱨ ᱟᱸᱡᱚᱢ ᱦᱚᱸ
ᱵᱟᱝ ᱥᱟᱱᱟᱭᱮ ᱠᱟᱱᱟ᱾

ᱡᱟᱸᱦᱟᱭᱟᱜ ᱢᱤᱨᱞᱩᱝ ᱢᱮᱫᱦᱟᱨᱮ
ᱢᱮᱥᱠᱚᱡ ᱤᱧ ᱯᱟᱥᱱᱟᱣ ᱞᱮᱫᱟ
ᱡᱟᱸᱦᱟᱭᱟᱜ ᱦᱚᱲᱢᱚᱧ
ᱥᱤᱢᱡᱤᱞ ᱦᱚᱪᱚ ᱞᱮᱫᱟ
ᱡᱟᱸᱦᱟᱭᱟᱜ ᱢᱚᱪᱟ ᱨᱮ ᱥᱤᱲᱩᱵ ᱤᱧ
ᱥᱟᱰᱮ ᱦᱚᱪᱚ ᱞᱮᱫᱟ
ᱟᱨ
ᱡᱟᱸᱦᱟᱭᱟᱜ ᱥᱩᱫ ᱨᱮ
ᱵᱤᱨ ᱵᱟᱦᱟᱹᱧ ᱨᱮᱵᱮᱫ ᱞᱮᱫᱟ᱾

ᱡᱟᱸᱦᱟᱭᱟᱜ ᱦᱚᱦᱚ
ᱡᱟᱹᱯᱤᱫ ᱢᱮᱫ ᱨᱮᱦᱚᱸᱧ ᱜᱚᱝ ᱞᱮᱫᱟ
ᱡᱟᱸᱦᱟᱭᱟᱜ ᱛᱤᱻ
ᱞᱚᱥᱚᱫ ᱨᱮᱭ ᱛᱷᱟᱹᱞᱤ ᱞᱮᱱ ᱨᱮᱧ ᱚᱨ ᱞᱮᱫᱟ
ᱡᱟᱸᱦᱟᱭᱟᱜ ᱰᱟᱸᱰᱟ
ᱦᱩᱠ ᱞᱮᱱ ᱨᱮᱧ ᱤᱥᱠᱤᱨ ᱞᱮᱫᱟ
ᱟᱨ ᱡᱟᱸᱦᱟᱭᱟᱜ ᱞᱩᱴᱤ
ᱛᱷᱟᱨᱛᱷᱟᱨᱟᱣᱜ ᱚᱠᱛᱮ
ᱤᱧᱟᱜ ᱞᱩᱴᱤ ᱛᱮᱧ ᱥᱟᱵ ᱩᱨᱤᱡ ᱞᱮᱫᱟ᱾

ᱩᱱᱤ!
ᱛᱮᱦᱮᱧ ᱥᱟᱺᱜᱤᱧᱚᱜ ᱠᱟᱱᱟᱭ ᱤᱧ ᱠᱷᱚᱱ᱾

Written by ᱦᱤᱥᱤᱫ ᱦᱚᱭ
Published on Arsi (ᱢᱟᱜᱽ – ᱪᱟᱹᱛ, 2013)