ᱵᱟᱦᱟ ᱢᱮᱱ ᱞᱮᱠᱷᱟᱱ ᱫᱚ ᱫᱟᱨᱮ ᱱᱟᱹᱲᱤ, ᱵᱩᱫᱟᱹ ᱨᱮ ᱵᱟᱦᱟᱜ ᱵᱟᱦᱟ ᱵᱩᱡᱷᱟᱣᱜ ᱠᱟᱱᱟ᱾ ᱱᱚᱣᱟ ᱵᱟᱦᱟ ᱢᱮᱱ ᱞᱮᱠᱷᱟᱱ ᱫᱚ ᱥᱟᱨᱡᱚᱢ ᱵᱟᱦᱟ ᱟᱨ ᱢᱟᱛᱠᱚᱢ ᱵᱟᱦᱟ ᱢᱮᱱᱛᱮ ᱵᱩᱡᱷᱟᱹᱜ ᱟᱱᱟ᱾ ᱵᱟᱦᱟ ᱥᱟᱞᱟᱜ ᱪᱟᱸᱫᱚ ᱡᱚᱲᱟᱣ ᱞᱮᱠᱷᱟᱱ ᱵᱟᱦᱟ ᱪᱟᱸᱫᱚ ᱵᱩᱡᱷᱟᱹᱣᱜ ᱠᱟᱱᱟ, ᱠᱟᱛᱷᱟᱡ ᱵᱟᱦᱟ ᱪᱟᱸᱫᱚ ᱢᱮᱱ ᱞᱮᱠᱷᱟᱱ ᱫᱚ ᱥᱟᱨᱡᱚᱢᱼᱢᱟᱛᱠᱚᱢ ᱵᱟᱦᱟᱜ ᱚᱠᱛᱚ ᱵᱩᱡᱷᱹᱟᱜᱣᱜ ᱠᱟᱱᱟ᱾ ᱵᱟᱦᱟ ᱢᱮᱱ ᱞᱮᱠᱷᱟᱱ ᱫᱚ ᱢᱤᱫ ᱯᱟᱨᱟᱵ ᱢᱮᱱᱛᱮ ᱦᱚᱸ ᱵᱩᱡᱷᱟᱹᱜ ᱠᱟᱱᱟ᱾ ᱱᱚᱰᱮ ᱵᱟᱦᱟ ᱢᱮᱱ ᱞᱮᱠᱷᱟᱱ ᱫᱚ ᱥᱟᱱᱛᱟᱲ ᱦᱚᱯᱚᱱ ᱠᱚᱣᱟᱜ ᱮᱛᱚᱦᱚᱵ, ᱢᱟᱨᱟᱝ ᱯᱟᱨᱟᱵ ᱠᱟᱱᱟ ᱚᱠᱟ ᱫᱚ ᱯᱷᱟᱹᱜᱩᱱ ᱪᱟᱸᱫᱚ ᱦᱩᱭᱩᱜ ᱠᱟᱱᱟ᱾ ᱵᱟᱦᱟ ᱯᱟᱨᱟᱵ ᱫᱚ ᱫᱤᱥᱚᱢ ᱡᱟᱠᱟᱴ ᱥᱟᱱᱛᱟᱲ ᱦᱚᱲᱟᱜ ᱠᱚ ᱢᱤᱫ ᱫᱷᱟᱣ ᱛᱮ ᱯᱷᱟᱹᱜᱩᱱ ᱠᱩᱱᱟᱹᱢᱤ ᱚᱠᱛᱚ ᱢᱟᱱᱟᱣ ᱫᱚ ᱟᱹᱰᱤ ᱡᱚᱛᱷᱟᱛᱟ᱾ ᱱᱚᱣᱟ ᱛᱮ ᱥᱟᱱᱛᱟᱲ ᱡᱟᱹᱛᱤ ᱫᱟᱲᱮᱭ ᱥᱟᱦᱟᱨᱟ᱾ ᱥᱟᱱᱛᱟᱲᱟᱜ ᱵᱟᱹᱲᱛᱤ ᱠᱟᱨ ᱛᱮ ᱯᱟᱨᱟᱵ ᱠᱚ ᱠᱩᱱᱟᱹᱢᱤ ᱥᱟᱶ ᱜᱮ ᱡᱚᱲᱟᱣ ᱟᱠᱟᱱᱟ᱾ ᱱᱚᱣᱟ ᱪᱟᱸᱫᱚ ᱞᱮᱠᱟᱛᱮ ᱥᱮ ᱥᱮᱨᱢᱟ ᱞᱮᱠᱷᱟ ᱞᱮᱠᱟᱛᱮ ᱠᱩᱱᱟᱹᱢᱤ ᱢᱟᱱᱟᱣ ᱜᱮ ᱡᱚᱛᱷᱟᱛᱟ᱾
ᱵᱟᱦᱟ ᱯᱟᱨᱟᱵᱽ ᱫᱚ ᱥᱟᱱᱛᱟᱲᱟᱜ ᱮᱛᱚᱦᱚᱵ ᱢᱟᱨᱟᱝ ᱯᱟᱨᱟᱵ ᱠᱟᱱᱟ᱾ ᱵᱟᱦᱟ ᱯᱟᱨᱟᱵ ᱫᱚ ᱯᱮ ᱢᱟᱦᱟ ᱠᱚ ᱢᱟᱱᱟᱣᱟᱼᱚᱱᱟ ᱠᱚᱫᱚ ᱵᱚᱝᱠᱟᱼᱩᱢᱼᱱᱟᱲᱠᱟ ᱢᱟᱦᱟ ᱵᱟᱝ ᱵᱚᱸᱜᱟ ᱠᱚ ᱨᱩᱢᱼᱰᱟᱠᱟᱣ ᱢᱟᱦᱟᱸ ᱥᱟᱹᱨᱫᱤ ᱢᱟᱦᱟ ᱵᱟᱝ ᱵᱟᱦᱟ ᱵᱚᱸᱜᱟᱭ ᱢᱟᱦᱟ ᱟᱨ ᱛᱮᱥᱟᱨ ᱢᱟᱦᱟ ᱫᱚ ᱵᱟᱥᱠᱮ ᱢᱟᱦᱟ ᱥᱮ ᱥᱮᱸᱫᱽᱨᱟ ᱢᱟᱦᱟ᱾
(᱑) ᱩᱢᱼᱱᱟᱲᱠᱟ ᱢᱟᱦᱟᱸ ᱥᱮ ᱵᱟᱦᱟ ᱵᱚᱸᱜᱟ ᱮᱛᱚᱦᱚᱵ ᱢᱟᱦᱟ ᱥᱮ ᱵᱚᱸᱜᱟ ᱠᱚ ᱨᱩᱢ ᱰᱟᱠᱟᱣ ᱢᱟᱦᱟᱼᱱᱚᱣᱟ ᱢᱟᱦᱟ ᱦᱤᱞᱚᱜ ᱫᱚ ᱟᱹᱛᱩ ᱦᱚᱲ ᱠᱚᱠᱚ ᱩᱢ ᱱᱟᱲᱠᱟᱜᱼᱟ ᱠᱟᱛᱷᱟᱡ ᱛᱚᱨᱟᱡ ᱛᱮ ᱠᱩᱜᱲᱤ ᱞᱟᱯᱚ ᱠᱚ ᱛᱤᱠᱤ ᱥᱚᱵᱚᱫ ᱯᱷᱟᱹᱨᱪᱟᱹᱭᱟ᱾ ᱵᱚᱸᱜᱟ ᱛᱷᱟᱱ ᱠᱚ ᱟᱹᱛᱩᱦᱚᱲ ᱠᱚ ᱯᱷᱟᱨᱪᱟᱭᱟ, ᱵᱚᱸᱜᱟ ᱚᱲᱟᱜ ᱠᱚᱠᱚ ᱫᱟᱞᱚᱵᱟ ᱰᱟᱺᱝᱜᱽᱣᱟ ᱠᱚᱲᱟ ᱠᱚᱠᱚ ᱫᱟᱞᱚᱵ ᱚᱪᱚ ᱠᱚᱣᱟ ᱩᱯᱟᱹᱥ ᱛᱮ᱾ ᱱᱟᱭᱠᱮ ᱵᱟᱵᱟ ᱦᱚᱸ ᱥᱟᱱᱟᱢ, ᱵᱚᱸᱜᱟ ᱛᱷᱟᱱ ᱠᱚᱭ ᱡᱮᱜᱼᱜᱩᱨᱤᱡᱟ ᱵᱚᱸᱜᱟ ᱠᱚᱭ ᱩᱢᱼᱱᱟᱲᱠᱟ ᱠᱚᱣᱟ᱾ ᱟᱫᱚ ᱡᱚᱛᱚ ᱦᱚᱲ ᱩᱢᱱᱟᱬᱲᱟ ᱠᱟᱛᱮ ᱟᱯᱟᱱᱼᱟᱹᱯᱤᱱ ᱚᱲᱟᱜ ᱠᱚ ᱪᱟᱞᱟᱜᱼᱟ᱾ ᱛᱟᱨᱟᱥᱤᱧ ᱵᱮᱲᱟ ᱥᱮ ᱥᱤᱸᱜᱟᱹᱲ ᱵᱮᱲᱟ ᱟᱹᱨᱦᱚᱸ ᱟᱹᱛᱩ ᱦᱚᱲ ᱠᱚ ᱱᱟᱭᱠᱮ ᱨᱟᱪᱟ ᱨᱮᱠᱚ ᱡᱟᱨᱣᱟᱜᱼᱟ᱾ ᱵᱚᱸᱜᱟ ᱠᱚᱠᱚ ᱨᱩᱢ ᱰᱟᱠᱟᱣ ᱠᱚᱣᱟ, ᱵᱩᱜᱤ ᱵᱟᱹᱲᱤᱡ ᱠᱚ ᱠᱩᱞᱤ ᱡᱚᱝᱼᱟ᱾ ᱨᱩᱢ ᱵᱚᱸᱜᱟ ᱫᱚ ᱨᱩᱢᱠᱟᱛᱮ ᱡᱟᱦᱮᱨ ᱛᱷᱟᱱ ᱠᱚ ᱪᱟᱞᱟᱜᱼᱟ᱾ ᱧᱮᱞ ᱵᱟᱲᱟ ᱠᱟᱛᱮ ᱠᱚ ᱨᱩᱣᱟᱹᱲᱟ᱾ ᱟᱹᱛᱩ ᱦᱚᱲ ᱱᱟᱭᱠᱮ ᱨᱟᱪᱟ ᱨᱮᱠᱚ ᱮᱱᱮᱡ ᱠᱷᱟᱱ ᱨᱩᱢ ᱵᱚᱸᱜᱟ ᱠᱚᱦᱚᱸ ᱠᱚ ᱮᱱᱮᱡᱼᱟ᱾ ᱡᱟᱹᱜᱟ ᱠᱚ ᱟᱹᱨᱩᱵ ᱠᱚᱣᱟ ᱟᱫᱚ ᱠᱚ ᱥᱩᱢᱟᱹᱱ ᱠᱚᱣᱟ᱾
(᱒) ᱫᱚᱥᱟᱨ ᱢᱟᱦᱟᱸ ᱫᱚ ᱵᱟᱦᱟ ᱵᱚᱸᱜᱟ ᱢᱟᱦᱟᱼᱟᱹᱰᱤ ᱡᱟᱠᱼᱡᱚᱢᱚᱠ ᱛᱮ ᱮᱱᱮᱡᱼᱥᱮᱨᱮᱧ ᱛᱟᱞᱟ ᱛᱮ ᱵᱟᱦᱟ ᱵᱚᱸᱜᱟ ᱵᱩᱨᱩ ᱠᱚ ᱦᱩᱭᱩᱜᱼᱟ᱾ ᱵᱚᱸᱜᱟ ᱠᱚ ᱥᱟᱢᱟᱝ ᱨᱮ ᱥᱟᱨᱡᱚᱢ ᱢᱟᱛᱠᱚᱢ ᱵᱟᱦᱟ ᱠᱚ ᱥᱟᱢᱟᱝ ᱟᱠᱚᱣᱟ᱾ ᱥᱤᱢᱼᱢᱮᱨᱚᱢ ᱠᱚ ᱵᱚᱸᱜᱟ ᱠᱟᱛᱮ ᱟᱨ ᱥᱚᱲᱮ ᱠᱟᱛᱮ ᱠᱚ ᱡᱚᱢ ᱠᱚᱣᱟ᱾ ᱟᱹᱰᱤ ᱠᱚ ᱮᱱᱮᱡᱼᱥᱮᱨᱮᱧᱟ᱾ ᱨᱩᱢ ᱵᱚᱸᱜᱟ ᱠᱚᱦᱚᱱ ᱠᱚ ᱮᱱᱮᱡᱼᱟ᱾ ᱛᱟᱨᱟ ᱥᱤᱧ ᱵᱮᱲᱟ ᱫᱚ ᱥᱚᱲᱮ ᱠᱚ ᱡᱚᱢ ᱛᱟᱭᱚᱢ ᱮᱱᱮᱡᱼᱥᱮᱨᱮᱧ ᱵᱷᱟᱜᱟᱣ ᱠᱟᱛᱮ ᱟᱫᱚ ᱱᱟᱭᱠᱮ ᱵᱟᱟ ᱚᱲᱟᱜ ᱛᱮᱠᱚ ᱤᱫᱤ ᱨᱩᱣᱟᱹᱲ ᱠᱟᱭᱟ᱾ᱰᱟᱦᱟᱨ ᱮᱱᱮᱡ ᱥᱮᱨᱮᱧ ᱟᱛᱮ ᱠᱚ ᱨᱩᱣᱟᱹᱲᱟ᱾ ᱪᱷᱟᱴᱠᱟ ᱯᱤᱪᱷᱤ ᱱᱟᱭᱠᱮ ᱫᱚ ᱡᱟᱸᱜᱟ ᱠᱚ ᱟᱹᱨᱩᱵ ᱤᱫᱤ ᱮᱭᱟ᱾ ᱱᱟᱭᱠᱮ ᱫᱚ ᱟᱹᱛᱩ ᱦᱚᱲ ᱠᱚ ᱦᱟᱺᱰᱤᱭ ᱮᱢᱟ ᱠᱚᱣᱟ᱾ ᱛᱟᱭᱚᱢ ᱫᱚ ᱵᱟᱦᱟ, ᱰᱟᱦᱟᱨ ᱞᱟᱜᱩᱱ ᱠᱚᱠᱚ ᱮᱱᱮᱡ ᱥᱮᱨᱮᱧ ᱟᱸᱜᱟᱭᱟ᱾
(᱓) ᱛᱮᱥᱟᱨ ᱢᱟᱦᱟᱸ ᱫᱚ ᱵᱟᱦᱟ ᱵᱟᱥᱠᱮ ᱢᱟᱦᱟᱼᱱᱚᱣᱟ ᱢᱟᱦᱟᱸ ᱦᱤᱞᱚᱜ ᱫᱚ ᱠᱚᱲᱟ ᱠᱚᱫᱚ ᱵᱟᱦᱟ ᱥᱮᱫᱽᱨᱟ ᱠᱚ ᱪᱟᱞᱟᱜᱼᱟ ᱟᱨ ᱠᱩᱲᱤ ᱠᱚᱫᱚ ᱫᱟᱜ ᱠᱚᱠᱚ ᱫᱩᱯᱩᱞ ᱮᱱᱮᱡᱼᱟ᱾ ᱟᱹᱰᱤ ᱟᱹᱛᱩ ᱨᱮᱫᱚ ᱵᱟᱥᱠᱮ ᱢᱟᱦᱟᱸ ᱫᱚ ᱥᱟᱹᱜᱩᱱ ᱥᱩᱯᱟᱹᱲᱤ ᱠᱚ ᱧᱮᱞᱟ᱾ ᱥᱮᱨᱢᱟ ᱵᱷᱩᱨ ᱨᱮᱭᱟᱜ ᱵᱩᱜᱤ ᱵᱟᱹᱲᱤᱡ ᱠᱚ ᱵᱟᱰᱟᱭ ᱡᱚᱝᱼᱟ᱾ ᱵᱚᱸᱜᱟ ᱠᱚᱠᱚ ᱨᱩᱢᱩᱜᱼᱟ᱾ ᱠᱩᱲᱟᱣ ᱛᱟᱦᱮᱸ ᱠᱷᱟᱱ ᱱᱟᱣᱟ ᱢᱟᱛᱠᱚᱢ ᱯᱷᱩᱞᱤ ᱯᱟᱹᱨᱣᱟᱹ ᱵᱚᱸᱜᱟ ᱠᱩᱠᱚ ᱮᱢᱟ ᱠᱚᱣᱟ ᱤᱱᱟᱹ ᱠᱟᱛᱮ ᱫᱚ ᱥᱟᱨᱮᱡ ᱫᱚ ᱟᱹᱛᱩ ᱦᱚᱲ ᱠᱚᱠᱚ ᱧᱩᱼᱨᱟᱥᱠᱟᱹᱭ ᱡᱚᱝᱼᱟ᱾
ᱵᱟᱦᱟ ᱯᱟᱨᱟᱵ ᱫᱚ ᱟᱹᱰᱤ ᱢᱚᱦᱚᱛ ᱟᱱᱟᱜ ᱯᱟᱨᱟᱵᱽ ᱠᱟᱱᱟ᱾ ᱥᱟᱱᱛᱟᱲᱟᱜ ᱮᱛᱚᱦᱚᱵ ᱥᱮ ᱥᱮᱫᱟᱭᱟᱜ ᱡᱚᱢᱼᱧᱩ ᱛᱮᱭᱟᱜ ᱥᱟᱨᱡᱚᱢᱼᱢᱟᱛᱠᱚᱢ ᱜᱮᱪᱚ ᱠᱚ ᱡᱚᱢ ᱞᱮᱜᱼᱟ᱾ ᱚᱱᱟᱛᱮ ᱥᱟᱨᱡᱚᱢ ᱢᱟᱛᱠᱚᱢ ᱫᱚ ᱡᱤᱢ ᱡᱤᱣᱤ ᱫᱚᱜ ᱡᱤᱱᱤᱥ ᱠᱟᱱᱟ᱾ ᱱᱮᱛᱟᱨ ᱦᱚᱸ ᱥᱟᱱᱛᱟᱲ ᱠᱚᱫᱚ ᱥᱟᱨᱡᱚᱢᱼᱢᱟᱛᱠᱚᱢ ᱱᱟᱱᱟ ᱦᱩᱱᱟᱹᱨ ᱞᱮᱠᱟᱛᱮ ᱠᱚ ᱡᱚᱢ ᱮᱫ ᱜᱮᱭᱟ ᱾ ᱥᱟᱨᱡᱚᱢᱼᱢᱟᱛᱠᱚᱢ ᱟᱹᱰᱤ ᱛᱮᱫ ᱜᱮ ᱢᱟᱹᱱᱢᱤ ᱭᱟᱜ ᱞᱟᱹᱠᱛᱤᱭ ᱯᱩᱨᱟᱹᱣ ᱮᱫᱼᱟ᱾ ᱱᱚᱣᱟ ᱠᱚ ᱠᱷᱟᱹᱛᱤᱨ ᱛᱮᱜᱮ ᱟᱵᱚ ᱫᱚ ᱥᱟᱨᱡᱚᱢ ᱵᱤᱨ ᱛᱟᱞᱟ ᱨᱮ ᱵᱚ ᱛᱟᱦᱮᱸ ᱟᱹᱜᱩ ᱟᱠᱟᱱᱟ᱾ ᱵᱟᱦᱟ ᱫᱚ ᱥᱟᱱᱛᱟᱲᱟᱜ ᱮᱛᱚᱦᱚᱵ ᱟᱹᱛᱩ ᱪᱤᱭᱟᱹ ᱞᱮᱠᱟᱟᱛᱮ ᱜᱮ ᱡᱟᱦᱮᱨ ᱛᱟᱞᱟ ᱨᱮ ᱵᱚᱸᱜᱟ ᱵᱩᱨᱩ ᱦᱩᱭᱩᱜ ᱠᱟᱱᱟ᱾
ᱢᱚᱱᱮ ᱨᱮᱭᱟᱜ ᱠᱟᱛᱷᱟ ᱯᱷᱚᱴᱮᱞ ᱥᱚᱫᱚᱨ ᱢᱮ !