ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ

ᱛᱤᱞᱚᱠᱯᱩᱨ ᱟᱹᱛᱩ ᱰᱟᱦᱟᱨ ᱯᱚᱱᱚᱛ ᱵᱷᱟᱜᱚᱞ ᱯᱩᱨ ᱡᱤᱞᱞᱟᱹ ᱨᱮᱱᱟᱝ ᱢᱤᱫ ᱧᱩᱛᱩᱢᱟᱱ ᱟᱹᱛᱩ᱾ᱚᱱᱟ ᱧᱩᱛᱩᱢᱟᱱ ᱟᱹᱛᱩ ᱨᱮᱜᱮ ᱥᱟᱱᱛᱟᱲ ᱠᱚᱭᱤᱡ ᱮᱛᱚᱦᱚᱵ ᱨᱟᱱᱟᱲᱟ ᱧᱮᱯᱮᱫᱤᱭᱟᱹ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱢᱟᱹᱼ ᱑᱑ᱼ᱒ᱼ᱑᱗᱕᱐ ᱥᱟᱞᱮ ᱨᱮᱠᱤᱱ ᱡᱟᱱᱟᱢ ᱯᱮᱱ ᱛᱟᱦᱮᱸᱱ᱾

ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱧᱮᱞ ᱡᱚᱝ ᱛᱮ ᱟᱹᱰᱤ ᱵᱚᱛᱚᱨ ᱜᱮ ᱠᱤᱱ ᱛᱟᱦᱮᱸ ᱠᱟᱱᱟ᱾ᱟᱹᱠᱤᱱᱟᱜ ᱦᱚᱲᱢᱚ ᱫᱚ ᱜᱩᱞᱟᱺᱰ ᱜᱩᱞᱴᱷᱩ ᱱᱤᱥᱟᱺᱰ, ᱱᱤᱯᱷᱚᱴ ᱟᱨ ᱫᱟᱲᱮᱛᱮ ᱯᱮᱨᱮᱡ ᱠᱤᱱ ᱛᱟᱦᱮᱸ ᱠᱟᱱᱟ᱾ᱟᱠᱤᱱ ᱫᱚ ᱡᱚᱥ ᱥᱟᱨ ᱛᱩᱧ ᱠᱷᱟᱸᱰᱟ ᱠᱟᱹᱯᱤ ᱦᱩᱨᱯᱟᱹ ᱴᱷᱮᱸᱜᱟ ᱟᱹᱪᱩᱨ ᱜᱤᱰᱩᱣᱟᱹᱨᱤ ᱛᱩᱧ ᱟᱨ ᱛᱟᱯᱟᱢ ᱮᱢᱟᱱ ᱮᱢᱟᱱ ᱠᱚᱨᱮ ᱢᱤᱫ ᱵᱤᱨ ᱵᱟᱶ ᱦᱚᱲ ᱜᱮᱠᱤᱱ ᱛᱟᱦᱮᱸ ᱠᱟᱱᱟ᱾

ᱟᱯᱟᱛ ᱛᱤᱠᱤᱱ ᱢᱟ ᱛᱟᱹᱠᱤᱱ ᱢᱤᱫ ᱯᱟᱨᱜᱟᱱᱟ ᱦᱚᱲ ᱠᱤᱱ ᱛᱟᱦᱮᱸ ᱠᱟᱱᱟ᱾ ᱚᱱᱟᱛᱮ ᱟᱯᱟᱛ ᱛᱟᱹᱠᱤᱱ ᱮ ᱵᱟᱸᱜᱟ ᱫᱮᱥᱚᱢ ᱮᱱ ᱛᱟᱭᱚᱢ ᱠᱷᱚᱱ ᱫᱚ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱜᱮ ᱯᱟᱨᱜᱟᱱᱟ ᱠᱟᱹᱢᱤ ᱫᱚᱠᱤᱱ ᱛᱚᱨᱟᱣ ᱮᱫ ᱛᱟᱦᱮᱸ ᱠᱟᱱᱟ᱾ ᱵᱤᱪᱟᱹᱨ , ᱟᱪᱟᱨ ᱟᱨ ᱢᱟᱹᱞᱤ ᱢᱟᱵᱽᱞᱟ ᱠᱚ ᱦᱚᱲ ᱦᱚᱯᱚᱱᱟᱜ ᱟᱹᱰᱤ ᱱᱤᱨᱟᱹᱭ ᱛᱮᱠᱤᱱ ᱛᱚᱨᱟᱣ ᱮᱫ ᱛᱟᱦᱮᱸ ᱠᱟᱱᱟ᱾ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱪᱮᱫ ᱞᱮᱠᱟᱱ ᱱᱚᱭᱟᱱ ᱦᱚᱲ ᱠᱤᱱ ᱛᱟᱦᱮᱸ ᱠᱟᱱᱟ ᱚᱱᱠᱟ ᱜᱮ ᱫᱷᱚᱨᱚᱢ ᱫᱟᱲᱮ ᱛᱮᱦᱚᱸ ᱠᱮᱴᱮᱡ ᱜᱮᱠᱤᱱ ᱛᱟᱦᱮᱸ ᱠᱟᱱᱟ᱾ ᱚᱱᱟᱛᱮ ᱦᱚᱲ ᱦᱚᱯᱚᱱ ᱠᱚ ᱢᱹᱠᱤᱱ ᱫᱚ ᱨᱟᱡᱟ ᱟᱨ ᱵᱟᱵᱟ ᱞᱮᱠᱟᱠᱚ ᱜᱟᱱᱟᱣ ᱮᱫ ᱠᱤᱱ ᱛᱟᱦᱮᱸ ᱠᱟᱱᱟ᱾ ᱟᱹᱠᱤᱱ ᱫᱚ ᱥᱟᱱᱟᱢ ᱫᱤᱥᱚᱢ ᱦᱚᱲ ᱠᱚᱜᱮ ᱵᱟᱨᱟ ᱵᱟᱹᱨᱤ ᱜᱮᱠᱤᱱ ᱧᱮᱞᱮᱫ ᱠᱚ ᱛᱟᱦᱮᱸ ᱠᱟᱱᱟ᱾ ᱢᱟᱨᱟᱝ ᱠᱚ ᱡᱮᱢᱚᱱ ᱠᱤᱱ ᱢᱟᱱᱚᱛ ᱮᱫ ᱠᱚ ᱛᱟᱦᱮᱸ ᱠᱟᱱᱟ , ᱦᱩᱰᱤᱧ ᱠᱚᱦᱚᱸ ᱛᱮᱢᱚᱱ ᱠᱤᱱ ᱫᱩᱞᱟᱹᱲ ᱮᱫ ᱠᱚ ᱛᱟᱦᱮᱸ ᱠᱟᱱᱟ᱾ ᱚᱱᱟᱛᱮ ᱟᱹᱠᱤᱱᱫᱚ ᱟᱵᱚ ᱦᱚᱲ ᱵᱷᱮᱜᱮᱫ ᱮᱴᱟᱜ ᱪᱷᱟᱹᱛᱤᱠ ᱠᱚᱦᱚᱸ ᱠᱚ ᱢᱟᱱᱟᱣ ᱞᱮᱫ ᱠᱤᱱ ᱜᱮ ᱛᱟᱦᱮᱸᱱ᱾ ᱢᱚᱴᱟ ᱢᱚᱴᱤ ᱢᱮᱱ ᱞᱮᱠᱷᱟᱱ ᱜᱟᱱᱚᱜᱼᱟ ᱡᱮ ᱟᱹᱠᱤᱱ ᱫᱚ ᱥᱟᱱᱟᱢ ᱦᱚᱲ ᱜᱮᱠᱚ ᱢᱟᱱᱟᱣ ᱮᱫ ᱠᱤᱱ ᱛᱟᱦᱮᱸ ᱠᱟᱱᱟ᱾ ᱟᱹᱠᱤᱱ ᱫᱤᱥᱚᱢ ᱡᱟᱹᱨᱤᱭᱮᱫ ᱚᱠᱛᱚ ᱫᱚ ᱦᱚᱲ ᱦᱚᱯᱚᱱ ᱠᱚᱣᱟᱜ ᱪᱮᱫ ᱦᱚᱸ ᱟᱱᱟᱴ ᱜᱮ ᱵᱟᱝ ᱛᱟᱦᱮᱸ ᱠᱟᱱᱟ᱾ ᱚᱱᱟᱛᱮ ᱫᱤᱥᱚᱢ ᱨᱮ ᱠᱩᱸᱵᱽᱲᱩ ᱵᱩᱠᱲᱩ ᱠᱟᱹᱢᱤ ᱜᱮ ᱮᱠᱟᱞ ᱵᱟᱝ ᱦᱩᱭᱩᱜ ᱠᱟᱱ ᱛᱟᱦᱮᱸᱜ᱾ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱚᱢᱚᱱ ᱫᱚ ᱵᱷᱟᱜᱚᱞᱯᱩᱨ ᱡᱤᱞᱞᱟᱹ ᱫᱚ ᱵᱤᱨ ᱵᱩᱨᱩ ᱛᱮᱜᱮ ᱯᱮᱨᱮᱡ ᱛᱟᱦᱮᱸ ᱠᱟᱱᱟ᱾ ᱫᱟᱨᱮ ᱞᱟᱨᱮ ᱡᱮᱯᱮᱫ ᱡᱮᱯᱮᱫ ᱛᱚᱯᱚᱞ ᱵᱷᱤᱲᱟᱹᱣ ᱞᱮᱱ ᱛᱟᱦᱮᱸᱜ᱾ ᱟᱹᱠᱤᱱᱟᱜ ᱚᱢᱚᱱ ᱡᱩᱫᱤ ᱦᱚᱸ ᱫᱤᱥᱚᱢ ᱥᱟᱦᱮᱵᱽ ᱠᱚᱣᱟᱜ ᱜᱚᱵᱚᱞ ᱨᱮ ᱛᱟᱦᱮᱸ ᱠᱟᱱᱟ, ᱮᱱ ᱨᱮᱦᱚᱸ ᱦᱚᱲ ᱦᱚᱯᱚᱱ ᱠᱚ ᱥᱟᱦᱮᱵᱽ ᱡᱟᱹᱨᱤ ᱨᱮ ᱢᱟᱬᱟᱝ ᱵᱟᱝ ᱛᱟᱦᱮᱸ ᱠᱟᱛᱮ ᱟᱠᱚᱣᱟᱜ ᱡᱟᱹᱨᱤ ᱨᱮᱜᱮ ᱠᱚ ᱛᱟᱦᱮᱱ ᱠᱟᱱᱟ᱾ ᱛᱚ, ᱠᱤᱪᱷᱩ ᱫᱤᱱ ᱛᱟᱭᱚᱢ ᱥᱟᱦᱮᱵᱽ ᱦᱚᱯᱚᱱ ᱠᱚ ᱟᱵᱚ ᱦᱚᱲ ᱠᱚ ᱪᱮᱛᱟᱱ ᱨᱮ ᱡᱩᱨ ᱠᱚᱪᱚᱞᱚᱸᱰ ᱡᱟᱹᱨᱤ ᱠᱚ ᱞᱟᱜᱟᱣ ᱠᱮᱫ ᱠᱷᱟᱱ ᱵᱮᱪᱨᱟ ᱟᱵᱚ ᱦᱚᱲᱠᱚ ᱫᱤᱥᱟᱹ ᱷᱟᱨᱟ ᱠᱟᱛᱮ ᱥᱟᱦᱮᱵᱽ ᱡᱟᱹᱨᱤ ᱨᱮ ᱛᱟᱦᱮᱸ ᱛᱮ ᱦᱩᱭ ᱟᱫ ᱠᱚᱣᱟ᱾

ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱟᱜ ᱫᱚ ᱵᱚᱸᱜᱟ ᱵᱳᱨᱳ ᱪᱮᱛᱟᱱ ᱨᱮ ᱡᱮᱢᱚᱱ ᱯᱟᱹᱛᱟᱹᱛ ᱛᱟᱦᱮᱸ ᱠᱟᱱᱟ ᱫᱮᱵᱟ ᱥᱮᱵᱟ ᱞᱟᱜᱟᱱ ᱛᱮᱦᱚᱸ ᱛᱟᱹᱠᱤᱱ ᱚᱱᱠᱟ ᱜᱮ ᱨᱟᱹᱥᱠᱟᱹ ᱛᱟᱦᱮᱸ ᱠᱟᱱᱟ᱾ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱᱟᱜ ᱢᱤᱫ ᱠᱟᱛᱷᱟ ᱢᱮᱱᱟᱜᱼᱟ᱾ ᱢᱤᱫ ᱫᱤᱱ ᱟᱹᱠᱤᱱ ᱜᱚᱥᱟᱬᱮ ᱛᱷᱟᱱ ᱨᱮ ᱵᱚᱸᱜᱟ ᱥᱟᱶ ᱫᱩᱲᱩᱵ ᱟᱠᱟᱱ ᱚᱠᱛᱮ ᱢᱤᱫ ᱯᱟᱹᱫᱽᱨᱤ ᱥᱟᱦᱮᱵᱽ ᱛᱤᱠᱤᱱ ᱦᱮᱡ ᱠᱟᱛᱮ ᱠᱤᱱ ᱢᱮᱛᱟᱫ ᱠᱤᱱᱟ ᱱᱚᱣᱟ ᱴᱟᱴᱠᱟ ᱫᱷᱤᱨᱤ ᱫᱚ ᱪᱮᱫ ᱵᱤᱱ ᱵᱚᱸᱜᱟ ᱟᱜ ᱠᱟᱱᱟ ᱵᱟᱵᱟ ᱚᱱᱟᱛᱮ ᱪᱮᱫ ᱟᱹᱵᱤᱱᱟᱜ ᱱᱟᱭᱠᱟᱱ ᱦᱩᱭᱩᱜ ᱠᱟᱱᱟ? ᱩᱱᱨᱮ ᱵᱟᱵᱟ ᱛᱤᱞᱠᱟᱹ ᱛᱤᱠᱤᱱ ᱠᱤᱱ ᱞᱟᱹᱭ ᱨᱩᱣᱟᱹᱲ ᱠᱮᱫᱼᱟ, ᱵᱟᱝᱼᱟ ᱥᱟᱦᱮᱵᱽ, ᱱᱚᱣᱟᱫᱚ ᱫᱷᱤᱨᱤ ᱫᱚ ᱵᱟᱝ ᱠᱟᱱᱟ᱾ “ᱱᱩᱭ ᱫᱚ ᱵᱚᱸᱜᱟ ᱠᱟᱱ ᱛᱟᱞᱮᱭᱟᱭ᱾ ᱥᱮᱵᱟᱭᱮ ᱠᱟᱱᱟᱞᱮ᱾ ᱱᱩᱭ ᱵᱚᱸᱜᱟ ᱞᱮ ᱥᱮᱵᱟᱭᱮ ᱠᱟᱱ ᱛᱮ ᱟᱞᱮᱭᱟᱜ ᱥᱟᱱᱟᱢ ᱞᱮᱠᱟᱱᱟᱜ ᱟᱹᱥ ᱛᱟᱞᱮ ᱯᱩᱨᱟᱹᱣᱜ ᱠᱟᱱᱟ᱾ ᱩᱱᱨᱮ ᱮᱱᱠᱷᱟᱱ ᱯᱟᱹᱫᱽᱨᱤ ᱥᱟᱦᱮᱵᱽ ᱛᱤᱠᱤᱱ ᱠᱤᱱ ᱢᱮᱱ ᱠᱮᱫᱼᱟ ᱥᱟᱹᱨᱤ ᱜᱮ ᱱᱩᱭ ᱵᱚᱸᱜᱟ ᱟᱛᱮ ᱟᱯᱮᱭᱟᱜ ᱥᱟᱱᱟᱢ ᱞᱮᱠᱟᱱ ᱟᱹᱥ ᱛᱟᱯᱮ ᱯᱩᱨᱟᱹᱣᱜ ᱠᱟᱱᱟ? ᱩᱱᱨᱮ ᱵᱟᱵᱟ ᱛᱤᱞᱠᱟᱹ ᱛᱤᱠᱤᱱ ᱦᱚᱸ ᱥᱚᱸᱥᱚᱸᱜᱮ ᱠᱤᱱ ᱢᱮᱱ ᱨᱩᱣᱟᱹᱲ ᱠᱮᱫᱼᱟ , ᱦᱚᱸ ᱦᱚᱸ ᱥᱟᱦᱮᱵᱽ᱾ ᱟᱪᱷᱟ ᱵᱟᱵᱟ ᱛᱤᱞᱠᱟᱹ – ᱢᱮᱬᱦᱮᱫ ᱨᱤᱱᱤᱡ ᱢᱮᱨᱚᱢ ᱱᱩᱭ ᱵᱚᱸᱜᱟᱭ ᱢᱟᱜ ᱛᱚᱯᱟᱜ ᱠᱮᱭᱟ ᱟᱨ ᱢᱟᱭᱟᱢᱮ ᱚᱰᱚᱠ ᱚᱪᱚ ᱠᱮ ᱛᱟᱭᱟ , ᱢᱮᱱᱛᱮ ᱯᱟᱹᱫᱨᱤ ᱥᱟᱦᱮᱵᱽ ᱛᱤᱠᱤᱱ ᱠᱤᱱ ᱢᱮᱱ ᱠᱮᱜᱼᱟ᱾ ᱠᱷᱟᱱ ᱵᱟᱵᱟ ᱛᱤᱞᱠᱟᱹ ᱛᱤᱠᱤᱱ ᱠᱤᱱ ᱢᱮᱱ ᱨᱩᱣᱟᱹᱲ ᱠᱮᱜᱼᱟ , ᱦᱚᱸ ᱦᱚᱸ ᱥᱟᱦᱮᱵᱽ᱾ ᱟᱹᱰᱤ ᱟᱞᱜᱟ ᱛᱮ ᱢᱮᱬᱦᱮᱫ ᱨᱤᱱᱤᱡ ᱢᱮᱨᱚᱢ ᱮ ᱢᱟᱜ ᱛᱚᱯᱟᱜᱚᱜᱼᱟ ᱟᱨ ᱢᱟᱭᱟᱢ ᱦᱚᱸ ᱛᱟᱭ ᱚᱰᱚᱠᱚᱜᱼᱟ᱾ ᱮᱱᱠᱷᱟᱱ ᱢᱤᱫ ᱫᱤᱱ ᱢᱮᱬᱦᱮᱫ ᱢᱮᱨᱚᱢ ᱟᱹᱜᱩ ᱠᱟᱛᱮ ᱵᱚᱸᱜᱟᱭᱮ ᱨᱮᱱᱟᱝ ᱫᱤᱱ ᱫᱷᱟᱨᱡᱚ ᱭᱮᱱᱟ”᱾

ᱚᱱᱟ ᱫᱷᱟᱨᱡᱚ ᱫᱤᱱ ᱥᱮᱴᱮᱨ ᱮᱱᱟ᱾ ᱢᱮᱬᱦᱮᱫ ᱨᱤᱱᱤᱡ ᱢᱮᱨᱚᱢ ᱵᱮᱱᱟᱣ ᱡᱩᱛ᱾ ᱜᱚᱥᱟᱬᱮ ᱛᱷᱟᱱ ᱥᱟᱢᱟᱝ ᱨᱮ ᱥᱮᱥᱮᱞᱮᱫ᱾ “ᱧᱮᱧᱮᱞ ᱞᱟᱜᱟᱱ ᱛᱮ ᱟᱭᱢᱟ ᱦᱚᱲ ᱠᱚ ᱡᱟᱣᱨᱟ ᱟᱠᱟᱱᱟ᱾ ᱢᱮᱬᱦᱮᱫ ᱨᱤᱱᱤᱡ ᱢᱮᱨᱚᱢ ᱵᱚᱸᱜᱟ ᱴᱷᱮᱱᱠᱚ ᱥᱟᱢᱟᱝ ᱠᱮᱫᱮᱭᱟ᱾ ᱵᱟᱵᱟ ᱛᱤᱞᱠᱟᱹ ᱛᱤᱠᱤᱱ ᱫᱚ ᱜᱚᱥᱟᱬᱮ ᱛᱷᱟᱱ ᱨᱮ ᱫᱩᱲᱩᱵ ᱠᱟᱛᱮ ᱢᱤᱫ ᱢᱚᱱ ᱛᱮ ᱟᱹᱰᱤ ᱜᱷᱟᱹᱲᱤᱠ ᱛᱤᱨᱤᱭᱟᱹᱣ ᱠᱤᱱ ᱚᱨᱚᱝ ᱠᱮᱫᱼᱟ᱾ ᱟᱹᱰᱤ ᱚᱨᱚᱝ ᱠᱤᱱ ᱚᱨᱚᱝ ᱠᱮᱫᱼᱟ᱾ ᱛᱤᱨᱤᱭᱟᱹᱣ ᱚᱨᱚᱝ ᱚᱨᱚᱝ ᱟᱫᱚ ᱟᱪᱠᱟ ᱜᱮ ᱚᱱᱟ ᱛᱤᱨᱤᱭᱟᱹᱣ ᱛᱮᱜᱮ ᱢᱮᱬᱦᱮᱫ ᱨᱤᱱᱤᱡ ᱢᱮᱨᱚᱢ ᱠᱤᱱ ᱢᱟᱜ ᱜᱚᱫ ᱠᱮᱫᱮᱭᱟ᱾ ᱢᱮᱬᱦᱮᱫ ᱢᱮᱨᱚᱢ ᱟᱜ ᱦᱚᱴᱚᱜ ᱛᱚᱯᱟᱜ ᱠᱟᱛᱮ ᱟᱞᱟᱜᱽ ᱩᱛᱟᱹᱨ ᱮᱱᱟ᱾ ᱢᱟᱭᱟᱢ ᱦᱚᱸ ᱰᱤᱧ ᱰᱟᱹᱵᱩᱨ ᱞᱤᱸᱡᱤᱭᱮᱱᱟ” ᱤᱱᱟᱹᱜ ᱠᱷᱟᱱ ᱜᱮ ᱩᱱᱠᱤᱱ ᱯᱟᱹᱫᱽᱨᱤ ᱥᱟᱦᱮᱵᱽ ᱟᱨ ᱚᱸᱰᱮ ᱟᱹᱣᱲᱤ ᱜᱮᱠᱚ ᱦᱮᱡ ᱥᱮᱥᱞᱮᱫ ᱞᱟᱱ ᱦᱚᱲᱠᱚ ᱢᱮᱬᱦᱮᱫ ᱢᱮᱨᱚᱢ ᱟᱜ ᱦᱚᱴᱚᱜ ᱛᱤᱨᱤᱭᱟᱹᱣ ᱛᱮ ᱢᱟᱜ ᱛᱚᱯᱟᱜ ᱟᱨ ᱢᱟᱭᱟᱢ ᱚᱰᱚᱠᱚᱜ ᱧᱮᱧ ᱛᱮ ᱟᱹᱰᱤ ᱛᱮᱫ ᱜᱮ ᱠᱚ ᱦᱟᱦᱟᱲᱟ ᱭᱮᱱᱟ᱾ ᱤᱱᱟᱹ ᱦᱤᱞᱚᱜ ᱠᱷᱚᱱ ᱜᱮ ᱥᱟᱦᱮᱵᱽ ᱦᱚᱯᱚᱱ ᱠᱚ ᱟᱵᱚ ᱦᱚᱲ ᱦᱚᱯᱚᱱ ᱨᱤᱱ ᱵᱚᱸᱜᱟ ᱵᱳᱨᱳ ᱠᱚ ᱟᱹᱰᱤ ᱛᱮᱫ ᱠᱚ ᱢᱟᱱᱟᱣ ᱠᱮᱫ ᱠᱚᱣᱟ᱾

ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱᱟᱜ ᱚᱢᱚᱲ ᱢᱟ ᱦᱚᱲ ᱦᱚᱯᱚᱱᱟᱜ ᱫᱤᱥᱚᱢ ᱥᱟᱦᱮᱵᱽ ᱠᱚᱣᱟᱜ ᱜᱚᱵᱚᱞ ᱨᱮ ᱛᱟᱦᱮᱸ ᱠᱟᱱᱟ᱾ ᱥᱟᱦᱮᱵᱽ ᱠᱚ ᱟᱵᱚ ᱦᱚᱲ ᱠᱚ ᱟᱹᱰᱤ ᱛᱮᱫ ᱠᱚ ᱦᱟᱨᱠᱮᱛ ᱮᱫ ᱠᱚ ᱛᱟᱦᱮᱸ ᱠᱟᱱᱟ᱾ ᱟᱵᱚ ᱦᱚᱲ ᱠᱚ ᱟᱠᱚ ᱠᱩᱥᱤ ᱵᱟᱠᱚ ᱛᱟᱦᱮᱸ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸ᱾

ᱛᱤᱱᱤᱱ ᱫᱤᱱ ᱪᱟᱱᱟᱵ ᱠᱷᱚᱱ ᱜᱮ ᱢᱤᱫ ᱚᱜᱚᱥᱴᱩᱞᱤᱵᱽ ᱞᱤᱸᱰ ᱧᱩᱛᱩᱢ ᱟᱹᱱᱤᱡ ᱥᱟᱦᱮᱵᱽ ᱵᱷᱟᱜᱟᱞᱯᱩᱨ ᱛᱤᱠᱤᱱ ᱦᱮᱡ ᱮᱱᱟ᱾ ᱵᱷᱟᱜᱟᱞᱯᱩᱨ ᱠᱤᱱ ᱜᱟᱵᱚᱞ ᱠᱮᱫᱼᱟ᱾’ᱦᱚᱲ ᱦᱚᱯᱚᱱ ᱠᱚ ᱡᱩᱨ ᱠᱚᱸᱪᱞᱚᱸᱰ ᱨᱮ ᱫᱚᱦᱚ ᱠᱚ ᱞᱟᱹᱜᱤᱫ ᱟᱹᱠᱤᱱᱟᱜ ᱟᱹᱥ ᱵᱟᱹᱲᱛᱤᱭᱟᱱᱟ᱾ ᱦᱚᱲ ᱦᱚᱯᱚᱱ ᱠᱚ ᱟᱹᱰᱤ ᱛᱮᱫ ᱠᱤᱱ ᱪᱤᱨᱩ ᱯᱤᱴᱩ ᱠᱮᱫ ᱠᱚᱣᱟ᱾ ᱠᱷᱟᱡᱽᱱᱟ ᱮᱢᱟᱱ ᱦᱚᱲ ᱦᱚᱯᱚᱱ ᱴᱷᱮᱱ ᱠᱷᱚᱱ ᱟᱹᱰᱮ ᱵᱟᱲᱛᱤ ᱠᱤᱱ ᱦᱟᱛᱟᱣ ᱠᱮᱫᱼᱟ᱾ ᱦᱚᱲ ᱦᱚᱯᱚᱱ ᱠᱚ ᱟᱠᱚ ᱠᱩᱥᱤ ᱵᱤᱨ ᱵᱩᱨᱩ ᱵᱟᱠᱤᱱ ᱢᱟᱜ ᱯᱷᱟᱫᱟ ᱚᱪᱚ ᱟᱫ ᱠᱚᱣᱟ᱾ ᱵᱟᱹᱫ ᱵᱟᱹᱭᱦᱟᱹᱲ ᱟᱠᱚ ᱠᱩᱥᱤ ᱵᱟᱹᱠᱤᱱ ᱵᱟᱹᱭ ᱚᱪᱚᱣᱟᱫ ᱠᱚᱣᱟ᱾ ᱟᱥᱩᱞ ᱦᱚᱸ ᱟᱠᱚ ᱠᱩᱥᱤ ᱵᱟᱠᱤᱱ ᱟᱥᱩᱞ ᱚᱪᱚᱣᱟᱫ ᱠᱚᱣᱟ᱾ ᱠᱷᱟᱱ ᱜᱮ ᱦᱚᱲ ᱦᱚᱯᱚᱱ ᱠᱚ ᱥᱟᱦᱮᱵᱽ ᱜᱚᱵᱚᱞ ᱨᱮ ᱵᱟᱝ ᱛᱟᱦᱮᱸ ᱥᱟᱱᱟ ᱠᱮᱫ ᱠᱚᱣᱟ ᱟᱠᱚᱛᱮ ᱟᱹᱯᱱᱟᱹᱛᱚᱜ ᱠᱚ ᱠᱷᱚᱡ ᱠᱮᱫᱼᱟ᱾

ᱦᱚᱲ ᱦᱚᱯᱚᱱ ᱠᱚ ᱥᱟᱱᱟᱢ ᱠᱚ ᱡᱩᱢᱤᱫᱽ ᱮᱱᱟ᱾ ᱥᱟᱦᱮᱵᱽ ᱠᱚ ᱮᱨᱟᱲ ᱨᱮ ᱧᱮᱯᱮᱫ ᱞᱟᱜᱤᱫ ᱠᱚ ᱥᱟᱯᱲᱟᱣ ᱮᱱᱟ᱾ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱧᱮᱯᱮᱫ ᱨᱤᱱᱤᱡ ᱢᱟᱬᱛᱮ ᱠᱤᱱ ᱛᱮᱦᱮᱸ ᱭᱮᱱᱟ᱾ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱟᱨ ᱫᱤᱥᱚᱢ ᱦᱚᱲ ᱠᱚ ᱥᱟᱦᱮᱵᱽ ᱦᱚᱯᱚᱱ ᱠᱚ ᱛᱩᱞᱩᱡ ᱟᱹᱰᱤ ᱜᱷᱟᱢᱟᱜᱷᱟᱴ ᱠᱚ ᱧᱮᱯᱮᱫ ᱮᱱᱟ᱾ ᱚᱱᱟ ᱧᱮᱯᱮᱫ ᱨᱮ ᱫᱚ ᱥᱟᱦᱮᱵᱽ ᱦᱚᱯᱚᱱ ᱠᱚ ᱟᱹᱰᱮ ᱛᱮᱫ ᱠᱚ ᱱᱟᱥ ᱚᱪᱚᱭᱮᱱᱟ᱾ ᱦᱚᱲ ᱦᱚᱯᱚᱱ ᱠᱚ ᱦᱚᱸ ᱠᱤᱪᱷᱩ ᱠᱤᱪᱷᱩᱜᱟᱱ ᱫᱚᱠᱚ ᱱᱟᱥ ᱵᱟᱲᱟ ᱚᱪᱚᱭᱟᱱ ᱜᱮᱭᱟ᱾ ᱛᱚ, ᱩᱱᱟᱹᱜ ᱵᱟᱝᱼᱟ᱾ ᱚᱱᱟ ᱧᱮᱯᱮᱫ ᱫᱚ ᱑᱗᱘᱑ ᱥᱟᱞᱮ ᱠᱷᱚᱱ ᱑᱗᱘᱔ ᱥᱟᱞᱮ ᱫᱷᱟᱹᱨᱤᱡ ᱦᱤᱭ ᱞᱮᱱᱟ᱾

ᱚᱜᱚᱥᱴ ᱩᱞᱤᱵᱽ ᱞᱮᱱᱰ ᱥᱟᱦᱮᱵᱽ ᱛᱤᱠᱤᱱ ᱠᱤᱱ ᱧᱮᱞ ᱠᱮᱫᱼᱟ, ᱤᱱᱠᱟᱹ ᱛᱮᱫᱚ ᱵᱟᱭ ᱜᱟᱱᱚᱜᱼᱟ? ᱚᱱᱟ ᱛᱮ ᱩᱱᱠᱤᱱ ᱢᱤᱫ ᱵᱩᱫᱷᱤ ᱠᱤᱱ ᱜᱟᱜ ᱠᱮᱫᱼᱟ᱾ ᱛᱤᱱᱤᱱ ᱟᱹᱫᱤᱵᱟᱹᱥᱤ ᱠᱚ ᱞᱚᱞᱚ ᱵᱟᱹᱪᱷᱩ ᱞᱚᱵ ᱞᱟᱞᱚᱪ ᱛᱮ ᱟᱹᱛ ᱠᱟᱛᱮ ᱢᱤᱫ ᱧᱮᱯᱮᱫ ᱡᱩᱢᱩᱫᱽ ᱠᱤᱱ ᱥᱟᱡᱟᱣ ᱠᱮᱫᱼᱟ᱾ ᱦᱚᱲ ᱦᱚᱯᱚᱱ ᱠᱤ ᱛᱩᱞᱩᱡ ᱜᱷᱟᱴᱢᱟᱴ ᱧᱮᱯᱮᱫ ᱠᱤᱱ ᱮᱦᱚᱵ ᱠᱮᱫᱼᱟ᱾ ᱟᱵᱚ ᱦᱚᱲ ᱦᱚᱯᱚᱱ ᱠᱚ ᱵᱟᱝ ᱵᱚᱛᱚᱨ ᱠᱟᱛᱮ, ᱡᱤᱣᱤ ᱟᱞᱟᱭ ᱟᱨ ᱠᱚᱲᱟᱢ ᱯᱷᱩᱞᱟᱹᱣ ᱠᱟᱛᱮ ᱥᱟᱦᱮᱵᱽ ᱜᱚᱵᱚᱞ ᱠᱷᱚᱱ ᱫᱤᱥᱚᱢ ᱵᱟᱧᱪᱟᱣ ᱫᱚᱦᱚᱭ ᱞᱟᱹᱜᱤᱫ ᱛᱮ ᱢᱚᱱ ᱠᱚ ᱢᱩᱠᱨᱩᱲ ᱠᱮᱫᱼᱟ᱾

ᱠᱷᱟᱸᱰᱟ ᱠᱟᱹᱯᱤ ᱛᱟᱨᱣᱟᱲᱮ ᱟᱨ ᱟᱜᱼᱥᱟᱨ ᱟᱛᱮ ᱥᱟᱦᱮᱵᱽ ᱠᱚ ᱥᱟᱶ ᱧᱮᱯᱮᱫ ᱠᱚ ᱥᱟᱢᱟᱝ ᱮᱱᱟ᱾ ᱥᱟᱦᱮᱵᱽ ᱠ ᱚᱟᱨ ᱟᱵᱚ ᱦᱚᱲ ᱠᱚ ᱵᱷᱤᱛᱨᱤ ᱨᱮ ᱠᱷᱩᱵ ᱠᱚ ᱧᱮᱯᱮᱫ ᱮᱱᱟ᱾ ᱦᱚᱲ ᱦᱚᱯᱚᱱ ᱠᱚ ᱧᱮᱯᱮᱫ ᱨᱮ ᱡᱟᱦᱟᱸᱭ ᱠᱚᱠᱚ ᱥᱟᱵᱽ ᱚᱪᱚ ᱠᱟᱱ ᱛᱟᱦᱮᱸᱱ, ᱩᱱᱠᱩ ᱠᱚᱫᱚ ᱥᱟᱱᱟᱢ ᱵᱷᱟᱜᱚᱞᱯᱩᱨ ᱡᱤᱦᱚᱞ ᱠᱷᱟᱱᱟ ᱛᱮᱠᱚ ᱤᱫᱤᱭᱮᱫ ᱠᱚ ᱛᱟᱦᱮᱸ ᱠᱟᱱᱟ᱾ ᱵᱷᱟᱜᱚᱞᱯᱩᱨ ᱡᱤᱦᱚᱞ ᱠᱷᱟᱱᱟ ᱛᱮ ᱤᱫᱤ ᱠᱟᱛᱮ ᱟᱫᱷᱟᱱ ᱠᱚᱫᱚ ᱥᱟᱫᱚᱢ ᱪᱟᱭᱞᱚᱢ ᱨᱮ ᱛᱚᱞ ᱠᱟᱛᱮ ᱵᱷᱟᱜᱚᱞᱯᱩᱨ ᱡᱤᱦᱚᱞ ᱠᱷᱟᱱᱟ ᱢᱟᱴ ᱜᱚᱴᱟ ᱠᱚ ᱚᱨ ᱟᱹᱪᱩᱨ ᱚᱪᱚᱭᱮᱫ ᱠᱚ ᱛᱟᱦᱮᱸ ᱠᱟᱱᱟ᱾ ᱟᱫᱷᱟᱱ ᱠᱚ ᱫᱚ ᱢᱮᱬᱦᱮᱫ ᱠᱟᱺᱴᱤ ᱥᱟᱞᱟᱜ ᱫᱟᱨᱮ ᱨᱮ ᱠᱚ ᱠᱩᱴᱟᱹᱢ ᱡᱟᱞᱟᱫ ᱮᱫ ᱠᱚ ᱛᱟᱦᱮᱸ᱾ ᱱᱚᱜᱼᱚᱭ ᱱᱚᱝᱠᱟ ᱩᱱᱠᱤᱱ ᱥᱟᱦᱮᱵᱽ ᱛᱤᱠᱤᱱᱟᱜ ᱦᱚᱲ ᱦᱚᱯᱚᱱ ᱠᱚ ᱪᱮᱛᱟᱱ ᱨᱮ ᱱᱟᱦᱟᱪᱟᱨ ᱵᱟᱹᱲᱛᱤᱭᱮᱱ ᱠᱷᱟᱱ, ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱᱟᱜ ᱨᱟᱹᱜᱤ ᱛᱮᱫ ᱛᱟᱺᱦᱩᱸ ᱵᱟᱹᱲᱛᱤᱭᱮᱱᱟ᱾

ᱠᱷᱟᱱ ᱜᱮ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱦᱚᱸ ᱢᱤᱫ ᱱᱟᱣᱟ ᱧᱮᱯᱮᱫ ᱡᱩᱢᱩᱫᱽ ᱠᱤᱱ ᱥᱟᱡᱟᱣ ᱠᱮᱫᱼᱟ᱾ ᱚᱱᱟ ᱡᱩᱢᱤᱫᱽ ᱨᱮᱫᱚ ᱦᱚᱲ ᱦᱚᱯᱚᱱ ᱨᱤᱱ ᱠᱩᱲᱤ ᱦᱚᱯᱚᱱ ᱠᱚᱦᱚᱸ ᱠᱚ ᱥᱮᱞᱮᱫ ᱞᱮᱱ ᱛᱟᱦᱮᱸᱱ᱾ ᱩᱱ ᱚᱠᱛᱚ ᱵᱷᱟᱜᱚᱞᱯᱩᱨ ᱡᱤᱞᱞᱟᱹ ᱢᱟ ᱵᱤᱨ ᱵᱩᱨᱩ ᱫᱟᱨᱮ ᱛᱮ ᱮᱴᱮᱫ ᱮᱥᱮᱫ ᱞᱮᱱ ᱛᱟᱦᱮᱸᱱ᱾ ᱚᱱᱟ ᱛᱮ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱜᱟᱹᱬᱤ ᱞᱮᱠᱟ ᱰᱟᱹᱨᱼᱰᱟᱹᱨ ᱛᱮ ᱴᱩᱰᱟᱹᱝ ᱠᱟᱛᱮ ᱧᱮᱯᱮᱫ ᱨᱮᱱᱟᱝ ᱛᱚᱦᱚᱨ ᱟᱵᱚ ᱦᱚᱲ ᱦᱚᱯᱚᱱ ᱠᱚ ᱥᱮᱪᱮᱫ ᱠᱤᱱ ᱮᱢᱟᱫ ᱠᱚ ᱛᱟᱦᱮᱸᱱ᱾ ᱧᱮᱯᱮᱫ ᱚᱠᱛᱚ ᱟᱵᱚ ᱨᱤᱱ ᱦᱚᱲ ᱦᱚᱯᱚᱱ ᱠᱚ ᱫᱟᱨᱮ ᱰᱟᱹᱨ ᱛᱮ ᱴᱩᱰᱟᱹᱝ ᱠᱟᱛᱮ ᱠᱚ ᱦᱤᱡᱩᱜ ᱥᱮᱱᱚ ᱠᱟᱱ ᱛᱮᱦᱮᱸᱱ᱾

ᱠᱟᱛᱷᱟ ᱢᱮᱱᱟᱜᱼᱟ ᱢᱤᱫᱼᱫᱤᱱ ᱦᱤᱞᱚᱜ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱟᱨᱮ ᱰᱟᱹᱨᱼᱰᱟᱹᱨ ᱛᱮ ᱴᱩᱰᱟᱹᱝ ᱥᱮᱱ ᱠᱟᱛᱮ ᱵᱟᱝᱞᱟ ᱨᱮ ᱛᱟᱦᱮᱱ ᱠᱟᱱ ᱚᱠᱛᱚ ᱜᱮ ᱚᱜᱚᱥᱴ ᱩᱞᱤᱵᱽ ᱞᱮᱸᱰ ᱥᱟᱦᱮᱵᱽ ᱛᱤᱠᱤᱱ ᱫᱚᱠᱤᱱ ᱛᱩᱧ ᱦᱟᱨᱟᱲ ᱠᱮᱫ ᱠᱤᱱᱟ᱾ ᱠᱷᱟᱱ ᱜᱮ ᱚᱜᱚᱥᱴ ᱩᱞᱤᱵᱽ ᱞᱮᱸᱰ ᱥᱟᱦᱮᱵᱽ ᱛᱤᱠᱤᱱ ᱫᱚᱠᱤᱱ ᱜᱚᱡ ᱩᱛᱟᱹᱨ ᱮᱱᱟ᱾ ᱱᱚᱣᱟ ᱜᱷᱚᱴᱚᱱ ᱫᱚ ᱢᱟᱺ ᱑᱓ᱼ᱑ᱼ᱑᱗᱘᱔ ᱦᱤᱛ ᱨᱮ ᱦᱩᱭ ᱞᱮᱱᱟ᱾ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱚᱜᱚᱥᱴ ᱩᱞᱤᱵᱽ ᱞᱮᱸᱰ ᱥᱟᱦᱮᱵᱽ ᱛᱤᱠᱤᱱ ᱠᱤᱱ ᱛᱩᱧ ᱜᱚᱡ ᱠᱮᱫ ᱠᱤᱱ ᱠᱷᱟᱹᱛᱤᱨ ᱥᱟᱦᱮᱵᱽ ᱦᱚᱯᱚᱱ ᱠᱚ ᱟᱹᱰᱤ ᱛᱮᱫ ᱠᱚ ᱨᱟᱸᱜᱟᱣ ᱮᱱᱟ᱾ ᱟᱹᱠᱤᱱ ᱥᱟᱵ ᱠᱤᱱ ᱞᱟᱹᱜᱤᱱ ᱛᱮ ᱥᱟᱦᱮᱵᱽ ᱦᱚᱯᱚᱱ ᱠᱚ ᱥᱤᱧ ᱧᱤᱫᱟᱹ ᱠᱚ ᱪᱷᱩᱴᱟᱹᱣ ᱮᱱᱟ᱾ ᱟᱹᱠᱤᱱ ᱥᱟᱵ ᱠᱤᱱ ᱞᱟᱹᱜᱤᱱ ᱛᱮ ᱥᱟᱦᱮᱵᱽ ᱦᱚᱯᱚᱱ ᱠᱚ ᱦᱟᱡᱟᱨ – ᱦᱟᱡᱟᱨ ᱴᱟᱠᱟ ᱥᱤᱨᱯᱷᱟᱹ ᱠᱚ ᱫᱚᱦᱚ ᱞᱮᱫᱼᱟ᱾ ᱦᱩᱲ – ᱦᱩᱲᱩᱪ ᱫᱤᱱ ᱛᱟᱭᱚᱢ ᱞᱟᱞᱚᱪ ᱤᱫᱤ ᱠᱟᱛᱮ ᱟᱵᱚ ᱦᱚᱲ ᱦᱚᱯᱚᱱ ᱠᱚᱜᱮ ᱵᱟᱵᱟ ᱛᱤᱞᱠᱟᱹ ᱢᱟᱺᱠᱷᱤ ᱛᱤᱠᱤᱱ ᱫᱚᱠᱚ ᱥᱟᱵ ᱚᱪᱚ ᱠᱮᱫ ᱠᱤᱱᱟ᱾

ᱢᱤᱫ ᱫᱤᱱ ᱦᱤᱞᱚᱜ ᱥᱟᱦᱮᱵᱽ ᱦᱚᱯᱚᱱ ᱠᱚ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱵᱷᱟᱜᱟᱞᱯᱩᱨ ᱡᱤᱦᱚᱞ ᱠᱷᱟᱱᱟ ᱥᱩᱨ ᱟᱫᱚᱱᱯᱩᱨ ᱰᱟᱹᱦᱤ ᱛᱮᱠᱚ ᱤᱫᱤ ᱠᱮᱫ ᱠᱤᱱᱟ᱾ ᱚᱸᱰᱮ ᱢᱤᱫ ᱥᱟᱲ ᱵᱟᱸᱫᱷᱟ ᱥᱟᱫᱚᱢ ᱪᱟᱭᱞᱚᱢ ᱨᱮ ᱛᱚᱞ ᱠᱟᱛᱮ ᱜᱮᱥᱟᱭ – ᱜᱮᱥᱟᱭ ᱢᱩᱦᱤᱢ ᱟᱠᱟᱱ ᱦᱚᱲ ᱥᱟᱢᱟᱝ ᱨᱮᱠᱚ ᱜᱚᱦᱟᱲ ᱟᱹᱪᱩᱨ ᱚᱪᱚ ᱠᱮᱫ ᱠᱤᱱᱟ᱾ ᱥᱟᱫᱚᱢ ᱠᱟᱢᱥᱟᱢᱤᱭᱟᱹ ᱛᱤᱱᱟᱹᱝ ᱡᱩᱨ ᱛᱮ ᱥᱟᱫᱚᱢ ᱠᱤᱱ ᱠᱟᱢᱥᱟᱣ ᱠᱮᱫᱮᱭᱟ, ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱦᱚᱸ ᱩᱱᱟᱹᱝ ᱡᱩᱨ ᱛᱮ ᱜᱮ ᱪᱚᱴ ᱛᱮᱠᱤᱱ ᱚᱴᱟᱝ ᱮᱱᱟ᱾ ᱥᱟᱫᱚᱢ ᱠᱟᱢᱥᱟᱢᱤᱭᱟᱹ ᱥᱟᱫᱚᱢ ᱫᱚ ᱰᱟᱹᱦᱤ ᱜᱚᱴᱟ ᱟᱹᱰᱤ ᱠᱟᱢᱥᱟᱣ ᱠᱤᱱ ᱠᱟᱢᱥᱟᱣ ᱞᱮᱫ ᱠᱤᱱᱟ᱾ ᱢᱮᱱᱠᱷᱟᱱ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱪᱮᱫ ᱦᱚᱸ ᱵᱟᱹᱠᱤᱱ ᱪᱮᱠᱟ ᱞᱮᱱᱟ᱾ ᱵᱟᱹᱠᱤᱱ ᱜᱤᱡ ᱞᱮᱱᱟ᱾ ᱵᱟᱹᱠᱤᱱ ᱜᱤᱡ ᱞᱮᱱ ᱠᱷᱟᱹᱛᱤᱨ ᱢᱤᱫᱼᱫᱤᱱ ᱦᱤᱞᱚᱜ ᱫᱚ ᱥᱟᱦᱮᱵᱽ ᱦᱚᱯᱚᱱ ᱠᱚ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱦᱟᱡᱟᱨᱼᱦᱟᱡᱟᱨ ᱢᱩᱦᱤᱢ ᱟᱠᱟᱱ ᱦᱚᱲ ᱠᱚ ᱥᱟᱢᱟᱝ ᱨᱮ ᱢᱤᱫ ᱪᱷᱚᱠ ᱨᱮ ᱛᱟᱦᱮᱸ ᱠᱟᱱ ᱵᱟᱲᱮ ᱫᱟᱨᱮ ᱨᱮ ᱟᱠᱟ ᱠᱟᱛᱮ ᱠᱚ ᱯᱟᱹᱥᱤ ᱜᱚᱡ ᱠᱮᱫ ᱠᱤᱱᱟ᱾

ᱡᱟᱦᱟᱸ ᱪᱷᱚᱠ ᱨᱮ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱠᱚ ᱯᱟᱹᱥᱤ ᱜᱤᱡ ᱞᱮᱫ ᱠᱤᱱᱟᱹ ᱚᱱᱟ ᱪᱷᱚᱠ ᱫᱚ ᱱᱤᱛᱚᱝ “ᱛᱤᱞᱠᱟᱹ” ᱪᱷᱚᱠ ᱢᱮᱱᱛᱮ ᱟᱵᱚ ᱠᱚ ᱥᱟᱢᱟᱝ ᱨᱮ ᱵᱤᱠᱟᱹᱣᱜ ᱠᱟᱱᱟ᱾ ᱵᱟᱵᱟ ᱛᱤᱞᱠᱟᱹ ᱢᱟᱹᱡᱷᱤ ᱛᱤᱠᱤᱱ ᱫᱚ ᱵᱷᱟᱨᱚᱛ ᱫᱤᱥᱚᱢ ᱟᱹᱯᱱᱟᱛ ᱞᱟᱹᱜᱤᱱ ᱛᱮ ᱥᱟᱦᱮᱵᱽ ᱦᱚᱯᱚᱱ ᱠᱚ ᱮᱨᱟᱲ ᱨᱮ ᱮᱛᱚᱦᱚᱵ ᱨᱮ ᱟᱹᱠᱤᱱ ᱜᱮ ᱧᱮᱯᱮᱫ ᱠᱤᱱ ᱮᱦᱚᱵ ᱞᱮᱫ ᱠᱷᱟᱹᱛᱤᱨ ᱵᱤᱦᱟᱨ ᱥᱚᱨᱠᱟᱨ ᱫᱚ ᱟᱠᱤᱱᱟᱜ ᱢᱤᱫ ᱢᱩᱴᱷᱟᱹᱱ ᱚᱱᱟ ᱛᱤᱞᱠᱟᱹ ᱪᱷᱚᱠ ᱨᱮᱜᱮ ᱢᱟᱨᱵᱚᱞ ᱫᱷᱤᱨᱤ ᱛᱮᱭ ᱵᱮᱱᱟᱣ ᱟᱠᱟᱫᱼᱟ᱾ ᱫᱤᱱᱟᱹᱢ ᱜᱮ ᱥᱟᱺᱜᱤᱧ – ᱥᱟᱺᱜᱤᱧ ᱠᱷᱚᱱ ᱟᱭᱢᱟ ᱦᱚᱲ ᱟᱹᱠᱤᱱᱟᱜ ᱢᱩᱴᱷᱟᱹᱱ ᱧᱮᱞ ᱞᱟᱹᱜᱤᱱ ᱛᱮᱠᱚ ᱦᱤᱡᱩᱜ ᱥᱮᱱᱚᱜ ᱠᱟᱱᱟ᱾

ᱱᱤᱛ ᱚᱱᱟ ᱵᱷᱟᱜᱟᱞᱯᱩᱨ ᱡᱤᱞᱟ ᱨᱮ ᱛᱤᱞᱠᱟᱹ ᱢᱚᱦᱚᱞ, ᱛᱤᱞᱠᱟᱹ ᱵᱟᱡᱟᱨ , ᱛᱤᱞᱠᱟᱹ ᱦᱟᱴ, ᱛᱤᱞᱠᱟᱹ ᱰᱟᱠ ᱠᱟᱢᱥᱲᱟ ᱾ ᱚᱱᱠᱟ ᱜᱮ ᱟᱹᱰᱤ ᱼ ᱟᱹᱰᱤ ᱞᱮᱠᱟᱱ ᱡᱟᱜᱟ ᱧᱩᱢ ᱟᱠᱟᱱᱟ ᱟᱨ ᱧᱩᱢᱩᱜᱚᱜ ᱠᱟᱱᱟ᱾