ᱟᱱᱠᱷᱟ ᱞᱟᱦᱟ

ᱞᱟᱦᱟ ᱨᱮ ᱢᱤᱫ ᱵᱟᱹᱨᱥᱤᱧ ᱵᱩᱜᱤ ᱛᱮᱭ ᱫᱟᱜ ᱟᱠᱟᱫᱼᱟ᱾ ᱢᱮᱱᱠᱷᱟᱱ ᱤᱱᱟᱹ ᱦᱤᱞᱚᱜ ᱛᱟᱨᱟᱥᱤᱧ ᱦᱚᱸ ᱢᱤᱫ ᱮᱥᱟ ᱫᱟᱜ ᱡᱚᱨᱚᱜ ᱠᱟᱱᱟ᱾ ᱥᱮᱨᱢᱟ ᱫᱚ ᱫᱟᱹᱨᱭᱟᱹ ᱦᱮᱸᱫᱮ ᱨᱤᱢᱤᱞ ᱛᱮᱭ ᱫᱟᱞᱚᱵ ᱮᱥᱮᱫ ᱪᱟᱵᱟ ᱟᱠᱟᱫᱼᱟ᱾ ᱚᱛ ᱟᱨ ᱥᱮᱨᱢᱟ ᱡᱚᱯᱚᱴᱮᱫ ᱠᱟᱛᱮ ᱨᱤᱢᱤᱞ ᱨᱮᱱᱟᱜ ᱦᱮᱸᱫᱮ ᱦᱚᱲᱢᱚ ᱨᱮ ᱫᱟᱜᱟᱨ ᱫᱟᱜᱟᱨ ᱵᱤᱡᱽᱞᱤ ᱪᱚᱢᱠᱟᱣᱜ ᱠᱟᱱᱟ᱾ ᱜᱷᱟᱱᱮ ᱜᱷᱟᱱᱮ ᱢᱚᱱᱮ ᱨᱮ ᱢᱤ ᱢᱤᱫ ᱜᱚᱴᱟᱝ ᱯᱷᱟᱸᱰᱟ ᱨᱮᱱᱟᱝ ᱵᱚᱛᱚᱨ ᱦᱮᱣᱞᱟ ᱨᱟᱠᱟᱵ ᱠᱟᱱᱟ ᱟᱨ ᱪᱮᱫ ᱦᱚᱭ᱾ ᱟᱹᱭᱩᱵ ᱚᱠᱛᱚ ᱜᱮ ᱯᱟᱞᱮᱱ ᱦᱚᱭ ᱚᱲᱟᱜ ᱨᱮᱭᱟᱜ ᱫᱩᱣᱟᱹᱨ ᱦᱚᱸ ᱡᱷᱤᱡ ᱮᱱᱟ᱾ ᱥᱟᱸᱭ ᱥᱟᱸᱭ ᱦᱚᱭ ᱥᱟᱰᱮ ᱠᱟᱱᱟ᱾ ᱱᱚᱶᱟ ᱥᱟᱸᱭ ᱥᱟᱸᱭ ᱥᱟᱰᱮ ᱨᱮ ᱦᱟᱱᱟ ᱯᱩᱨᱤ ᱨᱮᱱᱟᱜ ᱦᱚ ᱦᱚ ᱟᱹᱰᱤ ᱯᱩᱥᱴᱟᱹ ᱜᱮ ᱟᱸᱡᱚᱢᱚᱜ ᱠᱟᱱᱟ᱾ ᱩᱞᱟᱹᱴ ᱠᱟᱪᱟᱲᱮ ᱦᱚᱭ ᱮᱫᱟ ᱢᱟᱫ ᱫᱟᱨᱮ ᱚᱛ ᱦᱟᱹᱵᱤᱡ ᱮ ᱦᱚᱭ ᱛᱤᱨᱩᱵᱮᱜ ᱟ᱾ ᱢᱟᱛᱠᱚᱢ ᱥᱟᱨᱡᱚᱢ ᱫᱟᱨᱮ ᱪᱟᱲᱢᱚᱲ ᱨᱟᱹᱯᱩᱫᱚᱜ ᱠᱟᱱᱟ᱾ ᱚᱲᱟᱜ ᱥᱟᱹᱲᱤᱢ ᱦᱚᱭᱛᱮ ᱛᱩᱞ ᱧᱚᱜ ᱮᱫᱟᱭ ᱟᱨ ᱮ ᱫᱚᱦᱚ ᱮᱫᱟᱭ ᱟᱹᱰᱤ ᱞᱚᱜᱚᱱ ᱜᱮ ᱦᱚᱭ ᱥᱟᱞᱟᱜ ᱦᱚᱸ ᱯᱟᱞᱮᱫ ᱱᱷᱟᱜ ᱜᱟᱛᱮ ᱜᱚᱫᱚᱜ ᱟ᱾ ᱛᱟᱞᱟ ᱨᱮ ᱥᱮᱨᱢᱟ ᱯᱚᱥᱟᱜᱚᱜ ᱞᱮᱠᱟ ᱨᱤᱢᱤᱞ ᱥᱟᱰᱮ ᱠᱟᱱᱟ᱾ ᱢᱤᱫ ᱡᱟᱸᱜᱟᱢ ᱛᱟᱲᱟᱢ ᱥᱮ ᱵᱟᱝ ᱠᱷᱟᱱ ᱜᱮ ᱟᱨ ᱦᱚᱸ ᱨᱤᱢᱤᱞ ᱥᱟᱰᱮ ᱠᱟᱱᱟ᱾ ᱡᱤᱣᱤ ᱯᱷᱟᱹᱱᱴᱤᱞ ᱩᱰᱩᱠ ᱜᱚᱫᱚᱜ ᱞᱮᱠᱟ ᱵᱚᱛᱚᱨ ᱥᱟᱰᱮ᱾ ᱦᱚᱭ, ᱫᱟᱜ ᱟᱨ ᱵᱤᱡᱽᱞᱤ ᱛᱮᱦᱮᱧ ᱫᱚ ᱠᱚ ᱡᱩᱢᱤᱫ ᱟᱠᱟᱱᱟ ᱛᱤᱱ ᱫᱤᱱ ᱠᱷᱚᱱᱟᱜ ᱢᱚᱱᱮ ᱨᱮᱱᱟᱜ ᱛᱤᱱᱟᱹᱜ ᱛᱚᱯᱟ ᱨᱟᱹᱜᱤ ᱛᱮᱦᱮᱧ  ᱫᱚᱠᱚ ᱯᱚᱴᱟᱣ ᱮᱫ ᱛᱟᱠᱚᱣᱟ᱾ ᱚᱛ ᱫᱚ ᱛᱷᱤᱨᱛᱷᱟᱨ ᱡᱚᱛᱚᱭ ᱥᱟᱦᱟᱣ ᱠᱟᱜ ᱠᱟᱱᱟ, ᱡᱮᱞᱮᱠ ᱟᱡ ᱪᱮᱛᱟᱱ ᱨᱮ ᱪᱮᱫ ᱦᱚᱸ ᱵᱟᱝ ᱦᱩᱭᱩᱜ ᱠᱟᱱᱟ ᱪᱮ ᱪᱮᱫ ᱦᱚᱸ ᱵᱟᱭ ᱵᱩᱡᱷᱟᱹᱣ ᱡᱚᱝ ᱠᱟᱱᱟ᱾

ᱢᱮᱱᱠᱷᱟᱱ ᱦᱚᱲ ᱢᱟ ᱚᱛ ᱢᱟᱭ ᱵᱟᱝ ᱠᱟᱱᱟ ᱦᱚᱲᱟᱜ ᱨᱮᱸᱜᱮᱡ ᱛᱮᱛᱟᱝ ᱥᱩᱠ ᱫᱩᱠ ᱢᱟᱦᱨᱚᱜᱽ ᱡᱚᱛᱚᱣᱟᱜ ᱜᱮ ᱢᱮᱱᱟᱜᱼᱟ᱾ ᱚᱱᱟ ᱵᱷᱮᱜᱮᱫ ᱡᱤᱣᱤ ᱥᱩᱛᱩᱜ ᱠᱟᱛᱮ ᱛᱟᱦᱮᱱ ᱜᱮ ᱦᱚᱲ ᱠᱚᱣᱟᱜ ᱟᱹᱰᱤ ᱢᱟᱨᱟᱝ ᱟᱸᱥ ᱢᱮᱱᱟᱜᱼᱟ᱾ ᱡᱤᱣᱤ ᱨᱮᱱᱟᱜ ᱟᱸᱥ ᱯᱩᱨᱟᱹᱣᱜ ᱢᱟᱲᱟᱝ, ᱡᱤᱣᱤ ᱨᱮ ᱟᱹᱰᱤ ᱞᱮᱠᱟᱱ ᱦᱟᱲᱟᱜ ᱥᱮᱴᱮᱨ ᱞᱮᱱᱠᱷᱟᱱ ᱡᱤᱣᱤ ᱨᱮ ᱡᱟᱭ ᱡᱩᱜᱽ ᱞᱟᱹᱜᱤᱫ ᱫᱩᱠ ᱨᱮᱱᱟᱜ ᱦᱮᱸᱫᱮ ᱨᱤᱢᱤᱞ ᱫᱚ ᱫᱟᱞᱚᱵ ᱟᱬᱜᱚᱱᱟ᱾ ᱦᱚᱲᱟᱜ ᱚᱱᱟ ᱟᱹᱠᱷᱤᱨ ᱚᱠᱛᱚ ᱨᱮᱱᱟᱜ ᱚᱵᱚᱥᱛᱟ ᱚᱠᱚᱭᱮ ᱢᱮᱫ ᱞᱩᱛᱩᱨᱟᱜᱼᱟ? ᱦᱚᱲ ᱠᱚ ᱵᱟᱝ ᱵᱟᱰᱟᱭ ᱚᱪᱚ ᱠᱟᱛᱮ ᱢᱚᱞᱚᱝ ᱨᱮᱱᱟᱜ ᱚᱞᱚᱝ ᱫᱚ ᱩᱪᱟᱹᱲ ᱱᱟᱪᱟᱲᱚᱜᱼᱟ, ᱚᱱᱟ ᱛᱮ ᱦᱚᱲ ᱠᱚᱫᱚ ᱚᱞᱚᱝ ᱨᱮᱱᱟᱜ ᱛᱤᱨᱮ ᱢᱤ ᱢᱤᱫ ᱜᱚᱴᱟᱝ ᱯᱩᱛᱲᱟᱹ ᱠᱚ ᱦᱩᱭ ᱟᱠᱟᱱᱟ᱾

ᱚᱠᱚᱭᱮ ᱩᱭᱦᱟᱹᱨ ᱞᱮᱜᱟ ᱦᱚᱯᱱᱟ ᱟᱜ ᱚᱵᱚᱥᱛᱟ ᱨᱮᱱᱟᱜ ᱱᱚᱝᱠᱟ ᱚᱫᱚᱞᱼᱵᱚᱫᱚᱞᱚᱜᱼᱟ? ᱰᱷᱩᱞᱟᱹ ᱯᱮᱨᱮᱡ ᱵᱟᱺᱫᱤ ᱫᱚᱲᱚᱢ ᱞᱮᱱᱟ ᱟᱨ ᱜᱚᱲᱟ ᱯᱮᱨᱮᱡ ᱜᱟᱹᱭ ᱠᱚ ᱛᱟᱦᱮᱸ ᱠᱟᱱᱟ᱾ ᱢᱮᱱᱠᱷᱟᱱ ᱛᱮᱦᱮᱧ ᱚᱱᱟ ᱠᱟᱛᱷᱟ ᱠᱚ ᱩᱭᱦᱟᱹᱨ ᱞᱮᱠᱷᱟᱱ ᱧᱤᱫᱟᱹ ᱡᱟᱹᱯᱤᱫ ᱡᱚᱦᱚᱜ ᱨᱮᱱᱟᱜ ᱠᱩᱠᱢᱩ ᱛᱟᱱᱟᱜ ᱞᱮᱠᱟ ᱜᱮ ᱵᱩᱡᱷᱟᱹᱣᱜ ᱠᱟᱱᱟ᱾ ᱫᱷᱟᱹᱨᱛᱤ ᱨᱤᱱ ᱠᱩᱸᱵᱽᱲᱩ ᱫᱚ ᱫᱷᱚᱱ ᱠᱚ ᱠᱩᱸᱵᱽᱲᱩ ᱠᱮᱫᱼᱟ ᱟᱨ ᱥᱮᱨᱢᱟ ᱨᱤᱱ ᱠᱩᱸᱵᱽᱲᱩ ᱫᱚ ᱦᱚᱱ ᱦᱚᱯᱚᱱ ᱠᱚ ᱠᱩᱸᱵᱽᱲᱩ ᱠᱮᱫ ᱠᱚᱣᱟ᱾ ᱚᱲᱟᱜ ᱫᱩᱣᱟᱹᱨ ᱡᱟᱦᱟᱸ ᱛᱟᱦᱮᱸ ᱠᱟᱱᱟ ᱚᱱᱟ ᱠᱚ ᱫᱚ ᱫᱩᱱᱭᱟᱹ ᱨᱮᱱᱟᱜ ᱫᱟᱲᱮ ᱡᱚᱛᱚᱭ ᱚᱛᱟ ᱛᱤᱨᱩᱵ ᱠᱟᱫᱼᱟ᱾ ᱦᱚᱯᱱᱟ ᱟᱜ ᱢᱚᱱ ᱥᱩᱢᱩᱝ ᱦᱚᱸ ᱵᱟᱝ ᱵᱟᱹᱲᱤᱡ ᱞᱮᱱᱟ ᱵᱤᱪᱠᱚᱢ ᱢᱚᱥᱨᱟ ᱪᱟᱵᱟ ᱮᱱ ᱛᱟᱭᱟ᱾ ᱦᱚᱯᱱᱟ ᱫᱚ ᱚᱲᱟᱜ ᱫᱩᱣᱟᱹᱨ ᱦᱚᱱᱼᱦᱚᱯᱚᱱ ᱟᱨ ᱫᱷᱚᱱ ᱟᱫ ᱠᱟᱛᱮ ᱦᱚᱨ ᱨᱤᱱᱤᱡ ᱦᱚᱨ ᱛᱤᱱᱤᱡ ᱮᱱᱟᱭ᱾ ᱛᱮᱦᱮᱧ ᱫᱚ ᱩᱱᱤᱭᱟᱜ ᱦᱚᱨ ᱜᱮᱛᱟᱭ ᱫᱟᱲᱮ ᱦᱚᱨ ᱜᱮ ᱛᱟᱭ ᱟᱥᱨᱟ ᱟᱨ ᱵᱟᱝ ᱯᱟᱹᱪᱨᱤᱭᱟᱱ ᱚᱲᱟᱜ ᱜᱮᱛᱟᱭ ᱟᱡᱟᱜ ᱚᱲᱟᱜ ᱫᱚ᱾ ᱱᱟᱥᱮᱱᱟᱜ ᱦᱚᱭ ᱟᱨ ᱫᱟᱜ ᱮ ᱛᱷᱤᱨ ᱧᱚᱜ ᱠᱮᱜᱼᱟ ᱢᱮᱱᱠᱷᱟᱱ ᱥᱮᱨᱢᱟ ᱨᱤᱢᱤᱞ ᱨᱮᱱᱟᱜ ᱟᱵᱚᱥᱛᱟ ᱫᱚ ᱵᱚᱛᱚᱨ ᱜᱮ ᱧᱮᱞᱚᱜ ᱠᱟᱱᱟ᱾ ᱚᱠᱚᱭ ᱱᱚᱝᱠᱟᱱ ᱚᱠᱛᱚ ᱨᱮ ᱚᱲᱟᱜ ᱠᱷᱚᱱ ᱮ ᱩᱰᱩᱠᱚᱜᱼᱟ? ᱟᱹᱯᱨᱩᱜ ᱨᱮᱱᱟᱜ ᱱᱚᱶᱟ ᱚᱛ ᱨᱮ ᱧᱩᱛ ᱟᱜᱟᱢ ᱟᱨ ᱚᱞᱚᱝ ᱨᱮ ᱡᱟᱯᱟᱬ ᱠᱟᱛᱮ ᱟᱱᱠᱷᱟ ᱦᱚᱨ ᱛᱮ ᱛᱮᱦᱮᱧ ᱯᱚᱨᱛᱷᱚᱢ ᱡᱟᱸᱜᱟᱭ ᱵᱟᱰᱷᱟᱣ ᱠᱮᱜᱼᱟ᱾ ᱟᱹᱭᱩᱵᱚᱜ ᱠᱟᱱ ᱞᱮᱠᱟ ᱵᱩᱡᱷᱟᱹᱣᱜ ᱠᱟᱱᱟ ᱮᱱ ᱦᱚᱸ ᱢᱤᱫ ᱵᱟᱨ ᱴᱷᱚᱯ ᱫᱟᱜ ᱫᱚ ᱡᱚᱨᱚᱜ ᱠᱟᱱ ᱜᱮᱭᱟ᱾ ᱦᱚᱯᱱᱟ ᱚᱲᱟᱜ ᱠᱷᱚᱱ ᱩᱰᱩᱠ ᱠᱟᱛᱮ ᱢᱤᱫ ᱮᱥᱟ ᱠᱚᱧᱮ ᱢᱚᱦᱰᱟ ᱦᱚᱨ ᱛᱮ ᱛᱟᱲᱟᱢ ᱮ ᱮᱦᱚᱵ ᱠᱮᱜᱼᱟ᱾ ᱢᱤᱫ ᱜᱟᱰᱟ ᱟᱲᱮ ᱨᱮᱱᱟᱜ ᱢᱤᱫ ᱢᱟᱛᱠᱚᱢ ᱫᱟᱨᱮ ᱞᱟᱛᱟᱨ ᱨᱮ ᱪᱮᱫ ᱛᱟᱱᱟᱜ ᱛᱮ ᱡᱟᱸᱜᱟ ᱨᱮ ᱯᱟᱹᱥᱤᱭᱮᱱ ᱞᱮᱠᱟᱭ ᱛᱤᱸᱜᱩ ᱛᱷᱤᱨ ᱜᱚᱫ ᱮᱱᱟ᱾ ᱡᱟᱱᱟᱢ ᱟᱹᱛᱩ ᱥᱮᱱ ᱠᱚᱭᱚᱜ ᱨᱩᱣᱟᱹᱲ ᱠᱟᱛᱮ ᱡᱷᱚᱨ ᱡᱷᱚᱨ ᱢᱮᱫ ᱫᱟᱜ ᱡᱚᱨᱚ ᱜᱚᱫ ᱮᱱ ᱛᱟᱭᱟ᱾ ᱟᱡᱟᱜ ᱚᱱᱛᱚᱨ ᱨᱮ ᱡᱟᱱᱟᱢ ᱟᱹᱛᱩ ᱨᱮᱱᱟᱜ ᱢᱚᱦᱰᱟ ᱫᱚ ᱪᱷᱟᱯ ᱛᱟᱱᱟᱜ ᱞᱮᱠᱟ ᱡᱷᱟᱞᱠᱟᱣ ᱨᱟᱠᱟᱵ ᱜᱚᱫ ᱮᱱᱟ᱾ ᱚᱱᱟ ᱛᱮ ᱟᱹᱰᱤ ᱫᱤᱱ ᱨᱮᱱᱟᱜ ᱥᱩᱞᱩᱠ ᱥᱩᱛᱟᱹᱢ ᱨᱮᱱᱟᱜ ᱛᱚᱞ ᱮ ᱵᱩᱡᱷᱟᱹᱣ ᱧᱟᱢ ᱜᱚᱫ ᱠᱮᱜᱼᱟ᱾ ᱡᱟᱱᱟᱢ ᱟᱹᱛᱩ ᱨᱮ ᱛᱤᱱᱟᱹᱜ ᱨᱟᱹᱥᱠᱟᱹ ᱨᱮ ᱛᱟᱦᱮᱸ ᱠᱟᱱᱟᱭ᱾ ᱥᱟᱱᱟᱢ ᱦᱚᱲ ᱥᱟᱞᱟᱜ ᱟᱭᱳᱼᱵᱟᱵᱟ, ᱵᱚᱭᱦᱟ ᱢᱤᱥᱮᱨᱟ ᱛᱤᱱᱟᱹᱜ ᱥᱩᱞᱩᱠ ᱥᱟᱹᱜᱟᱹᱭ, ᱟᱹᱛᱩ ᱨᱮᱱᱟᱜ ᱦᱚᱨ ᱵᱤᱨ, ᱵᱟᱸᱫᱽ, ᱯᱩᱠᱷᱨᱤ ᱫᱟᱨᱮ ᱮᱢᱟᱱ ᱥᱟᱞᱟᱜ ᱛᱤᱱᱟᱹᱜ ᱫᱩᱞᱟᱹᱲ ᱛᱟᱦᱮᱸ ᱠᱟᱱᱟ᱾ ᱢᱮᱱᱠᱷᱟᱱ ᱚᱱᱟ ᱠᱚ ᱥᱟᱱᱟᱢ ᱫᱩᱞᱟᱹᱲ ᱛᱚᱞ ᱛᱚᱯᱟᱜ ᱠᱟᱛᱮ ᱛᱮᱦᱮᱧ ᱫᱚᱭ ᱧᱤᱨ ᱡᱚᱝ ᱠᱟᱱᱟ, ᱡᱤᱣᱤ ᱟᱹᱛᱠᱤᱨ ᱠᱟᱛᱮ ᱡᱟᱭ ᱡᱩᱜᱽ ᱞᱟᱹᱜᱤᱫ ᱢᱟᱨᱟᱝ ᱫᱟᱹᱜᱤ ᱠᱷᱩᱱᱤ ᱛᱟᱱᱟᱜ ᱞᱠᱟ᱾ ᱚᱱᱛᱚᱨ ᱛᱟᱭ ᱛᱮᱦᱮᱧ ᱵᱟᱝ ᱪᱷᱟᱰᱟᱜ ᱥᱟᱱᱟᱭᱮ ᱠᱟᱱ ᱨᱮᱦᱚᱸ ᱚᱵᱷᱟᱵᱽ ᱛᱮᱦᱮᱧ ᱫᱚ ᱟᱹᱛᱩ ᱚᱲᱟᱜ ᱨᱮᱱᱟᱜ ᱫᱩᱞᱟᱹᱲ ᱠᱷᱚᱱ ᱮ ᱚᱨ ᱵᱷᱮᱜᱟᱨ ᱮ ᱠᱟᱱᱟ᱾ ᱡᱟᱦᱟᱸ ᱛᱤᱥ ᱟᱨᱦᱚᱸ ᱨᱩᱣᱟᱹᱲ ᱨᱮᱱᱟᱜ ᱟᱸᱥ ᱛᱟᱦᱮᱱ ᱠᱷᱟᱱ ᱚᱱᱟ ᱢᱟ ᱢᱤᱫ ᱠᱟᱛᱷᱟ ᱪᱮᱫᱟᱜ ᱵᱟᱝᱢᱟ ᱨᱩᱣᱟᱹᱲ ᱠᱟᱛᱮ ᱨᱮ ᱦᱚᱸ ᱡᱚᱛᱚ ᱥᱟᱞᱟᱜ ᱮ ᱧᱟᱯᱟᱢᱟ ᱢᱮᱱᱠᱷᱟᱱ ᱚᱱᱟ ᱢᱟᱛᱚ ᱵᱟᱝᱟᱼᱛᱮᱦᱮᱧ ᱡᱮ ᱱᱚᱜ ᱚᱭ ᱮ ᱚᱰᱚᱠ ᱟᱠᱟᱱ, ᱥᱤᱢᱟᱹᱭ ᱦᱟᱹᱴᱤᱧ ᱠᱮᱫᱟᱼᱢᱤᱫ ᱨᱚᱠᱚᱢ ᱜᱟᱨ ᱮ ᱜᱮᱫ ᱠᱮᱫᱟ ᱛᱤᱥ ᱦᱚᱸ ᱟᱫᱚ ᱵᱟᱭ ᱨᱩᱣᱟᱹᱲᱟ᱾ ᱱᱚᱝᱠᱟ ᱨᱮᱸᱜᱮᱡ ᱨᱮᱱᱟᱜ ᱨᱟᱹᱜᱤᱼᱱᱩᱱᱟᱹᱜ ᱱᱤᱨᱢᱟᱭᱟ᱾

ᱧᱤᱫᱟᱹ ᱤᱫᱤ ᱮᱱᱟ᱾ ᱧᱩᱛ ᱦᱚᱸ ᱴᱩᱠᱩᱡ ᱧᱚᱞᱷᱟᱫ ᱞᱮᱠᱟ ᱦᱮᱸᱫᱮ ᱮᱱᱟ᱾ ᱢᱤᱫ ᱵᱤᱛᱟᱹ ᱯᱷᱟᱨᱟᱠ ᱨᱮ ᱪᱮᱫ ᱢᱮᱱᱟᱜᱼᱟ ᱚᱱᱟ ᱦᱚᱸ ᱵᱟᱝ ᱧᱮᱞ ᱛᱤᱭᱩᱜᱚᱜ ᱠᱟᱱᱟ᱾ ᱱᱟᱥᱮᱱᱟᱜ ᱥᱮᱱ ᱧᱚᱜ ᱠᱟᱛᱮ ᱥᱟᱢᱟᱝ ᱥᱮᱱ ᱨᱮ ᱥᱟᱺᱜᱤᱧ ᱧᱚᱜ ᱨᱮ ᱡᱩᱞᱩᱜ ᱥᱮᱸᱜᱮᱞ ᱮ ᱧᱮᱞ ᱧᱟᱢ ᱠᱮᱜᱼᱟ᱾ ᱱᱩᱱᱟᱹᱜ ᱢᱟᱨᱟᱝ ᱦᱚᱭ ᱡᱟᱹᱲᱤ ᱨᱮᱦᱚᱸ ᱥᱮᱸᱜᱮᱞ ᱡᱩᱞᱩᱜ ᱠᱟᱱᱟ; ᱧᱮᱞ ᱠᱟᱛᱮ ᱦᱟᱦᱟᱲᱟ ᱜᱮᱭ ᱵᱩᱡᱷᱟᱹᱣ ᱠᱮᱜᱼᱟ ᱟᱨ ᱚᱱᱟ ᱦᱟᱦᱟᱲᱟ ᱢᱚᱱᱮᱼᱡᱤᱣᱤ ᱛᱮᱜᱮ ᱟᱡᱟᱜ ᱡᱟᱸᱜᱟ ᱢᱟᱲᱟᱝ ᱥᱮᱱ ᱛᱟᱹᱦᱩᱸ ᱞᱚᱜᱚᱱ ᱞᱚᱜᱚᱱ ᱮ ᱚᱨ ᱤᱫᱤ ᱮ ᱠᱟᱱᱟ᱾ ᱡᱩᱞᱩᱜ ᱥᱮᱸᱜᱮᱞ ᱥᱩᱨ ᱮ ᱥᱮᱴᱮᱨ ᱤᱫᱤᱜ ᱛᱮᱜᱮ ᱟᱨᱦᱚᱸ ᱚᱠᱛᱚ ᱡᱟᱹᱥᱛᱤ ᱤᱫᱤ ᱮᱱᱟ ᱚᱱᱟ ᱛᱮ ᱥᱩᱨ ᱠᱚᱨᱮᱱᱟᱜ ᱪᱮᱫ ᱦᱚᱸ ᱵᱟᱝ ᱧᱮᱞ ᱴᱷᱤᱠᱟᱹᱜ ᱠᱟᱱᱟ᱾ ᱧᱤᱫᱟᱹ ᱥᱟᱲᱟ ᱥᱟᱹᱛᱤᱧ ! ᱪᱮᱫ ᱦᱚᱸ ᱵᱟᱝ ᱥᱟᱰᱮ ᱠᱟᱱᱟ ᱟᱨ ᱪᱮᱫ ᱦᱚᱸ ᱵᱟᱝ ᱞᱟᱲᱟᱣᱜ ᱠᱟᱱᱟ᱾ ᱦᱚᱭ ᱦᱚᱸ ᱛᱷᱤᱨ ᱛᱷᱟᱨ ᱟᱠᱟᱱᱟ ᱫᱟᱨᱮ ᱥᱟᱠᱟᱢ ᱠᱚᱦᱚᱸ ᱵᱟᱝ ᱞᱟᱲᱟᱣᱜ ᱠᱟᱱᱟ᱾ ᱥᱩᱶᱟᱹᱬᱤ ᱥᱚᱥᱨᱚᱡ ᱪᱤᱞᱤ ᱦᱚᱸ ᱵᱟᱝ ᱠᱚ ᱨᱟᱜ ᱥᱟᱰᱮᱭᱮᱜᱼᱟ᱾ ᱪᱚᱦᱚᱲ ᱫᱷᱟᱹᱨᱛᱤᱭ ᱡᱟᱹᱯᱤᱫ ᱠᱮᱜᱼᱟ᱾ ᱦᱟᱞᱵᱟᱞ ᱜᱟᱰᱟ ᱫᱟᱜ ᱵᱟᱹᱭ ᱵᱟᱹᱭ ᱛᱮ ᱞᱮᱜᱮᱢ ᱞᱮᱜᱮᱢ ᱞᱤᱸᱜᱤᱜ ᱠᱟᱱᱟ᱾ ᱡᱚᱠᱷᱟ ᱡᱚᱠᱷᱟ ᱛᱮ ᱜᱟᱰᱟᱭ ᱯᱟᱭᱚᱢ ᱮᱱᱟ᱾ ᱦᱟᱱᱟ ᱥᱟᱦᱟ ᱯᱟᱨᱚᱢ ᱠᱟᱛᱮ ᱦᱚᱨ ᱥᱩᱨ ᱨᱮᱱᱟᱜ ᱚᱱᱟ ᱡᱩᱞᱩᱜ ᱥᱮᱸᱜᱮᱞ ᱥᱮᱱ ᱢᱤᱫ ᱨᱟᱦᱟ ᱟᱹᱰᱤ ᱜᱷᱟᱹᱲᱤᱠ ᱮ ᱠᱚᱭᱚᱜ ᱠᱮᱜᱼᱟ᱾ ᱵᱚᱛᱚᱨ ᱛᱮ ᱦᱚᱲᱢᱚ ᱨᱮ ᱩᱫᱽᱜᱟᱹᱨ ᱫᱟᱜ ᱞᱤᱸᱜᱤ ᱮᱦᱚᱵ ᱮᱱᱟ ᱚᱱᱟ ᱛᱟᱠᱨᱮ ᱟᱡᱟᱜ ᱵᱚᱦᱚᱜ ᱪᱮᱛᱟᱱ ᱥᱮᱱᱛᱮ ᱯᱷᱟᱫ ᱯᱷᱟᱫᱟᱣ ᱠᱟᱛᱮ ᱢᱤᱫ ᱠᱚᱠᱚᱨ ᱪᱮᱬᱮ ᱦᱚᱨᱚᱵᱚᱨᱚ ᱠᱷᱚᱸᱦᱚᱸᱨ ᱠᱷᱚᱸᱦᱚᱸᱨ ᱨᱟᱜ ᱠᱟᱛᱮᱭ ᱩᱰᱟᱹᱣ ᱯᱟᱨᱚᱢ ᱮᱱᱟ᱾ ᱥᱟᱺᱜᱤᱧ ᱨᱮᱱᱟᱜ ᱠᱟᱨᱟᱡᱽ ᱨᱟᱜ ᱟᱸᱡᱚᱢ ᱦᱤᱡᱩᱜ ᱠᱟᱱᱟ᱾ ᱤᱱᱟᱹ ᱦᱤᱞᱚᱜᱟᱜ ᱦᱮᱸᱫᱮ ᱧᱩᱛ ᱫᱚ ᱠᱟᱹᱞᱤ ᱥᱮ ᱠᱟᱡᱚᱞ ᱥᱟᱞᱟᱜ ᱛᱩᱞᱟᱹ ᱡᱚᱠᱷᱟᱜᱼᱟ ᱚᱱᱟ ᱦᱚᱸ ᱵᱟᱝ ᱴᱷᱟᱹᱣᱠᱟᱹ ᱫᱟᱲᱮᱭᱟᱜ ᱠᱟᱱᱟ᱾ ᱚᱱᱠᱟᱱ ᱵᱚᱛᱚᱨᱟᱱ ᱧᱤᱫᱟᱹ᱾ ᱨᱩᱣᱟᱹᱲᱟᱭ ᱪᱮ ᱞᱟᱦᱟᱜ ᱟᱭ ᱱᱚᱝᱠᱟᱱ ᱵᱷᱮᱜᱟᱨ ᱵᱷᱮᱜᱟᱨ ᱢᱚᱱᱮ ᱟᱡᱟᱜ ᱦᱚᱲᱢᱚ ᱵᱷᱤᱛᱨᱤ ᱨᱮ ᱱᱮᱭᱟᱣ ᱨᱟᱯᱟᱪᱟᱜ ᱮᱦᱚᱵ ᱮᱱᱟ᱾ ᱟᱹᱛᱩ ᱢᱟ ᱵᱟᱝ ᱜᱮ ᱵᱟᱭ ᱨᱩᱣᱟᱹᱲᱟ ᱚᱸᱰᱮ ᱢᱟᱭ ᱛᱟᱞᱟᱠ ᱚᱴᱚ ᱟᱠᱟᱫᱼᱟ ᱮᱱ ᱠᱷᱟᱱ ᱢᱟᱲᱟᱝ ᱥᱮᱱ ᱞᱟᱦᱟᱜ ᱛᱮ ᱜᱮ ᱦᱩᱭ ᱟᱭᱟ᱾ ᱥᱟᱢᱟᱝ ᱨᱮ ᱡᱟᱦᱟᱸ ᱜᱮ ᱥᱮᱴᱮᱨᱚᱜ ᱚᱱᱟ ᱥᱟᱞᱟᱜ ᱥᱟᱢᱟᱝ ᱫᱟᱯᱟᱨᱟᱢ ᱛᱤᱸᱜᱩ ᱠᱮᱴᱮᱡ ᱠᱟᱛᱮ ᱯᱟᱨᱚᱢᱚᱜ ᱦᱩᱭᱩᱜᱼᱟ᱾

ᱵᱷᱟᱹᱜᱤ ᱞᱮᱠᱟ ᱟᱛᱮᱱ ᱴᱷᱤᱠ ᱠᱟᱛᱮ ᱥᱟᱺᱜᱤᱧ ᱨᱮ ᱦᱚᱲᱟᱜ ᱨᱚᱲ ᱞᱮᱠᱟᱭ ᱟᱸᱡᱚᱢ ᱠᱮᱜᱼᱟ᱾ ᱢᱚᱱᱮ ᱨᱮ ᱛᱚᱵᱮ ᱮᱱᱟᱝ ᱱᱟᱥᱮ ᱫᱟᱲᱮᱭ ᱧᱟᱢ ᱠᱮᱜᱼᱟ᱾ ᱥᱮᱸᱜᱮᱞ ᱥᱩᱨ ᱥᱮᱱᱮ ᱞᱟᱦᱟ ᱤᱫᱤᱜ ᱡᱚᱦᱚᱜ ᱪᱮᱫ ᱠᱚᱪᱚᱭ ᱥᱟᱬᱜᱚᱢ ᱤᱫᱤ ᱠᱮᱜᱼᱟ, ᱟᱨ ᱪᱮᱫ ᱠᱚᱪᱚ ᱡᱟᱸᱜᱟ ᱛᱮᱭ ᱛᱟᱹᱠᱤᱡ ᱤᱫᱤ ᱠᱮᱜᱼᱟ᱾ ᱮᱱᱠᱷᱟᱱ ᱚᱱᱟ ᱫᱚ ᱢᱟᱬᱟᱠᱩᱲ ᱠᱟᱱᱟ ᱢᱮᱱᱛᱮᱭ ᱵᱩᱡᱷᱟᱹᱣ ᱠᱮᱜᱼᱟ᱾ ᱢᱟᱬᱟᱠᱩᱲ ᱨᱮᱱᱟᱜ ᱠᱟᱛᱷᱟ ᱠᱚᱭ ᱩᱭᱦᱟᱹᱨ ᱟᱹᱪᱩᱨ ᱠᱮᱫ ᱠᱷᱟᱱ ᱛᱤ ᱡᱟᱸᱜᱟ ᱦᱚᱲᱢᱚ ᱵᱚᱛᱚᱨ ᱛᱮ ᱡᱷᱟᱢ ᱡᱷᱟᱢ ᱜᱚᱫ ᱮᱱ ᱛᱟᱭᱟ᱾ ᱢᱮᱱ ᱫᱚ ᱚᱠᱟ ᱨᱮ ᱵᱚᱛᱚᱨ ᱵᱟᱹᱱᱩᱜ ᱟᱱᱟ ? ᱚᱠᱚᱭᱟᱜ ᱢᱮᱫ ᱢᱮᱱᱟᱜ ᱛᱟᱭᱟ ᱧᱮᱞ ᱠᱟᱛᱮᱭ ᱵᱚᱛᱚᱨᱚᱜᱼᱟ, ᱚᱠᱚᱭᱟᱜ ᱞᱩᱛᱩᱨ ᱢᱮᱱᱟᱜᱼᱟ  ᱟᱸᱡᱚᱢ ᱠᱟᱛᱮ ᱦᱚᱸᱭ ᱵᱚᱛᱚᱨᱚᱜᱼᱟ ᱟᱨ ᱡᱤᱣᱤᱭᱟᱱ ᱠᱚ ᱢᱟ ᱩᱭᱦᱟᱹᱨ ᱟᱹᱪᱩᱨ ᱛᱮᱜᱮ ᱵᱚᱛᱚᱨ ᱠᱚ ᱵᱩᱡᱷᱟᱹᱣᱟ᱾ ᱚᱲᱟᱜᱼᱫᱩᱣᱟᱹᱨ ᱦᱚᱨᱼᱵᱤᱨ ᱜᱚᱴᱟ ᱜᱮ ᱵᱚᱛᱚᱨ ᱟᱱᱟ, ᱚᱱᱟ ᱟᱸᱵᱟᱵᱟᱹᱥᱤᱭᱟᱹ ᱧᱩᱛᱨᱮ ᱮᱥᱠᱟᱨᱜᱮ ᱚᱱᱠᱟ ᱢᱟᱬᱟᱠᱩᱲ ᱨᱮ ᱫᱟᱬᱟᱱ ᱫᱚ ᱚᱠᱚᱭ ᱵᱟᱭ ᱵᱚᱛᱚᱨᱚᱜᱼᱟ ? ᱢᱮᱱᱠᱷᱟᱱ ᱚᱠᱚᱭᱟᱜ ᱜᱮ ᱜᱩᱡᱩᱜ ᱵᱟᱨᱟ ᱵᱟᱹᱨᱤ ᱚᱠᱛᱚ ᱩᱱᱤᱭᱟᱜ ᱫᱚ ᱟᱨ ᱪᱮᱫ ᱵᱚᱛᱚᱨ ? ᱢᱚᱬᱟᱠᱩᱲ ᱜᱮ ᱚᱱᱟᱠᱟᱱ ᱦᱚᱲ ᱞᱟᱹᱜᱤᱫ ᱫᱚ ᱥᱩᱠ ᱨᱮᱱᱟᱜ ᱴᱷᱟᱶ᱾ ᱢᱟᱬᱟᱠᱩᱲ ᱨᱮᱭ ᱜᱤᱛᱤᱡ ᱫᱟᱲᱮᱭᱟᱜ ᱠᱷᱟᱱ ᱜᱮ ᱡᱟᱭ ᱡᱩᱜᱽ ᱞᱟᱹᱜᱤᱫ ᱥᱟᱹᱨᱤ ᱥᱩᱠ ᱮ ᱧᱟᱢᱟ᱾ ᱨᱮᱸᱜᱮᱡ ᱨᱟᱵᱟᱝ ᱨᱩᱣᱟᱹᱼᱦᱟᱹᱥᱩ ᱡᱚᱛᱚᱣᱟᱜ ᱠᱷᱚᱱ ᱡᱤᱣᱤ ᱦᱚᱲᱢᱚ ᱯᱟᱨᱟᱝᱜᱚᱛ ᱮ ᱧᱟᱢᱟ᱾ ᱵᱷᱟᱹᱜᱤ ᱥᱟᱺᱦᱤᱡᱱ ᱵᱮᱸᱜᱮᱫ ᱩᱨᱤᱡ ᱠᱟᱛᱮ ᱧᱮᱞ ᱧᱟᱢ ᱠᱮᱫ ᱠᱚᱣᱟᱭ ᱛᱤᱱᱟᱹᱜ ᱜᱟᱱ ᱦᱚᱲ ᱠᱚ ᱧᱮᱞᱚᱜ ᱠᱟᱱᱟ ᱟᱛᱮᱱ ᱴᱷᱤᱠᱟᱹ ᱠᱮᱜᱼᱟᱭ ᱩᱱᱠᱩ ᱫᱚ ᱜᱚᱡ ᱦᱚᱲ ᱨᱟᱯᱟᱜ ᱦᱚᱲ ᱠᱟᱱᱟ ᱠᱚ᱾ ᱤᱱᱟᱹᱜ ᱫᱤᱞ ᱟᱱᱟᱜ ᱵᱚᱛᱚᱨ ᱥᱟᱞᱟᱜ ᱵᱟᱹᱭ ᱵᱟᱹᱭ ᱛᱮ ᱠᱚ ᱜᱟᱞᱢᱟᱨᱟᱣ ᱠᱟᱱᱟ᱾ ᱢᱚᱱᱮ ᱨᱮ ᱫᱟᱲᱮ ᱡᱟᱣᱨᱟ ᱧᱚᱜ ᱠᱟᱛᱮ ᱱᱟᱥᱮᱱᱟᱜ ᱮᱛᱚᱢ ᱧᱚᱜ ᱛᱮ ᱦᱚᱨ ᱮ ᱮᱛᱚᱢ ᱠᱮᱜᱼᱟ ᱟᱨ ᱪᱟᱞᱟᱜ ᱛᱩᱞᱩᱡ ᱟᱡᱟᱜ ᱡᱟᱸᱜᱟ ᱨᱮ ᱪᱮᱫ ᱵᱷᱟᱹᱨᱤ ᱢᱩᱰᱷᱟᱹᱫ ᱛᱟᱱᱟᱜ ᱛᱚᱞ ᱟᱠᱟᱱ ᱞᱮᱠᱟᱭ ᱵᱩᱡᱷᱟᱹᱣ ᱠᱮᱜᱼᱟ᱾ ᱡᱟᱦᱟᱸᱜᱟᱜᱮ ᱵᱟᱝ ᱛᱩᱞᱩᱜᱼᱟ ᱟᱨ ᱥᱟᱢᱟᱝ ᱥᱮᱱ ᱦᱚᱸ ᱵᱟᱝ ᱰᱟᱰᱷᱟᱣᱚᱜᱼᱟ᱾ ᱢᱚᱱᱮ ᱛᱮ ᱛᱟᱲᱟᱢ ᱥᱟᱱᱟᱭᱮᱠᱟᱱ ᱨᱮᱦᱚᱸ ᱡᱟᱸᱜᱟ ᱨᱮᱱᱟᱜ ᱫᱟᱲᱮ ᱜᱮᱭ ᱟᱫ ᱠᱮᱫ ᱞᱮᱠᱟᱭ ᱵᱩᱡᱷᱟᱹᱣ ᱠᱮᱜᱼᱟ᱾ ᱮᱱᱠᱷᱟᱱ ᱚᱸᱰᱮ ᱜᱮ ᱫᱷᱟᱲᱟᱥ ᱢᱮᱱᱛᱮᱭ ᱫᱩᱲᱩᱵ ᱱᱟᱯᱚᱲ ᱮᱱᱟ᱾ ᱥᱮᱨᱢᱟ ᱧᱩᱛ ᱠᱷᱚᱱ ᱟᱨᱦᱚᱸ ᱧᱩᱛᱼᱵᱷᱟᱵᱽᱱᱟ ᱨᱮᱱᱟᱜ ᱦᱮᱸᱫᱮ ᱨᱤᱢᱤᱞ ᱛᱮ ᱥᱟᱢᱟᱝ ᱨᱮᱱᱟᱜ ᱦᱚᱨ ᱮ ᱮᱥᱮᱫ ᱠᱮᱫ ᱛᱟᱭᱟ᱾ ᱚᱠᱟ ᱥᱮᱸᱜᱮᱞ ᱞᱟᱡ ᱨᱮ ᱡᱩᱞᱩᱜ ᱠᱟᱱ ᱛᱮ ᱦᱚᱲ ᱠᱚ ᱚᱲᱟᱜ ᱫᱩᱣᱟᱹᱨ ᱚᱛᱼᱦᱟᱥᱟ, ᱯᱮᱲᱟ ᱯᱟᱹᱦᱬᱟᱹ ᱵᱟᱹᱜᱤ ᱠᱟᱛᱮ ᱫᱤᱥᱚᱢ ᱫᱤᱥᱚᱢ ᱫᱩᱠᱷᱢᱟᱹ ᱠᱚ ᱫᱟᱲᱟᱱᱟ, ᱵᱟᱝ ᱪᱟᱞᱟᱜ ᱥᱟᱱᱟ ᱠᱚ ᱨᱮᱦᱚᱸ ᱨᱮᱸᱜᱮᱡ ᱜᱮᱭ ᱡᱷᱚᱲᱟ ᱤᱫᱤ ᱠᱚᱣᱟ᱾ ᱩᱱ ᱡᱚᱦᱚᱜ ᱫᱚ ᱵᱤᱨ ᱪᱮᱬᱮ ᱟᱨ ᱦᱚᱱ ᱦᱚᱯᱚᱱ ᱨᱮ ᱪᱮᱫ ᱦᱚᱸ ᱯᱷᱚᱨᱚᱠ ᱜᱮ ᱵᱟᱝ ᱛᱟᱦᱮᱱᱟ᱾ ᱵᱟᱡᱟᱨ ᱨᱮᱜᱮ ᱡᱚᱢᱟᱜ, ᱜᱟᱰᱟ ᱫᱟᱜ ᱜᱮ ᱧᱩᱣᱟᱜ ᱟᱨ ᱫᱟᱨᱮ ᱩᱢᱩᱞ ᱜᱮ ᱡᱤᱣᱤ ᱦᱚᱲᱢᱚ ᱨᱩᱠᱷᱭᱟᱹᱭ ᱨᱮᱱᱟᱜ ᱟᱥᱨᱟ ᱫᱚ᱾ ᱩᱱ ᱡᱚᱦᱚᱜ ᱵᱚᱨ ᱵᱚᱛᱚᱨ ᱜᱮ ᱟᱫᱚᱜᱼᱟ, ᱟᱹᱠᱤᱞ ᱜᱮᱭᱟᱱ ᱠᱚᱢᱚᱜᱼᱟ ᱥᱟᱶᱛᱟ ᱟᱨ ᱫᱷᱚᱨᱚᱢ ᱨᱮᱱᱟᱜ ᱛᱚᱯᱚᱞ ᱦᱚᱲ ᱠᱚ ᱛᱚᱯᱟᱜ ᱜᱤᱰᱤ ᱠᱟᱜᱼᱟ᱾ ᱞᱟᱡ ᱨᱮᱱᱟᱜ ᱥᱮᱸᱜᱮᱞ ᱦᱚᱲᱟᱜ ᱢᱚᱱᱮ ᱡᱤᱣᱤ ᱵᱟᱝ ᱱᱤᱨᱞᱟᱹ ᱠᱟᱛᱮ ᱛᱟᱹᱦᱩᱸᱭ ᱢᱟᱹᱭᱞᱟᱹ ᱠᱟᱜᱼᱟ᱾ ᱡᱤᱣᱤ ᱨᱮᱱᱟᱝ ᱦᱚᱨ ᱵᱟᱝ ᱯᱷᱟᱨᱪᱟ ᱠᱟᱛᱮ ᱛᱟᱹᱦᱩ ᱟᱨ ᱦᱚᱸ ᱡᱟᱹᱱᱩᱢ ᱛᱮᱭ ᱨᱟᱢᱯᱷᱟᱹ ᱮᱥᱮᱫᱚᱜᱼᱟ᱾ ᱱᱚᱶᱟ ᱥᱮᱸᱜᱮᱞ ᱡᱟᱭ ᱡᱩᱜᱽ ᱞᱟᱹᱜᱤᱫ ᱡᱩᱞ ᱢᱩᱪᱟᱹᱫ ᱠᱟᱛᱮ ᱥᱟᱨᱟ ᱥᱮᱸᱜᱮᱞ ᱨᱮ ᱦᱚᱲᱢᱚ ᱞᱚ ᱞᱮᱱ ᱮᱱᱟᱝ ᱡᱚᱛᱚᱣᱟᱜ ᱪᱟᱵᱟᱜᱼᱟ᱾

ᱧᱩᱛ ᱨᱮ ᱢᱮᱫ ᱫᱟᱜ ᱡᱚᱫ ᱜᱤᱰᱤ ᱠᱟᱛᱮ ᱛᱤᱸᱜᱩ ᱠᱮᱴᱮᱡ ᱮᱱᱟᱭ ᱟᱨ ᱡᱤᱞᱤᱧ ᱥᱟᱺᱦᱤᱡ ᱥᱟᱸᱦᱮᱫ ᱠᱟᱛᱮ ᱵᱮᱫ ᱟᱠᱟᱫᱮ ᱞᱮᱠᱟ ᱧᱩᱛ ᱨᱮ ᱢᱤᱫ ᱫᱷᱟᱣ ᱪᱚᱴ ᱥᱮᱱ ᱠᱚᱭᱚᱜ ᱠᱟᱛᱮ ᱟᱱᱠᱷᱟ ᱜᱮ ᱛᱟᱲᱟᱢ ᱮ ᱮᱦᱚᱵ ᱠᱮᱫᱼᱟ᱾

Written by ᱥᱳᱵᱷᱟᱱᱟᱛᱷ ᱵᱮᱥᱨᱟ
Published on ᱯᱮ ᱡᱚᱲ ᱠᱟᱹᱦᱱᱤ