ᱥᱟᱶᱼᱥᱟᱶ ᱛᱟᱸᱦᱮ ᱨᱮᱱᱟᱝ ᱟᱣᱛᱟ ᱥᱮ ᱥᱚᱱᱚᱛ ᱟᱣᱛᱟ ᱜᱮ ᱥᱟᱶᱛᱟ ᱫᱚ᱾ ᱢᱟᱱᱣᱟ ᱦᱚᱯᱚᱱ ᱠᱚ ᱛᱟᱞᱟ ᱨᱮ ᱥᱩᱠᱼᱥᱩᱞᱩᱠ ᱱᱤᱨᱟᱹᱭ ᱛᱮ ᱛᱟᱦᱮᱸᱱ ᱜᱮ ᱥᱟᱶᱛᱟ ᱨᱮᱱᱟᱝ ᱥᱟᱹᱨᱤ ᱡᱚᱥ ᱫᱚ᱾
ᱥᱟᱹᱨᱤ ᱫᱷᱚᱨᱚᱢ ᱨᱮᱱᱟᱝ ᱱᱟᱹᱴᱣᱟᱹ ᱥᱩᱛᱟᱹᱢ ᱛᱮᱜᱮ ᱠᱷᱮᱨᱣᱟᱲ ᱥᱟᱶᱛᱟ ᱫᱚ ᱜᱚᱜ ᱫᱚᱦᱚ ᱜᱟᱵᱟᱱ ᱟᱠᱟᱱᱟ᱾ ᱞᱟᱭ ᱞᱟᱠᱪᱟᱨ ᱟᱹᱨᱤ ᱜᱮ ᱥᱟᱶᱛᱟ ᱨᱮᱱᱟᱝ ᱫᱷᱚᱱ ᱟᱨ ᱫᱟᱲᱮ ᱫᱚ᱾ ᱞᱟᱭ ᱞᱟᱠᱪᱟᱨ ᱟᱹᱨᱤ ᱟᱹᱨᱤ ᱪᱟᱹᱞᱤ ᱥᱚᱞᱚᱜ ᱵᱚᱠᱚᱜ ᱞᱮᱱ ᱠᱷᱟᱱ ᱥᱟᱶᱛᱟ ᱥᱚᱞᱚᱜ ᱵᱚᱠᱚᱜᱚᱜᱼᱟ᱾ ᱥᱟᱶᱛᱟ ᱥᱚᱞᱚᱜ ᱵᱚᱠᱚᱜ ᱞᱮᱱᱠᱷᱟᱱ ᱡᱟᱹᱛᱤ ᱨᱮᱱᱟᱝ ᱫᱷᱚᱱ ᱫᱷᱟᱥᱟᱜᱼᱟ᱾ ᱡᱟᱹᱛᱤ ᱨᱮᱱᱟᱝ ᱫᱷᱚᱱ ᱫᱷᱟᱥᱟᱣ ᱞᱮᱱᱠᱷᱟᱱ ᱫᱷᱚᱨᱚᱢ ᱱᱟᱥᱟᱜᱼᱟ, ᱟᱨ ᱫᱷᱚᱨᱚᱢ ᱱᱟᱥᱟᱣ ᱞᱮᱱᱠᱷᱟᱱ ᱨᱤᱞᱟᱹ ᱢᱟᱞᱟ ᱠᱷᱮᱨᱣᱟᱲ ᱥᱟᱶᱛᱟ ᱱᱟᱥᱟᱜᱼᱟ᱾
ᱦᱟᱱᱮ ᱛᱤᱢᱤᱱᱟᱝ ᱫᱤᱱ ᱨᱮᱪᱚᱝ ᱥᱮᱫᱟᱭ ᱦᱟᱯᱲᱟᱢ ᱠᱚ ᱵᱷᱟᱰᱟᱱ ᱵᱤᱱᱛᱤ ᱞᱟᱹᱜᱤᱫ, ᱢᱟᱞ ᱢᱚᱥᱞᱟ ᱞᱟᱹᱜᱤᱫ, ᱫᱷᱚᱨᱚᱢ ᱠᱚᱨᱚᱢ ᱞᱟᱹᱜᱤᱫ, ᱵᱚᱸᱜᱟ ᱵᱩᱨᱩ ᱞᱟᱹᱜᱤᱫ ᱢᱚᱬᱫᱟ ᱠᱟᱹᱥᱤ ᱴᱟᱺᱰᱤ ᱮᱨᱮ ᱟᱛᱱᱟᱜ, ᱠᱷᱚᱫᱮ ᱢᱟᱛᱠᱚᱢ, ᱞᱮᱵᱽᱫᱟ ᱞᱚᱣᱟ ᱯᱮᱴᱮᱨ ᱵᱟᱲᱮ, ᱞᱮᱯᱮᱡ ᱛᱤᱨᱤᱞ, ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹ ᱨᱮ ᱠᱚ ᱟᱪᱟᱨ ᱞᱟᱜ ᱵᱤᱪᱟᱹᱨ ᱞᱟᱜ ᱪᱤᱛᱨᱤ ᱜᱷᱩᱴᱩ ᱨᱮ ᱠᱮᱨᱚ ᱰᱟᱹᱰᱤ ᱫᱟᱜ ᱧᱩ ᱠᱟᱛᱮ᱾
ᱥᱟᱹᱨᱤ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹ ᱨᱮ ᱠᱟᱛᱷᱟ ᱥᱟᱹᱨᱤ ᱞᱮᱱᱟ, ᱥᱟᱹᱨᱤ ᱥᱟᱡᱚᱢ ᱫᱟᱨᱮ ᱯᱮ ᱠᱷᱤᱭᱟᱹ ᱥᱩᱛᱟᱹᱢ ᱛᱮ ᱛᱚᱞ ᱠᱟᱛᱮ, ᱫᱷᱚᱨᱚᱢ ᱥᱩᱯᱟᱹᱲᱤ ᱫᱟᱜ ᱫᱚᱲᱚᱢ ᱠᱟᱛᱮ ᱥᱟᱱᱟᱢ ᱵᱚᱸᱜᱟ ᱥᱟᱢᱟᱱ ᱵᱤᱫᱩᱵ ᱠᱟᱛᱮ, ᱥᱟᱭ ᱯᱩᱲᱥᱤ ᱟᱹᱛᱩ ᱨᱤᱱ ᱜᱩᱱᱟᱹᱱ ᱢᱟᱹᱱᱟᱱ ᱦᱚᱲ ᱛᱮ ᱞᱩᱢᱟᱹᱝ ᱯᱟᱹᱨᱞᱟᱹ ᱨᱮ ᱵᱚᱸᱜᱟ ᱧᱩᱛᱩᱢ ᱟᱛᱟᱝ ᱠᱮᱫ ᱦᱤᱞᱚᱜ ᱠᱷᱚᱱ ᱠᱷᱮᱨᱣᱟᱲ ᱦᱚᱯᱚᱱ ᱠᱚᱣᱟᱜ ᱱᱤᱭᱟᱭ (ᱱᱤᱨᱟᱹᱭ) ᱞᱟᱹᱜᱤᱫ ᱛᱮ ᱱᱟᱭᱠᱮ ᱫᱚᱠᱚ ᱪᱮᱴᱟᱜ ᱵᱟᱪᱷᱟᱣ ᱟᱱ ᱛᱟᱸᱦᱮ ᱠᱟᱱᱟ᱾ ᱱᱟᱭ ᱠᱮ ᱫᱚ ᱱᱟᱭ ᱫᱤᱥᱚᱢ ᱱᱟᱭᱟᱲᱳ, ᱟᱹᱛᱩ ᱫᱤᱥᱚᱢ ᱫᱩᱞᱟᱹᱲᱚ, ᱵᱤᱨ ᱫᱤᱥᱚᱢ ᱵᱟᱞᱟᱲᱚ, ᱡᱟᱦᱮᱨ ᱫᱤᱥᱚᱢ ᱫᱤᱭᱟᱹᱲᱚ ᱠᱟᱱᱟ ᱠᱚ᱾ ᱱᱩᱠᱩ ᱥᱤᱧ ᱵᱤᱨ ᱢᱟᱱ ᱵᱤᱨ ᱠᱚ ᱥᱩᱞᱛᱟᱹ ᱥᱩᱱᱩᱢ ᱟᱹᱜᱩ ᱟᱠᱟᱫᱼᱟ᱾ ᱱᱩᱠᱩ ᱠᱚ ᱚᱢᱟᱱᱚᱛ ᱞᱮᱠᱷᱟᱱ ᱵᱤᱨ ᱵᱟᱜᱟᱦᱤᱜᱼᱟ, ᱛᱩᱭᱩ ᱠᱚ ᱠᱩᱞᱚᱜᱼᱟ ᱥᱮᱫᱟᱭ ᱦᱟᱯᱲᱟᱢ ᱫᱚ ᱥᱚᱛ ᱪᱩᱨᱤᱛ ᱥᱟᱹᱨᱤ ᱦᱚᱲ ᱠᱚ ᱛᱟᱸᱦᱮ ᱠᱟᱱᱟ᱾ ᱢᱟᱬᱟᱝ ᱦᱤᱞᱚᱜ ᱵᱚᱸᱜᱟ ᱠᱚ ᱩᱢ ᱱᱟᱬᱠᱟ ᱠᱟᱛᱮ ᱢᱤᱫ ᱧᱤᱫᱟᱹ ᱠᱚ ᱵᱷᱟᱹᱨᱤ ᱵᱷᱚᱨᱢᱟᱫ ᱠᱚ ᱛᱟᱸᱦᱮᱫ, ᱫᱚᱥᱟᱨ ᱦᱤᱞᱚᱜ ᱠᱚ ᱜᱚᱪᱟᱨ ᱞᱮᱫ ᱠᱚᱣᱟ ᱯᱮᱨᱮᱡ ᱞᱮᱫ ᱩᱢᱟᱹᱬ ᱞᱮᱫ ᱠᱚᱣᱟ᱾ ᱚᱱᱟ ᱢᱟᱛᱠᱚᱢ, ᱵᱩᱴᱟᱹ ᱥᱟᱨᱡᱚᱢ ᱵᱩᱴᱟᱹ ᱨᱮᱜᱮ ᱵᱚᱸᱜᱟ ᱵᱩᱨᱩ ᱥᱟᱶ ᱠᱚ ᱧᱮᱯᱮᱞ ᱨᱚᱯᱚᱲ ᱞᱮᱱ ᱛᱟᱸᱦᱮᱫ᱾
ᱟᱵᱚ ᱦᱚᱸᱛᱚ ᱩᱱᱠᱩ ᱦᱟᱯᱲᱟᱢ ᱨᱤᱱ ᱯᱚᱼᱯᱚᱸᱜᱽᱲᱟ ᱠᱟᱱ ᱜᱤᱭᱟ ᱵᱚᱱ, ᱚᱱᱟ ᱢᱟᱛᱠᱚᱢ ᱵᱩᱴᱟᱹ ᱥᱟᱨᱡᱚᱢ ᱵᱩᱴᱟᱹ ᱫᱷᱩᱸᱫᱽ ᱜᱮᱵᱚᱱ ᱧᱮᱞᱮᱫ ᱟᱨ ᱪᱮᱫᱟᱜ?
ᱢᱚᱱᱮ ᱨᱮ ᱢᱚᱫᱟ ᱥᱟᱵ ᱟᱠᱟᱱᱟ, ᱞᱟᱸᱵᱟᱣ ᱮᱦᱚᱵ ᱟᱠᱟᱱᱟ, ᱫᱤᱠᱩ ᱦᱚᱲ ᱠᱚᱣᱟᱜ ᱧᱮᱞ ᱛᱮ ᱠᱩᱰᱟᱹᱢ ᱜᱮ ᱵᱚ ᱥᱟᱜᱼᱯᱷᱟ ᱠᱟᱱᱟ᱾ ᱵᱷᱤᱛᱟᱹᱨ ᱫᱚ ᱡᱚᱵᱽᱨᱟ ᱛᱮ ᱜᱟᱲ ᱟᱠᱟᱱᱟ᱾ ᱦᱚᱲᱟᱜ ᱧᱮᱞᱛᱮ ᱵᱷᱚᱲᱚᱠ ᱜᱮᱵᱚᱱ ᱥᱟᱜᱼᱡᱟᱣ ᱠᱟᱱᱟ “ᱦᱟᱭᱨᱮ ᱠᱷᱮᱨᱣᱟᱲ ᱟᱢᱟᱜ ᱡᱟᱹᱛᱤ ᱢᱮᱱᱟᱜ ᱛᱟᱢᱟ ᱫᱷᱚᱨᱚᱢ ᱢᱮᱱᱟᱜ ᱛᱟᱢᱟ, ᱵᱚᱸᱜᱟ ᱵᱩᱨᱩ ᱢᱮᱱᱟᱜ ᱠᱚ ᱛᱟᱢᱟ ᱮᱴᱟᱜ ᱦᱚᱲ ᱨᱤᱱ ᱵᱚᱸᱜᱟ ᱦᱟᱜ ᱦᱟᱹᱲᱤ ᱠᱟᱴ ᱨᱮ ᱢᱟᱹᱱᱥᱤᱠ ᱵᱚᱫᱟ ᱞᱮᱠᱟ ᱵᱚᱦᱚᱜ ᱵᱚᱱ ᱠᱷᱟᱸᱵᱚᱲᱮᱫᱼᱟ᱾ ᱦᱮ ᱠᱷᱮᱨᱣᱟᱲ ᱡᱟᱹᱛᱤ ᱫᱷᱚᱨᱚᱢ ᱵᱟᱹᱱᱩᱜ ᱞᱮᱠᱟ ᱱᱚᱝᱠᱟ ᱫᱚ ᱪᱮᱫᱟᱜ? ᱟᱵᱚᱨᱤᱱ ᱵᱚᱸᱜᱟ ᱵᱩᱨᱩ ᱪᱮᱛᱟᱱ ᱨᱮ ᱯᱟᱹᱛᱭᱟᱹᱣ ᱵᱚᱱ ᱟᱫ ᱟᱠᱟᱫᱼᱟ᱾” ᱱᱤᱛ ᱦᱚᱸ ᱚᱱᱟ ᱥᱟᱨᱡᱚᱢ ᱫᱟᱨᱮ ᱵᱩᱴᱟᱹ ᱠᱷᱚᱱ ᱞᱤᱴᱟᱹ ᱜᱚᱰᱮᱛ ᱢᱟᱨᱟᱝ ᱵᱳᱨᱳ ᱧᱟᱨᱟᱜ ᱧᱟᱨᱟᱜ ᱮ ᱦᱚᱦᱚ ᱭᱮᱫᱼᱟ “ᱦᱮ ᱟᱹᱫᱤᱢ ᱛᱚᱲᱮ ᱯᱩᱠᱷᱨᱤ ᱨᱮ ᱱᱟᱲ ᱠᱟ ᱵᱚᱦᱮᱞ ᱠᱟᱛᱮ ᱵᱟᱦᱟ ᱵᱟᱸᱫᱮᱞᱟ ᱨᱮ ᱟᱵ ᱯᱷᱟᱨᱪᱟ ᱠᱟᱛᱮ ᱫᱮ ᱠᱚᱭᱚᱜ ᱨᱩᱣᱟᱹᱲ ᱢᱮ, ᱢᱟᱨᱟᱝ ᱵᱳᱨᱳ ᱜᱚᱰ ᱡᱚᱦᱟᱨᱟᱭ ᱢᱮ ᱟᱢᱟᱜ ᱥᱟᱱᱟᱢᱟᱜ ᱮ ᱮᱢ ᱨᱩᱣᱟᱹᱲ ᱠᱟᱜ ᱞᱟᱹᱜᱤᱫ ᱛᱮ ᱢᱤᱫ ᱡᱟᱸᱜᱟ ᱞᱟᱦᱟ ᱠᱟᱛᱮ ᱵᱟᱨ ᱛᱤ ᱛᱮᱭ ᱥᱮᱯᱮᱧ ᱟᱠᱟᱫᱼᱟ, ᱟᱛᱟᱝ ᱫᱤᱲᱦᱚᱜ ᱢᱮ ᱡᱚᱛᱚᱣᱟᱜ ᱮᱢ ᱧᱟᱢ ᱨᱩᱣᱟᱹᱲᱟ᱾
“ᱥᱮᱫᱟᱭ ᱦᱟᱯᱟᱲᱟᱢ ᱠᱚ ᱥᱚᱛ ᱫᱷᱚᱨᱚᱢ ᱨᱮᱠᱚ ᱛᱟᱸᱦᱮ ᱠᱟᱱ ᱥᱟᱨᱡᱚᱢ ᱫᱟᱨᱮ ᱨᱚᱦᱚᱭ ᱡᱤᱣᱤᱫ ᱠᱟᱛᱮ ᱵᱚᱸᱜᱟ ᱵᱳᱨᱳ ᱜᱮᱠᱚ ᱥᱮᱵᱟ ᱞᱮᱫ ᱠᱚᱛᱮ ᱨᱚᱜᱽ ᱵᱤᱜᱷᱤᱱ ᱡᱚᱛᱚ ᱪᱟᱵᱟ ᱞᱮᱱ, ᱨᱮᱸᱜᱮᱡ ᱛᱮᱛᱟᱝ ᱫᱮᱭᱟ ᱞᱮᱱ, ᱵᱚᱸᱜᱟ ᱵᱩᱨᱩ ᱜᱮᱠᱚ ᱮᱨᱮᱲ ᱞᱮᱫᱼᱫᱚ᱾”
ᱥᱮᱛᱟᱜ ᱥᱤᱥᱤᱨᱫᱟᱜ ᱪᱟᱹᱛ ᱵᱟᱹᱭᱠᱥᱟᱹᱠ ᱡᱟᱹᱲᱤ
ᱵᱟᱝ ᱮ ᱛᱟᱺᱜᱤ ᱢᱮᱭᱟ ᱟᱹᱰᱤ ᱜᱷᱟᱹᱲᱤ᱾
ᱡᱟᱹᱛᱤ ᱥᱟᱶᱛᱟ ᱥᱩᱛᱩᱜ ᱠᱟᱛᱮ ᱟᱹᱠᱤᱞ ᱵᱟᱹᱛᱤ ᱡᱮᱨᱮᱫ ᱠᱟᱛᱮ
ᱫᱮᱞᱟ ᱵᱚᱱ ᱦᱳ ᱫᱮᱞᱟ ᱵᱚᱱ
ᱟᱹᱫᱤᱢ ᱥᱟᱱᱛᱟᱲ ᱥᱩᱞᱩᱠᱚᱜ ᱥᱟᱹᱨᱤ ᱜᱟᱶᱛᱟ ᱛᱮ᱾
ᱦᱩᱰᱤᱧ ᱦᱟᱯᱲᱟᱜ ᱥᱟᱱᱟᱢ ᱦᱚᱲ ᱛᱮ
ᱦᱟᱨᱟ ᱵᱩᱨᱩ ᱭᱟᱵᱚᱱ ᱡᱚᱛ ᱠᱚᱛᱮ᱾
ᱱᱮᱣᱛᱟ ᱮᱱᱟᱯᱮ ᱡᱩᱨᱤ ᱯᱟᱹᱨᱤ ᱥᱟᱱᱟᱢ ᱠᱚᱲᱟ ᱠᱩᱲᱤ
ᱟᱞᱚᱯᱮ ᱯᱩᱪᱩᱡ ᱱᱚᱝᱠᱟᱱ ᱥᱟᱹᱜᱩᱱ ᱠᱷᱟᱹᱲᱤ᱾
ᱜᱩᱱᱟᱹᱱ ᱢᱟᱹᱱᱟᱱ ᱥᱟᱱᱟᱢ ᱥᱩᱵᱩᱫᱤᱭᱟᱹ
ᱱᱮᱦᱚᱨᱮᱫ ᱯᱮᱭᱟᱹᱧ ᱤᱧ ᱞᱤᱪᱟᱹᱲ ᱞᱟᱹᱣᱲᱤᱭᱟᱹ᱾
Written by ᱦᱚᱨᱤ ᱯᱚᱫᱚ ᱢᱩᱨᱢᱩ
Published on Arsi (ᱢᱟᱜᱽ – ᱪᱟᱹᱛ, 2013)
ᱢᱚᱱᱮ ᱨᱮᱭᱟᱜ ᱠᱟᱛᱷᱟ ᱯᱷᱚᱴᱮᱞ ᱥᱚᱫᱚᱨ ᱢᱮ !