ᱫᱟᱸᱥᱟᱭ ᱫᱚ ᱫᱟᱜ ᱥᱟᱭ ᱠᱷᱚᱱ ᱜᱮ ᱯᱟᱞᱮᱱ ᱦᱩᱭ ᱟᱠᱟᱱᱟ᱾ ᱫᱚᱥᱟᱨ ᱠᱟᱛᱷᱟ ᱛᱮᱫᱚ ᱫᱟᱸᱥᱟᱭ ᱢᱮᱱ ᱞᱮᱠᱷᱟᱱ ᱫᱚ ᱠᱚᱭ ᱥᱮ ᱠᱚᱜᱠᱚᱭ ᱠᱟᱱᱟ᱾ ᱵᱟᱱᱟᱨ ᱢᱮᱱᱮᱛ ᱜᱮ ᱥᱚᱡᱷᱮ ᱜᱮᱭᱟ ᱟᱨ ᱵᱟᱱᱟᱨ ᱜᱮ ᱡᱚᱛᱷᱟᱛ ᱜᱮᱭᱟ᱾ ᱫᱟᱸᱥᱟᱭ ᱯᱟᱨᱟᱵ ᱥᱮ ᱫᱟᱸᱥᱟᱭ ᱫᱟᱸᱲᱟᱱ ᱫᱚ ᱫᱟᱸᱥᱟᱭ ᱪᱟᱸᱫᱚ ᱵᱟᱞᱮ ᱢᱩᱞᱩᱜ ᱦᱤᱞᱚᱜ ᱠᱷᱚᱱ ᱮᱭᱟᱭ ᱢᱟᱦᱟ ᱢᱟᱱᱟᱣ ᱜᱮ ᱡᱚᱛᱷᱟᱛᱟ᱾ ᱫᱟᱸᱥᱟᱭ ᱨᱮᱫᱚ ᱵᱟᱹᱲᱛᱤ ᱠᱟᱨ ᱛᱮ ᱵᱷᱩᱣᱟᱹᱝ ᱜᱮ ᱵᱮᱵᱷᱟᱨ ᱫᱚ ᱟᱹᱰᱤ ᱵᱮᱥ ᱚᱜᱼᱟ ᱟᱞᱮᱱ᱾ ᱢᱮᱱᱠᱷᱟᱱ ᱵᱷᱩᱣᱟᱹᱝ ᱫᱚ ᱢᱟᱞᱚᱴ ᱤᱫᱤᱜ ᱠᱟᱱᱟ ᱟᱹᱰᱤ ᱵᱟᱹᱲᱤᱡ ᱜᱮ ᱯᱟᱞᱮᱭ ᱦᱩᱭᱩᱜ ᱠᱟᱱᱟ᱾ ᱫᱟᱸᱥᱟᱭ ᱫᱚ ᱟᱹᱰᱤ ᱨᱟᱹᱥᱠᱟᱹ ᱨᱮᱭᱟᱜ ᱯᱟᱨᱟᱵ ᱫᱚ ᱵᱟᱝ ᱠᱟᱱᱟ ᱢᱮᱱ ᱫᱚ ᱫᱩᱠᱼᱦᱟᱨᱠᱮᱛᱼᱟᱸᱯᱟᱸᱜᱤᱨ ᱡᱟᱞᱟ ᱥᱮ ᱢᱟᱯᱟᱜᱼᱜᱚᱯᱚᱡ ᱨᱮᱭᱟᱜ ᱯᱟᱨᱟᱵ ᱠᱟᱱᱟ᱾ ᱟᱹᱰᱤ ᱦᱚᱲ ᱟᱹᱰᱤ ᱴᱷᱟᱶ ᱨᱮ ᱫᱤᱵᱤᱼᱫᱩᱨᱜᱟᱹ ᱫᱩᱨᱜᱟᱹ ᱯᱩᱡᱟᱹ ᱥᱟᱶ ᱛᱩᱞᱩᱡ ᱠᱟᱛᱮ ᱜᱮᱞ ᱢᱟᱦᱟᱸ ᱫᱷᱟᱹᱵᱤᱡ ᱠᱚ ᱫᱟᱸᱲᱟᱱ ᱠᱟᱱᱟ ᱩᱱᱟᱜ ᱫᱚ ᱵᱟᱝ ᱡᱩᱛᱩᱜ ᱠᱟᱱ ᱞᱮᱠᱟ ᱤᱧ ᱫᱚᱧ ᱵᱩᱡᱷᱟᱹᱣ ᱮᱫᱼᱟ᱾
ᱥᱮᱫᱟᱭ ᱢᱟ ᱡᱩᱜᱽ ᱨᱮ ᱛᱤᱥ ᱨᱮᱪᱚᱝ ᱱᱤᱨᱚᱲᱼᱵᱷᱚᱲ ᱥᱟᱱᱛᱟᱲ ᱠᱚ ᱛᱟᱞᱟ ᱨᱮ ᱵᱟᱝᱫᱚ ᱟᱹᱨᱡᱚ ᱠᱚ ᱵᱟᱝ ᱫᱚ ᱛᱩᱲᱩᱠ ᱠᱚᱠᱚ ᱵᱚᱞᱚ ᱮᱱᱟ ᱟᱨ ᱥᱟᱱᱛᱟᱲ ᱪᱮᱱᱨᱟ ᱥᱮ ᱫᱟᱲᱮ ᱠᱩᱲᱤ ᱜᱮᱠᱚ ᱟᱹᱜᱤᱨ ᱞᱮᱫ ᱠᱚᱣᱟ᱾ ᱚᱱᱠᱟᱱᱟᱜ ᱡᱷᱚᱴᱚᱱ ᱞᱮᱠᱟᱛᱮ ᱜᱮ ᱟᱭᱱᱚᱢᱼᱠᱟᱡᱚᱞ ᱫᱟᱜᱞᱩ ᱪᱮᱦᱨᱟ ᱥᱟᱱᱛᱟᱲ ᱠᱩᱲᱤ ᱠᱤᱱᱫᱚ ᱫᱤᱠᱩ ᱠᱚᱚ ᱟᱹᱛᱠᱤᱨ ᱞᱟᱜ ᱠᱤᱱᱟ᱾ ᱚᱱᱟ ᱚᱠᱛᱚ ᱨᱮ ᱟᱹᱰᱤ ᱜᱮᱭ ᱫᱟᱜ ᱡᱟᱹᱯᱩᱫ ᱠᱮᱫᱼᱟ᱾ ᱜᱟᱰᱟᱼᱢᱩᱰᱩ ᱠᱚ ᱵᱟᱱ ᱮᱱᱟ᱾ ᱵᱟᱝ ᱠᱚ ᱯᱤᱠᱨᱟᱹ ᱫᱟᱲᱮ ᱟᱫ ᱠᱤᱱᱟ᱾ ᱢᱮᱱᱠᱷᱟᱱ ᱥᱟᱱᱛᱟᱲ ᱠᱚᱲᱟ ᱫᱤᱵᱤ ᱟᱨ ᱫᱩᱨᱜᱟᱹ ᱠᱩᱲᱤ ᱫᱚ ᱟᱭᱚᱱᱼᱠᱟᱡᱚᱞ ᱫᱩᱜ ᱠᱤᱱ ᱞᱟᱹᱜᱤᱫ ᱟᱹᱠᱤᱱ ᱦᱚᱸ ᱟᱹᱠᱤᱱᱟᱜ ᱡᱤᱣᱤ ᱠᱤᱱ ᱟᱞᱟᱭ ᱞᱟᱜᱼᱟ᱾ ᱚᱱᱟ ᱛᱮ ᱫᱟᱜ ᱡᱟᱯᱩᱫ ᱪᱟᱵᱟ ᱛᱟᱭᱚᱢ ᱥᱟᱱᱛᱟᱲ ᱵᱤᱨ ᱵᱟᱫᱚᱞᱤ ᱠᱚ ᱵᱷᱩᱣᱟᱹᱝ ᱞᱮᱠᱟᱛᱮ ᱟᱜᱼᱥᱟᱨᱼᱠᱟᱹᱯᱤᱼᱛᱟᱨᱣᱟᱲᱮ ᱥᱟᱯᱟᱵ ᱠᱚ ᱥᱟᱯᱲᱟᱣ ᱠᱟᱛᱮ ᱩᱱᱠᱩ ᱟᱭᱚᱱᱼᱠᱟᱡᱚᱞ ᱫᱤᱵᱤ ᱫᱩᱨᱜᱟᱹ ᱮᱢᱟᱱ ᱠᱚ ᱯᱟᱱᱛᱮ ᱞᱟᱹᱜᱤᱫ ᱛᱮ ᱚᱲᱟᱜᱼᱚᱲᱟᱜ, ᱫᱩᱣᱟᱹᱨᱼᱫᱩᱣᱟᱹᱨ, ᱟᱹᱛᱩᱼᱟᱹᱛᱩ ᱫᱤᱥᱚᱢᱼᱫᱤᱥᱚᱢ ᱜᱩᱜᱩ ᱪᱮᱜᱟ ᱠᱚᱲᱟ ᱠᱚ ᱠᱚ ᱫᱟᱸᱲᱟ ᱞᱟᱜᱼᱟ᱾ ᱢᱮᱱᱠᱷᱟᱱ ᱵᱟᱝ ᱠᱚ ᱧᱟᱢ ᱞᱟᱜ ᱠᱚᱣᱟ᱾ ᱟᱠᱚᱣᱟᱜ ᱮᱱᱮᱡᱼᱥᱮᱨᱮᱧ ᱛᱟᱞᱟᱛᱮ ᱰᱩᱠ ᱦᱟᱨᱠᱮᱛ ᱨᱮᱭᱟᱜ ᱵᱷᱟᱵ ᱜᱮᱠᱚ ᱥᱚᱫᱚᱨ ᱟᱠᱟᱫᱼᱟ᱾ ᱫᱟᱸᱥᱟᱭ ᱫᱚ ᱫᱚᱞ ᱛᱮ ᱫᱚᱞ ᱠᱚ ᱮᱱᱮᱡᱼᱥᱮᱨᱮᱧᱟ, ᱚᱠᱞᱟᱼᱫᱩᱞᱟᱹ ᱫᱚ ᱵᱟᱝ ᱜᱮ᱾ ᱱᱟᱦᱟᱜ ᱫᱚ ᱦᱚᱲ ᱠᱚ ᱪᱮᱫ ᱠᱚ ᱵᱷᱟᱹᱵᱤ ᱠᱟᱛᱮ ᱪᱚᱝ ᱫᱟᱸᱥᱟᱭ ᱮᱱᱮᱡᱼᱥᱮᱨᱮᱧ ᱫᱚ ᱠᱚ ᱦᱤᱲᱤᱧ ᱤᱫᱤ ᱮᱫᱼᱟ ᱟᱨ ᱟᱵᱚᱣᱟᱜ ᱥᱮᱫᱟᱭ ᱢᱟᱨᱮ ᱮᱱᱮᱡᱼᱥᱮᱨᱮᱧ ᱢᱟᱨᱮ ᱞᱮᱜᱪᱟᱨ ᱵᱚ ᱵᱟᱹᱜᱤ ᱟᱫ ᱩᱛᱟᱹᱨ ᱮᱫᱼᱟ᱾ ᱚᱱᱟᱛᱮ ᱤᱧᱟᱜ ᱱᱮᱦᱚᱨ ᱡᱚᱛᱚ ᱠᱚᱛᱮ ᱵᱚ ᱵᱟᱧᱪᱟᱣ ᱵᱚ ᱨᱤᱠᱟᱹᱭ ᱢᱟ᱾
ᱫᱟᱸᱥᱟᱭ ᱨᱮ ᱚᱠᱟ ᱵᱷᱩᱣᱟᱹᱝ ᱟᱥᱚᱞ ᱨᱩᱜ ᱨᱩ ᱥᱟᱯᱟᱵ ᱚᱠᱟ ᱵᱮᱵᱦᱟᱨᱚᱜ ᱠᱟᱱᱟ ᱚᱱᱟ ᱫᱚ ᱫᱩᱱᱤᱭᱟᱹ ᱡᱟᱠᱟᱛ ᱨᱮᱭᱟᱜ ᱡᱚᱛᱚ ᱠᱷᱚᱱ ᱢᱟᱨᱮ ᱨᱩᱜᱨᱩ ᱡᱤᱱᱤᱥ ᱢᱮᱱᱛᱮ ᱢᱟᱱᱴᱷᱟᱣ ᱮ ᱧᱟᱢ ᱟᱠᱟᱫᱼᱟ᱾ ᱩᱱᱟᱹᱜ ᱜᱚᱨᱚᱵ ᱢᱟᱹᱱ ᱧᱟᱢ ᱠᱟᱛᱮ ᱦᱚᱸ ᱟᱹᱰᱤ ᱫᱚ ᱚᱱᱟ ᱢᱟᱹᱱ ᱚᱱᱟ ᱢᱚᱦᱚᱛ ᱵᱟᱝ ᱵᱚ ᱯᱚᱨᱚᱠ ᱠᱮ ᱠᱟᱱᱟ᱾
ᱫᱟᱸᱥᱟᱭ ᱨᱮᱫᱚ ᱮᱱᱮᱡ ᱟᱨ ᱥᱮᱨᱮᱧ ᱛᱟᱞᱟ ᱛᱮ ᱯᱟᱱᱛᱮ ᱨᱮᱭᱟᱜ ᱮᱱᱮᱡᱼᱥᱮᱨᱮᱧ ᱠᱟᱱᱟ᱾ ᱥᱟᱶᱛᱮ ᱠᱚᱭ ᱤᱫᱤ ᱦᱚᱸ ᱠᱟᱱᱟ᱾ ᱫᱟᱸᱥᱟᱭ ᱠᱚᱲᱟ ᱫᱚ ᱥᱮᱫᱟᱭ ᱨᱤᱱ ᱜᱩᱨᱩ ᱪᱮᱞᱟ ᱠᱚ ᱟᱹᱰᱤ ᱢᱚᱦᱚᱛ ᱠᱚ ᱮᱢᱟ ᱦᱟᱜ ᱠᱟᱱ ᱛᱟᱦᱮᱸᱜ᱾ ᱱᱩᱠᱩ ᱫᱚ ᱨᱟᱱᱼᱢᱩᱨᱜᱟᱹᱱ ᱜᱩᱱ ᱵᱤᱨᱫᱟᱹ ᱮᱢᱟᱱ ᱠᱚᱦᱚᱸ ᱠᱚ ᱵᱟᱰᱟᱭ ᱠᱟᱱ ᱛᱟᱦᱮᱸᱜ ᱠᱟᱱᱟ᱾ ᱚᱱᱟᱛᱮ ᱫᱟᱸᱥᱟᱭ ᱫᱟᱲᱟᱱ ᱚᱠᱛᱚ ᱜᱩᱨᱩ ᱠᱚᱣᱟᱜ ᱥᱮ ᱪᱮᱞᱟ ᱠᱚᱲᱟ ᱠᱚᱣᱟᱜ ᱜᱩᱱᱼᱵᱤᱨᱫᱟ ᱠᱚᱦᱚᱸ ᱠᱚ ᱪᱟᱯᱟᱞᱟᱣ ᱯᱚᱨᱚᱠᱚᱜ ᱠᱟᱱ ᱛᱟᱦᱮᱸ ᱠᱟᱱᱟ᱾
ᱫᱟᱸᱥᱟᱭ ᱠᱚᱲᱟ ᱠᱚᱫᱚ ᱠᱚᱭ ᱫᱚᱠᱚ ᱮᱢᱟ ᱦᱟᱠᱚ ᱜᱮᱭᱟ᱾ ᱚᱠᱛᱚ ᱡᱟᱹᱱᱤ ᱫᱚ ᱫᱟᱠᱟ ᱫᱟᱜ ᱢᱟᱹᱰᱤ ᱟᱨ ᱧᱤᱫᱟᱹ ᱵᱟᱥᱟᱜ ᱴᱷᱟᱶ ᱦᱚᱸᱠᱚ ᱟᱲᱟᱜ ᱟᱠᱚ ᱜᱮᱭᱟ ᱫᱟᱸᱥᱟᱭ ᱜᱩᱨᱩᱼ ᱪᱮᱞᱟ ᱠᱚᱲᱟ ᱠᱚᱫᱚ ᱮᱭᱟᱭ ᱢᱟᱦᱟ ᱨᱮᱜᱮ ᱟᱟᱹᱰᱤ ᱢᱟᱨᱟᱝ ᱴᱷᱟᱣ ᱛᱮᱠᱚ ᱢᱟᱰᱨᱟᱣ ᱯᱟᱱᱛᱮ ᱟᱹᱪᱩᱨ ᱠᱟᱱ ᱜᱮᱭᱟ᱾
ᱫᱟᱸᱥᱟᱭ ᱫᱚ ᱵᱟᱦᱟᱼᱥᱚᱦᱨᱟᱭ ᱛᱟᱞᱟ ᱨᱮ ᱨᱟᱹᱥᱠᱟᱹ ᱫᱩᱠᱼᱦᱚᱢᱚᱨ ᱮᱱᱮᱡᱼᱥᱮᱨᱮᱧ ᱛᱟᱞᱟᱛᱮ ᱢᱟᱱᱟᱣ ᱨᱮᱭᱟᱜ ᱡᱟᱭᱡᱩᱜ ᱨᱤᱠᱟᱹᱵᱚ ᱫᱚᱚᱭ ᱢᱟ᱾
ᱟᱰᱤ ᱟᱰᱤ ᱥᱟᱨᱦᱟᱣ ,
ᱱᱩᱠᱩ ᱵᱩᱨᱩ ᱪᱮᱠᱟ ᱫᱤᱥᱚᱢ ᱫᱤᱥᱚᱢ ᱨᱮ ᱜᱩᱱ ᱵᱤᱨᱫᱟ ᱨᱟᱱ ᱢᱩᱨᱜᱟ.ᱱ ᱠᱚ ᱯᱟᱥᱱᱟᱣ ᱭᱮᱫ ᱟᱫᱚ ᱜᱩᱨᱩ ᱠᱚᱫᱚ
ᱚᱠᱚᱭ ᱠᱚᱠᱚ ᱛᱟᱦᱮᱸ ᱠᱟᱱᱟ ᱠᱟᱴᱤᱡ ᱞᱟᱭ ᱠᱮᱠᱷᱟᱱ ᱵᱤᱱ ᱟ-ᱰᱤ ᱱᱟᱯᱟᱭ ᱠᱚ-ᱟ ᱾