ᱫᱩᱜᱽᱫᱟᱹ ᱦᱟᱲᱟᱢᱟᱜ ᱨᱟᱜ ᱢᱮᱥᱟ ᱞᱟᱸᱫᱟ

ᱡᱩᱨᱤ ᱯᱟᱹᱨᱤ ᱥᱩᱞᱩᱠ ᱥᱟᱹᱜᱟᱭ ᱛᱟᱦᱮᱱ ᱠᱷᱟᱱ ᱫᱚ ᱜᱷᱟᱸᱨᱚᱸᱡᱽ ᱨᱮᱱᱟᱝ ᱠᱟᱢᱤ ᱦᱟᱨᱟ ᱠᱚ ᱵᱩᱫᱷᱤ ᱵᱚᱨᱥᱟ ᱠᱚ ᱜᱚᱲᱚ ᱜᱚᱯᱚᱲ ᱟᱛᱮᱭ ᱠᱟᱹᱢᱤᱭᱟ᱾ ᱫᱩᱠ ᱢᱩᱦᱤᱢ ᱨᱮᱸᱜᱮᱡ ᱛᱮᱛᱟᱝ ᱨᱩᱣᱟᱜ ᱦᱟᱥᱩᱜ ᱠᱚᱨᱮ ᱠᱩᱯᱩᱞᱤ ᱛᱚᱞᱟᱥ ᱛᱟᱦᱮᱸᱱᱟ᱾ ᱥᱤᱛᱩᱝ ᱞᱚᱞᱚ ᱞᱟᱸᱜᱟ ᱨᱟᱲᱮᱡ ᱡᱟᱦᱟᱸ ᱥᱮᱫ ᱠᱷᱚᱱᱮᱢ ᱦᱮᱡ ᱜᱚᱫᱚᱜ ᱟ, ᱡᱩᱨᱤ ᱛᱟᱢᱮ ᱞᱟᱸᱫᱟ ᱠᱟᱛᱮᱭ ᱨᱚᱲ ᱫᱟᱨᱟᱢ ᱟᱢ ᱠᱷᱟᱱᱮ ᱞᱟᱸᱜᱟ ᱦᱚᱲᱢᱚ ᱟᱹᱨᱩ ᱜᱚᱫᱚᱜ ᱟ, ᱜᱚᱥᱚ ᱢᱚᱱᱮ ᱡᱤᱭᱟᱹᱲ ᱨᱩᱣᱟᱹᱲᱚᱜ ᱟ᱾ ᱵᱟᱝ ᱡᱩᱨᱤ ᱭᱟᱱ ᱦᱚᱲ ᱠᱚᱣᱟᱜ ᱡᱤᱣᱤ ᱫᱚ ᱛᱟᱨᱟ ᱠᱚᱬ ᱯᱷᱟᱫᱟ ᱜᱮᱭᱟ ᱮᱠᱞᱟ ᱛᱮᱫᱚ ᱚᱲᱟᱜ ᱫᱩᱣᱟᱨ ᱨᱮᱱᱟᱝ ᱩᱭᱦᱟᱹᱨ ᱵᱷᱟᱵᱽᱱᱟ ᱵᱟᱝ ᱜᱮ ᱛᱤᱭᱩᱜᱚᱜ ᱟ᱾ ᱫᱩᱜᱽᱫᱟ ᱦᱟᱲᱟᱢ ᱦᱚᱸ ᱡᱩᱨᱤ ᱫᱚᱭ ᱡᱩᱨᱤ ᱭᱟᱱ ᱛᱟᱦᱮᱸ ᱠᱟᱱ ᱜᱮᱭᱟ᱾ ᱢᱮᱱ ᱠᱷᱟᱱ ᱚᱠᱚᱭᱟᱜ ᱠᱚᱯᱟᱲ ᱞᱤᱠᱷᱚᱱ ᱚᱠᱟ ᱞᱮᱠᱟ ᱚᱞ ᱠᱚᱜ ᱟ ᱵᱟᱝ ᱜᱮ ᱞᱟᱹᱭᱩᱜᱚᱜ ᱟ᱾ ᱫᱚᱝ ᱥᱮᱨᱮᱧ ᱠᱟᱛᱷᱟ ᱞᱮᱠᱟ ᱺᱼ

ᱱᱤᱛ ᱱᱚᱜ ᱚᱭ ᱱᱚᱝᱠᱟ, ᱫᱷᱤᱱᱟᱹᱝ ᱛᱚᱠᱟ ᱞᱮᱠᱟ
ᱡᱤᱣᱤ ᱨᱮᱱᱟᱝ ᱠᱟᱛᱷᱟ, ᱵᱟᱝ ᱜᱮ ᱨᱚᱲᱚᱜ ᱟ᱾

ᱨᱟᱠᱟᱵ ᱪᱟᱸᱫᱚᱭ ᱦᱟᱹᱥᱩᱨ ᱨᱩᱣᱟᱹᱲ ᱮᱱ ᱞᱮᱠᱟ ᱫᱩᱜᱽᱫᱟᱹ ᱦᱟᱲᱟᱢ ᱡᱩᱨᱤ ᱛᱟᱭ ᱫᱚᱭ ᱦᱟᱹᱥᱨ ᱵᱟᱹᱜᱤ ᱟᱠᱟᱣᱟᱫ ᱫᱮᱭᱟ᱾ ᱱᱤᱛ)ᱚᱝ ᱚᱲᱟᱜ ᱫᱩᱣᱟᱹᱨ ᱪᱟᱼᱪᱟᱞᱟᱣ ᱨᱮᱭᱼ ᱮᱠᱞᱟ ᱟᱠᱟᱱᱟ, ᱢᱟᱬᱟᱝ ᱞᱮᱠᱟ ᱩᱭᱦᱟᱹᱨ ᱫᱟᱲᱮ ᱵᱟᱝ ᱦᱤᱡᱩᱜ ᱠᱟᱱᱟ᱾ ᱟᱨ ᱱᱚᱴᱮ ᱵᱟᱹᱭᱼᱵᱟᱹᱭ ᱛᱮ ᱦᱚᱲᱢᱚ ᱫᱟᱲᱮ ᱠᱚᱦᱚᱸ ᱠᱚᱢ ᱤᱫᱤᱜ ᱠᱟᱱᱟ᱾ ᱮᱠᱞᱟ ᱛᱚᱠᱞᱟ ᱠᱚᱨᱮ ᱢᱤᱼᱢᱤᱫ ᱫᱷᱟᱹᱣ ᱫᱚ ᱦᱟᱸᱬᱟ ᱦᱩᱯᱩᱡ ᱫᱩᱲᱩᱵ ᱛᱷᱤᱨ ᱠᱟᱛᱮ ᱡᱩᱨᱤ ᱭᱟᱜ ᱠᱟᱛᱷᱟᱭ ᱩᱭᱦᱟᱹᱨᱟ᱾ ᱡᱟᱣ ᱫᱚᱭ ᱛᱟᱦᱮᱸ ᱠᱟᱱ ᱫᱚ ᱤᱧ ᱚᱠᱟ ᱵᱟᱹᱧ ᱩᱭᱦᱟᱹᱨ ᱮᱴᱮᱨ ᱞᱮᱫ ᱟ, ᱟᱡ ᱚᱱᱟᱭ ᱩᱭᱦᱟᱹᱨ ᱥᱮᱴᱮᱨ ᱞᱮᱫ ᱟ᱾ ᱤᱧ ᱚᱠᱟ ᱵᱟᱹᱧ ᱠᱟᱹᱢᱤ ᱜᱟᱱ ᱞᱮᱜ ᱟ, ᱟᱡ ᱮ ᱠᱟᱹᱢᱤ ᱜᱟᱱ ᱞᱮᱜ ᱟ, ᱱᱚᱝᱠᱟᱭ ᱩᱭᱦᱟᱹᱨ ᱵᱟᱲᱟᱭᱟ᱾ ᱫᱩᱜᱽᱫᱟᱹ ᱱᱤᱛ ᱵᱟᱝ ᱚᱠᱚᱭ ᱥᱟᱶ ᱮ ᱨᱚᱲ ᱞᱟᱸᱫᱟᱭᱟ ᱡᱩᱨᱤ ᱢᱟᱛᱟᱭ ᱵᱟᱹᱱᱩᱜᱤᱡ ᱦᱟᱨᱟ ᱦᱚᱯᱚᱱ ᱡᱩᱣᱹᱟᱱ ᱠᱚᱲᱟ “ᱠᱚᱨᱚ” ᱢᱮᱱᱟᱭ ᱫᱚ ᱢᱮᱱᱟᱭ ᱜᱮᱭᱟ ᱠᱩᱲᱤ ᱥᱟᱶ ᱨᱚᱲ ᱞᱟᱸᱫᱟ ᱨᱮᱱᱟᱝ ᱥᱤᱵᱤᱞ ᱵᱷᱤᱱᱟᱹ ᱜᱮᱭᱟ ᱟᱨ ᱡᱩᱨᱤ ᱥᱟᱶ ᱨᱚᱲ ᱞᱟᱸᱫᱟ ᱨᱮᱱᱟᱝ ᱥᱤᱵᱤᱞ ᱵᱷᱤᱱᱟᱹ ᱜᱮ ᱟᱹᱭᱠᱟᱹᱣᱜ ᱟ᱾ ᱫᱩᱜᱽᱫᱟᱹ ᱦᱟᱲᱟᱢ ᱟᱫᱚᱭ ᱟᱪᱟᱨ ᱵᱤᱪᱟᱹᱨ ᱵᱟᱲᱟ ᱠᱮᱫ ᱟ ᱱᱤᱛᱚᱜ ᱫᱚ ᱦᱚᱯᱚᱱᱤᱧ ᱵᱟᱯᱞᱟ ᱞᱮᱠᱷᱟᱱ ᱠᱤᱢᱤᱱᱤᱧ ᱥᱟᱶ ᱟᱹᱠᱤᱱ ᱡᱚᱠᱷᱟ ᱠᱟᱹᱢᱤ ᱟᱹᱠᱤᱱ ᱠᱤᱱ ᱧᱮᱞᱟ, ᱱᱚᱝᱠᱟᱭ ᱩᱭᱦᱟᱹᱨ ᱵᱟᱲᱟ ᱠᱮᱫ ᱛᱮ ᱫᱩᱜᱽᱫᱟᱹ ᱠᱚᱨᱚ ᱵᱟᱹᱵᱩ ᱵᱟᱠᱷᱨᱟ ᱥᱩᱨ ᱥᱟᱺᱜᱤᱧ ᱟᱹᱛᱩ ᱠᱷᱚᱱ ᱢᱤᱫ “ᱵᱟᱦᱟ” ᱧᱩᱛᱩᱢᱟᱱ ᱠᱩᱲᱤ ᱥᱟᱶ ᱠᱚ ᱵᱟᱯᱞᱟ ᱠᱟᱫᱮᱭᱟ᱾ ᱫᱩᱜᱽᱫᱟᱹ ᱦᱟᱲᱟᱢ ᱠᱤᱢᱤᱱ ᱫᱚᱭ ᱧᱟᱢ ᱠᱮᱫᱮᱭᱟ ᱤᱠᱷᱟᱹᱱ “ᱵᱟᱦᱟ” ᱫᱚᱭ ᱠᱩᱪᱤ ᱩᱢᱟᱹᱨ ᱠᱩᱲᱤ ᱜᱤᱫᱽᱨᱟᱹ ᱠᱟᱱᱟ᱾ᱫᱩᱜᱽᱫᱟᱹ ᱦᱟᱲᱟᱢ ᱫᱤᱥᱚᱢ ᱫᱟᱬᱟᱱ ᱡᱟᱸᱜᱟ ᱠᱚᱭ ᱠᱷᱟᱴᱚ ᱜᱮᱛᱮ ᱟᱨ ᱡᱟᱦᱟᱸ ᱥᱮᱫ ᱵᱟᱭ ᱫᱟᱬᱟ ᱞᱮᱜ ᱟ᱾ “ᱵᱟᱦᱟ” ᱮᱸᱜᱟᱛ ᱟᱯᱟᱛ ᱠᱚ ᱨᱮᱵᱮᱱ ᱮᱱ ᱛᱟᱭᱚᱢ ᱥᱟᱹᱜᱩᱱ ᱧᱮᱞ ᱠᱟᱛᱮ ᱱᱚᱰᱮ ᱜᱮᱭ ᱥᱟᱨ ᱥᱟᱹᱜᱩᱱ ᱠᱮᱜ ᱟ, ᱟᱨ “ᱠᱚᱨᱚ “ ᱵᱟᱹᱵᱩ ᱦᱚ ᱸᱟᱨ ᱪᱮᱫ ᱵᱟᱝ ᱮ ᱢᱮᱱ, ᱵᱟᱵᱟ ᱡᱚᱠᱷᱚᱱᱮ ᱠᱩᱥᱤ ᱟᱠᱟᱱ ᱵᱟᱝ ᱮ ᱢᱮᱱ ᱞᱮᱠᱷᱟᱱ ᱢᱟ ᱵᱟᱝ ᱜᱟᱱᱚᱜ ᱟ᱾ ᱵᱯᱷᱩᱴᱩᱜ ᱵᱟᱦᱟ ᱨᱮᱦᱚᱸ ᱦᱟᱛᱟᱣ ᱛᱮᱜᱮ ᱦᱩᱭ ᱟᱭ ᱠᱟᱱᱟ, ᱟᱠᱤᱱ ᱚᱲᱟᱜ ᱨᱮ ᱟᱭᱚ ᱦᱚᱲ ᱜᱮ ᱵᱟᱹᱱᱩᱜ ᱠᱚᱣᱟ᱾ ᱡᱚᱛᱚᱣᱟᱜ ᱠᱟᱹᱢᱤ ᱟᱹᱠᱤᱱ ᱜᱮᱠᱤᱱ ᱠᱟᱹᱢᱤ ᱮᱫ ᱟ᱾ ᱤᱠᱷᱟᱹᱱ“ᱵᱟᱦᱟ” ᱫᱚ ᱠᱩᱪᱤ ᱩᱢᱟᱹᱨ ᱠᱩᱲᱤ ᱠᱟᱱ ᱨᱮᱦᱚᱸᱭ ᱟᱸᱜᱟ ᱢᱟᱨᱥᱟᱞ ᱛᱚᱨᱟ ᱠᱷᱚᱱ ᱥᱸᱜᱟᱹᱲ ᱫᱷᱟᱹᱵᱤᱡᱟᱜ ᱚᱠᱟ ᱠᱟᱹᱢᱤ ᱦᱚᱸ ᱵᱟᱭ ᱮᱛᱚᱢᱟ᱾ “ᱵᱟᱦᱟ” ᱦᱟᱜ ᱠᱟᱢ ᱠᱟᱡᱽ ᱧᱮᱞ ᱛᱮ ᱫᱩᱜᱽᱫᱟ ᱦᱟᱲᱟᱢ ᱫᱚᱭ ᱠᱩᱥᱤ ᱡᱚᱝ ᱠᱟᱱᱟ, ᱵᱷᱟᱹᱜᱤ ᱠᱤᱢᱤᱱ ᱜᱤᱧ ᱧᱟᱢ ᱟᱠᱟᱫ ᱫᱮᱭᱟ ᱢᱮᱱ ᱛᱮ᱾ ᱢᱮᱱᱫᱚ, “ᱠᱚᱨᱚ” ᱵᱟᱹᱵᱩ ᱫᱚ ᱠᱩᱪᱤ ᱠᱩᱲᱤ ᱢᱮᱱᱛᱮ ᱵᱟᱭ ᱪᱮᱨᱮᱡ ᱵᱟᱲᱟ ᱮᱭᱟ, ᱫᱤᱱᱟᱹᱢ ᱜᱮ ᱥᱤᱸᱜᱟᱹᱲ ᱛᱚᱨᱟ ᱫᱟᱠᱟ ᱡᱚᱢ ᱠᱟᱛᱮ ᱰᱟᱺᱜᱽᱣᱟᱹ ᱬᱮᱞᱟ ᱡᱟᱹᱯᱤᱫ ᱮ ᱪᱟᱞᱟᱜ ᱟ᱾ ᱟᱨ ᱠᱚᱲᱟ ᱠᱚ ᱥᱟᱶ ᱦᱚᱸ ᱫᱚᱝ ᱞᱟᱸᱜᱽᱬᱮ ᱮᱱᱮᱡ ᱦᱚᱸᱭ ᱫᱟᱬᱟᱱ ᱜᱮᱭᱟ᱾“ᱵᱟᱦᱟ” ᱫᱚ ᱢᱤᱫ ᱠᱩᱴᱨᱤ ᱨᱮᱭ ᱜᱤᱛᱤᱡ ᱠᱚᱜ ᱟ, ᱛᱤᱢᱤᱱ ᱫᱤᱱ ᱪᱚ ᱟᱫᱚ ᱱᱚᱝᱠᱟ ᱛᱮ ᱯᱟᱨᱚᱢ ᱤᱫᱤ ᱭᱮᱱᱟ᱾ ᱫᱤᱱ ᱢᱟ ᱢᱤᱫ ᱥᱚᱢᱟᱱ ᱵᱟᱝ ᱜᱮ ᱛᱟᱦᱮᱸᱱᱟ, ᱚᱠᱛᱚ ᱨᱮᱱᱟᱝ ᱪᱟᱠᱟ ᱞᱮᱠᱟ ᱟᱹᱪᱨ ᱟᱠᱟ ᱜᱮ ᱛᱟᱦᱮᱸᱱ ᱠᱟᱱᱟ᱾ ᱵᱷᱩᱴᱩᱜ ᱵᱟᱦᱟ ᱦᱚᱸᱛᱚ ᱫᱤᱱ ᱦᱤᱞᱚᱜ ᱵᱷᱩᱴᱩᱜ ᱵᱟᱝᱜᱮ ᱛᱟᱦᱮᱸᱱᱟ ᱵᱷᱩᱴᱩᱜ ᱵᱟᱦᱟ ᱥᱟᱲ ᱠᱟᱛᱮ ᱨ᱙ᱟᱥᱟ ᱥᱚᱨᱚ ᱵᱚᱨᱚᱜ ᱠᱟᱱᱟ, ᱢᱮᱱᱫᱚ “ᱵᱟᱦᱟ” ᱦᱟᱜ ᱠᱩᱪᱤ ᱦᱚᱲᱢᱚ ᱯᱟᱠᱚᱲ ᱟᱠᱟᱱᱟ᱾ ᱫᱩᱞᱟᱹᱲ ᱫᱚᱨᱭᱟ ᱨᱮ ᱠᱷᱤᱞᱰᱩ ᱮᱱᱮᱡ ᱞᱟᱹᱜᱤᱫ ᱟᱹᱰᱤ ᱜᱮᱭ ᱟᱹᱠᱩ ᱯᱟᱹᱠᱩᱜ ᱠᱟᱱᱟ᱾

“ᱠᱚᱨᱚ” ᱢᱟ ᱠᱩᱪᱤ ᱩᱢᱟᱹᱨ ᱢᱮᱱᱛᱮ ᱵᱟᱭ ᱩᱥᱩᱨ ᱮᱭᱟ ᱪᱚᱜ ᱪᱮᱨᱡ, ᱟᱨ ᱱᱚᱛᱮ “ᱵᱟᱦᱟ” ᱵᱤᱞᱤ ᱠᱟᱭᱨᱟ ᱧᱮᱞᱛᱮ ᱛᱤᱱᱟᱹᱜ ᱫᱤᱱ ᱩᱞᱤᱫᱟᱜ ᱮ ᱡᱚᱨᱚᱭᱟ᱾ ᱢᱤᱫ ᱫᱤᱱ ᱫᱚ ᱞᱟᱡᱟᱣ ᱵᱚᱛᱚᱨ ᱫᱮᱭᱟ ᱠᱟᱛᱮ ᱦᱚᱧᱦᱟᱨ ᱛᱮᱫ ᱦᱟᱲᱟᱢ ᱴᱷᱮᱱᱟ ᱨᱚᱲ ᱠᱮᱜ ᱟ, “ᱦᱚᱯᱚᱱ ᱢᱮᱢᱟ ᱚᱲᱟᱜ ᱨᱮᱦᱚᱸ ᱵᱟᱭ ᱛᱟᱦᱮᱸᱱᱟ ᱟᱹᱭᱩᱵ ᱛᱚᱨᱟ ᱫᱟᱠᱟᱭ ᱡᱚᱢᱛᱮ ᱚᱠᱟ ᱠᱚᱥᱮᱫ ᱪᱚᱭ ᱪᱟᱞᱟᱜ ᱟᱹᱞᱤᱧ ᱥᱟᱶ ᱵᱩᱜᱤ ᱵᱯᱟᱹᱲᱤᱡ ᱦᱚᱸ ᱵᱟᱭ ᱜᱟᱯᱟᱞ ᱢᱟᱨᱟᱜ ᱟ᱾ ᱫᱟᱨᱟᱭ ᱦᱟᱴ ᱫᱚ ᱵᱟᱝ ᱠᱷᱟᱱ ᱟᱞᱮ ᱚᱲᱟᱜ ᱥᱮᱫ ᱦᱤᱜ ᱨᱤ ᱞᱮᱠᱟᱧ ᱥᱮᱱ ᱦᱤᱡᱩᱜ ᱟ᱾” ᱱᱚᱝᱠᱟᱭ ᱞᱟᱹᱭ ᱠᱮᱫ ᱠᱷᱟᱱ ᱫᱩᱜᱽᱫᱟᱹ ᱦᱟᱲᱟᱢ ᱫᱚ ᱟᱹᱰᱤ ᱵᱷᱟᱵᱽᱱᱟ ᱨᱮᱭ ᱯᱟᱲᱟᱣ ᱮᱱᱟ, ᱵᱟᱹᱭᱦᱟᱹᱲ ᱦᱟᱛᱟᱣ ᱠᱟᱛᱮ ᱯᱩᱭᱟᱹᱢ ᱫᱚᱦᱚᱭ ᱠᱷᱟᱱ ᱫᱚ ᱡᱟᱸᱦᱟᱭ ᱨᱤᱱᱰ ᱟᱺᱜᱽᱨᱤ ᱢᱮᱨᱚᱢ ᱜᱮᱠᱚ ᱫᱟᱹᱲ ᱵᱚᱞᱚᱱᱟ᱾ ᱱᱚᱝᱠᱟ ᱨᱮᱢᱟ ᱱᱟᱚᱣᱟ ᱜᱷᱟᱸᱨᱚᱸᱡᱽ ᱠᱷᱚᱱ ᱫᱩᱜᱽᱫᱟ ᱧᱩᱛᱩᱢ ᱜᱮ ᱢᱩᱪᱟᱹᱫ ᱩᱛᱟᱹᱨᱚᱜ ᱟ ᱵᱟᱝᱜᱮ ᱛᱤᱸᱜᱩ ᱨᱩᱣᱟᱹᱲᱚᱜ ᱟ᱾ ᱱᱚᱝᱠᱟᱭ ᱩᱭᱦᱟᱹᱨ ᱵᱟᱲᱟ ᱠᱮᱫ ᱛᱮ ᱥᱤᱸᱜᱟᱹᱲ ᱵᱮᱲᱟ ᱟᱡ ᱢᱟᱬᱟᱝ ᱫᱟᱠᱟᱭ ᱡᱚᱢ ᱠᱮᱫ ᱛᱮ ᱠᱩᱞᱦᱤ ᱯᱤᱸᱰᱟ ᱨᱮᱭ ᱫᱩᱲᱩᱵ ᱟᱠᱟᱱᱟ᱾ “ᱠᱚᱨᱚ” ᱦᱚᱸᱭ ᱠᱤᱫᱩᱜ ᱵᱟᱲᱟ ᱮᱱᱛᱮ ᱩᱭᱩ ᱟᱴᱮᱫ ᱠᱚ ᱦᱚᱵᱨ ᱠᱟᱛᱮ ᱠᱚᱲᱟ ᱜᱚᱲᱟ ᱜᱤᱛᱤᱡ ᱮ ᱪᱟᱞᱟᱜ ᱠᱟᱱ ᱚᱠᱛᱚ ᱨᱮ ᱟᱫᱚᱭ ᱠᱩᱞᱤ ᱭᱮ ᱠᱟᱱᱟ “ᱦᱮᱸᱫᱟ ᱵᱟᱵᱩ ᱚᱠᱟᱛᱮᱢ ᱪᱟᱞᱟᱜ ᱠᱟᱱᱟ?” “ᱠᱚᱨᱚ” ᱦᱚᱸ ᱦᱟᱨᱚ ᱯᱷᱟᱠᱚᱭ ᱨᱚᱲ ᱨᱩᱣᱟᱹᱲ ᱠᱮᱫ ᱟ “ᱠᱚᱲᱟ ᱠᱚ ᱚᱠᱟ ᱠᱚ ᱥᱮᱫ ᱪᱚᱝ ᱞᱟᱸᱜᱽᱬᱮ ᱮᱱᱮᱡ ᱪᱟᱞᱟᱜ ᱠᱚ ᱢᱮᱱ ᱮᱫᱼᱟ᱾ ᱟᱫᱚ ᱩᱱᱠᱩ ᱜᱤᱧ ᱜᱚᱲᱚ ᱟᱠᱚ ᱞᱟᱹᱜᱤᱫ” ᱫᱩᱜᱽᱫᱟᱹ ᱦᱟᱲᱟᱢ ᱜᱚᱸᱫᱽᱨᱟᱣ ᱧᱚᱜ ᱠᱟᱛᱮ ᱢᱮᱛᱟᱭ ᱠᱟᱱᱟ “ᱦᱮᱸᱫᱟ ᱭᱟ ᱚᱲᱟᱜ ᱨᱮ ᱵᱟᱹᱭᱦᱟᱹᱲᱤᱧ ᱦᱟᱛᱟᱣ ᱟᱠᱟᱣᱟᱫ ᱢᱮ ᱛᱩᱞᱩᱡ ᱟᱢᱫᱚ ᱟᱨ ᱦᱚᱸ ᱚᱠᱟ ᱠᱚᱨᱮ ᱡᱷᱤᱡ ᱜᱤᱰᱤ ᱥᱩᱠᱨᱤ ᱞᱮᱠᱟᱢ ᱩᱴᱤᱡ ᱵᱯᱟᱲᱟ ᱭᱮᱫ ᱟ᱾ ᱟᱢ ᱵᱟᱝᱛᱮ ᱵᱟᱹᱦᱩᱣᱟᱜ ᱡᱤᱣᱤ ᱦᱚᱲᱢᱚ ᱨᱮ ᱥᱩᱠ ᱜᱮ ᱵᱟᱭ ᱧᱟᱢ ᱮᱫ ᱟ, ᱟᱠᱚ ᱚᱲᱟᱜ ᱛᱮ ᱪᱟᱞᱟᱜ ᱥᱟᱱᱟᱭ ᱠᱟᱱᱟ, ᱟᱢᱤᱧ ᱢᱮᱛᱟᱢ ᱠᱟᱱᱟ ᱟᱞᱚ ᱟᱛᱟᱢᱟ ᱫᱩ ᱵᱚᱞᱚ ᱨᱩᱣᱟᱹᱲᱚᱜ ᱢᱮ᱾” “ᱠᱚᱨᱚ” ᱟᱯᱟᱛᱟᱜ ᱠᱟᱛᱷᱟᱭ ᱟᱸᱡᱚᱢ ᱠᱮᱫ ᱛᱮ ᱛᱟᱲᱟᱢ ᱡᱟᱸᱜᱟᱭ ᱟᱹᱪᱩᱨ ᱨᱩᱣᱟᱹᱲ ᱠᱮᱫ ᱟ᱾ ᱵᱚᱞᱚ ᱠᱟᱛᱮ ᱨᱟᱪᱟ ᱨᱮ ᱢᱤᱫ ᱜᱷᱟᱹᱲᱤᱠ ᱮ ᱩᱭᱦᱟᱹᱨ ᱟᱹᱪᱩᱨ ᱵᱟᱲᱟ ᱠᱮᱫ ᱟ, ᱤᱱᱟᱹ ᱛᱟᱭᱚᱢ “ᱵᱟᱦᱟᱭ” ᱜᱤᱛᱤᱡ ᱟᱠᱟᱱ ᱠᱩᱴᱨᱤ ᱨᱮᱭ ᱵᱚᱞᱚ ᱥᱮᱱ ᱮᱱᱟ᱾ ᱰᱷᱟᱹᱯᱱᱤ ᱫᱟᱠᱟ ᱨᱮ ᱛᱤᱭ ᱮᱢ ᱠᱮᱫ ᱠᱷᱟᱱ ᱵᱟᱞᱚᱜ ᱥᱮᱛᱟ ᱞᱮᱟᱠᱭ ᱞᱚᱥᱟᱜ ᱫᱟᱨᱟᱢ ᱠᱮᱫᱮᱭᱟ “ᱫᱤᱢ ᱱᱚᱰᱮᱢ ᱪᱤᱠᱟᱹ ᱵᱟᱲᱟᱜ ᱠᱟᱱᱟ, ᱡᱟᱣ ᱢᱟ ᱚᱠᱟ ᱠᱚᱥᱮᱫ ᱪᱚᱢ ᱫᱟᱹᱲ ᱤᱫᱤ, ᱛᱮᱦᱮᱧ ᱫᱚ ᱵᱟᱢ ᱪᱟᱞᱟᱜ ᱠᱟᱱᱟ?” ᱤᱱᱟᱹᱜ ᱠᱷᱟᱱ “ᱠᱚᱨᱚᱭ” ᱩᱭᱦᱟᱹᱨ ᱜᱚᱫ ᱠᱮᱫ ᱟ, “ᱛᱤᱥ ᱠᱷᱚᱱ ᱪᱚᱝ ᱨᱚᱴᱮ ᱪᱟᱹᱴᱟᱱᱤ ᱠᱷᱚᱱ ᱫᱟᱜ ᱫᱚ ᱥᱮᱛᱮᱧᱚᱜ ᱠᱟᱱᱟ, ᱥᱤᱧᱡᱚ ᱵᱤᱞᱤ ᱛᱩᱱᱩᱢ ᱛᱮ ᱡᱚᱠᱷᱚᱱ ᱥᱟᱠᱟᱢ ᱥᱟᱰᱮ ᱠᱟᱱᱟ ᱛᱮᱛᱟᱝ ᱢᱟᱨᱛᱚᱠ ᱫᱟᱜ ᱫᱚ ᱧᱩ ᱦᱩᱭᱩᱜ ᱜᱮᱭᱟ”᱾ ᱤᱱᱟᱹ ᱧᱤᱫᱟᱹ ᱞᱟᱣᱲᱤ ᱯᱟᱛᱱᱤ ᱠᱤᱱ ᱡᱚᱲ ᱮᱱᱟ, ᱫᱩᱞᱟᱹᱲ ᱨᱮᱱᱟᱝ ᱡᱷᱤᱯᱤᱨ ᱫᱟᱜ ᱛᱮ ᱡᱤᱭᱚᱱ ᱜᱟᱰᱟ ᱵᱟᱱ ᱮᱱᱟ ᱵᱟᱱᱟᱨ ᱠᱟᱹᱛᱷᱤ ᱥᱟᱨᱮᱲ ᱪᱮᱦᱮᱞ ᱪᱮᱯᱮᱞ᱾ “ᱵᱟᱦᱟ” ᱦᱟᱜ ᱩᱭᱦᱟᱹᱨ ᱠᱩᱠᱢᱩ ᱥᱟᱹᱨᱤ ᱮᱱ ᱛᱟᱭᱟ, ᱟᱸᱥ ᱢᱮᱴᱟᱣ ᱮᱱᱟ, ᱧᱤᱫᱟᱹ ᱟᱸᱜᱟ ᱭᱮᱱᱟ᱾ “ᱵᱟᱦᱟ” ᱟᱡᱟᱜ ᱠᱟᱹᱢᱤ ᱨᱮᱭ ᱫᱷᱩᱨᱟᱹᱣ ᱮᱱᱟ ᱫᱩᱜᱽᱫᱟᱹ ᱦᱟᱲᱟᱢ ᱯᱟᱨᱠᱚᱢ ᱨᱮ ᱫᱩᱲᱩᱵ ᱠᱟᱛᱮ ᱪᱮᱫ ᱠᱚᱪᱚᱭ ᱵᱷᱟᱹᱵᱤᱛᱚᱜ ᱠᱟᱱᱟ᱾ ‘ᱵᱦᱟ’ ᱡᱚᱜ ᱨᱟᱪᱟ ᱪᱟᱵᱟ ᱵᱟᱲᱟ ᱠᱟᱛᱮ, ᱪᱟᱣᱞᱮᱭ ᱜᱩᱢᱮᱫ ᱵᱮᱲᱟ ᱨᱮ ᱧᱤᱫᱟᱹ ᱡᱟᱹᱯᱤᱫ ᱴᱷᱤᱠ ᱵᱟᱝ ᱛᱮ ᱜᱷᱟᱹᱲᱤᱼᱜᱷᱟᱹᱲᱤ ᱟᱸᱜᱚᱵ ᱧᱮᱞ ᱛᱮ “ᱠᱚᱨᱚ” ᱢᱩᱞᱩᱪ ᱧᱚᱜ ᱠᱟᱛᱮᱭ ᱢᱮᱛᱟᱭ ᱠᱟᱱᱟ, “ᱪᱮᱞᱮ ᱛᱮᱦᱮᱧ ᱫᱚ ᱪᱮᱫ ᱞᱮᱠᱟᱢ ᱪᱦᱟᱵ ᱵᱟᱲᱟ ᱭᱮᱫ ᱟ”᱾ ᱮᱫᱽᱨᱮ ᱢᱮᱥᱟ ᱠᱩᱥᱤ ᱧᱚᱜ ᱛᱮᱭ ᱨᱚᱲ ᱨᱩᱣᱟᱹᱲ ᱟᱫᱮᱭᱟ, “ᱵᱟᱵᱟᱭ ᱞᱟᱹᱭ ᱟᱫ ᱢᱮᱛᱮ! ᱵᱟᱝ ᱠᱷᱟᱱ ᱟᱢ ᱛᱮᱫᱚ ᱵᱟᱢ ᱫᱤᱥᱟᱹ ᱡᱚᱝ ᱠᱟᱱ ᱛᱟᱦᱮᱸ ᱾ ᱫᱩᱜᱽᱫᱟᱹ ᱦᱟᱲᱟᱢ ᱨᱟᱹᱠᱟᱹ ᱢᱮᱥᱟ ᱞᱟᱸᱫᱟ ᱠᱟᱛᱮᱭ ᱨᱚᱲ ᱠᱮᱫ ᱟ, “ ᱱᱚᱰᱮ ᱜᱮᱪᱮᱭᱟ ᱜᱟᱯᱟᱞ ᱢᱟᱨᱟᱣ ᱨᱮᱭᱟᱜ ᱡᱟᱭᱜᱯᱟ ᱫᱚᱵᱤᱱ ᱧᱟᱢ ᱞᱮᱜ ᱟ, ᱵᱟᱲᱜᱮ ᱥᱮᱫ ᱫᱚ ᱵᱟᱹᱵᱤᱱ ᱥᱮᱱ ᱫᱟᱲᱮᱭᱟᱜ ᱠᱟᱱᱟ᱾” ᱱᱚᱝᱠᱟ ᱨᱚᱲᱼᱨᱚᱲ ᱛᱮ ᱠᱩᱞᱦᱤ ᱥᱮᱫ ᱮ ᱚᱰᱚᱠ ᱮᱱᱟ, ᱨᱟᱠᱟᱵ ᱪᱟᱸᱫ ᱥᱮᱫ ᱡᱚᱲ ᱛᱤ ᱭᱟᱛᱮᱭ ᱨᱚᱲ ᱡᱚᱝ ᱠᱟᱱᱟ, “ᱚᱠᱟᱧ ᱠᱷᱚᱡ ᱠᱟᱱ ᱛᱟᱦᱮᱸ ᱚᱱᱟ ᱫᱚ ᱪᱟᱸᱫᱚ ᱦᱩᱭ ᱠᱚᱜ ᱢᱟ, ᱫᱩᱜᱫᱟᱹ ᱧᱩᱛᱩᱢ ᱫᱚ ᱛᱤᱸᱜᱩ ᱨᱩᱣᱟᱹᱲ ᱠᱚᱜ ᱢᱟ ᱵᱟᱲᱮ ᱡᱚᱦᱟᱨ᱾”

Written by ᱥᱭᱟᱢ ᱦᱟᱸᱥᱫᱟᱜ “ᱠᱟᱸᱬᱟ”
Published on Arsi (ᱥᱟᱱ – ᱫᱟᱥᱟᱸᱭ, 2013)