ᱥᱩᱱ ᱨᱮᱭᱟᱜ ᱜᱩᱱ

ᱦᱚᱲ ᱠᱚ ᱞᱮᱠᱟ ᱜᱮ ᱤᱧ ᱦᱚᱸ ᱚ,ᱛ,ᱜ,ᱝ,ᱞ
ᱩᱨᱩᱢ ᱠᱟᱛᱮ ᱜᱮᱹᱧ ᱥᱮᱬᱟ ᱞᱮᱫᱼᱟ ᱚᱼᱚᱞ᱾
ᱟᱨ ᱚᱱᱟ ᱥᱟᱶᱛᱮ ᱑,᱒,᱓,᱔,᱕,᱖,᱗,᱘,᱙,᱑᱐
ᱞᱮᱠᱷᱟ ᱠᱟᱛᱮ ᱜᱮᱹᱧ ᱥᱮᱬᱟ ᱞᱮᱫᱼᱟ ᱮᱞ᱿

ᱤᱱᱟᱹ ᱛᱟᱭᱚᱢ ᱛᱮ ᱮᱛᱚᱢ, ᱠᱚᱸᱭᱮ ᱟᱨ ᱥᱤᱢᱟᱹ ᱥᱟᱲᱮ
ᱤᱠᱷᱟᱹᱱ ᱵᱟᱹᱧ ᱵᱟᱰᱟᱭ ᱞᱮᱫᱟ ᱥᱩᱱ ᱨᱮᱭᱟᱜ ᱫᱟᱲᱮ᱾᱑᱒
ᱞᱟᱦᱟ ᱛᱮᱫᱚ ᱱᱚᱝᱠᱟ ᱜᱮᱹᱧ ᱩᱭᱦᱟᱹᱨ ᱞᱮᱫ ᱛᱟᱸᱦᱮᱫ
ᱥᱩᱱ ᱨᱮᱭᱟᱜ ᱫᱚ ᱯᱟᱞᱮᱱ ᱵᱟᱹᱱᱩᱜ ᱜᱮᱭᱟ ᱢᱮᱱᱮᱫ᱿

ᱥᱩᱱ ᱨᱮᱫᱚ ᱪᱮᱫ ᱦᱚᱸ ᱜᱩᱱ ᱜᱮ ᱵᱟᱹᱱᱩᱜ ᱟᱱ
ᱮᱠᱷᱮᱱ ᱦᱚᱭᱟᱝ, ᱡᱮᱞᱮᱠ ᱫᱷᱟᱹᱨᱛᱤ ᱪᱮᱛᱟᱱ᱾
ᱤᱠᱷᱟᱹᱱ ᱱᱤᱛ ᱮᱱᱟᱝ ᱤᱧ ᱵᱟᱰᱟᱭ ᱧᱟᱢ ᱠᱮᱫᱼᱟ,
ᱚᱱᱟ ᱥᱩᱱ ᱨᱮᱭᱟᱜ ᱫᱚ ᱛᱤᱱᱟᱹᱜ ᱜᱩᱱ ᱢᱮᱱᱟᱜᱼᱟ᱿

ᱯᱟᱲᱦᱟᱣ ᱠᱟᱛᱤ ᱥᱮᱬᱟ ᱠᱮᱫᱼᱟ ᱥᱩᱱ ᱨᱮᱭᱟᱜ ᱜᱩᱱ
ᱚᱱᱟ ᱥᱮᱞᱮᱫ ᱵᱷᱮᱜᱮᱫ ᱠᱟᱛᱮ ᱦᱚᱸ ᱛᱟᱸᱦᱮᱱ ᱯᱩᱨᱩᱱ᱾
ᱚᱱᱟ ᱥᱟᱶ ᱜᱟᱵᱟᱬ ᱞᱮᱠᱷᱟᱱ ᱡᱮᱛᱮᱭᱟᱜ ᱪᱟᱵᱟᱜᱼᱟ
ᱟᱨ ᱚᱱᱟ ᱦᱟᱴᱟᱬ ᱞᱮᱠᱷᱟᱱ ᱵᱟᱝ ᱜᱮ ᱢᱩᱪᱟᱹᱫᱚᱜᱼᱟ᱿

ᱠᱚᱸᱭᱮ ᱨᱮ ᱥᱩᱱ ᱡᱚᱴᱟᱣ ᱢᱮᱥᱟ ᱞᱮᱱ ᱠᱷᱟᱱ
ᱜᱮᱞ ᱫᱚᱵᱚᱲᱚᱜᱼᱟ ᱚᱱᱟ ᱞᱮᱠᱟ ᱛᱟᱸᱦᱮ ᱠᱟᱱ᱾
ᱜᱮᱞ ᱥᱟᱶᱛᱮ ᱟᱨᱦᱚᱸ ᱢᱤᱫ ᱥᱩᱱ ᱡᱚᱴᱟᱜ ᱟᱭ,
ᱚᱱᱟ ᱜᱮᱞ ᱜᱮ ᱦᱩᱭᱩᱜᱼᱟ ᱩᱱᱫᱚ ᱢᱤᱫ ᱥᱟᱭ᱿

ᱮᱞᱠᱷᱟ ᱨᱮ ᱥᱩᱱ ᱨᱮᱭᱟᱜ ᱱᱚᱣᱟ ᱜᱩᱱ ᱛᱮ
ᱜᱮᱞ ᱫᱚᱵᱚᱲ ᱤᱫᱤᱜᱼᱟ ᱢᱤᱼᱢᱤᱫ ᱥᱩᱱ ᱛᱮ,᱾
ᱦᱩᱭ ᱤᱫᱤᱜᱼᱟ ᱜᱮ ᱥᱟᱭ, ᱟᱨ ᱦᱚᱸ ᱥᱟᱥᱟᱭ,
ᱱᱤᱛ ᱦᱩᱭ ᱮᱱᱟ, ᱚᱱᱟ ᱡᱚᱛᱷᱟᱛ ᱵᱟᱰᱟᱭ᱿

ᱵᱟᱝᱠᱚ ᱵᱟᱰᱟᱭ ᱡᱟᱸᱦᱟᱭ ᱱᱚᱣᱟ ᱠᱟᱛᱷᱟ
ᱞᱟᱹᱭ ᱟᱠᱚ, ᱥᱩᱱ ᱫᱚ ᱟᱹᱰᱤ ᱜᱮ ᱵᱮᱨᱛᱷᱟ,᱾
ᱵᱟᱹᱱᱩᱜ ᱯᱮᱨᱮᱡ ᱯᱩᱨᱩᱱ ᱚᱱᱟ ᱠᱷᱚᱞ ᱜᱮᱭᱟ
ᱤᱠᱷᱟᱹᱱ ᱚᱱᱟ ᱨᱚᱨᱚᱲ ᱦᱚᱲ ᱠᱚ ᱢᱩᱨᱩᱠ ᱜᱮᱭᱟ᱿

ᱡᱮᱞᱮᱠ ᱱᱤᱫᱷᱟᱹᱱ ᱨᱮ ᱦᱚᱸᱭ, ᱡᱟᱸᱦᱟᱭ ᱜᱩᱱ ᱛᱮ,
ᱪᱚᱦᱚᱲ ᱥᱟᱰᱮ ᱠᱟᱜ ᱟᱭ ᱩᱱᱤ ᱱᱤᱥᱚᱱ ᱚᱠᱛᱮ,᱾
ᱛᱟᱸᱦᱮᱱ ᱠᱷᱟᱱ ᱮ ᱥᱟᱶᱛᱮ ᱚᱱᱠᱟᱱ ᱢᱤᱫ ᱦᱚᱲ
ᱵᱟᱲᱦᱟᱣ ᱛᱟᱢᱟᱭ ᱫᱟᱲᱮ ᱜᱮᱞ ᱵᱟᱨ ᱫᱚᱵᱚᱲ᱿

ᱵᱤᱰᱟᱹᱣ ᱠᱮᱭᱟᱢ ᱚᱱᱟ ᱵᱟᱢ ᱥᱟᱹᱨᱤᱜ ᱠᱷᱟᱱ
ᱥᱩᱱ ᱨᱮᱭᱟᱜ ᱫᱟᱲᱮᱢ ᱧᱮᱞᱟ, ᱩᱱ ᱡᱚᱠᱷᱟᱱ᱾
ᱜᱩᱸᱞᱟᱹᱰ ᱨᱮᱦᱚᱸ ᱵᱟᱭ ᱠᱷᱚᱭᱟᱜ ᱜᱮᱭᱟ ᱥᱩᱱ
ᱯᱮᱨᱮᱡ ᱜᱮᱭᱟ ᱚᱱᱟ, ᱢᱮᱱᱟᱜ ᱟᱹᱰᱤ ᱯᱩᱨᱩᱱ᱿

Written by ᱡᱚᱜᱚᱫᱤᱥ ᱪᱚᱱᱫᱨᱚ ᱢᱩᱨᱢᱩ, ᱡᱚᱜᱚ ᱥᱟᱯᱲᱮᱛ
Published on Arsi (ᱥᱟᱱ – ᱫᱟᱥᱟᱸᱭ, 2013)