ᱛᱟᱨᱟ ᱠᱮᱪᱟᱜ ᱞᱟᱹᱰᱩ

ᱚᱠᱛᱚ ᱥᱮᱴᱮᱨᱚᱜᱼᱟ, ᱮᱵᱷᱮᱱ ᱮᱥᱮᱨᱚᱜᱼᱟ, ᱧᱮᱞ ᱩᱫᱩᱜᱚᱜᱼᱟ ᱡᱮᱸᱜᱮᱫᱼᱡᱮᱸᱱᱜᱮᱫ ᱵᱟᱦᱟ ᱯᱷᱩᱴᱟᱹᱜᱚᱜᱼᱟ, ᱪᱮᱦᱨᱟ ᱚᱴᱟᱜᱚᱜᱼᱟ, ᱥᱚ ᱚᱴᱟᱝᱚᱜᱼᱟ ᱦᱮᱥᱮᱫᱼᱦᱮᱥᱮᱫ᱾ ᱥᱚ ᱛᱮᱵᱟᱜ ᱠᱟᱛᱮ ᱟᱥᱟ ᱦᱟᱵᱟᱜ ᱠᱟᱛᱮ ᱩᱨᱩ ᱠᱚ ᱦᱤᱡᱩᱜ ᱜᱮᱭᱟ ᱨᱟᱥᱟ ᱪᱮᱯᱮᱡ᱾

ᱚᱱᱠᱟ ᱜᱮ ᱢᱟᱹᱭ ᱟᱥᱟ ᱨᱟᱹᱱᱤᱭᱟᱜ ᱡᱩᱣᱟᱹᱱ ᱦᱮᱲᱮᱢ ᱨᱟᱥᱟ ᱪᱮᱯᱮᱡ ᱞᱟᱹᱜᱤᱫ ᱟᱣᱟᱨᱟ (ᱩᱫᱽᱢᱟᱹ) ᱩᱨᱩ ᱵᱷᱟᱸᱣᱟᱨ ᱦᱚᱸᱠᱚ ᱢᱟᱰᱨᱟᱣ ᱵᱟᱲᱟ ᱞᱮᱱ ᱜᱭᱟ, ᱚᱱᱟ ᱞᱟᱦᱟ ᱨᱮᱜᱮ ᱡᱩᱣᱟᱹᱱ ᱡᱩᱸᱵᱽᱲᱤ ᱵᱷᱟᱶᱟᱨ ᱩᱨᱩ ᱫᱚ ᱢᱚᱱᱮ ᱯᱮᱨᱮᱡ ᱮ ᱡᱮᱸᱵᱮᱫ ᱟᱱ ᱛᱟᱸᱦᱮ ᱠᱟᱱᱟ ᱢᱟᱹᱭ ᱟᱥᱟ ᱦᱟᱜ ᱡᱩᱣᱟᱹᱱ ᱨᱟᱥᱟ ᱫᱚ ᱾

ᱠᱩᱱᱟᱹᱢᱤ ᱪᱟᱸᱫᱚ ᱛᱮᱨᱫᱮᱡ ᱢᱟᱨᱥᱟᱞ ᱨᱮ ᱪᱟᱸᱫᱚ ᱥᱟᱹᱠᱷᱤ ᱠᱟᱛᱮ ᱛᱟᱨᱟ ᱠᱮᱪᱟᱜ ᱞᱟᱹᱰᱩ ᱡᱚᱢ ᱦᱟᱹᱴᱤᱧ ᱠᱟᱛᱮ ᱡᱤᱣᱤᱫ ᱡᱤᱵᱚᱱ ᱵᱷᱩᱨ ᱥᱟᱶᱛᱮ ᱛᱟᱦᱮᱱ ᱨᱮᱱᱟᱝ ᱠᱤᱨᱟᱹ ᱦᱚᱸᱠᱤᱱ ᱦᱟᱛᱟᱣ ᱞᱮᱫᱼᱟ᱾ᱚᱱᱟ ᱧᱮᱞ ᱟᱱᱡᱚᱢ ᱧᱮᱞ ᱠᱟᱛᱮ ᱪᱟᱸᱫᱚ ᱦᱚᱸ ᱢᱩᱞᱩᱪ ᱢᱟᱪᱷᱟᱭ ᱞᱟᱸᱫᱟ ᱟᱱ ᱛᱟᱸᱦᱮᱫ᱾

ᱚᱠᱛᱚ ᱪᱟᱠᱟ ᱞᱮᱠᱟ ᱯᱟᱨᱚᱢ ᱤᱫᱤ ᱞᱮᱱᱟ, ᱚᱱᱠᱟ ᱜᱮ ᱟᱹᱠᱤᱱᱟᱜ ᱦᱟᱛᱟᱣ ᱞᱟᱫ ᱠᱤᱨᱟᱹ ᱦᱚᱸ ᱠᱩᱱᱟᱹᱢᱤ ᱪᱟᱸᱫᱚ ᱞᱮᱠᱟ ᱠᱮᱪᱟᱜᱼᱠᱮᱪᱟᱜ ᱛᱮ ᱢᱤᱫ ᱫᱤᱱ ᱫᱚ ᱟᱸᱵᱟ ᱵᱟ,ᱥᱭᱟᱹ ᱧᱩᱛᱟᱹᱛ ᱨᱮ ᱵᱚᱫᱚᱞ ᱮᱱᱟ᱾ ᱚᱱᱟ ᱧᱩᱛᱟᱹᱛ ᱨᱮ ᱛᱟᱦᱟᱢ ᱛᱩᱠᱩᱡ ᱠᱟᱛᱮ ᱟᱥᱟ ᱢᱟᱹᱭᱟᱜ ᱡᱟᱸᱜᱟ ᱫᱚ ᱰᱷᱚᱰᱟ ᱰᱷᱤᱯᱟᱹ ᱨᱮ ᱧᱩᱨ ᱞᱮᱱᱟ᱾ᱛᱟᱲᱟᱢ ᱦᱚᱨ ᱛᱟᱭ ᱵᱚᱫᱚᱞ ᱮᱱᱟ, ᱵᱩᱜᱤ ᱚᱠᱟ ᱵᱟᱹᱲᱤᱡ ᱚᱠᱟᱵᱟᱝ ᱮ ᱩᱨᱩᱢ ᱞᱟᱜᱼᱟ᱾ ᱥᱟᱺᱜᱤᱧ ᱠᱷᱚᱱ ᱠᱚ ᱩᱫᱩᱜ ᱢᱟᱜᱟᱞ ᱮᱭᱟ, ᱢᱮᱱ ᱟᱠᱚ ᱦᱟᱹᱱᱤ ᱧᱮᱞᱮᱯᱮ ᱠᱤᱥᱟᱺᱬ ᱚᱲᱟᱜ ᱨᱤᱱᱤᱡ ᱩᱫᱟᱹᱢ ᱥᱟᱱᱰ ᱡᱟᱸᱦᱟᱭᱟᱜ ᱜᱚᱲᱟ ᱨᱮᱜᱮᱭ ᱥᱚᱵᱚᱜ ᱵᱚᱞᱚᱱᱟ, ᱡᱟᱸᱦᱟᱭᱟᱜ ᱥᱟᱛᱮ ᱥᱟᱹᱲᱤᱢ ᱜᱮᱭ ᱵᱚᱡᱟ, ᱥᱟᱢᱟᱝ ᱨᱮ ᱚᱱᱟ ᱠᱟᱛᱷᱟ ᱨᱚᱲ ᱨᱮᱭᱟᱜ ᱚᱠᱚᱭ ᱮᱭ ᱥᱟᱦᱚᱥ ᱠᱮᱭᱟ?ᱦᱚᱲ ᱥᱟᱢᱟᱝ ᱨᱮ ᱫᱤᱠᱩ ᱛᱟᱞᱟ ᱨᱮ ᱵᱟᱱ ᱜᱟᱰᱟ ᱫᱟᱜ ᱞᱮᱠᱟ ᱪᱦᱤᱞᱠᱟᱹ ᱪᱷᱤᱞᱠᱤ ᱵᱷᱮᱞᱠᱟ ᱵᱷᱤᱞᱠᱤ, ᱚᱱᱟ ᱠᱚ ᱧᱮᱞ ᱠᱟᱛᱮ ᱡᱟᱹᱛᱤ ᱵᱤᱨᱟᱹᱫᱽ ᱨᱤᱱᱡᱩᱣᱟᱹᱱ ᱠᱚᱲᱟ ᱠᱚᱦᱚᱸ ᱮᱛᱠᱟ ᱠᱚᱴᱟ ᱟᱠᱚ ᱠᱟᱱ ᱞᱮᱠᱟ ᱠᱚ ᱵᱩᱡᱷᱟᱹᱣᱟ᱾ ᱢᱮᱱ ᱠᱷᱟᱱ ᱜᱟᱹᱫᱩᱨᱚᱜ ᱪᱷᱟᱰᱟ ᱠᱟᱛᱮ ᱟᱨ ᱡᱟᱦᱟᱱᱟᱜ ᱪᱮᱫ ᱦᱚᱸ ᱵᱟᱝ ᱠᱚ ᱪᱤᱠᱟᱹ ᱠᱮ ᱛᱟᱸᱦᱮᱫ᱾

ᱡᱟᱸᱦᱟᱭ ᱠᱚ ᱟᱡᱟᱜ ᱡᱩᱣᱟᱹᱱ ᱡᱷᱟᱨᱱᱟ ᱩᱨᱜᱩᱢ ᱫᱟᱜ ᱨᱮ ᱩᱱᱩᱢ ᱟᱸᱜᱮᱱ ᱥᱟᱱᱟ ᱠᱚ ᱛᱟᱸᱦᱮᱫ ᱩᱠᱩ ᱦᱚᱸ ᱵᱟᱹᱭᱼᱵᱟᱹᱭ ᱛᱮ ᱠᱚ ᱯᱟᱹᱪᱷᱞᱟᱹ ᱞᱮᱱᱟᱵᱟᱱ ᱜᱟᱰᱟ ᱫᱟᱜ ᱨᱮᱱᱟᱝ ᱵᱟᱱ ᱡᱷᱩᱨᱤ ᱞᱮᱠᱟ ᱦᱟᱸᱰᱮ ᱰᱷᱟᱝ ᱱᱷᱟᱰᱮ ᱰᱷᱟᱝ ᱰᱷᱟᱝᱼᱰᱷᱟᱝ ᱛᱮ ᱢᱤᱫ ᱴᱷᱮᱱ ᱫᱩᱚᱭ ᱰᱷᱟᱝ ᱮᱱᱟ᱾ᱟᱥᱟ ᱢᱟᱹᱭᱟᱜ ᱛᱤᱢᱤᱱᱟᱝ ᱥᱮᱨᱢᱟ ᱫᱚ ᱱᱟᱯᱟᱭ ᱛᱮᱜᱮ ᱟᱹᱰᱤ ᱨᱟᱥᱠᱟᱹ ᱥᱟᱛᱞᱟᱜ ᱫᱤᱱ ᱫᱚ ᱯᱟᱨᱚᱢ ᱪᱟᱞᱟᱣ ᱮᱱᱟ, ᱦᱮᱸᱣ ᱦᱚᱵᱚᱨ ᱟᱱᱟᱭ, ᱦᱮᱸᱣ ᱦᱚᱵᱚᱨᱟᱜ ᱦᱚᱸ ᱦᱟᱨᱟ ᱵᱩᱨᱩ ᱮᱱᱟ, ᱢᱮᱱ ᱠᱷᱟᱱ ᱡᱸᱦᱟᱭ ᱥᱟᱶ ᱟᱡ ᱡᱤᱣᱤᱭ ᱡᱚᱲᱟᱣ ᱞᱟᱜᱼᱟ, ᱢᱚᱱᱮᱭ ᱜᱟᱵᱟᱱ ᱞᱟᱜᱼᱟ, ᱚᱱᱟ ᱜᱟᱵᱟᱱ ᱜᱟᱹᱞᱤ ᱦᱚᱸ ᱵᱷᱟᱺᱫᱩᱲ ᱮᱱᱟ᱾ ᱟᱥᱟ ᱫᱚ ᱚᱲᱟᱜ, ᱫᱩᱣᱟᱹᱨ, ᱴᱟᱠᱟ, ᱠᱟᱹᱣᱰᱤ, ᱜᱟᱰᱤ, ᱢᱚᱴᱚᱨ ᱠᱮᱜ ᱟᱭ, ᱴᱟᱠᱟ ᱫᱟᱲᱮ ᱛᱮ ᱟᱹᱰᱤ ᱠᱤᱪᱷᱩ ᱥᱩᱠ ᱨᱮᱱᱟᱝ ᱥᱟᱢᱟᱱᱮ ᱠᱤᱨᱤᱧ ᱟᱱᱟ, ᱢᱮᱱ ᱠᱷᱟᱱ ᱥᱩᱠ ᱥᱟᱹᱱᱛᱤ ᱫᱚ ᱵᱟᱝ ᱮᱭ ᱠᱤᱨᱤᱧ ᱰᱟᱲᱮ ᱭᱟᱫᱼᱟ᱾ ᱡᱮᱞᱠᱟ ᱦᱤᱨᱟᱹ ᱢᱩᱠᱩᱴ ᱵᱚᱦᱚᱜ ᱨᱮ ᱦᱚᱨᱚᱜ ᱞᱮᱱ ᱠᱷᱟᱱ ᱵᱚᱦᱚᱜ ᱦᱟᱹᱥᱩ ᱵᱟᱭ ᱪᱟᱵᱟᱜᱼᱟ, ᱚᱱᱟ ᱞᱟᱹᱜᱤᱫ ᱫᱚ ᱵᱚᱦᱚᱜ ᱦᱟᱹᱥᱩ ᱨᱟᱱ ᱜᱮ ᱞᱟᱹᱠᱛᱤᱜᱼᱟ᱾ ᱢᱮᱱ ᱠᱷᱟᱱ ᱟᱥᱟ ᱢᱟᱹᱭ ᱞᱟᱹᱜᱤᱫ ᱵᱚᱦᱚᱜ ᱦᱟᱹᱥᱩ ᱨᱟᱱ ᱠᱚᱴᱮᱡ ᱞᱟᱹᱜᱤᱫ ᱥᱟᱹᱨᱤ ᱡᱩᱨᱤ ᱫᱚ ᱵᱟᱝ ᱮᱭ ᱡᱚᱴᱟᱣ ᱫᱟᱲᱮ ᱭᱟᱱᱟ᱾

ᱢᱤᱫ ᱚᱼᱵᱷᱟᱜᱟ ᱠᱷᱮᱨᱪᱚ ᱢᱚᱞᱚᱝ, ᱩᱱᱤᱫᱚ ᱟᱹᱰᱤ ᱜᱟᱹᱦᱤᱨ ᱟᱸᱥ ᱮ ᱫᱚᱦᱚ ᱞᱮᱫ ᱟ, ᱟᱥᱟ ᱢᱟᱹᱭ ᱴᱷᱮᱱ, ᱟᱡᱟᱜ ᱢᱚᱱᱮ ᱨᱮᱱᱟᱝ ᱠᱟᱛᱷᱟ ᱨᱚᱲ ᱛᱮ ᱚᱞ ᱛᱮ ᱟᱡ ᱴᱷᱮᱱᱮ ᱥᱮᱴᱮᱨ ᱞᱮᱜᱼᱟ, ᱢᱮᱱ ᱠᱷᱟᱱ ᱢᱟᱹᱭ ᱟᱥᱟ ᱫᱚ ᱚᱱᱟ ᱞᱟᱸᱫᱟ ᱠᱟᱛᱮ ᱜᱮᱭ ᱚᱴᱟᱝ ᱞᱟᱜ ᱛᱟᱸᱦᱮᱱ, ᱩᱱᱤ ᱠᱷᱮᱨᱪᱚ ᱢᱚᱞᱚᱝ ᱫᱚ ᱪᱟᱸᱫᱚ ᱴᱷᱮᱱᱮ ᱱᱮᱦᱚᱨ ᱵᱤᱱᱛᱤ ᱞᱮᱱᱟ, ᱮ ᱥᱤᱧ ᱵᱚᱸᱜᱟ, ᱮ ᱧᱤᱫᱟᱹ ᱪᱟᱸᱫᱚ, ᱤᱧᱟᱹᱜ ᱫᱩᱞᱟᱹᱲ ᱡᱩᱫᱤ ᱥᱟᱹᱨᱤ ᱜᱮᱭᱟ, ᱪᱷᱚᱞ ᱠᱚᱯᱚᱴ ᱵᱟ,ᱱᱩᱜ ᱟᱱᱟ, ᱮᱱᱠᱷᱟᱱ ᱱᱩᱭ ᱜᱚᱨᱚᱵᱤᱭᱟᱹ ᱠᱤᱥᱟᱺᱬ ᱦᱚᱯᱚᱱ ᱮᱨᱟ, ᱤᱧᱟᱹᱜ ᱫᱩᱞᱟᱹᱲ ᱠᱟᱛᱷᱟ ᱞᱟᱸᱫᱟ ᱠᱟᱛᱮᱭ ᱚᱴᱟᱝ ᱟᱠᱟᱫᱼᱟ ᱚᱱᱟ ᱯᱟᱯ ᱫᱚ ᱤᱧ ᱥᱟᱢᱟᱝ ᱨᱮ ᱢᱮᱫ ᱫᱟᱜ ᱛᱮᱭ ᱟᱨᱩᱵ ᱥᱟᱯᱷᱟᱭ ᱢᱟ᱾

ᱟᱪᱠᱟ ᱜᱮ ᱢᱤᱫ ᱫᱤᱱ ᱠᱟᱞᱤ ᱵᱟᱹᱵᱩ ᱟ ᱨᱟᱥᱟ ᱢᱟᱹᱭ ᱧᱟᱯᱟᱢ ᱟᱠᱟ ᱱᱟᱠᱤᱱ ᱱᱤᱪᱚᱞ ᱚᱠᱛᱚ᱾ ᱯᱟᱱᱛᱮ ᱛᱮ ᱫᱩᱲᱩᱵ ᱠᱟᱛᱮ ᱡᱤᱭᱚᱱ ᱨᱮᱱᱟᱝ ᱵᱟᱹᱥᱭᱟᱢ ᱠᱮᱴᱮᱡ ᱵᱮᱲᱟ ᱠᱷᱚᱱ ᱛᱤᱠᱤᱱ ᱛᱟᱨᱟ ᱥᱤᱧ ᱵᱮᱲᱟ ᱨᱮᱱᱟᱝ ᱠᱟᱛᱷᱟ ᱠᱚ ᱠᱤᱱ ᱜᱟᱯᱟᱞ ᱢᱟᱨᱟᱣ ᱮᱱᱟ, ᱢᱟᱹᱭ ᱟᱥᱟ ᱦᱟᱜ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱫᱚ ᱟᱥᱟᱲ ᱥᱟᱱ ᱫᱟᱜ ᱞᱮᱠᱟ ᱜᱮ ᱞᱤᱸᱜᱤ ᱚᱰᱚᱠ ᱮᱱᱟ ᱵᱟᱱᱟᱨ ᱡᱚᱦᱟ ᱥᱮᱫ ᱛᱮ᱾ ᱠᱟᱞᱤ ᱵᱟᱹᱵᱩ ᱫᱚ ᱧᱮᱞ ᱠᱟᱛᱮᱭ ᱟᱪᱠᱟ ᱭᱮᱱᱟ ᱠᱷᱟᱱᱮ ᱠᱩᱞᱤ ᱠᱮᱫᱮᱭᱟ ᱢᱟᱹᱭ ᱟᱥᱟ ᱡᱟᱦᱟᱱᱟᱜ ᱪᱮᱫ ᱱᱚᱝᱠᱟᱱ ᱠᱟᱛᱷᱟᱧ ᱢᱮᱛᱟᱫ ᱢᱮᱛᱮ ᱢᱮᱫ ᱫᱟᱜ ᱫᱚᱢ ᱡᱚᱨᱚ ᱟᱫ ᱟᱹᱫᱤᱧᱟ ᱚᱼᱡᱟᱱᱟ ᱛᱮ ᱡᱟᱦᱟᱱᱟᱜᱡᱩᱫᱤᱧ ᱢᱮᱱ ᱵᱟᱹᱲᱛᱤ ᱟᱠᱟᱫᱼᱟ ᱮᱱ ᱠᱷᱟᱱ ᱟᱢ ᱴᱷᱮᱱ ᱤᱠᱟᱹᱧ ᱠᱷᱚᱡᱚᱜ ᱠᱟᱱᱟ ᱤᱠᱟᱹ ᱠᱟᱹᱧᱟᱢ᱾

ᱢᱟᱹᱭ ᱟᱥᱟ ᱫᱚ ᱠᱟᱞᱤ ᱵᱟᱵᱩ ᱣᱟᱜ ᱢᱚᱪᱟ ᱛᱤᱛᱮ ᱵᱮᱫ ᱠᱟᱛᱮᱭ ᱢᱮᱱ ᱠᱮᱫᱼᱟ, ᱠᱟᱞᱤ ᱵᱟᱵᱩ (ᱢᱮᱫ ᱫᱟᱜ ᱡᱚᱫᱼᱡᱚᱫ ᱛᱮ) ᱤᱠᱟᱹ ᱬᱟ ᱤᱧᱟᱜ ᱦᱟᱛᱟᱣ ᱞᱟᱹᱠᱛᱤᱜ ᱠᱟᱱᱟ ᱟᱢᱫᱚ ᱵᱟᱝ, ᱪᱮᱫᱟᱜ ᱥᱮ ᱵᱷᱩᱞ ᱢᱟ ᱤᱧᱤᱧ ᱵᱷᱚᱞ ᱟᱠᱟᱫᱼᱟ᱾ ᱟᱢᱟᱜ ᱫᱩᱞᱟᱹᱲ ᱨᱮᱱᱟᱝ ᱠᱟᱛᱷᱟ ᱜᱟᱹᱦᱤᱨ ᱛᱮ ᱵᱟᱹᱧ ᱩᱭᱦᱟᱹᱨ ᱞᱟᱜ ᱛᱮ ᱤᱧᱟᱹᱜ ᱱᱚᱣᱟ ᱫᱚᱥᱟ ᱫᱚ, ᱟᱢ ᱱᱩᱱᱟᱜ ᱮᱢ ᱱᱟᱯᱟᱭᱟ ᱢᱮᱱᱛᱮ ᱫᱚ ᱱᱤᱛᱚᱜ ᱤᱧ ᱴᱷᱤᱠᱟᱹ ᱮᱫᱼᱟ᱾ ᱟᱫᱚ ᱱᱤᱛᱚᱜ ᱡᱤᱭᱚᱱ ᱨᱮᱱᱟᱝ ᱛᱟᱨᱟ ᱥᱤᱧ ᱵᱮᱲᱟ ᱨᱮ ᱩᱭᱦᱟᱹᱨ ᱠᱟᱛᱮ ᱫᱚ ᱪᱮᱫ ᱦᱩᱭᱩᱜᱼᱟ, ᱡᱚᱛᱚᱣᱟᱜ ᱛᱩᱧ ᱪᱟᱵᱟ ᱟᱠᱟᱫᱼᱟ᱾

ᱟᱢ ᱴᱷᱮᱱ ᱱᱤᱭᱟᱹᱜᱮ ᱟᱥᱟ ᱤᱧᱟᱜ ᱡᱟᱸᱦᱟ ᱛᱤᱥ ᱡᱟᱸᱦᱟ ᱨᱮᱞᱟᱝ ᱧᱟᱯᱟᱢ ᱞᱮᱱ ᱠᱦᱟᱱᱮᱢ ᱨᱚᱲ ᱥᱟᱰᱮ ᱟᱹᱧᱟ᱾ ᱪᱮᱠᱟᱢ ᱴᱷᱤᱠᱟᱹ ᱠᱮᱜᱼᱟ ᱤᱧᱫᱚ ᱱᱟᱯᱟᱭ ᱦᱚᱲ?ᱟᱨ ᱚᱱᱟ ᱦᱚᱸ ᱤᱧ ᱞᱮᱠᱟᱱ ᱦᱚᱲᱱᱟᱯᱟᱭ ᱮᱢ ᱢᱤᱛᱟᱹᱧ ᱠᱟᱱᱟ! (ᱞᱟᱸᱫᱟ) ᱤᱧᱟᱜ ᱯᱟᱯ ᱨᱮᱱᱟᱝ ᱯᱨᱟᱭᱥᱪᱤᱛ ᱞᱮᱠᱟᱛᱮ ᱤᱧ ᱟᱞᱮ ᱚᱲᱟᱜ ᱨᱤᱧ ᱵᱟᱥᱟ ᱞᱮᱫ ᱢᱮᱭᱟ, ᱮᱠᱞᱟ ᱚᱲᱟᱜ ᱨᱮ ᱢᱤᱫ ᱥᱟᱶᱛᱮ ᱧᱤᱫᱟᱹ ᱞᱟᱝ ᱟᱸᱜᱟ ᱞᱮᱫᱼᱟ ᱤᱧᱟᱹᱜ ᱢᱮᱫ ᱨᱮᱫᱚ ᱡᱟᱹᱯᱤᱫ ᱜᱮ ᱵᱟᱝ ᱦᱮᱡ ᱞᱮᱱᱟ᱾ ᱢᱚᱱᱮᱼᱢᱚᱱᱮ ᱛᱤᱧ ᱢᱮᱱ ᱡᱚᱝ ᱠᱟᱱ ᱛᱟᱸᱦᱮᱫ ᱵᱷᱩᱨ ᱡᱩᱣᱟᱹᱱ ᱚᱠᱛᱚ ᱨᱮ ᱠᱚᱲᱟ ᱦᱟᱜ ᱡᱟᱸᱦᱟ ᱫᱟᱲᱮ ᱦᱩᱭᱩᱜ ᱫᱚᱨᱠᱟᱨ ᱚᱱᱟ ᱫᱟᱲᱮ ᱫᱚ ᱵᱟᱹᱱᱩᱜ ᱛᱟᱢᱟ (ᱵᱟᱹᱭᱞᱟᱹ ᱜᱮᱭᱟᱢ) ᱴᱮᱦᱮᱧ ᱤᱧ ᱵᱟᱰᱟᱭ ᱧᱟᱢ ᱠᱮᱜᱼᱟ ᱟᱹᱨᱥᱤ ᱞᱮᱠᱟᱱ ᱢᱚᱱᱮ ᱛᱟᱢᱤᱧ ᱨᱟᱯᱩᱫ ᱠᱟᱨᱟ ᱠᱩᱪᱟᱹ ᱟᱠᱟᱫ ᱛᱟᱢᱟ, ᱚᱱᱟ ᱵᱟᱢ ᱡᱚᱲᱟᱣ ᱨᱩᱣᱟᱹᱲ ᱟᱠᱟᱫ ᱛᱟᱸᱦᱮᱫ᱾ᱵᱚᱛᱚᱨ ᱛᱟᱸᱦᱮ ᱠᱟᱱᱟ ᱡᱟᱸᱦᱟ ᱨᱟᱹᱯᱩᱫ ᱟᱠᱟᱱ ᱚᱱᱟ ᱫᱚ ᱟᱨ ᱵᱟᱢ ᱨᱟᱹᱯᱩᱫ ᱛᱟᱢᱟ᱾ ᱡᱟᱸᱦᱟ ᱡᱚᱠᱷᱚᱢ ᱮᱢ ᱧᱟᱢ ᱟᱠᱟᱫᱼᱟ ᱡᱤᱵᱚᱱ ᱵᱷᱩᱨᱮᱢ ᱵᱷᱚᱜᱟ, ᱵᱟᱝ ᱠᱷᱟᱱ ᱠᱚᱚᱠᱭ ᱦᱚᱲ ᱫᱚ ᱡᱟᱸᱦᱟ ᱜᱮ ᱠᱩᱥᱤᱛᱮᱭ ᱧᱟᱢᱟ ᱚᱱᱟ ᱜᱮᱭ ᱠᱩᱥᱤᱜᱼᱟ, ᱟᱨ ᱞᱩᱵᱷᱭᱟᱹ ᱞᱟᱞᱪᱤ ᱦᱚᱲ ᱫᱚ ᱠᱚᱭ ᱛᱮ ᱵᱟᱝ ᱧᱟᱢᱚᱜ ᱠᱷᱟᱱ ᱡᱚᱵᱚᱨ ᱠᱟᱛᱮ ᱦᱚᱬᱠᱚ ᱦᱟᱛᱟᱣᱟ, ᱚᱠ ᱟᱜᱮ ᱤᱧᱤᱡ ᱡᱤᱣᱤ ᱡᱩᱨᱤ ᱦᱚᱸ ᱤᱧᱟᱜ ᱫᱩᱞᱟᱹᱲ ᱫᱚ ᱡᱚᱵᱚᱨ ᱛᱮᱭ ᱦᱟᱛᱟᱣ ᱞᱟᱜᱼᱟ᱾

ᱤᱱᱟᱹ ᱦᱤᱞᱚᱜ ᱟᱢ ᱫᱚ ᱛᱮᱢ ᱟᱸᱜᱟ ᱞᱮᱜᱼᱟ, ᱤᱧ ᱫᱚ ᱵᱮᱸᱜᱮᱫ ᱠᱟᱛᱮ, ᱥᱮᱛᱟᱜ ᱵᱚᱭᱦᱟ ᱠᱩᱲᱤ ᱠᱚᱠᱚ ᱞᱟᱸᱫᱟ ᱟᱹᱫᱤᱧ ᱛᱟᱸᱦᱮᱫ; ᱦᱮᱸ ᱫᱟᱹᱭ! ᱛᱮᱦᱮᱧ ᱫᱚ ᱟᱹᱰᱤᱢ ᱟᱸᱜᱚᱜ ᱠᱟᱱᱫᱚ, ᱧᱤᱸᱫᱟᱹ ᱯᱟᱞᱮᱱ ᱤᱧ ᱛᱮᱧᱟᱝ ᱵᱟᱝ ᱮ ᱡᱟᱹᱯᱤᱫ ᱦᱚᱪᱚ ᱣᱟᱫ ᱢᱮᱭᱟ? ᱩᱱ ᱚᱠᱛᱚ ᱦᱚᱸ ᱟᱥᱟ ᱢᱟᱹᱭᱟᱜ ᱢᱚᱱᱮ ᱡᱤᱣᱤ ᱦᱮᱸᱫᱮ ᱨᱤᱢᱤᱞ ᱨᱟᱠᱟᱵ ᱞᱮᱱᱟ ᱟᱨ ᱢᱮᱫ ᱦᱚᱨᱛᱮ ᱢᱤᱫ ᱵᱟᱨ ᱴᱷᱚᱯ ᱫᱟᱜ ᱦᱚᱸ ᱡᱟᱹᱲᱤ ᱞᱮᱱᱟ᱾

ᱵᱤᱱ ᱠᱟᱹᱞᱤ ᱛᱮ ᱠᱟᱞᱤ ᱵᱟᱹᱵᱩ ᱫᱚ ᱦᱮᱸᱫᱮ ᱧᱚᱞᱦᱟᱫ ᱠᱚ ᱡᱚᱫ ᱟᱫᱮ ᱛᱟᱦᱮᱱ ᱠᱷᱟᱹᱞᱤᱼᱠᱷᱟᱹᱞᱤ ᱛᱮ᱾ᱠᱟᱞᱤ ᱵᱟᱹᱵᱩ ᱦᱚᱸᱭ ᱚᱲᱟᱜ ᱥᱚᱝᱥᱟᱨ ᱟᱠᱟ ᱣᱟᱱᱟ ᱜᱷᱟᱨᱚᱸᱡᱽ ᱨᱤᱱ ᱥᱟᱱᱟᱢ ᱠᱚ ᱥᱟᱶ ᱨᱟᱹᱥᱠᱟ ᱨᱮᱜᱮ ᱢᱟᱱᱟᱭᱟ᱾ ᱢᱟᱹᱭ ᱟᱥᱟ ᱞᱮᱠᱟ ᱚᱲᱟᱜ ᱫᱩᱣᱟᱹᱨ ᱫᱷᱚᱱ ᱫᱩᱨᱤᱵᱽ ᱜᱟᱹᱲᱤ ᱜᱷᱚᱲᱟᱛᱮ ᱵᱟᱝ ᱮ ᱠᱤᱥᱟᱺᱬ ᱨᱮᱦᱚᱸ, ᱠᱟᱞᱤ ᱵᱟᱹᱵᱩ ᱫᱚ ᱫᱤᱞ ᱫᱟᱲᱮ ᱢᱟᱹᱱ ᱥᱚᱢᱢᱟᱱ ᱛᱮᱦᱚᱸ ᱟᱹᱰᱤᱭ ᱠᱤᱥᱟᱸᱬᱟ ᱚᱱᱟ ᱛᱮᱜᱮ ᱟᱡᱟᱜ ᱥᱩᱞᱩᱠ ᱥᱚᱝᱥᱟᱨ ᱫᱚ ᱡᱤᱭᱟᱹᱲ ᱦᱟᱹᱨᱭᱟᱹᱲ ᱜᱮ ᱛᱟᱭᱟ᱾᱾ᱢᱩᱪᱟᱫ᱾᱾

“ᱱᱚᱣᱟ ᱫᱚ ᱠᱟᱹᱦᱱᱤ ᱠᱟᱱᱟ ᱡᱟᱸᱦᱟᱭᱟᱜ ᱡᱤᱭᱚᱱ ᱠᱟᱹᱦᱱᱤ ᱫᱚ ᱵᱟᱝ ᱠᱟᱱᱟ᱾ ᱱᱚᱣᱟ ᱫᱷᱟᱹᱨᱛᱤ ᱨᱮ ᱦᱩᱭ ᱫᱟᱲᱮ ᱠᱮᱭᱟ ᱠᱟᱹᱦᱱᱤ ᱨᱤᱱ ᱯᱟᱛᱨᱚᱼᱯᱟᱛᱨᱤ ᱥᱟᱞᱟᱜ ᱧᱩᱛᱩᱢ ᱟᱨ ᱡᱤᱭᱚᱱ ᱠᱟᱹᱦᱱᱤ ᱦᱚᱸ ᱧᱟᱯᱧᱢ ᱠᱮᱭᱟ ᱢᱮᱱ ᱠᱷᱟᱱ ᱱᱚᱣᱟ ᱫᱚ ᱠᱟᱞᱯᱚᱱᱤᱠ ᱠᱟᱱᱟ᱾”

Written by ᱦᱚᱨᱤ ᱯᱚᱫᱚ ᱢᱩᱨᱢᱩ
Published on Arsi (ᱥᱚᱦᱨᱟᱭ – ᱯᱩᱥ, 2013-14)