ᱡᱷᱟᱲᱟ

ᱪᱟᱸᱫᱚ ᱵᱚᱸᱜᱟᱭ ᱥᱤᱨᱡᱟᱹᱣ ᱟᱠᱟᱫ ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱟᱹᱰᱤ ᱦᱟᱦᱟᱲᱟ ᱜᱮ᱾ ᱱᱚᱣᱟ ᱞᱮ ᱞᱮᱸᱜᱮᱫ ᱫᱷᱟᱹᱨᱛᱤ ᱯᱩᱨᱤ ᱨᱮ ᱪᱟᱸᱫᱚ ᱵᱚᱸᱜᱟᱭ ᱥᱤᱨᱡᱟᱹᱣ ᱟᱠᱟᱫ ᱠᱚ ᱱᱟᱱᱟ ᱦᱩᱱᱟᱹᱨ ᱡᱤᱣᱤ ᱡᱤᱭᱟᱹᱞᱤ ᱡᱤᱱᱛᱤ ᱯᱤᱯᱤᱲᱤ ᱠᱚ, ᱟᱨ ᱩᱱᱠᱩ ᱢᱩᱫᱽ ᱨᱮ ᱢᱟᱨᱟᱝ ᱵᱩᱨᱩ ᱦᱚᱛᱮ ᱛᱮ ᱟᱵᱚ ᱢᱟᱹᱱᱢᱤ ᱦᱚᱸ ᱱᱚᱣᱟ ᱦᱟᱹᱨᱭᱟᱲ ᱫᱟᱷᱟᱹᱨᱛᱤ ᱨᱮᱭ ᱥᱤᱨᱡᱟᱹᱣ ᱟᱠᱟᱫ ᱵᱚᱱᱟ᱾ ᱡᱤᱣᱤ ᱡᱤᱭᱟᱹᱞᱤ ᱟᱨ ᱢᱟᱹᱱᱢᱤ ᱠᱚ ᱢᱩᱫᱽ ᱨᱮ ᱵᱷᱮᱜᱟᱨᱼᱵᱷᱮᱜᱟᱨ ᱢᱟᱱᱚᱛ ᱟᱨ ᱜᱩᱱᱟᱹᱱ ᱢᱟᱹᱱᱟᱹᱱ ᱞᱟᱹᱜᱤᱫ ᱟᱹᱠᱤᱞ ᱫᱤᱥᱟᱹ ᱦᱚᱸᱭ ᱪᱟᱞ ᱟᱠᱟᱣᱟᱫᱽ ᱵᱚᱱᱟ᱾ ᱢᱟᱨᱮ ᱦᱟᱯᱲᱟᱢ ᱠᱚᱣᱟᱜ ᱠᱟᱛᱷᱟ ᱞᱮᱠᱟ ᱛᱮ ᱵᱟᱰᱟᱭᱚᱜ ᱠᱟᱱᱟ, ᱢᱟᱹᱱᱢᱤ ᱫᱚ ᱯᱟᱨᱚᱢᱮᱱ ᱛᱤᱢᱤᱱ ᱥᱟᱭ ᱥᱮᱨᱢᱟ ᱨᱮᱪᱚ ᱵᱚ ᱚᱯᱮᱞ ᱟᱠᱟᱱᱟ ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮ᱾ ᱟᱹᱜᱤᱞ ᱢᱟᱨᱮ ᱦᱟᱯᱲᱟᱢ ᱠᱚᱜᱮ ᱟᱵᱚ ᱦᱚᱲ ᱦᱚᱯᱚᱱ ᱠᱚ ᱞᱟᱹᱜᱤᱫ ᱞᱟᱭ ᱞᱟᱠᱪᱟᱨ ᱟᱹᱨᱤ ᱪᱟᱹᱞᱤ, ᱵᱚᱸᱜᱟ ᱵᱩᱨᱩ, ᱵᱤᱱᱛᱤ ᱵᱟᱸᱠᱷᱮᱲ, ᱮᱱᱮᱡ ᱥᱮᱨᱮᱧ, ᱡᱟᱱᱟᱢ ᱪᱷᱟᱹᱴᱭᱟᱹᱨ ᱠᱷᱚᱱ ᱮᱦᱚᱵ ᱠᱟᱛᱮ ᱵᱮᱦᱟ ᱵᱟᱯᱞᱟ ᱜᱚᱡ ᱜᱩᱨ ᱡᱟᱝ ᱵᱟᱦᱟ ᱛᱩᱯᱩ (ᱡᱤᱞᱤᱧ ᱦᱚᱨ) ᱵᱷᱟᱰᱟᱱ ᱥᱟᱶ ᱯᱮ ᱯᱤᱲᱦᱤ ᱨᱤᱱ ᱵᱚᱸᱜᱟ ᱵᱩᱨᱩ ᱥᱟᱶ ᱢᱮᱥᱟ ᱢᱤᱫᱩᱜ ᱞᱟᱹᱜᱤᱫ ᱞᱮᱜᱽ ᱟᱪᱟᱨ (ᱵᱤᱫᱷᱤ ᱵᱤᱫᱷᱟᱱ) ᱠᱚ ᱵᱮᱱᱟᱣ ᱟᱠᱟᱣᱟᱫ ᱵᱚᱱᱟ᱾ ᱚᱱᱟ ᱠᱚᱜᱮ ᱛᱤᱱᱟᱹᱜ ᱵᱚᱱ ᱢᱟᱱᱟᱣ ᱮᱫ ᱵᱟᱛᱟᱣ ᱮᱫ ᱠᱟᱱᱟ ᱚᱱᱟᱜᱮ ᱩᱭᱦᱟᱹᱨ ᱵᱷᱟᱵᱽᱱᱟ ᱨᱮᱱᱟᱝ ᱞᱟᱹᱠᱛᱤ ᱯᱟᱲᱟᱣ ᱟᱠᱟᱱᱟ᱾ ᱡᱩᱜᱽ ᱥᱟᱶ ᱦᱚᱲ ᱦᱚᱯᱚᱱ ᱵᱚᱱ ᱵᱚᱫᱚᱞᱚᱜ ᱠᱟᱱᱟ, ᱵᱚᱫᱚᱞᱚᱜ ᱦᱚᱸ ᱞᱟᱹᱠᱛᱤᱜ ᱠᱟᱱᱟ, ᱢᱮᱱᱠᱷᱟᱱ ᱱᱩᱱᱟᱹᱜ ᱦᱚᱸ ᱟᱞᱚᱵᱚᱱ ᱵᱚᱫᱚᱞᱚᱜ ᱢᱟ, ᱡᱮᱢᱛᱮ ᱦᱟᱯᱲᱟᱢ ᱠᱚ ᱵᱮᱱᱟᱣ ᱦᱚᱴᱚ ᱟᱠᱟᱫ ᱥᱟᱶᱛᱟ ᱨᱮᱭᱟᱜ ᱟᱹᱨᱤ ᱪᱟᱹᱞᱤ, ᱨᱟᱭ ᱨᱤᱛ, ᱵᱚᱸᱜᱟ ᱵᱩᱨᱩ, ᱮᱱᱮᱡ ᱥᱮᱨᱮᱧ ᱞᱮᱜᱽ ᱟᱪᱟᱨ, ᱚᱱᱟ ᱠᱚᱫᱚ ᱮᱠᱟᱞ ᱟᱞᱚ ᱵᱚᱱ ᱵᱚᱫᱚᱞ ᱢᱟ᱾ ᱡᱩᱫᱤ ᱚᱱᱟ ᱠᱚᱵᱚᱱ ᱵᱚᱫᱚᱞ ᱞᱮᱠᱷᱟᱱ ᱥᱟᱱᱛᱟᱲ ᱥᱟᱶᱛᱟ ᱜᱮ ᱢᱟᱞᱚᱴ ᱩᱛᱟᱹᱨᱚᱜᱼᱟ, ᱟᱨ ᱢᱟᱞᱚᱴ ᱞᱮᱱ ᱠᱷᱟᱱ ᱦᱚᱲ ᱦᱚᱯᱚᱱᱟᱜ ᱥᱟᱱᱛᱟᱲ ᱡᱟᱹᱛᱤᱜᱮ ᱢᱩᱪᱟᱹᱫ ᱩᱛᱟᱹᱨᱚᱜᱼᱟ᱾ ᱱᱤᱛ ᱢᱮᱱ ᱨᱮᱭᱟᱜ ᱠᱟᱛᱷᱟ ᱫᱚ ᱱᱚᱣᱟ ᱜᱮ ᱠᱟᱱᱟ, ᱚᱞ ᱯᱟᱲᱦᱟᱣ ᱥᱮᱪᱮᱫ ᱥᱤᱠᱷᱱᱟᱹᱛ ᱛᱤᱱᱟᱹᱜ ᱞᱟᱹᱠᱛᱤᱜ ᱠᱟᱱᱟ, ᱟᱢᱟᱜ ᱫᱚᱨᱚᱢ ᱞᱟᱭ ᱞᱟᱠᱪᱟᱨ ᱵᱟᱧᱪᱟᱣ ᱦᱚᱸ ᱩᱱᱟᱹᱜ ᱜᱮ ᱞᱟᱠᱛᱤᱜ ᱠᱟᱱᱟ᱾ ᱥᱚᱦᱚᱨ, ᱵᱟᱡᱟᱨ, ᱱᱟᱜᱟᱨ ᱨᱮ ᱪᱟᱹᱠᱨᱤ ᱞᱟᱹᱜᱤᱫ ᱛᱮ ᱢᱮᱱᱟᱜ ᱟᱠᱟᱫ ᱵᱚᱱ ᱠᱚ ᱵᱟᱹᱲᱛᱤ ᱠᱟᱛᱮ ᱪᱷᱟᱹᱛᱤᱠ ᱡᱟᱹᱛ ᱠᱚᱣᱟᱜ ᱞᱮᱜᱽ ᱟᱪᱟᱨ ᱟᱨᱤ ᱪᱟᱹᱞᱤ ᱠᱚᱵᱚᱱ ᱟᱯᱱᱟᱨ ᱡᱚᱝ ᱠᱟᱱᱟ, ᱟᱨ ᱟᱵᱚᱣᱟᱜ ᱨᱟᱭ ᱨᱤᱛ ᱫᱚᱵᱚᱱ ᱫᱮᱭᱟ ᱜᱤᱰᱤ ᱠᱟᱜ ᱠᱟᱱᱟ, ᱱᱤᱛ ᱟᱹᱛᱩ ᱚᱲᱟᱜ ᱠᱚᱨᱮ ᱦᱚᱸ ᱟᱹᱰᱤ ᱵᱟᱹᱲᱛᱤ ᱧᱮᱞᱚᱜ ᱠᱟᱱᱟ ᱥᱮ ᱵᱚᱱ ᱟᱯᱱᱟᱨ ᱮᱫ ᱠᱟᱱᱟ᱾ ᱱᱚᱣᱟ ᱠᱚ ᱴᱮᱠᱟᱣ ᱫᱟᱨᱟᱢ ᱨᱮᱱᱟᱝ ᱫᱟᱲᱮ ᱫᱚ ᱟᱵᱚ ᱟᱭᱚ ᱵᱟᱵᱟ ᱴᱷᱮᱱ ᱜᱮ ᱢᱮᱱᱟᱜᱼᱟ, ᱢᱮᱱ ᱫᱚ ᱟᱵᱚ ᱚᱱᱟ ᱵᱟᱵᱚᱱ ᱦᱩᱫᱤᱥ ᱫᱟᱲᱮ ᱭᱟᱜ ᱠᱟᱱᱟ᱾ ᱟᱯᱟᱱ ᱟᱹᱯᱤᱱ ᱨᱤᱱ ᱦᱚᱱ ᱜᱟᱬᱟ ᱠᱚ ᱥᱮᱪᱮᱫ ᱥᱤᱠᱷᱱᱟᱹᱛ ᱠᱟᱠᱚ ᱫᱚ ᱟᱹᱰᱤ ᱜᱮ ᱞᱟᱹᱠᱛᱤᱜ ᱠᱟᱱᱟ ᱟᱨ ᱮᱴᱟᱜ ᱯᱟᱹᱨᱥᱤ ᱛᱮ ᱨᱚᱲ ᱦᱚᱸ ᱥᱮᱬᱟ ᱡᱚᱝ ᱫᱚ ᱟᱹᱰᱤ ᱱᱟᱯᱟᱭ ᱠᱟᱛᱷᱟ ᱠᱟᱱᱟ, ᱢᱮᱱᱫᱚ ᱟᱯᱱᱟᱨᱟᱜ ᱡᱟᱹᱛᱤ ᱯᱟᱹᱨᱥᱤ ᱞᱮᱜᱽ ᱟᱪᱟᱨ ᱟᱹᱨᱤ ᱪᱟᱹᱞᱤ ᱛᱟᱞᱚᱢ ᱯᱟᱨᱚᱢ ᱠᱟᱛᱮ ᱦᱤᱲᱤᱧ ᱜᱤᱰᱤ ᱠᱟᱜ ᱫᱚ ᱟᱹᱰᱤ ᱢᱟᱨᱟᱝ ᱵᱟᱹᱲᱤᱡ ᱦᱚᱨ ᱵᱚᱱ ᱯᱟᱸᱡᱟ ᱭᱮᱜᱼᱟ᱾ ᱟᱨ ᱦᱚᱲ ᱠᱚ ᱴᱷᱮᱱ ᱞᱟᱹᱭ ᱵᱟᱲᱟ ᱟᱹᱰᱤ ᱨᱟᱹᱥᱠᱟᱹ ᱵᱚᱱ ᱟᱹᱭᱠᱟᱹᱣᱟ ᱵᱟᱝᱢᱟ ᱟᱞᱮᱭᱤᱡ ᱜᱤᱫᱽᱨᱟᱹ ᱫᱚ ᱦᱤᱱᱫᱤ ᱢᱮᱱᱢᱮ ᱤᱝᱜᱽᱞᱤᱥ ᱢᱮᱱᱢᱮ ᱟᱹᱰᱤ ᱵᱮᱥ ᱮ ᱨᱚᱲ ᱠᱮᱭᱟ ᱢᱮᱱᱠᱷᱟᱱ ᱥᱟᱱᱛᱟᱲ (ᱡᱟᱱᱟᱢ ᱟᱲᱟᱝ) ᱛᱮᱫᱚ ᱮᱠᱟᱞ ᱵᱟᱭ ᱨᱚᱲ ᱠᱮᱭᱟ᱾ᱜᱤᱫᱽᱨᱟᱹ ᱦᱚᱸ ᱡᱟᱱᱟᱢ ᱟᱲᱟᱝ ᱦᱤᱲᱤᱧ ᱠᱟᱛᱮ ᱟᱭᱚᱼᱵᱟᱵᱟ ᱵᱟᱝ ᱢᱮᱱ ᱠᱟᱛᱮ ᱢᱟᱹᱢᱢᱤᱼᱯᱟᱯᱯᱟ ᱥᱮ ᱢᱟᱹᱢᱢᱤᱼᱰᱟᱭᱰᱤ ᱠᱚ ᱢᱮᱱ ᱮᱫ ᱠᱟᱱᱟ ᱟᱹᱠᱷᱤᱨ ᱱᱚᱝᱠᱟ ᱫᱚ ᱪᱮᱫᱟᱜ? ᱡᱩᱫᱤ ᱮᱸᱜᱟᱛ ᱫᱚ ᱢᱟᱹᱢᱢᱤ ᱟᱨ ᱢᱟᱢᱚ ᱭᱤᱡ ᱚᱲᱟᱜ ᱮᱨᱟ ᱫᱚ ᱪᱤᱞᱤ ᱢᱮᱱ ᱠᱟᱛᱮ ᱦᱚᱼᱦᱚ ᱟᱭᱟᱭᱹᱹᱹᱹᱹᱹᱹᱹᱹᱹᱹᱹ? ᱚᱱᱟᱛᱮ ᱡᱟᱱᱟᱢ ᱟᱲᱟᱝ ᱛᱮ ᱨᱚᱲ ᱫᱚ ᱟᱞᱚᱵᱚᱱ ᱫᱮᱭᱟ ᱵᱟᱹᱜᱤᱭᱟᱜ ᱢᱟ, ᱡᱟᱹᱛᱤ ᱦᱩᱛᱤ ᱥᱟᱶᱛᱟ ᱜᱟᱸᱰᱟᱨ ᱫᱚ ᱟᱞᱚ ᱵᱚᱱ ᱵᱮᱱᱟᱜ ᱢᱟ᱾ ᱨᱚᱲ ᱟᱨ ᱥᱟᱹᱜᱟᱹᱭ ᱮᱴᱟᱜ ᱡᱟᱹᱛ ᱜᱮ ᱵᱚᱱ ᱯᱟᱸᱡᱟ ᱭᱮᱫ ᱠᱚᱣᱟ, ᱵᱟᱝ ᱫᱚ ᱮᱴᱟᱜ ᱡᱟᱹᱛ ᱵᱚᱱ ᱜᱚᱲᱚ ᱟᱠᱚ ᱠᱟᱱ, ᱵᱟᱝ ᱫᱚ ᱟᱵᱚ ᱜᱮ ᱥᱟᱬᱜᱚᱢ ᱚᱪᱚᱜ ᱦᱚᱨ ᱰᱟᱦᱟᱨ ᱵᱚᱱ ᱢᱟᱜ ᱯᱷᱟᱫᱟ ᱡᱚᱝ ᱠᱟᱱ᱾ ᱱᱤᱛᱚᱜ ᱥᱮᱪᱮᱫ ᱥᱟᱶᱛᱟ ᱢᱮᱱ ᱛᱮᱵᱚ ᱩᱭᱦᱟᱹᱨᱚᱜ ᱠᱟᱱᱟ, ᱞᱟᱹᱭ ᱢᱟᱵᱚᱱ ᱡᱮ ᱦᱟᱯᱲᱟᱢ ᱠᱚ ᱟᱵᱚ ᱞᱟᱹᱜᱤᱫ ᱡᱟᱭ ᱡᱩᱜᱽ ᱱᱟᱯᱟᱭ ᱟᱨ ᱱᱤᱨᱚᱲ ᱨᱮ ᱛᱟᱸᱦᱮ ᱠᱟᱛᱮ ᱵᱚᱸᱜᱟ ᱵᱩᱨᱩ, ᱞᱮᱜᱽ ᱟᱪᱟᱨ, ᱞᱟᱠᱪᱟᱨ ᱮᱱᱮᱡ ᱥᱮᱨᱮᱧ ᱠᱚ ᱥᱤᱨᱡᱟᱹᱣ ᱚᱴᱚ ᱟᱠᱟᱣᱟᱫ ᱵᱚᱱᱟ, ᱚᱱᱟᱠᱚ ᱱᱤᱛᱚᱜ ᱪᱮᱫᱟᱜ ᱵᱚᱱ ᱧᱮᱞ ᱰᱷᱤᱞᱟᱹᱣᱟ᱾ ᱪᱷᱩᱛ ᱪᱷᱟᱹᱴᱭᱟᱹᱨ ᱵᱮᱦᱟ ᱵᱟᱯᱞᱟ, ᱟᱨ ᱯᱟᱨᱟᱵ ᱯᱩᱱᱟᱹᱭ ᱨᱮ ᱟᱵᱚᱣᱟᱜ ᱵᱟᱡᱽ ᱵᱟᱡᱽᱱᱟ ᱦᱤᱲᱤᱧ ᱠᱟᱛᱮ ᱪᱷᱟᱹᱛᱤᱠ ᱵᱟᱡᱽᱱᱟ ᱛᱮ ᱰᱷᱚᱝ ᱵᱚᱱ ᱮᱱᱮᱡ ᱠᱟᱱᱟ, ᱮᱱᱠᱷᱟᱱ ᱥᱟᱱᱛᱟᱲ ᱥᱟᱶᱛᱟ ᱵᱟᱧᱪᱟᱣ ᱐ᱟᱦᱮᱱᱟ ᱪᱮᱠᱟᱛᱮ…ᱹᱹ? ᱟᱹᱛᱩ ᱨᱮᱱᱟᱜ ᱫᱷᱚᱨᱚᱢ ᱟᱠᱷᱲᱟ ᱨᱮ ᱢᱟᱹᱱᱢᱤ ᱥᱟᱶ ᱵᱚᱸᱜᱟ ᱵᱩᱨᱩ ᱦᱚᱸᱠᱚ ᱨᱟᱹᱥᱠᱟᱹᱭᱟ, ᱚᱱᱟ ᱫᱷᱚᱨᱚᱢ ᱴᱷᱟᱶ ᱨᱮᱦᱚᱸ ᱯᱟᱨᱟᱵ ᱯᱩᱱᱟᱹᱭ ᱨᱮ ᱪᱷᱟᱹᱛᱤᱠ ᱢᱟᱰᱮᱨ ᱛᱮ ᱨᱟᱹᱥᱠᱟᱹ ᱵᱚ ᱢᱮᱴᱟᱣᱼᱟ᱾ ᱢᱟᱥᱮ ᱦᱳ ᱡᱤᱣᱤᱫ ᱢᱟᱱᱣᱟ ᱪᱮᱫᱟᱜ ᱮᱢ ᱛᱷᱤᱨ ᱟᱠᱟᱱᱟ ᱜᱚᱡ ᱟᱠᱟᱱ ᱞᱮᱠᱟ᱾

ᱟᱞᱚᱢ ᱛᱟᱞᱚᱢ ᱟᱢᱟᱜ ᱫᱩᱞᱟᱹᱲ ᱥᱟᱶᱛᱟ
ᱞᱤᱪᱟᱹᱲ ᱞᱟᱵᱟᱲᱚᱜ ᱠᱟᱱ ᱩᱨᱤᱡ ᱥᱟᱶᱛᱟ᱾
ᱥᱤᱠᱷᱱᱟᱹᱛ ᱠᱟᱛᱮ ᱟᱢᱫᱚ ᱪᱮᱫᱟᱜ ᱵᱯᱟᱢ ᱢᱚᱱᱮ ᱮᱫ ᱪᱤᱨᱜᱟᱹᱞ,
ᱟᱢᱫᱚ ᱮᱱᱛᱮ ᱛᱤᱥᱮᱢ ᱧᱟᱢᱟ ᱥᱟᱶᱛᱟ ᱨᱮᱱᱟᱜ ᱯᱷᱩᱨᱜᱟᱹᱞ᱾
ᱮᱴᱟᱜ ᱥᱟᱶᱛᱟ ᱠᱚᱣᱟᱜ ᱯᱟᱸᱡᱟ ᱟᱠᱟᱫ ᱟᱢ ᱟᱢᱫᱚ ᱢᱟᱬᱟᱝ,
ᱵᱟᱢ ᱴᱷᱤᱠᱟᱹᱭᱮᱜᱼᱟ, ᱟᱢᱫᱚ ᱨᱟᱠᱟᱵ ᱠᱟᱱᱟᱢ ᱫᱤᱲᱦᱟᱹ ᱫᱟᱲᱟᱝ᱾
ᱥᱟᱶᱛᱟ ᱵᱟᱧᱪᱟᱣ ᱞᱟᱹᱜᱤᱫ ᱡᱩᱫᱤ ᱟᱢᱜᱮ ᱵᱟᱢ ᱥᱩᱨᱩᱜᱼᱟ,
ᱮᱱᱠᱷᱟᱱ ᱚᱠᱚᱭ ᱥᱩᱥᱟᱹᱨᱟ ᱚᱱᱟ ᱫᱚ ᱟᱡᱼᱟᱡ ᱛᱮᱜᱮ ᱧᱩᱨᱩᱜᱼᱟ᱾

ᱯᱷᱟᱹᱜᱩᱱ ᱵᱮᱲᱟ ᱨᱮᱭᱟᱜ ᱥᱟᱹᱜᱩᱱ ᱵᱮᱲᱟ ᱨᱮ ᱡᱚᱛᱚ ᱠᱷᱚᱱ ᱢᱟᱨᱟᱝ ᱯᱟᱨᱟᱵ “ᱵᱟᱦᱟ” ᱵᱚᱸᱜᱟ ᱵᱩᱨᱩ ᱩᱢ ᱟᱹᱨᱩᱵ, ᱯᱮᱨᱮᱡ ᱩᱢᱟᱹᱬ ᱥᱟᱶ ᱡᱟᱦᱮᱨ ᱨᱮ ᱨᱟᱹᱥᱠᱟᱹ ᱜᱮ ᱮᱱᱮᱡ ᱥᱮᱨᱮᱧ, ᱵᱚᱸᱜᱟ ᱵᱩᱨᱩ ᱨᱮ ᱛᱤᱱᱟᱹᱜ ᱵᱚᱱ ᱥᱩᱨᱩᱜ ᱠᱟᱱᱟ ᱟᱨ ᱪᱮᱫ ᱞᱮᱠᱟ ᱵᱚᱱ ᱬᱟᱱᱟᱣᱟ, ᱚᱱᱟ ᱫᱚ ᱟᱯᱟᱱ ᱟᱯᱤᱱᱜ ᱮ ᱩᱭᱦᱟᱹᱨ ᱢᱟ, ᱪᱷᱟᱴᱭᱟᱹᱨ ᱨᱮᱱᱟᱜ ᱞᱟᱠᱛᱤᱜ ᱫᱚ ᱵᱟᱱᱩᱜᱼᱟ᱾ ᱱᱚᱴᱮ ᱪᱷᱟᱹᱛᱤᱠ ᱠᱚᱣᱟᱜ ᱵᱚᱸᱜᱟ ᱵᱩᱨᱩ ᱨᱮᱫᱚ ᱜᱤᱫᱟᱹᱨ ᱯᱤᱫᱟᱹᱨ ᱛᱤᱭᱟᱹᱜ ᱥᱩᱛᱩᱜ ᱠᱟᱛᱮ ᱨᱩᱢᱡᱷᱟᱣ ᱥᱟᱺᱦᱤᱡ ᱢᱤᱫ ᱛᱮ ᱥᱟᱱᱟᱢ ᱠᱚᱵᱚᱱ ᱥᱮᱴᱮᱨᱚᱜ ᱠᱟᱱᱟ᱾ ᱵᱟᱦᱟ ᱫᱚᱥᱟᱨ ᱦᱤᱞᱚᱜ ᱥᱟᱹᱜᱩᱱ ᱞᱟᱹᱜᱤᱫ ᱜᱟᱯᱟᱱᱚᱜ ᱦᱚᱲ ᱠᱚ ᱫᱟᱜ ᱠᱚ ᱫᱩᱯᱩᱞᱟ, ᱚᱱᱟ ᱠᱚᱢᱟ ᱵᱟᱝ ᱧᱮᱞᱚᱜ ᱠᱟᱱᱟ, ᱢᱮᱱ ᱠᱷᱟᱱ ᱱᱚᱣᱟ ᱫᱚ ᱟᱹᱰᱤ ᱯᱩᱥᱴᱟᱹᱣ ᱥᱟᱺᱦᱤᱡ ᱟᱨᱥᱤ ᱛᱮ ᱡᱷᱟᱞᱠᱟᱜ ᱞᱮᱠᱟ ᱧᱮᱞᱚᱜᱚᱜ ᱠᱟᱱᱟ ᱮᱴᱟᱜ ᱪᱷᱟᱹᱛᱤᱠ ᱡᱟᱹᱛᱤ ᱠᱚᱣᱟᱜ “ᱦᱳᱞᱤ” ᱯᱟᱨᱟᱵ ᱨᱮ ᱨᱚᱝ ᱞᱟᱜᱟᱣ ᱫᱚ ᱠᱚᱲᱟ ᱠᱩᱲᱤ ᱟᱹᱰᱤ ᱡᱟᱸᱠ ᱡᱚᱢᱚᱠ ᱵᱚ ᱢᱟᱱᱟᱣᱮᱜᱼᱟ, ᱟᱨ ᱵᱚ ᱵᱟᱛᱟᱣᱮᱜᱼᱟ᱾ᱱᱚᱣᱟ ᱠᱚᱫᱚ ᱡᱩᱢᱤᱫ ᱨᱮᱭᱟᱜ ᱫᱟᱲᱮ ᱛᱮᱫ ᱥᱮ ᱥᱟᱶᱛᱟ ᱞᱮᱣᱰᱷᱟ ᱨᱮᱭᱟᱜ ᱥᱚᱲᱮ ᱛᱮᱫ᱾ ᱱᱚᱣ ᱟᱜᱮ ᱥᱮᱪᱮᱫ ᱥᱟᱶᱛᱟ ᱨᱮᱭᱟᱜ ᱠᱟᱹᱨᱫᱷᱟᱹᱱᱤ ᱥᱮ ᱥᱮᱪᱮᱫ ᱢᱟᱹᱱᱢᱤ ᱠᱚᱣᱟᱜ ᱜᱟᱹᱱᱤ ᱥᱟᱹᱱᱤ᱾ ᱥᱟᱶᱛᱟ ᱨᱤᱱ ᱦᱚᱲ ᱜᱮ ᱥᱟᱶᱛᱟ ᱡᱷᱟᱲᱟᱜ ᱨᱮᱭᱟᱜ ᱵᱚᱱ ᱠᱟᱹᱢᱤ ᱠᱟᱱᱟ᱾ ᱪᱟᱹᱥᱤ ᱦᱚᱲᱟᱜ ᱢᱟ ᱡᱷᱟᱲᱟ ᱯᱟᱨᱪᱟᱣ ᱞᱮᱱ ᱠᱷᱟᱱ ᱪᱮᱫ ᱮ ᱠᱟᱹᱢᱤᱭᱟ, ᱵᱟᱹᱫᱽ ᱨᱮ ᱦᱩᱲᱩ ᱛᱟᱦᱮᱱ ᱨᱮᱦᱚᱸ ᱦᱩᱲᱩ ᱢᱟᱞᱚᱴ ᱩᱛᱟᱹᱨᱚᱜᱼᱟ, ᱚᱱᱠᱟ ᱜᱮ ᱱᱤᱛ ᱟᱹᱫᱤᱢ ᱥᱟᱶᱛᱟ ᱨᱤᱱ ᱦᱚᱲ ᱵᱚᱱ ᱚᱯᱮᱞᱚᱜ ᱠᱟᱱᱟ ᱢᱟᱱᱣᱟ ᱥᱟᱱᱟᱢ ᱠᱚᱜᱮ ᱡᱷᱟᱲᱟ ᱞᱮᱠᱟ ᱵᱚᱱ ᱠᱟᱹᱢᱤ ᱠᱟᱱᱟ᱾ᱡᱩᱫᱤ ᱱᱤᱛᱚᱜ ᱢᱮᱱᱟᱜ ᱟᱱ ᱠᱚ ᱥᱟᱶᱛᱟ ᱨᱮ ᱱᱟᱯᱟᱭ ᱩᱭᱦᱟᱹᱨ ᱦᱚᱲᱠᱚ ᱥᱟᱶᱛᱟ ᱱᱟᱯᱟᱭ ᱞᱟᱹᱜᱤᱫ ᱵᱟᱝ ᱠᱚ ᱩᱭᱦᱟᱹᱨᱟ ᱮᱱᱠᱷᱟᱱ ᱥᱟᱶᱛᱟ ᱪᱷᱤᱱ ᱪᱷᱟᱛᱩᱨᱚᱜ ᱞᱟᱹᱜᱤᱫ ᱚᱠᱛᱚ ᱫᱚ ᱥᱮᱴᱮᱨ ᱩᱛᱟᱹᱨ ᱟᱠᱟᱱᱟ᱾ᱢᱟᱥᱮ ᱮᱱᱠᱷᱟᱱ ᱥᱟᱱᱟᱢ ᱥᱟᱶᱛᱟ ᱫᱩᱞᱟᱹᱲᱤᱭᱟᱹ, ᱥᱟᱶᱛᱟ ᱫᱚᱨᱚᱫᱤᱭᱟᱹ ᱵᱚᱭᱦᱟ ᱢᱤᱥᱤ ᱠᱚᱴᱷᱮᱱ ᱱᱮᱦᱚᱨ ᱟᱨᱫᱟᱥ ᱵᱤᱱᱛᱤ ᱛᱟᱦᱮᱱ ᱠᱟᱱᱟ, ᱪᱮᱫ ᱞᱮᱠᱟ ᱠᱟᱹᱢᱤ ᱞᱮᱠᱷᱟᱱ ᱯᱟᱨᱪᱟᱜ ᱠᱟᱱ ᱥᱟᱶᱛᱟ ᱨᱮ ᱡᱷᱟᱲᱟ ᱞᱮᱠᱟᱱᱟᱜ ᱠᱟᱹᱢᱤ ᱠᱚ ᱢᱩᱜᱪᱟᱹᱫ ᱦᱩᱭᱩᱜᱼᱟ᱾ ᱥᱮᱫᱟᱭ ᱟᱹᱜᱤᱞ ᱦᱟᱯᱲᱟᱢ ᱠᱚ ᱥᱤᱨᱡᱟᱹᱣ ᱚᱴᱚ ᱟᱠᱟᱣᱟᱫ ᱵᱚᱱ ᱱᱤᱨᱟᱹᱭ ᱱᱤᱯᱷᱩᱴ ᱥᱟᱶᱛᱟ ᱡᱤᱣᱤᱫ ᱡᱤᱭᱟᱹᱲ ᱵᱚᱱ ᱫᱚᱦᱚᱭᱟ᱾

ᱫᱷᱚᱨᱚᱢ ᱜᱮ ᱥᱟᱹᱨᱤ ᱢᱮᱱᱫᱚ
ᱯᱟᱯ ᱟᱞᱚᱢ ᱟᱨᱡᱟᱣ ᱟᱢᱫᱚ,
ᱯᱟᱯ ᱛᱟᱢ ᱪᱷᱟᱨᱟ ᱣᱚᱜ
ᱫᱷᱚᱨᱚᱢ ᱛᱟᱢ ᱦᱟᱨᱟ ᱣᱚᱜ
ᱡᱟᱹᱛᱤ ᱛᱟᱢ ᱠᱷᱟᱨᱟ ᱣᱚᱜ᱾

Written by ᱥᱭᱟᱢ ᱪᱚᱨᱚᱱ ᱢᱩᱨᱢᱩ
Published on Arsi (ᱥᱚᱦᱨᱟᱭ – ᱯᱩᱥ, 2013-14)