ᱵᱤᱨ ᱵᱟᱦᱟ

ᱱᱚᱣᱟ ᱞᱮᱻ ᱞᱮᱸᱜᱮᱫ ᱫᱷᱟᱹᱨᱛᱤ ᱯᱩᱨᱤ ᱨᱮ, ᱥᱤᱥᱤᱨᱡᱟᱹᱣᱤᱡᱟᱜ ᱦᱟᱦᱟᱲᱟ ᱞᱤᱠᱷᱚᱱ, ᱦᱟᱦᱟᱲᱟ ᱥᱤᱨᱡᱚᱱ, ᱥᱤᱨᱡᱚᱱ ᱫᱚ ᱚᱠᱚᱭ? ᱚᱠᱟᱨᱮ ᱢᱮᱱᱟᱭᱟ? ᱚᱛ ᱥᱮᱨᱢᱟ , ᱫᱷᱟᱹᱨᱛᱤ, ᱯᱟᱛᱟᱞ, ᱵᱤᱨ, ᱵᱩᱨᱩ, ᱫᱟᱨᱮ, ᱱᱟᱹᱲᱤ, ᱜᱟᱰᱟ, ᱢᱩᱰᱩ, ᱫᱚᱨᱭᱟ ᱥᱤᱨᱡᱚᱱ ᱫᱚ ᱟᱹᱰᱤ ᱦᱟᱦᱟᱲᱟ ᱜᱮᱭᱟ᱾ ᱦᱚᱭ ᱵᱟᱹᱨᱰᱩ, ᱟᱨᱮᱞ, ᱚᱠᱛᱚ ᱡᱟᱹᱱᱤᱡ ᱟᱹᱪᱩᱨ ᱵᱤᱦᱩᱨᱚᱜ ᱠᱟᱱᱟ᱾ ᱢᱟᱹᱱᱢᱤᱭᱟᱜ ᱡᱤᱭᱚᱱ ᱫᱚᱞᱟᱦᱤ ᱦᱚᱸ ᱚᱱᱠᱟᱜᱮ ᱰᱚᱭᱞᱟᱝ ᱥᱮᱱᱚᱜ ᱠᱟᱱᱟ᱾ ᱱᱚᱝᱠᱟ ᱦᱟᱦᱟᱲᱟ ᱪᱤᱛᱟᱹᱨ ᱠᱚᱜᱮ ᱢᱟᱹᱭ ᱵᱟᱦᱟᱦᱟᱜ ᱢᱚᱱᱮ ᱢᱮᱫ ᱨᱮ ᱡᱷᱟᱞᱠᱟᱣ ᱨᱟᱠᱟᱵ ᱠᱟᱱᱟ᱾ ᱫᱷᱟᱹᱨᱛᱤ ᱫᱚ ᱛᱤᱱᱟᱹᱜ ᱢᱟᱨᱟᱝᱟ ᱵᱟᱭ ᱵᱟᱰᱟᱭᱟ, ᱫᱚᱨᱭᱟ ᱛᱤᱱᱟᱹᱜ ᱞᱮᱻᱞᱮᱸᱜᱮᱫᱼᱟ ᱵᱟᱭ ᱩᱭᱦᱟᱹᱨ ᱠᱮᱭᱟ, ᱢᱟᱹᱱᱢᱤ ᱱᱚᱢᱮ ᱨᱮ ᱛᱤᱱᱟᱹᱜ ᱦᱟᱹᱴᱤᱧ ᱢᱮᱱᱟᱜᱼᱟ ᱚᱱᱟ ᱦᱚᱸ ᱵᱟᱭ ᱵᱟᱰᱟᱭᱟ᱾ ᱪᱤᱠᱟᱹᱭ ᱵᱟᱰᱟᱭᱟ? ᱪᱤᱠᱟᱹᱛᱮᱭ ᱵᱟᱰᱟᱭᱟ?

ᱵᱟᱦᱟ ᱢᱟᱹᱭ ᱫᱚ ᱢᱚᱦᱮ ᱠᱷᱚᱱ ᱵᱷᱩᱴᱩᱜ ᱠᱟᱛᱮ ᱵᱩᱨᱩ ᱫᱚᱞᱟ ᱦᱤᱨᱮᱭ ᱨᱟᱹᱥᱠᱟᱹ ᱡᱚᱝᱟ, ᱮᱠᱞᱟ ᱡᱤᱭᱚᱱ ᱨᱮ᱾ ᱩᱱᱫᱚ ᱞᱩᱜᱩ ᱵᱩᱨᱩ ᱜᱷᱟᱱᱴᱟ ᱵᱟᱲᱮ ᱟᱹᱨᱩᱴ ᱵᱤᱨ ᱫᱟᱨᱮ ᱵᱟᱹᱲᱤᱛᱮ ᱥᱟᱡᱟᱣ ᱛᱟᱸᱦᱮ ᱠᱟᱱᱟ᱾ ᱵᱩᱨᱩ ᱫᱷᱟᱥᱱᱟ ᱥᱤᱛᱟᱹ ᱱᱟᱞᱟ ᱜᱟᱰᱟ ᱫᱟᱜ ᱥᱮᱨᱮᱧ ᱟᱛᱮᱭ ᱫᱟᱹᱲ ᱠᱟᱜ ᱛᱟᱸᱦᱮᱫ᱾ ᱞᱩᱜᱩ ᱵᱩᱨᱩ ᱜᱷᱟᱱᱴᱟ ᱵᱟᱲᱮ ᱚᱱᱟ ᱵᱤᱨ ᱛᱟᱞᱟ ᱜᱟᱡᱟᱲ ᱫᱟᱱᱟᱝ ᱫᱷᱤᱨᱤ ᱠᱷᱚᱸᱜᱚᱨ ᱨᱮ ᱵᱟᱦᱟ ᱧᱩᱛᱩᱢᱟᱹᱱᱤᱡ ᱢᱟᱹᱱᱢᱤ ᱵᱮᱥᱛᱮ ᱢᱤᱫ ᱵᱚᱸᱜᱟ ᱠᱩᱲᱤᱭ ᱛᱟᱸᱦᱮ ᱠᱟᱱᱟ᱾ ᱧᱮᱞ ᱡᱚᱝᱛᱮ ᱪᱮᱦᱨᱟ ᱪᱚᱨᱚᱠ, ᱵᱮᱱᱟᱣ ᱵᱚᱸᱜᱟ ᱢᱩᱴᱷᱟᱹᱱ, ᱵᱩᱨᱩ ᱨᱮᱱᱟᱜ ᱱᱟᱹᱲᱤ ᱵᱟᱦᱟᱛᱮ ᱥᱟᱡᱟᱣ ᱪᱷᱮᱢᱮᱠ ᱮ ᱫᱟᱸᱲᱟ ᱡᱚᱝ ᱛᱟᱸᱦᱮᱫ᱾ ᱚᱠᱚᱭ ᱢᱟᱹᱱᱢᱤ ᱦᱚᱸ ᱩᱱᱤ ᱫᱳ ᱵᱟᱭ ᱧᱮᱞ ᱟᱠᱟᱫ ᱠᱚᱣᱟ᱾ ᱥᱤᱧ ᱵᱮᱲᱟ ᱵᱤᱨ ᱡᱤᱭᱟᱹᱞᱤ ᱥᱟᱞᱟᱜ ᱠᱷᱮᱞᱚᱸᱰ ᱠᱟᱛᱮ ᱮᱱᱮᱡ ᱥᱮᱨᱮᱧ, ᱧᱤᱫᱟᱹ ᱵᱮᱲᱟ ᱫᱚ ᱵᱩᱨᱩ ᱨᱮᱱᱟᱜ ᱫᱷᱤᱨᱤ ᱜᱷᱚᱸᱜᱚᱨ ᱨᱮ ᱡᱟᱹᱯᱤᱫ ᱠᱟᱛᱮ ᱟᱹᱠᱷᱤᱨ ᱡᱤᱭᱚᱱ ᱠᱩᱠᱢᱩᱭ ᱧᱮᱞᱟ᱾ ᱦᱟᱱᱟ ᱵᱩᱨᱩ ᱠᱷᱚᱱ ᱱᱷᱟᱣᱟ ᱵᱩᱨᱩ, ᱠᱩᱠᱢᱩ ᱨᱩᱯᱛᱮᱭ ᱩᱰᱟᱹᱣ ᱟᱫᱮ ᱨᱚᱜ ᱛᱟᱸᱦᱮᱫ᱾ ᱥᱮᱨᱮᱧ ᱨᱟᱦᱟᱛᱮ ᱵᱩᱨᱩ ᱫᱷᱟᱥᱱᱟ ᱟᱸᱫᱚᱲ ᱠᱚᱜᱼᱟ, ᱫᱟᱨᱮ ᱱᱟᱹᱲᱤ ᱦᱟᱞᱟᱭ ᱦᱚᱭ ᱟᱡᱟᱜ ᱥᱮᱨᱮᱧ ᱠᱚ ᱛᱮᱞᱟ ᱨᱩᱣᱟᱹᱲᱟ᱾ ᱠᱩᱞ ᱛᱟᱹᱨᱩᱵ ᱦᱩᱸᱠᱨᱟᱹᱣ ᱦᱟᱯᱤᱫ ᱜᱚᱫᱚᱜᱼᱟ, ᱢᱟᱨᱟᱜ ᱦᱤᱸᱭᱚᱲ ᱛᱷᱤᱨ ᱛᱷᱟᱨᱚᱜᱼᱟ, ᱪᱮᱬᱮ ᱪᱤᱯᱨᱩᱜ ᱨᱟᱜ, ᱢᱟᱞᱟ ᱯᱚᱛᱟᱢ ᱠᱩᱠᱩ ᱰᱩᱵᱩᱨ ᱦᱚᱴᱚᱜ ᱨᱮᱜᱮ ᱴᱷᱟᱠᱮᱫ ᱜᱚᱫᱚᱜᱼᱟ, ᱡᱟᱹᱱᱤᱡ ᱥᱟᱱᱟᱢᱟᱜ ᱛᱮ ᱵᱟᱦᱟ ᱢᱟᱹᱭᱟᱜ ᱥᱮᱨᱮᱧ ᱜᱮᱠᱚ ᱟᱛᱟᱝ ᱫᱟᱨᱟᱢ ᱠᱟᱜᱼᱟ᱾ ᱟᱹᱨᱩᱴ ᱵᱤᱨ ᱛᱟᱞᱟ ᱱᱚᱝᱠᱟ ᱮᱥᱠᱟᱨ ᱜᱮᱭ ᱛᱟᱸᱦᱮ ᱠᱟᱱᱛᱮ, ᱩᱱᱤ ᱫᱚ ᱵᱤᱨ ᱵᱟᱦᱟ ᱜᱮ ᱧᱩᱛᱩᱢ ᱛᱟᱭᱫᱚ᱾ ᱵᱩᱨᱩ ᱱᱩᱱᱟᱹᱜ ᱟᱹᱨᱩᱴ ᱛᱟᱸᱦᱮ ᱠᱟᱱᱟ, ᱢᱟᱹᱱᱢᱤ ᱪᱚᱦᱚᱲ ᱥᱮ ᱚᱲᱟᱜ ᱫᱩᱣᱟᱹᱨ ᱮᱠᱟᱞ ᱵᱟᱝ ᱛᱟᱸᱦᱮ ᱠᱟᱱᱟ᱾ ᱢᱟᱹᱱᱢᱤ ᱩᱱᱫᱚ ᱩᱱᱟᱹᱜ ᱫᱟᱹᱨᱭᱟᱹ ᱦᱚᱸ ᱵᱟᱝᱠᱚ ᱛᱟᱸᱦᱮ ᱠᱟᱱᱟ᱾ ᱵᱩᱨᱩ ᱨᱮᱱᱟᱜ ᱫᱷᱤᱨᱤ ᱜᱷᱚᱸᱜᱚᱨ, ᱫᱷᱟᱥᱱᱟ ᱨᱮ ᱥᱟᱠᱟᱢ ᱠᱩᱸᱵᱟᱹ ᱚᱲᱟᱜ ᱫᱳ ᱵᱟᱦᱟ ᱢᱟᱹᱭᱟᱜ ᱢᱚᱦᱚᱞ ᱛᱟᱸᱦᱮ ᱠᱟᱱᱟ᱾ ᱱᱚᱝᱠᱟᱱ ᱵᱩᱨᱩ ᱛᱟᱞᱟ ᱫᱷᱤᱨᱤ ᱚᱲᱟᱜ, ᱜᱷᱟᱱᱮ ᱥᱟᱠᱟᱢ ᱠᱩᱸᱵᱟᱹ ᱵᱚᱸᱜᱟ ᱞᱮᱠᱟ ᱵᱟᱦᱟ ᱢᱟᱹᱭ ᱮᱥᱠᱟᱨᱮ ᱛᱟᱸᱦᱮ ᱠᱟᱱᱟ᱾ ᱵᱤᱨ ᱨᱤᱱ ᱪᱮᱬᱮ ᱪᱤᱯᱩᱨᱜ, ᱦᱩᱣᱟᱹᱲ, ᱢᱟᱨᱟᱜ, ᱪᱤᱛᱨᱤ, ᱠᱩᱞᱟᱹᱭ ᱥᱟᱱᱟᱢ ᱡᱤᱭᱟᱹᱞᱤ ᱜᱮ ᱟᱡ ᱨᱤᱱ ᱡᱤᱣᱤ ᱜᱟᱛᱮ᱾ ᱱᱩᱠᱩ ᱜᱮ ᱟᱡ ᱨᱤᱱ, ᱟᱡ ᱫᱚ ᱟᱠᱚᱨᱤᱱ ᱵᱚᱸᱜᱟ ᱢᱟᱹᱭ ᱞᱮᱠᱟᱭ ᱛᱟᱸᱦᱮ ᱠᱟᱱᱟ᱾

ᱥᱩᱠ ᱥᱩᱠ ᱮᱯᱮᱢ ᱪᱟᱯᱟᱞ, ᱥᱤᱛᱩᱝ ᱡᱟᱹᱯᱩᱫ ᱨᱮᱭᱟᱲ, ᱨᱟᱵᱟᱝ, ᱦᱟᱹᱴᱤᱧ ᱦᱟᱯᱟᱹᱴᱤᱧ ᱟᱛᱮ ᱠᱚ ᱜᱷᱩᱲ ᱠᱚᱜᱼᱟ᱾ ᱨᱮᱸᱜᱮᱡ ᱛᱮᱛᱟᱝ ᱡᱚᱢ ᱧᱩ, ᱟᱹᱰᱤ ᱥᱩᱠ, ᱥᱩᱞᱩᱠ ᱱᱤᱨᱟᱹᱭ ᱛᱮ ᱱᱚᱝᱠᱟ ᱚᱠᱛᱚ ᱫᱚ ᱯᱟᱨᱚᱢ ᱪᱟᱞᱟᱜ ᱛᱟᱠᱚᱣᱟ᱾ ᱵᱟᱦᱟ ᱢᱟᱹᱭ ᱩᱱᱠᱩ ᱥᱟᱱᱟᱢ ᱡᱤᱤᱭᱟᱹᱞᱤ, ᱟᱡ ᱨᱤᱱ ᱡᱤᱣᱤ ᱵᱚᱭᱦᱟ ᱞᱮᱠᱟᱭ ᱟᱯᱱᱟᱨ ᱠᱚ ᱛᱟᱸᱦᱮᱫ᱾ ᱵᱩᱨᱩ ᱛᱟᱞᱟ ᱮᱠᱞᱟ ᱱᱤᱥᱚᱱ ᱵᱟᱦᱟ ᱢᱟᱹᱭᱟᱜ ᱥᱮᱨᱮᱧ ᱚᱠᱛᱚ ᱫᱚ ᱥᱟᱱᱟᱢ ᱠᱚ ᱟᱛᱮᱱ ᱟᱛᱮᱱ ᱢᱤᱫᱽ ᱛᱮᱠᱚ ᱞᱮᱣᱮᱨ ᱠᱚᱫᱚᱨᱚᱜᱼᱟ᱾ ᱢᱟᱨᱟᱜ ᱯᱷᱟᱹᱠᱲᱟᱹᱜ ᱰᱷᱟᱞ ᱠᱟᱛᱮ, ᱠᱩᱞᱟᱹᱭ ᱞᱩᱛᱩᱨ ᱵᱤᱫ ᱠᱟᱛᱮ ᱢᱤᱫ ᱛᱟᱞᱛᱮ ᱡᱤᱣᱤ ᱩᱞᱟᱹᱥᱤ ᱠᱚ ᱨᱟᱹᱥᱠᱟᱹᱭᱟ, ᱞᱟᱸᱫᱟᱭᱟ᱾ ᱞᱮᱜᱮᱡᱼᱞᱮᱜᱮᱡ ᱦᱟᱹᱨᱭᱟᱹᱲ ᱜᱷᱟᱸᱥ, ᱯᱚᱦᱟᱞ ᱯᱚᱦᱟ ᱠᱟᱪᱨᱟᱫ ᱫᱟᱨᱮ, ᱞᱩᱜᱩᱼᱵᱩᱨᱩ ᱜᱷᱟᱱᱴᱟ ᱵᱟᱲᱮ, ᱥᱤᱛᱟᱹ ᱱᱟᱞᱟ ᱜᱟᱰᱟ ᱛᱟᱞᱟ ᱵᱟᱦᱟ ᱢᱟᱹᱭ ᱫᱚᱭ ᱜᱩᱸᱜᱩᱫ ᱠᱚᱜ ᱛᱟᱸᱦᱮᱫ᱾ ᱥᱮᱛᱟᱜ ᱯᱟᱭᱟᱨ ᱪᱮᱬᱮ ᱪᱮᱨᱚᱼᱵᱮᱨᱚ, ᱢᱟᱨᱟᱝ ᱦᱩᱣᱟᱹᱲ ᱥᱮᱨᱮᱧ ᱨᱟᱦᱟᱛᱮ ᱡᱟᱹᱯᱤᱫ ᱠᱷᱚᱱᱟᱜ ᱵᱚᱸᱜᱟ ᱢᱟᱹᱭ ᱫᱚᱠᱚ ᱦᱚᱦᱚ ᱵᱮᱨᱮᱫ ᱮ ᱛᱟᱸᱦᱮᱫ᱾

ᱥᱟᱱᱟᱢ ᱡᱤᱭᱟᱹᱞᱤ ᱜᱮ ᱩᱱᱤ ᱫᱚ ᱟᱹᱰᱤ ᱠᱚ ᱠᱩᱥᱤ ᱫᱩᱞᱟᱹᱲ ᱟᱭᱟ᱾ ᱵᱟᱦᱟ ᱢᱟᱹᱭ ᱫᱚ ᱥᱟᱨᱟ ᱜᱷᱟᱹᱲᱤ ᱜᱮ ᱠᱩᱥᱤ ᱨᱟᱹᱥᱠᱟᱹ ᱛᱮ, ᱵᱟᱱ ᱫᱟᱜ ᱞᱮᱠᱟᱭ ᱪᱮᱦᱮᱞ ᱪᱮᱯᱮᱞ ᱠᱚᱜ ᱛᱟᱸᱦᱮᱫᱼᱟ᱾ ᱧᱮᱞ ᱡᱚᱝ ᱛᱮ ᱪᱮᱦᱨᱟ ᱪᱚᱨᱚᱠ, ᱡᱩᱞᱩᱜ ᱤᱧᱯᱤᱞ ᱢᱩ ᱢᱮᱫ ᱦᱟᱸ, ᱢᱩᱞᱩᱜ ᱪᱟᱸᱫᱚ ᱢᱚᱪᱟ, ᱟᱴᱟᱞ ᱵᱟᱦᱟ ᱛᱷᱚᱛᱱᱟ, ᱠᱟᱹᱯᱤᱞ ᱜᱟᱹᱭ ᱪᱟᱶᱟᱨ ᱵᱚᱦᱚᱜ ᱩᱵ, ᱵᱮᱱᱟᱣ ᱵᱚᱸᱜᱟ ᱢᱩᱴᱷᱟᱹᱱ ᱠᱷᱚᱱᱦᱚᱸ ᱟᱹᱰᱤᱭ ᱥᱚᱨᱮᱥ ᱜᱮᱭᱟ᱾ ᱚᱠᱚᱭ ᱢᱟᱹᱱᱢᱤ ᱦᱚᱸ ᱩᱱᱤᱭᱟᱜ ᱨᱩᱯ ᱯᱚᱨᱟᱭᱱᱤ ᱵᱟᱠᱚ ᱥᱩᱜ ᱜᱮᱞᱮᱡ ᱟᱠᱟᱫᱼᱟ, ᱢᱚᱦᱚᱨ ᱵᱟᱠᱚ ᱧᱮᱞ ᱜᱮᱞᱟ ᱟᱠᱟᱫᱼᱟ᱾ ᱞᱩᱜᱩ ᱵᱩᱨᱩ ᱜᱷᱟᱱᱴᱟ ᱵᱟᱲᱮ ᱴᱷᱟᱶ ᱫᱚ ᱟᱹᱰᱤ ᱥᱩᱞᱩᱠ ᱟᱨ ᱱᱤᱨᱟᱹᱭ ᱛᱮ ᱛᱟᱸᱦᱮ ᱠᱟᱱᱟ᱾ ᱚᱸᱰᱮ ᱫᱚ ᱞᱚᱵᱽ, ᱞᱟᱞᱚᱪ, ᱦᱤᱸᱥᱟᱹ ᱥᱩᱭᱟᱹ, ᱯᱟᱯ ᱯᱟᱹᱯᱤ ᱨᱮᱱᱟᱜ ᱪᱮᱫ ᱵᱚᱛᱚᱨ ᱦᱚᱸᱜᱮ ᱵᱟᱝ ᱡᱷᱟᱞᱠᱟᱜ ᱛᱟᱸᱦᱮ ᱠᱟᱱᱟ᱾ ᱥᱟᱱᱟᱢ ᱵᱩᱨᱩ ᱫᱷᱟᱥᱱᱟ ᱥᱩᱞᱩᱠ ᱱᱤᱨᱟᱹᱭ ᱜᱮ ᱛᱟᱨᱟᱥ ᱞᱮᱠᱟ ᱛᱟᱨᱥᱮ ᱛᱟᱸᱦᱮ ᱠᱟᱱᱟ᱾ ᱵᱚᱸᱜᱟ ᱠᱩᱲᱤ ᱵᱟᱦᱟ ᱢᱟᱹᱭ ᱵᱩᱨᱩ ᱞᱚᱫᱟᱢ ᱵᱤᱨ ᱛᱟᱞᱟ ᱨᱟᱹᱥᱠᱟᱹ ᱦᱩᱞᱟᱹᱝ ᱮᱠᱞᱟ ᱜᱮᱭ ᱫᱟᱬᱟ ᱵᱟᱲᱟ ᱡᱚᱝᱟ, ᱞᱮᱜᱮᱡ ᱫᱟᱨᱮ ᱱᱟᱹᱲᱤ ᱨᱮᱱᱟᱜ ᱥᱟᱠᱟᱢ ᱟᱴᱮᱫ ᱠᱟᱛᱮ ᱢᱚᱱ ᱡᱤᱭᱚᱱᱮ ᱜᱤᱛᱤᱡ ᱫᱩᱲᱩᱵ ᱡᱚᱝᱟ, ᱟᱡ ᱠᱩᱥᱤ, ᱟᱡᱟᱜ ᱢᱚᱱᱮ ᱡᱟᱦᱟᱸᱭ ᱞᱟᱹᱭᱟ, ᱚᱠᱚᱭ ᱦᱚᱸ ᱢᱟᱱᱟ ᱟᱠᱚᱴ ᱨᱤᱱ ᱵᱟᱠᱚ ᱛᱟᱸᱦᱮ ᱠᱟᱱᱟ᱾ ᱜᱷᱟᱱᱮ ᱞᱩᱜᱩ ᱵᱩᱨᱩ ᱨᱤᱱ ᱪᱮᱬᱮ ᱪᱤᱯᱨᱩᱜ ᱥᱟᱞᱟᱜ ᱟᱡᱟᱜ ᱥᱮᱨᱮᱧ ᱨᱟᱦᱟᱭ ᱡᱚᱲ ᱛᱟᱸᱦᱮᱫ, ᱜᱷᱟᱱᱮ ᱱᱤᱨ ᱨᱮᱱᱟᱜ ᱡᱚ ᱵᱟᱦᱟ ᱛᱮ ᱢᱚᱱ ᱠᱩᱥᱤ ᱜᱟᱞᱟᱝ ᱢᱟᱞᱟ ᱛᱮᱭᱟᱨ ᱠᱟᱛᱮ ᱦᱚᱴᱚᱜ ᱯᱮᱨᱮᱡ ᱢᱟᱞᱟᱛᱮᱭ ᱥᱟᱡᱟᱣ ᱠᱚᱜᱼᱟ᱾ ᱡᱤᱞᱤᱧ ᱩᱵ ᱵᱟᱦᱟ ᱛᱷᱩᱯᱱᱟᱹᱜ ᱛᱮ ᱜᱟᱞᱟᱝ ᱠᱟᱛᱮ ᱵᱤᱨ ᱨᱮᱱᱟᱜ ᱫᱟᱨᱮ ᱵᱟᱦᱟ ᱞᱮᱠᱟᱭ ᱞᱮᱣᱮᱨ ᱠᱚᱫᱚᱨᱚᱜᱼᱟ᱾ ᱵᱩᱨᱩ ᱫᱷᱟᱥᱱᱟ ᱛᱮ ᱞᱟᱸᱫᱟᱭ ᱞᱮᱠᱟ ᱫᱟᱹᱲ ᱟᱸᱲᱜᱚ ᱟᱠᱟᱫ ᱥᱤᱛᱟᱹ ᱱᱟᱞᱟ ᱜᱟᱰᱟ ᱫᱟᱜ ᱨᱮᱭᱟᱜ ᱡᱷᱚᱢᱚᱨ ᱛᱟᱞ ᱥᱟᱰᱮᱛᱮᱭ ᱮᱱᱮᱡ ᱟᱸᱫᱚᱲ ᱠᱟᱜᱼᱟ᱾

ᱞᱩᱜᱩ ᱵᱩᱨᱩ ᱜᱷᱟᱱᱴᱟ ᱵᱟᱲᱮ ᱨᱮᱱ ᱥᱟᱱᱟᱢ ᱡᱤᱭᱟᱹᱞᱤ ᱵᱟᱦᱟ ᱢᱟᱹᱭᱟᱜ ᱨᱟᱹᱥᱠᱟᱹ ᱦᱩᱞᱟᱹᱝ ᱧᱮᱧᱮᱞ ᱞᱟᱹᱜᱤᱫ ᱵᱩᱨᱩ ᱱᱤᱥᱩᱱ ᱠᱟᱛᱮ ᱟᱡ ᱴᱷᱮᱱ ᱠᱚ ᱴᱷᱟᱹᱣᱨᱟᱹ ᱠᱚᱜ ᱛᱟᱸᱦᱮᱫ᱾ ᱱᱩᱱ ᱢᱟᱨᱟᱝ ᱵᱩᱨᱩ ᱵᱤᱨ ᱛᱟᱞᱟ ᱵᱚᱸᱜᱟ ᱠᱩᱲᱤ ᱵᱟᱦᱟ ᱢᱟᱹᱭ ᱮᱠᱞᱟᱭ ᱛᱟᱸᱦᱮ ᱠᱟᱱ ᱨᱮᱦᱚᱸ ᱮᱠᱞᱟ ᱫᱚ ᱮᱠᱟᱞ ᱵᱟᱭ ᱵᱩᱡᱷᱟᱹᱣᱟ᱾ ᱟᱹᱰᱤ ᱨᱟᱹᱥᱠᱟᱹ ᱟᱨ ᱨᱚᱢᱚᱡᱽ ᱛᱟᱞᱟᱛᱮ ᱱᱚᱝᱠᱟᱜᱮ ᱵᱚᱸᱜᱟ ᱢᱟᱹᱭᱟᱜ ᱚᱠᱛᱚ ᱯᱟᱨᱚᱢ ᱤᱫᱤᱜᱼᱟ᱾ ᱥᱤᱧ ᱪᱟᱸᱫᱚ ᱧᱤᱫᱟᱹ ᱪᱟᱸᱫᱚᱣᱟᱜ ᱛᱟᱨᱟᱥ ᱛᱟᱨᱥᱮᱛᱮ ᱵᱟᱦᱟ ᱫᱚ ᱢᱚᱦᱮ ᱠᱷᱚᱱ ᱵᱷᱩᱴᱩᱜ ᱥᱮᱱᱮ ᱞᱟᱦᱟ ᱤᱫᱤᱜ ᱠᱟᱱᱟ᱾ ᱢᱤᱫ ᱫᱤᱱ ᱵᱩᱨᱩ ᱥᱚᱸᱜᱷᱟ ᱠᱷᱚᱱ ᱞᱤᱸᱜᱤᱱ ᱟᱬᱜᱚᱱ ᱠᱟᱱ ᱥᱤᱛᱟᱹ ᱱᱟᱞᱟ ᱜᱟᱰᱟ ᱫᱟᱜ ᱨᱮ, ᱢᱤᱫ ᱴᱟᱹᱝ ᱫᱷᱤᱨᱤ ᱫᱤᱲᱦᱟᱹ ᱨᱮ ᱫᱩᱲᱩᱵ ᱠᱟᱛᱮ, ᱡᱷᱟᱨᱱᱟ ᱫᱟᱜ ᱨᱮ ᱡᱟᱸᱜᱟ ᱛᱟᱭᱮ ᱪᱷᱤᱞᱠᱟᱹ ᱪᱷᱤᱞᱠᱤ ᱮᱫᱼᱟ, ᱡᱟᱹᱱᱤᱡ ᱵᱚᱸᱜᱟ ᱢᱟᱹᱭ ᱫᱚ ᱫᱩᱞ ᱫᱟᱜ ᱨᱮᱭᱟᱜ ᱥᱟᱰᱮᱛᱮ ᱠᱚᱞᱥᱟ ᱢᱮᱥᱟ ᱠᱟᱛᱮᱭ ᱮᱱᱮᱡ ᱡᱚᱝ ᱠᱟᱱᱟ᱾ ᱵᱚᱸᱜᱟ ᱠᱩᱲᱤ ᱵᱟᱦᱟ ᱢᱟᱹᱭ ᱫᱚ ᱡᱷᱟᱨᱱᱟ ᱫᱟᱜ ᱚᱱᱟ ᱫᱷᱤᱨᱤ ᱪᱮᱛᱟᱱ, ᱢᱤᱫ ᱯᱩᱸᱰ ᱠᱩᱞᱟᱹᱭ ᱦᱚᱯᱚᱱ ᱦᱚᱵᱚᱨ ᱠᱟᱛᱮᱭ ᱪᱚᱜ ᱪᱮᱨᱮᱡ ᱮ ᱠᱟᱱᱟ᱾ ᱟᱡᱟᱜ ᱢᱮᱫ ᱢᱩᱴᱷᱟᱹᱱ ᱫᱚ ᱨᱤᱞᱟᱹ ᱢᱟᱞᱟ ᱞᱤᱸᱡᱤᱱ ᱫᱟᱜ ᱨᱮᱭ ᱩᱠᱩ ᱮᱱᱮᱡ ᱮᱫᱼᱟ᱾ ᱟᱡᱟᱜ ᱥᱮᱨᱮᱧ ᱨᱟᱦᱟ ᱛᱮ ᱜᱚᱴᱟ ᱵᱩᱨᱩ ᱟᱸᱫᱚᱲ ᱟᱠᱟᱱᱟ᱾ ᱟᱪᱠᱟᱜᱮ ᱥᱮᱨᱮᱧ ᱥᱟᱶ ᱛᱤᱨᱭᱳ ᱨᱮᱱᱟᱜ ᱧᱚᱦᱚᱲ ᱨᱟᱦᱟ ᱟᱸᱡᱚᱢ ᱮᱱᱟ, ᱚᱱᱟ ᱟᱛᱟᱭᱚᱢ ᱪᱚᱨᱦᱚᱫ ᱟᱸᱡᱚᱢ ᱮᱱᱟ᱾ ᱛᱤᱨᱭᱳ ᱥᱟᱰᱮ ᱫᱚ ᱵᱟᱦᱟ ᱢᱟᱹᱭᱟᱜ ᱥᱮᱨᱮᱧ ᱥᱟᱞᱟᱜ ᱛᱟᱸᱦᱩ ᱜᱮ ᱜᱷᱩᱲ ᱤᱫᱤᱜ ᱠᱟᱱᱟ᱾ ᱠᱩᱞᱟᱹᱭ ᱦᱚᱯᱚᱱ ᱪᱚᱜ ᱠᱟᱛᱮ ᱛᱟᱭᱚᱢ ᱥᱮᱱᱮ ᱠᱚᱭᱚᱜᱽ ᱫᱚ ᱥᱟᱹᱨᱤ ᱜᱮ, ᱢᱤᱫ ᱢᱟᱹᱱᱢᱤ ᱠᱚᱲᱟ ᱛᱤᱸᱜᱩ ᱠᱟᱛᱮ ᱠᱚᱭᱚᱜ ᱟᱠᱟᱫᱼᱟ; ᱴᱷᱤᱠ ᱵᱟᱦᱟ ᱢᱟᱹᱭ ᱨᱮᱱᱜᱮ᱾ ᱩᱱᱤ ᱠᱚᱲᱟ ᱫᱚ ᱧᱮᱞ ᱡᱚᱝ ᱛᱮ ᱟᱹᱰᱤ ᱢᱚᱡᱽ ᱟᱨ ᱪᱮᱦᱨᱟ ᱜᱮᱭ ᱧᱮᱞᱚᱜ ᱠᱟᱱᱟ᱾ ᱡᱟᱹᱱᱤᱡ ᱪᱚ ᱟᱹᱰᱤ ᱠᱤᱥᱟᱹᱬ ᱦᱚᱯᱚᱱ ᱠᱟᱱᱟᱭ᱾ ᱱᱤᱯᱷᱩᱴ ᱦᱚᱲᱢᱚ, ᱫᱟᱹᱨᱭᱟᱹ ᱠᱚᱲᱟᱢ, ᱠᱚᱣᱚᱜ ᱢᱟ ᱞᱤᱞ ᱥᱮᱨᱢᱟ ᱢᱮᱫ ᱦᱟᱸ, ᱥᱟᱲ ᱵᱟᱦᱟ ᱜᱟᱹᱣᱤᱡᱮᱫ ᱞᱮᱠᱟ ᱢᱚᱪᱟ, ᱠᱚᱲᱟᱢ ᱪᱮᱛᱟᱱ ᱦᱟᱹᱞᱤ ᱜᱷᱟᱸᱥ ᱚᱢᱚᱱ ᱟᱠᱟᱱ ᱞᱮᱠᱟ ᱠᱚᱲᱟᱢ ᱩᱵ, ᱟᱹᱰᱤ ᱪᱮᱦᱨᱟ, ᱟᱹᱰᱤ ᱪᱚᱨᱚᱠ, ᱱᱚᱣᱟ ᱞᱩᱜᱩ ᱵᱩᱨᱩ ᱠᱷᱚᱱ ᱵᱚᱸᱜᱟ ᱠᱚᱲᱟ ᱜᱮᱭ ᱚᱯᱮᱞ ᱟᱠᱟᱱᱟ᱾ ᱵᱟᱦᱟ ᱢᱟᱹᱭ ᱱᱚᱣᱟ ᱞᱟᱦᱟ ᱪᱤᱞᱤ ᱢᱟᱹᱱᱢᱤ ᱦᱚᱸᱜᱮ ᱵᱟᱭ ᱧᱮᱞ ᱟᱠᱟᱣᱟᱱ ᱛᱟᱸᱦᱮᱫᱼᱟ᱾ ᱩᱱᱤ ᱠᱚᱲᱟ ᱦᱚᱯᱚᱱ ᱧᱮᱞ ᱠᱟᱛᱮ ᱵᱟᱦᱟ ᱢᱹᱟᱭ ᱟᱹᱰᱤᱭ ᱞᱟᱡᱟᱣ ᱮᱱᱟ᱾ ᱟᱡ ᱥᱩᱨᱛᱮ ᱥᱮᱴᱮᱨ ᱟᱠᱟᱱ ᱩᱱᱤ ᱠᱚᱲᱟ ᱦᱚᱯᱚᱱ ᱫᱚ ᱨᱟᱡᱽ ᱦᱚᱯᱚᱱ ᱜᱮ, ᱫᱚᱢᱞᱟ ᱵᱩᱨᱩ ᱫᱷᱤᱨᱤ ᱚᱲᱟᱜ ᱞᱮᱠᱟᱱ, ᱩᱞᱤᱱ ᱜᱩᱞᱤᱱ ᱨᱟᱡᱽ ᱵᱟᱠᱷᱚᱞ ᱨᱤᱱᱤᱡ, ᱨᱟᱡᱽ ᱦᱚᱯᱚᱱ ᱠᱟᱱ ᱜᱮᱭᱟᱭ᱾ ᱧᱩᱛᱩᱢ ᱛᱟᱭᱫᱚ ‘ᱞᱩᱜᱩ’᱾ ᱞᱩᱜᱩ ᱫᱚ ᱫᱟᱜ ᱛᱮᱛᱟᱝ ᱟᱠᱟᱫᱮ ᱛᱟᱸᱦᱮᱫ᱾ ᱩᱱᱤᱭᱟᱜ ᱢᱚᱱᱮ ᱫᱚ ᱫᱟᱜ ᱧᱩ ᱨᱮᱱᱟᱜ ᱜᱮ ᱛᱟᱸᱦᱮ ᱠᱟᱱᱟ᱾ ᱢᱮᱱᱠᱷᱟᱱ ᱵᱟᱦᱟ ᱢᱟᱹᱭᱟᱜ ᱨᱩᱯ ᱢᱚᱦᱚᱨ ᱧᱮᱞ ᱠᱟᱛᱮ ᱚᱱᱟ ᱥᱟᱱᱟᱢᱟᱜ ᱮ ᱦᱤᱲᱤᱧ ᱩᱛᱟᱹᱨ ᱠᱮᱫᱼᱟ᱾ ᱵᱟᱦᱟ ᱢᱟᱹᱭ ᱫᱩᱲᱩᱵ ᱟᱠᱟᱱ ᱫᱷᱤᱨᱤ ᱪᱮᱛᱟᱱ ᱠᱷᱚᱱᱮ ᱥᱟᱦᱟᱭᱮᱱ ᱠᱷᱟᱱ ᱨᱟᱡᱽ ᱦᱚᱯᱚᱱ ᱞᱩᱜᱩ ᱫᱚ ᱟᱸᱡᱽᱞᱮ ᱠᱟᱛᱮ ᱫᱟᱜ ᱮ ᱧᱩ ᱠᱮᱫᱼᱟ ᱟᱨ ᱛᱮᱛᱟᱝ ᱮ ᱛᱤᱨᱯᱤᱫ ᱠᱮᱫ ᱛᱟᱭᱟ᱾ ᱵᱟᱦᱟ ᱢᱟᱹᱭ ᱨᱟᱡᱽ ᱦᱚᱯᱚᱱ ᱞᱩᱜᱩ ᱥᱮᱫ ᱠᱚᱭᱚᱜ ᱠᱟᱛᱮ ᱞᱟᱸᱫᱟ ᱟᱛᱮᱭ ᱠᱩᱞᱤ ᱜᱚᱫ ᱠᱮᱫᱮᱭᱟ ᱹᱹᱹ ᱯᱮᱲᱟ ᱫᱟᱫᱟ ᱚᱠᱟ ᱠᱷᱚᱱᱮᱢ ᱦᱮᱡ ᱟᱠᱟᱱᱟ? ᱱᱚᱰᱮ ᱫᱚ ᱪᱤᱠᱟᱹᱢ ᱦᱮᱡ ᱮᱱᱟ? ᱱᱚᱰᱮ ᱫᱚ ᱪᱤᱞᱤ ᱢᱟᱹᱱᱢᱤ ᱦᱚᱸ ᱵᱟᱠᱚ ᱦᱮᱡ ᱟᱠᱟᱱᱟ ᱹᱹᱹ ᱯᱮᱲᱟ ᱫᱟᱫᱟ᱾ ᱟᱢ ᱢᱟ ᱥᱮᱸᱫᱽᱨᱟ ᱥᱤᱠᱟᱹᱨᱤ ᱞᱮᱠᱟᱢ ᱧᱮᱞᱚᱜ ᱠᱟᱱᱟ ᱹᱹᱹᱹᱹᱹᱹ᱾ ᱞᱩᱜᱩᱭ ᱢᱮᱱ ᱜᱚᱫ ᱠᱮᱫᱼᱟ, ᱹᱹᱹᱹ ᱦᱚᱭ ᱤᱧ ᱫᱚ ᱥᱮᱸᱫᱽᱨᱟ ᱜᱮᱧ ᱦᱮᱡ ᱟᱠᱟᱱᱟ ᱯᱮᱲᱟ ᱵᱩᱰᱤ᱾ ᱵᱟᱦᱟ ᱢᱟᱹᱭ ᱮ ᱢᱮᱱ ᱨᱩᱣᱟᱹᱲ ᱠᱮᱫᱼᱟ, ᱹᱹᱹᱹ ᱟᱢ ᱫᱚ ᱱᱚᱰᱮ ᱠᱷᱳᱱ ᱪᱟᱞᱟᱣ ᱡᱚᱝ ᱢᱮ ᱯᱮᱲᱟ ᱫᱟᱫᱟ, ᱱᱚᱰᱮ ᱫᱚ ᱤᱧᱟᱜ ᱨᱟᱠᱷᱟ ᱟᱠᱷᱲᱟ ᱠᱟᱱᱟ ᱹᱹᱹᱹᱹᱹᱹᱹ ᱱᱚᱰᱮᱱ ᱨᱤᱱ ᱥᱟᱱᱟᱢ ᱪᱮᱬᱮ ᱪᱤᱯᱨᱩᱜ, ᱵᱤᱨ ᱡᱤᱭᱟᱹᱞᱤᱠᱚ, ᱤᱧ ᱨᱤᱱ ᱜᱟᱛᱮ ᱵᱚᱭᱦᱟ ᱢᱤᱥᱤ ᱠᱟᱱᱟ ᱠᱚ, ᱱᱚᱰᱮ ᱫᱚ ᱚᱠᱚᱭ ᱦᱚᱸ ᱪᱤᱞᱤ ᱦᱚᱸ ᱵᱟᱠᱚ ᱥᱮᱸᱫᱽᱨᱟ ᱠᱚᱣᱟ, ᱪᱤᱞᱤ ᱦᱚᱸ ᱪᱤᱞᱤᱭᱟᱜ ᱡᱤᱣᱤ ᱵᱟᱠᱚ ᱱᱟᱥᱟᱣᱟ᱾ ᱥᱟᱱᱟᱢ ᱜᱮ ᱱᱚᱰᱮ ᱫᱚ ᱥᱩᱞᱩᱠ ᱱᱤᱨᱟᱹᱭᱛᱮ ᱡᱤᱭᱟᱹᱲ ᱢᱮᱱᱟᱜ ᱠᱚᱣᱟ᱾ ᱨᱟᱡᱽ ᱦᱚᱯᱚᱱ ᱞᱩᱜᱩ ᱞᱟᱸᱫᱟ ᱠᱟᱛᱮᱭ ᱢᱮᱱ ᱜᱚᱫ ᱠᱮᱫᱟ ᱹᱹᱹᱹᱹᱹᱹ ᱯᱮᱲᱟ ᱵᱩᱰᱤ ᱧᱤ ᱫᱚ ᱪᱤᱞᱤ ᱦᱚᱸ ᱵᱟᱹᱧ ᱥᱮᱸᱫᱽᱨᱟ ᱠᱚᱣᱟ ᱟᱨ ᱪᱤᱞᱤ ᱦᱚᱸ ᱵᱟᱹᱧ ᱜᱚᱡ ᱠᱚᱣᱟ᱾ ᱤᱧ ᱫᱚ ᱱᱚᱰᱮ ᱫᱟᱲᱟ ᱫᱟᱲᱟᱛᱮ ᱠᱷᱮᱞᱚᱸᱰ ᱡᱚᱝ ᱜᱮᱧ ᱦᱮᱡ ᱟᱠᱟᱱᱟ᱾

ᱢᱚᱱᱨᱮ ᱥᱮᱸᱫᱽᱨᱟ ᱨᱮᱭᱟᱜ ᱥᱟᱱᱟ ᱫᱚ ᱵᱟᱹᱱᱩᱜ ᱟᱱ ᱛᱤᱧᱟ ᱯᱮᱲᱟ ᱵᱩᱰᱤ᱾ ᱱᱚᱣᱟ ᱠᱚ ᱠᱟᱛᱷᱟ ᱞᱟᱹᱭᱠᱟᱛᱮ ᱞᱩᱜᱩ ᱫᱚᱭ ᱛᱷᱤᱨ ᱟᱠᱟᱱᱟ᱾ ᱢᱚᱱᱨᱮ ᱪᱮᱛᱟᱛ ᱠᱚᱪᱚ ᱟᱹᱰᱤ ᱞᱮᱠᱟᱭ ᱟᱹᱱᱤ ᱵᱷᱟᱹᱵᱤ ᱮᱫᱼᱟ᱾ ᱵᱟᱦᱟ ᱢᱟᱹᱭ ᱢᱤᱫ ᱫᱷᱟᱹᱣ ᱞᱩᱜᱩ ᱥᱮᱱᱮ ᱠᱚᱭᱚᱜ ᱨᱟᱠᱟᱵ ᱠᱮᱫᱼᱟ᱾ ᱢᱩᱞᱩᱡ ᱢᱮᱥᱟ ᱨᱤᱫᱟᱹᱭ ᱠᱷᱚᱱᱮ ᱞᱟᱸᱫᱟ ᱟᱱᱟ᱾ ᱵᱟᱭ ᱩᱭᱦᱟᱹᱨ ᱫᱟᱲᱮᱭᱜ ᱠᱟᱱᱟ ᱞᱟᱦᱟ ᱥᱮᱱ ᱪᱮᱫ ᱮ ᱨᱚᱲᱟ, ᱪᱮᱫ ᱞᱮᱠᱟᱛᱮ ᱠᱟᱛᱷᱟᱭ ᱮᱦᱚᱵᱟ ᱹᱹᱹᱹ? ᱞᱩᱜᱩᱣᱟᱜ ᱜᱩᱸᱞᱟᱹᱰ ᱜᱤᱨᱩ ᱦᱚᱲᱢᱚ ᱨᱮ ᱢᱚᱱ ᱡᱤᱭᱚᱱ ᱮᱫᱷᱮ ᱵᱮᱫᱷᱮᱜ ᱠᱟᱱ ᱛᱟᱭᱟ᱾ ᱟᱫᱚ ᱢᱤᱨᱩ ᱟᱲᱟᱝ ᱛᱮᱭ ᱨᱚᱲ ᱜᱚᱫ ᱠᱮᱫᱼᱟ ᱹᱹᱹᱹ ᱯᱮᱲᱟ ᱫᱟᱫᱟ ᱟᱢᱫᱚ ᱟᱹᱰᱤ ᱞᱟᱸᱜᱟᱜᱮᱢ ᱧᱮᱞᱚᱜ ᱠᱟᱱᱟ, ᱠᱟᱹᱴᱤᱡ ᱡᱤᱨᱟᱹᱣ ᱞᱮᱱᱢᱮ ᱫᱮᱞᱟ ᱹᱹᱹᱹ᱾ ᱞᱩᱜᱩ ᱫᱚ ᱢᱤᱫ ᱫᱷᱤᱨᱤ ᱪᱟᱹᱴᱟᱹᱱᱤ ᱨᱮᱭ ᱫᱩᱲᱩᱵ ᱡᱤᱨᱟᱹᱣ ᱮᱱᱟ᱾ ᱛᱟᱲᱟᱢ ᱞᱟᱸᱜᱟ ᱛᱮᱛᱟᱝ ᱡᱤᱣᱤ ᱛᱤᱨᱯᱤᱫ ᱠᱟᱛᱮ ᱵᱮᱸᱜᱮᱫ ᱠᱟᱛᱮ ᱠᱩᱠᱢᱩᱭ ᱧᱮᱞ ᱮᱫᱼᱟ᱾

ᱥᱤᱧ ᱵᱮᱲᱟ ᱵᱟᱹᱭ ᱵᱟᱹᱭᱛᱮ ᱵᱩᱨᱩ ᱫᱟᱱᱟᱝᱨᱮᱭ ᱩᱠᱩᱱ ᱠᱟᱱᱟ᱾ ᱪᱮᱬᱮ ᱪᱤᱯᱨᱩᱜ ᱪᱮᱨᱚᱵᱮᱨᱚ ᱟᱛᱮ ᱛᱩᱠᱟᱹ ᱛᱮᱠᱚ ᱨᱩᱣᱟᱹᱲ ᱥᱮᱱᱚᱜ ᱠᱟᱱᱟ᱾ ᱵᱤᱨ ᱡᱤᱭᱟᱹᱞᱤ ᱟᱛᱮᱠᱚ ᱨᱩᱣᱟᱹᱲ ᱠᱟᱱᱟ᱾

ᱢᱤᱫ ᱜᱷᱟᱹᱲᱤᱠ ᱛᱟᱭᱚᱢ ᱵᱚᱸᱜᱟ ᱠᱩᱲᱤ ᱵᱟᱦᱟ ᱢᱟᱹᱭ ᱴᱷᱮᱱ ᱵᱤᱨ ᱟᱹᱞᱩ, ᱵᱟᱶᱞᱟ, ᱞᱚᱣᱟ, ᱢᱮᱨᱟᱞ ᱮᱢᱟᱱ ᱵᱤᱨ ᱡᱚ ᱵᱟᱦᱟ ᱛᱮ ᱫᱩᱢᱦᱟᱹ ᱮᱱᱟ᱾ ᱫᱤᱱᱟᱹᱢ ᱜᱮ ᱱᱚᱝᱠᱟ ᱵᱟᱦᱟ ᱢᱟᱹᱭ ᱫᱚ ᱡᱚᱢᱟᱜ ᱠᱚ ᱟᱹᱜᱩ ᱦᱚᱴᱚ ᱟᱭ ᱛᱟᱸᱦᱮᱫ᱾ ᱵᱤᱨ ᱵᱩᱨᱩ ᱨᱤᱱ ᱡᱤᱵᱽ ᱡᱤᱭᱟᱹᱞᱤ ᱫᱚ ᱵᱟᱦᱟ ᱢᱟᱹᱭ ᱨᱤᱱ ᱢᱟᱭᱟᱢ ᱦᱟᱹᱴᱤᱧ ᱵᱚᱭᱦᱟ ᱞᱮᱠᱟ, ᱟᱨ ᱟᱡᱫᱚ ᱟᱠᱚ ᱛᱟᱞᱟ ᱨᱮ ᱢᱮᱱᱟᱭ ᱨᱟᱹᱱᱤ ᱞᱮᱠᱟ᱾ ᱟᱨ ᱟᱡᱫᱚ ᱟᱠᱚ ᱛᱟᱞᱟ ᱨᱮ ᱢᱮᱱᱟᱭ ᱨᱟᱹᱱᱤ ᱞᱮᱠᱟ᱾ ᱨᱟᱹᱥᱠᱟᱹ ᱯᱮᱨᱮᱡ ᱪᱮᱨᱮᱡ ᱛᱮᱠᱚ ᱜᱷᱩᱲ ᱠᱟᱭᱟ᱾ ᱪᱮᱫ ᱨᱮᱭᱟᱜ ᱦᱚᱸ ᱟᱱᱟᱴ ᱮᱴᱠᱮ ᱴᱚᱬᱮ ᱵᱟᱹᱱᱩᱜ, ᱱᱚᱣᱟ ᱫᱚ ᱢᱟᱱᱣᱟ ᱫᱟᱹᱨᱛᱤ ᱠᱷᱚᱱ ᱵᱷᱮᱜᱟᱨ ᱛᱮ ᱵᱮᱱᱟᱣ ᱟᱠᱟᱫ ᱥᱩᱞᱩᱠ ᱫᱷᱟᱹᱨᱛᱤ ᱠᱟᱱᱟ᱾ ᱞᱩᱜᱩ ᱱᱚᱣᱟ ᱠᱚ ᱥᱟᱱᱟᱢ ᱧᱮᱞ ᱠᱟᱛᱮ, ᱟᱹᱰᱤ ᱨᱟᱹᱥᱠᱟᱹ ᱟᱨ ᱮ ᱠᱩᱥᱤᱭᱮᱱᱟ᱾

ᱢᱚᱱᱮ ᱛᱮᱭ ᱢᱮᱱ ᱡᱚᱝ ᱠᱟᱱᱟ ᱹᱹᱹᱹᱹ “ᱵᱚᱸᱜᱟ ᱠᱩᱲᱤ” ᱵᱟᱦᱟ ᱢᱟᱹᱭ ᱟᱢ ᱫᱚ, ᱡᱟᱭ ᱡᱤᱱ, ᱛᱤᱱᱹᱟᱜ ᱱᱟᱯᱟᱭ ᱥᱩᱞᱩᱠ ᱜᱷᱟᱸᱨᱚᱡᱽ ᱛᱟᱢ, ᱠᱮᱱᱮ ᱠᱚᱛᱮ ᱨᱚᱲ ᱞᱟᱸᱫᱟ ᱛᱟᱢ, ᱥᱟᱹᱨᱤ ᱜᱮ ᱤᱧ ᱦᱚᱸ ᱦᱩᱱᱟᱹᱝ ᱱᱚᱰᱮᱧ ᱛᱟᱸᱦᱮ ᱫᱟᱲᱮᱭᱟᱜ ᱹᱹᱹᱹᱹᱹᱹ᱾ ᱵᱟᱦᱟ ᱢᱟᱹᱭ ᱮ ᱢᱮᱱ ᱜᱚᱫ ᱠᱮᱫᱼᱟ ᱹᱹᱹ “ᱟᱢ ᱫᱚ ᱠᱤᱥᱟᱹᱲ ᱦᱚᱯᱚᱱ, ᱨᱟᱡᱽ ᱵᱟᱠᱷᱩᱞ, ᱟᱢᱟᱜ ᱫᱚ ᱵᱤᱨ ᱵᱩᱨᱩ ᱥᱟᱶᱫᱚ ᱪᱮᱫ ᱥᱟᱹᱜᱟᱹᱭ ᱢᱮᱱᱟᱜ ᱛᱟᱢ ᱛᱮ ᱹᱹᱹᱹᱹ?

ᱨᱟᱡᱽ ᱵᱟᱠᱷᱩᱞ ᱞᱩᱜᱩᱫ ᱟᱴᱮᱫ ᱜᱮ ᱟᱢ ᱞᱟᱹᱜᱤᱫ ᱫᱚ ᱥᱚᱨᱮᱥᱟ ᱹᱹᱹᱹ᱾ ᱟᱢ ᱞᱟᱹᱜᱤᱫ ᱫᱚ ᱞᱟᱹᱴᱩᱼᱞᱟᱹᱴᱩ ᱯᱟᱠᱟ ᱫᱳᱞᱟᱱ ᱢᱮᱱᱟᱜ, ᱱᱟᱜᱟᱨ ᱵᱟᱡᱟᱨ ᱢᱮᱱᱟᱜᱼᱟ, ᱟᱢ ᱫᱳ ᱪᱤᱠᱟᱹᱢ ᱛᱟᱸᱦᱮ ᱠᱚᱜᱼᱟ ᱵᱤᱨ ᱛᱟᱞᱟ ᱵᱩᱨᱩ ᱜᱷᱚᱸᱜᱚᱨ ᱫᱷᱤᱨᱤ ᱪᱟᱹᱴᱟᱹᱱᱤ ᱨᱮᱫᱚ ᱹᱹᱹᱹᱹᱹ?

ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱫᱚᱞᱢᱟ ᱵᱩᱨᱩ ᱫᱷᱤᱨᱤ ᱚᱲᱟᱜ ᱨᱤᱱᱤᱡ ᱨᱟᱡᱽ ᱦᱚᱯᱚᱱ ᱞᱩᱜᱩᱭ ᱢᱮᱱ ᱜᱚᱫ ᱠᱮᱫᱼᱟ, “ᱯᱮᱲᱟ ᱵᱩᱰᱤ ᱵᱤᱨ ᱨᱮᱜᱮ ᱥᱟᱜᱩᱱ ᱫᱚ, ᱟᱢ ᱥᱟᱞᱟᱜ ᱱᱚᱝᱠᱟ ᱧᱟᱯᱟᱢ ᱠᱟᱛᱮ ᱢᱚᱱᱮ ᱛᱤᱧᱮ ᱢᱮᱱ ᱮᱫᱼᱟ, ᱞᱩᱜᱩ ᱵᱩᱨᱩ ᱞᱩᱢᱟᱹᱝ ᱞᱮᱠᱟ, ᱰᱟᱹᱨ ᱰᱟᱹᱨ ᱥᱟᱠᱟᱢ ᱥᱟᱠᱟᱢ ᱴᱩᱰᱟᱹᱝ ᱟᱹᱪᱩᱨ ᱠᱟᱛᱮ ᱥᱟᱠᱟᱢ ᱥᱤᱵᱤᱞ ᱡᱚᱢ ᱱᱟᱹᱣᱟᱹᱭ ᱠᱟᱛᱮ ᱢᱤᱫ ᱛᱮᱞᱟᱝ ᱛᱚᱞ ᱢᱤᱫᱩᱜᱼᱟ, ᱥᱟᱜᱮᱱ ᱰᱟᱹᱨ ᱨᱮᱱᱟᱜ ᱚᱱᱟ ᱞᱤᱣᱤᱫ ᱰᱟᱹᱨ ᱞᱟᱯᱷᱟᱝ ᱨᱮ᱾ ᱟᱹᱰᱣᱹᱟᱱᱤ ᱡᱟᱦᱟᱸ ᱛᱤᱥ ᱯᱟᱸᱡᱟ ᱯᱟᱸᱡᱟ ᱠᱟᱛᱮ ᱠᱚ ᱧᱟᱢ ᱞᱟᱝᱟ, ᱢᱤᱫ ᱴᱟᱹᱝ ᱞᱩᱢᱟᱹᱝ ᱨᱮ, ᱮᱸᱜᱟ ᱟᱺᱰᱭᱟᱹᱠᱤᱱ ᱛᱚᱞ ᱢᱤᱫ ᱟᱠᱟᱱᱟ᱾

ᱯᱮᱲᱟ ᱵᱩᱰᱤ ᱟᱢ ᱫᱚ ᱥᱟᱹᱨᱤ ᱥᱟᱹᱨᱤ ᱜᱮ ᱵᱤᱨ ᱨᱤᱱᱤᱡ ᱵᱤᱨ ᱵᱟᱦᱟ ᱠᱟᱱᱟᱢ ᱟᱢᱟᱜ ᱥᱚᱸᱫᱷᱟᱲ ᱥᱚ ᱵᱤᱨ ᱨᱮᱱᱟᱜ ᱥᱟᱱᱟᱢ ᱫᱟᱨᱮ ᱱᱟᱹᱲᱤ ᱨᱮ ᱢᱚᱦᱠᱟᱣᱚᱜ ᱠᱟᱱᱟ᱾ ᱟᱢ ᱫᱚ ᱱᱚᱣᱟ ᱞᱩᱜᱩ ᱵᱩᱨᱩ ᱜᱷᱟᱱᱴᱟ ᱵᱟᱲᱮ, ᱥᱤᱛᱟᱹ ᱱᱟᱞᱟ ᱜᱟᱰᱟ ᱛᱟᱞᱟ ᱨᱤᱱᱤᱡ ᱡᱚᱛᱚᱱ ᱡᱚᱜᱟᱣᱤᱡ ᱠᱟᱱᱟᱢ, ᱟᱢ ᱞᱮᱠᱟᱱ ᱵᱚᱸᱜᱟ ᱠᱩᱲᱤ ᱧᱟᱢ ᱠᱟᱛᱮ ᱤᱧ ᱫᱚ ᱥᱟᱱᱟᱢᱟᱜ ᱤᱧ ᱦᱤᱲᱤᱧ ᱠᱮᱫᱼᱟ᱾ ᱤᱧᱟᱜ ᱡᱤᱣᱤ ᱨᱮᱫᱚ ᱮᱠᱷᱮᱱ ᱟᱢ ᱟᱨ ᱟᱢ ᱥᱩᱢᱩᱝ ᱜᱮᱧ ᱧᱮᱞ ᱧᱟᱢᱮᱫ ᱢᱮᱭᱟ᱾ ᱵᱟᱦᱟ ᱢᱟᱹᱭ! ᱟᱢ ᱠᱤ ᱦᱤᱸᱥᱤᱫ ᱦᱚᱭᱛᱮ ᱢᱚᱦᱮ ᱠᱚᱲᱦᱚᱸ ᱵᱟᱦᱟ ᱵᱟᱢ ᱞᱮᱜᱮᱡ ᱞᱟᱸᱫᱟ ᱦᱚᱪᱚᱭᱟ, ᱨᱤᱞᱟᱹᱢᱟᱞᱟ ᱥᱤᱛᱟᱹᱱᱟᱞᱟ ᱫᱟᱜ ᱛᱤᱨᱯᱤ ᱠᱟᱛᱮ ᱵᱟᱢ ᱡᱤᱭᱟᱹᱲ ᱦᱚᱪᱚᱭᱟ ᱡᱤᱣᱤ ᱨᱮᱱᱟᱜ ᱫᱩᱞᱟᱹᱲ ᱱᱟᱹᱲᱤ? ᱵᱟᱦᱟ ᱢᱟᱹᱭ ᱮ ᱢᱮᱱ ᱨᱩᱣᱟᱹᱲ ᱜᱚᱫ ᱠᱮᱫᱼᱟ, ᱯᱮᱲᱟ ᱫᱟᱫᱟ ᱡᱟᱹᱯᱤᱫ ᱠᱟᱛᱮ ᱞᱩᱜᱩᱫ ᱟᱴᱮᱫ, ᱫᱟᱨᱟᱼᱦᱟᱨᱟ ᱟᱹᱪᱤᱨ ᱯᱟᱹᱪᱤᱨ ᱵᱟᱹᱠᱷᱩᱞ, ᱛᱚᱣᱟ ᱫᱟᱠᱟ ᱡᱚᱢ ᱧᱩ ᱤᱧ ᱞᱮᱠᱟᱱ ᱚᱵᱷᱟᱜᱤᱭᱟᱹ ᱛᱤᱨᱞᱟ ᱦᱚᱯᱚᱱᱟᱜ ᱫᱚ ᱛᱤᱥᱦᱚᱸ ᱵᱟᱝ ᱡᱩᱴᱟᱹᱜᱼᱟ᱾ ᱟᱹᱰᱤ ᱵᱟᱹᱲᱛᱤ ᱢᱟᱹᱱᱢᱤ ᱜᱮ ᱡᱟᱹᱯᱤᱫ ᱠᱟᱛᱮ ᱞᱟᱹᱴᱩᱼᱞᱟᱹᱴᱩ ᱠᱩᱠᱢᱩ ᱠᱚ ᱧᱮᱞᱟ, ᱞᱟᱹᱴᱩ ᱞᱟᱹᱴᱩ ᱠᱟᱛᱷᱟ ᱠᱚ ᱨᱚᱲᱟ, ᱥᱟᱹᱨᱤ ᱨᱮᱠᱚ ᱡᱚᱣᱟᱣᱚᱜᱼᱟ᱾ ᱡᱟᱦᱟᱸᱭ ᱢᱟᱹᱱᱢᱤ ᱵᱮᱸᱜᱮᱫ ᱠᱟᱛᱮ, ᱟᱡᱟᱜ ᱢᱚᱱᱮ ᱫᱟᱲᱮ, ᱦᱚᱲᱢᱚ ᱫᱟᱲᱮ, ᱵᱩᱫᱷᱤ ᱫᱟᱲᱮ ᱛᱮ ᱠᱩᱠᱢᱩ ᱠᱚ ᱧᱮᱞᱟ ᱚᱱᱠᱟᱱ ᱠᱚᱣᱟᱜ ᱠᱩᱠᱢᱩ ᱜᱮ ᱥᱟᱹᱨᱤᱜᱼᱟ᱾ ᱞᱩᱜᱩ ᱵᱟᱦᱟ ᱢᱟᱹᱭᱟᱜ ᱱᱚᱝᱠᱟᱱ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱥᱟᱹᱨᱤ ᱥᱤᱠᱷᱱᱟᱹᱛ ᱠᱟᱛᱷᱟ ᱞᱮᱠᱟ ᱞᱩᱛᱩᱨ ᱨᱮᱭ ᱨᱮᱵᱮᱫ ᱫᱚᱦᱚ ᱠᱮᱫᱼᱟ᱾ ᱟᱹᱰᱤᱜᱟᱱ ᱱᱚᱝᱠᱟᱱ ᱠᱟᱛᱷᱟ ᱜᱟᱞᱢᱟᱨᱟᱣ ᱜᱟᱞ ᱢᱟᱨᱟᱣ ᱛᱟᱞᱟᱛᱮ ᱞᱩᱜᱩ ᱵᱟᱦᱟ ᱢᱟᱹᱭ ᱮ ᱠᱩᱞᱤ ᱠᱮᱫᱮᱭᱟ “ᱢᱟᱹᱭ, ᱪᱤᱠᱟᱹᱛᱮ ᱟᱢᱫᱚ ᱮᱠᱞᱟ ᱛᱤᱨᱞᱟᱹ ᱱᱚᱣᱟ ᱟᱹᱨᱩᱴ ᱵᱤᱨ ᱛᱟᱞᱟᱛᱮᱢ ᱦᱮᱡ ᱮᱱᱟ? ᱠᱩᱞᱤ ᱠᱟᱛᱮ ᱵᱟᱹᱧ ᱵᱟᱹᱲᱤᱡ ᱟᱠᱟᱫ ᱠᱷᱟᱱ ᱫᱟᱭᱟ ᱠᱟᱛᱮ ᱱᱚᱣᱟ ᱠᱟᱛᱷᱟᱢ ᱞᱟᱹᱭ ᱠᱤᱧᱟ?

ᱵᱟᱦᱟ ᱢᱟᱹᱭ ᱢᱚᱴᱟ ᱧᱚᱜᱼᱮ ᱥᱟᱦᱮᱸᱫ ᱠᱮᱫᱼᱟ, ᱡᱤᱣᱤ ᱠᱟᱸᱫᱟ ᱟᱦᱩᱞ ᱵᱟᱠᱩᱞᱮᱱ ᱛᱟᱭᱟ, ᱡᱟᱹᱱᱤᱡ ᱪᱮᱫ ᱪᱚᱭ ᱟᱹᱲᱤᱥᱚᱜ ᱠᱟᱱ ᱞᱮᱠᱟ ᱮᱱᱦᱚᱸ ᱞᱟᱹᱭ ᱥᱟᱱᱟ ᱢᱮᱱᱟᱜ ᱛᱟᱭᱛᱮ ᱢᱟᱹᱦᱤᱨ ᱥᱟᱺᱦᱤᱡ ᱮ ᱢᱮᱱ ᱨᱩᱣᱟᱹᱲ ᱠᱮᱫᱼᱟ, “ᱯᱮᱲᱟ ᱫᱟᱫᱟ ᱱᱚᱣᱟ ᱫᱚ ᱤᱧᱟᱜ ᱢᱚᱪᱟᱛᱮ ᱞᱟᱹᱭ ᱱᱟᱯᱟᱭ ᱵᱟᱝ ᱦᱩᱭᱩᱜᱼᱟ, ᱟᱨ ᱟᱢᱟᱜ ᱞᱩᱛᱩᱨ ᱨᱮ ᱟᱸᱡᱚᱢ ᱠᱟᱛᱮ ᱟᱢᱟᱜ ᱢᱚᱱᱮ ᱵᱟᱹᱲᱤᱡ ᱮᱢ ᱵᱩᱡᱷᱹᱟᱣᱟ᱾ ᱚᱱᱟᱛᱮ ᱱᱚᱣᱟ ᱠᱟᱛᱦᱟ ᱨᱮᱱᱟᱜ ᱛᱮᱞᱟ ᱵᱟᱰᱟᱭ ᱥᱟᱱᱟ ᱫᱚ ᱤᱠᱟᱹ ᱠᱟᱜ ᱢᱮ᱾ ᱞᱩᱜᱩᱭ ᱢᱮᱱ ᱠᱮᱫᱼᱟ, “ᱵᱟᱦᱟ ᱢᱟᱹᱭ ᱱᱚᱣᱟ ᱫᱚ ᱫᱚ ᱮᱠᱷᱮᱱ ᱟᱢ ᱟᱨ ᱤᱧᱜᱮ ᱢᱮᱱᱟᱜ ᱞᱟᱝᱟ ᱞᱟᱹᱭ ᱞᱮᱠᱷᱟᱱᱮᱢ ᱵᱟᱹᱲᱤᱡ ᱫᱚ ᱵᱟᱹᱧ ᱢᱚᱱᱮᱭᱟ᱾

ᱵᱟᱦᱟ ᱢᱟᱹᱭ ᱮ ᱨᱚᱲ ᱨᱩᱣᱟᱹᱲ ᱠᱮᱫᱼᱟ, “ᱯᱮᱲᱟ ᱫᱟᱫᱟ ᱡᱟᱦᱟᱸ ᱵᱚᱥᱢᱚᱛᱟ ᱠᱷᱚᱱᱵᱚ ᱡᱟᱱᱟᱢ ᱠᱟᱱᱟᱟ, ᱚᱱᱟ ᱨᱮᱱᱟᱜ ᱵᱟᱹᱲᱤᱡ ᱨᱚᱲ ᱫᱚ ᱯᱟᱯ ᱠᱟᱱᱟ, ᱡᱟᱦᱟᱸ ᱨᱮ ᱱᱤᱛᱚᱜ ᱟᱵᱚᱵᱚ ᱠᱷᱤᱞᱚᱸᱰ ᱡᱚᱝ ᱠᱟᱱᱟ ᱚᱱᱟᱫᱚ ᱚᱦᱚ ᱜᱮᱵᱚᱱ ᱫᱩᱥᱟᱹᱣ ᱠᱮᱭᱟ, ᱚᱦᱚᱜᱮᱵᱚᱱ ᱱᱤᱥᱲᱟᱹᱣ ᱠᱮᱭᱟ᱾ ᱞᱩᱜᱩ ᱢᱟᱹᱦᱤᱨ ᱧᱚᱜ ᱛᱮᱭ ᱢᱮᱱ ᱜᱚᱫ ᱠᱮᱫᱼᱟ, “ᱢᱟᱹᱭ ᱫᱩᱥᱟᱹᱣ ᱟᱨ ᱱᱤᱥᱲᱟᱹᱣ ᱠᱟᱛᱷᱟ ᱫᱚ ᱵᱟᱹᱧ ᱢᱮᱱ ᱮᱫᱼᱟ, ᱤᱧᱟᱜ ᱢᱚᱱᱮᱛᱮ ᱯᱟᱨᱚᱢ ᱟᱠᱟᱱ ᱱᱟᱜᱟᱢ ᱠᱚᱭᱚᱜ ᱨᱩᱣᱟᱹᱲ ᱠᱟᱛᱮᱜᱮ ᱟᱜᱟᱢ ᱫᱚ ᱱᱟᱯᱟᱭᱚᱜᱼᱟ᱾ ᱢᱟ ᱟᱢᱟᱜ ᱠᱟᱛᱷᱟ ᱞᱟᱹᱭᱢᱮ᱾ ᱵᱟᱦᱟ ᱢᱟᱹᱭ ᱮ ᱢᱮᱱ ᱠᱮᱫᱼᱟ, “ᱯᱮᱲᱟ ᱫᱟᱫᱟ ᱟᱭᱳ ᱵᱟᱵᱟ ᱫᱚ ᱵᱟᱹᱧ ᱫᱤᱥᱟᱹ ᱠᱤᱱᱟ, ᱛᱚᱵᱮ ᱤᱧᱤᱡ ᱫᱷᱚᱨᱚᱢ ᱵᱟᱵᱟ, ᱡᱟᱦᱟᱸᱭ ᱫᱚ ᱱᱤᱛᱚᱜ ᱥᱚᱢᱟᱭ ᱥᱚᱠᱲᱟ ᱥᱮᱱᱮᱨ ᱯᱚᱴᱟᱜᱼᱮ ᱪᱟᱞᱟᱣ ᱟᱠᱟᱱᱟ, ᱩᱱᱤᱜᱮᱭ ᱞᱟᱹᱭ ᱟᱹᱧ ᱛᱟᱸᱦᱮᱫ ᱤᱧ ᱫᱚ ᱦᱟᱱᱟ ᱫᱷᱤᱨᱤ ᱪᱟᱹᱴᱟᱹᱱᱤ ᱫᱷᱚᱨᱚᱢ ᱜᱟᱲ ᱞᱟᱛᱟᱨ ᱥᱤᱛᱟᱹ ᱱᱟᱞᱟ ᱜᱟᱰᱟ ᱟᱲᱮᱨᱮ ᱠᱚ ᱜᱤᱛᱤᱡ ᱜᱤᱰᱤ ᱠᱟᱹᱫᱤᱧ ᱛᱟᱸᱦᱮᱫ᱾ ᱩᱱᱫᱚ ᱵᱟᱞᱮ ᱵᱮᱠᱮᱨᱤᱧ ᱛᱟᱸᱦᱮ ᱠᱟᱱᱟ᱾ ᱮᱭᱟᱭ ᱥᱤᱧ ᱮᱭᱟᱭ ᱧᱤᱫᱟᱹ, ᱚᱱᱠᱟ ᱫᱷᱤᱨᱤ ᱪᱮᱛᱟᱱ ᱩᱲᱫᱷᱩᱢ ᱛᱮᱜᱤᱧ ᱛᱟᱸᱦᱮ ᱠᱟᱱᱟ᱾ ᱡᱟᱱᱟᱢ ᱟᱭᱳ ᱵᱟᱵᱟ ᱟᱣᱨᱤ ᱡᱩᱨᱤᱜ ᱨᱮᱜᱮ ᱤᱧᱫᱚ ᱱᱚᱣᱟ ᱵᱚᱥᱢᱚᱛᱟ ᱨᱤᱧ ᱦᱚᱸᱥᱚᱨ ᱟᱸᱬᱜᱚ ᱞᱮᱱᱟ᱾ ᱟᱵᱚ ᱥᱟᱶᱛᱟ ᱨᱮᱱᱟᱜ ᱞᱟᱡᱟᱣ ᱠᱟᱺᱦᱤᱥ ᱵᱟᱠᱤᱱ ᱥᱟᱦᱟᱣ ᱫᱟᱲᱮᱭᱜᱫ ᱛᱮ ᱤᱧ ᱫᱚ ᱵᱟᱞᱮ ᱵᱮᱠᱮᱨ ᱨᱮ ᱵᱟᱹᱜᱤ ᱦᱚᱴᱚ ᱠᱟᱛᱮ, ᱟᱹᱠᱤᱱ ᱫᱚ ᱟᱹᱠᱤᱱᱟᱜ ᱟᱹᱛᱩ ᱫᱤᱥᱚᱢ ᱠᱤᱱ ᱥᱮᱱ ᱮᱱᱟ᱾ ᱱᱚᱣᱟ ᱵᱩᱨᱩ ᱨᱮ ᱛᱟᱸᱦᱮ ᱠᱟᱱ ᱢᱤᱫ ᱫᱷᱚᱨᱚᱢ ᱵᱟᱵᱟ ᱟᱡᱟᱜ ᱥᱚᱦᱟᱜᱽ ᱠᱚᱞᱮᱨᱮ ᱵᱟᱞᱮ ᱵᱮᱠᱮᱨ ᱠᱷᱚᱱᱮ ᱦᱟᱨᱟ ᱠᱤᱫᱤᱧᱟ᱾ ᱩᱱᱤ ᱦᱚᱸ ᱱᱤᱛᱚᱜ ᱫᱚ ᱱᱟᱹᱲᱩᱜ ᱮᱭᱟ᱾ ᱩᱱᱠᱷᱚᱱ ᱜᱮ ᱤᱧ ᱫᱚ ᱱᱤᱛᱚᱜ ᱱᱚᱣᱟ ᱵᱩᱨᱩ ᱛᱟᱞᱟ, ᱠᱩᱸᱵᱟᱹ ᱚᱲᱟᱜ ᱱᱩᱠᱩ ᱵᱩᱨᱩ ᱡᱤᱭᱟᱹᱞᱤ ᱛᱟᱞᱟ ᱨᱮ, ᱟᱹᱰᱤ ᱱᱟᱯᱟᱭ ᱛᱮ ᱢᱤᱱᱟᱹᱧᱟ, ᱟᱨ ᱱᱚᱝᱠᱟ ᱜᱮ ᱛᱟᱸᱦᱮᱱ ᱥᱟᱹᱱᱟᱹᱧ ᱠᱟᱱᱟ᱾ ᱞᱩᱜᱩ ᱵᱟᱦᱟ ᱢᱟᱹᱭᱟᱜ ᱢᱚᱪᱟ ᱠᱷᱚᱱ ᱱᱚᱝᱠᱟᱱ ᱠᱟᱛᱷᱟ ᱟᱸᱡᱚᱢ ᱠᱟᱛᱮ, ᱡᱤᱣᱤ ᱢᱚᱱᱮᱨᱮ ᱫᱟᱭᱟ ᱫᱩᱞᱟᱹᱲ ᱯᱚᱴᱠᱚᱡ ᱟᱫᱮᱭᱟ᱾ ᱥᱟᱹᱨᱤ ᱜᱮ ᱢᱟᱹᱱᱢᱤ ᱫᱚ ᱟᱠᱚᱣᱟᱜ ᱥᱚᱠ ᱵᱷᱩᱸᱡᱟᱹᱣ ᱞᱟᱹᱜᱤᱫ, ᱟᱰᱹᱤ ᱞᱮᱠᱟᱠᱚ ᱪᱤᱠᱟᱹ ᱫᱟᱲᱮᱭᱟᱜᱼᱟ᱾ ᱩᱱᱫᱚ ᱚᱠᱚᱭ ᱦᱚᱸ ᱚᱠᱚᱭᱟᱜ ᱠᱟᱛᱷᱟ ᱵᱟᱠᱚ ᱩᱭᱦᱟᱹᱨᱟ᱾ ᱱᱚᱝᱠᱟᱛᱮ ᱟᱭᱢᱟ ᱥᱤᱧ ᱧᱤᱫᱟᱹ ᱯᱟᱨᱚᱢ ᱮᱱᱟ ᱞᱩᱜᱩ ᱟᱡᱟᱜ ᱚᱲᱟᱜ ᱫᱩᱣᱟᱹᱨ ᱠᱟᱛᱷᱟ ᱫᱚ ᱮᱠᱟᱞ ᱛᱮᱭ ᱦᱤᱲᱤᱧ ᱠᱮᱫᱼᱟ᱾ ᱥᱤᱧ ᱪᱟᱸᱫᱚ ᱧᱤᱫᱟᱹ ᱪᱟᱸᱫᱚ ᱛᱟᱨᱟᱥ ᱢᱟᱨᱥᱟᱞ, ᱟᱨ ᱡᱩᱞᱩᱜ ᱤᱯᱤᱞ ᱢᱮᱥᱠᱚᱡ ᱞᱟᱸᱫᱟ ᱛᱮ ᱡᱤᱣᱤ ᱢᱚᱱᱮ ᱜᱟᱵᱟᱱ ᱩᱨᱤᱡ ᱮᱱ ᱛᱟᱠᱤᱱᱟ᱾ ᱩᱱᱫᱚ ᱦᱟᱲᱟᱢ ᱵᱩᱰᱷᱤ ᱟᱯᱟᱫ ᱧᱩᱛᱟᱹᱛ ᱟᱠᱟᱱᱟ᱾ ᱥᱮᱨᱢᱟ ᱪᱚᱴ ᱨᱤᱱ ᱯᱤᱞ ᱞᱟᱡᱟᱣ ᱞᱟᱡᱟᱣ ᱞᱮᱠᱟ ᱵᱟᱹᱭ ᱵᱟᱹᱭ ᱛᱮᱠᱚ ᱩᱰᱩᱠ ᱥᱚᱫᱚᱨᱚᱜ ᱠᱟᱱᱟ᱾ ᱞᱩᱜᱩ ᱵᱩᱨᱩ ᱜᱷᱟᱱᱴᱟ ᱵᱟᱹᱲᱮ ᱠᱟᱪᱨᱟᱫ ᱫᱟᱨᱮ ᱦᱚᱭᱜᱮ ᱮᱠᱷᱮᱱ ᱥᱚᱦᱚᱭ ᱥᱚᱦᱚᱭ ᱟᱸᱡᱚᱢᱚᱜ ᱠᱟᱱᱟ᱾ ᱪᱮᱬᱮ ᱪᱤᱯᱨᱩᱜ ᱪᱮᱨᱚᱼᱵᱮᱨᱚ ᱦᱟᱹᱯᱤᱫ ᱟᱠᱟᱱᱟ ᱯᱟᱞᱮ ᱟᱠᱚᱦᱚᱸ ᱜᱟᱯᱟ ᱨᱮᱭᱟᱜ ᱡᱚᱢᱟᱜ ᱧᱩᱣᱟᱜ ᱡᱚᱜᱟᱣ ᱨᱚᱯᱚᱲ ᱨᱮᱠᱚ ᱡᱚᱦᱚᱲ ᱟᱠᱟᱱᱟ᱾ ᱥᱤᱧᱠᱚ ᱞᱟᱡᱟᱜ, ᱧᱤᱫᱟᱹ ᱫᱟᱬᱟᱱᱠᱚ ᱱᱟᱠᱚ ᱜᱚᱦᱚᱲ ᱟᱠᱟᱱᱟ᱾ ᱵᱟᱦᱟ ᱢᱟᱹᱭ ᱞᱩᱜᱩ ᱞᱟᱹᱜᱤᱫ ᱡᱚᱢ ᱵᱟᱠᱷᱨᱟ ᱵᱤᱨ ᱡᱚ, ᱧᱩ ᱞᱟᱹᱜᱤᱫ ᱠᱟᱸᱰᱟᱨᱮ ᱫᱟᱜ ᱟᱹᱜᱩ ᱠᱟᱛᱮ ᱟᱹᱰᱤ ᱫᱩᱞᱟᱹᱲ ᱛᱮᱭ ᱮᱢᱟ ᱦᱟᱫᱮᱭᱟ᱾ ᱡᱤᱭᱚᱱ ᱨᱮᱭᱟᱜ, ᱟᱹᱠᱷᱤᱨ ᱨᱮᱭᱟᱜ, ᱛᱤᱱᱟᱹᱜ ᱠᱟᱛᱷᱟ ᱜᱟᱯᱟᱞᱢᱟᱨᱟᱣ ᱠᱮᱫᱟᱠᱤᱱ, ᱠᱟᱛᱷᱟ ᱵᱟᱭ ᱢᱩᱪᱟᱹᱫᱚᱜ ᱞᱮᱠᱟ᱾ ᱫᱩᱠᱨᱮ ᱥᱩᱠᱨᱮ, ᱢᱤᱫ ᱛᱮ ᱛᱟᱦᱮᱸᱱ ᱨᱮᱭᱟᱜ ᱠᱟᱛᱷᱟ ᱫᱚ, ᱞᱮᱯᱮᱡ ᱛᱤᱨᱤᱞ, ᱯᱮᱴᱮᱨ ᱵᱟᱲᱮ, ᱮᱨᱮ ᱟᱛᱱᱟᱜ ᱠᱷᱚᱫᱮ ᱢᱟᱛᱠᱚᱢ ᱵᱚᱸᱜᱟᱠᱚ ᱞᱮᱠᱟᱠᱤᱱ ᱜᱚᱴᱟ ᱩᱨᱤᱡ ᱠᱮᱫᱟ, ᱟᱹᱠᱤᱱ ᱫᱚ ᱢᱤᱫ ᱛᱮᱠᱤᱱ ᱛᱟᱸᱦᱮᱱᱟ ᱢᱮᱱᱛᱮ᱾ ᱛᱟᱞᱟ ᱧᱤᱫᱟᱹ ᱫᱮᱞᱟ ᱫᱮᱞᱤ ᱵᱟᱦᱟ ᱢᱟᱹᱭ ᱟᱡᱟᱜ ᱠᱩᱸᱵᱟᱹ ᱚᱲᱟᱜ ᱛᱮᱭ ᱪᱟᱞᱟᱣ ᱮᱱᱟ, ᱟᱨ ᱞᱩᱜᱩᱫᱚ ᱚᱱᱟ ᱫᱷᱤᱨᱤ ᱜᱷᱚᱸᱜᱚᱨ ᱨᱮᱭ ᱡᱟᱹᱯᱤᱫ ᱟᱸᱜᱟ ᱠᱮᱫᱟ᱾ ᱛᱤᱱᱹᱟᱜ ᱪᱮᱦᱨᱟ, ᱛᱤᱱᱟᱹᱜ ᱪᱚᱨᱚᱠ, ᱚᱱᱟ ᱟᱹᱨᱩᱴ ᱵᱩᱨᱩᱨᱮ, ᱵᱟᱨᱭᱟ ᱫᱩᱞᱟᱹᱲᱤᱭᱟᱹ ᱟᱹᱠᱤᱱᱟᱜ ᱢᱚᱱ ᱠᱩᱥᱤ ᱠᱤᱱ ᱪᱮᱯᱮᱨᱮᱡ ᱮᱱᱟ, ᱡᱟᱦᱟᱸ ᱠᱚ ᱫᱟᱨᱮ ᱱᱟᱹᱲᱤ ᱫᱷᱤᱨᱤ, ᱥᱮᱨᱢᱟ ᱨᱤᱱ ᱡᱩᱞᱩᱜ ᱥᱤᱧ ᱪᱟᱸᱫᱚ ᱧᱤᱫᱟᱹ ᱪᱟᱸᱫᱚ ᱞᱟᱡᱟᱣ ᱤᱯᱤᱞ ᱪᱷᱟᱰᱟ ᱠᱟᱛᱮ ᱚᱠᱚᱭ ᱦᱚᱸ ᱵᱟᱠᱚ ᱛᱷᱤᱛ ᱞᱮᱫ ᱠᱤᱱᱟ᱾

ᱥᱮᱛᱟᱜ ᱢᱟᱨᱥᱟᱞ ᱮᱱᱟ᱾ ᱪᱮᱬᱮ ᱪᱮᱨᱚᱵᱮᱨᱚ ᱪᱚᱦᱚᱲ ᱛᱮ ᱞᱩᱜᱩ ᱵᱩᱨᱩ ᱥᱚᱨᱚ ᱵᱚᱨᱚᱭᱮᱱᱟ᱾ ᱯᱩᱨᱩᱵᱽ ᱱᱟᱠᱷᱟ ᱥᱤᱧ ᱪᱟᱸᱫᱚ ᱩᱠᱩᱠᱷᱚᱱ ᱨᱟᱝ ᱞᱮᱠᱟᱭ ᱨᱟᱠᱟᱵ ᱠᱟᱱᱟ ᱞᱟᱸᱫᱟᱭ ᱞᱮᱠᱟ, ᱵᱟᱞᱮ ᱛᱟᱨᱟᱥ ᱛᱟᱨᱥᱮ ᱠᱟᱛᱮ᱾ ᱵᱤᱨ ᱪᱮᱬᱮ, ᱠᱩᱞᱟᱹᱭ ᱢᱟᱨᱟᱜ ᱪᱚᱦᱚᱲ ᱪᱮᱨᱚ ᱵᱮᱨᱚᱜ ᱛᱮ ᱨᱟᱝ ᱪᱟᱸᱫᱚ ᱠᱚ ᱫᱟᱨᱟᱢ ᱫᱟᱜᱮ ᱠᱟᱱᱟ᱾ ᱫᱷᱤᱨᱤ ᱜᱷᱚᱸᱜᱚᱨ ᱨᱮ ᱡᱟᱹᱯᱤᱫ ᱟᱠᱟᱫ ᱨᱟᱡᱽ ᱦᱚᱯᱚᱱ ᱵᱚᱸᱜᱟ ᱠᱚᱲᱟ ᱞᱩᱜᱩᱠᱚ ᱦᱚᱦᱚ ᱵᱮᱨᱮᱫ ᱮᱠᱟᱱᱟ᱾ ᱥᱤᱛᱟᱹ ᱱᱟᱞᱟ ᱡᱷᱟᱨᱱᱟ ᱫᱟᱜ ᱞᱟᱸᱫᱟ ᱟᱛᱮᱭ ᱮᱱᱮᱡ ᱟᱸᱫᱚᱲ ᱡᱚᱝ ᱠᱟᱱᱟ᱾ ᱫᱚᱞᱢᱟ ᱵᱩᱨᱩ ᱫᱷᱤᱨᱤ ᱚᱲᱟᱜ ᱨᱤᱱᱤᱡ ᱨᱟᱡᱽ ᱦᱚᱯᱚᱱ ᱞᱩᱜᱩ ᱚᱲᱟᱜ ᱨᱮᱱᱟᱜ ᱠᱟᱛᱷᱟᱭ ᱩᱭᱦᱟᱹᱨᱮᱫ ᱠᱷᱟᱱ ᱡᱤᱣᱤ ᱢᱚᱱᱮᱨᱮ ᱟᱹᱰᱤ ᱵᱷᱟᱹᱵᱤᱛᱮ ᱵᱩᱡᱷᱟᱹᱣ ᱮᱫᱟ᱾ ᱚᱱᱟ ᱵᱤᱨ ᱜᱟᱡᱟᱲ ᱠᱷᱚᱱ ᱥᱮᱱ ᱨᱩᱣᱟᱹᱲ ᱞᱟᱹᱜᱤᱫ ᱢᱚᱱᱮ ᱵᱟᱝ ᱠᱮᱴᱮᱡᱚᱜ ᱠᱟᱱ ᱛᱟᱭᱟ᱾ ᱵᱚᱸᱜᱟ ᱠᱩᱲᱤ ᱵᱟᱦᱟ ᱢᱟᱹᱭ, ᱞᱩᱜᱩ ᱞᱟᱹᱜᱤᱫ ᱥᱮᱛᱟᱜ ᱢᱟᱡᱟᱱ ᱞᱚᱣᱟ ᱵᱤᱞᱤᱭ ᱟᱹᱜᱩ ᱠᱮᱫᱼᱟ᱾ ᱞᱟᱡ ᱯᱮᱨᱮᱡ ᱞᱚᱣᱟ ᱵᱤᱞᱤ ᱡᱚᱢ ᱠᱟᱛᱮ ᱞᱩᱜᱩ ᱵᱟᱦᱟ ᱢᱟᱹᱭ ᱮ ᱢᱮᱛᱟᱭ ᱠᱟᱱᱟ, “ᱯᱮᱲᱟ ᱵᱩᱰᱤ ᱟᱢᱴᱷᱮᱱ ᱢᱤᱫ ᱠᱟᱛᱷᱟ ᱢᱮᱢᱮᱱ ᱥᱟᱹᱱᱟᱹᱧ ᱠᱟᱱᱟ, ᱟᱸᱡᱚᱢ ᱟᱢ, ᱵᱟᱹᱲᱤᱡ ᱵᱟᱢ ᱢᱚᱱᱮᱭᱟᱛᱚ?” ᱵᱟᱦᱟ ᱢᱟᱹᱭ ᱮ ᱢᱮᱱ ᱨᱩᱣᱟᱹᱲ ᱠᱮᱫᱼᱟ ᱪᱮᱫ ᱠᱟᱛᱷᱟ ᱢᱟ ᱞᱟᱹᱭᱢᱮ ᱵᱟᱹᱲᱤᱡ ᱫᱚ ᱵᱟᱹᱧ ᱢᱚᱱᱮᱭᱟ᱾

ᱞᱩᱜᱩᱣᱟᱜ ᱠᱚᱲᱟᱢ ᱫᱷᱟᱲᱟᱠ ᱜᱚᱫ ᱮᱱᱟ ᱥᱟᱦᱮᱫ ᱦᱚᱸ ᱱᱟᱱᱦᱟ ᱢᱚᱴᱟ ᱮᱱᱟ ᱹᱹᱹᱹᱹ᱾ ᱡᱤᱣᱤ ᱚᱲᱟᱜ ᱩᱠ ᱵᱩᱠᱟᱹᱣᱮᱱᱟ, ᱱᱟᱹᱰᱨᱤ ᱠᱷᱚᱱ ᱩᱞᱤᱫᱟᱜ, ᱨᱚᱲ ᱨᱟᱦᱟ ᱠᱩᱮᱪᱮᱫᱚᱜ ᱞᱮᱠᱟᱭ ᱟᱴᱠᱟᱨᱮᱫᱼᱟ᱾ ᱮᱱᱦᱚᱸ ᱥᱟᱦᱮᱫ ᱠᱩᱲᱟᱹᱣ ᱠᱟᱛᱮ ᱢᱮᱱ ᱜᱚᱫ ᱠᱮᱫᱟ, “ᱯᱮᱲᱟ ᱵᱩᱰᱤ ᱤᱧ ᱥᱟᱞᱟᱜ ᱮᱢ ᱥᱮᱱᱚᱜᱼᱟ, ᱟᱞᱮ ᱚᱲᱟᱜ ᱛᱮ? ᱤᱧ ᱚᱱᱟ ᱫᱚᱞᱢᱟ ᱵᱩᱨᱩ ᱫᱷᱤᱨᱤ ᱚᱲᱟᱜ ᱨᱮ ᱨᱟᱹᱱᱤ ᱞᱮᱠᱟᱹᱧ ᱥᱮᱵᱟ ᱢᱮᱭᱟ᱾ ᱡᱤᱣᱤ ᱯᱮᱨᱮᱡ ᱤᱧ ᱫᱩᱞᱟᱹᱲ ᱢᱮᱭᱟ, ᱢᱚᱱᱮ ᱯᱮᱨᱮᱡ ᱤᱧ ᱥᱤᱵᱤᱞ ᱟᱢᱟ ᱡᱟᱦᱟᱸ ᱫᱚ ᱫᱚᱨᱭᱟ ᱫᱟᱜ ᱞᱮᱠᱟ ᱛᱤᱥᱦᱚᱸ ᱵᱟᱝ ᱟᱸᱡᱮᱫᱚᱜᱼᱟ ᱛᱤᱥᱦᱚᱸ ᱵᱟᱝ ᱥᱟᱹᱠᱤᱫᱚᱜᱼᱟ”᱾

ᱵᱟᱦᱟ ᱢᱟᱹᱭ ᱮ ᱢᱮᱱ ᱨᱩᱣᱟᱹᱲ ᱠᱮᱫᱼᱟ, “ᱤᱧ ᱫᱚ ᱟᱹᱢᱤᱡ ᱨᱟᱹᱱᱤ ᱦᱩᱭ ᱠᱟᱛᱮ ᱪᱮᱫ ᱤᱧ ᱪᱤᱠᱟᱹᱭᱟ? ᱥᱩᱞᱩᱠ ᱛᱮ ᱢᱤᱱᱟᱹᱧᱟ, ᱟᱹᱰᱤ ᱱᱟᱯᱟᱭᱛᱮ ᱪᱮᱫ ᱦᱚᱸ ᱵᱟᱹᱧ ᱠᱷᱚᱡᱽ ᱠᱟᱱᱟ ᱜᱳ ᱹᱹᱹᱹ ᱤᱠᱟᱹᱧ ᱢᱮ᱾”

ᱞᱩᱜᱩ ᱟᱹᱰᱤ ᱜᱟᱹᱦᱤᱨ ᱟᱲᱟᱝ ᱛᱮᱭ ᱢᱮᱱ ᱨᱩᱣᱟᱹᱲ ᱠᱮᱫᱼᱟ, “ᱟᱢ ᱫᱚ ᱤᱧᱤᱧ ᱫᱩᱞᱟᱹᱲ ᱟᱢᱟ ᱯᱮᱲᱟ ᱵᱩᱰᱤᱹ ᱟᱢ ᱵᱮᱜᱚᱨ ᱤᱧᱟᱜ ᱡᱤᱭᱚᱱ ᱫᱚ ᱮᱠᱷᱮᱱ ᱮᱲᱮᱜᱮᱭᱟ ᱹᱹᱹ ᱤᱧᱟᱜ ᱟᱜᱟᱢ ᱡᱤᱭᱚᱱ ᱚᱦᱚᱜᱮ ᱥᱩᱜᱷᱚᱲ ᱠᱚᱜᱼᱟ, ᱥᱩᱨ ᱠᱷᱚᱱ ᱟᱞᱚᱢ ᱥᱟᱺᱜᱤᱧ ᱠᱟᱹᱧᱟ᱾ ᱵᱟᱦᱟ ᱢᱟᱹᱭ ᱜᱟᱹᱦᱤᱨ ᱟᱲᱟᱝ ᱛᱮᱭ ᱨᱚᱲ ᱠᱮᱫᱼᱟ “ᱯᱮᱲᱟ ᱫᱟᱫᱟ ᱚᱸᱰᱮᱢᱟ ᱱᱚᱣᱟ ᱵᱤᱨ ᱫᱟᱨᱮ ᱱᱟᱹᱲᱤ, ᱜᱟᱰᱟ ᱢᱩᱰᱩ ᱫᱟᱜ, ᱪᱮᱬᱮ ᱪᱮᱨᱚᱼᱵᱮᱨᱚ, ᱥᱤᱛᱟᱹ ᱱᱟᱞᱟ ᱡᱷᱟᱨᱱᱟ ᱫᱟᱜ, ᱦᱚᱦᱚᱣᱟᱹᱧ ᱞᱮᱠᱟ, ᱢᱟᱨᱟᱜ ᱧᱚᱦᱚᱲ ᱤᱧᱠᱚ ᱪᱮᱨᱮᱡ ᱤᱧ ᱞᱮᱠᱟ ᱪᱮᱫ ᱦᱚᱸ ᱵᱟᱹᱧ ᱟᱸᱡᱚᱢ ᱧᱟᱢᱟ ᱹᱹᱹ᱾

ᱞᱩᱜᱩᱭ ᱢᱮᱱ ᱠᱮᱫᱼᱟ ᱵᱟᱦᱟ ᱢᱟᱹᱭ ᱚᱸᱰᱮᱫᱚ ᱥᱟᱱᱟᱢ ᱥᱮᱫ ᱛᱮ ᱥᱩᱠᱨᱮᱢ ᱛᱟᱸᱦᱮᱱᱟ, ᱱᱟᱣᱟ ᱱᱟᱣᱟ ᱦᱚᱨᱚᱜ ᱵᱟᱸᱫᱮ, ᱥᱤᱵᱤᱞ ᱥᱚᱲᱚᱢ ᱡᱚᱢ ᱧᱩ, ᱨᱟᱹᱥᱠᱟᱹ ᱨᱚᱢᱚᱡᱽ ᱥᱟᱶᱛᱮ ᱟᱨᱦᱚᱸ ᱮᱢᱟᱱ ᱛᱮᱭᱟᱜ ᱹᱹᱹ ᱜᱷᱟᱸᱨᱚᱡᱽ ᱛᱟᱞᱟᱨᱮᱢ ᱜᱷᱩᱲ ᱠᱚᱜᱼᱟ ᱯᱟᱞᱟᱠ ᱯᱟᱨᱠᱚᱢ ᱨᱮᱢ ᱜᱩᱸᱜᱩᱫ ᱠᱚᱜᱼᱟ, ᱵᱩᱨᱩ ᱨᱮᱫᱚ ᱪᱮᱫ ᱦᱚᱸᱛᱚ ᱵᱟᱢ ᱧᱟᱢ ᱡᱚᱝ ᱠᱟᱱᱟ᱾ ᱵᱟᱦᱟᱭ ᱢᱮᱱ ᱨᱩᱣᱟᱹᱲ ᱠᱮᱫᱼᱟ, “ᱢᱟᱱᱢᱤ ᱫᱚ ᱟᱠᱚ ᱞᱟᱹᱜᱤᱫ ᱵᱟᱱᱟᱨ ᱥᱩᱠ ᱥᱩᱞᱩᱠ ᱠᱚ ᱛᱮᱭᱟᱨ ᱟᱠᱟᱫᱟ᱾ ᱟᱠᱚ ᱱᱟᱯᱟᱭ ᱠᱚ ᱛᱟᱸᱦᱮᱞᱮᱱ ᱠᱷᱟᱱᱜᱮ ᱥᱟᱱᱟᱢ ᱢᱟᱹᱱᱢᱤ ᱱᱟᱯᱟᱭ ᱠᱚ ᱛᱟᱸᱦᱮᱱᱟ ᱚᱱᱟ ᱫᱚ ᱤᱧᱫᱚ ᱥᱩᱠᱫᱚ ᱵᱟᱹᱧ ᱢᱮᱛᱟᱜᱼᱟ᱾ ᱟᱯᱲᱮᱭᱟᱜ ᱥᱩᱠ ᱥᱩᱞᱩᱠ ᱜᱮ ᱥᱩᱞᱩᱠ ᱫᱚ ᱵᱟᱝ ᱠᱟᱱᱟ᱾ ᱥᱟᱱᱟᱢ ᱢᱟᱹᱱᱢᱤ ᱥᱩᱠ ᱥᱩᱠᱩᱠ ᱛᱟᱦᱮᱸᱱ ᱜᱮ ᱥᱩᱠᱩᱠ ᱜᱷᱟᱨᱚᱸᱡᱽ ᱫᱚ᱾

ᱵᱟᱦᱟ ᱢᱟᱹᱭᱟᱜ ᱱᱚᱝᱠᱟᱱ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱞᱩᱜᱩ ᱪᱮᱫ ᱛᱮᱞᱟ ᱦᱚᱸ ᱵᱟᱭ ᱨᱩᱣᱟᱹᱲ ᱫᱟᱲᱮᱭᱟᱫᱼᱟ᱾ ᱵᱟᱦᱟ ᱢᱟᱹᱭ ᱟᱨᱦᱚᱸ ᱟᱡ ᱟᱡᱛᱮᱜᱮᱭ ᱢᱮᱱ ᱡᱚᱝ ᱠᱟᱱᱟ “ᱱᱩᱱᱟᱹᱜ ᱪᱮᱦᱨᱟ ᱫᱷᱟᱹᱨᱛᱤ ᱟᱭᱳ ᱥᱟᱡᱟᱣ ᱠᱚᱲᱟᱢ ᱠᱚᱞᱮ, ᱫᱤᱱᱟᱹᱢ ᱞᱮᱠᱟ ᱫᱟᱨᱮ ᱱᱟᱹᱲᱤ ᱪᱮᱬᱮ ᱪᱤᱯᱨᱩᱜ ᱢᱚᱱ ᱨᱮᱭᱟᱜ ᱪᱚᱜ ᱪᱮᱨᱮᱡ ᱥᱚᱦᱚᱨ ᱱᱟᱜᱟᱨ ᱨᱮᱫᱚ ᱚᱠᱟᱨᱮᱧ ᱧᱟᱢᱟ ᱱᱚᱰᱮ ᱫᱚ ᱮᱠᱞᱟ ᱢᱤᱭᱟᱹᱧᱟ ᱟᱹᱰᱤ ᱱᱟᱯᱟᱭ ᱢᱤᱱᱟᱹᱧᱟ ᱦᱤᱸᱥᱟᱹ ᱥᱩᱭᱟᱹ ᱱᱮᱭᱟᱣ ᱠᱷᱟᱹᱯᱟᱹᱨᱤ ᱱᱚᱰᱮ ᱪᱮᱫ ᱦᱚᱸ ᱵᱟᱹᱱᱩᱜ ᱟᱱᱟ ᱵᱟᱦᱟ ᱢᱟᱹᱭ ᱢᱚᱱᱮᱨᱮ ᱚᱠᱚᱭ ᱪᱚ ᱟᱹᱰᱤ ᱜᱟᱹᱦᱤᱨ ᱛᱮ ᱡᱟᱹᱱᱤᱡ ᱮ ᱢᱮᱛᱟᱭ ᱠᱟᱱᱟ ᱵᱟᱦᱟ ᱢᱟᱹᱭ ᱟᱢᱫᱚ ᱵᱚᱸᱜᱟ ᱞᱮᱠᱟ ᱱᱤᱡ ᱠᱟᱱᱟᱢ, ᱵᱚᱸᱜᱟ ᱫᱚ ᱢᱟᱹᱱᱢᱤ ᱭᱟᱜ ᱠᱟᱛᱷᱟ ᱠᱚ ᱟᱸᱡᱚᱢᱟ, ᱢᱟᱹᱱᱢᱤ ᱭᱟᱜ ᱫᱩᱠ ᱦᱟᱨᱠᱮᱛ ᱨᱮ ᱜᱚᱲᱚᱠᱚ ᱮᱢᱟ, ᱥᱮᱱᱚᱜ ᱨᱮᱵᱮᱱ ᱢᱮᱥᱮ ᱟᱹᱰᱤ ᱱᱟᱯᱟᱭ ᱛᱮᱢ ᱛᱟᱸᱦᱮᱱᱟ ᱦᱮᱸ ᱢᱮᱱᱢᱮ ᱵᱟᱦᱟ ᱢᱟᱹᱭ, ᱦᱮᱸ ᱢᱮᱱᱢᱮ᱾ ᱵᱟᱦᱟ ᱢᱟᱹᱭ ᱵᱚᱸᱜᱟ ᱠᱚᱲᱟ ᱞᱮᱠᱟᱱ ᱠᱚᱲᱟ ᱞᱩᱜᱩ ᱥᱟᱞᱟᱜ ᱥᱮᱱᱚᱜ ᱞᱟᱹᱜᱤᱫ ᱮ ᱨᱮᱦᱮᱱ ᱮᱱᱟ᱾ ᱢᱚᱱᱮᱭ ᱜᱚᱴᱟ ᱠᱮᱫᱟ᱾ ᱡᱤᱣᱤ ᱨᱮᱭᱟᱜ ᱫᱩᱞᱟᱹᱲ ᱱᱟᱹᱲᱤᱛᱮᱭ ᱪᱷᱟᱸᱫᱟ ᱵᱷᱤᱸᱫᱟᱹᱲ ᱮᱱᱟ᱾ ᱞᱩᱜᱩ ᱥᱟᱞᱟᱜ ᱥᱮᱱᱚᱜ ᱨᱮᱦᱚᱸᱭ ᱨᱮᱵᱮᱱ ᱮᱱᱟ ᱡᱚ ᱵᱟᱦᱟ ᱠᱩᱞᱟᱹᱭ ᱢᱟᱨᱟᱜ ᱴᱷᱮᱱᱠᱷᱚᱱ ᱵᱤᱫᱟᱹᱭ ᱦᱟᱛᱟᱣ ᱠᱟᱛᱮ ᱠᱩᱜᱩ ᱥᱟᱶᱮ ᱚᱰᱚᱠ ᱪᱟᱞᱟᱜ ᱠᱟᱱᱟ᱾ ᱥᱮᱱᱚᱜ ᱡᱚᱦᱚᱜ ᱢᱮᱫ ᱨᱮᱭᱟᱜ ᱢᱮᱫ ᱫᱟᱜ ᱯᱮᱲᱮ ᱯᱮᱲᱮᱭᱮᱱ ᱛᱟᱭᱟ᱾ ᱱᱤᱪᱚᱞ ᱱᱤᱡᱷᱩᱢ ᱫᱟᱨᱮ ᱱᱟᱹᱲᱤ ᱦᱚᱸ ᱵᱟᱦᱟ ᱢᱟᱹᱭ ᱚᱰᱚᱠ ᱪᱟᱞᱟᱜ ᱠᱟᱱ ᱧᱮᱞ ᱠᱟᱛᱮ ᱢᱤᱫ ᱰᱚᱸᱰᱮᱠ ᱞᱟᱹᱜᱤᱫ ᱛᱷᱤᱨ ᱛᱷᱟᱨ ᱩᱛᱟᱹᱨ ᱮᱱᱟ᱾ ᱵᱟᱦᱟ ᱢᱟᱹᱭ ᱥᱟᱶᱛᱮ ᱞᱩᱜᱩ ᱛᱟᱲᱟᱢ ᱥᱮᱴᱮᱨ ᱠᱮᱫᱟᱠᱤᱱ ᱫᱚᱞᱢᱟ ᱵᱩᱨᱩ ᱫᱷᱤᱨᱤ ᱚᱲᱟᱜ, ᱩᱞᱤᱱ ᱜᱩᱞᱤᱱ ᱨᱟᱡᱽ ᱵᱟᱹᱠᱷᱩᱞ᱾ ᱥᱟᱹᱜᱩᱱ ᱫᱤᱱ ᱨᱮᱱᱟᱜ ᱥᱟᱹᱜᱩᱱ ᱵᱮᱲᱟᱨᱮ ᱨᱟᱹᱦᱤ ᱰᱟᱹᱰᱤ ᱵᱟᱯᱞᱟ ᱤᱛᱩᱫ ᱵᱟᱦᱟ ᱢᱟᱹᱭ ᱧᱮᱞ ᱠᱟᱛᱮ ᱟᱹᱰᱤᱠᱚ ᱠᱩᱥᱤ ᱨᱟᱹᱥᱠᱟᱹ ᱭᱮᱱᱟ᱾ ᱵᱟᱦᱟ ᱢᱟᱹᱭ ᱟᱨ ᱞᱩᱜᱩ ᱫᱚ ᱡᱟᱹᱱᱤᱡ ᱵᱚᱸᱜᱟ ᱠᱚᱲᱟ ᱟᱨ ᱵᱚᱸᱜᱟ ᱠᱩᱲᱤ ᱞᱮᱠᱟ᱾ ᱪᱟᱸᱫᱚ ᱜᱮ ᱥᱤᱨᱡᱚᱱᱤᱡ, ᱪᱟᱸᱫᱚᱜᱮ ᱡᱩᱨᱤᱭᱤᱡ, ᱱᱩᱠᱤᱱᱟᱜ ᱵᱟᱯᱞᱟ ᱫᱚ ᱡᱟᱹᱱᱤᱡ ᱫᱷᱚᱨᱚᱢ ᱜᱮᱭ ᱥᱟᱹᱠᱷᱤᱭᱟᱱ᱾ ᱵᱟᱯᱞᱟ ᱛᱟᱭᱚᱢ ᱞᱩᱜᱩ ᱟᱨ ᱵᱟᱦᱟ ᱦᱟᱜ ᱫᱩᱞᱟᱹᱲ ᱥᱮᱛᱮᱧ ᱤᱫᱤ ᱮᱱᱟ᱾ ᱞᱩᱜᱩ ᱱᱮᱛᱟᱨ ᱫᱚ ᱥᱩᱠ ᱨᱤᱱ ᱞᱟᱹᱣᱲᱤᱭᱟᱹ᱾ ᱫᱤᱱᱟᱹᱢ ᱦᱤᱞᱚᱜ ᱟᱡᱟᱜ ᱟᱱᱟᱴ ᱮᱴᱠᱮᱴᱚᱬᱮ ᱯᱟᱪᱮ ᱦᱩᱭᱩᱜ ᱠᱟᱱ ᱚᱱᱟ ᱠᱟᱛᱷᱟᱠᱚᱭ ᱠᱩᱞᱤᱭᱮᱭᱟ᱾ ᱥᱟᱱᱟᱢ ᱞᱮᱠᱟᱱ ᱛᱩᱱᱠᱷᱤ ᱛᱚᱞᱟᱥ ᱞᱟᱹᱜᱤᱫ ᱠᱟᱹᱲᱢᱤ ᱠᱩᱲᱤᱦᱚᱸ ᱵᱟᱦᱟ ᱢᱟᱹᱭ ᱜᱚᱲᱚ ᱞᱟᱹᱜᱤᱫᱼᱮ ᱫᱚᱦᱚ ᱠᱮᱫ ᱠᱚᱣᱟ᱾ ᱫᱟᱨᱟ ᱦᱟᱨᱟ ᱚᱱᱟ ᱵᱟᱹᱠᱷᱩᱞ ᱨᱮ ᱵᱟᱦᱟ ᱢᱟᱹᱭᱟᱜ ᱪᱮᱫ ᱨᱮᱦᱚᱸ ᱠᱷᱟᱴᱚᱜᱮ ᱵᱟᱝ ᱛᱟᱸᱦᱮᱠᱟᱱᱟ᱾ ᱱᱟᱯᱟᱭ ᱦᱚᱨᱚᱜ ᱵᱟᱸᱫᱮ ᱡᱚᱢ ᱧᱩ ᱥᱚᱱᱟ ᱨᱩᱯᱟᱹ ᱟᱨ ᱠᱟᱹᱲᱢᱤ ᱠᱚᱲᱤᱛᱮ ᱵᱟᱦᱟ ᱢᱟᱹᱭᱫᱚ ᱫᱤᱱᱟᱹᱢ ᱠᱚ ᱩᱢ ᱚᱡᱚᱜ ᱮ ᱛᱟᱸᱦᱮᱫ᱾ ᱱᱚᱝᱠᱟᱛᱮ ᱫᱤᱱᱟᱹᱢ ᱥᱤᱧ ᱠᱷᱚᱱ ᱧᱤᱫᱟᱹ ᱦᱟᱯᱛᱟ ᱠᱷᱚᱱ ᱪᱟᱸᱫᱚ, ᱪᱟᱸᱫᱚ ᱠᱷᱚᱱ ᱥᱮᱨᱢᱟ ᱯᱟᱨᱚᱢ ᱪᱟᱞᱟᱜ ᱠᱟᱱᱟ᱾ ᱵᱟᱦᱟ ᱢᱟᱹᱭ ᱱᱤᱥᱚᱱ ᱦᱚᱴᱚ ᱟᱠᱟᱫ ᱫᱷᱤᱨᱤ ᱜᱷᱚᱸᱜᱚᱨ ᱠᱩᱸᱵᱟᱹ ᱚᱲᱟᱜ ᱪᱮᱬᱮ ᱪᱤᱯᱨᱩᱜ ᱫᱟᱨᱮ ᱱᱟᱹᱲᱤ ᱵᱟᱦᱟ ᱢᱟᱹᱭ ᱩᱭᱦᱟᱹᱨ ᱛᱮᱠᱚ ᱢᱩᱞᱤᱱ ᱢᱮᱫ ᱦᱟᱸ ᱟᱠᱟᱱᱟ᱾ ᱟᱪᱠᱟᱜᱮ ᱢᱤᱫ ᱫᱤᱱ ᱫᱚ ᱵᱟᱦᱟ ᱢᱟᱹᱭᱟᱜ ᱡᱤᱭᱚᱱ ᱟᱸᱫᱩᱨ ᱢᱟᱹᱫᱩᱨᱮᱱ ᱛᱟᱭᱟ᱾ ᱥᱩᱞᱩᱠ ᱠᱩᱠᱢᱩ ᱥᱟᱶᱟᱨ ᱢᱚᱱᱮ ᱵᱷᱩᱭᱞᱩ ᱵᱷᱟᱺᱫᱩᱲᱚᱜ ᱠᱟᱱᱟ᱾ ᱥᱚᱱᱟ ᱢᱟᱞᱟ ᱱᱟᱯᱟᱭ ᱦᱚᱨᱚᱜ ᱵᱟᱸᱫᱮ, ᱛᱚᱣᱟ ᱫᱟᱦᱮ ᱵᱤᱨ ᱨᱮᱱᱟᱜ ᱡᱚ ᱵᱟᱦᱟ ᱠᱷᱚᱱᱫᱚ ᱱᱤᱠᱚᱢ ᱜᱮ ᱢᱚᱱᱮ ᱠᱮᱫᱼᱟ᱾ ᱡᱩᱣᱟᱹᱱ ᱦᱚᱲᱢᱚ ᱜᱚᱥᱚ ᱛᱚᱞᱢᱚᱡᱚᱜ ᱠᱟᱱ ᱞᱮᱠᱟᱭ ᱵᱩᱡᱷᱟᱹᱣᱮᱫᱼᱟ᱾ ᱫᱚᱞᱢᱟ ᱵᱩᱨᱩ ᱫᱷᱤᱨᱤ ᱚᱲᱟᱜ ᱨᱤᱱ ᱥᱟᱱᱟᱢ ᱜᱷᱟᱸᱨᱚᱡᱽ ᱦᱚᱲ, ᱵᱟᱦᱟᱢᱟᱹᱭᱟᱜ ᱱᱚᱝᱠᱟᱱ ᱦᱟᱞᱟᱛ ᱧᱮᱞ ᱠᱟᱛᱮ ᱟᱹᱰᱤ ᱵᱷᱟᱹᱵᱤ ᱨᱮᱠᱚ ᱧᱩᱨᱷᱟᱹᱭᱮᱱᱟ᱾ ᱱᱚᱝᱠᱟᱱ ᱨᱟᱹᱥᱠᱟᱹ ᱚᱠᱛᱚ ᱢᱩᱞᱤᱱᱚᱜ ᱠᱟᱱ ᱩᱭᱦᱟᱹᱨ ᱠᱟᱛᱮ ᱚᱠᱟ ᱫᱤᱥ ᱦᱩᱫᱤᱥ ᱜᱮ ᱵᱟᱝᱠᱚ ᱠᱩᱲᱟᱹᱣ ᱮᱫᱼᱟ᱾ ᱨᱟᱡᱽ ᱵᱟᱠᱷᱩᱞ ᱨᱮᱱᱟᱜ ᱞᱩᱜᱩᱫ ᱟᱴᱮᱫ ᱜᱮ ᱵᱟᱦᱟ ᱢᱟᱹᱭᱟᱜ ᱥᱟᱦᱮᱫ ᱵᱟᱝ ᱠᱩᱲᱟᱜ ᱠᱟᱱᱟ, ᱪᱤᱠᱟᱹᱛᱮᱪᱚ ᱩᱠᱵᱩᱠᱟᱹᱣ ᱜᱮᱭ ᱟᱴᱠᱟᱨᱮᱫᱼᱟ? ᱠᱚᱲᱟᱢ ᱰᱷᱟᱭ ᱰᱷᱟᱭᱚᱜ ᱠᱟᱱᱟ, ᱡᱟᱹᱱᱤᱡ ᱞᱩᱜᱩ ᱵᱩᱨᱩ ᱡᱤᱵᱽ ᱡᱤᱭᱟᱹᱞᱤ ᱵᱟᱹᱜᱤ ᱠᱟᱛᱮ ᱪᱮᱫ ᱪᱚᱭ ᱠᱟᱹᱭ ᱟᱠᱟᱫᱼᱟ᱾ ᱢᱚᱱ ᱛᱟᱞᱟ ᱨᱮ ᱜᱟᱹᱦᱤᱨ ᱨᱤᱫᱟᱹᱭ ᱠᱷᱚᱱ ᱵᱤᱨ ᱨᱮᱱᱟᱜ ᱫᱟᱨᱮ ᱱᱟᱹᱲᱤ, ᱪᱮᱬᱮ ᱪᱤᱯᱨᱩᱜ, ᱡᱚᱵᱟᱦᱟ ᱜᱟᱹᱣᱤᱡ ᱟᱛᱮ ᱫᱟᱭᱟ ᱜᱮᱠᱚ ᱦᱚᱦᱚ ᱟᱭ ᱠᱟᱱᱟ ᱹᱹᱹᱹᱹᱹᱹ ᱥᱟᱺᱜᱤᱧ ᱠᱷᱚᱱ ᱠᱚ ᱜᱟᱹᱣᱤᱡ ᱟᱭ ᱠᱟᱱᱟ ᱵᱟᱦᱟ ᱢᱟᱹᱭ ᱥᱩᱞᱩᱠ ᱥᱟᱶᱟᱨ ᱵᱟᱹᱱᱩᱜ ᱠᱷᱟᱱ ᱫᱮᱞᱟ ᱨᱩᱣᱟᱹᱲ ᱢᱮ᱾ ᱞᱩᱜᱩ ᱵᱩᱨᱩ ᱥᱟᱠᱟᱢ ᱠᱩᱸᱵᱟᱹ ᱚᱲᱟᱜ ᱛᱮ, ᱫᱷᱤᱨᱤ ᱜᱷᱚᱸᱜᱚᱨ ᱨᱮ ᱦᱮᱞᱠᱟ ᱦᱮᱞᱠᱤ ᱥᱤᱛᱟᱹ ᱱᱟᱞᱟ ᱜᱟᱰᱟ ᱟᱲᱮ ᱨᱮ᱾ ᱨᱟᱡᱽ ᱵᱟᱠᱷᱩᱞ ᱨᱮᱱᱟᱜ ᱡᱚᱢ ᱧᱩ ᱦᱚᱴᱚᱜ ᱨᱮ ᱵᱟᱝ ᱩᱫᱩᱜ ᱠᱟᱱᱟ, ᱦᱚᱨᱚᱜ ᱵᱟᱸᱫᱮ ᱦᱚᱲᱢᱚ ᱨᱮ ᱵᱟᱝ ᱥᱚᱵᱷᱟᱜ, ᱵᱟᱹᱭ ᱵᱟᱹᱭᱛᱮ ᱥᱟᱹᱠᱤᱫ ᱠᱟᱛᱮ ᱟᱸᱡᱮᱫᱚᱜ ᱠᱟᱱᱟ᱾

ᱵᱟᱦᱟ ᱢᱟᱹᱭᱟᱜ ᱱᱤᱯᱷᱩᱴ ᱜᱩᱸᱞᱟᱹᱰ ᱦᱚᱲᱢᱚ ᱵᱟᱹᱭ ᱵᱟᱹᱭᱛᱮ ᱜᱚᱥᱚ ᱛᱚᱞᱢᱚᱡᱚᱜ ᱠᱟᱱᱟ᱾ ᱮᱠᱞᱟ ᱱᱤᱥᱴᱟᱹ ᱫᱩᱲᱩᱵ ᱠᱟᱛᱮ ᱪᱮᱛᱟᱛ ᱠᱚᱪᱚ ᱦᱟᱱᱟ ᱱᱷᱟᱨᱟ ᱩᱭᱦᱟᱹᱨ ᱛᱮᱭ ᱜᱷᱩᱲ ᱠᱚᱜ ᱠᱟᱱᱟ᱾ ᱱᱟᱱᱟ ᱦᱩᱱᱹᱟᱨ ᱩᱭᱦᱟᱹᱨ ᱵᱟᱨᱟᱦᱤᱛᱮᱭ ᱜᱟᱵᱽᱲᱩᱵ ᱥᱟᱵᱽᱲᱟᱜ ᱮᱱᱟ᱾ ᱞᱩᱜᱩᱣᱟᱜ ᱛᱤᱨᱭᱳ ᱥᱟᱞᱟᱜ ᱵᱟᱝ ᱡᱚᱲᱚᱜ ᱠᱟᱱᱟ ᱵᱟᱦᱟ ᱢᱟᱹᱭᱟᱜ ᱱᱚᱝᱠᱟᱱ ᱢᱩᱦᱤᱢ ᱠᱷᱚᱱ ᱚᱣᱟᱨᱮ ᱞᱟᱹᱜᱤᱫ ᱞᱩᱜᱩ ᱥᱟᱱᱟᱢ ᱞᱮᱠᱟᱛᱮᱭ ᱠᱩᱨᱩ ᱢᱩᱴᱩᱠᱮᱫᱼᱟ, ᱢᱮᱱᱠᱷᱟᱱ ᱵᱟᱦᱟ ᱢᱟᱹᱭᱟᱜ ᱢᱚᱥᱚᱫ ᱢᱚᱱᱮᱫᱚ ᱵᱟᱭ ᱦᱟᱹᱞᱤ ᱨᱩᱣᱟᱹᱲ ᱫᱟᱲᱮᱭᱟᱫᱼᱟ᱾ ᱜᱷᱟᱱᱮᱠ ᱫᱤᱱ ᱛᱟᱭᱚᱢ ᱦᱚᱲᱢᱚ ᱟᱹᱰᱤ ᱨᱟᱯᱩᱫ ᱮᱱ ᱛᱟᱭᱟ ᱟᱴᱮᱫ ᱯᱟᱞᱟᱠ ᱯᱟᱨᱠᱚᱢ ᱥᱟᱶ ᱮ ᱡᱟᱞᱟᱫ ᱤᱫᱤᱜ ᱠᱟᱱᱟ᱾ ᱫᱤᱱᱟᱹᱢ ᱫᱤᱱ ᱨᱩᱯ ᱢᱚᱦᱚᱨ ᱵᱟᱹᱲᱤᱡ ᱥᱮᱱᱜᱮ ᱞᱟᱦᱟ ᱪᱟᱞᱟᱜ ᱠᱟᱱᱟ᱾ ᱡᱟᱱ ᱚᱡᱷᱟ ᱪᱮᱫ ᱨᱟᱱ ᱦᱚᱸᱜᱮ ᱵᱟᱦᱟ ᱢᱟᱹᱭ ᱴᱷᱮᱱ ᱵᱟᱝ ᱞᱟᱜᱟᱣ ᱞᱮᱱᱟ᱾ ᱨᱟᱱ ᱟᱨ ᱟᱡᱟᱨ ᱵᱟᱝ ᱜᱟᱯᱟᱱ ᱞᱮᱱᱟ ᱡᱤᱣᱤ ᱵᱟᱹᱧᱪᱟᱜ ᱟᱸᱥ ᱥᱩᱞᱛᱟᱹ ᱵᱟᱹᱭ ᱵᱟᱹᱭᱛᱮ ᱧᱩᱲᱩ ᱧᱩᱲᱩ ᱤᱫᱤᱜ ᱠᱟᱱᱟ, ᱵᱟᱧᱪᱟᱜ ᱨᱮᱱᱟᱜ ᱥᱟᱱᱟ ᱢᱩᱰᱨᱩᱡ ᱤᱫᱤᱜ ᱠᱟᱱᱟ᱾ ᱢᱤᱫ ᱫᱤᱱ ᱵᱟᱦᱟ ᱢᱟᱹᱭ ᱞᱩᱜᱩ ᱛᱮᱡ ᱦᱚᱦᱚ ᱥᱩᱨ ᱠᱟᱛᱮᱭ ᱢᱮᱛᱟᱭ ᱠᱟᱱᱟ ᱹᱹᱹᱹᱹ ᱟᱹᱰᱤᱢ ᱫᱩᱞᱟᱹᱲ ᱞᱤᱫᱤᱧᱟ ᱜᱚ, ᱟᱹᱰᱤᱢ ᱥᱤᱵᱤᱞ ᱟᱹᱫᱤᱧᱟ ᱹᱹ ᱵᱟᱹᱧ ᱞᱟᱹᱭ ᱠᱮᱭᱟ ᱟᱞᱟᱝ ᱟᱜ ᱫᱩᱞᱟᱹᱲ ᱪᱟᱫᱚ ᱜᱮᱪᱚ ᱯᱟᱞᱮᱱ ᱵᱟᱭ ᱧᱮᱞ ᱥᱟᱦᱟᱣ ᱞᱮᱫ, ᱥᱮ ᱵᱤᱨ ᱨᱮᱱᱟᱜ ᱫᱟᱨᱮ ᱱᱟᱹᱲᱤ ᱡᱚ ᱵᱟᱦᱟ ᱟᱨᱥᱮ ᱵᱟᱝ ᱞᱩᱜᱩ ᱵᱩᱨᱩ ᱠᱩᱸᱵᱟᱹ ᱚᱲᱟᱜ ᱨᱮᱠᱚ ᱪᱮᱨᱮᱡ ᱵᱟᱲᱟᱭᱤᱧ ᱪᱮᱬᱮ ᱪᱤᱯᱨᱩᱜ ᱜᱮᱠᱚ ᱟᱹᱲᱤᱥᱮᱱ ᱚᱦᱚᱧ ᱞᱟᱹᱭ ᱠᱮᱭᱟ᱾ ᱢᱮᱱ ᱮᱢᱱᱛᱮ ᱵᱟᱦᱟ ᱢᱹᱟᱭᱟᱜ ᱦᱤᱰᱤᱨ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱦᱤᱸᱡᱽᱨᱟᱹᱣ ᱟᱲᱜᱚᱭᱮᱱᱟ ᱞᱩᱜᱩᱦᱚᱸ ᱱᱚᱣᱟ ᱢᱮᱫ ᱫᱟᱜ ᱥᱟᱶ ᱟᱡᱟᱜ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱡᱚᱨᱚ ᱟᱸᱲᱜᱚᱭᱮᱱᱟ᱾ ᱵᱟᱦᱟ ᱢᱟᱹᱭ ᱨᱟᱜ ᱟᱛᱮᱜᱮᱭ ᱨᱚᱲ ᱤᱫᱤᱭᱮᱫᱼᱟ ᱹ ᱹᱹ ᱟᱫᱚ ᱤᱧ ᱫᱚ ᱵᱟᱹᱧ ᱵᱟᱧᱪᱟᱜ ᱟᱜᱳ, ᱜᱩᱡᱩᱜ ᱞᱟᱦᱟ ᱟᱢᱴᱷᱮᱱ ᱢᱤᱫ ᱴᱟᱹᱝ ᱟᱸᱥ ᱢᱮᱱᱟᱜ ᱟ ᱟᱢᱠᱤ ᱚᱱᱟ ᱟᱸᱥ ᱮᱢ ᱯᱩᱨᱟᱹᱣ ᱠᱮᱛᱤᱧᱟ? ᱞᱩᱜᱩ ᱨᱟᱜ ᱟᱲᱟᱝ ᱛᱮᱭ ᱨᱚᱲ ᱨᱩᱲᱟᱹᱣ ᱠᱮᱫᱼᱟ ᱮᱠᱟᱞᱛᱮ ᱟᱢᱟᱜ ᱟᱸᱥ ᱤᱧ ᱯᱩᱨᱟᱹᱣ ᱛᱟᱢᱟ ᱫᱩᱞᱟᱹᱲᱤ, ᱞᱟᱹᱭᱢᱮ ᱪᱮᱫ ᱛᱟᱢ ᱟᱢᱟᱜ ᱟᱸᱥ? ᱪᱮᱫ ᱛᱟᱢ ᱟᱢᱟᱜ ᱠᱩᱠᱢᱩ? ᱵᱟᱦᱟ ᱢᱟᱹᱭ ᱮ ᱢᱮᱱ ᱨᱩᱣᱟᱹᱲ ᱠᱮᱫᱼᱟ ᱹᱹᱹᱹ ᱡᱟᱦᱟᱸ ᱛᱤᱥ ᱡᱩᱫᱤ ᱞᱩᱜᱩ ᱵᱩᱨᱩ ᱥᱮᱸᱫᱽᱨᱟ ᱥᱤᱞᱟᱹᱨᱤᱭᱟᱹ ᱞᱮᱠᱟᱛᱮᱢ ᱥᱮᱱᱚᱜᱼᱟ ᱤᱧ ᱨᱤᱱ ᱩᱱᱠᱩ ᱵᱚᱭᱦᱟ ᱢᱟᱭᱟ ᱵᱤᱨ ᱨᱤᱱ ᱪᱮᱬᱮ ᱪᱤᱯᱨᱩᱜ ᱟᱞᱚᱢ ᱥᱮᱸᱫᱨᱟ ᱠᱚᱣᱟ, ᱟᱞᱚᱢ ᱜᱚᱡ ᱠᱚᱣᱟ᱾ ᱩᱱᱠᱩ ᱠᱚ ᱛᱟᱸᱦᱮᱱ ᱠᱷᱟᱱ ᱤᱧᱟᱜ ᱞᱩᱜᱩ ᱵᱩᱨᱩ ᱠᱩᱸᱵᱟᱹ ᱚᱲᱟᱜ ᱠᱚ ᱧᱮᱞ ᱥᱟᱢᱴᱟᱣ ᱠᱟᱜᱼᱟ᱾ ᱟᱨᱦᱚᱸ ᱟᱸᱡᱚᱢ ᱢᱮ ᱥᱤᱨᱡᱚᱱ ᱨᱮᱱᱟᱜ ᱢᱩᱪᱟᱹᱫ ᱢᱮᱱᱟᱜᱼᱟ, ᱡᱟᱱᱟᱢ ᱨᱮᱱᱟᱜ ᱦᱚᱸ ᱜᱩᱡᱩᱜ ᱢᱮᱱᱟᱜᱼᱟ, ᱹᱹᱹᱤᱧ ᱡᱟᱦᱟᱸ ᱛᱤᱥ ᱤᱧ ᱜᱩᱡᱩᱜᱼᱟ ᱤᱧ ᱫᱚ ᱤᱧᱟᱜ ᱞᱩᱜᱩ ᱵᱩᱨᱩ ᱜᱷᱟᱱᱴᱟ ᱵᱟᱲᱮ ᱡᱟᱯᱟᱜ ᱵᱤᱨ ᱛᱟᱞᱟ ᱠᱩᱸᱵᱟᱹ ᱚᱲᱟᱜ ᱚᱱᱟ ᱫᱷᱤᱨᱤ ᱜᱷᱚᱸᱜᱚᱨ ᱨᱮ ᱛᱚᱯᱟ ᱠᱟᱹᱧ ᱢᱮᱜᱳ ᱹᱹᱹᱹᱹᱹ ᱟᱢ ᱠᱤ ᱱᱚᱣᱟ ᱟᱸᱥ ᱮᱢ ᱯᱩᱨᱟᱹᱣ ᱠᱤᱛᱤᱧᱟ? ᱞᱩᱜᱩ ᱨᱟᱜ ᱢᱮᱫ ᱦᱟᱸ ᱟᱛᱮᱭ ᱨᱚᱲ ᱨᱩᱣᱟᱹᱲ ᱠᱮᱫᱼᱟ, ᱯᱩᱨᱟᱹᱣ ᱟᱹᱧ ᱫᱩᱞᱟᱹᱲᱤ, ᱯᱩᱨᱟᱹᱣᱟᱹᱧ᱾ ᱟᱢᱟᱜ ᱱᱚᱣᱟ ᱟᱸᱥ ᱠᱩᱠᱢᱩ ᱫᱚᱧ ᱯᱩᱨᱟᱹᱣ ᱜᱮᱭᱟ ᱢᱮᱱᱠᱷᱟᱱ ᱱᱤᱛᱨᱮᱫᱚ ᱪᱮᱫᱟᱜ ᱚᱱᱠᱟᱱ ᱠᱟᱛᱷᱟ ᱜᱟᱯᱟᱞ ᱢᱟᱨᱟᱣ ᱚᱠᱛᱚ ᱜᱮ ᱵᱟᱦᱟ ᱢᱹᱟᱭᱟᱜ ᱥᱟᱦᱮᱫ ᱦᱟᱹᱯᱤᱫ ᱮᱱᱟ, ᱢᱮᱫ ᱛᱟᱭ ᱡᱟᱭ ᱡᱩᱜᱽ ᱞᱟᱹᱜᱤᱫ ᱡᱟᱹᱯᱤᱫ ᱮᱱᱟ᱾ ᱞᱩᱜᱩ ᱵᱟᱦᱟ ᱢᱟᱹᱭ ᱵᱮᱲᱦᱟᱭ ᱛᱮ ᱩᱨᱩ ᱠᱚᱸᱰᱮᱞᱮ ᱨᱟᱜ ᱦᱚᱢ ᱚᱨᱮᱱᱟ᱾ ᱞᱩᱜᱩ ᱫᱚ ᱵᱟᱦᱟ ᱢᱟᱹᱭᱟᱜ ᱟᱸᱥ ᱟᱨ ᱥᱟᱱᱟ ᱞᱮᱠᱟᱛᱮ ᱚᱱᱟ ᱞᱩᱜᱩ ᱵᱩᱨᱩ ᱠᱩᱸᱵᱟᱹ ᱚᱲᱟᱜ ᱫᱷᱤᱨᱤ ᱜᱷᱚᱸᱜᱚᱨ ᱨᱮ ᱫᱩᱠ ᱢᱚᱱᱮ ᱠᱟᱺᱦᱤᱥ ᱡᱤᱣᱤ ᱟᱛᱮᱭ ᱛᱚᱯᱟ ᱠᱟᱫᱮᱭᱟ᱾ ᱛᱚᱯᱟ ᱴᱷᱟᱶ ᱠᱷᱚᱱ ᱥᱟᱦᱟ ᱧᱚᱜ ᱨᱮ ᱡᱟᱦᱟᱸᱨᱮ ᱞᱩᱜᱩ ᱯᱩᱭᱞᱩ ᱵᱟᱦᱟ ᱢᱟᱹᱭ ᱥᱟᱞᱟᱜ ᱧᱟᱯᱟᱢᱚᱜ ᱦᱤᱞᱚᱜᱼᱮ ᱡᱟᱹᱯᱤᱫ ᱟᱸᱜᱟ ᱞᱮᱫᱼᱟ, ᱟᱡᱟᱜ ᱥᱚᱱᱮᱨ ᱛᱤᱨᱭᱳ ᱦᱚᱸᱭ ᱟᱠᱟ ᱦᱚᱴᱚ ᱠᱟᱫᱼᱟ᱾ ᱟᱨ ᱟᱡᱫᱚ ᱚᱸᱰᱮ ᱠᱷᱚᱱᱮ ᱪᱷᱟᱱ ᱮᱱᱟ᱾ ᱵᱤᱨ ᱨᱤᱱ ᱪᱮᱬᱮ ᱪᱤᱯᱨᱩᱜ, ᱫᱟᱨᱮ ᱱᱟᱹᱲᱤ ᱥᱟᱶ ᱛᱮ ᱥᱟᱱᱟᱢ ᱵᱩᱨᱩ ᱡᱤᱭᱟᱹᱞᱤ ᱵᱟᱦᱟ ᱢᱟᱹᱭᱟᱜ ᱱᱚᱝᱠᱟᱱ ᱫᱚᱥᱟ ᱧᱮᱞ ᱠᱟᱛᱮ ᱢᱚᱱ ᱢᱩᱞᱤᱱ ᱟᱛᱮᱠᱚ ᱨᱟᱜ ᱟᱸᱫᱚᱲ ᱠᱮᱫᱼᱟ᱾ ᱱᱤᱯᱷᱩᱴ ᱫᱟᱨᱮ ᱰᱟᱹᱨ ᱠᱷᱚᱱ ᱴᱩᱸᱜᱟᱹᱣ ᱧᱩᱨ ᱮᱱᱟ, ᱥᱟᱜᱮᱱ ᱫᱟᱨᱮ ᱠᱷᱚᱱ ᱵᱟᱞᱮ ᱥᱟᱠᱟᱢ ᱜᱚᱥᱚ ᱛᱚᱞᱢᱚᱡ ᱮᱱᱟ᱾ ᱪᱮᱬᱮ ᱪᱤᱯᱨᱩᱜᱟᱜ ᱫᱩᱠᱷᱟᱹᱞᱤ ᱟᱲᱟᱝ ᱛᱮ ᱥᱮᱨᱢᱟ ᱯᱟᱛᱟᱞ ᱵᱩᱨᱩ ᱜᱚᱴᱟ ᱟᱸᱫᱚᱲ ᱮᱱᱟ᱾ ᱜᱷᱟᱱᱮ ᱥᱮᱨᱢᱟ ᱛᱟᱭᱚᱢ ᱚᱱᱟ ᱵᱩᱨᱩ ᱛᱟᱞᱟ ᱠᱩᱸᱵᱟᱹ ᱚᱲᱟᱜ ᱫᱷᱤᱨᱤ ᱜᱷᱚᱸᱜᱚᱨ ᱠᱷᱚᱱ ᱡᱟᱦᱟᱸᱨᱮ ᱵᱟᱦᱟ ᱢᱟᱹᱭ ᱠᱚ ᱛᱚᱯᱟ ᱞᱮᱫᱮᱭᱟ ᱢᱤᱫ ᱯᱚᱦᱟᱞ ᱫᱟᱨᱮ ᱯᱚᱴᱠᱚᱡ ᱠᱟᱛᱮ ᱦᱟᱨᱟᱭᱮᱱᱟ ᱚᱱᱟ ᱫᱟᱨᱮᱠᱷᱚᱱ ᱞᱟᱸᱫᱟᱭ ᱞᱮᱠᱟ ᱵᱟᱦᱟ ᱢᱟᱹᱭᱟᱜ ᱨᱩᱯᱛᱮ ᱵᱟᱦᱟ ᱢᱚᱦᱮ ᱵᱷᱩᱴᱩᱜ ᱠᱟᱛᱮ ᱥᱟᱲᱮᱱᱟ ᱞᱟᱸᱫᱟᱭ ᱞᱮᱠᱟ᱾ ᱢᱟᱹᱱᱢᱤ ᱚᱱᱟᱫᱚ ᱪᱟᱢᱯᱟ ᱵᱟᱦᱟ ᱢᱮᱱ ᱠᱟᱛᱮ ᱡᱤᱭᱟᱹᱲ ᱪᱟᱯᱢᱟ ᱠᱚ ᱢᱮᱛᱟᱦᱟᱫᱼᱟ᱾ ᱱᱤᱡᱷᱩᱢ ᱱᱤᱪᱚᱞ ᱚᱠᱛᱚ ᱡᱟᱦᱟᱸ ᱚᱠᱛᱚ ᱪᱤᱞᱤᱭᱟᱜ ᱦᱚᱸ ᱥᱟᱲᱟ ᱥᱚᱵᱚᱫᱽ ᱵᱟᱝ ᱟᱸᱡᱚᱢᱚᱜᱼᱟ ᱩᱱᱡᱚᱦᱚᱜ ᱥᱮᱨᱮᱧ ᱨᱟᱦᱟ ᱥᱟᱶᱛᱮ ᱛᱤᱨᱭᱳ ᱚᱨᱚᱝ ᱡᱚᱲᱛᱮ ᱡᱤᱣᱤ ᱨᱟᱹᱥᱠᱟᱹᱜ ᱞᱮᱠᱟ ᱥᱟᱰᱮ ᱟᱸᱡᱚᱢᱚᱜᱼᱟ ᱡᱤᱣᱤᱫ ᱡᱤᱭᱚᱱ ᱨᱟᱹᱥᱠᱟᱹ ᱟᱸᱥ ᱵᱟᱝ ᱯᱩᱨᱟᱹᱣ ᱞᱮᱱᱛᱮ ᱯᱟᱞᱮᱱ ᱥᱚᱨᱚᱜᱽ ᱯᱩᱨᱤᱠᱷᱚᱱ ᱛᱚᱲᱮ ᱥᱩᱛᱟᱹᱢ ᱛᱮ ᱟᱸᱲᱜᱚ ᱥᱮᱨᱢᱟ ᱨᱤᱢᱤᱞ ᱨᱮᱠᱤᱱ ᱢᱟᱰᱨᱟᱣ ᱵᱟᱲᱟᱭᱟ ᱱᱚᱣᱟ ᱫᱚ ᱚᱠᱚᱭ ᱞᱟᱹᱭ ᱠᱮ?

Written by ᱢᱳᱦᱚᱱ ᱪᱚᱱᱫᱨᱚ ᱵᱟᱥᱠᱮ
Published on Holong Gada (Jan – Jun, 2011)