ᱤᱧ ᱜᱚᱜᱚᱣᱟᱜ ᱠᱩᱠᱢᱩ

ᱛᱮᱦᱮᱧ ᱫᱚ ᱯᱷᱮᱵᱽᱨᱟᱨᱤ ᱪᱟᱸᱫᱚ ᱨᱮᱭᱟᱜ ᱮᱭᱟᱭ ᱢᱟᱦᱟᱸ ᱠᱟᱱᱟ᱾ ᱛᱮᱦᱮᱧ ᱛᱟᱹᱨᱤᱠ ᱫᱚ ᱟᱹᱞᱤᱧ ᱵᱟᱱᱟ ᱦᱚᱲᱟᱜ, ᱤᱧ ᱜᱚᱜᱚ ᱟᱨ ᱤᱧᱟᱜ ᱫᱚ ᱟᱹᱰᱤ ᱜᱮ ᱢᱚᱱᱮ ᱦᱤᱨᱫᱟᱹᱱ ᱟᱨ ᱜᱟᱱᱰᱚᱱ ᱫᱤᱱ ᱠᱟᱱᱟ᱾ ᱪᱮᱫᱟᱜ ᱥᱮ ᱠᱟᱛᱷᱟᱡ ᱤᱧ ᱜᱚᱜᱚᱭ ᱞᱟᱹᱭᱟ ᱵᱟᱝᱢᱟ ᱛᱮᱦᱮᱧ ᱠᱷᱚᱱ ᱵᱟᱨ ᱜᱮᱞ ᱢᱚᱬᱮ ᱵᱚᱪᱷᱚᱨ ᱞᱟᱦᱟ ᱱᱚᱣᱟ ᱛᱟᱹᱨᱤᱠ ᱨᱮᱜᱮ ᱤᱧ ᱵᱟᱵᱟ ᱫᱚ ᱤᱧ ᱴᱩᱣᱟᱹᱨ ᱚᱴᱚ ᱠᱟᱛᱮᱫ ᱡᱟᱭᱡᱩᱜᱽ ᱞᱟᱹᱜᱤᱫ ᱢᱟᱜᱟᱲ ᱜᱤᱯᱤᱭ ᱪᱟᱞᱟᱣ ᱮᱱᱟ᱾ ᱛᱮᱦᱮᱧ ᱛᱟᱹᱨᱤᱠ ᱫᱚ ᱤᱧ ᱜᱚᱜᱚ ᱤᱧ ᱵᱟᱵᱟ ᱧᱩᱢ ᱦᱟᱞᱟᱝ ᱦᱟᱞᱟᱝ ᱛᱮᱭ ᱨᱟᱜᱟ ᱟᱨ ᱩᱩᱱᱤ ᱧᱮᱞ ᱛᱮ ᱤᱧ ᱦᱚᱸᱧ ᱨᱟᱜᱟ᱾ ᱟᱹᱰᱤᱧ ᱠᱩᱨᱩᱢᱩᱴᱩᱭᱟ ᱩᱱᱤ ᱛᱷᱤᱨᱮ ᱨᱮᱭᱟᱜ ᱟᱨ ᱦᱟᱹᱲᱩᱵ ᱡᱟᱞᱟᱛ ᱠᱟᱛᱮᱫ ᱤᱧ ᱢᱮᱛᱟᱭᱟ ᱼ “ᱟᱪᱷᱟ ᱜᱚ! ᱢᱟ ᱟᱫᱚ ᱛᱷᱤᱨᱚᱜ ᱢᱮ ᱱᱤᱛᱚᱜ ᱫᱚ᱾ ᱼ “ᱛᱤᱱᱟᱜ ᱟᱫᱚ ᱵᱟᱵᱟ ᱫᱳᱢ ᱫᱤᱥᱟᱹᱭᱮᱭᱟ?” ᱟᱫᱚᱭ ᱢᱮᱱᱟ ᱼ “ᱦᱮᱸ ᱵᱮᱴᱟ! ᱪᱮᱫᱟᱜ ᱪᱚ ᱛᱮᱦᱮᱧ ᱟᱹᱰᱤ ᱟᱺᱴᱤᱧ ᱩᱭᱦᱟᱹᱨᱮ ᱠᱟᱱᱟ ᱟᱢ ᱵᱟᱵᱟ ᱫᱚ᱾” ᱦᱮ ᱪᱟᱸᱫᱚ! ᱚᱠᱚᱭ ᱦᱚᱸ ᱱᱩᱱᱟᱹᱜ ᱫᱩᱠ ᱫᱚ ᱟᱞᱚᱢ ᱮᱢᱟ ᱠᱚᱣᱟ ᱵᱟᱲᱮ᱾” ᱢᱤᱢᱤᱫ ᱫᱚᱢ ᱫᱚᱧ ᱦᱩᱫᱤᱥ ᱪᱮᱫᱟᱜ ᱪᱚ ᱵᱚᱣᱟ ᱛᱟᱹᱨᱤᱠ ᱫᱚ ᱦᱤᱡᱩᱜ? ᱯᱟᱥᱮᱫ ᱱᱚᱣᱟ ᱛᱟᱹᱨᱤᱠ ᱵᱟᱝ ᱦᱮᱡ ᱞᱮᱱᱠᱷᱟᱱ ᱤᱧ ᱜᱚᱜᱚᱣᱟᱜ ᱡᱤᱣᱤ ᱫᱚ ᱱᱩᱱᱟᱹᱜ ᱫᱚ ᱚᱦᱚ ᱞᱚ ᱞᱮᱱᱟ᱾ ᱢᱮᱱᱠᱷᱟᱱ ᱤᱧ ᱢᱮᱱ ᱠᱟᱛᱮᱫ ᱫᱚ ᱪᱮᱫ ᱦᱚᱭᱚᱜᱼᱟ? ᱱᱚᱝᱠᱟ ᱜᱮ ᱫᱚᱥᱛᱩᱨ ᱠᱟᱱᱟ ᱟᱨ ᱱᱚᱣᱟ ᱛᱟᱹᱨᱤᱠ ᱫᱚ ᱜᱷᱩᱨᱮ ᱯᱷᱤᱨᱮ ᱦᱤᱡᱩᱜ ᱛᱮᱜᱮ ᱛᱟᱸᱦᱮᱱᱟ᱾

ᱠᱚᱞᱠᱟᱛᱟ ᱨᱮᱭᱟᱜ ᱢᱤᱫ ᱥᱚᱨᱠᱟᱨᱤ ᱠᱣᱟᱴᱟᱨ ᱚᱲᱟᱜ ᱨᱮ ᱢᱮᱱᱟᱜ ᱞᱤᱧᱟ᱾ ᱟᱹᱞᱤᱧ ᱫᱚ ᱤᱧ ᱜᱚᱜᱚ ᱛᱟᱹᱞᱤᱧ ᱵᱟᱨ ᱦᱚᱲ ᱜᱮ ᱞᱤᱧ ᱛᱟᱸᱦᱮᱱᱟ᱾ ᱚᱲᱟᱜ ᱨᱮᱭᱟᱜ ᱠᱟᱹᱢᱤ ᱜᱚᱲᱚ ᱟᱨ ᱥᱟᱵ ᱥᱳᱨ ᱞᱟᱹᱜᱤᱫ ᱥᱳᱨ ᱧᱚᱜ ᱨᱮᱱ ᱜᱮ ᱢᱤᱫ ᱴᱮᱱ ᱟᱭᱳ ᱦᱚᱲ ᱞᱤᱧ ᱫᱳᱦᱚ ᱣᱟᱠᱟᱫᱮᱭᱟ᱾ ᱥᱮᱛᱟᱜ ᱠᱷᱚᱱ ᱟᱹᱭᱩᱵ ᱦᱟᱹᱵᱤᱡ ᱠᱟᱹᱢᱤ ᱵᱟᱲᱟ ᱠᱟᱛᱮᱫ ᱟᱠᱚ ᱴᱷᱮᱱᱮ ᱨᱩᱣᱟᱹᱲ ᱮᱱ ᱜᱮ᱾ ᱵᱟᱨ ᱥᱮᱨᱢᱟ ᱦᱚᱭ ᱮᱱᱟ ᱢᱤᱫᱴᱮᱱ ᱥᱚᱨᱠᱟᱨᱤ ᱠᱟᱹᱢᱤᱧ ᱧᱟᱢ ᱟᱠᱟᱫᱟ᱾ ᱟᱫᱚ ᱚᱱᱟ ᱵᱤᱵᱷᱟᱜᱽ ᱨᱮᱭᱟᱜ ᱜᱮ ᱥᱚᱨᱠᱟᱨᱤ ᱠᱣᱟᱴᱟᱨ ᱠᱚ ᱮᱢ ᱟᱠᱟᱣ ᱫᱤᱧᱟ᱾ ᱚᱸᱰᱮ ᱜᱮ ᱵᱟᱨ ᱥᱮᱨᱢᱟ ᱠᱷᱚᱱ ᱮᱸᱜᱟ ᱦᱚᱯᱚᱱ ᱞᱤᱧ ᱛᱟᱸᱦᱮᱱ ᱠᱟᱱᱟ᱾ ᱱᱚᱰᱮ ᱫᱚ ᱪᱮᱫ ᱨᱮᱭᱟᱜ ᱜᱮ ᱫᱩᱠ ᱥᱮ ᱠᱚᱥᱴᱚ ᱫᱚ ᱵᱟᱹᱱᱩᱜ ᱛᱟᱹᱞᱤᱧᱟ᱾ ᱠᱚᱞᱠᱟᱛᱟ ᱫᱚ ᱟᱹᱰᱤ ᱢᱟᱨᱟᱝ ᱱᱟᱜᱽᱨᱟᱦᱟ ᱠᱟᱱᱟ᱾ ᱞᱟᱹᱴᱩ ᱞᱟᱹᱴᱩ ᱫᱚᱞᱟᱱ ᱟᱨ ᱥᱮᱬᱟ ᱥᱮᱬᱟ ᱟᱹᱯᱷᱤᱥ ᱠᱚᱛᱮᱜᱮ ᱯᱮᱨᱮᱡ ᱟᱠᱟᱱᱟ᱾ ᱱᱮᱵᱮᱛᱟᱨ ᱫᱚ ᱟᱵᱚ ᱦᱚᱲ ᱦᱚᱯᱚᱱ ᱦᱚᱸ ᱟᱹᱰᱤ ᱥᱟᱸᱜᱮ ᱱᱚᱸᱰᱮ ᱠᱚ ᱠᱟᱹᱢᱤ ᱟᱹᱥᱩᱞᱚᱜ ᱠᱟᱱᱟ᱾ ᱟᱹᱞᱤᱧ ᱡᱟᱦᱟᱸ ᱴᱷᱮᱱ ᱞᱤᱧ ᱛᱟᱸᱦᱮᱱ ᱠᱟᱱᱟ ᱚᱱᱟ ᱟᱰᱮ ᱯᱟᱥᱮ ᱦᱚᱸ ᱟᱭᱢᱟ ᱦᱚᱲ ᱠᱚ ᱛᱟᱸᱦᱮᱱ ᱠᱟᱱᱟ᱾ ᱟᱛᱳ ᱫᱤᱥᱚᱢ ᱨᱮᱱ ᱦᱚᱲ ᱫᱚ ᱱᱚᱰᱮ ᱥᱚᱦᱚᱨ ᱵᱟᱡᱟᱨ ᱨᱮᱭᱟᱜ ᱥᱟᱱᱟᱢ ᱞᱮᱠᱟᱱ ᱞᱟᱦᱟᱱᱛᱤ ᱠᱚ ᱧᱮᱞ ᱫᱟᱲᱮᱭᱟᱜᱼᱟ᱾

ᱟᱞᱮ ᱚᱲᱟᱜ ᱥᱮ ᱤᱧᱟᱜ ᱵᱩᱠᱟᱹ ᱛᱚᱯᱟ ᱡᱟᱱᱟᱢ ᱰᱤᱰᱟᱹ ᱫᱚ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱥᱟᱱᱛᱟᱞ ᱯᱟᱨᱜᱟᱱᱟ ᱜᱚᱰᱰᱟ ᱡᱤᱞᱟᱹ ᱨᱮᱭᱟᱜ ᱯᱚᱸᱲᱮᱭᱟᱦᱟᱴ ᱛᱷᱟᱱᱟ ᱥᱳᱨ ᱢᱮᱱᱟᱜ ᱪᱤᱨ ᱜᱟᱰᱟ ᱟᱲᱮ ᱨᱮ ᱢᱤᱫ ᱦᱚᱲ ᱟᱛᱳ᱾ ᱤᱧ ᱜᱚᱜᱚᱭ ᱞᱟᱹᱭᱟ ᱵᱟᱝᱢᱟ ᱤᱧ ᱵᱟᱵᱟ ᱛᱟᱠᱚ ᱫᱚ ᱥᱟᱸᱜᱮ ᱵᱚᱭᱦᱟ ᱡᱚᱢ ᱟᱹᱥᱩᱞᱚᱜ ᱠᱮᱴᱮᱡ ᱦᱚᱲ ᱜᱮ ᱠᱚ ᱛᱟᱸᱦᱮᱠᱟᱱᱟ᱾ ᱤᱧ ᱵᱟᱵᱟ ᱫᱚ ᱠᱟᱹᱴᱤᱡ ᱩᱛᱟᱹᱨ ᱵᱚᱭᱦᱟᱭ ᱛᱟᱸᱦᱮᱠᱟᱱᱟ᱾ ᱚᱞᱚᱜ ᱯᱟᱲᱦᱟᱣᱚᱜ ᱦᱚᱸ ᱵᱟᱭ ᱦᱮᱛᱟᱣᱟᱫᱟ᱾ ᱟᱛᱳ ᱠᱚᱲᱟ ᱠᱚ ᱥᱟᱶ ᱛᱮ ᱟᱡᱟᱨᱤ ᱟᱨ ᱛᱟᱹᱲᱤᱼᱦᱟᱺᱰᱤ ᱠᱚ ᱜᱮᱭ ᱛᱟᱬᱟᱜ ᱵᱟᱲᱟᱭᱟ᱾ ᱢᱟᱨᱟᱝ ᱵᱟ, ᱛᱟᱞᱟ ᱵᱟ ᱛᱟᱠᱚ ᱦᱚᱸᱠᱚ ᱵᱩᱡᱷᱟᱹᱣ ᱞᱟᱸᱜᱟ ᱭᱮᱱ ᱠᱷᱟᱱ ᱩᱥᱟᱹᱨᱟ ᱵᱟᱯᱞᱟ ᱠᱟᱭ ᱨᱮᱭᱟᱜ ᱠᱚ ᱯᱚᱨᱛᱚᱱ ᱠᱮᱫᱟ᱾ ᱟᱨ ᱟᱛᱳ ᱠᱷᱚᱱ ᱫᱟᱹᱠᱷᱤᱱᱼᱯᱚᱥᱪᱤᱢ ᱨᱮ ᱢᱮᱱᱟᱜ ᱫᱷᱚᱢᱥᱩᱨ ᱵᱩᱨᱩ ᱦᱟᱱᱟ ᱥᱟ ᱡᱷᱟᱨᱠᱷᱚᱸᱰ ᱫᱤᱥᱚᱢ ᱟᱨ ᱵᱤᱦᱟᱨ ᱨᱮᱭᱟᱜ ᱥᱤᱵᱤᱞ ᱥᱤᱢᱟᱹ ᱨᱚᱯᱚᱜ ᱥᱚᱨ ᱟᱛᱳ ᱠᱷᱚᱱ ᱤᱧ ᱜᱚᱜᱚ ᱠᱚ ᱥᱤᱲᱤ ᱧᱟᱢ ᱠᱮᱫᱮᱭᱟ ᱟᱨ ᱩᱥᱟᱹᱨᱟ ᱥᱟᱨᱼᱥᱟᱹᱜᱩᱱ ᱠᱟᱛᱮᱫ ᱠᱚ ᱵᱟᱹᱱᱤᱡᱽ ᱟᱹᱜᱩ ᱠᱮᱫᱮᱭᱟ᱾ ᱤᱧ ᱢᱟᱢᱟᱵᱟ ᱦᱚᱸ ᱢᱚᱦᱟᱥᱚᱭ ᱜᱮᱭ ᱛᱟᱸᱦᱮᱠᱟᱱᱟ, ᱢᱮᱱᱠᱷᱟᱱ! ᱮᱱᱦᱚᱸ ᱪᱮᱠᱟᱛᱮ ᱪᱚᱝ ᱠᱩᱲᱤ ᱜᱤᱫᱽᱨᱟᱹ ᱯᱟᱲᱦᱟᱣ ᱚᱪᱚ ᱠᱚᱫᱚ ᱪᱮᱫᱟᱜ ᱪᱚ ᱮᱠᱟᱞ ᱵᱟᱭ ᱦᱮᱛᱟᱣᱟᱜ ᱠᱟᱱ ᱛᱟᱸᱦᱮᱠᱟᱱᱟ᱾ ᱢᱮᱱᱟᱭ ᱠᱩᱲᱤ ᱜᱤᱫᱽᱨᱟᱹ ᱫᱚ ᱚᱲᱟᱜ ᱨᱮᱭᱟᱜ ᱠᱟᱹᱢᱤ ᱪᱮᱫ ᱡᱟᱹᱨᱩᱲ ᱠᱟᱱᱟ᱾ ᱠᱩᱲᱤ ᱜᱤᱫᱽᱨᱟᱹ ᱫᱚ ᱡᱟᱦᱟᱸ ᱛᱮᱜᱮᱭ ᱪᱟᱞᱟᱜ ᱥᱮᱭ ᱛᱚ ᱮᱴᱟᱜ ᱦᱚᱲᱟᱜ ᱪᱩᱞᱦᱟᱹ ᱜᱮ ᱚᱝ ᱦᱩᱭᱩᱜ ᱛᱟᱭᱟ᱾ ᱚᱱᱟ ᱛᱮᱜᱮ ᱤᱧ ᱜᱚᱜᱚ ᱫᱚ ᱟᱹᱠᱤᱞ ᱥᱮᱪᱮᱫ ᱛᱮ ᱫᱚ ᱫᱩᱸᱫᱷᱤ ᱜᱮᱭ ᱛᱟᱸᱦᱮᱠᱟᱱᱟ, ᱮᱱᱛᱮ ᱤᱥᱠᱩᱞ ᱪᱟᱞᱟᱜ ᱨᱮᱭᱟᱜ ᱫᱚ ᱱᱟᱥᱮ ᱦᱚᱸ ᱟᱹᱛ ᱜᱮ ᱵᱟᱭ ᱧᱟᱢ ᱞᱮᱫᱟ᱾ ᱢᱮᱱᱠᱷᱟᱱ ᱮᱥᱮᱞ ᱢᱟᱨᱥᱟᱞ ᱪᱮᱦᱨᱟ ᱠᱩᱲᱤᱭ ᱛᱟᱸᱦᱮᱠᱟᱱᱟ ᱟᱨ ᱠᱟᱹᱢᱤᱼᱠᱟᱹᱥᱱᱤ ᱨᱮᱱ ᱫᱚ ᱜᱟᱹᱠᱷᱩᱲ ᱛᱮᱫ ᱮ ᱛᱟᱸᱦᱮᱠᱟᱱᱟ᱾ ᱚᱲᱟᱜ ᱨᱮᱭᱟᱜ ᱠᱟᱹᱢᱤ ᱫᱚ ᱢᱚᱱᱮ ᱢᱩᱨᱩᱠ ᱠᱟᱛᱮᱭ ᱠᱟᱹᱢᱤ ᱫᱟᱲᱮᱭᱟᱜ ᱠᱟᱱ ᱛᱟᱸᱦᱮᱠᱟᱱᱟ᱾ ᱟᱨ ᱤᱧ ᱵᱟᱵᱟ ᱦᱚᱸ ᱛᱮᱞ ᱥᱟᱶᱟᱨ ᱪᱮᱦᱨᱟ ᱠᱚᱲᱟᱭ ᱛᱟᱸᱦᱮ ᱠᱟᱱ ᱛᱮ ᱤᱧ ᱜᱚᱜᱚ ᱦᱚᱸᱭ ᱠᱩᱥᱤ ᱜᱚᱫ ᱮᱱᱟ᱾ ᱠᱟᱛᱷᱟᱡ ᱤᱧ ᱵᱟᱵᱟ ᱫᱚ ᱢᱮᱴᱨᱤᱠ ᱦᱟᱹᱵᱤᱡ ᱫᱚᱭ ᱨᱟᱠᱟᱵ ᱞᱮᱱ ᱜᱮᱭᱟ᱾ ᱢᱮᱱᱠᱷᱟᱱ ᱠᱚᱢ ᱩᱢᱟᱹᱨ ᱨᱮᱜᱮ ᱠᱚ ᱵᱟᱯᱞᱟ ᱠᱟᱫᱮᱭᱟ ᱟᱨ ᱠᱚ ᱵᱮᱜᱟᱨ ᱠᱟᱫ ᱠᱤᱱᱟ᱾ ᱵᱟᱯᱞᱟ ᱵᱟᱨ ᱥᱮᱨᱢᱟ ᱜᱟᱱ ᱫᱳ ᱟᱹᱰᱤ ᱠᱩᱥᱤ ᱨᱟᱹᱥᱠᱟᱹ ᱛᱮᱜᱮ ᱡᱤᱭᱚᱱ ᱞᱟᱹᱣᱠᱟᱹ ᱫᱚ ᱠᱤᱱ ᱞᱟᱜᱟ ᱞᱮᱫ ᱜᱮᱭᱟ᱾ ᱜᱚᱴᱟ ᱵᱚᱸᱣᱥᱤ ᱢᱟᱱᱫᱟᱨ ᱟᱨ ᱱᱤᱡᱷᱟᱹᱨᱼᱵᱟᱸᱥᱛᱟᱨᱟ ᱢᱮᱞᱟ ᱦᱚᱸ ᱥᱟᱹᱭᱠᱤᱞ ᱛᱮᱠᱤᱱ ᱫᱟᱬᱟ ᱞᱮᱫ ᱜᱮᱭᱟ᱾ ᱵᱚᱸᱣᱥᱤ ᱢᱮᱞᱟ ᱨᱮ ᱵᱚᱜᱮ ᱛᱮ ᱠᱚᱲᱟᱼᱠᱩᱲᱤ ᱠᱚ ᱯᱷᱚᱴᱚᱜ ᱠᱟᱱ ᱧᱮᱞ ᱛᱮ ᱤᱧ ᱜᱚᱜᱚ ᱵᱟᱵᱟ ᱦᱚᱸ ᱢᱤᱫ ᱛᱮ ᱢᱤᱫ ᱴᱷᱮᱱ ᱠᱤᱱ ᱯᱷᱚᱴᱚ ᱞᱮᱱᱟ᱾ ᱟᱨ ᱚᱱᱟ ᱯᱷᱚᱴᱚ ᱫᱚ ᱛᱮᱦᱮᱧ ᱦᱟᱹᱵᱤᱡ ᱤᱧ ᱜᱚᱜᱚ ᱫᱚ ᱟᱹᱰᱤ ᱡᱚᱛᱚᱱ ᱠᱟᱛᱮᱫ ᱮ ᱫᱚᱦᱚ ᱟᱠᱟᱫᱟ᱾

ᱤᱧ ᱜᱚᱜᱚᱭ ᱞᱟᱹᱭᱟ ᱠᱟᱛᱷᱟᱡ ᱵᱟᱝᱢᱟ ᱛᱤᱱ ᱨᱮ ᱤᱧ ᱫᱚ ᱤᱧ ᱜᱚᱜᱚᱣᱟᱜ ᱦᱚᱲᱢᱚ ᱨᱮᱧ ᱵᱟᱥᱟᱭᱮᱱᱟ, ᱩᱱ ᱠᱷᱚᱱ ᱜᱮ ᱤᱧ ᱵᱟᱵᱟ ᱫᱚ ᱱᱤᱥᱟᱹ ᱵᱮᱣᱦᱟᱨ ᱫᱚᱭ ᱰᱷᱮᱨ ᱤᱫᱤ ᱠᱮᱫᱟ᱾ ᱚᱠᱟ ᱫᱚ ᱡᱩᱣᱟᱹᱱ ᱚᱠᱛᱚ ᱠᱷᱚᱱ ᱜᱮ ᱦᱮᱣᱟ ᱫᱚ ᱛᱟᱸᱦᱮᱠᱟᱱ ᱛᱟᱭᱟ᱾ ᱤᱧ ᱜᱚᱜᱚᱣᱟᱜ ᱢᱟᱱᱟ ᱠᱟᱛᱷᱟ ᱦᱚᱸ ᱵᱟᱭ ᱟᱸᱡᱚᱢᱟ᱾ ᱟᱫᱚ ᱩᱱᱤ ᱫᱚ ᱚᱠᱟ ᱨᱮᱧ ᱯᱤᱪᱷᱟᱹ ᱵᱟᱲᱟᱭᱮᱭᱟ? ᱵᱟᱹᱭᱼᱵᱟᱹᱭ ᱛᱮ ᱤᱧ ᱵᱟᱵᱟ ᱫᱚ ᱦᱟᱺᱰᱤ ᱯᱟᱹᱣᱨᱟᱹ ᱨᱮᱜᱮᱭ ᱡᱚᱵᱮ ᱪᱟᱵᱟᱭᱮᱱᱟ᱾ ᱩᱱᱤ ᱫᱚ ᱯᱟᱹᱣᱨᱟᱹ ᱵᱚᱛᱚᱞ ᱜᱮᱭ ᱦᱮᱨᱢᱮᱫ ᱵᱟᱲᱟᱭᱟ ᱟᱨ ᱜᱚᱴᱟ ᱧᱤᱫᱟᱹ ᱚᱱᱟ ᱜᱮᱭ ᱦᱟᱺᱵᱩᱫ ᱠᱟᱜᱼᱟ᱾ ᱤᱧ ᱜᱚᱜᱚ ᱴᱷᱮᱱ ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮᱫ ᱤᱧ ᱵᱟᱰᱟᱭ ᱠᱮᱫᱟ ᱡᱮ ᱵᱟᱝᱢᱟ ᱤᱧ ᱵᱟᱵᱟ ᱫᱚ ᱯᱟᱹᱣᱨᱟᱹ ᱵᱚᱛᱚᱞ ᱨᱮ ᱛᱤᱱᱟᱹᱜ ᱫᱩᱞᱟᱹᱲ ᱛᱟᱸᱦᱮᱠᱟᱱ ᱛᱟᱭᱟ᱾ ᱚᱱᱮ ᱠᱚ ᱢᱮᱱᱟ ᱡᱟᱦᱟᱸᱱ ᱡᱤᱱᱤᱥ ᱜᱮ ᱟᱹᱰᱤ ᱫᱩᱞᱟᱹᱲ ᱫᱚ ᱵᱟᱝ ᱴᱷᱤᱠᱟ᱾ ᱛᱷᱚᱲᱟ ᱫᱤᱱ ᱠᱷᱟᱱ ᱜᱮ ᱤᱧ ᱵᱟᱵᱟ ᱫᱚ ᱨᱟᱡᱨᱚᱜᱽ ᱧᱟᱢ ᱠᱮᱫᱮᱭᱟ ᱟᱨ ᱢᱟᱭᱟᱝ ᱢᱮᱥᱟᱞ ᱠᱷᱚᱜᱼᱠᱷᱟᱨᱟᱜ ᱮ ᱮᱦᱚᱵ ᱠᱮᱫᱟ᱾ ᱟᱨ ᱢᱤᱫ ᱫᱤᱱ ᱫᱚ ᱴᱷᱤᱠ ᱤᱧᱟᱜ ᱡᱟᱱᱟᱢᱚᱜ ᱢᱚᱬᱮ ᱛᱩᱨᱩᱭ ᱪᱟᱸᱫᱚ ᱛᱟᱭᱚᱢ ᱟᱪᱠᱟ ᱜᱮ ᱠᱷᱚᱜᱼᱠᱷᱚᱜ ᱛᱮᱭ ᱞᱟᱛᱣᱟᱜ ᱩᱛᱟᱹᱨᱮᱱᱟ ᱟᱨ ᱮ ᱡᱟᱹᱯᱤᱫ ᱛᱷᱤᱨ ᱠᱮᱫᱟ᱾ ᱟᱨ ᱡᱟᱭ ᱡᱩᱜᱽ ᱞᱟᱹᱜᱤᱫ ᱤᱧ ᱫᱚ ᱴᱩᱣᱟᱹᱨ ᱚᱴᱚ ᱠᱟᱫᱮᱫ ᱢᱟᱜᱟᱲ ᱜᱩᱯᱤᱭ ᱪᱟᱞᱟᱣ ᱮᱱᱟ᱾ ᱤᱧ ᱫᱚ ᱤᱧ ᱵᱟᱵᱟᱣᱟᱜ ᱢᱩᱴᱷᱟᱹᱱ ᱥᱮ ᱢᱮᱫ ᱦᱟᱸ ᱫᱚ ᱱᱟᱥᱮ ᱦᱚᱸ ᱵᱟᱹᱧ ᱫᱤᱥᱟᱹᱭᱟ ᱡᱮ ᱤᱧ ᱵᱟᱵᱟ ᱫᱚ ᱪᱮᱫ ᱞᱮᱠᱟᱭ ᱛᱟᱸᱦᱮ ᱠᱟᱱᱟ? ᱦᱟᱺᱰᱤᱼᱯᱟᱹᱣᱨᱟᱹ ᱧᱩᱼᱧᱩ ᱠᱟᱨᱣᱟᱱ ᱛᱮ ᱤᱧ ᱵᱟᱵᱟ ᱫᱚ ᱥᱟᱱᱟᱢ ᱦᱳᱲᱳᱼᱪᱟᱣᱞᱮ, ᱢᱤᱦᱩᱸᱼᱢᱮᱨᱚᱢ, ᱜᱟᱹᱭᱼᱰᱟᱸᱜᱽᱨᱟ ᱥᱮ ᱡᱩᱢᱤᱼᱡᱟᱭᱜᱟ ᱡᱚᱛᱚ ᱫᱤᱠᱩ ᱢᱚᱦᱟᱡᱚᱱ ᱴᱷᱮᱱᱮ ᱥᱟᱴᱷᱟᱼᱵᱷᱚᱨᱱᱟ ᱪᱟᱵᱟ ᱞᱮᱫᱟ᱾ ᱵᱟ ᱹᱭᱼᱵᱟᱹᱭ ᱛᱮ ᱵᱟᱵᱟ ᱨᱮᱱ ᱥᱟᱱᱟᱢ ᱜᱩᱛᱤᱭᱟᱹ ᱠᱚ ᱦᱚᱸ ᱠᱚ ᱥᱟᱦᱟ ᱪᱟᱵᱟᱭᱮᱱᱟ᱾ ᱤᱧ ᱜᱚᱜᱚ ᱫᱚ ᱢᱟᱢᱚ ᱛᱟᱠᱚ ᱴᱷᱮᱱ ᱪᱟᱞᱟᱜ ᱫᱚ ᱵᱟᱭ ᱨᱮᱵᱮᱱ ᱞᱮᱱᱟ᱾ ᱧᱩᱼᱧᱩ ᱠᱟᱨᱣᱟᱱ ᱛᱮᱜᱮ ᱤᱧ ᱵᱟᱵᱟ ᱫᱚ ᱚᱲᱟᱜᱼᱫᱩᱣᱟᱹᱨ ᱦᱚᱸ ᱵᱟᱭ ᱡᱚᱛᱚᱱ ᱞᱮᱫᱟ᱾ ᱮᱠᱟᱞ ᱛᱟᱞᱮ ᱰᱷᱚᱰᱭᱟ ᱠᱚᱛᱮ ᱫᱟᱯ ᱵᱟᱲᱟᱣᱟᱠᱟᱱᱟ᱾ ᱞᱟᱱᱫᱚᱯ ᱥᱟᱹᱲᱤᱢ ᱦᱚᱛᱮᱡ ᱛᱮ ᱥᱮᱱᱮᱨ ᱠᱚᱦᱚᱸ ᱦᱟᱹᱛᱤ ᱰᱟᱴᱟ ᱞᱮᱠᱟ ᱨᱚᱠᱨᱚᱠᱚ ᱪᱟᱵᱟ ᱟᱠᱟᱱᱟ᱾ ᱱᱤᱛ ᱢᱟ ᱡᱚᱢ ᱧᱩ ᱨᱮᱭᱟᱜ ᱦᱚᱸᱞᱤᱧ ᱦᱟᱨᱚᱱ ᱮᱱᱟ᱾ ᱤᱧ ᱜᱚᱜᱚ ᱫᱚ ᱦᱩᱫᱤᱥ ᱪᱤᱱᱛᱟᱹ ᱛᱮ ᱭᱮ ᱢᱚᱨᱚᱛ ᱪᱟᱵᱟᱭᱮᱱᱟ᱾ ᱤᱧ ᱫᱚ ᱮᱠᱟᱞ ᱠᱟᱹᱴᱤᱡ ᱜᱮᱧ ᱛᱟᱸᱦᱮ ᱠᱟᱱ ᱛᱮ ᱵᱟᱝ ᱫᱚ ᱤᱧᱮ ᱦᱮᱣ ᱦᱚᱵᱚᱨ ᱵᱟᱲᱟᱭᱤᱧ ᱟᱨ ᱵᱟᱝ ᱫᱚ ᱞᱟᱡ ᱯᱮᱨᱮᱡ ᱞᱟᱹᱜᱤᱫ ᱱᱟᱦᱞᱟᱭ ᱪᱟᱞᱟᱜ᱾ ᱵᱮᱜᱚᱨ ᱱᱟᱞᱦᱟ ᱠᱟᱹᱢᱤ ᱛᱮ ᱫᱚ ᱪᱮᱠᱟ ᱛᱮᱞᱤᱧ ᱟᱹᱥᱩᱞᱚᱜᱼᱟ? ᱢᱮᱱᱠᱷᱟᱱ! ᱪᱮᱠᱟᱭᱟᱭ ᱤᱧ ᱦᱟᱨᱟᱧ ᱫᱤᱥᱟᱹ ᱠᱟᱛᱮᱫ ᱠᱟᱹᱢᱤ ᱢᱟ ᱦᱳᱭᱳᱜ ᱜᱮᱭᱟ᱾ ᱦᱚᱲ ᱠᱚ ᱴᱷᱮᱱ ᱮ ᱱᱟᱞᱦᱟ ᱵᱟᱲᱟᱭᱟ᱾ ᱠᱟᱹᱢᱤ ᱴᱷᱮᱱ ᱜᱮᱭ ᱤᱫᱤ ᱠᱟᱧᱟ ᱟᱨ ᱚᱸᱰᱮ ᱜᱮ ᱠᱷᱮᱛ ᱵᱟᱲᱜᱮ ᱯᱤᱸᱰᱟᱹ ᱥᱮ ᱴᱟᱺᱰᱤ ᱠᱚ ᱨᱮᱭ ᱜᱤᱛᱤᱡ ᱜᱤᱰᱤ ᱠᱟᱧᱟ᱾ ᱥᱮᱛᱚᱝ ᱠᱷᱟᱱ ᱫᱚ ᱪᱟᱛᱚᱢ ᱵᱟᱝ ᱠᱷᱟᱱ ᱯᱤᱪᱷᱟᱹᱣᱲᱤ ᱛᱮᱭ ᱩᱢᱩᱞ ᱠᱟᱧᱟ, ᱟᱨ ᱯᱚᱦᱨᱮᱠᱼᱯᱚᱦᱨᱮᱠ ᱨᱮᱭ ᱠᱚᱭᱚᱜ ᱟᱧᱟ ᱟᱨ ᱥᱮᱛᱚᱝ ᱥᱮᱫ ᱮ ᱚᱰ ᱠᱟᱹᱧᱟ᱾ ᱡᱟᱹᱥᱛᱤᱧ ᱨᱟᱜ ᱞᱮᱠᱷᱟᱱ ᱚᱠᱟ ᱚᱠᱟ ᱫᱚ ᱞᱟᱡ ᱯᱮᱨᱮᱡ ᱱᱩᱱᱩᱣᱟᱹᱫᱤᱧ ᱜᱮ ᱟᱨ ᱯᱤᱪᱷᱟᱹᱣᱲᱤ ᱛᱮ ᱫᱮᱭᱟ ᱨᱮᱭ ᱛᱚᱞ ᱡᱟᱞᱟᱫ ᱠᱟᱹᱧᱟ ᱟᱨ ᱟᱹᱰᱤ ᱠᱚᱥᱴᱚᱭ ᱠᱟᱹᱢᱤᱭᱟ᱾ ᱫᱤᱱ ᱫᱚ ᱪᱚᱜ ᱪᱮᱨᱮᱡ ᱨᱮᱭᱟᱜ ᱚᱠᱛᱮ ᱜᱮ ᱵᱟᱭ ᱧᱟᱢᱟ ᱚᱱᱟ ᱛᱮ ᱟᱹᱭᱩᱵ ᱵᱮᱞᱟ ᱥᱮᱫ ᱫᱚ ᱫᱟᱠᱟᱭ ᱪᱚᱸᱫᱟ ᱠᱟᱜᱼᱟ ᱟᱨ ᱤᱧ ᱫᱚ ᱠᱷᱩᱵᱮ ᱫᱩᱞᱟᱹᱲᱤᱧᱟ᱾ ᱮᱞᱮᱫ, ᱥᱟᱹᱨᱤ ᱜᱮᱠᱚ ᱢᱮᱱ ᱟᱠᱟᱫᱟ ᱡᱮ ᱜᱚᱜᱚᱣᱟᱜ ᱫᱩᱞᱟᱹᱲ ᱫᱚ ᱥᱟᱱᱟᱢ ᱠᱷᱚᱱ ᱥᱚᱨᱚᱥᱟᱱᱟᱜ ᱫᱩᱞᱟᱹᱲ ᱠᱟᱱᱟ᱾ ᱱᱚᱣᱟ ᱨᱮ ᱫᱚ ᱡᱟᱦᱟᱸᱱ ᱪᱷᱚᱞᱼᱠᱚᱯᱚᱴ ᱥᱮ ᱞᱟᱞᱚᱪ ᱫᱚ ᱵᱟᱹᱱᱩᱜᱼᱟ᱾ ᱮᱱᱠᱟ ᱛᱮᱜᱮ ᱟᱭᱢᱟ ᱫᱤᱱ ᱞᱤᱧ ᱠᱷᱮᱢᱟᱣ ᱠᱮᱫᱟ᱾ ᱤᱧ ᱦᱚᱸᱧ ᱞᱟᱹᱴᱩ ᱧᱚᱜ ᱮᱱᱟ᱾ ᱟᱛᱳ ᱨᱮᱭᱟᱜ ᱠᱟᱹᱢᱤ ᱠᱚ ᱦᱚᱸ ᱪᱟᱵᱟᱭᱮᱱ ᱠᱷᱟᱱ ᱢᱤᱫ ᱫᱤᱱ ᱫᱚ ᱟᱛᱳ ᱦᱚᱲ ᱠᱚ ᱥᱟᱶ ᱛᱮ ᱦᱟᱱᱮ ᱱᱟᱢᱟᱞ ᱫᱤᱥᱟᱚᱢ ᱵᱟᱹᱨᱤᱱ ᱵᱟᱝᱞᱟ ᱵᱚᱨᱫᱷᱚᱢᱟᱱ ᱥᱮᱫ ᱪᱟᱞᱟᱜ ᱮ ᱥᱟᱯᱲᱟᱣ ᱮᱱᱟ᱾ ᱞᱩᱭᱦᱟᱹ, ᱪᱮᱞᱟᱝᱼᱴᱩᱠᱩᱡ, ᱯᱟᱹᱴᱤᱭᱟᱹ ᱟᱨ ᱠᱤᱪᱨᱤᱜ ᱠᱚᱭ ᱢᱚᱴᱨᱟ ᱴᱷᱤᱠ ᱠᱮᱫᱟ ᱟᱨ ᱰᱟᱸᱰᱟ ᱯᱟᱴᱷᱮ ᱩᱨᱤᱡ ᱠᱟᱛᱮᱫ ᱤᱧ ᱫᱚ ᱰᱟᱸᱰᱟ ᱨᱮᱭ ᱦᱮᱣ ᱠᱤᱫᱤᱧᱟ᱾ ᱟᱹᱞᱤᱧᱟᱜ ᱚᱲᱟᱜ ᱴᱟᱹᱴᱤᱼᱥᱤᱞᱯᱤᱧ ᱫᱚ ᱡᱟᱹᱱᱩᱢ ᱛᱮᱞᱤᱧ ᱨᱚᱢᱯᱷᱟ ᱮᱥᱮᱫ ᱠᱟᱫᱟ᱾ ᱟᱨ ᱫᱟᱭᱟ ᱜᱮ ᱟᱛᱳ ᱨᱮᱱ ᱱᱟᱢᱟᱞ ᱠᱟᱹᱢᱤ ᱦᱚᱲ ᱞᱤᱧ ᱯᱟᱸᱡᱟ ᱠᱮᱫ ᱠᱚᱣᱟ᱾ ᱢᱤᱫ ᱴᱮᱱ ᱵᱟᱥ ᱜᱟᱹᱰᱤ ᱛᱮ ᱢᱮᱨᱚᱢ ᱵᱷᱤᱰᱤ ᱞᱮᱠᱟ ᱛᱩᱦᱟᱹᱫ ᱠᱟᱛᱮ ᱢᱤᱦᱤᱡᱟᱢ ᱪᱤᱛᱛᱚᱨᱚᱧᱡᱚᱱ ᱦᱟᱹᱵᱤᱡ ᱞᱤᱧ ᱪᱟᱞᱟᱣᱮᱱᱟ᱾ ᱚᱸᱰᱮ ᱠᱷᱚᱱ ᱟᱨ ᱦᱚᱸ ᱵᱚᱨᱫᱷᱚᱢᱟᱱ ᱪᱟᱞᱟᱜ ᱜᱟᱹᱰᱤ ᱞᱤᱧ ᱩᱪᱟᱹᱲ ᱮᱱᱟ᱾ ᱵᱚᱨᱫᱷᱚᱢᱟᱱ ᱥᱮᱫ ᱨᱮᱜᱮ ᱚᱸᱰᱮ ᱱᱤᱡ ᱢᱚᱦᱟᱡᱚᱱᱟᱜ ᱚᱲᱟᱜ ᱥᱟᱛᱮ ᱨᱮᱜᱮ ᱟᱛᱳ ᱨᱮᱱ ᱮᱴᱟᱜ ᱦᱚᱲ ᱠᱚ ᱥᱟᱶ ᱛᱮ ᱜᱮ ᱞᱤᱧ ᱛᱟᱸᱦᱮᱱᱟ᱾ ᱤᱧ ᱜᱚᱜᱚ ᱫᱚᱭ ᱠᱟᱹᱢᱤ ᱵᱟᱲᱟᱭᱟ ᱟᱨ ᱤᱧ ᱫᱚ ᱮᱴᱟᱜ ᱜᱤᱫᱽᱨᱟᱹ ᱠᱚ ᱥᱟᱶᱛᱮ ᱠᱟᱺᱪ ᱜᱩᱞᱤ ᱠᱚᱧ ᱠᱷᱮᱞ ᱵᱟᱲᱟᱭᱟ ᱟᱨ ᱵᱟᱠᱰᱩᱞᱩᱧ ᱥᱟᱵ ᱵᱟᱲᱟ ᱠᱚᱣᱟ᱾ ᱱᱚᱝᱠᱟ ᱛᱮᱜᱮ ᱫᱤᱱ ᱠᱚᱫᱚ ᱯᱟᱨᱚᱢ ᱤᱫᱤᱭᱮᱱᱟ᱾ ᱤᱧ ᱦᱚᱸ ᱢᱚᱬᱮ ᱵᱚᱪᱷᱚᱨ ᱜᱟᱱ ᱤᱧ ᱞᱟᱹᱴᱩᱭᱮᱱᱟ᱾ ᱤᱧ ᱜᱚᱜᱚ ᱦᱚᱸ ᱛᱷᱚᱲᱟ ᱜᱟᱱ ᱴᱟᱠᱟᱼᱯᱟᱹᱭᱥᱟᱹ ᱠᱚᱭ ᱡᱩᱲᱟᱹᱣ ᱠᱮᱫᱟ᱾ ᱟᱫᱚ ᱥᱚᱦᱨᱟᱭ ᱥᱮᱴᱮᱨᱮᱱ ᱠᱷᱟᱱ ᱟᱹᱞᱤᱧᱟᱜ ᱚᱲᱟᱜ ᱛᱮᱞᱤᱧ ᱨᱩᱣᱟᱹᱲ ᱮᱱᱟ᱾ ᱱᱟᱞᱦᱟ ᱡᱩᱣᱟᱹᱲ ᱯᱟᱹᱭᱥᱟᱹ ᱛᱮ ᱛᱷᱚᱲᱟ ᱜᱟᱱ ᱥᱤᱢᱼᱥᱩᱠᱨᱤ ᱟᱨ ᱢᱤᱦᱩᱸᱼᱢᱮᱨᱚᱢ ᱮᱢᱟᱱ ᱞᱤᱧ ᱦᱟᱛᱟᱣ ᱠᱮᱫ ᱠᱚᱣᱟ᱾ ᱛᱷᱚᱲᱟᱜᱟᱱ ᱥᱟᱨᱮᱡ ᱟᱠᱟᱱ ᱵᱟᱲᱜᱮ ᱠᱚᱨᱮ ᱨᱚᱦᱚᱭ ᱞᱟᱹᱜᱤᱫ ᱨᱟᱦᱮᱲᱼᱡᱚᱱᱰᱨᱟ ᱮᱢᱟᱱ ᱤᱛᱟᱹ ᱠᱚᱞᱤᱧ ᱠᱤᱨᱤᱧ ᱠᱮᱫᱟ ᱟᱨ ᱟᱹᱰᱤ ᱡᱚᱛᱚᱱ ᱠᱟᱛᱮᱫ ᱞᱤᱧ ᱪᱟᱥ ᱠᱮᱫᱟ᱾

ᱟᱫᱚ ᱢᱤᱫ ᱫᱤᱱ ᱤᱧ ᱜᱚᱜᱚ ᱫᱚᱭ ᱜᱚᱴᱟ ᱴᱷᱤᱠ ᱠᱮᱫᱟ ᱟᱨ ᱟᱛᱳ ᱨᱮ ᱢᱮᱱᱟᱜ ᱤᱥᱠᱩᱞ ᱛᱮᱭ ᱤᱫᱤᱠᱤᱫᱤᱧᱟ ᱟᱨ ᱢᱚᱦᱟᱥᱚᱭ ᱮ ᱢᱮᱛᱟ ᱫᱮᱭᱟ ᱼ “ᱢᱚᱦᱟᱥᱚᱭ! ᱤᱧ ᱨᱮᱱ ᱵᱟᱹᱵᱩ ᱦᱚᱸ ᱵᱷᱟᱹᱨᱛᱤ ᱠᱟᱭ ᱢᱮ᱾ ᱟᱹᱞᱤᱧ ᱵᱟᱵᱚᱛ ᱢᱚᱦᱟᱥᱚᱭ ᱢᱟᱭ ᱵᱟᱰᱟᱭ ᱠᱟᱱ ᱛᱟᱸᱦᱮ ᱜᱮᱭᱟ᱾ ᱟᱫᱚᱭ ᱢᱮᱱ ᱠᱮᱫᱟ ᱼ ᱟᱹᱰᱤ ᱢᱚᱸᱡᱽ ᱠᱟᱛᱷᱟ᱾ ᱱᱚᱝᱠᱟᱱ ᱜᱤᱫᱽᱨᱟᱹ ᱠᱚ ᱯᱟᱲᱦᱟᱣᱚᱜ ᱞᱟᱹᱜᱤᱫ ᱜᱮ ᱛᱷᱚᱨ ᱱᱚᱣᱟ ᱤᱥᱠᱩᱞ ᱫᱚ᱾ ᱢᱮᱱᱠᱷᱟᱱ ᱟᱵᱮᱱ ᱢᱟ ᱹᱹᱹᱹ ᱱᱟᱢᱟᱞ ᱠᱟᱹᱢᱤ ᱥᱮᱫ ᱵᱮᱱ ᱪᱟᱞᱟᱜ ᱠᱟᱱ? ᱟᱫᱚ ᱤᱧ ᱜᱚᱜᱚᱭ ᱢᱮᱱ ᱜᱚᱫ ᱠᱮᱫᱟ ᱼ “ᱵᱟᱝ ᱢᱚᱦᱟᱥᱚᱭ ᱟᱫᱚ ᱵᱟᱹᱞᱤᱧ ᱪᱟᱞᱟᱜᱼᱟ” ᱼ “ᱤᱧ ᱨᱮᱱ ᱵᱮᱴᱟ ᱱᱚᱰᱮᱭ ᱯᱟᱲᱦᱟᱜᱼᱟ ᱟᱨ ᱱᱚᱰᱮ ᱜᱮᱞᱤᱧ ᱛᱟᱸᱦᱮᱱᱟ᱾᱾” ᱼ ᱟᱹᱰᱤ ᱵᱮᱥ, ᱪᱮᱫ ᱧᱩᱛᱩᱢ ᱵᱟᱹᱵᱩ? ᱼ”ᱤᱭᱟᱹ ᱢᱚᱦᱟᱥᱚᱭ, ᱢᱟᱨᱥᱟᱞ ᱵᱟᱹᱵᱩ ᱜᱮᱞᱮ ᱦᱚᱦᱚᱣᱟᱭᱟ᱾ ᱼ ᱠᱟᱹᱴᱤᱡ ᱨᱮ ᱟᱹᱰᱤ ᱮᱥᱮᱞ ᱢᱟᱨᱥᱟᱞ ᱜᱮᱭ ᱛᱟᱸᱦᱮᱠᱟᱱᱟ᱾ ᱟᱫᱚ ᱚᱱᱟ ᱧᱩᱛᱩᱢ ᱜᱮ ᱛᱟᱸᱦᱮᱭᱮᱱᱟ᱾” ᱢᱚᱦᱟᱥᱚᱭ ᱼ ᱥᱟᱹᱨᱤ ᱜᱮ ᱟᱹᱰᱤ ᱢᱚᱡᱽ ᱧᱩᱛᱩᱢ ᱠᱟᱱᱟ, ᱛᱮᱦᱮᱧ ᱠᱷᱚᱱ ᱫᱚ ᱢᱟ ᱛᱚᱵᱮ ᱢᱟᱨᱥᱟᱞ ᱢᱩᱨᱢᱩ ᱧᱩᱛᱩᱢ ᱤᱧ ᱚᱞ ᱠᱮᱫ ᱛᱟᱭᱟ᱾ ᱫᱚᱥᱟᱨ ᱦᱤᱞᱚᱜ ᱠᱷᱚᱱ ᱤᱧ ᱦᱚᱸ ᱥᱤᱞᱚᱴ ᱯᱮᱱᱥᱤᱞ ᱟᱱᱛᱮ ᱤᱥᱠᱩᱞ ᱪᱟᱞᱟᱜ ᱤᱧ ᱮᱦᱚᱵ ᱠᱮᱫᱟ᱾ ᱫᱤᱱᱟᱹᱢ ᱜᱮ ᱤᱧ ᱜᱚᱜᱚ ᱫᱚ ᱤᱥᱠᱩᱞ ᱮ ᱤᱫᱤ ᱥᱮᱴᱮᱨ ᱚᱴᱚ ᱠᱟᱹᱧᱟ᱾ ᱟᱨ ᱪᱷᱩᱴᱤ ᱚᱠᱛᱚ ᱦᱚᱸ ᱟᱹᱰᱤ ᱥᱟᱺᱜᱤᱧ ᱠᱷᱚᱱᱮ ᱫᱟᱨᱟᱢ ᱟᱹᱜᱩᱧ ᱠᱟᱱ ᱛᱟᱸᱦᱮᱱᱟ᱾ ᱟᱹᱭᱩᱵ ᱫᱚ ᱟᱹᱰᱤ ᱢᱚᱸᱡᱽᱼᱢᱚᱸᱡᱽ ᱠᱤᱥᱥᱟ ᱠᱩᱫᱩᱢ ᱠᱚᱭ ᱞᱟᱹᱭ ᱟᱧᱟ ᱟᱨ ᱚᱱᱠᱟ ᱜᱮ ᱢᱚᱸᱡᱽᱼᱢᱚᱸᱡᱽ ᱥᱟᱞᱦᱟ ᱠᱚᱭ ᱵᱟᱛᱞᱟᱣᱟᱧᱟ᱾ ᱚᱠᱟᱼᱚᱠᱟ ᱫᱚ ᱟᱛᱳ ᱨᱮᱱ ᱜᱤᱫᱽᱨᱟᱹ ᱠᱚ ᱥᱟᱶᱛᱭᱮ ᱦᱟᱱᱛᱮᱼᱱᱷᱟᱛᱮᱧ ᱧᱤᱨ ᱵᱟᱲᱟᱭᱟ᱾ ᱤᱧ ᱜᱚᱜᱚ ᱫᱚ ᱫᱚᱢᱮᱭ ᱥᱮᱱᱫᱨᱟ ᱵᱟᱲᱟᱭᱤᱧᱟ ᱟᱨᱮ ᱧᱟᱢᱞᱤᱧ ᱠᱷᱟᱱ ᱫᱚ ᱚᱠᱟᱼᱚᱠᱟ ᱫᱚ ᱫᱟᱞ ᱦᱚᱸᱭ ᱫᱟᱞᱮᱧ ᱜᱮᱭᱟ᱾ ᱟᱨ ᱦᱚᱸ ᱟᱹᱭᱩᱵ ᱫᱚ ᱠᱷᱩᱵᱮ ᱫᱩᱞᱟᱹᱲᱤᱧᱟ ᱟᱨᱮ ᱢᱮᱱᱟ ᱼ “ᱵᱮᱴᱟ ᱟᱢ ᱫᱚ ᱢᱤᱫ ᱜᱷᱟᱹᱲᱤᱡ ᱵᱟᱹᱧ ᱧᱮᱞ ᱧᱟᱢ ᱞᱮᱢ ᱠᱷᱟᱱ ᱚᱠᱟ ᱞᱮᱠᱟ ᱪᱚᱧ ᱟᱹᱭᱠᱟᱣᱟ᱾ “ᱟᱢ ᱫᱚ ᱜᱚᱜᱣᱟᱜ ᱫᱩᱠ ᱫᱚ ᱚᱦᱚᱢ ᱵᱩᱡᱷᱹᱟᱣ ᱠᱮᱭᱟ᱾” “ᱤᱧᱟᱜ ᱥᱟᱱᱟᱢ ᱠᱩᱠᱢᱩ ᱫᱚᱢ ᱟᱢ ᱠᱟᱱ ᱜᱮᱭᱟ᱾” “ᱚᱱᱟᱛᱮ ᱢᱚᱸᱡᱽ ᱛᱮ ᱚᱞᱚᱜ ᱯᱟᱲᱦᱟᱣ ᱪᱮᱫ ᱠᱟᱛᱮᱫ ᱞᱟᱹᱴᱩ ᱥᱚᱨᱠᱟᱨ ᱠᱟᱹᱢᱤ ᱧᱟᱢ ᱛᱟᱞᱟᱝ ᱢᱮ᱾ “ᱱᱚᱝᱠᱟ ᱟᱭᱢᱟ ᱫᱤᱱ ᱠᱚᱥᱴᱚ ᱞᱟᱝ ᱥᱟᱦᱟᱣ ᱠᱮᱫᱟ᱾” “ᱟᱢ ᱞᱟᱹᱴᱩ ᱦᱚᱲᱮᱢ ᱵᱟᱱᱟᱣ ᱞᱮᱱ ᱠᱷᱟᱱ ᱜᱮ ᱟᱞᱟᱝᱟᱜ ᱥᱩᱠ ᱫᱳ ᱢᱮᱱᱟᱜᱼᱟ᱾” ᱤᱧ ᱦᱚᱸ ᱤᱧ ᱜᱚᱜᱚᱣᱟᱜ ᱠᱟᱛᱷᱟ ᱛᱟᱱᱢᱟᱱ ᱤᱧ ᱟᱸᱡᱚᱢᱟ᱾ ᱟᱨ ᱜᱚᱜᱚᱣᱟᱜ ᱢᱮᱱ ᱞᱮᱠᱟ ᱜᱮ ᱞᱟᱹᱴᱩ ᱦᱚᱲ ᱵᱮᱱᱟᱣᱚᱜ ᱨᱮᱭᱟᱜ ᱤᱧ ᱨᱤᱠᱟᱹ ᱡᱚᱝᱟ᱾ ᱧᱮᱞᱼᱧᱮᱞ ᱛᱮ ᱟᱛᱚ ᱤᱥᱠᱩᱞ ᱨᱮᱭᱟᱜ ᱢᱚᱬᱮ ᱠᱤᱥᱟᱹᱞ ᱫᱚ ᱟᱹᱰᱤ ᱢᱚᱸᱡᱽ ᱛᱮᱧ ᱯᱟᱥ ᱚᱰᱚᱝ ᱮᱱᱟ᱾ ᱟᱛᱳ ᱤᱥᱠᱩᱞ ᱨᱮᱱ ᱢᱚᱦᱟᱥᱚᱭ ᱫᱚ ᱱᱮᱵᱮᱛᱟᱨ ᱤᱧ ᱫᱚ ᱟᱹᱰᱤ ᱛᱮᱫ ᱮ ᱠᱩᱥᱤᱭᱟᱹᱧᱟ ᱟᱨ ᱤᱧ ᱜᱚᱜᱚ ᱴᱷᱮᱱᱮ ᱢᱮᱱᱟ ᱼ “ᱢᱟᱨᱥᱟᱞ ᱫᱚ ᱢᱤᱫ ᱫᱤᱱ ᱟᱢᱟᱜ ᱜᱷᱟᱨᱚᱸᱡᱽ ᱫᱚᱭ ᱢᱟᱨᱥᱟᱞ ᱛᱟᱢ ᱜᱮᱭᱟ᱾” ᱮᱱᱛᱮᱫ! ᱱᱩᱭ ᱞᱮᱠᱟᱱ ᱵᱩᱫᱽᱫᱷᱤᱢᱟᱱ ᱟᱨ ᱨᱤᱠᱤᱲ ᱢᱚᱱᱮ ᱛᱮ ᱯᱟᱲᱦᱟᱣᱚᱜ ᱜᱤᱫᱽᱨᱟᱹ ᱜᱮ ᱱᱚᱣᱟ ᱤᱥᱠᱩᱞ ᱨᱮ ᱫᱚ ᱵᱟᱹᱱᱩᱜ ᱠᱚᱣᱟ᱾ ᱼᱚᱱᱟ ᱢᱚᱸᱡᱽ ᱯᱟᱲᱦᱟᱣᱚᱜ ᱜᱩᱱᱟᱹᱜ ᱛᱮᱜᱮ ᱱᱚᱜ ᱚᱭ ᱪᱮᱛᱟᱱ ᱥᱮᱫ ᱯᱟᱲᱦᱟᱣᱚᱜ ᱞᱟᱹᱜᱤᱫ ᱥᱚᱨᱠᱟᱨ ᱥᱮᱫ ᱠᱷᱚᱱ ᱠᱟᱹᱣᱰᱤ ᱜᱚᱲᱚᱭ ᱧᱟᱢ ᱤᱫᱤ ᱭᱮᱫᱟ᱾” ᱼᱢᱚᱦᱟᱥᱚᱭ ᱱᱚᱶᱟ ᱠᱚᱫᱚ ᱟᱢᱟᱜ ᱜᱚᱲᱚ ᱛᱮᱜᱮ ᱦᱳᱭᱳᱜ ᱠᱟᱱᱟ᱾ ᱤᱧ ᱜᱚᱜᱚᱭ ᱨᱚᱲ ᱠᱮᱫᱟ᱾ ᱢᱤᱫ ᱵᱟᱨ ᱦᱟᱯᱛᱟ ᱛᱟᱭᱚᱢ ᱜᱮ ᱯᱚᱸᱰᱮᱭᱟᱦᱟᱴ ᱵᱟᱡᱟᱨ ᱥᱚᱲᱚᱠ ᱫᱷᱟᱨᱮ ᱨᱮ ᱢᱮᱱᱟᱜ ᱢᱤᱰᱤᱞ ᱤᱥᱠᱩᱞ ᱨᱮ ᱤᱧᱟᱜ ᱧᱩᱛᱩᱢ ᱞᱤᱧ ᱚᱞ ᱚᱪᱚ ᱠᱮᱫᱟ᱾ ᱢᱚᱬᱮ ᱠᱚᱥ ᱜᱟᱱ ᱟᱛᱳ ᱠᱷᱚᱱ ᱛᱟᱲᱟᱢ ᱛᱮᱜᱮ ᱦᱤᱡᱩᱜ ᱥᱮᱱᱚᱜ ᱮᱱ ᱦᱚᱸ ᱢᱚᱸᱡᱽ ᱛᱮᱜᱮᱧ ᱯᱟᱥ ᱚᱰᱚᱝ ᱮᱱᱟ᱾ ᱟᱫᱚ ᱥᱚᱨᱠᱟᱨᱤ ᱦᱟᱭ ᱤᱥᱠᱩᱞ ᱨᱮ ᱧᱩᱛᱩᱢ ᱤᱧ ᱚᱞ ᱚᱪᱚ ᱠᱮᱫᱟ᱾ ᱟᱫᱚ ᱵᱷᱤᱰᱤᱼᱢᱮᱨᱚᱢ ᱠᱚ ᱟᱹᱠᱷᱨᱤᱧ ᱠᱟᱛᱮᱫ ᱤᱧ ᱜᱚᱜᱚ ᱫᱚ ᱥᱟᱹᱭᱠᱤᱞ ᱮ ᱦᱟᱛᱟᱣ ᱟᱹᱫᱤᱰᱧᱟ᱾ ᱚᱸᱰᱮ ᱠᱷᱚᱱ ᱦᱚᱸ ᱯᱮ ᱥᱮᱨᱢᱟ ᱛᱮᱜᱮ ᱯᱟᱹᱦᱤᱞ ᱫᱟᱨᱡᱟ ᱛᱮ ᱢᱮᱴᱨᱤᱠ ᱤᱧ ᱯᱟᱥ ᱠᱮᱫᱟ᱾ ᱤᱧ ᱜᱚᱜᱚ ᱫᱚ ᱟᱹᱰᱤᱭ ᱠᱩᱥᱤᱭᱮᱱᱟ᱾ ᱛᱷᱚᱲᱟ ᱫᱤᱱ ᱛᱟᱭᱚᱢ ᱠᱷᱟᱱ ᱜᱮ ᱜᱚᱰᱰᱟ ᱠᱚᱞᱮᱡᱽ ᱨᱮᱧ ᱵᱷᱟᱹᱨᱛᱤ ᱭᱮᱱᱟ᱾ ᱟᱨ ᱵᱟᱨ ᱵᱚᱪᱷᱚᱨ ᱨᱮ ᱜᱮ ᱤᱱᱴᱟᱨ ᱫᱚᱧ ᱯᱟᱥ ᱠᱮᱫᱟ᱾ ᱚᱱᱟ ᱵᱟᱫᱽ ᱧᱮᱞᱼᱧᱮᱞ ᱛᱮᱜᱮ ᱯᱮ ᱵᱚᱪᱷᱚᱨ ᱨᱮ ᱵᱤᱹᱮᱹ ᱦᱚᱸ ᱯᱟᱹᱦᱤᱞ ᱫᱟᱨᱡᱟ ᱛᱮᱧ ᱯᱟᱥ ᱠᱮᱫᱟ᱾ ᱢᱮᱰᱮᱞ ᱦᱚᱸᱧ ᱧᱟᱢ ᱠᱮᱫᱟ ᱟᱨ ᱠᱟᱹᱣᱰᱤ ᱜᱚᱲᱚ ᱦᱚᱧ ᱧᱟᱢ ᱠᱮᱫᱟ᱾ ᱧᱮᱞ ᱢᱮᱥᱮ ᱵᱤᱹᱮᱹ ᱯᱟᱥ ᱛᱟᱭᱚᱢ ᱜᱮ ᱢᱤᱫ ᱫᱚᱢ ᱜᱮ ᱥᱚᱨᱠᱟᱨ ᱠᱟᱹᱢᱤ ᱞᱟᱹᱜᱤᱫ ᱵᱤᱰᱟᱹᱣ ᱤᱧ ᱮᱢ ᱠᱮᱫᱟ, ᱚᱱᱟ ᱨᱮᱸᱜᱮᱧ ᱯᱟᱥ ᱮᱱᱟ ᱟᱨ ᱤᱧᱟᱜ ᱢᱚᱸᱡᱽ ᱥᱟᱨᱴᱤᱯᱷᱤᱠᱮᱴ ᱧᱮᱞ ᱛᱮ ᱤᱱᱴᱟᱨᱵᱤᱭᱩ ᱨᱮᱦᱚᱸ ᱠᱚ ᱵᱟᱪᱷᱟᱣ ᱩᱛᱟᱹᱨᱮ ᱠᱤᱫᱤᱧᱟ᱾ ᱯᱟᱹᱦᱤᱞ ᱨᱮᱜᱮ ᱠᱚᱞᱠᱟᱛᱟ ᱱᱟᱜᱽᱨᱟᱦᱟ ᱨᱮ ᱠᱟᱹᱢᱤ ᱠᱚ ᱮᱢᱟ ᱫᱤᱧᱟ᱾ ᱱᱤᱛ ᱫᱚ ᱱᱚᱣᱟ ᱥᱚᱨᱠᱟᱨᱤ ᱠᱣᱟᱴᱟᱨ ᱚᱲᱟᱜ ᱨᱮ ᱵᱤᱛᱟᱹᱣ ᱪᱟᱞᱟᱣ ᱟᱠᱟᱱ ᱫᱤᱱ ᱠᱚᱫᱚ ᱥᱤᱱᱮᱢᱟ ᱨᱮᱭᱟᱜ ᱪᱤᱛᱟᱹᱨ ᱞᱮᱠᱟ ᱞᱤᱧ ᱫᱤᱥᱟᱹ ᱨᱩᱣᱟᱹᱲᱟ᱾ ᱠᱟᱹᱢᱤ ᱧᱟᱢ ᱠᱟᱛᱮᱫ ᱵᱟᱨ ᱥᱮᱨᱢᱟ ᱛᱮᱜᱮ ᱵᱟᱹᱭᱼᱵᱟᱹᱭ ᱛᱮ ᱡᱚᱛᱚ ᱡᱩᱢᱤ ᱡᱟᱭᱜᱟ ᱞᱤᱧ ᱪᱷᱟᱰᱟᱣ ᱨᱩᱣᱟᱹᱲ ᱠᱮᱫᱟ᱾ ᱚᱲᱟᱜ ᱫᱩᱣᱟᱹᱨ ᱦᱚᱸ ᱞᱤᱧ ᱵᱮᱱᱟᱣ ᱯᱷᱮᱨᱮᱣ ᱠᱮᱫᱟ᱾ ᱱᱚᱝᱠᱟ ᱥᱚᱨ ᱫᱤᱱ ᱜᱮ ᱤᱧ ᱞᱟᱹᱜᱤᱫ ᱫᱩᱨᱜᱟᱹᱯᱩᱨ ᱠᱷᱚᱱ ᱵᱟᱹᱦᱩ ᱦᱚᱸᱞᱮ ᱧᱮᱞ ᱠᱩᱥᱤᱭᱟᱠᱟᱱᱟ᱾ ᱱᱤᱭᱟᱹ ᱥᱤᱵᱽᱨᱟᱛ ᱛᱟᱭᱚᱢ ᱜᱮ ᱱᱟᱦᱟᱜ ᱤᱧᱟᱜ ᱥᱟᱹᱜᱩᱱ ᱵᱟᱯᱞᱟ ᱫᱚ ᱦᱳᱭᱳᱜᱼᱟ᱾ ᱢᱤᱫ ᱫᱤᱱ ᱤᱧ ᱜᱚᱜᱚ ᱫᱚ ᱤᱧ ᱵᱟᱵᱟᱣᱟᱜ ᱯᱷᱚᱴᱚ ᱵᱟᱠᱥᱟ ᱠᱷᱚᱱ ᱧᱟᱢ ᱚᱰᱚᱝ ᱠᱮᱫᱟ ᱟᱨ ᱩᱫᱩᱜ ᱟᱛᱮᱭ ᱢᱤᱛᱟᱹᱧ ᱠᱟᱱᱟ ᱼ “ᱢᱟ ᱧᱮᱞᱮ ᱢᱮᱥᱮ ᱵᱮᱴᱟ᱾ ᱟᱢ ᱵᱟᱵᱟ ᱟᱢ ᱞᱮᱠᱟ ᱜᱮᱭ ᱧᱮᱞᱚᱜ ᱠᱟᱱᱟ ᱥᱮ ᱵᱟᱝ? ᱥᱟᱹᱨᱤ ᱜᱮᱧ ᱞᱮᱧ ᱠᱮᱫᱮ ᱼ ᱮᱠᱟᱞ ᱤᱧᱟᱜ ᱢᱩᱴᱷᱟᱹᱱ ᱜᱮ ᱚᱱᱟ ᱯᱷᱚᱴᱚ ᱨᱮᱧ ᱧᱮᱞ ᱧᱟᱢ ᱠᱮᱫᱟ᱾ ᱤᱧ ᱜᱚᱜᱚ ᱫᱚ ᱢᱮᱫᱫᱟᱜ ᱡᱚᱡᱚᱫ ᱤᱧ ᱨᱮᱭ ᱦᱟᱹᱲᱩᱵ ᱡᱟᱞᱟᱫ ᱜᱚᱫ ᱮᱱᱟ ᱟᱨᱮ ᱢᱮᱱ ᱠᱮᱫᱟ ᱼ “ᱛᱮᱦᱮᱧ ᱫᱚ ᱤᱧᱟᱜ ᱠᱩᱠᱢᱩ ᱫᱚ ᱥᱟᱹᱨᱤᱭᱮᱱᱟ ᱵᱮᱴᱟ᱾”

Written by ᱥᱭᱟᱢ ᱵᱮᱥᱨᱟ
Published on Holong Gada (Jan – Jun, 2011)