ᱨᱚᱲ ᱟᱨ ᱥᱟᱶᱦᱮᱫ ᱥᱟᱶ ᱡᱚᱲᱟᱣᱜ

ᱡᱟᱹᱛᱤ ᱢᱤᱫᱴᱟᱹᱝ ᱟᱨᱟᱬ ᱦᱩᱭᱩᱜ ᱠᱷᱟᱱ ᱯᱟᱹᱨᱥᱤ ᱟᱨ ᱥᱟᱶᱦᱮᱫ ᱫᱚ ᱯᱟᱴᱥᱟᱢᱵᱽᱞᱮᱨᱮ ᱛᱚᱞ ᱟᱠᱟᱱ ᱚᱨᱚᱜ ᱫᱟᱲᱮ ᱠᱟᱱᱟ ᱠᱤᱱ, ᱥᱮᱪᱮᱫ ᱚᱸᱰᱮ ᱱᱟᱦᱮᱞ; ᱥᱤᱭᱟᱠᱚ ᱥᱟᱶᱛᱟ᱾ ᱱᱚᱶᱟ ᱠᱟᱹᱢᱤᱨᱮ ᱡᱚᱛᱚᱣᱟᱜ ᱢᱤᱢᱤᱫᱴᱟᱹᱝ ᱫᱟᱭᱵᱷᱟᱨ ᱢᱮᱱᱟᱜ ᱟ᱾ ᱚᱠᱟᱴᱟᱝ ᱦᱚᱸ ᱵᱟᱹᱨᱜᱤᱞ ᱠᱟᱛᱮᱫᱚ ᱠᱟᱹᱢᱤ ᱵᱟᱭ ᱜᱟᱱᱚᱜᱛᱮ ᱢᱟᱨᱟᱝᱵᱳᱨᱳ ᱫᱚ ᱢᱤᱫ ᱢᱚᱱᱠᱟᱛᱮ ᱢᱤᱫᱴᱟᱹᱝ ᱠᱟᱴᱛᱮ ᱤᱥᱤ ᱟᱨᱟᱬ ᱟᱨ ᱱᱟᱦᱮᱞᱮ ᱢᱟᱜ ᱚᱰᱚᱠ ᱞᱮᱫᱟ᱾ ᱱᱚᱶᱟ ᱨᱮᱭᱟᱜ ᱵᱮᱱᱟᱣ ᱫᱚ ᱠᱟᱹᱢᱤ ᱟᱞᱜᱟᱭ ᱟᱨ ᱩᱥᱟᱹᱨᱟᱭ ᱞᱟᱹᱜᱤᱫ, ᱛᱚᱵᱮ ᱠᱟᱹᱢᱤ ᱨᱮᱫᱚ ᱞᱟᱜᱟᱣ ᱜᱟᱱᱚᱜ ᱟ ᱩᱱᱨᱮ, ᱡᱚᱠᱷᱚᱱ ᱫᱟᱲᱮᱠᱤᱱ ᱠᱟᱹᱢᱤᱭᱟ; ᱱᱟᱦᱮᱞ ᱠᱤᱱ ᱚᱨᱟ᱾ ᱵᱟᱨ ᱯᱟᱦᱴᱟ ᱯᱟᱴᱼᱥᱟᱢᱵᱽᱞᱮᱨᱮ ᱯᱟᱹᱨᱥᱤ ᱟᱨ ᱥᱟᱶᱦᱮᱫ ᱟᱯᱟᱱ ᱫᱤᱲᱟᱹᱱ ᱞᱮᱱᱠᱷᱟᱱ ᱥᱮᱪᱮᱫ ᱱᱟᱦᱮᱞ ᱫᱚ ᱥᱟᱶᱛᱟ ᱞᱟᱹᱜᱤᱫ ᱠᱷᱚᱭᱟᱝᱚᱜᱼᱟ᱾ ᱵᱮᱥᱛᱮ ᱵᱟᱝ ᱥᱤ ᱠᱟᱛᱮ ᱜᱷᱤᱧᱪᱚ ᱜᱷᱚᱪᱚᱲᱚᱜᱼᱟ᱾ ᱪᱷᱩᱴᱟᱹᱣ ᱵᱮᱨᱛᱷᱟ ᱜᱤᱰᱤᱜᱼᱟ᱾ ᱚᱱᱟᱛᱮ ᱢᱤᱫᱚᱜ ᱫᱚ ᱞᱟᱹᱠᱛᱤ᱾ ᱢᱮᱱᱟᱜᱤᱡᱟᱜ ᱥᱟᱹᱜᱟᱹᱭ ᱦᱚᱸ ᱡᱚᱲᱠᱟᱛᱮ ᱫᱚᱦᱚ ᱛᱮᱜᱮ ᱦᱩᱭ ᱟᱵᱚᱱᱟ᱾ ᱛᱚᱵᱮ ᱮᱱᱟᱝ ᱫᱟᱲᱮ ᱮᱢ ᱜᱟᱱᱚᱜᱼᱟ ᱡᱚᱥᱟᱜ ᱠᱟᱹᱢᱤ ᱥᱟᱹᱛ ᱞᱟᱹᱜᱤᱫ ᱛᱮ᱾

ᱢᱩᱨᱩᱠ ᱦᱟᱞᱟᱛ ᱠᱷᱚᱱ ᱚᱰᱚᱠᱚᱜ ᱞᱟᱹᱜᱤᱫ ᱱᱤᱛ ᱥᱮᱪᱮᱫᱚᱜ ᱟᱹᱰᱤᱛᱮᱫ ᱞᱟᱹᱠᱛᱤ ᱠᱟᱱᱟ᱾ ᱛᱚᱵᱮ ᱥᱮᱪᱮᱫ ᱠᱟᱛᱮ ᱡᱟᱹᱛᱤᱭᱟᱹᱨᱤ ᱟᱨᱟᱬ ᱫᱚ ᱟᱵᱚ ᱜᱚᱜ ᱞᱮ ᱮᱱᱟᱝ ᱡᱟᱹᱛᱤᱫᱚ ᱵᱟᱧᱪᱟᱣᱜᱼᱟ᱾ ᱟᱞᱟᱜᱽ ᱟᱞᱟᱜᱽ ᱯᱚᱱᱚᱛᱨᱮ ᱪᱷᱤᱛᱭᱟᱹᱣ ᱠᱟᱛᱮ ᱛᱟᱦᱮᱸ ᱟᱠᱟᱱ ᱚᱠᱛᱚᱨᱮ ᱥᱮᱪᱮᱫᱚᱜ ᱵᱚ ᱮᱦᱚᱵᱮᱫ ᱠᱟᱱᱟ ᱫᱤᱠᱩ ᱯᱟᱹᱨᱥᱤᱛᱮ᱾ ᱚᱱᱟ ᱯᱟᱹᱨᱥᱤ ᱥᱟᱶᱛᱮ ᱥᱟᱢᱟᱝ ᱥᱮᱫᱨᱮ ᱢᱮᱱᱟᱜ ᱪᱟᱹᱠᱨᱤ ᱱᱩᱠᱨᱤ ᱦᱟᱭᱟ ᱜᱮᱵᱚ ᱧᱮᱞ ᱧᱟᱢᱮᱫ ᱛᱮ ᱡᱟᱹᱛᱤ ᱚᱣᱟᱨ ᱥᱮ ᱡᱟᱹᱛᱤ ᱵᱟᱧᱪᱟᱣ ᱫᱚᱦᱚᱭ ᱯᱟᱦᱴᱟ ᱟᱹᱰᱤ ᱠᱟᱹᱡ ᱦᱚᱲ ᱜᱮᱵᱚᱱ ᱩᱭᱦᱟᱹᱨᱮᱫ ᱠᱟᱱᱟ᱾ ᱨᱚᱲ ᱟᱨ ᱥᱟᱶᱦᱮᱫ ᱫᱩᱞᱟᱹᱲᱼᱡᱚᱛᱚᱱᱟᱜ ᱞᱟᱹᱠᱛᱤᱜ ᱠᱟᱱ ᱵᱮᱲᱟᱨᱮ ᱟᱹᱛᱩ ᱫᱤᱥᱚᱢ ᱦᱚᱲ ᱫᱚ ᱦᱟᱯᱲᱟᱢ ᱠᱚᱴᱷᱮᱫ ᱠᱷᱚᱱ ᱦᱟᱛᱟᱣ ᱟᱜ ᱠᱚ ᱪᱟᱞᱟᱣ ᱮᱫᱟ ᱟᱨ ᱪᱟᱹᱠᱨᱤ ᱱᱩᱠᱨᱤ ᱥᱟᱶᱛᱮ ᱱᱟᱢᱟᱞ ᱟᱹᱥᱩᱞ ᱦᱚᱲ ᱫᱚ ᱢᱟᱬᱟᱝ ᱢᱟ ᱯᱚᱱᱚᱛ ᱯᱟᱹᱨᱥᱤ ᱟᱨ ᱚᱱᱟ ᱛᱟᱭᱚᱢ ᱤᱝᱞᱤᱥ ᱯᱟᱹᱨᱥᱤ ᱥᱮᱫᱵᱚ ᱢᱚᱸᱦᱰᱟᱜ ᱠᱟᱱᱟ᱾ ᱪᱮᱫᱟᱜ ᱥᱮ ᱚᱱᱟ ᱥᱮᱬᱟ ᱞᱮᱠᱷᱟᱱ ᱥᱮᱬᱟ ᱪᱟᱹᱠᱨᱤ ᱥᱮᱫ ᱢᱟᱬᱟᱝᱚᱜ ᱦᱩᱭ ᱜᱟᱱᱚᱜ ᱠᱟᱱᱟ᱾ ᱵᱷᱟᱨᱚᱛ ᱛᱷᱟᱨ ᱨᱮᱭᱟᱜ ᱥᱮᱬᱟ ᱪᱟᱹᱠᱨᱤ ᱨᱮᱫᱚ ᱤᱝᱞᱤᱥ ᱜᱮᱭᱟᱱ ᱟᱨ ᱛᱤᱱᱟᱹᱜ ᱫᱚ ᱦᱤᱱᱫᱤ ᱦᱚᱸ ᱞᱟᱹᱠᱛᱤᱜ ᱠᱟᱱᱛᱮ ᱞᱮᱴᱠᱟ ᱠᱚ ᱚᱱᱟ ᱢᱤᱰᱤᱭᱟᱢ ᱮᱫ ᱠᱚᱣᱟᱵᱚ᱾ ᱛᱷᱚᱱᱚᱛ ᱞᱮᱴᱠᱟ ᱠᱚᱴᱷᱮᱫ ᱠᱷᱚᱱ ᱟᱞᱚᱠᱚ ᱯᱟᱹᱪᱷᱞᱟᱹᱜ ᱢᱟ ᱢᱮᱱᱛᱮ ᱟᱠᱚ ᱥᱟᱶᱫᱚ ᱚᱱᱟ ᱯᱟᱹᱨᱥᱤ ᱛᱮᱜᱮᱵᱚᱱ ᱨᱚᱲᱮᱫ ᱠᱟᱱᱟ᱾ ᱜᱟᱨᱡᱤᱭᱚᱱ ᱢᱤᱴᱤᱝᱨᱮ ᱟᱥᱲᱟ ᱯᱟᱦᱴᱟ ᱠᱷᱚᱱ ᱟᱭᱳ ᱵᱟᱵᱟ ᱚᱱᱟ ᱜᱮᱠᱚ ᱢᱮᱛᱟ ᱦᱟᱠᱚ ᱠᱟᱱᱟ ᱢᱟᱪᱮᱫ ᱠᱚ᱾ ᱱᱚᱝᱠᱟᱛᱮ ᱞᱮᱴᱠᱟ ᱠᱚ ᱛᱟᱵᱚᱫᱚ ᱟᱵᱚ ᱨᱚᱲ ᱠᱷᱚᱱ ᱫᱚᱠᱚ ᱥᱟᱦᱟ ᱩᱛᱟᱹᱨᱚᱜ ᱠᱟᱱᱟ᱾ ᱵᱚᱛᱚᱨ ᱵᱩᱡᱷᱟᱹᱣᱜᱼᱟ ᱱᱤᱛ ᱦᱚᱲ ᱞᱮᱠᱷᱟ ᱞᱮᱠᱟᱛᱮ ᱡᱟᱦᱟᱸ ᱛᱤᱱᱟᱹᱜ ᱥᱟᱱᱛᱟᱲ ᱵᱚ ᱞᱮᱠᱷᱟ ᱧᱟᱢᱚᱜ ᱠᱟᱱᱟ ᱩᱱᱟᱹᱜ ᱦᱚᱲ ᱫᱚ ᱥᱟᱱᱛᱟᱲ ᱨᱚᱲ ᱵᱟᱵᱚ ᱵᱟᱰᱟᱭᱟ᱾ ᱛᱤᱱᱟᱹᱜ ᱫᱚ ᱮᱴᱟᱜ ᱫᱷᱚᱨᱚᱢ ᱥᱮᱫ ᱰᱟᱦᱨᱟᱣ ᱠᱟᱛᱮ ᱵᱩᱴᱟᱹ ᱜᱮᱵᱚ ᱛᱟᱲᱟᱣ ᱟᱠᱟᱫ ᱛᱟᱵᱚᱱᱟ᱾ ᱥᱟᱱᱛᱟᱲᱟᱜ ᱞᱟᱭ ᱞᱟᱠᱪᱟᱨ ᱩᱱᱠᱩ ᱴᱷᱮᱫ ᱫᱚ ᱵᱟᱹᱱᱩᱜ ᱟᱱᱟᱝ,ᱵᱟᱢ ᱧᱟᱢᱟ᱾ ᱱᱚᱶᱟᱫᱚ ᱢᱩᱪᱟᱹᱫᱚᱜ ᱢᱚᱸᱦᱰᱟ ᱞᱟᱦᱟᱜ ᱵᱟᱝ ᱠᱟᱱ ᱛᱟᱵᱚᱱᱟᱛᱚ?

ᱱᱤᱛ ᱟᱹᱰᱤᱜᱟᱱ ᱯᱟᱹᱨᱥᱤ ᱱᱤᱭᱟᱺᱠᱚ ᱠᱷᱟᱹᱛᱤᱨ ᱜᱮ ᱥᱤᱫᱚᱜ ᱥᱮᱫ ᱠᱚ ᱢᱚᱸᱦᱰᱟ ᱦᱟᱠᱟᱱᱟ ᱟᱨ ᱛᱤᱱᱟᱹᱜ ᱫᱚᱠᱚ ᱥᱤᱫ ᱮᱱ ᱜᱮᱭᱟ᱾ ᱨᱚᱲ ᱜᱮᱛᱟᱢ ᱵᱟᱭ ᱛᱟᱦᱮᱸᱱ ᱠᱷᱟᱱ ᱡᱟᱹᱛᱤ ᱛᱟᱦᱮᱸᱱᱟ ᱚᱠᱟ ᱞᱮᱠᱟᱨᱮ ᱪᱤ ᱡᱟᱹᱛᱤᱭᱟᱜ ᱫᱮᱵᱟᱥᱮᱵᱟ ᱦᱚᱸ ᱵᱟᱧᱪᱟᱣᱜ ᱟ ᱚᱠᱟ ᱞᱮᱠᱟᱨᱮ᱾ ᱡᱟᱱᱟᱢ ᱠᱷᱚᱱ ᱜᱩᱡᱩᱜ ᱦᱟᱹᱵᱤᱡ ᱡᱚᱛᱚᱣᱟᱜᱨᱮ ᱟᱵᱚᱣᱟᱜ ᱫᱚ ᱥᱮᱨᱮᱧ ᱢᱮᱱᱟᱜ ᱟ᱾ ᱚᱱᱠᱟᱪᱤ ᱦᱚᱲ ᱜᱩᱡᱩᱜ ᱨᱮ ᱠᱩᱲᱤᱠᱚ ᱛᱟᱵᱚ ᱨᱟᱜᱟ ᱠᱚ ᱥᱮᱨᱮᱧ ᱨᱟᱦᱟᱛᱮ᱾ ᱮᱱᱠᱷᱟᱱ ᱵᱤᱱ ᱥᱟᱱᱛᱟᱲ ᱨᱚᱲ ᱛᱮ ᱚᱠᱟ ᱠᱟᱹᱢᱤ ᱛᱟᱢ ᱥᱮᱱᱚᱜ ᱟ ᱥᱟᱱᱛᱟᱲᱟᱜ ᱰᱷᱟᱧᱪᱟ ᱛᱮ?

ᱛᱤᱱᱟᱹᱜ ᱜᱟᱱ ᱡᱟᱹᱛᱤ ᱫᱩᱞᱟᱹᱲᱤᱭᱟᱹ ᱯᱟᱴᱷᱮ ᱠᱮᱴᱮᱡ ᱠᱟᱛᱮ ᱚᱱᱟ ᱛᱮᱜᱮ ᱯᱟᱹᱨᱥᱤ ᱥᱟᱶᱦᱮᱫ ᱡᱚᱛᱚᱱ ᱞᱟᱹᱜᱤᱫ ᱠᱚ ᱚᱰᱚᱠ ᱟᱠᱟᱱᱟ᱾ ᱞᱟᱡ ᱫᱟᱠᱟ ᱜᱮᱫ ᱠᱟᱛᱮ ᱯᱚᱛᱚᱵ ᱯᱟᱛᱷᱟᱢ ᱠᱚ ᱪᱷᱟᱯᱟᱭᱮᱫᱟ ᱢᱮᱱᱠᱷᱟᱱ ᱵᱤᱥᱛᱚ ᱦᱚᱲᱟᱜ ᱚᱱᱟᱨᱮ ᱜᱚᱨᱚᱡᱽ ᱵᱟᱝᱛᱮ ᱚᱱᱟ ᱟᱸᱥᱡᱟᱹᱱᱤ ᱵᱟᱭ ᱞᱟᱹᱴᱤᱭᱟᱹᱣᱜ ᱠᱟᱱᱟ᱾ ᱡᱚᱛᱚ ᱜᱮᱵᱚ ᱵᱟᱰᱟᱭᱟ ᱟᱹᱛᱩᱨᱤᱱ ᱥᱟᱱᱛᱟᱲ ᱟᱨ ᱵᱟᱡᱟᱨ ᱨᱤᱱ ᱥᱟᱱᱛᱟᱲ ᱵᱷᱤᱛᱨᱟᱹᱨᱮ ᱯᱷᱚᱨᱚᱠ ᱫᱚ ᱢᱮᱱᱟᱜ ᱜᱮᱭᱟ᱾ ᱟᱹᱛᱩᱨᱤᱱ ᱫᱚ ᱟᱹᱛᱩ ᱨᱮᱜᱮᱠᱚ ᱛᱟᱦᱮᱸᱱ ᱠᱟᱱᱛᱮ ᱨᱟᱭ ᱨᱤᱛ ᱠᱚ ᱵᱷᱟᱹᱜᱤ ᱥᱟᱺᱦᱤᱡ ᱠᱚ ᱥᱟᱵ ᱴᱷᱤᱠ ᱟᱠᱟᱜ ᱟ᱾ ᱛᱚᱵᱮ ᱵᱟᱡᱟᱨ ᱨᱤᱱ ᱫᱚ ᱯᱟᱹᱴᱷᱩᱣᱟᱹ ᱯᱟᱹᱲᱤᱭᱟᱹ ᱠᱚ ᱛᱮᱵᱟᱜ ᱠᱮᱫ ᱠᱷᱟᱱ ᱥᱟᱦᱟ ᱦᱟᱠᱟᱱᱟᱠᱚ ᱟᱹᱛᱩ ᱠᱷᱚᱱ᱾ ᱤᱱᱟᱹ ᱛᱟᱦᱮᱸᱱ ᱵᱷᱤᱛᱨᱟᱹ ᱨᱮ ᱡᱟᱦᱟᱸ ᱜᱮᱠᱚ ᱪᱮᱫ ᱧᱟᱢ ᱠᱮᱜ ᱟ ᱚᱱᱟ ᱜᱚᱨᱚᱡᱽ ᱢᱮᱱᱟᱜ ᱠᱷᱟᱱ ᱵᱟᱡᱟᱨ ᱨᱮ ᱟᱹᱛᱩ ᱫᱤᱥᱚᱢ ᱨᱮᱭᱟᱝ ᱪᱟᱞᱟᱣ ᱞᱟᱹᱜᱤᱫ ᱠᱚ ᱫᱤᱲᱟᱹᱢᱩᱲᱮᱜ ᱟ᱾ ᱛᱟᱭᱚᱢ ᱢᱟᱬᱟᱝ ᱠᱟᱛᱮ ᱠᱟᱹᱢᱤ ᱠᱚ ᱛᱚᱨᱟᱣ ᱮᱫᱟ ᱟᱫᱛᱩᱫ᱾ ᱥᱟᱶᱦᱮᱫ ᱦᱚᱸ ᱩᱱᱠᱩ ᱵᱟᱡᱟᱨ ᱨᱤᱱ ᱜᱮ ᱵᱤᱥᱛᱤ ᱠᱚ ᱪᱟᱨᱪᱟ ᱭᱮᱫ ᱛᱮ ᱟᱹᱲᱟᱹ ᱨᱮᱭᱟᱜ ᱟᱱᱟᱴ ᱠᱚ ᱥᱟᱢᱟᱝ ᱮᱫᱟ᱾ ᱟᱹᱛᱩᱨᱮ ᱛᱟᱦᱮᱸᱱ ᱵᱷᱤᱛᱨᱟᱹ ᱨᱮ ᱥᱮᱪᱮᱫ ᱥᱟᱶ ᱡᱚᱲᱟᱣ ᱛᱟᱦᱮᱸᱱ ᱠᱷᱟᱹᱛᱤᱨ ᱡᱚᱛᱚᱣᱟᱜ ᱢᱟ ᱵᱟᱠᱚ ᱥᱟᱵ ᱛᱤᱭᱚᱜ ᱠᱟᱜ ᱠᱟᱱᱟ᱾ ᱚᱱᱠᱟᱨᱮ ᱡᱚᱛᱚ ᱥᱟᱱᱛᱟᱲᱼᱟᱹᱲᱟᱹ ᱪᱟᱨᱪᱟ ᱵᱷᱤᱛᱤᱨ ᱨᱮ ᱵᱟᱵᱚ ᱧᱟᱢᱮᱜ ᱟ᱾ ᱢᱮᱱᱠᱷᱟᱱ ᱩᱱᱠᱩ ᱠᱚᱴᱷᱮᱫ ᱠᱷᱚᱱ ᱜᱮ ᱥᱟᱶᱦᱮᱫ ᱫᱚ ᱥᱤᱨᱤᱡᱚᱜ ᱠᱟᱱᱛᱮ ᱟᱹᱰᱤᱜᱟᱱ ᱟᱹᱲᱟᱹ ᱩᱠᱩᱨᱮ ᱛᱟᱦᱮᱸᱱ ᱠᱟᱱᱟ᱾ ᱚᱱᱟᱛᱮ ᱯᱟᱹᱨᱥᱤ ᱵᱟᱧᱪᱟᱣ ᱫᱚᱦᱚᱭ ᱞᱟᱹᱜᱤᱫ ᱠᱷᱟᱱ,ᱞᱮᱜᱽ ᱪᱟᱨ ᱵᱟᱧᱪᱟᱣ ᱫᱚᱦᱚᱭ ᱞᱟᱹᱜᱤᱫ ᱠᱷᱟᱱ; ᱚᱱᱟ ᱟᱹᱲᱟᱹ ᱠᱚ ᱢᱤᱫᱴᱟᱹᱝ ᱟᱹᱲᱟᱹᱵᱟᱺᱫᱤ (Dictionary) ᱨᱮ ᱥᱟᱢᱴᱟᱣ ᱫᱚᱦᱚᱭ ᱞᱮᱠᱟᱱ ᱠᱟᱹᱢᱤ ᱦᱚᱨᱟ ᱦᱟᱛᱟᱣ ᱨᱮᱭᱟᱜ ᱞᱟᱹᱠᱛᱤ ᱢᱮᱱᱟᱜ ᱟ᱾

ᱱᱤᱛ ᱚᱠᱟᱨᱮ ᱚᱠᱟᱨᱮ ᱯᱟᱹᱨᱥᱤ ᱵᱟᱧᱪᱟᱣ ᱫᱚᱦᱚᱭ ᱞᱟᱹᱜᱤᱫ ᱛᱮ ᱥᱚᱨᱠᱟᱨᱤ ᱜᱚᱲᱚ ᱥᱚᱦᱚᱫ ᱠᱚᱦᱚᱸᱵᱚ ᱧᱟᱢ ᱵᱟᱲᱟᱭᱮᱫ ᱜᱮᱭᱟ᱾ ᱤᱛᱩᱱ ᱟᱥᱲᱟ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱦᱟᱹᱵᱤᱡ ᱥᱟᱱᱛᱟᱲᱤ ᱯᱚᱲᱦᱚᱱᱚᱜ ᱨᱮᱭᱟᱜ ᱱᱤᱛ ᱛᱟᱠᱵᱚ ᱧᱟᱢ ᱠᱮᱫ ᱜᱮᱭᱟ᱾ ᱤᱠᱷᱟᱹᱱ ᱚᱱᱟᱴᱟᱝ ᱫᱚ ᱵᱟᱠᱷᱨᱟ ᱠᱟᱛᱮ ᱛᱟᱦᱮᱸᱭᱟᱠᱟᱱᱟ ᱥᱟᱶᱦᱮᱫ ᱥᱩᱢᱩᱝ ᱨᱮᱜᱮ᱾ ᱚᱱᱟ ᱱᱤᱛ ᱞᱟᱦᱟᱜ ᱞᱟᱹᱠᱛᱤᱜ ᱠᱟᱱᱟ ᱥᱟᱬᱮᱥ ᱥᱮᱫ,ᱚᱛᱱᱚᱜ ᱥᱮᱫ,ᱱᱟᱜᱟᱢ ᱥᱮᱫ,ᱮᱞᱠᱷᱟ ᱥᱮᱫ᱾ ᱚᱱᱠᱟᱱ ᱪᱟᱨᱪᱟ ᱨᱟᱠᱟᱵ ᱠᱟᱱ ᱡᱚᱦᱚᱜ ᱛᱤᱱᱟᱹᱜ ᱜᱟᱱ ᱜᱟᱹᱠᱷᱩᱲ ᱚᱱᱚᱞᱤᱭᱟᱹ ᱠᱚᱦᱚᱸ ᱢᱮᱱᱮᱫ ᱛᱟᱵᱚᱱᱟᱠᱚ ᱚᱱᱟ ᱞᱟᱹᱜᱤᱫ ᱛᱮ ᱟᱹᱲᱟᱹ ᱛᱟᱵᱚᱱ ᱥᱟᱴᱟᱣ ᱜᱚᱫᱽ ᱞᱮᱠᱟᱫᱚ ᱵᱟᱹᱱᱩᱜ ᱟ᱾ ᱥᱟᱹᱨᱤ ᱠᱟᱛᱷᱟ ᱢᱮᱱ ᱞᱮᱠᱷᱟᱱ ᱱᱚᱝᱠᱟᱱ ᱢᱮᱱᱫᱚ ᱵᱟᱭ ᱥᱟᱹᱨᱤᱭᱟ᱾ ᱯᱟᱹᱨᱩᱠᱤᱭᱟᱹ ᱢᱟᱦᱨᱚᱜᱽ ᱛᱮ ᱱᱚᱝᱠᱟᱱ ᱠᱟᱛᱷᱟ ᱫᱚᱵᱚ ᱢᱮᱱᱮᱜ ᱟ᱾ ᱢᱟᱱᱷᱟᱜ ᱵᱟᱝᱠᱷᱟᱱ ᱮᱴᱟᱜ ᱡᱟᱹᱛᱤ ᱥᱮᱫᱦᱚᱸᱵᱚ ᱵᱮᱸᱜᱮᱫᱟᱜ ᱢᱟ᱾ ᱮᱛᱚᱦᱚᱵ ᱨᱮᱫᱚ ᱡᱚᱛᱚᱜᱮ ᱚᱱᱟ ᱟᱱᱟᱴ ᱠᱚ ᱥᱟᱢᱟᱝ ᱟᱠᱟᱫᱟ᱾ᱱᱚᱱᱰᱮ ᱜᱟᱹᱠᱷᱩᱲᱢᱟᱱ ᱵᱚᱭᱜᱭᱟᱸᱱᱤᱠ ᱥᱚᱛᱭᱮᱱ ᱵᱳᱥ ᱢᱮᱱ ᱞᱮᱫᱟᱜ ᱠᱟᱛᱷᱟ ᱪᱟᱨᱪᱟᱭ ᱯᱟᱞᱮ ᱵᱟᱭ ᱥᱟᱛᱟᱢ ᱵᱟᱦᱮᱨᱚᱜ ᱟ᱾ ᱢᱤᱫ ᱡᱮᱠᱷᱟ ᱟᱡ ᱮ ᱢᱮᱱ ᱞᱮᱜ ᱟ ᱼᱡᱟᱦᱟᱸᱭ ᱠᱚᱠᱚ ᱢᱮᱱᱟ ᱵᱟᱝᱞᱟ ᱯᱟᱹᱨᱥᱤᱛᱮ ᱯᱚᱫᱟᱨᱛᱷ ᱵᱤᱜᱭᱟᱱ (Physics) ᱫᱚ ᱟᱞᱮ ᱵᱟᱞᱮ ᱯᱟᱲᱦᱟᱣ ᱫᱟᱲᱮᱭᱟᱠᱚᱣᱟ᱾ ᱚᱱᱟᱨᱮᱭᱟᱜ ᱢᱟᱱᱮᱫᱚ ᱱᱚᱶᱟᱫᱚ ᱵᱟᱝ ᱠᱟᱱᱟ ᱡᱮ ᱟᱠᱚ ᱵᱟᱝᱞᱟ ᱯᱟᱹᱨᱥᱤ ᱵᱮᱥ ᱞᱮᱠᱟ ᱵᱟᱠᱚ ᱵᱟᱰᱟᱭᱟ᱾ ᱚᱥᱚᱞ ᱠᱟᱛᱷᱟ ᱦᱩᱭᱩᱜ ᱠᱟᱱᱟ ᱩᱱᱠᱩᱫᱚ ᱯᱷᱤᱡᱤᱠᱥ ᱜᱮ ᱵᱮᱥᱛᱮ ᱵᱟᱠᱚ ᱵᱟᱰᱟᱭ ᱟᱠᱟᱫᱟ᱾ ᱟᱯᱱᱟᱨᱟᱜ ᱥᱟᱛᱟᱢ ᱡᱩᱛ ᱥᱟᱺᱦᱤᱡ ᱮᱢ ᱵᱟᱰᱟᱭ ᱟᱠᱟᱫ ᱠᱷᱟᱱ ᱡᱟᱦᱟᱸ ᱯᱟᱹᱨᱥᱤ ᱛᱮᱜᱮ ᱚᱱᱟᱫᱚ ᱯᱟᱲᱦᱟᱣ ᱜᱟᱱᱚᱜ ᱟ᱾ ᱢᱤᱫᱴᱟᱹᱝ ᱯᱟᱹᱨᱥᱤᱛᱮ ᱡᱟᱦᱟᱸᱱ ᱥᱟᱛᱟᱢ ᱵᱟᱝ ᱵᱤᱥᱲᱤ ᱫᱟᱲᱮᱭᱟᱜ ᱨᱮᱭᱟᱜ ᱢᱟᱱᱮᱫᱚ ᱯᱟᱹᱨᱥᱤ ᱜᱮ ᱞᱤᱪᱟᱹᱲᱟ ᱢᱮᱱᱛᱮ ᱫᱚ ᱟᱞᱚᱢ ᱢᱮᱱᱟ,ᱞᱤᱪᱟᱹᱲ ᱛᱟᱦᱮᱸᱱ ᱠᱟᱱᱟ ᱥᱟᱛᱟᱢ ᱜᱮᱭᱟᱱ ᱨᱮᱭᱟᱜ᱾

ᱫᱟᱹᱭᱠᱟᱹ ᱞᱮᱠᱟᱛᱮ ᱰᱚᱹ ᱫᱮᱵᱽᱨᱟᱡᱽ ᱦᱟᱸᱥᱫᱟᱜᱟᱜ ᱠᱟᱛᱷᱟᱧ ᱢᱮᱱᱟ᱾ ᱢᱮᱰᱤᱠᱮᱞ ᱥᱟᱭᱤᱱᱥ ᱨᱮᱭᱟᱜ ᱟᱹᱰᱤᱜᱟᱱ ᱠᱮᱴᱮᱡ ᱟᱹᱲᱟᱹ ᱟᱹᱰᱤ ᱵᱷᱟᱹᱜᱤᱛᱮ ᱟᱡ ᱥᱩᱢᱩᱝ ᱛᱮ ᱟᱵᱚᱛᱮ ᱥᱟᱡᱟᱣ ᱠᱟᱛᱮ ᱮᱰᱥ ᱪᱮᱛᱟᱱ ᱨᱮ ᱢᱤᱫᱴᱟᱹᱝ ᱯᱚᱛᱚᱵ ᱮ ᱚᱞ ᱟᱠᱟᱫᱟᱼᱮᱰᱥ ᱥᱟᱶ ᱡᱤᱵᱚᱱ᱾ ᱩᱠᱩᱨ ᱚᱠᱟᱨᱮᱦᱚᱸ ᱦᱟᱬᱟᱜ ᱟᱠᱟᱱ ᱞᱮᱠᱟᱱ ᱠᱟᱛᱷᱟ ᱯᱚᱛᱚᱵ ᱠᱷᱚᱱ ᱢᱟ ᱵᱟᱭ ᱯᱚᱨᱚᱠᱚᱜ ᱠᱟᱱᱟ᱾

ᱡᱚᱛᱚ ᱯᱟᱦᱴᱟ ᱠᱷᱚᱱ ᱱᱚᱝᱠᱟᱱ ᱪᱷᱩᱴᱟᱹᱣ ᱨᱮᱭᱟᱜ ᱞᱟᱹᱠᱛᱤ ᱢᱮᱱᱟᱜ ᱟ᱾ ᱪᱮᱫᱟᱜᱪᱤ ᱚᱱᱟᱜᱮ ᱨᱚᱲ ᱛᱟᱵᱚᱫᱚᱭ ᱵᱟᱧᱪᱟᱣ ᱫᱚᱦᱚ ᱠᱮᱭᱟ᱾ ᱚᱞᱢᱟ ᱦᱮᱸᱜᱮ ᱥᱟᱶᱛᱮ ᱞᱟᱹᱠᱛᱤᱜ ᱠᱟᱱᱟ ᱵᱤᱥᱛᱤ ᱠᱷᱚᱱ ᱵᱤᱥᱛᱤ ᱦᱚᱲ ᱱᱚᱶᱟᱛᱮ ᱨᱚᱲ᱾ ᱱᱟᱶᱟᱜᱮ ᱡᱟᱱᱟᱢᱟᱠᱟᱱ ᱜᱤᱫᱟᱹᱨ ᱞᱟᱹᱜᱤᱫ ᱟᱭᱚ ᱛᱚᱣᱟ ᱡᱟᱦᱟᱸ ᱞᱮᱠᱟ ᱞᱟᱹᱠᱛᱤᱭᱟᱱᱟᱜ ᱡᱤᱱᱤᱥ ᱠᱟᱱᱟ,ᱡᱟᱹᱛᱤ ᱞᱟᱹᱜᱤᱫ ᱦᱚᱸ ᱟᱭᱚ ᱟᱲᱟᱝ ᱚᱱᱠᱟ ᱜᱮ ᱞᱟᱹᱠᱛᱤ᱾ ᱢᱤᱫᱴᱟᱹᱝ ᱩᱨᱩᱢ ᱛᱟᱵᱚ ᱚᱱᱟᱫᱚᱭ ᱫᱚᱲᱦᱚᱭᱟ ᱡᱟᱱᱟᱢ ᱛᱚᱨᱟ ᱠᱷᱚᱱ᱾ ᱡᱟᱦᱟᱸ ᱡᱟᱹᱛᱤ ᱠᱷᱚᱱ ᱵᱚ ᱡᱟᱱᱟᱢ ᱟᱠᱟᱱᱟ ᱚᱱᱟ ᱞᱟᱹᱜᱤᱫ ᱛᱮ ᱟᱹᱰᱤ ᱞᱮᱠᱟᱱ ᱮᱱᱮᱢ ᱡᱟᱹᱛᱤᱭᱮ ᱠᱷᱚᱡᱚᱜ ᱠᱟᱱᱟ᱾ ᱤᱱᱟᱹᱜ ᱵᱚ ᱵᱟᱰᱟᱭ ᱠᱟᱜᱢᱟ ᱡᱟᱹᱛᱤᱫᱚ ᱠᱷᱟᱹᱞᱤ ᱢᱟᱸᱫᱟᱞ ᱡᱩᱲᱩ ᱮᱢᱟ ᱦᱟᱵᱚ ᱞᱟᱹᱜᱤᱫ ᱫᱚ ᱵᱟᱝ ᱠᱟᱱᱟ,ᱵᱤᱪᱠᱚᱢ ᱱᱚᱶᱟᱫᱚ ᱟᱯᱱᱟᱨ ᱧᱟᱢ ᱟᱠᱟᱫ ᱞᱮᱠᱟᱜᱮ ᱟᱜᱟᱢ ᱜᱟᱬᱟ ᱴᱷᱮᱫ ᱦᱟᱹᱴᱤᱧ ᱨᱮᱭᱟᱜ᱾ ᱡᱟᱹᱛᱤ ᱛᱟᱵᱚ ᱢᱮᱱᱟᱜᱼᱟ, ᱨᱚᱲ (ᱵᱷᱟᱥᱟ) ᱢᱮᱱᱟᱜ ᱟ; ᱛᱚᱵᱮ ᱟᱵᱚ ᱨᱚᱲᱫᱚ Dialect (ᱪᱟᱸᱜᱟᱜ ᱯᱟᱹᱨᱥᱤ) ᱫᱚ ᱵᱟᱝ ᱠᱟᱱᱟ᱾ ᱪᱟᱸᱜᱟᱜ ᱯᱟᱹᱨᱥᱤ ᱫᱚ ᱚᱱᱟᱠᱚ ᱢᱮᱛᱟᱜ ᱟ ᱡᱟᱦᱟᱸ ᱢᱩᱬ ᱢᱤᱫᱴᱟᱹᱝ ᱯᱟᱹᱨᱥᱤ ᱠᱷᱚᱱ ᱚᱰᱚᱠ ᱟᱠᱟᱱᱟ ᱵᱟᱝᱠᱷᱟᱱ ᱡᱟᱦᱟᱸ ᱯᱟᱹᱨᱥᱤ ᱨᱮᱭᱟᱜ ᱪᱤᱠᱤ ᱵᱟᱹᱱᱩᱜ ᱟ᱾ ᱡᱷᱟᱨᱠᱷᱚᱸᱰᱨᱮ, ᱵᱮᱸᱜᱚᱞ ᱨᱮ ᱱᱤᱛ ᱟᱵᱚᱣᱟᱜ ᱪᱤᱠᱤ ᱵᱟᱹᱱᱩᱜ ᱟᱱ ᱞᱮᱠᱟᱜᱮ ᱚᱠᱚᱭ ᱫᱚ ᱨᱳᱢᱟᱱ ᱚᱠᱚᱭᱫᱚ ᱵᱮᱸᱜᱚᱞᱤ ᱟᱨ ᱚᱠᱚᱭ ᱫᱚ ᱫᱮᱵᱽᱱᱟᱜᱚᱨᱤ ᱠᱚ ᱟᱯᱱᱟᱨ ᱮᱫᱟ ᱟᱨ ᱥᱟᱶᱦᱮᱫ ᱥᱟᱶᱛᱮ ᱡᱟᱹᱛᱤ ᱛᱟᱵᱚᱱ ᱟᱠᱚ ᱡᱟᱹᱛᱤ ᱨᱮᱭᱟᱜ ᱩᱢᱩᱞ ᱛᱮᱠᱚ ᱤᱫᱤ ᱭᱮᱜ ᱟ᱾ ᱪᱮᱫᱟᱜ? ᱟᱵᱚᱢᱟ ᱨᱟᱯᱟᱪᱟᱜ ᱜᱮ ᱵᱟᱵᱚᱱ ᱵᱟᱹᱜᱤᱱ ᱠᱟᱱᱟ ᱱᱚᱛᱮ ᱫᱚ ᱚᱱᱟᱛᱮ ᱟᱲᱟᱝ ᱯᱩᱥᱴᱟᱹᱣ ᱥᱟᱺᱦᱤᱡ ᱟᱞᱚ ᱯᱟᱪᱷᱮ ᱚᱞ ᱜᱟᱱᱚᱜ ᱢᱟ᱾ ᱵᱟᱵᱚᱱ ᱫᱤᱥᱟᱹ ᱫᱟᱲᱮᱭᱟᱜ ᱠᱟᱱᱟ ᱟᱵᱚᱣᱟᱜ ᱵᱷᱟᱹᱞᱟᱹᱭ ᱚᱠᱟᱨᱮ᱾ ᱟᱵᱚᱨᱤᱱ ᱟᱹᱭᱩᱨᱟᱱ ᱥᱟᱶᱦᱮᱫᱤᱭᱟᱹ ᱥᱟᱹᱫᱷᱩ ᱨᱟᱢᱪᱟᱸᱫᱽ ᱢᱩᱨᱢᱩ ᱟᱨ ᱯᱚᱱᱰᱮᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱡᱟᱹᱛᱤ ᱞᱟᱹᱜᱤᱫ ᱛᱮ ᱟᱞᱟᱜᱽ ᱪᱤᱠᱤ ᱟᱹᱰᱤ ᱛᱮᱫᱜᱮ ᱞᱚᱲᱟ ᱟᱱᱟ ᱢᱮᱱᱛᱮ ᱠᱤᱱ ᱩᱭᱦᱟᱹᱨ ᱞᱮᱫ ᱛᱮ ‘ᱢᱚᱸᱡᱽ ᱫᱟᱸᱫᱷᱮᱨ ᱟᱸᱠ’ ᱟᱨ ‘ᱚᱞ ᱪᱤᱠᱤ’ ᱫᱚᱠᱤᱱ ᱚᱰᱚᱠ ᱞᱮᱜ ᱟ᱾ ᱫᱤᱥᱟᱹ ᱫᱚ ᱚᱱᱟᱜᱮ ᱮᱴᱟᱜ ᱠᱚᱴᱷᱮᱫ ᱟᱞᱚᱵᱚᱱ ᱛᱟᱞᱚᱢ ᱚᱪᱚᱜ ᱢᱟ᱾ ᱩᱱ ᱚᱠᱛᱚᱨᱮ ᱠᱤᱨᱤᱥᱛᱟᱱ ᱯᱟᱫᱽᱨᱤ ᱠᱚ ᱟᱹᱛᱩ ᱟᱹᱛᱩ ᱫᱟᱬᱟ ᱠᱟᱛᱮ ᱟᱹᱫᱤᱵᱟᱹᱥᱤ ᱠᱚ ᱤᱥᱟᱹᱭ ᱫᱷᱚᱨᱚᱢ ᱛᱮᱠᱚ ᱤᱫᱤᱭᱮᱫ ᱠᱚ ᱛᱟᱦᱮᱸᱫ ᱟᱨ ᱟᱵᱚᱣᱟᱜ ᱥᱟᱶᱦᱮᱫ ᱨᱮᱦᱚᱸ ᱟᱠᱚᱣᱟᱜ ᱩᱢᱩᱞ ᱜᱮᱠᱚ ᱫᱚᱦᱚ ᱞᱮᱜ ᱟ᱾ ᱨᱟᱧᱪᱤ ᱡᱮᱜᱮᱛ ᱵᱤᱨᱫᱟᱹᱜᱟᱲᱟᱜ ᱩᱫᱤᱥ ᱦᱚᱸ ᱚᱱᱟᱜᱮ ᱡᱮ ᱥᱟᱱᱛᱟᱲᱤᱫᱚ ᱟᱠᱚᱣᱟᱜ(ᱦᱤᱸᱫᱤ) ᱩᱢᱩᱞ ᱨᱮᱜᱮ ᱛᱟᱦᱮᱸᱱ ᱢᱟ᱾ ᱚᱱᱰᱮᱱᱟᱜ ᱵᱷᱟᱥᱟ ᱵᱤᱵᱷᱟᱜᱽ ᱨᱮᱦᱚᱸ ᱚᱱᱠᱟᱱ ᱠᱚᱜᱮᱠᱚ ᱫᱚᱦᱚᱭᱮᱫ ᱠᱚᱣᱟ ᱡᱟᱦᱟᱸᱭ ᱥᱚᱨᱠᱟᱨᱟᱜ ᱫᱤᱥᱟᱹ ᱫᱚᱦᱚ ᱠᱟᱛᱮ ᱜᱮᱠᱚ ᱠᱟᱹᱢᱤᱭᱟ᱾ ᱚᱱᱟᱛᱮ ᱱᱤᱛ ᱫᱷᱟᱹᱵᱤᱡ ᱥᱟᱱᱛᱟᱲᱤ ᱵᱤᱵᱷᱟᱜᱽ ᱜᱮ ᱵᱟᱭ ᱮᱛᱚᱦᱚᱵ ᱫᱟᱲᱮᱭᱟᱫᱟ ᱟᱨ ᱨᱛᱞ ᱨᱮ ᱬᱟ ᱭᱮᱫ ᱪᱮᱫᱮᱛ ᱥᱟᱶᱦᱮᱫ ᱥᱩᱢᱩᱝ ᱵᱟᱝ ᱠᱟᱛᱮᱠᱚ ᱯᱟᱲᱦᱟᱣᱜ ᱠᱟᱱᱟ ᱢᱮᱬᱥᱟ ᱢᱤᱬᱥᱤ ᱥᱟᱛᱟᱢ ᱡᱟᱦᱟᱸᱨᱮ ᱛᱟᱦᱮᱸᱱ ᱠᱟᱱᱟ ᱥᱚᱢᱟᱡᱽ ᱵᱤᱜᱭᱟᱱ,ᱦᱚᱲ ᱵᱤᱜᱭᱟᱱ ᱥᱟᱶᱛᱮ ᱥᱟᱶᱦᱮᱫ᱾ ᱚᱱᱰᱮᱱᱤᱡ ᱯᱟᱹᱴᱷᱩᱣᱟᱹ ᱫᱚ ‘ᱯᱟᱹᱨᱥᱤ ᱥᱟᱬᱮᱥ’ ᱢᱮᱱ ᱞᱮᱠᱷᱟᱱ ᱠᱚ ᱵᱩᱡᱷᱟᱹᱣ ᱟ ᱨᱚᱱᱚᱲ (ᱵᱭᱟᱠᱚᱨᱚᱬ) ᱟᱨ ᱥᱟᱶᱦᱮᱫ ᱨᱮᱭᱟᱜ ᱱᱟᱜᱟᱢ ᱢᱟᱱᱮᱫᱚ ᱚᱱᱚᱞᱤᱭᱟᱹ ᱠᱚᱣᱟᱜ ᱠᱷᱟᱴᱚᱛᱮ ᱩᱱᱩᱨᱩᱢ (Biodata)᱾

ᱞᱟᱹᱠᱛᱤᱜ ᱠᱟᱱᱟ ᱟᱹᱰᱤᱴᱷᱮᱫ ᱛᱟᱦᱮᱸᱠᱟᱱᱤᱡ ᱱᱤᱛ ᱵᱷᱟᱵᱽᱛᱮ ᱛᱚᱯᱚᱞᱚᱜ ᱨᱮᱭᱟᱜ᱾ ᱦᱤᱴᱟᱹᱝ ᱡᱟᱲᱟᱝᱚᱜ ᱨᱮᱫᱚ ᱟᱵᱚᱣᱟᱜ ᱦᱟᱹᱱᱜᱮ ᱧᱮᱞ ᱧᱟᱢᱚᱜ ᱠᱟᱱᱟ᱾ ᱥᱟᱢᱮᱞᱟᱭᱛᱮ ᱟᱹᱰᱤ ᱥᱮᱫᱟᱜ ᱫᱟᱣ ᱡᱮᱢᱚᱱ ᱴᱤᱵᱷᱤ, ᱥᱤᱱᱮᱢᱟ,ᱨᱮᱰᱤᱭᱳ ᱠᱚᱵᱚ ᱦᱟᱛᱟᱣ ᱢᱟ᱾ ᱚᱱᱟ ᱠᱚᱨᱮ ᱟᱹᱛᱷᱟᱹᱣᱲᱤᱭᱟᱜ ᱵᱟᱝ ᱠᱟᱛᱮ ᱱᱟᱯᱟᱭ ᱱᱟᱯᱟᱭᱟᱜ ᱵᱚ ᱯᱟᱨᱥᱟᱞ ᱞᱮᱠᱷᱟᱱ ᱟᱵᱚᱣᱟᱜ ᱟᱸᱡᱚᱢ ᱞᱟᱹᱜᱤᱫ ᱦᱚᱲᱵᱚ ᱥᱟᱯᱲᱟᱣ ᱠᱮᱠᱚᱣᱟ᱾ ᱡᱟᱹᱛᱤᱭᱟᱹᱨᱤ ᱡᱟᱣᱨᱟᱱᱨᱮ ᱱᱤᱛ ᱡᱟᱦᱟᱸ ᱞᱮᱠᱟ ᱯᱮᱬᱮ ᱠᱟᱪᱟ ᱟᱨ ᱡᱷᱟᱹᱞᱟᱜ (ᱠᱷᱟᱺᱰᱤ) ᱠᱟᱨᱵᱟᱨ ᱵᱚᱱ ᱯᱚᱨᱜᱚᱞ ᱟᱠᱟᱱᱟ ᱚᱱᱠᱟᱜᱮ ᱛᱩᱢᱫᱟᱹᱜ ᱴᱟᱢᱟᱠ ᱵᱚ ᱜᱚᱨᱚᱡᱟᱜ ᱢᱟ᱾ ᱪᱟᱥᱤᱚ ᱠᱚᱫᱚ ᱟᱵᱚᱣᱟᱜ ᱛᱟᱲ ᱮ ᱵᱮᱜᱚᱲ ᱮᱫᱟ, ᱪᱮᱦᱨᱟᱭ ᱪᱟᱵᱟ ᱭᱮᱜ ᱟ᱾ ᱮᱴᱟᱜᱟᱜ ᱫᱚ ᱟᱞᱚᱵᱚ ᱦᱟᱭᱟ ᱦᱟᱜ ᱢᱟ,ᱮᱴᱟᱜ ᱠᱚ ᱟᱵᱚ ᱥᱮᱫᱵᱚ ᱚᱨ ᱥᱩᱨ ᱠᱚᱢᱟ᱾ ᱯᱟᱹᱨᱥᱤ ᱠᱚᱦᱚᱸ ᱡᱟᱦᱟᱸᱭ ᱡᱟᱦᱟᱸᱱᱟᱜ ᱠᱚ ᱪᱮᱫᱚᱜ ᱠᱟᱱᱟ ᱢᱟᱱᱟᱫᱚ ᱵᱟᱝ,ᱛᱚᱵᱮ ᱟᱵᱚᱣᱟᱜ ᱦᱚᱸ ᱡᱟᱹᱨᱩᱲ ᱠᱚ ᱪᱟᱨᱪᱟᱭ ᱢᱟ᱾ ᱡᱟᱱᱟᱢ ᱛᱚᱨᱟ ᱡᱟᱦᱟᱸ ᱟᱭᱚ ᱟᱲᱟᱝ ᱞᱮᱴᱠᱟᱭ ᱪᱮᱫᱚᱜ ᱟ,ᱚᱱᱟᱛᱮᱜᱮ ᱥᱤᱠᱱᱟᱹᱛ ᱦᱚᱸ ᱦᱩᱭᱩᱜ ᱢᱟ᱾ ᱥᱤᱧᱚᱛᱨᱮ ᱢᱤᱫᱴᱟᱹᱝ ᱡᱟᱹᱛᱤ ᱢᱮᱱᱟᱜ ᱠᱚᱣᱟ ᱛᱟᱢᱤᱞ᱾ ᱥᱤᱠᱤᱛ ᱡᱟᱹᱛᱤ ᱠᱟᱱᱟᱠᱚ ᱟᱨ ᱯᱟᱞᱮ ᱟᱠᱚᱜᱮ ᱡᱚᱛᱚᱠᱷᱚᱱ ᱵᱤᱥᱛᱤ ᱫᱚ ᱯᱚᱨᱵᱟᱥᱨᱮ ᱢᱮᱱᱟᱜ ᱠᱚᱣᱟ᱾ ᱚᱱᱟ ᱛᱩᱞᱩᱡ ᱟᱠᱚᱫᱚ ᱡᱟᱹᱨᱩᱲ ᱠᱟᱛᱮ ᱛᱟᱢᱤᱞ ᱫᱚᱠᱚ ᱪᱮᱫᱠᱟᱜ ᱜᱮᱭᱟ᱾ ᱟᱠᱚᱣᱟᱜ ᱯᱟᱹᱨᱥᱤᱫᱚ ᱯᱮ ᱦᱟᱡᱟᱨ ᱥᱮᱨᱢᱟ ᱜᱟᱱᱟᱜ ᱢᱟᱨᱮ ᱯᱟᱹᱨᱥᱤ ᱠᱟᱱᱟ᱾ ᱚᱱᱟ ᱚᱠᱛᱚ ᱨᱮᱭᱟᱝ ᱯᱟᱹᱨᱥᱤ ᱥᱚᱸᱥᱠᱨᱩᱛ ᱟᱨ ᱯᱟᱞᱤᱫᱚ ᱛᱤᱥ ᱥᱮᱫᱟᱭᱨᱮ ᱜᱚᱡ ᱦᱟᱹᱯᱤᱭᱟᱠᱟᱱᱟ ᱢᱮᱱᱠᱷᱟᱱ ᱛᱟᱢᱤᱞ ᱫᱚ ᱵᱚᱦᱚᱜ ᱛᱩᱞ ᱠᱟᱛᱮ ᱢᱮᱱᱟᱭ ᱜᱮᱭᱟ᱾ ᱚᱡᱮᱫᱚ ᱡᱚᱛᱚ ᱦᱚᱲᱟᱜ ᱠᱩᱨᱩᱢᱩᱴᱩ ᱟᱨ ᱩᱨᱩᱢ ᱵᱟᱝ ᱩᱱᱩᱢ ᱠᱟᱜ ᱫᱤᱥᱟᱹ ᱜᱮ᱾

ᱨᱚᱲ ᱟᱨ ᱥᱟᱶᱦᱮᱫ ᱜᱮ ᱱᱤᱛᱫᱚ ᱢᱤᱫᱴᱟᱹᱝ ᱡᱟᱹᱛᱤᱭᱟᱜ ᱱᱟᱹᱴᱠᱟᱹ ᱦᱟᱠᱟᱱᱟ᱾ ᱫᱮᱞᱟᱵᱚᱱ ᱡᱚᱛᱚᱠᱚ ᱱᱚᱶᱟ ᱞᱟᱹᱜᱤᱫ ᱚᱱᱠᱟᱵᱚ ᱠᱟᱹᱢᱤᱭᱟ ᱡᱮᱢᱚᱱ ᱱᱟᱹᱴᱠᱟᱹ ᱫᱚ ᱫᱷᱟᱲᱟᱥ ᱟᱠᱟᱜᱮ ᱛᱟᱦᱮᱸᱱ ᱢᱟ ᱨᱚᱲ ᱟᱨ ᱥᱟᱶᱦᱮᱫ ᱥᱟᱶ᱾

Written by ᱜᱚᱝᱜᱟᱫᱷᱚᱨ ᱦᱟᱸᱥᱫᱟᱜ
Published on ᱯᱟᱸᱡᱟ (Sep – Oct 2013)