ᱵᱚᱭᱛᱚᱨ ᱱᱟᱹᱭᱜᱟᱰᱟ ᱟᱲᱮᱨᱮ ᱨᱟᱹᱥᱤ ᱟᱹᱛᱳ ᱵᱟᱱᱜᱷᱟᱴ᱾ ᱥᱮᱫᱟᱭ ᱦᱟᱯᱲᱟᱢ ᱠᱚ ᱛᱮᱸᱜᱮᱱ ᱛᱟᱞᱟᱣᱟᱠᱟᱫ ᱥᱟᱨᱱᱟ ᱡᱟᱦᱮᱨ ᱜᱟᱲ ᱨᱮᱜᱮ ᱥᱟᱱᱛᱟᱲ ᱞᱟᱲᱠᱟ ᱢᱩᱰᱟᱹ ᱡᱚᱛᱚᱠᱚ ᱵᱚᱸᱜᱟ ᱵᱳᱨᱳᱜᱼᱟ᱾ ᱨᱮᱸᱜᱮᱡ ᱠᱤᱥᱟᱹᱬ ᱵᱟᱝᱜᱮ ᱠᱚ ᱯᱷᱚᱨᱚᱠᱚᱜᱼᱟ ᱡᱚᱛᱚ ᱜᱮ ᱫᱟᱨᱟᱦᱟᱨᱟ ᱚᱲᱟᱜ᱾ ᱚᱲᱟᱜ ᱯᱤᱪᱷᱤ ᱫᱟᱜ ᱢᱤᱥᱤᱱ, ᱠᱟᱰᱟ ᱟᱨᱟᱬ, ᱵᱚᱭᱛᱚᱨ ᱱᱟᱹᱭ ᱫᱟᱜᱛᱮ ᱪᱮᱫ ᱥᱤᱛᱩᱢ ᱪᱮᱫ ᱡᱟᱹᱯᱩᱫ ᱩᱱᱟᱹᱝ ᱢᱟᱨᱟᱝ ᱵᱟᱺᱵᱽᱲᱤ ᱵᱟᱱᱟᱨ ᱨᱮᱱ ᱯᱮᱴ ᱫᱟᱺᱫᱤᱭᱟᱹ ᱞᱟᱡ ᱟᱥᱮᱱ ᱪᱟᱹᱠᱤᱨᱤᱭᱟᱹ ᱫᱤᱠᱩ ᱯᱩᱥᱤ ᱫᱚ ᱵᱟᱱᱜᱷᱟᱴ ᱨᱮᱭᱟᱜ ᱪᱟᱥ ᱛᱮᱜᱮ ᱠᱚ ᱡᱚᱢ ᱟᱹᱥᱩᱞᱚᱜ ᱠᱟᱱᱟ ᱢᱮᱱ ᱞᱮᱠᱷᱟᱱ ᱵᱟᱭ ᱵᱟᱹᱲᱤᱡᱚᱜᱼᱟ᱾ ᱮᱴᱟᱜ ᱦᱚᱲᱟᱜ ᱚᱠᱛᱟ ᱪᱤᱱᱛᱟᱹ ᱦᱤᱸᱥᱟᱹ ᱥᱩᱭᱟᱹ ᱜᱮ ᱟᱹᱛᱳ ᱨᱮ ᱵᱟᱹᱱᱩᱜᱼᱟ᱾ ᱪᱟᱥ ᱠᱟᱹᱢᱤ ᱨᱮᱜᱮ ᱠᱚ ᱞᱟᱵᱟᱫᱷᱤᱭᱟᱹ ᱠᱚᱜᱼᱟ᱾ ᱵᱟᱦᱟ ᱥᱚᱦᱨᱟᱭ ᱞᱮᱠᱟᱱ ᱯᱟᱨᱟᱵᱽ ᱯᱩᱱᱟᱹᱭ ᱠᱚᱨᱮ ᱨᱟᱹᱥᱠᱟᱹ ᱨᱮᱠᱚ ᱧᱮᱯᱮᱞ ᱧᱟᱯᱟᱢᱟ᱾ ᱢᱮᱱᱠᱷᱟᱱ ᱫᱤᱱᱟᱹᱢ ᱟᱹᱭᱩᱵ ᱜᱮ ᱱᱟᱭᱠᱮ ᱨᱟᱪᱟ ᱫᱷᱚᱨᱚᱢ ᱚᱲᱟᱜ ᱨᱮ ᱵᱚᱸᱜᱟ ᱥᱟᱢᱟᱱᱚᱢ ᱥᱟᱯᱟᱵ ᱚᱞ ᱜᱩᱨᱩ ᱫᱷᱚᱨᱚᱢ, ᱜᱩᱨᱩ ᱠᱷᱮᱨᱣᱟᱲ ᱜᱩᱨᱩ ᱠᱚᱣᱟᱜ ᱫᱷᱚᱨᱚᱢ ᱪᱤᱛᱟᱹᱨ ᱥᱟᱢᱟᱝ ᱨᱮ ᱫᱷᱨᱚᱢ ᱨᱮᱭᱟᱜ ᱱᱮᱦᱚᱨ ᱟᱠᱷᱲᱟ ᱨᱮ ᱡᱚᱛᱚ ᱵᱟᱥᱟ ᱨᱮᱱ ᱦᱚᱲ ᱟᱨ ᱚᱲᱟᱜ ᱜᱤᱫᱟᱹᱨ ᱠᱚ ᱥᱮᱴᱮᱨᱚᱜ ᱫᱚ ᱵᱟᱝᱠᱚ ᱦᱤᱲᱤᱧᱟ ᱚᱠᱚᱭ ᱦᱚᱸ᱾ ᱵᱟᱱᱜᱷᱟᱴ ᱦᱚᱲᱟᱜ ᱫᱚ ᱫᱷᱚᱨᱚᱢ ᱪᱮᱛᱟᱱ ᱨᱮ ᱜᱟᱹᱦᱤᱨ ᱯᱟᱹᱛᱭᱟᱹᱣ ᱛᱟᱠᱚ ᱢᱮᱱᱟᱜᱼᱟ᱾ ᱡᱟᱦᱮᱨ ᱜᱟᱲ ᱨᱮ ᱫᱟᱜ ᱠᱚ ᱥᱟᱵ ᱞᱮᱠᱷᱟᱱ ᱜᱮ ᱵᱤᱨ ᱫᱤᱥᱚᱢ ᱨᱟᱹᱥᱤ ᱟᱹᱛᱳ ᱨᱮᱦᱚᱸ ᱦᱟᱹᱛᱤ ᱵᱟᱱᱟ ᱵᱤᱨ ᱥᱩᱠᱨᱤ ᱞᱮᱠᱟᱱ ᱵᱟᱹᱲᱤᱡ ᱡᱟᱱᱟᱣᱨ ᱠᱚ ᱜᱚᱨᱟᱢ ᱨᱮᱭᱟᱜ ᱠᱤᱨᱥᱤ ᱡᱚᱢ ᱩᱡᱟᱹᱲ ᱦᱚᱸ ᱵᱟᱝᱠᱚ ᱵᱚᱞᱚᱱᱟ᱾ ᱨᱚᱜᱽ ᱟᱡᱟᱨ ᱠᱚᱨᱮ ᱰᱟᱠᱛᱟᱨ ᱵᱚᱭᱫᱚ ᱠᱚᱣᱟᱜ ᱨᱟᱱ ᱢᱩᱨᱜᱟᱹᱱ ᱠᱚ ᱵᱟᱝ ᱪᱷᱩᱣᱟᱹᱣ ᱞᱮᱱᱠᱷᱟᱱ ᱚᱲᱟᱜ ᱵᱚᱸᱜᱟ, ᱜᱚᱲᱟ ᱵᱚᱸᱜᱟ, ᱴᱟᱺᱰᱤ ᱵᱚᱸᱜᱟ ᱠᱚᱨᱮ ᱫᱟᱜ ᱥᱟᱵ ᱠᱟᱛᱮ ᱠᱚ ᱜᱚᱰ ᱡᱚᱦᱟᱨ ᱞᱮᱠᱷᱟᱱ ᱦᱟᱦᱟᱲᱟ ᱜᱮᱠᱚ ᱵᱩᱜᱤ ᱜᱚᱫᱚᱜᱼᱟ᱾ ᱱᱚᱝᱠᱟ ᱨᱮ ᱪᱤᱠᱟᱹᱛᱮ ᱫᱷᱚᱨᱚᱢ ᱫᱚᱠᱚ ᱦᱤᱲᱤᱧᱟ᱾
ᱟᱹᱛᱳ ᱨᱮ ᱡᱚᱛᱚ ᱠᱷᱚᱱ ᱠᱟᱹᱭ ᱢᱚᱱᱮ ᱦᱚᱲ ᱫᱚ ᱨᱟᱫᱷᱮ ᱦᱟᱲᱟᱢ᱾ ᱥᱟᱶᱛᱟ ᱨᱮᱭᱟᱜ ᱩᱞᱴᱟᱹ ᱜᱮ ᱟᱡᱟᱜ ᱩᱭᱦᱟᱹᱨ᱾ ᱟᱯᱱᱟᱨᱟᱜ ᱜᱮ ᱩᱭᱦᱟᱹᱨᱟᱭ᱾ ᱢᱟᱹᱡᱷᱤ ᱢᱚᱬᱮ ᱠᱚ ᱜᱚᱨᱟᱢ ᱨᱮᱭᱟᱜ ᱱᱤᱨᱟᱹᱭ ᱠᱟᱛᱷᱟ ᱠᱚ ᱢᱮᱱ ᱨᱮᱦᱚᱸ ᱛᱟᱭᱚᱢ ᱠᱚᱨᱮ ᱨᱚᱲ ᱵᱟᱲᱟᱭᱟᱭ ᱦᱚᱲ ᱠᱷᱚᱱᱮᱢ ᱢᱟᱲᱟᱝᱚᱜ ᱠᱷᱟᱱ ᱴᱷᱮᱞᱟᱣ ᱥᱟᱦᱟ ᱠᱟᱛᱮ ᱞᱮᱵᱮᱫ ᱪᱟᱜᱟᱲ ᱠᱟᱛᱮ ᱮᱱᱟᱝ ᱢᱟᱜᱬᱟᱝᱟ᱾ ᱮᱴᱟᱜ ᱦᱚᱲᱟᱜ ᱛᱟᱨᱮᱱ ᱨᱮ ᱵᱟᱢ ᱞᱮᱵᱮᱫ ᱞᱮᱱᱠᱷᱟᱱ ᱮᱴᱟᱜ ᱦᱚᱲ ᱠᱷᱚᱱ ᱪᱤᱠᱟᱹᱢ ᱪᱮᱛᱟᱱᱚᱜᱼᱟ᱾
ᱨᱟᱫᱷᱮ ᱦᱟᱲᱟᱢ ᱛᱮᱦᱮᱧ ᱟᱹᱰᱤ ᱨᱟᱹᱥᱠᱟᱹ ᱨᱮ᱾ ᱪᱮᱫᱟᱜ ᱥᱮ ᱵᱟᱱᱜᱷᱟᱴ ᱟᱹᱛᱳ ᱫᱚ ᱟᱨ ᱟᱹᱛᱳ ᱞᱮᱠᱟ ᱵᱟᱹᱱᱩᱜ ᱟᱱᱟᱝ, ᱵᱚᱫᱚᱞ ᱪᱟᱵᱟ ᱟᱠᱟᱱᱟ ᱦᱚᱲ ᱠᱚᱣᱟᱜ ᱩᱭᱦᱟᱹᱨ᱾ ᱵᱚᱫᱚᱞ ᱵᱟᱹᱲᱤᱡ ᱟᱠᱟᱱᱟ ᱟᱹᱛᱳ ᱨᱮᱭᱟᱜ ᱱᱤᱨᱟᱹᱭ ᱢᱟᱹᱡᱷᱤ ᱠᱚᱣᱟᱜ ᱨᱟᱭᱨᱤᱛ, ᱟᱨ ᱵᱟᱝ ᱪᱟᱹᱞᱩᱜ ᱠᱟᱱᱟ᱾ ᱢᱟᱬᱟᱝ ᱞᱮᱠᱟ ᱪᱟᱥᱵᱟᱥ ᱦᱚᱸ ᱵᱟᱝ ᱦᱩᱭᱩᱜ ᱠᱟᱱᱟ᱾ ᱡᱟᱦᱟᱱᱟᱜ ᱫᱚ ᱪᱟᱹᱞᱩᱭᱮᱱ ᱟᱨ ᱵᱟᱝ ᱪᱟᱹᱞᱩᱭᱮᱱ ᱢᱮᱱ ᱫᱚ ᱨᱟᱫᱷᱟᱮ ᱦᱟᱲᱟᱢᱟᱜ ᱯᱟᱹᱨᱣᱟᱹ ᱵᱷᱟᱹᱴᱤ ᱛᱮᱫ ᱫᱚ ᱵᱷᱟᱹᱜᱤ ᱜᱮ ᱪᱟᱹᱞᱩᱣᱟᱠᱟᱱᱟ᱾
ᱱᱮᱛᱟᱨ ᱢᱟ ᱡᱚᱛᱚ ᱦᱚᱲ ᱜᱮ ᱨᱟᱫᱷᱮ ᱦᱟᱲᱟᱢ ᱨᱮᱱ ᱜᱚᱦᱨᱟᱠ ᱠᱚ ᱯᱟᱞᱴᱟᱣ ᱟᱠᱟᱱᱟ᱾ ᱦᱟᱺᱰᱤ ᱫᱚ ᱞᱟᱸᱜᱟ ᱯᱷᱟᱨᱪᱟᱣ ᱨᱟᱱ ᱞᱟᱹᱜᱤᱫ ᱴᱚᱞᱟ ᱨᱮ ᱵᱟᱝᱠᱚ ᱦᱟᱺᱰᱤ ᱵᱟᱲᱟᱭᱟ᱾ ᱨᱟᱫᱷᱮ ᱦᱟᱲᱟᱢ ᱚᱲᱟᱜ ᱨᱮ ᱥᱮᱛᱟᱜ ᱠᱷᱚᱱ ᱥᱤᱸᱜᱟᱹᱲ ᱫᱷᱟᱹᱵᱤᱡ ᱫᱮᱥᱤ ᱵᱤᱫᱮᱥᱤ ᱯᱟᱹᱨᱣᱟᱹ ᱨᱮᱭᱟᱜ ᱴᱷᱟᱱᱰᱟ ᱥᱟᱞ ᱮ ᱛᱷᱟᱯᱱᱟ ᱟᱠᱟᱫᱟ᱾ ᱟᱡᱟᱜ ᱢᱟ ᱱᱟᱯᱟᱭᱚᱜ ᱠᱟᱱ ᱜᱮ ᱡᱚᱛᱚ ᱠᱚ ᱢᱟᱛᱟᱞᱮᱱᱟ ᱟᱯᱟᱛ ᱛᱟᱭᱚᱢ ᱦᱚᱯᱚᱱᱮ ᱜᱚᱨᱟᱠᱷᱤᱭᱮᱱᱟ ᱱᱟᱶᱟ ᱡᱩᱣᱟᱹᱱ ᱟᱛᱨᱟ ᱚᱞᱚᱜ ᱠᱚᱲᱟ ᱦᱟᱜ ᱩᱛᱯᱟᱛ ᱵᱟᱹᱲᱛᱤ ᱤᱫᱤᱜ ᱠᱟᱱᱟ᱾ ᱚᱱᱟᱛᱮᱜᱮ ᱛᱚ ᱟᱹᱛᱳ ᱨᱮᱭᱟᱜ ᱵᱟᱹᱲᱤᱡ ᱚᱨᱥᱚᱝ ᱠᱷᱚᱱ ᱥᱟᱦᱟ ᱨᱮ ᱫᱚᱦᱚ ᱠᱟᱛᱮ ᱦᱚᱯᱚᱱ ᱛᱟᱭ ᱢᱟ ᱡᱷᱟᱹᱞ ᱫᱤᱥᱚᱢ ᱵᱟᱡᱟᱨ ᱨᱮᱭ ᱚᱞ ᱯᱟᱲᱦᱟᱣᱮᱠᱟᱱᱟ᱾ ᱢᱤᱫ ᱫᱤᱱ ᱦᱤᱞᱚᱜ ᱦᱚᱯᱚᱱᱤᱧ ᱦᱚᱸ ᱟᱹᱛᱳ ᱦᱚᱲ ᱪᱩᱯᱩᱫ ᱫᱟᱲᱮᱭᱟᱠᱚᱢᱟᱭ ᱢᱮᱱᱛᱮ ᱨᱟᱫᱷᱮ ᱦᱟᱲᱟᱢᱟᱜ ᱩᱭᱦᱟᱹᱨ ᱫᱚ᱾ ᱮᱴᱟᱜ ᱚᱲᱟᱜ ᱞᱟᱺᱫᱩᱲ ᱠᱟᱛᱮ ᱟᱡᱟᱜ ᱚᱲᱟᱜᱼᱮ ᱯᱟᱠᱟ ᱠᱮᱫᱟ᱾ ᱵᱷᱟᱹᱵᱤ ᱞᱮᱫᱟᱭ ᱯᱟᱹᱨᱣᱟᱹ ᱨᱮᱭᱟᱜ ᱥᱟᱦᱟᱨ ᱛᱮ ᱟᱹᱛᱳ ᱦᱚᱲᱮ ᱜᱩᱞᱟᱹᱢ ᱠᱚᱣᱟ᱾ ᱢᱮᱱᱠᱷᱟᱱ ᱯᱟᱹᱨᱣᱟᱹ ᱨᱩᱯᱟᱱ ᱨᱟᱠᱚᱥ ᱢᱟ ᱫᱷᱟᱹᱨᱛᱤ ᱜᱚᱴᱟᱨᱮᱱ ᱦᱚᱲᱮ ᱜᱩᱞᱟᱹᱢ ᱥᱟᱹᱛ ᱟᱠᱟᱫ ᱠᱚᱣᱟ᱾ ᱜᱟᱹᱦᱤᱨ ᱵᱟᱢ ᱩᱭᱦᱟᱹᱨ ᱞᱮᱠᱷᱟᱱ ᱛᱤᱱ ᱠᱚᱨᱮᱪᱚ ᱡᱚᱸᱠ ᱞᱮᱠᱟᱭ ᱞᱟᱴᱷᱟ ᱠᱚᱜᱼᱟ ᱟᱯᱱᱟᱨᱟᱜ ᱡᱤᱣᱤ ᱥᱟᱣ, ᱡᱟᱦᱟᱸ ᱛᱤᱱᱟᱹᱜᱼᱮᱢ ᱥᱤᱠᱷᱤᱛ ᱠᱚᱜ ᱨᱮᱦᱚᱸ ᱚᱦᱚᱢ ᱥᱟᱦᱟ ᱠᱮᱭᱟ᱾
ᱯᱟᱯ ᱫᱷᱚᱱ ᱥᱩᱭᱟᱹ ᱢᱚᱱ ᱨᱟᱫᱷᱮ ᱦᱚᱯᱚᱱ ᱦᱚᱸ ᱛᱤᱥ ᱨᱮᱪᱚ ᱢᱟᱹᱭᱡᱩ ᱛᱟᱭᱚᱢ ᱨᱮ ᱡᱚᱯᱚᱨ ᱡᱚᱞᱮᱜ ᱠᱟᱱᱟᱭ᱾ ᱤᱱᱟᱹ ᱥᱩᱢᱩᱝ ᱫᱚ ᱵᱟᱝ ᱵᱟᱡᱟᱨ ᱢᱟᱹᱭᱞᱟᱹ ᱡᱚᱛᱚ ᱟᱡᱟᱜ ᱦᱚᱲᱢᱚ ᱡᱤᱣᱤ ᱨᱮ ᱛᱤᱥ ᱨᱮᱪᱚ ᱧᱚᱞᱷᱟᱫ ᱟᱠᱟᱱᱟ ᱜᱚᱨᱚᱵᱽ ᱫᱷᱚᱢᱚᱠ ᱛᱮ ᱵᱮᱸᱡᱟᱜ ᱛᱷᱚᱯᱮ ᱟᱠᱟᱱ ᱢᱮᱫ ᱛᱮᱫᱚ ᱟᱯᱱᱟᱨᱟᱜ ᱜᱟᱹᱞᱛᱤ ᱫᱚ ᱚᱦᱚᱜᱮ ᱧᱮᱞᱧᱟᱢᱚᱜᱼᱟ᱾ ᱦᱚᱥᱴᱮᱞ ᱨᱮ ᱵᱟᱥᱟᱜ, ᱵᱤᱭᱟᱨ ᱵᱟᱨ ᱵᱚᱞᱚᱱ, ᱢᱟᱹᱭᱡᱩ ᱞᱟᱫᱮ ᱠᱟᱛᱮ ᱢᱚᱴᱚᱨ ᱥᱟᱭᱠᱮᱞ ᱛᱮ ᱫᱟᱬᱟᱱ ᱢᱟ ᱫᱤᱱᱟᱹᱢ ᱠᱟᱹᱢᱤᱛᱟᱭ ᱯᱟᱞᱮ ᱚᱠᱚᱭ ᱧᱮᱞᱮ ᱠᱟᱱᱟ᱾ ᱰᱩᱞᱟᱹᱲ ᱛᱮ ᱟᱸᱫᱷᱟ ᱞᱮᱱᱠᱷᱟᱱ ᱡᱟᱹᱛᱤ ᱫᱷᱚᱨᱚᱢ ᱥᱟᱶᱛᱟ ᱥᱚᱢᱟᱡᱽ ᱨᱮᱸᱜᱮᱡ ᱠᱤᱥᱟᱹᱬ ᱫᱚ ᱪᱮᱫ ᱢᱤᱢᱤᱫᱫᱷᱟᱣ ᱫᱚ ᱯᱟᱹᱨᱤᱥ ᱟᱨ ᱥᱟᱹᱜᱟᱹᱭ ᱦᱚᱸ ᱵᱟᱝ ᱴᱷᱤᱠᱟᱹᱜᱼᱟ᱾ ᱚᱱᱟᱛᱮ ᱞᱩᱥᱩᱯᱩᱸᱰᱩ ᱵᱮᱸᱜᱮᱫ ᱠᱟᱛᱮ ᱰᱩᱞᱟᱹᱲ ᱛᱮ ᱦᱩᱭᱩᱜᱼᱟ᱾
ᱛᱤᱱᱟᱹᱜ ᱵᱚᱪᱷᱚᱨ ᱛᱟᱭᱚᱢ ᱪᱚᱝ ᱢᱤᱫᱫᱤᱱ ᱦᱤᱞᱚᱜ ᱨᱟᱫᱷᱮ ᱦᱟᱲᱟᱢ ᱚᱲᱟᱜ ᱨᱮ ᱨᱤᱛᱟᱹ ᱨᱤᱛᱤ ᱵᱷᱩᱞ ᱵᱷᱩᱛᱟᱹᱲ ᱦᱟᱲᱟᱢ ᱵᱩᱰᱷᱤ ᱥᱟᱱᱟᱢ ᱟᱹᱛᱳ ᱚᱲᱟᱜ ᱡᱟᱠ ᱦᱚᱲ ᱠᱚ ᱡᱟᱣᱨᱟ ᱟᱠᱟᱱᱟ᱾ ᱡᱟᱣ ᱫᱚ ᱚᱲᱟᱜ ᱨᱮ ᱵᱷᱤᱲ ᱵᱷᱟᱲ ᱞᱟᱜᱟᱣ ᱞᱮᱱᱠᱷᱟᱱ ᱟᱹᱰᱤ ᱛᱮᱫ ᱮ ᱨᱟᱹᱥᱠᱟᱹᱜᱼᱟ, ᱛᱮᱦᱮᱧ ᱫᱚ ᱛᱟᱞᱟ ᱨᱟᱪᱟ ᱨᱮ ᱯᱟᱨᱠᱚᱢ ᱪᱮᱛᱟᱱᱨᱮ ᱵᱟᱨ ᱛᱤᱛᱮ ᱵᱟᱨᱭᱟ ᱡᱚᱦᱟ ᱨᱮ ᱪᱟᱹᱯᱩ ᱠᱟᱛᱮ ᱜᱚᱡ ᱵᱩᱱᱩᱢ ᱞᱮᱠᱟᱭ ᱜᱚᱥᱚ ᱟᱠᱟᱱᱟ᱾ ᱪᱮᱫᱟᱜ ᱥᱮ ᱥᱟᱫᱷᱮᱨ ᱦᱚᱯᱚᱱ ᱛᱟᱭ ᱟᱛᱨᱟ ᱚᱞᱚᱜ ᱡᱩᱣᱟᱹᱱ ᱠᱚᱲᱟ ᱦᱚᱸᱭ ᱵᱟᱛᱨᱟ ᱵᱩᱰᱟᱹ ᱟᱠᱟᱱᱟ᱾ ᱡᱟᱹᱛᱤ ᱫᱷᱚᱨᱚᱢ ᱥᱟᱶᱛᱟᱨᱤ ᱥᱤᱢᱟᱹ ᱰᱚᱱ ᱯᱟᱨᱚᱢ ᱠᱟᱛᱮ ᱢᱤᱫᱴᱟᱝ ᱯᱮᱬᱮ ᱮᱨᱟ ᱠᱳᱨᱴ ᱨᱮ ᱵᱟᱯᱞᱟ ᱠᱟᱛᱮ ᱚᱲᱟᱜ ᱨᱮᱠᱤᱱ ᱥᱮᱴᱮᱨ ᱟᱠᱟᱱᱟ᱾ ᱨᱟᱫᱷᱮ ᱦᱟᱲᱟᱢᱟᱜ ᱤᱫᱤ ᱠᱟᱛᱮ ᱡᱟᱦᱟᱸᱭ ᱡᱟᱦᱟᱱᱟᱜ ᱠᱚ ᱨᱚᱲ ᱮᱫᱟ ᱦᱟᱹᱯᱤᱭᱟᱠᱟᱱᱟᱭ ᱨᱚᱲ ᱨᱟᱲᱟᱭ ᱨᱮᱭᱟᱜ ᱩᱭᱦᱟᱹᱨ ᱜᱮ ᱵᱟᱹᱱᱩᱜ ᱛᱟᱭᱟ᱾ ᱟᱡ ᱠᱷᱟᱹᱛᱤᱨ ᱛᱤᱱᱟᱹᱜ ᱦᱚᱲᱠᱚ ᱨᱟᱺᱰᱤ ᱴᱩᱣᱟᱹᱨ ᱟᱠᱟᱱᱟ ᱛᱤᱱᱟᱹᱜ ᱦᱚᱲ ᱚᱛ ᱦᱟᱥᱟ ᱵᱟᱸᱫᱟᱷᱟ ᱠᱟᱛᱮ ᱢᱮᱱᱟᱜ ᱠᱚᱣᱟ, ᱯᱟᱹᱨᱣᱟᱹ ᱵᱮᱯᱟᱨ ᱵᱟᱲᱦᱟᱣ ᱟᱠᱟᱱᱟ, ᱢᱟᱹᱡᱷᱤ ᱵᱟᱵᱟ ᱫᱚᱭ ᱢᱮᱛᱟᱠᱚ ᱠᱟᱱᱟ ᱡᱚᱛᱚ ᱵᱟᱹᱲᱤᱡ ᱨᱮᱭᱟᱜ ᱵᱩᱴᱟᱹ ᱨᱮᱦᱮᱫ ᱫᱚ ᱦᱟᱺᱰᱤ ᱟᱨ ᱯᱟᱹᱨᱣᱟᱹ ᱜᱮ ᱠᱟᱱᱟ᱾ ᱨᱟᱫᱷᱮ ᱦᱟᱲᱟᱢᱟᱜ ᱵᱚᱦᱚᱜ ᱛᱮᱦᱮᱧ ᱛᱤᱨᱩᱵ ᱟᱠᱟᱱᱟ, ᱩᱭᱦᱟᱹᱨ ᱡᱚᱝ ᱠᱟᱱᱟᱭ ᱡᱚᱛᱚ ᱵᱟᱹᱲᱤᱡ ᱨᱮᱭᱟᱜ ᱮᱛᱚᱦᱚᱵ ᱫᱚ ᱵᱟᱹᱲᱤᱡ ᱨᱮᱜᱮ ᱢᱩᱪᱟᱹᱫᱚᱜᱼᱟ᱾ ᱟᱡᱟᱜ ᱥᱚᱝᱥᱟᱨ ᱠᱮᱴᱮᱡ ᱞᱟᱹᱜᱤᱫ ᱮᱴᱟᱜ ᱦᱚᱲᱟᱜ ᱥᱚᱝᱥᱟᱨ ᱞᱟᱺᱫᱩᱲᱚᱜ ᱞᱮᱠᱟᱭ ᱵᱩᱫᱷᱤ ᱞᱮᱫᱟ᱾ ᱡᱟᱣ ᱢᱟ ᱦᱚᱲ ᱜᱷᱩᱛᱟᱹᱣ ᱠᱚ ᱨᱮᱭᱟᱜ ᱴᱷᱟᱱᱰᱟ ᱥᱟᱞᱮ ᱠᱷᱩᱞᱟᱹ ᱞᱮᱫᱟ᱾ ᱛᱮᱦᱮᱧᱟᱜ ᱴᱷᱟᱱᱰᱟ ᱥᱟᱞ ᱫᱚ ᱡᱚᱢ ᱩᱡᱟᱹᱲ ᱦᱚᱪᱚ ᱞᱟᱹᱜᱤᱫ ᱞᱮᱠᱟ ᱜᱮ ᱠᱷᱩᱞᱟᱹ ᱟᱠᱟᱱᱟ᱾ ᱛᱮᱦᱮᱧ ᱫᱚ ᱢᱟᱹᱡᱷᱤ ᱢᱚᱬᱮ ᱠᱚ ᱵᱮᱨᱮᱫ ᱵᱟᱠᱷᱨᱟ ᱡᱚᱢᱧᱩ ᱟᱨ ᱢᱤᱫ ᱞᱟᱠ ᱴᱟᱠᱟ ᱠᱚ ᱫᱟᱨᱮ ᱟᱠᱟᱣᱟᱫᱮᱭᱟ᱾ ᱟᱨ ᱵᱟᱝᱠᱷᱟᱱ ᱡᱚᱛᱚ ᱫᱤᱱ ᱞᱟᱹᱜᱤᱫ ᱠᱷᱮᱨᱣᱟᱲ ᱥᱟᱶᱛᱟ ᱠᱷᱚᱱ ᱵᱟᱨᱚᱱ ᱨᱮᱭ ᱛᱟᱦᱮᱱᱟ᱾ ᱵᱟᱝ ᱧᱩ ᱠᱚᱦᱚᱸ ᱛᱮᱦᱮᱧ ᱫᱚ ᱨᱟᱹᱜᱤ ᱧᱚᱜ ᱨᱟᱹᱥᱠᱟᱹ ᱧᱚᱜ ᱦᱚᱲ ᱵᱩᱡᱷᱟᱹᱣᱫ ᱛᱮ ᱵᱟᱹᱴᱤ ᱵᱟᱹᱴᱤ ᱠᱚ ᱧᱩ ᱩᱡᱟᱹᱲ ᱠᱟᱜ ᱠᱟᱱ ᱛᱟᱭᱟ᱾ ᱦᱚᱲ ᱜᱷᱩᱛᱟᱹᱣ ᱠᱟᱛᱮ ᱡᱟᱦᱟᱸᱭ ᱦᱚᱲ ᱵᱷᱟᱹᱴᱤ ᱠᱷᱚᱱ ᱢᱟᱬᱜᱷᱟᱹᱴᱤ ᱨᱮᱭᱟᱜ ᱦᱚᱨ ᱰᱟᱦᱟᱨᱮ ᱩᱫᱩᱜ ᱟᱠᱚ ᱠᱟᱱ ᱛᱟᱦᱮᱸ ᱩᱱᱤ ᱦᱚᱲ ᱜᱮ ᱛᱮᱦᱮᱧ ᱫᱚ ᱥᱟᱶᱛᱟ ᱞᱟᱹᱜᱤᱫ ᱛᱮᱫᱚ ᱵᱟᱧᱪᱟᱣ ᱟᱠᱟᱱ ᱜᱚᱡ ᱦᱚᱲᱮ ᱯᱟᱞᱴᱟᱣ ᱟᱠᱟᱱᱟ᱾ ᱛᱮᱦᱮᱧ ᱫᱚ ᱠᱷᱮᱨᱣᱟᱲ ᱥᱟᱶᱛᱟ ᱠᱷᱚᱱᱮ ᱵᱷᱮᱜᱟᱨᱚᱜᱼᱟ ᱟᱨ ᱵᱟᱝᱠᱷᱟᱱ ᱥᱟᱶᱛᱟ ᱨᱮ ᱢᱮᱥᱟ ᱠᱟᱛᱮ ᱦᱚᱯᱚᱱ ᱠᱤᱢᱤᱱ ᱠᱷᱚᱱᱮ ᱵᱷᱮᱜᱟᱨᱚᱜᱼᱟ᱾ ᱢᱟᱹᱱᱢᱤ ᱡᱤᱣᱤ ᱨᱮᱭᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱫᱟᱲᱮ, ᱩᱭᱦᱟᱹᱨ ᱫᱟᱲᱮ ᱦᱚᱸᱛᱟᱭ ᱵᱟᱭ ᱠᱟᱹᱢᱤᱭᱮᱫᱟ᱾ ᱛᱤᱱᱟᱹᱝ ᱜᱟᱱ ᱦᱚᱲ ᱫᱚᱠᱚ ᱯᱷᱟᱥᱟᱨ ᱯᱷᱩᱥᱩᱨ ᱵᱟᱲᱟᱜ ᱠᱟᱱᱟ, ᱱᱩᱭ ᱨᱟᱫᱷᱮ ᱦᱟᱲᱟᱢᱟᱜ ᱵᱷᱟᱹᱴᱤ ᱠᱷᱚᱱ ᱜᱮ ᱡᱚᱛᱚᱦᱚᱲ ᱢᱟᱬᱜᱷᱟᱹᱴᱤ ᱟᱹᱭᱩᱨᱮᱫ ᱵᱚᱱ ᱛᱟᱦᱮᱸ ᱠᱟᱱᱟ᱾ ᱛᱮᱦᱮᱧ ᱫᱚ ᱟᱡᱟᱜ ᱯᱟᱹᱨᱤ, ᱱᱩᱭ ᱫᱚ ᱱᱷᱟᱜ ᱞᱟᱡᱟᱣ ᱚᱯᱚᱢᱟᱱ ᱛᱮ ᱯᱟᱹᱥᱤ ᱜᱩᱡᱩᱜ ᱜᱮᱭᱟᱭ᱾ ᱵᱷᱟᱹᱴᱤ ᱠᱷᱚᱱ ᱢᱟᱬᱜᱷᱟᱹᱴᱤ ᱫᱚ ᱛᱤᱱᱟᱹᱜ ᱥᱟᱺᱜᱤᱧᱟ ᱤᱱ ᱦᱤᱞᱚᱜᱼᱮ ᱴᱷᱤᱠᱟᱹᱭᱟ᱾
Written by ᱡᱚᱜᱮᱱᱫᱨᱚ ᱢᱟᱨᱱᱰᱤ
Published on ᱯᱟᱸᱡᱟ (Jan – Mar 2016)
ᱢᱚᱱᱮ ᱨᱮᱭᱟᱜ ᱠᱟᱛᱷᱟ ᱯᱷᱚᱴᱮᱞ ᱥᱚᱫᱚᱨ ᱢᱮ !