ᱡᱟᱱᱟᱢ ᱯᱟᱹᱨᱥᱤ ᱛᱮ ᱥᱮᱪᱮᱫ

ᱵᱟᱨᱭᱟ ᱜᱟᱛᱮ ᱠᱩᱲᱤ ᱠᱤᱱ ᱛᱟᱦᱮᱸ ᱠᱟᱱᱟ ᱪᱟᱢᱯᱟ ᱟᱱ ᱫᱩᱞᱟᱹᱨᱤ᱾ ᱪᱟᱢᱯᱟ ᱛᱮᱠᱚ ᱫᱚ ᱟᱹᱰᱤ ᱨᱮᱸᱜᱮᱡ ᱜᱮᱠᱚ ᱛᱟᱦᱮᱸ ᱠᱟᱱᱟ ᱟᱨ ᱫᱩᱞᱟᱹᱨᱤ ᱛᱮᱠᱚ ᱫᱚ ᱟᱹᱰᱤ ᱠᱤᱥᱟᱹ᱾ ᱟᱨ ᱟᱡ ᱵᱟᱵᱟᱭ ᱪᱟᱹᱠᱨᱤ ᱠᱤᱱ ᱛᱟᱦᱮᱸ ᱠᱟᱱᱟ᱾ ᱜᱤᱫᱽᱨᱟᱹ ᱨᱮᱫᱚ ᱪᱟᱢᱯᱟ ᱟᱨ ᱫᱩᱞᱟᱹᱨᱤ ᱟᱹᱰᱤ ᱜᱮᱠᱤᱱ ᱜᱟᱛᱮ ᱛᱟᱦᱮᱸᱼᱟ᱾ ᱟᱫᱚ ᱪᱟᱢᱯᱟ ᱫᱚ ᱟᱹᱛᱩ ᱤᱥᱠᱩᱞ ᱨᱮ ᱯᱟᱲᱦᱟᱣ ᱼ ᱯᱟᱲᱦᱟᱣ ᱛᱮᱜᱮ ᱠᱚᱞᱮᱡᱽ ᱦᱟᱹᱵᱤᱡ ᱮ ᱯᱟᱲᱦᱟᱣ ᱥᱮᱴᱮᱨ ᱮᱱᱟ, ᱟᱹᱰᱤ ᱦᱟᱨᱠᱮᱛ ᱥᱟᱥᱮᱛ ᱛᱟᱞᱟ ᱛᱮ ᱟᱨ ᱚᱱᱟ ᱥᱟᱶᱛᱮ ᱡᱟᱱᱟᱢ ᱯᱟᱹᱨᱥᱤ ᱚᱞ ᱪᱤᱠᱤ ᱦᱚᱸ ᱟᱹᱰᱤ ᱜᱚᱨᱚᱡᱽ ᱢᱚᱱᱮ ᱛᱮ ᱥᱮᱬᱟ ᱠᱮᱫᱟᱭ᱾

ᱢᱮᱱᱠᱷᱟᱱ ᱫᱩᱞᱟᱹᱨᱤ ᱫᱚ ᱜᱤᱫᱽᱨᱟᱹ ᱨᱮᱜᱮ ᱟᱹᱛᱩ ᱫᱚᱥᱚᱢ ᱠᱷᱚᱱ ᱥᱚᱦᱚᱨ ᱛᱮ ᱦᱮᱡ ᱮᱱᱟᱭ ᱟᱨ ᱚᱸᱰᱮ ᱜᱮ ᱚᱞ ᱯᱟᱲᱦᱟᱣ ᱮᱱᱟᱭ ᱟᱨ ᱟᱵᱚᱣᱟᱜ ᱟᱲᱟᱝ ᱫᱚ ᱵᱟᱹᱭ ᱼ ᱵᱟᱹᱭ ᱛᱮ ᱦᱤᱲᱤᱧ ᱤᱫᱤ ᱠᱮᱫᱼᱟ᱾ ᱟᱫᱚ ᱢᱤᱫ ᱫᱤᱱ ᱫᱚ ᱚᱲᱟᱜ ᱛᱮᱠᱚ ᱦᱮᱡ ᱟᱠᱟᱱᱟ, ᱟᱫᱚ ᱚᱱᱟ ᱦᱤᱡᱩᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱪᱟᱢᱯᱟ ᱫᱚ ᱫᱩᱞᱟᱹᱨᱤ ᱛᱮᱠᱚ ᱚᱲᱟᱜ ᱮ ᱦᱮᱡ ᱮᱱᱟ ᱟᱨ ᱢᱟᱲᱟᱝ ᱡᱟᱦᱟᱸ ᱞᱮᱠᱟ ᱠᱤᱱ ᱠᱟᱛᱷᱟᱜ ᱛᱟᱸᱦᱮᱱ ᱚᱛᱠᱟ ᱜᱮ ᱵᱮᱡ ᱠᱟᱛᱮ ᱢᱮᱛᱟᱭ ᱠᱟᱱᱟ, ᱜᱟᱛᱮ ᱟᱵᱚ ᱚᱞ ᱼ ᱪᱤᱠᱤ ᱚᱞ ᱫᱚ ᱟᱹᱰᱤ ᱢᱚᱡᱽ ᱟᱹᱭᱠᱟᱹᱣᱜᱼᱟ ᱫᱮᱞᱟ ᱞᱟᱝ ᱯᱟᱲᱦᱟᱣᱜᱼᱟ᱾ ᱢᱮᱱᱠᱷᱟᱱ ᱫᱩᱞᱟᱹᱨᱤ ᱫᱚ ᱵᱟᱭ ᱜᱚᱨᱚᱡᱽ ᱞᱮᱱᱟ, ᱟᱨ ᱮ ᱢᱮᱱ ᱠᱮᱫᱟ ᱱᱚᱶᱟ ᱟᱢᱟᱜ ᱚᱞ ᱪᱤᱠᱤ ᱥᱮᱬᱟ ᱠᱟᱛᱮ ᱚᱠᱚᱭ ᱛᱤᱱᱟᱹᱜ ᱥᱮᱬᱟ ᱦᱚᱲ ᱠᱚ ᱵᱮᱱᱟᱣ ᱟᱠᱟᱱᱟ, ᱥᱮ ᱪᱮᱫ ᱠᱚ ᱧᱟᱢ ᱟᱠᱟᱫᱟ᱾ ᱛᱳᱣᱟ ᱥᱟᱱᱛᱟᱲ ᱨᱚᱲ ᱠᱚᱫᱚ ᱤᱧ ᱫᱚ ᱵᱟᱝ ᱥᱟᱹᱱᱟᱹᱧᱟ ᱟᱨ ᱨᱚᱲ ᱦᱚᱸ ᱞᱟᱡᱟᱣ ᱜᱮᱧ ᱵᱩᱡᱷᱟᱹᱣᱟ᱾ ᱮᱱᱠᱷᱟᱱ ᱪᱟᱢᱯᱟ ᱢᱮᱱ ᱠᱮᱫᱼᱟᱭ ᱜᱟᱛᱮ, ᱟᱠᱷᱤᱨ ᱚᱞ ᱪᱤᱠᱤ, ᱥᱟᱱᱛᱟᱲ ᱯᱟᱹᱨᱥᱤ ᱨᱚᱲ ᱫᱚ ᱟᱵᱚᱣᱟᱜ ᱡᱟᱱᱟᱢ ᱟᱭᱳ ᱟᱲᱟᱝ ᱠᱟᱱᱟ ᱟᱨ ᱡᱚᱠᱷᱚᱱ ᱟᱢ ᱱᱚᱶᱟ ᱫᱷᱩᱲᱤ ᱫᱷᱟᱹᱨᱛᱤᱢ ᱞᱮᱵᱮᱫ ᱠᱮᱫᱼᱟ, ᱫᱷᱟᱹᱨᱛᱤ ᱞᱮᱵᱮᱫ ᱛᱚᱨᱟ ᱜᱮ ᱟᱢ ᱫᱚ ᱟᱭᱳ ᱡᱟᱱᱟᱢ ᱟᱲᱟᱝ ᱛᱮ ᱪᱮᱨᱮᱡ ᱞᱮᱫ ᱢᱮ ᱛᱟᱸᱦᱮᱫ ᱪᱤᱠᱟᱹᱢ ᱦᱤᱲᱤᱧ ᱠᱮᱭᱟ, ᱟᱢᱟᱜ ᱡᱟᱱᱟᱢ ᱟᱭᱳ ᱟᱲᱟᱝ ᱟᱨ ᱱᱚᱶᱟ ᱚᱞ ᱪᱤᱠᱤ ᱫᱚ ᱟᱵᱚᱣᱟᱜ ᱡᱟᱱᱟᱢ ᱯᱟᱹᱨᱥᱤ ᱠᱟᱱᱟ᱾ ᱡᱩᱫᱤ ᱟᱵᱚ ᱱᱚᱶᱟ ᱚᱞ ᱪᱤᱠᱤ ᱵᱟᱵᱚ ᱪᱮᱢᱮᱫᱟ ᱮᱱᱠᱷᱟᱱ ᱟᱵᱚ ᱥᱟᱱᱛᱟᱲ ᱫᱚ ᱪᱷᱟᱹᱛᱤᱠ ᱠᱚ ᱞᱟᱸᱫᱟ ᱟᱵᱚᱱᱟ ᱟᱨ ᱢᱤᱫ ᱫᱤᱱ ᱦᱤᱞᱚᱜ ᱟᱵᱚᱣᱟᱜ ᱚᱞ ᱪᱤᱠᱤ ᱥᱟᱶᱛᱮ ᱟᱵᱚ ᱦᱚᱸ ᱠᱚ ᱞᱮᱵᱮᱫ ᱞᱟᱴᱚᱢ ᱤᱫᱤ ᱵᱚᱱᱟ᱾ ᱚᱱᱟ ᱛᱤᱧ ᱟᱢ ᱴᱷᱮᱱ ᱱᱮᱦᱚᱨᱚᱜ ᱠᱟᱱᱟ ᱜᱟᱛᱮ ᱚᱞ ᱪᱤᱠᱤ ᱥᱮᱬᱟᱭ ᱨᱮᱫᱚ ᱟᱞᱚ ᱵᱚᱱ ᱛᱟᱭᱚᱢᱚᱜᱼᱟ, ᱢᱮᱱ ᱫᱚ ᱵᱟᱨ ᱡᱟᱸᱜᱟ ᱢᱟᱲᱟᱝ ᱠᱟᱛᱮ ᱢᱟᱲᱟᱝ ᱥᱮᱫ ᱜᱮᱵᱚᱱ ᱪᱟᱞᱟᱜᱼᱟ ᱟᱨ ᱜᱟᱛᱮ ᱥᱟᱱᱛᱟᱲ ᱛᱮ ᱨᱚᱲ ᱫᱚ ᱟᱞᱚ ᱵᱚᱱ ᱞᱟᱡᱟᱜ ᱢᱟ, ᱱᱚᱶᱟ ᱫᱚ ᱟᱵᱚᱣᱟᱜ ᱟᱭᱳ ᱟᱲᱟᱝ ᱟᱨ ᱱᱚᱶᱟ ᱟᱭᱳ ᱟᱲᱟᱝ ᱜᱮ ᱢᱤᱫ ᱫᱤᱱ ᱦᱤᱞᱚᱜ ᱟᱵᱚ ᱞᱟᱦᱟ ᱥᱮᱫ ᱮ ᱟᱹᱭᱩᱨ ᱤᱫᱤ ᱵᱚᱱᱟ᱾

ᱥᱟᱹᱨᱤ ᱜᱮ ᱜᱟᱛᱮ ᱟᱢ ᱫᱚ ᱤᱧᱟᱜ ᱢᱮᱫ ᱮᱢ ᱵᱩᱥᱟᱹᱲ ᱠᱮᱫ ᱛᱤᱧᱟ ᱢᱟᱨᱥᱟᱞ ᱰᱟᱦᱟᱨ ᱮᱢ ᱩᱫᱩᱜ ᱟᱹᱫᱤᱧᱟ᱾ ᱟᱫᱚ ᱵᱟᱱᱟ ᱦᱚᱲ ᱫᱩᱲᱩᱵ ᱢᱤᱫ ᱯᱟᱱᱛᱮ ᱠᱟᱛᱮ ᱚᱞᱚᱜ ᱠᱤᱱ ᱪᱷᱩᱴᱟᱹᱣ ᱮᱱᱟ᱾ ᱟᱫᱚ ᱩᱱ ᱨᱮ ᱠᱤᱱ ᱢᱮᱱ ᱠᱮᱫᱼᱟ ᱫᱮᱞᱟ ᱵᱚᱱ ᱵᱚᱭᱦᱟ ᱱᱚᱶᱟ ᱚᱞ ᱪᱤᱠᱤ ᱚᱞ ᱛᱮ ᱥᱟᱱᱛᱟᱲ ᱯᱟᱹᱨᱥᱤ ᱵᱚᱱ ᱞᱟᱦᱟᱭᱟ ᱟᱨ ᱟᱵᱚᱣᱟᱜ ᱥᱟᱱᱛᱟᱲ ᱥᱟᱶᱛᱟ ᱵᱚᱱ ᱞᱟᱦᱟᱭᱟ, ᱡᱟᱹᱛᱤ, ᱫᱷᱚᱨᱚᱢ ᱵᱚᱱ ᱟᱨᱥᱟᱞᱟ ᱟᱜᱟᱢ ᱛᱟᱲᱟᱢ ᱰᱟᱦᱟᱨ ᱵᱚ ᱯᱟᱹᱨᱪᱟᱹᱭᱟ᱾

Written by ᱵᱤᱞᱟᱥᱤᱱᱤ ᱴᱩᱰᱩ
Published on Souvenir, 8th International Santal Conference – 2018